မြေလတ်အသံ၊ မေ ၂၁၊ ၂၀၂၅။

မန္တလေးမြို့၊ မဟာအောင်မြေမြို့နယ်မှာ ငလျင်ဒဏ်ထိထားတဲ့ ၂ ထပ်ခွဲ လူနေအိမ်တိုက်အဆောက်အဦ ၁ လုံး လေပြင်းတိုက်မိုးကြီးချိန်ပြိုကျခဲ့တယ်လို့ ဒေသလူမှုကူညီရေးအသင်းတွေဆီက သိရပါတယ်။

မဟာအောင်မြေမြို့နယ်၊ ၈၉ လမ်း၊ ၃၆ လမ်းနဲ့ ၃၇ လမ်းကြားရှိ ငလျင်ထိထားတဲ့ ၂ ထပ်ခွဲတိုက် ၁ လုံးဟာ မေ ၂၁ ရက် ဒီကနေ့မနက် ၂ နာရီမှာ နေအိမ်အောက်ထပ်က စတင်ပြိုကျခဲ့တာလို့ ဆိုပါတယ်။

“အောက်ခြေတိုင်တွေက ကျိုးထားတာ။ မိုးနဲ့ထပ်စောင်းပြီး အောက်ထပ်က ပြိုလာတာ။ ဘေးအိမ်တွေ ဘက်ယိုင်လာတော့ အကုန်ညက ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌ရှောင်အိပ်ရတာ။ မိုးရော၊ လေရော တော်တော်ပြင်းတာ” လို့ အခင်းဖြစ် ရပ်ကွက်နေပြည်သူတဦးက မြေလတ်အသံကို ပြောပါတယ်။

တိုက်ပြိုကျတာကြောင့် အဆိုပါတိုက်နဲ့အနီးဝန်းကျင်ရှိ နေအိမ် အိမ်ထောင်စု ၆ စုကို ပဲပုတ္တန်း ‌ဓမ္မာရုံ အတွင်း မိုးလေထဲမှာပဲ ညတွင်းချင်းယာယီပြောင်းရွှေ့ပေးခဲ့ရတယ်လို့ ဆိုပါတယ်။

ပြိုကျခဲ့တဲ့နေအိမ်အဆောက်အဦမှာ ငလျင်ကြီးဒဏ်ကြောင့် နေအိမ်တိုင်တွေကျိုးကျတာအပါအဝင် ပျက်စီးမှုများပြားပြီး လူဆက်လက်နေထိုင်နိုင်ခြင်းမရှိတာကြောင့် အိမ်ရှင်တွေကပစ္စည်းတွေယူဆောင်ကာ ပြောင်းရွှေ့နေထိုင်နေကြပြီး ရပ်ကွက်နေပြည်သူတွေက အဆိုပါနေအိမ်ကိုဖြိုချပေးဖို့ ပြောဆိုကြပေမယ့် လက်ရှိအထိ ဖြိုချတာမျိုးမရှိသေးဘူးလို့ သိရပါတယ်။

မတ် ၂၈ ရက်က စစ်ကိုင်းမြို့အနီးကို ဗဟိုပြု လှုပ်ခတ်ခဲ့တဲ့ အင်အားပြင်း ငလျင်ကြီးနဲ့ နောက်ဆက်တွဲ ငလျင်ငယ်တွေကြောင့် မန္တလေးမြို့ အထပ်မြင့်အဆောက်အဦတွေအပါအဝင် လူနေအဆောက်အဦအများအပြား ပြိုကျပျက်စီးခဲ့ပြီး လူထောင်နဲ့ချီသေဆုံးခဲ့တာပါ။

မေ ၁၇ ရက် ညပိုင်းကလှုပ်ခတ်ခဲ့တဲ့ နောက်ဆက်တွဲ ငလျင်ကြောင့်လည်း ငလျင်ကယ်ဆယ်ရေးစခန်းတခုမှာ သစ်ပင်ကျိုးကျပြီး ပြည်သူ ၂ ဦး သေဆုံးခဲ့သ လို နေအိမ်တချို့ပျက်စီးခဲ့ပါ သေးတယ်။

မြေလတ်အသံ၊ မေ ၂၁၊ ၂၀၂၅။

ကချင်ပြည်နယ်၊ ဗန်းမော်မြို့နယ်အတွင်း ပျက်ကျခဲ့တဲ့ စစ်ကောင်စီတပ်သယ်ယူပို့ဆောင်ရေးရဟတ်ယာဉ်ဟာ စက်ချို့ယွင်းတာကြောင့်လို့ စစ်ကောင်စီတပ်က မေ ၂၀ ရက် ယမန်နေ့ညပိုင်းမှာ ၎င်းတို့သတင်းထုတ်ပြန်ရေးမီဒီယာတွေကတဆင့် ထုတ်ပြန်လာပါတယ်။

