သပိတ်ကျင်း၊ ဇူလိုင် ၂၃၊ ၂၀၂၅။

တော်လှန်ရေးပူးပေါင်းတပ်တွေတိုက်ခိုက်သိမ်းပိုက်ထားတဲ့ မန္တလေးတိုင်း၊ သပိတ်ကျင်းမြို့ရဲ့နေရာတချို့ကို ပြန်လည်လက်လွှတ်လိုက်ရတယ်လို့ မြေပြင်ကာကွယ်ရေးတပ်ဖွဲ့ဝင်တွေဆီက သိရပါတယ်။

ဇူလိုင် ၂၂ ရက် ညပိုင်းမှာ တော်လှန်ရေးပူးပေါင်းတပ်တွေရဲ့ သပိတ်ကျင်းမြို့ကိုကာထားတဲ့စစ်ကြောင်းတွေကို စစ်ကောင်စီတပ်က ထိုးဖောက်ဝင်ရောက်နိုင်ခဲ့ပြီး မြို့တွင်းနေရာတချို့အထိ ဝင်ရောက်လာနိုင်ခဲ့တာလို့ သိရပါတယ်။

သပိတ်ကျင်းမြို့ကို ၂၀၂၄၊ ဩဂုတ်လမှာ တော်လှန်ရေးတပ်တွေကသိမ်းယူနိုင်ခဲ့တာဖြစ်ပြီး အဲဒီကာလကတည်းက ၇ မိုင်ကျေးရွာရှိ စစ်ကောင်စီတပ်ရင်းကနေ သပိတ်ကျင်းမြို့ကို ပြန်လည်ထိုးစစ်ဆင်ခဲ့တာပါ။ အဲ့ဒီနောက်တပ်အင်အားတွေထပ်မံဖြည့်တင်းပြီး ဆက်တိုက်ထိုးစစ်ဆင်တိုက်ခိုက်လာရာက ၁ နှစ်နီးပါးအကြာ ယမန်နေ့ညပိုင်းမှာ ပြန်လည်လက်လွှတ်ခဲ့ရတာလည်း ဖြစ်ပါတယ်။

သပိတ်ကျင်းမြို့နယ်ဟာ မန္တလေးတိုင်းအတွင်းက ၁၀၂၇ စစ်ဆင်ရေးမှာ တော်လှန်ရေးပူးပေါင်းတပ်တွေသိမ်းယူထားတဲ့ မိုးကုတ်၊ မတ္တရာ၊ စဉ့်ကူးမြို့နယ်တို့နဲ့ လမ်းကြောတခုထဲမှာရှိပြီး စစ်ရေးဗျူဟာအရအရေးပါတဲ့ မြို့နယ်ဖြစ်ပါတယ်။

ဒီမြို့နယ်ကနေ မိုးကုတ်ကို စစ်တပ်က ထိုးစစ်ဆင်လာနိုင်သလို မတ္တရာမြို့ဘက်ကနေ စဉ့်ကူးမြို့ နယ်ကို ဆက်လက်ထိုးစစ်ဆင်လာနိုင်တယ်လို့ ဒေသခံတွေက သုံးသပ်ထားပါတယ်။ တဖက်မှာလည်း စစ်တပ်က ဒီမြို့နယ်တွေကို ဖြတ်သန်းနိုင်တဲ့ ဧရာဝတီမြစ်လမ်းကြောင်းကိုသုံးကာ ထိုးစစ်ဆင်တာတွေပြုလုပ်နေပါတယ်။

စစ်ကောင်စီတပ်ကို ထောက်ခံရေးသားနေတဲ့ တယ်လီဂရမ်ချန်နယ်တွေမှာလည်း ၎င်းတို့စစ်ကောင်စီတပ်ဖွဲ့ဝင်တွေအနေနဲ့ သပိတ်ကျင်းမြို့ကို ပြန်လည်ထိန်းချုပ်နိုင်ပြီဖြစ်ကြောင်း ဓာတ်ပုံတွေနဲ့တကွရေးသားဖော်ပြနေပါတယ်။

