MLAT

ပဲခူး၊ မေ ၈၊ ၂၀၂၂။

ပဲခူးတိုင်းဒေသကြီး၊ ပြည်ခရိုင် ကျောင်းသားသမဂ္ဂဥက္ကဌဟောင်းကိုစိုးမြတ်မင်း ကို ဖမ်းဆီးပြီးနောက် ဇနီးဖြစ်သူနှင့် ၂ နှစ်အရွယ်သားကိုပါ ယနေ့ မေလ ၈ ရက်နေ့ နေ့လည်မှာ ဖမ်းဆီးသွားတယ်လို့ သူတို့နဲ့ ရင်းနှီးသူ မိတ်ဆွေတွေထံကသိရပါတယ်။

ယနေ့နေ့လည် ၂ နာရီခန့်က ပြည်ခရိုင်၊ ရွှေတောင်မြို့ နယ်ထဲက ကျေးရွာတခုမှာ ဝင်ရောက်ဖမ်းဆီးသွားတာဖြစ်ပြီး ဘယ်ကိုခေါ်ဆောင်သွားတယ်မသိရသေးဘူးလို့ ဆိုပါတယ်။

“စိုးမြတ်မင်းကို ဖမ်းသွားတုန်းက ဖမ်းတယ်မဖမ်းဘူးဆိုတာက နှစ်ရက်လောက်ထိမသေချာဖြစ်နေတာ။ ဒီနေ့တော့ သူ့မိန်းမနဲ့ ကလေးကို မိဘတွေရွာမှာ လာဖမ်းသွားတယ်ဆိုတာ သိရတယ်။ စိုးမြတ်မင်းကိုလည်း ဘယ်မှာထားတယ်ဆိုတာ မသိရသေးဘူး” လို့ သူတို့မိတ်ဆွေတဦးကပြောပါတယ်။

ကိုစိုးမြတ်မင်းကို ပြီးခဲ့တဲ့ မေလ ၃ ရက်နေ့က ပြည်မြို့ စားသောက်ဆိုင်တဆိုင်မှာ ထိုင်နေစဉ် ဝင်ဖမ်းသွားတယ်လို့ သတင်းများထွက်ပေါ်ခဲ့သော်လည်း ထိုစဉ်က ဖမ်းဆီးခံရသူမှာ ကိုစိုးမြတ်မင်း ဟုတ်မဟုတ် ကို အတည်ပြုနိုင်ခြင်းမရှိဘူးလို့လည်း ပြောဆိုကြပါတယ်။

ကိုစိုးမြတ်မင်းမှာ ယခင် ပြည်ခရိုင် ကျောင်းသားသမဂ္ဂဥက္ကဌ တာဝန်ကိုထမ်းဆောင်ခဲ့ဖူးပြီး နွေဦးတော်လှန်ရေးတွင် ဆန္ဒဖော်ထုတ်ခဲ့တာကြောင့် ပုဒ်မ ၅၀၅-က ဖြင့်အမှုဖွင့်ကာ ဖမ်းဝရမ်းထုတ်ခံထားရသူလည်းဖြစ်ပါတယ်။

မြေလတ်အသံ၊ မေ ၆၊ ၂၀၂၂။

ရက္ခိုင့်တပ်တော်(AA)စစ်ဦးစီးချုပ် ဗိုလ်ထွန်းမြတ်နိုင်က မေလ ၆ ရက်နေ့တွင် ၎င်း၏ လူမှုကွန်ရက် Twitter မှတစ်ဆင့် အနောက်ပိုင်းတိုင်းစစ်ဌာနချုပ် တိုင်မှူးထင်လတ်ဦးကို သတိပေး ရေးသားထားသည်။

“ကိုထင်လတ်ဦး သိပ်လျှောက်မလုပ်နဲ့ အာရုံနောက်နေပြီ ငြိမ်းချမ်းရေးဘာညာ သောက်ဂရုစိုက်နေမှာမဟုတ်ဘူး။ မင်းနေတဲ့နေရာထိ တက်ကြိတ်ပလိုက်မှာနော်” ဟု AA စစ်ဦးစီးချုပ် ဗိုလ်ချုပ်ထွန်းမြတ်နိုင်က လူမှုကွန်ရက် Twitter တွင် ရေးသားထားသည်။

အနောက်ပိုင်းတိုင်း စစ်ဌာနချုပ်သည် ရခိုင်ပြည်နယ်၊ အမ်းမြို့နယ်တွင် တည်ရှိသည်။

ဗိုလ်ချုပ်ထွန်းမြတ်နိုင်၏ ရေးသားထားမှုအပေါ် ရခိုင့်နိုင်ငံရေးသမားတဦးဖြစ်သည့် လွှတ်တော်ကိုယ်စားလှယ်ဟောင်း ဦးဖေသန်းက “ငြိမ်းချမ်း ရေးတည်ဆောက်နေတဲ့ ကာလမှာ ငြိမ်းချမ်းရေးကို ပျက်စီးစေတဲ့ ထိခိုက်စေတဲ့ အပြုအမှု အသုံးအနှုန်းတွေကို ရှောင်ရှားသင့်တယ်လို့ထင်တယ်။ အဲဒါကြောင့် ဗိုလ်ချုပ်က အခုလိုရေးသားလာတာလို့ မှတ်ချက်ပေးချင်တယ်။” ဟု ပြောသည်။

