MLAT

မြေလတ်အသံ၊ မတ် ၂၇၊ ၂၀၂၆ ။

စစ်ကော်မရှင်ရဲ့ပြောခွင့်ရသူ ဗိုလ်ချုပ် ဇော်မင်းထွန်းရဲ့ စစ်ဘက်ရာထူးဖြစ်တဲ့ ကာကွယ်ရေးဦးစီးချုပ် ရုံး(ကြည်း) ပြည်သူ့ဆက်ဆံရေးနှင့်စိတ်ဓာတ်စစ်ဆင်ရေးညွှန်ကြားရေးမှူးရုံး(ကကပြည်) ညွှန်ကြားရေးမှူးရာထူးကို ဗိုလ်မှူးချုပ် ရဲရင့်အောင် နဲ့အစားထိုးခန့်အပ်ထားတယ်လို့ စစ်ကော်မရှင်ရဲ့ သတင်းရုပ်သံထုတ်ပြန်ချက်တွေအရ သိရပါတယ်။

ယမန်နေ့ မတ်လ ၂၆ ရက် ညပိုင်းမှာ ပြုလုပ်ခဲ့တဲ့ စစ်ကော်မရှင်တပ်ရဲ့ ဝါဒဖြန့်ဇာတ်လမ်းဖြစ်တဲ့ “တိမ်ပင်လယ်ခရီးကြမ်း” မှာ ပါဝင်သရုပ်ဆောင်ခဲ့သူတွေကို ညစာစားပွဲနဲ့ဆုချီးမြှင့်ပွဲမှာ ကကပြည် ညွှန်ကြားရေးမှူးဖြစ်တဲ့ ဗိုလ်မှူးချုပ် ရဲရင့်အောင် က ဆုချီးမြှင့်ခဲ့တယ်ဆိုကာ ထည့်သွင်းဖော်ပြခဲ့တာပါ။

ဗိုလ်ချုပ် ဇော်မင်းထွန်း ဟာ စစ်ကော်မရှင်မှာ ပြန်ကြားရေးဒုတိယဝန်ကြီးရာထူး ရယူထားပြီး စစ်ကော်မရှင်ကို ကိုယ်စားပြုကာသတင်းမီဒီယာတွေကို ဖြေကြားနေတဲ့ ပြောခွင့်ရသူဖြစ်တဲ့အပြင် စစ်ဘက်မှာလည်း ကကပြည် ညွှန်ကြားရေးမှူးရာထူးကို ပူးတွဲရယူထားပါ။

လက်ရှိ စစ်ကော်မရှင်ရဲ့ ပြန်ကြားရေးဝန်ကြီး ဦးမောင်မောင်အုန်း ဟာ ပြီးခဲ့တဲ့မတ်လလယ်ပိုင်းမှာ စတင်ခဲ့တဲ့ ပြည်သူ့လွှတ်တော်မှာ ဒုဥက္ကဌအဖြစ် တာဝန်ယူထားတာကြောင့် လာမယ့်စစ်ကော်မရှင်ရဲ့ အစိုးရသစ်မှာ လက်ရှိဝန်ကြီးရာထူးကို စွန့်လွှတ်ရမှာပါ။

ဗိုလ်ချုပ် ဇော်မင်းထွန်းရဲ့စစ်ဘက်ရာထူးကို အခြားစစ်ဗိုလ်ချုပ် ၁ ဦးနဲ့ အစားထိုးခန့်အပ်လိုက်ပေမယ့် ၎င်းဟာ စစ်ကော်မရှင်ရဲ့ပြည်ထောင်စုဝန်ကြီးနဲ့ဒုတိယဝန်ကြီးအမည်စာရင်းမှာ လက်ရှိအထိ ရှိနေသေးတာပါ။