မေ ၂၀ ရက် နေ့လယ်ပိုင်းမှာ ဗန်းမော်မြို့နယ်အတွင်းရှိ စစ်ကောင်စီတပ်စခန်းတွေကို ထောက်ပံ့ရေးပစ္စည်းတွေ သွားရောက်ပို့ဆောင်ပြီး ပြန်လည်ထွက်ခွာလာစဉ် မြို့အနောက်တောင်ဘက် မီတာ ၁၄,၀၀၀ ခန့်အကွာအရောက်မှာ ရုတ်တရက်စက်ချို့ယွင်းပြီး မတော်တဆပျက်ကျခဲ့တာလို့ ဆိုပါတယ်။

ကချင်လွတ်မြောက်ရေးတပ်မတော် – KIA ပြောခွင့်ရ ဗိုလ်မှူးကြီး နော်ဘူ က ဗန်းမော်အခြေစိုက် စကခ ၂၁ ကိုလာတဲ့ စစ်ကောင်စီတပ်ထောက်ပို့ရဟတ်ယာဉ် ၃ စီးတွဲမှာ ၂ စီးကို KIA နဲ့ ပူးပေါင်းတပ်တွေက ဗန်းမော်မြို့အနောက်ဘက် ဧရာဝတီမြစ်ကမ်းအနီးမှာ ပစ်ခတ်နိုင်ခဲ့ပြီး ၁ စီး မှာ မီးလောင်ပြီးနောက် ရွှေကူမြို့နယ်တောတောင်အတွင်းကို ပျက်ကျသွားခဲ့တာလို့ ပြောပါတယ်။

ရဟတ်ယာဉ်ပျက်ကျခဲ့တဲ့နေရာဟာ KIA တပ်ရင်း ၅ နယ်မြေဖြစ်ပြီး ယမန်နေ့ညပိုင်းက လူမှုကွန်ယက်မှာပြန့်နှံ့လာတဲ့ရုပ်သံအရ ရဟတ်ယာဉ်မီးလောင်ပျက်ကျတဲ့နေရာအနီးမှာ မျိုးထက်အောင် အမည်ရှိ ဗိုလ်ကြီးအဆင့် ရဟတ်ယာဉ်မှူး ၁ ဦးသေဆုံးနေတာကိုလည်း တွေ့မြင်ရပါတယ်။

စစ်ကောင်စီအနေနဲ့ ယခင်က ရဟတ်ယာဉ်၊လေယာဉ်တွေ စက်ချို့ယွင်းပျက်ကျမှုဖြစ်စဉ်ဖြစ်ပွားပါက ကြားဖြတ်သတင်းနဲ့ချက်ချင်းထုတ်ပြန်လေ့ရှိပေမယ့် ယခုဖြစ်စဥ်မှာတော့ ရဟတ်ယာဉ်ပျက်ကျနေရာက ရုပ်သံပြန့်နှံ့လာပြီး စစ်တပ်ထောက်ခံသူတွေအကြား ဝေဖန်မှုတွေမြင့်တက်လာပြီးနောက် စစ်ကောင်စီဘက်က သတင်းထုတ်ပြန်လာတာပါ။

အဆိုပါ စစ်ကောင်စီရဟတ်ယာဉ်ပေါ်မှာ စစ်ကောင်စီတပ်ဖွဲ့ဝင် ၂၀ ခန့်ပါနိုင်ပြီး အသက်ရှင်ကျန်ရစ်သူမရှိကြောင်း ဗိုလ်မှူးကြီး နော်ဘူ က ပြောဆိုထားကာ သေဆုံးသူတွေအနက် ဗျူဟာမှူးပါဝင်တယ်ဆိုတာကိုတော့ သူ့အနေနဲ့အတည်မပြုကြောင်း ပြောပါတယ်။

မြေလတ်အသံ၊ မေ ၂၀၊ ၂၀၂၅။

တိုင်းဒေသကြီးနဲ့ပြည်နယ်အလိုက်က စီးပွားရေးလုပ်ငန်းတွေကို စစ်ကောင်စီက ချေးငွေတွေ ထုတ်ချေးခဲ့ပေမယ့် ထိုက်သင့်သလောက် အောင်မြင်မှုမရှိခဲ့ဘူးလို့ စစ်ကောင်စီဥက္ကဌ ဗိုလ်ချုပ်မှူးကြီး မင်းအောင်လှိုင်က ပြောဆိုပါတယ်။

မေ ၁၉ ရက် နေပြည်တော်မှာပြုလုပ်တဲ့ စစ်ကောင်စီအစည်းအဝေးမှာ စစ်ခေါင်းဆောင်က စီးပွားရေးကဏ္ဍနဲ့ပတ်သက်ပြီး အခုလိုထည့်သွင်းပြောဆိုခဲ့တာကို ၎င်းတို့စစ်ကောင်စီထိန်းချုပ်ထားတဲ့ သတင်းစာတွေမှာ ဖော်ပြပါတယ်။

