ရေစကြို၊ ဇွန် ၉၊ ၂၀၂၆။

မကွေးတိုင်း၊ ရေစကြိုမြို့၊ အမှတ် ၄ ရပ်ကွက်မှာ အုပ်ချုပ်ရေးမှူး သားအဖ ပစ်ခတ်ခံရပြီး သေဆုံးခဲ့တယ်လို့ ရေစကြိုမြို့နယ်ပကဖဆီက သိရပါတယ်။

ပစ်သတ်ခံရသူတွေဟာ အသက် ၅၀ အရွယ်အုပ်ချုပ်ရေးမှူး လွင်မျိုးအောင် (ခ) ငလွင် နဲ့ သားဖြစ်သူ အသက် ၂၀ ကျော်အရွယ် ပျူစောထီးရဲမာန်တို့ဖြစ်ပြီး ဇွန်လ ၈ ရက်ည ၁၀ နာရီကျော်မှာ ပစ်ခတ်ခဲ့တာလို့ ဆိုပါတယ်။

“သူ့အိမ်ကို ဝင်ပြီးဖမ်းတာ။ ဖမ်းတဲ့အချိန်မှာ အသာတကြည်အဖမ်းမခံဘဲ ထွက်ပြေးတာ။ အဲ့တော့ နေရာမှာတင် တခါတည်းရှင်းခဲ့လိုက်တာ။ သူတို့အိမ်က လမ်းဘေး။ ညသွားဖမ်းရတာဆိုတော့ သူတို့လည်းအလန့်တကြားထွက်ပြေးတာ။ ဒါပေမယ့်မလွတ်ပါဘူး။ လမ်းပေါ်မှာတင် ၁ ယောက် ၂ ချက်ပစ်ခဲ့တယ်”လို့ ရေစကြိုမြို့နယ်ပကဖ သတင်းတာဝန်ခံက ပြောပါတယ်။

ပစ်ခတ်ခံရလို့ အုပ်ချုပ်ရေးမှူးသားအဖမှာ နေရာတင်သေဆုံးပြီး သူတို့ဆီကနေ ဖုန်း ၂ လုံးကိုလည်း သိမ်းယူနိုင်ခဲ့တယ်လို့ ဆိုပါတယ်။

အုပ်ချုပ်ရေးမှူး လွင်မျိုးအောင် (ခ) ငလွင်ဟာ အမှတ် ၄ ရပ်ကွက်နဲ့ အမှတ် ၆ ရပ်ကွက်တွေအတွင်း စစ်ကော်မရှင်တွေအတွက် စစ်မှုထမ်းပေါ်တာဆွဲရာမှာပါဝင်တာ၊ ငွေကြေးတောင်းယူတာတွေ လုပ်တဲ့အပြင် သားဖြစ်သူမှာလည်း ပြည်သူစစ်သင်တန်းဆင်း လက်နက်ကိုင်ပျူစောထီး ၁ ဦးဖြစ်ပြီး ပြည်သူ့စစ်အဖွဲ့တွေနဲ့အတူ ဒေသခံတွေအပေါ် အုပ်စုဖွဲ့အနိုင်ကျင့်တာကြောင့် ပစ်ခတ်ခဲ့တာလို့ ဆိုပါတယ်။

ပစ်ခတ်မှုဖြစ်ပြီးနောက် စစ်ကော်မရှင်အဖွဲ့တွေက လာရောက်စစ်ဆေးပြီးအလောင်းတွေကို ကောက်ယူသွားတယ်လို့ ဆိုပါတယ်။

ဧပြီ ၃၀ ရက်ကလည်း ရေစကြိုမြို့နယ်၊ တောင်အိုကျေးရွာ ပခုက္ကူ-ရေစကြိုလမ်းပေါ်မှာ စစ်ကော်မရှင်အဖွဲ့တွေ ကြားဖြတ်တိုက်ခံရပြီး ၇ ဦးသေဆုံးကာ ပစ်ခတ်မှုအတွင်း ပြည်သူ ၁ ဦးလည်း သေဆုံးခဲ့တယ်လို့ သိရပါတယ်။

စာတည်း – လင်း

ဝက်လက်၊ ဇွန် ၈၊ ၂၀၂၆။

စစ်ကိုင်းတိုင်း၊ ဝက်လက်မြို့နယ်၊ ရှားကွဲရွာနဲ့ ရေကမိုးရွာကြားကနေအိမ်တွေကို စစ်ကော်မရှင်တပ်က မီးရှို့ခဲ့တယ်လို့ သစ်ဆိမ့်တိုက်နယ်တာဝန်ရှိသူတွေဆီက သိရပါတယ်။