ဒါကြောင့် ခုလကုန်မှာ ဖွဲ့စည်းမယ့်အစိုးရသစ်မှာ ပြန်ကြားရေးဝန်ကြီး သို့မဟုတ် ဝန်ကြီးတနေရာရာမှာ ပြန်လည်ပါဝင်နိုင်တယ်လို့ CDM တပ်မတော်သားတချို့က ခန့်မှန်းထားကြပါတယ်။

တဖက်မှာလည်း ဗိုလ်ချုပ် ဇော်မင်းထွန်း ရာထူးကဖယ်ရှားခံရပြီး စစ်ဆေးခံနေရတယ်လို့ သတင်းတွေ ထွက်ပေါ်နေပေမယ့် စစ်ကော်မရှင်ရဲ့ဝန်ကြီး၊ ဒုဝန်ကြီး အမည်စာရင်းဖော်ပြထားတဲ့ ဝက်ဆိုက်မှာ တော့ လက်ရှိအထိ ဗိုလ်ချုပ် ဇော်မင်းထွန်း ဟာ ဒုတိယဝန်ကြီးအဖြစ် ဆက်ရှိနေတာလည်း ဖြစ်ပါတယ်။

မြေလတ်အသံ၊ မတ် ၂၄၊ ၂၀၂၆။

တရားမဝင် မြန်မာရွှေ့ပြောင်းလုပ်သား ၁၂ ဦးကို တင်ဆောင်လာတဲ့ ဖို့ဒ်ကား ၁ စီးကို ရဲတပ်ဖွဲ့လိုက်လံဖမ်းဆီးစဉ် ထိုင်းနိုင်ငံ၊ ချွန်ဖွန်ခရိုင်၊ ဝမ်မိုင်ကျေးရွာအနီးမှာ ဖမ်းဆီးရရှိခဲ့တယ်လို့ ထိုင်းဒေသတွင်းသတင်းတွေမှာ ဖော်ပြပါတယ်။

မတ်လ ၂၃ ရက်က အဖြူရောင် ဖို့ဒ် ပစ်ကပ် ကား ၁ စီးဟာ ထိုင်းရဲတပ်ဖွဲ့စစ်ဆေးရေးဂိတ်မှာ မရပ်ဘဲ မောင်းနှင်ထွက်ပြေးတဲ့အတွက် အဝေးပြေးရဲတပ်ဖွဲ့ကို အကြောင်းကြားပြီး ပိတ်ဆို့ဖမ်းဆီးခဲ့တယ်လို့ ဆိုပါတယ်။

ထိုင်းနိုင်ငံသား အသက် ၂၈ နှစ်အရွယ်ရှိ နိုင်ကန်တာဖွန်း (Nai Kantaphon) မောင်းနှင်လာတဲ့အဆိုပါကားဟာ ရဲတပ်ဖွဲ့ရဲ့လိုက်လံဖမ်းဆီးမှုကြောင့် ထာစဲ့ခရိုင်ကနေ မောင်းမြို့နယ်ဘက်ကိုသွားတဲ့လမ်းအတိုင်း ကီလိုမီတာ ၂၀ ခန့် လမ်းပြောင်းပြန်မောင်းပြီး ထွက်ပြေးရာကနေ ဝမ်မိုင်ကျေးရွာအနီး အရောက် အရှိန်မထိန်းနိုင်ဘဲ တိမ်းမှောက်ခဲ့တာလို့ သိရပါတယ်။

ဖမ်းဆီးခံရပြီးနောက် ကနဦး စစ်ဆေးချက်တွေအရ မြန်မာလုပ်သား ၁၂ ဦးကို ဆမွန်စခွန်ခရိုင်၊ မဟာချိုင်နယ်မြေကနေ ဆုန်ခလာခရိုင်၊ ဟတ်ယိုင်မြို့ကို သွားရောက်ပို့ဆောင်ပေးရမှာဖြစ်ပြီး ပို့ဆောင်ခ ဘတ် ၈,၀၀၀ ရရှိကြောင်း နိုင်ကန်တာဖွန်း (Nai Kantaphon) က ထွက်ဆိုတယ်လို့ ဆိုပါတယ်။

