မန္တလေး၊ မေ ၂၆၊ ၂၀၂၅။

မန္တလေးမြို့၊ အောင်မြေသာစံမြို့နယ်ရှိ အင်းဝဘဏ်မှာ လုံခြုံရေးတာဝန်ကျတဲ့ စစ်ကောင်စီတပ်ဖွဲ့ဝင် အချင်းချင်း ပစ်ခတ်မှုဖြစ်ခဲ့ပြီး တပ်ကြပ်ကြီး ၁ ဦးသေဆုံးကာ ၁ ဦးဒဏ်ရာရခဲ့တယ်လို့ စစ်ကောင်စီရဲ့ အလယ်ပိုင်းတိုင်းစစ်ဌာနချုပ်နဲ့ နီးစပ်သူဆီက သိရပါတယ်။

မေ ၂၅ ရက်မနေ့ကနေ့လယ် ၁၂ နာရီဝန်းကျင်မှာ မန္တလေးမြို့၊ ဈေးချိုနာရီစင်အနီး ၂၆ လမ်းနဲ့ ၈၄ လမ်းထောင့်ရှိ အင်းဝဘဏ်မှာလုံခြုံရေးစောင့်နေကြချိန် ပစ်ခတ်မှုဖြစ်ခဲ့ကြတာလို့ ဆိုပါတယ်။

“ပြင်ဦးလွင်ကလာတဲ့ လုံခြုံရေးကားလို့ပြောတာပဲ။ တပ်ကြပ်ကြီးကိုတပ်သားကပစ်တာ။ တပ်မှာ ကိုယ့်ထပ်ရာထူးကြီးတဲ့ သူကိုအဲဒီလိုအာခံလို့မှမရတာ။ ဒုတပ်ကြပ်ကလည်း တပ်ကြပ်ကြီးဘက်က ဝင်ပြောပုံပဲ။ ဒုတပ်ကြပ်ကဒဏ်ရာရတယ်။ တပ်ကြပ်ကြီးကတော့သေတယ်”လို့ အလယ်ပိုင်းတိုင်း စစ်ဌာနချုပ်နဲ့ နီးစပ်သူတဦးကပြောပါတယ်။

သေဆုံးသူတွေဟာ ဘယ်တပ်တွေကလဲဆိုတာကိုတော့ သီးခြားအတည်မပြုနိုင်သေးပါဘူး။

ဒီပစ်ခတ်မှုကကြားရတဲ့ သေနတ်သံတွေကြောင့် မန္တလေးဈေးချိုထဲကဆိုင်တချို့လည်း ကြောက်လန့်ပြီး ပိတ်ခဲ့ကြတယ်လို့ မန္တလေးမြို့ခံတဦးက ပြောပါတယ်။

“ဘ‌‌ဏ်ပိတ်ရက်ဖြစ်တာ။ သေနတ်သံကတော့အချက်ရေတော်တော်များတယ်။ အဲ့တာကြောင့် ဆိုင်တချို့ကပိတ်သွားကြတာ။ ဒီနေ့တော့ပုံမှန်ပါပဲ”လို့ မြို့ခံတဦးက ပြောပါတယ်။

ပစ်ခတ်မှုဖြစ်ပြီးနောက် စစ်ကောင်စီဘက်က ရှာဖွေစစ်ဆေးမှုတွေလုပ်ခဲ့ပြီး ပစ်ခတ်ခဲ့တဲ့ စစ်ကောင်စီတပ်သားက လက်ရှိအချိန်ထိထွက်ပြေးလွတ်မြောက်နေဆဲဖြစ်တယ်လို့ သိရပါတယ်။

စာတည်း – လင်း

မန္တလေး၊ မေ ၂၅၊ ၂၀၂၅။

လူငယ်တွေ‌‌‌‌‌‌‌‌ဦးစီးပြုလုပ်တဲ့ မန္တလေးက ငလျင်ရန်ပုံငွေပန်းချီပြပွဲကို စစ်ကေင်စီတပ်က ဝင်စီးနင်းပြီး ပန်းချီပညာရှင်တွေကိုဖမ်းဆီးသွားတယ်လို့ ဒေသခံတွေဆီက သိရပါတယ်။