ဇွန် ၈ ရက်မနက် ၈ နာရီခန့်မှာ ရှားကွဲရွာမှာတပ်စွဲထားတဲ့ စစ်ကော်မရှင်အင်အား ၇၀ ခန့်ဟာ စစ်ကြောင်းထိုးလာပြီးနောက် မီးရှို့ခဲ့တာလို့ဆိုပါတယ်။

“ရှားကွဲနဲ့ရေကမိုးကြား မန္တလေးတောင်နားက တောတိုက်နေအိမ်တွေကိုမီးရှို့တာ။ အိမ်တွေမှာတော့ လူမနေကြဘူး။ ပိုင်ရှင်တွေက စစ်ရှောင်နေကြတာကြာပြီ”လို့ သစ်ဆိမ့်တိုက်နယ်ပကဖတာဝန်ရှိသူက ပြောပါတယ်။

စစ်ကော်မရှင်အဖွဲ့တွေ မီးရှို့တာကြောင့် တောတိုက်ထဲကနေအိမ် ၁၀ လုံးထက်မနည်း မီးလောင်ပျက်စီးနိုင်ပြီး အသေးစိတ်ကိုတော့ မသိရသေးဘူးလို့ဆိုပါတယ်။

မီးရှို့ပြီးနောက် စစ်ကော်မရှင်စစ်ကြောင်းဟာ ရှားကွဲကျေးရွာကိုပြန်လည်အထိုင်ချတပ်စွဲထားပြီး စစ်ကြောင်းကြောင့် ရေကမိုး၊ ရှားကွဲ၊ ရွာသစ်၊ ထုံးဘိုကုန်း၊ ဂူကြီး၊ ငါးဘတ်ချောင်း၊ သစ်ဆိမ့်ရွာတွေက ပြည်သူ ၃,၀၀၀ ကျော်လည်း စစ်ရှောင်နေကြရတယ်လို့ အထက်ပါပကဖတာဝန်ရှိသူက ပြောပါတယ်။

မတ် ၁၀ ရက်ကလည်း ဝက်လက်မြို့နယ်၊ ငါးဘတ်ချောင်းကျေးရွာကို စစ်ကော်မရှင်စစ်ကြောင်း ဝင်သွားပြီးနောက် မီးရှို့သတ်ဖြတ်ခံထားရတဲ့ အမျိုးသမီးအလောင်းတွေ့ပြီး နေအိမ် ၆ လုံးလည်းဖျက်ဆီးခံခဲ့ရပါသေးတယ်။

စာတည်း – လင်း

ဝေါ၊ ဇွန် ၈၊ ၂၀၂၆။

ပဲခူးတိုင်း၊ ဝေါမြို့ပေါ်ရှိ ဝေါမြို့နယ် လဝကရုံးကဝန်ထမ်းတွေဟာ ပြည်သူတွေဆီကနေ အဆမတန် ငွေတောင်းနေတာကြောင့် အခက်ကြုံနေရတယ်လို့ မှတ်ပုံတင်သွားလုပ်စဥ် ကိုယ်တိုင်ငွေပေးခဲ့ရသူတွေဆီ က သိရပါတယ်။

လဝက ဝန်ထမ်းတွေက မှတ်ပုံတင်အသစ်ပြုလုပ်တာ၊ ပျောက်ဆုံး/ပျက်စီး ပြန်လျှောက်တာ၊ အိမ်ထောင်စုစာရင်းအသစ်လုပ်တာ၊ ပျောက်ဆုံး/ပျက်စီး ပြန်လျှောက်တာနဲ့ မွေးစာရင်း အသစ်ပြန်ထည့်တာ၊ စမတ်ကဒ်ပြုလုပ်တာတွေအပါအဝင် လဝကရုံးမှာ ဝန်ဆောင်မှုလာယူသူတိုင်း ငွေမပေးရသူမရှိဘူးလို့ ဆိုပါတယ်။