လက်ရှိမှာ ထိုင်းနိုင်ငံသားယာဉ်မောင်းနဲ့ တရားမဝင် ဝင်ရောက်လာသူ မြန်မာနိုင်ငံသား ၁၂ ဦးကို Salui ရဲစခန်းကို ပို့ဆောင်ထားကာ ဥပဒေအရအရေးယူဆောင်ရွက်လျက်ရှိပြီး ဆက်စပ်နေတဲ့ လူမှောင်ခိုဂိုဏ်းကိုလည်း ဆက်လက်စုံစမ်းဖော်ထုတ်သွားမယ်လို့ သိရပါတယ်။

Ref – Cop’s Magazine.

မြေလတ်အသံ၊ မတ် ၂၀၊ ၂၀၂၆။

ထိုင်းနိုင်ငံမှာ လောင်စာဆီအခက်အခဲကြောင့် ဆုန်ခရန်ကာလ ခရီးသွားလာမှု ကျဆင်းနိုင်ချေရှိနေပြီး ကုန်ကျစရိတ်မြင့်တက်လာမှုတွေအတွက် ထိုင်း ခရီးသွားလုပ်ငန်းရှင်တွေ စိုးရိမ်ပူပန်နေကာ ကြိုတင်ပြင်ဆင်မှုတွေ ပြုလုပ်နေကြတယ်လို့ Bangkok Post သတင်းဌာနမှာ ဖော်ပြပါတယ်။

ထိုင်းနိုင်ငံ သယ်ယူပို့ဆောင်ရေးလုပ်ငန်းရှင်များအသင်းရဲ့ အကြံပေးပုဂ္ဂိုလ် Mr. Wasuchet Sophonsathien က “လောင်စာဆီဈေးနှုန်း မြင့်တက်မှုဟာ လာမယ့်လမှာကျရောက်မယ့် ဆုန်ခရန်အားလပ်ရက်အပေါ် ရေတိုသက်ရောက်မှု ရှိနိုင်ပါတယ်။ အချို့ခရီးသွားတွေက ပြည်နယ်ကျော်ခရီးစဉ်တွေ ကြိုတင်ဘွတ်ကင်လုပ်ထားကြပေမယ့် အများစုကတော့ ဆီဈေးနှုန်းအခြေအနေကို စောင့်ကြည့်ပြီး ယုံကြည်မှုရှိမှပဲ ခရီးသွားဖို့ ဆုံးဖြတ်ကြတော့မှာပါ” လို့ ပြောကြားခဲ့ပါတယ်။

ဒါ့အပြင် လောင်စာဆီဈေးနှုန်း ဘယ်လောက်အထိ မြင့်တက်မယ်ဆိုတာ မသေချာတာကြောင့် လုပ်ငန်းရှင်အချို့အနေနဲ့ Tour Packages အသစ်တွေပြုလုပ်ဖို့ တွန့်ဆုတ်နေကြပြီး အဆိုပါအခြေအနေက ၎င်းတို့ရဲ့ အကျိုးအမြတ်ကို ထိခိုက်စေနိုင်တယ်လို့ သူက ဆက်ပြောပါတယ်။

ခရီးသွားဈေးကွက် ကျဆင်းမှုအခြေအနေကို ကာကွယ်ဖို့အတွက် သယ်ယူပို့ဆောင်ရေးလုပ်ငန်းရှင်များအသင်းအနေနဲ့ မိတ်ဖက်အဖွဲ့အစည်းတွေဖြစ်တဲ့ ထိုင်းဟိုတယ်များအသင်း၊ ထိုင်းခရီးသွားကိုယ်စားလှယ်များအသင်းတို့နဲ့ သင်္ကြန်ကာလဆိုင်ရာ မဟာဗျူဟာတွေကို ဆွေးနွေးဖို့ စီစဉ်နေတယ်လို့လည်း ဖော်ပြပါတယ်။