လက်ရှိရခိုင်ပြည်နယ်တွင် စစ်ကောင်စီက ဒေသခံများကို ဖမ်းဆီးစစ်ဆေးခြင်းများ၊ ကျေးရွာ‌များကို ဝင်ရောက်စစ်ဆေးခြင်း၊ ကားလမ်းမများပေါ်တွင် လုံခြုံရေးတင်းကြပ်စွာ ချထားခြင်းတို့ကို ဆက်တိုက်ဆိုသလို လုပ်ဆောင်လျှက်ရှိနေသည်ဟု ဒေသခံများက ပြောသည်။

ယင်းအပြင် ယခုရက်အပိုင်းအတွင်း စစ်ကောင်စီက အင်အားတိုးချဲ့လာမှုများ၊ နယ်မြေချဲ့ထွင်မှု များကိုလည်း လုပ်ဆောင်လျှက်‌ရှိနေသည်။

ပဲခူး၊ မေ ၄၊ ၂၀၂၂။

ပဲခူးတိုင်း ပြည်မြို့နယ်မှာ မနေ့က မနက်ပိုင်း သင်းအုပ်ဆရာတဦးနဲ့ လူငယ်တဦး ပျောက်ဆုံးနေပြီး ညဘက်မှာလည်း ဘုရားကျောင်း ၂ကျောင်းကို စစ်ကောင်စီက ဝင်ရှာဖွေတာမျိုးတွေ ရှိခဲ့တယ်လို့ ဒေသခံတဦးဆီက သိရပါတယ်။

မေလ ၃ရက်မနေ့က မနက်ပိုင်း ပြည်မြို့နယ် ဝက်ထီးကန်မြို့ ကျောက်ကွင်းဘုရားကျောင်းက သင်းအုပ်ဆရာနဲ့အတူ လူငယ်တဦးဟာ ပြည်မြို့ကို စျေးလာဝယ်ချိန်မှာ အဆက်အသွယ်ပြတ်သွားခဲ့တယ်လို့ သင်းအုပ်ဆရာရဲ့ မိတ်ဆွေတဦးက ပြောပါတယ်။

” ကျောက်ကွင်းဘုရားကျောင်းကို ဝင်ရှာတော့ တံခါးတွေကို ရိုက်ဖျက်တယ်လို့ သိရတယ်၊ ပြည်မြို့က ဘုရားကျောင်းကိုကတော့ ဒီတိုင်းပဲ လူဝင်ရှာသွားတာပါ၊ ဖမ်းသွားတာမျိုးတော့ မရှိဘူး” လို့ သင်းအုပ်ဆရာရဲ့ မိတ်ဆွေက ပြောပါတယ်။

ပြည်မြို့ ခေတ္တရာ မြို့သစ် ၁၃လမ်း ၄ကွက်က ခေတ္တရာ မြန်မာနှစ်ခြင်းဘုရားကျောင်းနဲ့ ဝက်ထီးကန်မြို့က ကျောက်ကွင်းရွာက နှစ်ခြင်းဘုရားကျောင်းတွေကို စစ်ကောင်စီက မနေ့ကည ၁၀ နာရီနောက်ပိုင်းမှာ ဝင်ရောက်ရှာဖွေတာတွေ လုပ်ခဲ့တယ်လို့ ဆိုပါတယ်။

ပြီးခဲ့တဲ့ လဝက်လောက်ကတည်းက ပြည်မြို့မှာ စစ်ကောင်စီက PDF ကိုထောက်ပံ့တယ်ဆိုတဲ့ အကြောင်းပြချက်နဲ့ ဖမ်းဆီးတာတွေ ဆက်တိုက်လုပ်နေတယ်လို့ ပြည်မြို့ခံတဦးက ပြောပါတယ်။

” အိမ်တွေကိုဝင်ဖမ်းရင် စစ်ကားရဲကားတွေကိုအသုံးပြုပြီးဝင်ဖမ်းတယ်၊ လမ်းတွေပေါ်မှာ ဖမ်းဆီးရင် အရပ်ဝတ်နဲ့ဝင်ဖမ်းတယ်” လို့ ဒေသခံတဦးက ပြောပါတယ်။