“အိမ်ထောင်စုပျောက်ဆုံးပြန်လျှောက်တာ ၅၀,၀၀၀ ပေးရတယ်။ စာရွက်စာတမ်းခ မပါသေးဘူး။ အဲ့မှာ ကလေးမွေးတိုးထည့်တာ ကလေး ၁ ယောက်ကို ၃၀,၀၀၀ ပေးခဲ့ရတယ်။ အခြားသူတွေဆို ၁ သိန်းထိ တောင်းတာမျိုး ကြားရတယ်။ လူတွေကိုလည်း မောင်းထုတ်တယ်။ မင်းတို့ခိုင်းတိုင်းလုပ်ရမလား လဝက ကိုဘာအောက်မေ့နေလဲ ဆိုတာမျိုးတွေလည်း ပြောခံရတယ်”လို့ ကိုယ်တိုင်ကြုံတွေ့ခဲ့ရသူတဦးက ပြောပါတယ်။

ယခုငွေပေးရမှုပမဏဟာ ကိုယ်တိုင်ပြုလုပ်သူတွေကြုံတွေ့ခဲ့ရတာတွေဖြစ်ပြီး ပွဲစားနဲ့လုပ်ပါက ၃ ဆမက ပိုပေးရပြီး ကိုယ်တိုင်ပြုလုပ်ပါက အထောက်အထားထပ်မံလိုအပ်တယ်ဆိုတဲ့အကြောင်းပြချက်နဲ့ ငွေပိုတောင်းလေ့ရှိတယ်လို့ အထက်ပါဒေသခံက ဆက်ပြောပါတယ်။

အဆိုပါလဝကရုံးမှာ ပြည်သူတွေအနေနဲ့ ကိုယ်တိုင်လာလုပ်ပါက အချိန်ကြာမြင့်စွာစောင့်ဆိုင်းခိုင်းတာ၊ တခါတရံ ရုံးဝန်းအတွင်းအဝင်မခံဘဲ မောင်းထုတ်တာ၊ ရုံးပြင်ပနေပူထဲမှာ စောင့်ဆိုင်းခိုင်းတာမျိုးတွေလည်းလုပ်ခိုင်းတတ်ပြီး ပွဲစားတွေဆိုရင် ရုံးအတွင်းအချိန်မရွေးဝင်ထွက်သွားလာလို့ရတယ်လို့ သိရပါတယ်။

“ပွဲစားဆီကျတော့ ပိုတောင်းလို့ကောင်းလို့ အဝင်ခံတယ်။ ပြည်သူက ဝင်လို့မရဘူး။ သွေးနှောပိုဆိုးသေးတယ် မောင်းထုတ်တာ။ ဗုဒ္ဓဘာသာစစ်စစ်ကောဝင်လို့ရလားဆို သူအကန့်နဲ့သူရှိမှရတယ်။ ဝေါလဝကမှာ တော်တော်ကိုအခြေနေဆိုးနေတာ”လို့ အထက်ပါဒေသခံက ဆက်ပြောပါတယ်။

ဒါ့အပြင် မှတ်ပုံတင်အသစ်လုပ်မယ်ဆိုပါက တိုင်းရင်းသား ၁ ဦး ကျပ်အနည်းဆုံး ၃ သိန်း၊ သွေးနှော ဆိုပါက ကျပ် ၅ သိန်းမှ ၁၂ သိန်းအထိ၊ ပျောက်ဆုံး/ပျက်စီးပြန်လျှောက်ပါက တိုင်းရင်းသား ၁ ဦး ကျပ် ၁ သိန်း၊ သွေးနှော ကျပ် ၂ သိန်းခွဲပေးရတယ်လို့ ဆိုပါတယ်။

ဒါ့အပြင် အိမ်ထောင်စုစာရင်းအသစ်ပြုလုပ်ပါက ကျပ် ၁ သိန်း၊ မွေးတိုး(မွေးကင်းစ ကလေးငယ်တွေ အိမ်ထောင်စုစာရင်းထဲ ထည့်သွင်း) ပါက ၁ ဦးကို ၃ သောင်းကျပ် မှ ၁ သိန်း၊ စမတ်ကဒ်ပြုလုပ်ပါက ၁ ဦး ၂ သောင်းကျပ်အပြင် အခြားဝန်ဆောင်မှုတွေအတွက်လည်း ကျပ်သိန်းဂဏန်းအထိ ငွေကြေး တောင်းခံတယ်လို့ ဆိုပါတယ်။