Kanchanaburi ကုန်သည်ကြီးများအသင်း ဥက္ကဋ္ဌ Ms. Nattharin Pongvittayapanu ကတော့ လုပ်ငန်းလည်ပတ်မှုစရိတ် မြင့်တက်လာတာကြောင့် အကျိုးအမြတ်နည်းပါးသွားနိုင်ပေမယ့် ခရီးသွားလုပ်ငန်းရှင်အချို့အနေနဲ့ လုပ်ငန်းကို ပုံမှန်အတိုင်း ဆက်လက်လည်ပတ်ဖို့ ဆုံးဖြတ်ထားကြပြီး အချို့ကတော့ အခြေအနေကို စောင့်ကြည့်ဖို့အတွက် ခရီးစဉ်အရေအတွက်ကို လျှော့ချထားတယ်လို့ ဆိုပါတယ်။

Sriracha Koh Si Chang ခရီးသွားလုပ်ငန်းနှင့် ဝန်ဆောင်မှုအသင်း ဥက္ကဋ္ဌ Ms. Nutsarai Chaijindaratana က စီရာချာနဲ့ ချွန်ပူရီဒေသတွေဟာ ဘန်ကောက်မြို့နဲ့ နီးပြီး ဆုန်ခရန်ကာလ လာရောက်လည်ပတ်သူများတာကြောင့် အခြားဝေးလံတဲ့ဒေသတွေလောက် ထိခိုက်မှုမရှိနိုင်ကြောင်း ပြောကြားခဲ့ပေမယ့် ခရီးစဉ် ကြိုတင်ဘွတ်ကင်တင်ထားတဲ့အခြေအနေကတော့ မျှော်လင့်ထားတာထက်နှေးကွေးနေပြီး ပုံမှန်နှစ်တွေမှာ ၇၀ ရာခိုင်နှုန်းခန့်ရှိသော်လည်း ယခုနှစ်မှာ ၆၀ ရာခိုင်နှုန်းသာ ရှိသေးတယ်လို့ ဆိုပါတယ်။

ဒါဟာ ထိုင်းခရီးသွားတွေအနေနဲ့ ၎င်းတို့ရဲ့ ခရီးစဉ်တွေကို ရွှေ့ဆိုင်းနေကြကြောင်း ဖော်ပြနေပြီး အရှေ့အလယ်ပိုင်းအခြေအနေတွေကြောင့် လေကြောင်းခရီးစဉ်ပြတ်တောက်မှုအချို့ရှိနေလို့ နိုင်ငံခြားသားခရီးသွားဝင်ရောက်မှုလည်း ကျဆင်းသွားတယ်လို့ Ms. Nutsarai က ပြောပါတယ်။

အခြေအနေတွေ ကောင်းမွန်မလာပါက ဟိုတယ်တွေအနေဖြင့် ဝန်ထမ်းတွေကို အလှည့်ကျခွင့်ပေးခြင်းနဲ့ လုပ်အားခစရိတ်ကို လျှော့ချသွားနိုင်ပေမယ့် ဈေးကွက်အခြေအနေကို ယိမ်းယိုင်မသွားစေဖို့အတွက် ဟိုတယ်အခန်းခလျှော့ချတာမျိုးတော့ ပြုလုပ်မှာမဟုတ်ကြောင်း သိရတယ်လို့ Bangkok Post က ဖော်ပြပါတယ်။

ဒါ့အပြင် ဟိုတယ်အများစုကတော့ စွမ်းအင်အခက်အခဲကာလအတွင်းမှာ လျှပ်စစ်စရိတ်လျှော့ချဖို့အတွက် ဆိုလာစွမ်းအင်ကို ပြောင်းလဲအသုံးပြုနေကြတယ်လို့လည်း သိရပါတယ်။