မန္တလေး ၇၉ လမ်း၊ ၂၇ လမ်းနဲ့ ၂၈ လမ်းကြားက လက်ဖက်ရည်ဆိုင်အပေါ်ထပ်မှာပြုလုပ်မယ့် “နမ္မတီး” ငလျင်ဒဏ်သင့် ပြည်သူများကူညီရေးပန်းချီပြပွဲ၊ ပြိုင်ပွဲနဲ့ စာအုပ်ရောင်းချပွဲအတွက်ပြင်ဆင်နေချိန် မေ ၂၂ ရက်ညနေပိုင်းမှာ စစ်ကောင်စီတပ်က ဝင်ရောက်စီးနင်းပြီး ပြပွဲဦးဆောင်သူနဲ့ ပန်းချီဆရာတွေကို ဖမ်းဆီးသွားတာလို့ သိရပါတယ်။

“ငလျင် ဘေးသင့်ပြည်သူတွေကို ယာယီအိမ်တွေဆောက်ပေးဖို့ ပြုလုပ်တဲ့ပွဲပါ။ ပထမဆုံး ဖိတ်ထားတဲ့သူတွေကို ပွဲက ခွင့်ပြုချက်မရဘူးလို့ သတင်းကြားတာ။ အဲ့ဒီကနေ ‌‌‌‌‌‌‌‌‌‌‌‌‌‌‌‌‌‌‌‌‌‌ဆက်တိုက် အကုန်လိုက်ဖမ်းတာတဲ့။ အခု တော်တော်များများ အဖမ်းခံထားရတယ်။” လို့ ဖြစ်စဥ်ကိုသိရှိသူနဲ့ နီးစပ်သူတဦးက ပြောပါတယ်။

အဆိုပါပွဲကို မေ ၂၃ ရက်ကနေ ၂၈ ရက်အထိပြုလုပ်ဖို့ စီစဥ်ထားတာဖြစ်ပြီး အခုလိုစီးနင်းဖမ်းဆီးခံရတာကြောင့် ပွဲကိုဖျက်လိုက်ရတယ်လို့လည်း သိရပါတယ်။

စစ်ကောင်စီချန်နယ်တွေမှာတော့ ဒီပြပွဲနဲ့ပတ်သက်ပြီး နိုင်ငံတော်အလံပုံတူပန်းချီပေါ်မှာ နိုင်ငံတော်အကြည်ညိုပျက်စေတဲ့ပုံတွေ ရေးဆွဲကြောင်းသတင်းရတဲ့အတွက် အမှတ် ၈ ရဲစခန်းကိုခေါ်ဆောင်စစ်ဆေးရာ နောက်ဆက်တွဲအကြမ်းဖက်တွေကို ဖမ်းမိတယ်ဆိုပြီး ဖော်ပြထားပါတယ်။

လက်ရှိမှာ အမျိုးသား၊ အမျိုးသမီး ၆ ဦးဝန်းကျင်လောက် အမှတ် ၈ ရဲစခန်းမှာ ဖမ်းဆီးခံထားရတယ်လို့သိရပြီး နောက်ဆက်တွဲအခြေအနေတွေကိုတော့ မြေလတ်အသံက ဆက်လက်စုံစမ်းနေပါတယ်။

ဒါ့အပြင် ဒီဖမ်းဆီးမှုကြောင့် မေလနောက်ဆုံးပတ်ထဲမှာပြုလုပ်ဖို့စီစဥ်ထားတဲ့ ရန်ပုံငွေ ဂီတဖျော်ဖြေပွဲလည်း ရပ်နားလိုက်ရတယ်လို့ ဒေသခံတွေဆီကသိရပါတယ်။

မြေလတ်အသံ၊ မေ ၂၅၊ ၂၀၂၅ ။

စစ်ကိုင်းတိုင်း၊ ရွှေဘိုခရိုင်အတွင်းရှိ ဒေသခံပြည်သူတွေကို ရွှေဘိုခရိုင်ပြည်သူ့ကာကွယ်ရေးတပ်ဖွဲ့ တပ်ရင်း ၄ တပ်ဖွဲ့ဝင်တွေက လေကြောင်းအန္တရာယ်နဲ့ ပတ်သက်တဲ့ အသိပညာပေးတာနဲ့ လေကြောင်းတိုက်ခိုက်မှု ကြုံလာချိန်မှာ လုပ်ဆောင်ရမယ့်အချက်တွေကို လက်တွေ့သရုပ်ပြဟောပြောမှု ပြုလုပ်ပေးခဲ့တယ်လို့ အမျိုးသားညီညွတ်ရေးအစိုးရ – NUG ကာကွယ်ရေးဝန်ကြီးဌာနက မေ ၂၅ ရက် ဒီကနေ့မှာ ထုတ်ပြန်ပါတယ်။