သတင်း – မြတ်

မန္တလေး၊ ဇူလိုင် ၂၂၊ ၂၀၂၅။

မန္တလေးမြို့ကနေ ဆန်တက်သွားတဲ့ စစ်သင်္ဘောတွေက ပစ်တဲ့လက်နက်ကြီးကျပြီး ဝက်လက်မြို့နယ်အရှေ့ခြမ်းက အင်ဒေါင်းရွာက နေအိမ် ၄ လုံး မီးလောင် ပျက်စီးခဲ့တယ်လို့ ဒေသခံတွေဆီက သိရပါတယ်။

ဇူလိုင် ၂၂ ရက်နေ့ ဒီနေ့မနက်ပိုင်းမှာ မန္တလေးမြို့၊ ဂေါဝိန်ဆိပ်ကမ်းက နေ တိုက်ခိုက်ရေးယာဉ် ၂ စီးနဲ့ ကုန်တင် သံခွန် သင်္ဘော ၄ စီးတို့ ဆန်တက်သွားတာလို့ သိရပါတယ်။

အဲဒီ စစ်သင်္ဘောတွေဟာ မြစ်ကမ်းအနီးနားက ကျေးရွာတွေကို လက်နက်ကြီး၊ လက်နက်ငယ်တွေနဲ့ ပစ်ခတ်တာတွေပြုလုပ်ခဲ့တယ်လို့ ဒေသခံတွေက ပြောပါတယ်။

စစ်သင်္ဘောပေါ်က ပစ်ခတ်ခဲ့တဲ့ လက်နက်ကြီးဟာ ဝက်လက်မြို့နယ်အ ရှေ့ခြမ်း၊ အင်ဒေါင်းကျေးရွာထဲကို ကျပြီးမီးလောင်ခဲ့တာမို့ နေအိမ် ၂ လုံးနဲ့ ပဲမှော်စင် ၂လုံးတို့ မီးလောင်ပျက်စီးခဲ့တယ်လို့ သိရပါတယ်။

“လူအထိအခိုက်တော့ မရှိဘူး‌ဗျ။ လက်နက်ကြီး၊ လက်နက်ငယ်တွေနဲ့ ဆက်တိုက်ပစ်နေတာ။ ဒီတခေါက်က လေယာဉ်ပစ်ကူလည်းမပါဘူး”လို့ Wetlet information Network က ကိုနဂါးလေး ကပြောပါတယ်။

လက်ရှိမှာ အဲ့ဒီ စစ်သင်္ဘောတွေဟာ စဉ့်ကူးမြို့နယ်အတွင်း ရောက်နေပြီး ဆက်လက်ဆန်တက်နေတယ်လို့ သိရပါတယ်။

ဇူလိုင် ၁၇ ရက်နေ့ကလည်း မန္တလေးဂေါဝိန်ဆိပ်ကနေ စစ် သင်္ဘော ၁၂ စီး ဆန်တက်ခဲ့ပြီး လေကြောင်းပစ်ကူကြောင့် ဝက်လက်မြို့နယ်အရှေ့ ခြမ်းကပြည်သူ ၂၁ ဦး သေဆုံးခဲ့ပါသေးတယ်။

သတင်း – မြတ်

မြေလတ်အသံ၊ ဇူလိုင် ၁၈၊ ၂၀၂၅။

တော်လှန်ရေးတပ်တွေ စိုးမိုးထိန်းချုပ်မှုအားကြောင့် စစ်ကောင်စီတပ်က ၁ နှစ်နီးပါးအကြာအသုံးမပြုခဲ့တဲ့ မန္တလေး-ဗန်းမော် ဧရာဝတီမြစ်ကြောင်းကနေ လူ၊ လက်နက်ခဲယမ်း၊ ရိက္ခာအပြည့်တင်ဆောင်ထားတဲ့ သ‌င်္ဘော ၁၂ စီး ဇူလိုင် ၁၇ ရက် ယမန်နေ့မနက်မှာ စတင်ထွက်ခွာသွားတယ်လို့ မန္တလေးဒေသခံတွေဆီက သိရပါတယ်။

သင်္ဘော ၁၂ စီးမှာ စစ်သင်္ဘော ၅ စီး၊ တွဲဖလက် ၇ စီး၊ တိုက်ခိုက်ရေးသင်္ဘော ၁ စီး ပါဝင်ပြီး အင်အားဖြည့်တင်းဖို့အတွက် ဇွန်လကစတင်ကာ မန္တလေးဂေါဝိန်ဆိပ်ကမ်းမှာ ၁ လနီးပါးအကြာပြင်ဆင်ခဲ့တယ်လို့ ဆိုပါတယ်။