ငွေကြေးတောင်းခံတာနဲ့ အချိန်ကြာအောင်စောင့်ဆိုင်းရတာတွေကြောင့် သွားလာစားရိတ်၊ နေထိုင်စရိတ် တွေပေးရတာအပြင် အချိန်ကုန်၊ အလုပ်ပျက်တာတွေလည်းဖြစ်နေရတယ်လို့ အထက်ပါဒေသခံက ပြောပါတယ်။

“ရွာတွေက လူတွေက ဒီလဝကရုံးကိုပဲ လာရတာလေ။ မနက်ခြေကတည်းက လာတယ်ဆိုရင် ထမင်းဝယ်စားရင် ပွဲပြင် ၁ ပွဲတောင် သုံးလေးထောင် ဝယ်စားရတယ်။ အဲဒါပြီးရင်အပြင်မှာ နေပူပူမိုးရွာရွာစောင့်နေရတာ။ မွေးတိုးလေးလုပ်တာတောင် ၃ ခေါက်နဲ့မပြီးဘူး။ ထောက်ခံစာလိုတယ် ဘာလိုတယ်ဆိုပြီး ဘယ်နေ့ထပ်လာဆိုချိန်းလိုက်မှ။ ရပ်ကွက် ရဲထောက်ခံစာမပါလို့ လူ ၁ ယောက်အနည်းဆုံး ၃ ခေါက်ပဲ။ ဆိုင်ကယ်မရှိတဲ့လူ ကယ်ရီနဲ့လာရရင် ၁ ကြောင်း ၃၀,၀၀၀ ပေးရတယ်။ “လို့ အထက်ပါဒေသခံက ဆက်ပြောပါတယ်။

အဆိုပါ လဝကရုံးမှာ မြို့နယ်ဦးစီးမှူး စိုင်းဝေယံဦး၊ တိုက်နယ်တာဝန်ခံတွေဖြစ်တဲ့ မျိုးမြင့်ထွန်းတို့က အဓိက တောင်းခံနေကြတာလို့လည်း ဆိုပါတယ်။

စာတည်း – လင်း

ရေတာရှည်၊ ဇွန် ၆၊ ၂၀၂၆။

ပဲခူးတိုင်း၊ ရေတာရှည်မြို့နယ်၊ နဂျပ်ကျေးရွာမှာ လေကြောင်းကနေ ဗုံးကြဲခဲ့တာကြောင့် သက်ကြီးအမျိုးသား ၁ ဦးသေဆုံးခဲ့တယ်လို့ ဒေသကာကွယ်ရေးအဖွဲ့ဝင်တွေဆီက သိရပါတယ်။

ဇွန် ၆ ရက်မနက် ၄ နာရီခွဲမှာ စစ်ကော်မရှင်ဘက်က Y 12 လေယာဥ် ၁ စီးဟာ ကျေးရွာအနီးဝန်းကျင်ကို ဗုံး ၂ လုံးထက်မနည်းကြဲချခဲ့တယ်လို့ ဆိုပါတယ်။

“ခုထိတဲ့သူတွေက ရွာနားဝန်းကျင်မှာ စစ်ရှောင်နေကြတာ။ လေယာဥ်နဲ့လာတာဆိုတော့လည်း ပြေးမခင်ဘူးလေ(ပြေးချိန်မရလိုက်ဘူးလေ)။ စစ်ရှောင်နေတဲ့နေရာနားကို ကျပြီးထိတာ”လို့ ဒေသကာကွယ်ရေးအဖွဲ့ဝင်တဦးက ပြောပါတယ်။

ဗုံးပေါက်ကွဲစထိမှန်တာကြောင့် အသက် ၈၂ နှစ်အရွယ် အမျိုးသား ရင်ဘတ်ပွင့်ထွက်ဒဏ်ရာနဲ့ သေဆုံးပြီး အသက် ၄၅ နှစ်အရွယ် အမျိုးသား ၁ ဦးလည်းဒဏ်ရာပြင်းထန်ရတယ်လို့ ဆိုပါတယ်။

ဇွန် ၃ ရက်ကစတင်ပြီး စစ်ကော်မရှင်အင်အား ၁,၀၀၀ ခန့်ဟာ ရေတာရှည်မြို့နယ်အတွင်းက ကျေးရွာတွေကို စစ်ကြောင်းထိုးနေပြီး ဒရုန်း၊ ဂျက်ဖိုက်တာ၊ Y12 တွေနဲ့ ဗုံးကြဲတိုက်ခိုက်ခဲ့တယ်လို့ လည်း သိရပါတယ်။