ရွှေဘိုခရိုင်အတွင်းက ကျေးရွာတွေကို စစ်ကောင်စီတပ်က လေကြောင်းကနေ မကြာခဏဗုံးကြဲတိုက်ခိုက်နေပြီး အခုမေလအတွင်းမှာပဲ ရွှေဘိုခရိုင်၊ ဝက်လက်မြို့နယ်အတွင်းက ကျေးရွာ ၆ ရွာထက်မနည်း လေကြောင်းတိုက်ခိုက်ခံရတာကြောင့် လူ ၁၁ ဦးသေဆုံးထားပါတယ်။

စစ်ကောင်စီတပ်ဟာ တော်လှန်ရေးတပ်တွေ စိုးမိုးထိန်းချုပ်ထားတဲ့ နယ်မြေတွေကို နေ့စဉ်နီးပါး လေကြောင်းကနေ ဗုံးကြဲတိုက်ခိုက်နေတာဖြစ်ပြီး အဆိုပါဗုံးကြဲတိုက်ခိုက်မှုတွေကို ကာကွယ်နိုင်ဖို့ ဒေသခံပြည်သူတွေအနေနဲ့ ဗုံးခိုကျင်းတွေ အသီးသီးတူးဖော်နေထိုင်နေရတာလည်း ဖြစ်ပါတယ်။

မန္တလေး၊ မေ ၂၃၊ ၂၀၂၅။

မန္တလေးမြို့မှာ ငလျင်ကူညီ‌ရေးစခန်းတွေ အားလုံး မေလကုန်မှာ ပိတ်တော့မှာဖြစ်ပြီး ငလျင်ဘေးသင့်ပြည်သူတွေကို စတင်ရွှေ့ခိုင်းနေပြီလို့ မြို့ခံတွေဆီကသိရပါတယ်။

မေလကုန်နောက်ဆုံးထားပြီး ဘုန်းကြီးကျောင်း၊ စာသင်ကျောင်းနဲ့ အားကစားကွင်းတွေက ငလျင် ကူညီရေးစခန်း အားလုံးပိတ်သိမ်းရမယ်လို့ စစ်ကောင်စီက အမိန့်ထုတ်ထားတယ်လို့သိရပါတယ်။

မန္တလေးမြို့မှာ ငလျင်ကူညီရေးစခန်းတွေက မန္တလေးမြို့မဟာ‌အောင်မြေမြို့နယ်၊ စိန်ပန်းရပ်ကွက်၊ မန္တလာသီရိအားကစားကွင်း၊ ဗထူးအားကစားကွင်းတွေမှာ လူဦးရေအများဆုံးရှိပြီး စိန်ပန်းရပ်ကွက်မှာတော့ နေအိမ်ပြန်မဆောက်ရသေးတဲ့ လူဦးရေများတယ်လို့သိရပါတယ်။

“အစိုးရဆီက ကူညီရေးကဘာမှသိပ်မရဘူး။ ပုဂ္ဂလိက အလှူရှင်တွေကတော့ လာလှူကြပါတယ်။ ကျနော်တို့ ဖြစ်စေချင်တာက‌ အဆောက်အဦး ဖြိုချတာ၊ ပြန်ဆောက်တာတွေကိုပဲ အစိုးရကစနစ်တကျ ကြီးကြပ်ပေးစေချင်တာ။ အခုကဆောက်ဖို့၊ ပြင်ဖို့ မပြောနဲ့ဖျက်မိန့်မကျလို့ မဖျက်ရသေးတဲ့ အိမ်တွေ အများကြီးရှိသေးတယ်”လို့ ငလျင်ဒဏ်သင့်ပြည်သူတဦးကပြောပါတယ်။

ငလျင်ဒဏ်သင့် အဆောက်အဦး‌ တွေဟာ စစ်ကောင်စီလက်အောက်က စည်ပင်ရဲ့ ခွင့်ပြုချက်ကို ယူရပြီး ဖျက်မိန့်ကျဖို့ကို နီးစပ်ရာကနေ ငွေပေး လာဘ်ထိုးရတာတွေရှိတယ်လို့ မြိုခံတွေကပြောပါတယ်။

ဒါ့အပြင် နောက်ဆက်တွဲ ငလျင်တွေကလည်း ဒီနေ့အထိ လှုပ်နေဆဲဖြစ်ပြီး မေ ၁၇ ရက်နေ့က လှုပ်ခတ်ခဲ့တဲ့ နောက်ဆက်တွဲငလျင်ကြောင့် ပြည်သူ ၂ ဦး သေဆုံးခဲ့သလို နေအိမ် အဆောက်အဦး ပျက်စီးတာတွေလည်းရှိခဲ့ပါတယ်။