Source – Bangkok Post

မြေလတ်အသံ၊ မတ် ၂၀၊ ၂၀၂၆။

၈ ရက်အတွင်း ပဲခူးတိုင်း ရွှေကျင်မြို့နယ်၊ စစ်ကိုင်းတိုင်း မုံရွာမြို့နယ်၊ ယင်းမာပင်မြို့နယ်၊ တန့်ဆည်မြို့နယ်၊ မင်းကင်းမြို့နယ်နဲ့ မကွေးတိုင်း ဂန့်ဂေါမြို့နယ်တို့မှာ စစ်ကော်မရှင်တပ်ရဲ့ ဗုံးကြဲ ပစ်ခတ်မှုတွေကြောင့် ကလေးငယ်တွေအပါအဝင် ၁၄ ဦးသေဆုံးပြီး ၁၅ ဦးထိခိုက်ဒဏ်ရာရခဲ့ပါတယ်။

ဒီအရေအတွက်ဟာ မတ် ၁၁ ရက်ကနေ မတ် ၁၈ ရက်အတွင်း မြေလတ်အသံက လက်လှမ်းမီသလောက် တင်ပြခဲ့တဲ့သတင်းတွေကတဆင့် ပြန်လည်စုစည်းထားတဲ့ အရေအတွက်ဖြစ်ပါတယ်။

သေဆုံးသူတွေမှာ အသက် ၉ နှစ်ကနေ ၅၀ နှစ်အရွယ်ကြားဖြစ်ပြီး အမျိုးသမီးနဲ့ PDF တပ်ဖွဲ့ဝင်တချို့လည်း ပါဝင်ပါတယ်။

မတ်လ ၁၁ ရက်နေ့လယ် ၁၂ နာရီ မိနစ် ၄၀ မှာ ပဲခူးတိုင်း၊ ရွှေကျင်မြို့နယ်၊ ကရင့်အမျိုးသားအစည်းအရုံး – KNU တပ်မဟာ ၃ ထိန်းချုပ်နယ်မြေရှိ အင်းဗလာရွာကို စက်တပ်လေထီးနဲ့ဗုံးကြဲခဲ့တာကြောင့် အသက် ၉ နှစ်အရွယ် မိန်းကလေး ၁ ဦး၊ အသက် ၂၀ ကနေ ၆၀ ကြား အမျိုးသား၊အမျိုးသမီး ၆ ဦး စုစုပေါင်း ၇ ဦး သေဆုံးခဲ့ပါတယ်။

မတ်လ ၁၂ ရက် မနက် ၉ နာရီခွဲမှာလည်း စစ်ကိုင်းတိုင်း၊ မုံရွာမြို့နယ် ကျေးရွာ ၁ ရွာကို စစ်ကော်မရှင်ရဲ့ စစ်တပ်လေထီးနဲ့ ဗုံးကြဲခဲ့တာကြောင့် PDF ၁ ဦးအပါ ၂ ဦးထိခိုက်ဒဏ်ရာရခဲ့ပါတယ်။

အဲ့ဒီနေ့ မနက် ၉ နာရီခန့်မှာပဲ စစ်ကိုင်းတိုင်း၊ ယင်းမာပင်မြို့နဲ့ ၇ မိုင်အကွာ ဖိုလ်ဝင်တောင်ဘုရားမုခ်ဝ အနီး စစ်တပ်လေထီး ၂ စီးနဲ့ ဗုံး ၂ လုံးကြဲခဲ့တာကြောင့် အသက် ၅၀ ကျော်အရွယ် ခရီးသွားအမျိုးသား ၁ ဦး၊ အမျိုးသမီး ၁ ဦးနဲ့ အဲ့ဒီနေရာအနီးရှိနေတဲ့ အသက် ၂၀ အရွယ် ဒေသခံကာကွယ်ရေးတပ်ဖွဲ့၀င် ၁ ဦးတို့ သေဆုံးခဲ့ပြီး ခရီးသွား ၅ ဦးနဲ့ PDF အဖွဲ့ဝင် ၃ ဦးဒဏ်ရာရခဲ့ပါတယ်။