စစ်ကြောင်းထိုးနေတာကြောင့် ပိတောက်ကုန်း၊ အုတ်မြေလူး၊ ဆီဆိုင်၊ အေးရွာလေး၊ ကျွန်းကုန်း၊ ရေတာရှည်လေး၊ ရေငံ၊ အင်းကြီးပေါက်၊ ခင်တန်းရွာသစ်၊ ကံလှ၊ ဂွေးသဲ၊ တောင်အင်းကုန်း၊ ကြာအင်းကုန်း၊ ကြိတ်ပုတီး၊ နဂျပ်၊ အင်းကြီး၊ စည်ပိုင်းရွာတွေအပါအဝင်ကျေးရွာပေါင်း ၂၀ ခန့်က ပြည်သူ ၁၀,၀၀၀ ကျော်ထွက်ပြေးနေရပါတယ်။

စစ်ကြောင်းဝင်ချိန် စစ်ကော်မရှင်ဘက်ကပစ်ခတ်တဲ့ ဒရုန်း၊ လက်နက်ကြီးနဲ့လေယာဥ်ဗုံးတွေကြောင့် ကြိတ်ပုတီး၊ နဂျပ်၊ ဆွာရွာမ၊ ပိတောက်ကုန်းရွာတွေက ပြည်သူ ၂ ဦးသေဆုံးထားပြီး ၅ ဦးထက်မနည်းလည်းဒဏ်ရာရထားပေမယ့် အသေးစိတ်အချက်အလက် မကောက်ယူနိုင်သေးဘူးလို့ ဆိုပါတယ်။

ဖေဖော်ဝါရီ ၂၈ ရက်ကလည်း ရေတာရှည်မြို့နယ်၊ မရိုးခုံကျေးရွာအနီးမှာ စစ်ကော်မရှင်စစ်ကြောင်းနဲ့ တိုးပြီးနောက် PDF ၁ ဦးနဲ့ပြည်သူ ၁ စစ်ကြောင်းနဲ့တွေ့ပြီး ဖမ်းဆီးသတ်ဖြတ်ခံရပါသေးတယ်။

စာတည်း – လင်း

စစ်ကိုင်း၊ ဇွန် ၅၊ ၂၀၂၆။

စစ်ကိုင်းတိုင်း၊ စစ်ကိုင်းမြို့၊ ပါရမီရပ်ကွက်ရှိ စစ်ကိုင်းမြို့နယ်လဝကရုံး မိုင်းခွဲခံရပြီး ပြည်သူနဲ့ဝန်ထမ်း ၂၀ ဦး ဒဏ်ရာရတယ်လို့ ကူညီဆောင်ရွက်ပေးခဲ့သူတွေဆီက သိရပါတယ်။

ဇွန် ၅ ရက်မနက် ၁၀ နာရီကျော်မှာ ရုံးအတွင်းဝန်ထမ်းတွေနဲ့ မှတ်ပုံတင်၊ အိမ်ခေါင်စုစာရင်း လာရောက်လုပ်ကိုင်နေတဲ့ပြည်သူတွေရှိနေစဥ် မိုင်းကွဲခဲ့တာလို့ဆိုပါတယ်။

“မိုင်းကွဲတာပါ။ လာချသွားပြီးမှကွဲတဲ့သဘောမျိုး။ သေတာတော့မရှိဘူး။ ဝန်ထမ်း ၃ ဦးထိတယ်။ ဒဏ်ရာရတဲ့သူတွေကများတယ်။ ဒဏ်ရာပြင်းထန်တာ ၄ ဦးပါတယ်။ ရုံးက ဝန်းရှိတယ်။ ၃ ဖက်ပိတ်ထားပြီး ၁ ဖက်တည်းဖွင့်ထားတာ။” လို့ ကူညီဆောင်ရွက်ပေးခဲ့သူတဦးက ပြောပါတယ်။

မိုင်းကွဲတာကြောင့် အသက် ၂ နှစ်အရွယ် ကလေးငယ် ၁ ဦးအပါအဝင် အသက် ၃၀ ကနေ ၆၀ ကြားရှိ အမျိုးသား ၈ ဦး၊ အမျိုးသမီး ၁၂ ဦး ဒဏ်ရာရခဲ့ပြီး ထိခိုက်သူတွေထဲမှာ ဝန်ထမ်း ၃ ဦးပါဝင်တယ်လို့ ဆိုပါတယ်။