“ အလုပ်လုပ်နိုင်အောင်ဖန်တီးပေးရန်နှင့် တိုက်တွန်းပေးရန်မှာအစိုးရတွင်တာဝန်ရှိပြီး မိမိတို့အနေဖြင့် ချေးငွေများထုတ်ချေးခြင်း၊ လိုအပ်သည်များ ဖြည့်ဆည်းဆောင်ရွက်ပေးခြင်းတို့ကို ဆောင်ရွက်ပေးလျက်ရှိကြောင်း၊ သို့သော်လည်း တိုင်းဒေသကြီးနှင့်ပြည်နယ်များရှိ လုပ်ငန်းများ ထိုက်သင့်သလောက် အောင်မြင်မှုမရှိခဲ့ကြောင်း” ဆိုကာ စစ်ခေါင်းဆောင်က ပြောဆိုပါတယ်။

စစ်ခေါင်းဆောင်က ၎င်းတို့စစ်ကောင်စီအနေနဲ့ မူဝါဒသာချမှတ်ပေးမှာဖြစ်ပြီး တိုင်းနဲ့ပြည်နယ်တွေက အောင်မြင်အောင် အကောင်အထည်ဖော်ဆောင်ရွက်ရမှာဖြစ်တယ်လို့ ဆိုပါတယ်။

ဒါ့အပြင် စိုက်ပျိုးရေးလုပ်ငန်းတွေမှာလည်း ရည်မှန်းချက်မပြည့်မီဘဲ ဆီထွက်သီးနှံနဲ့ပတ်သက်ပြီး အထွက်နှုန်းအားနည်းနေဆဲဖြစ်ကာ ပြည်ပကနေတင်သွင်းနေရဆဲဖြစ်တယ်လို့ ၎င်းက ပြောပါတယ်။

စစ်ကောင်စီခန့် တိုင်းနဲ့ပြည်နယ်ဝန်ကြီးချုပ်တွေအနေနဲ့ စစ်ခေါင်းဆောင်စိတ်တိုင်းကျ ဗိုလ်ချုပ်ဟောင်းအများစုကို တာဝန်ပေးထားသူတွေဖြစ်ပြီး သက်ဆိုင်ရာတိုင်းနဲ့ပြည်နယ်အလိုက် ဝန်ကြီးတွေမှာလည်း စစ်ကောင်စီနဲ့နီးစပ်သူအများစုက တာဝန်ယူထားတာပါ။

” အောက်ကဝန်ကြီးချုပ်တွေကို အပြစ်တင်နေပေမယ့် သူတို့မှာအာဏာအပြည့်အဝမရှိဘူး။ တကယ့်တကယ်လွတ်လွတ်လပ်လပ်စီမံခွင့်အာဏာက သူ့ဆီမှာပဲ အပြည့်အဝချုပ်ကိုင်ထားတာ။ ဒီစီးပွားရေးအလုပ်မဖြစ်တာက ခင်ဗျားတို့အသုံးမကျလို့ သူ့မှာတင်တာဝန်ရှိတာမဟုတ်ဘူး၊ ခင်ဗျားတို့လည်း တာဝန်ရှိတယ်ဆိုတာမျိုး ပြောတဲ့သဘော” လို့ CDM တပ်မတော်သား ဗိုလ်ကြီး ဇင်ယော်က ပြောပါတယ်။

” ဒီစိုက်ပျိုးရေးလုပ်ငန်းဆိုလည်း ဖြောင့်ဖြောင့်တန်းတန်းလုပ်မရဘူး၊ လေယာဥ်ဗုံးကြဲတာနဲ့ စစ်ကြောင်းထိုးလို့ ပျက်တာနဲ့ စစ်ကြောင်းထိုးပြီဆိုလည်း လယ်ခင်း၊ ယာခင်းတွေထဲက သွားပြီဆိုရင် စစ်ပိုးကျပြီး အကုန်ပျက်တာပဲ။ အခု သူတို့က အဖျက်အမှောက်လုပ်ငန်းတွေလုပ်နေပြီးမှာ ဘယ်လိုလုပ် တိုးတက်မှာလဲ” ၎င်းက ဆက်ပြောပါတယ်။

လက်ရှိမှာ စစ်ကောင်စီအနေနဲ့ နိုင်ငံရဲ့ ၃ ပုံ ၁ ပုံ ၃၂ ရာခိုင်နှုန်းကိုသာ ထိန်းချုပ်ထားနိုင်ပြီး ၄၄ ရာ ခိုင်နှုန်းကို ပြည်သူ့ကာကွယ်ရေးတပ်တွေနဲ့ တိုင်းရင်းသားတော်လှန်ရေးအဖွဲ့က စိုးမိုးထိန်းချုပ်ထားနိုင်ကာ ကျန် ၂၄ ရာခိုင်နှုန်းနယ်မြေတွေမှာ တော်လှန်စစ်ဖြစ်ပွားနေတယ်လို့ ယခုနှစ်ဆန်းပိုင်းမှာ NUG အစိုးရက ထုတ်ပြန်တဲ့ ၂၀၂၄ စစ်ရေး ဖြစ်ပေါ်တိုးတက်မှု အစီရင်ခံစာမှာ ဖော်ပြပါတယ်။

မြေလတ်အသံ

စစ်ကောင်စီ #ချေးငွေ #ထုတ်ချေး #စီးပွားရေး #အောင်မြင်မှုမရှိ #စစ်ခေါင်းဆောင်ပြော