ပြီးခဲ့တဲ့ ၁၀ရက်တာ အတွင်း ပြည်မြို့မှာ ၁၀ ဦးထက်မနည်းကို မနက်ပိုင်းတွေမှာ အရပ်ဝတ်တွေနဲ့ ဖမ်းဆီးတာတွေရှိနေပြီး ညဖက်တွေမှာလည်း ဝင်ဖမ်းတာတွေ ရှိနေတာကြောင့် ပျောက်ဆုံးနေသူတွေလည်း ရှိနေတယ်လို့သိရပါတယ်။

မြေလတ်အသံ၊ မေ ၁၊ ၂၀၂၂။

မတရားအသင်း ဆက်သွယ်မှုအက်ဥပဒေပုဒ်မ ၁၇(၁)၊ နိုင်ငံတော်အကြည်အညိုပျက်စေမှု ပုဒ်မ ၅၀၅(ခ)တို့ဖြင့် တရားစွဲခံထားရသည့် ရခိုင်ပြည်နယ် ဝန်ကြီးချုပ်ဦးညီပု၏ သမီးဖြစ်သူ NLD ဗဟိုတာဝန်ခံ မမိုးဆန်းစုကြည်နှင့် မိသားစုအဆက်အသွယ်မရသည်မှာ ၂ လကျော်ရှိနေပြီဖြစ်ကြောင်း မိသားစုဝင်များထံမှ သိရသည်။

မမိုးဆန်းစုကြည်မှာ ပြီးခဲ့သည့် ၂၀၂၁ ခုနှစ် မေလ ၈ ရက်နေ့တွင် ရန်ကုန်မြို့၌ ဖမ်းဆီးခံလိုက်ရခြင်းဖြစ်ပြီး အင်းစိန်အကျဉ်းထောင်၌ ချုပ်နှောင်ခံ ထားရသူဖြစ်သည်။

လက်ရှိတွင် မမိုးဆန်းစုကြည်ကို သာယာဝတီအကျဉ်းထောင်သို့ရွေ့သွားပြီဟု သတင်းကြားရ သော်လည်း သူမနှင့် အဆက်အသွယ်လုံးဝမရသေးဟု အစ်မဖြစ်သူ မကြည်ကြည်ဦးက ပြောသည်။

“ညီမရဲ့ အမှုအခြေအနေလည်း မပြောတတ်တော့ဘူး။ ရုံးချိန်းလည်း မသိဘူး။ လောလောဆယ် အဆက်အသွယ် ပြတ်နေပါတယ်။ ရှေ့နေကလည်း သူနဲ့မတွေ့ရဘူး။ မိသားစုတွေက အရမ်းတွေ့ချင်တာပေါ့။ အခုလေ သူမကို သာယာဝတီကို ရွေ့တယ်လို့သတင်းရတယ်။ အခုချိန်ထိ အဆက်အသွယ်မရသေးဘူး။ သူမနဲ့ပတ်သက်လို့ စိတ်မကောင်းရုံကလွဲလို့ ဘာမှမပြောချင်တော့ဘူး”ဟု မကြည်ကြည်ဦးက ပြောသည်။

ဖမ်းဆီးခံရစဉ်က မမိုးဆန်းစုကြည်မှာ ပုဒ်မ ၅၀၅(ခ) အမှုတခုတည်းဖြင့်တရားစွဲခံရခြင်းဖြစ် သော်လည်း ၂၀၂၂ ခုနှစ် မတ်လ ၈ ရက်နေ့တွင် ပုဒ်မ ၁၇(၁) ဖြင့် ထပ်တိုးတရားစွဲခံလိုက်ရခြင်းဖြစ် သည်။

ထပ်တိုးတရားစွဲလိုက်သည့် ပုဒ်မ ၁၇(၁)သည် ထောင်ဒဏ် ၂ နှစ် သို့မဟုတ် ၃ နှစ်ထက်မပိုသော ပြစ်ဒဏ်ချမှတ်နိုင်သလို ငွေဒဏ်လည်း ချမှတ်နိုင်သည်ဟု ဥပဒေ၌ပြဌာန်းထားသည်။

မမိုးဆန်းစုကြည်မှာ ရခိုင်ပြည်နယ်ဝန်ကြီးချုပ် ဦးညီပု၏ သမီးဖြစ်ပြီး၊ လက်ရှိတွင် ဦးညီပုမှာလည်း ၅၀၅(ခ)၊ ပုဒ်မ ၅၁ တို့ဖြင့် စစ်တွေအကျဉ်းထောင်မှာ ထောင်ဒဏ် ၁၁ နှစ်ကျခံနေရသည်။

စစ်တပ်မှအာဏာသိမ်းပြီးနောက် ရခိုင်ပြည်နယ်မှ အမျိုးသားဒီမိုကရေစီအဖွဲ့ချုပ် (NLD) ပါတီဝင်များဖြစ်ကြသည့် ဦးညီပု၊ ဦးမင်းအောင်နှင့် ဦးစိုးလေးအပါအဝင် ၄ ဦးတို့မှာ ဖမ်းဆီးတရားစွဲ ခံထားကြရသည်။