အဆိုပါ မိုင်းခွဲမှုကို ဘယ်အဖွဲ့တွေကဘာကြောင့်ပြုလုပ်တယ်ဆိုတာကိုတော့ သီးခြား အတည်မပြုနိုင်သေးပါဘူး။

မိုင်းကွဲလို့ ရုံးအဆောက်အဦလည်းပျက်စီးကာ ထိခိုက်ဒဏ်ရာရသူတွေကတော့ လက်ရှိ စစ်ကိုင်းပြည်သူ့ဆေးရုံမှာ ဆေးကုသမှုခံယူနေရတယ်လို့သိရပါတယ်။

သတင်း – ကျော်ကြီး၊ စာတည်း – လင်း

မြေလတ်အသံ

စစ်ကိုင်း #လဝကရုံး #ဗုံးကွဲ #ထိခိုက်ဒဏ်ရာရ

မကွေး၊ ဇွန် ၄၊ ၂၀၂၆။

မကွေးတိုင်း၊ ဆောမြို့နယ်နဲ့ ချင်းပြည်နယ်၊ မင်းတပ်မြို့နယ်အစပ်ရှိ ထင်းချောင်းရွာက ဒေသခံ ၂ ဦးကို စစ်ကော်မရှင်တပ်ဖွဲ့ဝင်တွေက ပစ်သတ်ပြီး နေအိမ် ၁၀ လုံးကျော်ကိုလည်း မီးရှို့ဖျက်ဆီးခဲ့တယ်လို့ ဆောမြို့နယ်မှ ဒေသခံခံတွေဆီက သိရပါတယ်။

ထင်းချောင်းရွာနေ အသက် ၁၆ နှစ်အရွယ် အမျိုးသမီးငယ်နဲ့ အသက် ၆၀ ကျော်အရွယ် အဖိုးဖြစ်သူတို့ကို မေလ ၃၀ ရက်မှာ ထင်းချောင်းရွာကိုစစ်ကြောင်းဝင်ချိန် သတ်ဖြတ်ခံခဲ့ရတာဖြစ်နိုင်ပြီး အလောင်းတွေတော့ ပြန်ရတယ်လို့ ဆိုပါတယ်။

“ရွာခံတွေ ဒီရက်ပိုင်းရွာထဲပြန်ကြည့်တဲ့အချိန်မှာ တွေ့ရတာ။ ရွာထဲတော့ ပြန်နေကြတာမဟုတ်ဘူး။ ရွာနားမှာပဲ ကပ်နေတယ်။ **တွေထွက်သွားရင် ရွာထဲအခြေနေပြန်ကြည့်တယ်။ ပြန်ဝင်လာရင် ပြန်ထွက်ကြတယ်။ အဖိုးက ကျန်းမာရေးမကောင်းဘူး။ လေဖြတ်ထားတယ်။ အလောင်းကပြန်ရတယ်။ သတ်တာက ရွာအပြင်ရှောင်နေချိန်မိပြီး အဲ့နားမှာသတ်ခံရတာ”လို့ ဒေသခံတဦးက ပြောပါတယ်။

သတ်ဖြတ်ခံထားရတဲ့ မြေးအဖိုး ၂ ယောက်အလောင်းကိုတော့ ရွာခံတွေကကောက်ယူပြီး သင်္ဂြိုဟ်ပေးလိုက်ရတယ်လို့ ဆိုပါတယ်။

မင်းတပ်မြို့နယ်ထဲကို စစ်ကြောင်းထိုးနေတဲ့စစ်ကော်မရှင်စစ်ကြောင်းဟာ မင်းတပ်မြို့နဲ့ ၁၀ မိုင်အကွာ အထိရောက်နေပြီး တိုက်ပွဲတွေလည်း ဇွန်လ ၄ ရက် ဒီကနေ့အထိဖြစ်နေကာ အသေးစိတ်ကိုတော့ မသိရသေးဘူးလို့ ဆိုပါတယ်။

ဖေဖော်ဝါရီ ၅ ရက်ကလည်း ဆောမြို့နယ်၊ ကျောက်ထုမြို့နဲ့ ၂ မိုင်အကွာ မိအယ်ကျေးရွာမှာ လေကြောင်းကနေဗုံးကြဲခဲရပြီး ကျောင်းသူ ၂ ဦးအပါအဝင် အမျိုးသမီး ၅ ဦးသေဆုံးခဲ့သေးတယ်လို့ သိရပါတယ်။

စာတည်း – လင်း