ဒါ့အပြင် မတ် ၁၆ ရက်မနက် ၁၀ နာရီခန့်မှာလည်း စစ်ကော်မရှင်ရဲ့ဂျက်ဖိုက်တာ ၁ စီးက စစ်ကိုင်းတိုင်း၊ တန့်ဆည်မြို့နယ်၊ ပန်းတိမ်ကုန်းနဲ့ ရေရှင်ရွာကြားက စစ်ရှောင်တွေနေထိုင်တဲ့ တဲတိုက်ပေါ်ကို ဗုံးကြဲခဲ့တာကြောင့် အသက် ၄၀ အရွယ် အမျိုးသမီး ၁ ဦးသေဆုံးခဲ့ပါတယ်။

အလားတူ မတ် ၁၆ ရက်နေ့လယ် ၁ နာရီခန့်မှာလည်း မကွေးတိုင်း၊ ဂန့်ဂေါမြို့နယ်၊ ကျောက်ဂူဒေသ၊ ကံရွာအနောက်ဘက်တောစပ်မှာ စစ်ကော်မရှင်တပ်က လေကြောင်းကနေ ဗုံးကြဲခဲ့တာကြောင့် ကံရွာကျေးရွာကနေ စစ်ဘေးလာရှောင်နေတဲ့ အသက် ၅၀ အရွယ် အမျိုးသမီးနဲ့ အသက် ၁၃ နှစ်အရွယ် သမီးအငယ်ဆုံးတို့ နေရာမှာပဲသေဆုံးပြီး အသက် ၂၀ အရွယ် သမီးကြီးက ခြေထောက်ပြတ်သွားသလို ဖခင်ဖြစ်သူမှာလည်း ပြင်းထန်ဒဏ်ရာရသွားတယ်လို့ သိရပါတယ်။

မတ် ၁၈ ရက်နေ့လယ် ၂ နာရီခန့်မှာလည်း စစ်ကိုင်းတိုင်း၊ မင်းကင်းမြို့နယ်၊ ရွာဘရွာနဲ့ မြောက်ချွန်းရွာကြားရှိ ချင်းတွင်းမြစ်အတွင်းမှာရှိတဲ့ ရွှေမျောတွေကို လေကြောင်းကဗုံးကြဲခဲ့တာကြောင့် ရွှေမျောဖောင်တွေမှာ ဝင်ရောက်လုပ်ကိုင်နေတဲ့ အသက် ၂၅ နှစ်အရွယ် အမျိုးသား ၁ ဦးနေရာမှာသေဆုံးပြီး အသက် ၂၀ က နေ ၃၀ ကြားအမျိုးသား ၃ ဦး ပြင်းထန်ဒဏ်ရာတွေရခဲ့ပါတယ်။

အထက်ပါဒေသတွေမှာ စစ်ကော်မရှင်တပ်ဟာ လေကြောင်းတိုက်ခိုက်မှုအပြင် မြေပြင်စစ်ကြောင်းထိုး မီးရှို့တာနဲ့ လက်နက်ကြီးပစ်ခတ်မှုတွေကိုပါလုပ်နေတာကြောင့် ဒေသခံတွေလည်းဘေးလွတ်ရာကို တိမ်းရှောင်နေကြရပါတယ်။

၂၀၂၁ စစ်အာဏာသိမ်းချိန်ကနေ ၂၀၂၆၊ မတ်လ ၁၉ ရက်ထိ စစ်ကော်မရှင်နဲ့ ၎င်းရဲ့လက်အောက်ခံတွေ ကြောင့် သေဆုံးခဲ့တဲ့ပြည်သူစုစုပေါင်း ၇,၉၃၆ ရှိပြီလို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း – AAPP က ထုတ်ပြန်ထားပါတယ်။