မန္တလေးစစ်ကောင်စီတပ်ဖွဲ့နဲ့နီးစပ်သူတွေထံက ရရှိတဲ့အချက်အလက်တွေအရ သင်္ဘောတွေပေါ်မှာ လက်နက်ခဲယမ်း၊ ရိက္ခာနဲ့ ဆေးဝါးတွေပါဝင်ပြီး စစ်အင်အားအများစုဟာ ပုသိမ်ကြီးမြို့နယ်၊ ရန်ကင်းတောင်ခြေ ခမရ ၄ ထဲမှာ စစ်သင်တန်းပေးထားသူတွေ ရာနဲ့ချီပါဝင်သလို အလယ်ပိုင်းတိုင်းစစ်ဌာန ချုပ်(လပခ)အတွင်းက တပ်တချို့လည်းပါဝင်ကာ ဗန်းမော်မြို့ကို ပို့ဆောင်မှာဖြစ်တယ်လို့ သိရပါတယ်။

ပြီးခဲ့တဲ့ ဇွန်လကလည်း သင်္ဘောတွေဆန်တက်မယ့် သတင်းတွေထွက်ခဲ့ပြီး နေ့စဥ်မနက် ၅နာရီခန့်မှာ လပခ(နန်းတွင်း)ကနေ စစ်တပ်ဖောကားအကြီးတွေနဲ့ သင်္ဘောတွေပေါ်ကို ကုန်ပစ္စည်းတွေပို့ဆောင်ခဲ့ကာ ယခုတပတ်အတွင်းမှာ ဗျူဟာမှူးမှ ၃ ရက်တာစစ်ဆေးပြီး သင်္ဘောတွေအပြီးသတ်ထွက်ခွာခဲ့တာလို့ မျက်မြင်တွေ့ရှိတဲ့မန္တလေးမြို့ခံတဦးက ပြောပါတယ်။

စစ်သင်္ဘောတွေပေါ်မှာပါတဲ့ အင်အားအတိအကျကိုမသိရပေမယ့် တပ်တချို့ကတော့ ဗန်းမော်မြို့ကို စစ်ကူပို့ဆောင်တာဖြစ်ကာ KIAပူးပေါင်းတပ်တွေ ထိုးစစ်ဆင်နေတဲ့ ဗန်းမော်မြို့မှာ ဇူလိုင်လ တတိယပတ်အထိ တိုက်ပွဲတွေ ဆက်လက်ဖြစ်ပွားနေတာပါ။

ယမန်နေ့ညနေပိုင်းမှာ အဲဒီစစ်သင်္ဘောတွေဟာ စဉ့်ကူးမြို့နယ်အတွင်းကို ရောက်ရှိနေပြီး လေကြောင်းပစ်ကူနဲ့ မြစ်ကမ်းအနီးကျေးရွာတွေကို ပစ်ခတ်နေတယ်လို့ ဒေသခံတွေဆီက သိရပါတယ်။

ဒါ့အပြင် ယမန်နေ့မနက်ပိုင်းကစတင်ကာ စစ်သင်္ဘောတွေဖြတ်သန်းမယ့် ဧရာဝတီမြစ်နံဘေးတလျှောက်က ကျေးရွာတွေကို ဖုန်းလိုင်းတွေပါဖြတ်တောက်ထားတယ်လို့လည်း သိရပါတယ်။

ဒီရေလမ်းကြောင်းဟာ လက်ရှိတော်လှန်ရေးတပ်တွေစိုးမိုးထားတဲ့ ဧရိယာအတွင်းမှာအများဆုံးရှိပြီး စဉ့်ကူး၊ မတ္တရာ၊ သပိတ်ကျင်း၊ ထီးချိုင့်မြို့နယ်တွေကိုပါ ထိုးစစ်ဆင်လာနိုင်တယ်လို့ တော်လှန်ရေးတပ်တွေက ခန်းမှန်းထားကြပါတယ်။

မန္တလေး-ဗန်းမော် မြစ်ကြောင်းတလျှောက် မြို့နယ်၊ ကျေးရွာအများစုကို တော်လှန်ရေးတပ်ဖွဲ့တွေဘက်က ထိန်းချုပ်ထားနိုင်တာကြောင့် စစ်ကောင်စီတပ်က အထက်ပါမြစ်ကြောင်းကနေ သင်္ဘောတွေနဲ့ လူ၊ လက်နက်၊ ခဲယမ်း ပို့ဆောင်တာကို ပြီးခဲ့တဲ့ ၂၀၂၄ စက်တင်ဘာက စတင်ရပ်နားခဲ့တာဖြစ်ပြီး ၁ နှစ်နီးပါအကြာမှာ ပြန်လည်အသုံးပြုလာတာလည်း ဖြစ်ပါတယ်။

သတင်း – မြတ်

PDF တွေလှုပ်ရှားမှုကို စကစထံသတင်းပေးလို့ ဖမ်းဆီးထားကြောင်း မလှိုင်ပကဖ ပြော

မလှိုင်၊ ဇူလိုင် ၁၆၊ ၂၀၂၅။

မန္တလေးတိုင်း၊ မလှိုင်မြို့၊ အမှတ် ၁၄ ရပ်ကွက်နေသူ ဆိတ်ကုန်သည်အမျိုးသားကို မလှိုင်ပြည်သူ့ကာကွယ်ရေးအဖွဲ့ကဖမ်းဆီးထားပြီးနောက် ၆ လကျော်ကြာတဲ့အထိ အဆက်အသွယ်မရတာကြောင့် အသက်အန္တရာယ်အတွက် စိုးရိမ်နေကြရတယ်လို့ မိသားစုဝင်နဲ့နီးစပ်သူတွေက ပြောပါတယ်။

ဖမ်းဆီးခံထားရသူဟာ အသက် ၄၀ နှစ်အရွယ် ဦးချစ်ကိုကို ဖြစ်ပြီး မလှိုင်မြို့နယ်၊ တက်မကုန်းကျေးရွာ ဦးဌေးဝင်နေအိမ်မှာရှိနေချိန် ယခုနှစ်ဆန်း ဇန်နဝါ ရီ ၈ ရက်က တောင်သာမြို့နယ်ပကဖအဖွဲ့ဝင်တွေက ဖမ်းဆီးခဲ့ပြီးနောက် မလှိုင်ပကဖထံကို လွှဲပြောင်းပေးခဲ့တာကို စုံစမ်းသိရှိရတယ်လို့ ဆိုပါတယ်။

” ဖမ်းခံရတော့ လိုက်တဲ့အခါကျတော့ မလှိုင်ပကဖက မဟုတ်ပါဘူး။ သူတို့မဖမ်းပါဘူးဆိုပြီးငြင်းတယ်။ တောင်သာပကဖအဖွဲ့ ကျော်ကြီးက ပြောတာက ‘ကျနော်တို့ကိုယ်တိုင်ဖမ်းတာ။ ကျနော်တို့ကို အကူအညီတောင်းလို့ ဖမ်းပေးတာပါ။’ တဆင့်တဆင့် လိုက်စုံစမ်းတော့ ဟုတ်တယ်။ ‘ကျနော်တို့ ဖမ်းတာ၊ သူတို့ကဝန်မခံဘူးလား။ ကျနော်တို့ကိုယ်တိုင်အပ်ပေးလိုက်တာ’လို့ပြောတာကို သိထားရတယ်”လို့ ဦးချစ်ကိုကိုရဲ့ မိသားစုနဲ့နီးစပ်သူတဦးက မြေလတ်အသံကို ပြောပါတယ်။

ဖမ်းဆီးခံရချိန်မှာ ငွေသား ကျပ်သိန်း ၄၀၊ ကျောက်စိမ်းလက်စွပ် ၁ ကွင်း၊ ဖုန်း ၁ လုံး၊ ၁၂ ဘီးကား ၁ စီးနဲ့အတူဖမ်းဆီးခံရတာဖြစ်ကြောင်း မိသားစုဝင်တွေထံကသိရပြီး မလှိုင်ပကဖဆီကို ဆက်သွယ်စုံစမ်းတဲ့အခါမှာ ဦးချစ်ကိုကိုဟာ ပျူစောထီးဖြစ်ကြောင်းပြောဆိုတယ်လို့ သိရပါတယ်။

ဦးချစ်ကိုကိုဟာ မကွေးတိုင်း၊ မြိုင်မြို့နယ်နဲ့ မန္တလေးတိုင်း၊ မလှိုင်မြို့နယ်အတွင်းက ကျေးရွာတွေမှာ ဆိတ်အရောင်းအဝယ်လုပ်သူဖြစ်ပြီး စစ်ကောင်စီစစ်ဆေးရေးဂိတ်တွေကိုလည်း ဖြတ်ကျော်ပြီးမှပို့ဆောင်သွားလာရတာကြောင့် စစ်ကောင်စီဂိတ်တွေဖြတ်သန်းချိန်မှာ လုပ်ငန်းသဘောအရ စစ်ကောင်စီတပ်ဖွဲ့ဝင်တချို့နဲ့ ဆက်သွယ်မှုရှိတယ်လို့ ဆိုပါတယ်။

” ပထမ မလှိုင်ပကဖတာဝန်ခံ ဦးမုတ်ဆိတ်နဲ့ဆက်သွယ်တယ်။ သူကနယ်တွေရောက်နေလို့ မသိရသေးလို့ အောက်လက်ကို ပြန်မေးပါအုန်းမယ်လို့ပြောတယ်။ နောက်သူတို့မဆက်သွယ်လို့ ထပ်ဆက်တော့ အောက်လက်ငယ်သားတယောက်ကိုင်ပါတယ်။ ဦးချစ်ကိုကိုမှာ အပြစ်ရှိတယ်ပေါ့။ သူလုပ်ထားတယ်။ ဖုန်းထဲအသံဖိုင်ရှိတယ်။ ဗီဒီယိုရှိတယ်။ ဖုန်းနံပါတ်တွေရှိတယ်ဆိုပြီးပြောတယ်။”လို့ ၎င်းက ပြောပါတယ်။

ဖမ်းဆီးခံထားရတဲ့ ဦးချစ်ချစ်ကိုနဲ့ပတ်သက်ပြီး ဇန်နဝါရီလအတွင်း မိသားစုဝင်တွေဘက်က ဆက်သွယ်စုံစမ်းခဲ့ပေမယ့် ပကဖဘက်ကတိကျတဲ့အဖြေမပေးခဲ့ဘဲ လက်ရှိ ၆ လကျော်ကာလအထိ ဖုန်း ၅ ကြိမ်ထက်မနည်း ထပ်မံဆက်သွယ်စုံစမ်းပေးမယ့် ဖုန်းလက်ခံမဖြေတော့တာကြောင့် အသက်အန္တရာယ် စိုးရိမ်နေကြောင်း ဆက်ပြောပါတယ်။

အဆိုပါဖြစ်စဥ်နဲ့ပတ်သက်ပြီး မြေလတ်အသံက မလှိုင်မြို့နယ်ပကဖကို ဆက်သွယ်မေးမြန်းရာ ဦးချစ်ကိုကိုအနေနဲ့ ဒေသတွင်းတော်လှန်ရေးတပ်ဖွဲ့ဝင်တွေ လှုပ်ရှားမှုနဲ့တည်နေရာတွေကို စစ်ကောင်စီနယ်ထိန်းအဖွဲ့တွေဆီ ဆက်သွယ်ပြောဆိုထားတာကိုသိရှိထားရတာကြောင့် ဖမ်းဆီးထိန်းသိမ်းခဲ့ကြောင်းပြောဆိုပြီး အသေးစိတ်အခြေအနေတွေကိုတော့ ပြောဆိုတာမရှိပါဘူး။

“ရဲဘော်အသွားအလာတွေ သတင်းပို့တာစစ်လို့ပေါ်တယ်။ သူကိုယ်တိုင်လည်းဝန်ခံသွားတယ်” လို့ မလှိုင်မြို့နယ်ပကဖတာဝန်ရှိသူတဦးက ပြောပါတယ်။

ဒါ့အပြင် ဦးချစ်ကိုကို နဲ့ အတူဖမ်းဆီးခံရတဲ့ ၁၂ ဘီးကားအပါအဝင် ငွေသားနဲ့ပစ္စည်းတွေ ၆ လကြာတဲ့အထိ ပြန်ပေးတာမျိုးမရှိသေးဘူးလို့ မိသားစုနဲ့နီးစပ်သူက ပြောပါတယ်။