MLAT

မြေလတ်အသံ၊ မတ် ၁၈၊ ၂၀၂၆။

စစ်ကော်မရှင်က ပြီးခဲ့တဲ့ဇန်နဝါရီလအတွင်းမှာ ၎င်းတို့ရဲ့လက်အောက် အရေးကြီးဝန်ကြီးဌာနတချို့ရဲ့ ဒုတိယဝန်ကြီးနေရာတွေကို အပြောင်းအလဲပြုလုပ်ခဲ့ပါတယ်။

စစ်ကော်မရှင်က ပြည်ထဲရေးဒုဝန်ကြီးအဖြစ် ဗိုလ်ချုပ် မင်းသူ၊ စက်မှုဒုဝန်ကြီးအဖြစ် ဦးသွင်အောင် ၊ပို့ဆောင်ဆက်သွယ်ရေးဒုဝန်ကြီးအဖြစ် ဦးသက်ဝင်းအောင် တို့ကို အစားထိုးခန့်အပ်တယ်လို့ ဇန်နဝါရီ ၂၃ ရက်မှာ ထုတ်ပြန်လာတာပါ။

အဲ့ဒီထဲက စက်မှုနဲ့ ပို့/ဆက် ဒုဝန်ကြီးတွေဖြစ်လာတဲ့ ဦးသွင်အောင်နဲ့ ဦးသက်ဝင်းအောင် တို့ဟာ စစ်ကော်မရှင်တပ်ရဲ့အသက်သွေးကြော ကာကွယ်ရေးပစ္စည်းစက်ရုံ(ကပစ) လက်နက်ထုတ်လုပ်ရေးစက်ရုံတွေရဲ့ စက်ရုံမှူးတာဝန်ယူထားတဲ့ ဗိုလ်မှူးချုပ် သွင်အောင်နဲ့ ဗိုလ်မှူးကြီး သက်ဝင်းအောင် တို့ဖြစ်တယ်လို့ ကပစတပ်အသိုင်းအဝိုင်းထံက သိရပါတယ်။

ဗိုလ်မှူးချုပ် သွင်အောင် ဟာ ဒုဝန်ကြီးအဖြစ်ခန့်အပ်မခံရမီအထိ နေပြည်တော်၊ တပ်ကုန်းအခြေစိုက် အမှတ် ၄ ကာကွယ်ရေးပစ္စည်းစက်ရုံ (ကပစ ၄) စက်ရုံမှူးတာဝန်ရယူခဲ့သူဖြစ်ပြီး ကပစ ၄ ဟာ ကပစ တပ်တွေအနက် နည်းပညာမြင့်ထုတ်လုပ်ရေးတပ်ဖြစ်ပြီး တခြားလက်ရုံးတပ်တွေနဲ့ ချိတ်ဆက်ကာ လက်နက်ထုတ်လုပ်ရေးလုပ်ငန်းတွေလုပ်ဆောင်နေတဲ့ စက်ရုံဖြစ်တယ်လို့ ကပစအသိုင်းအဝိုင်းက ပြောပါတယ်။

ဗိုလ်မှူးကြီး သက်ဝင်းအောင် ကတော့ မကွေးတိုင်း၊ စေတုတ္တရာမြို့အခြေစိုက် အမှတ် ၂၀ ကာကွယ်ရေးပစ္စည်းစက်ရုံ (ကပစ ၂၀)စက်ရုံမှူးဖြစ်ပြီး လက်ရှိစစ်ကော်မရှင်မှာအရေးပါတဲ့ ဗိုလ်ချုပ်ကြီး(ဟောင်း) မြထွန်းဦး ပြည်ထောင်စုဝန်ကြီးတာဝန်ယူထားတဲ့ ပို့/ဆက်ဝန်ကြီးဌာနမှာ ဒုဝန်ကြီးအဖြစ် ခန့်အပ်ခံခဲ့ရတာပါ။

စစ်အာဏာသိမ်းပြီးတဲ့နောက် စစ်ခေါင်းဆောင် မင်းအောင်လှိုင် က ကာကွယ်ရေးပစ္စည်းထုတ်လုပ်မှုတပ်ဖွဲ့အရာရှိချုပ်ရုံး(ကကထုတ်) က ၎င်းယုံကြည်ရတဲ့ ဗိုလ်ချုပ်တချို့ကို အရပ်ဘက်ဝန်ကြီးတွေအဖြစ် ပြောင်းရွှေ့တာဝန်ပေးခဲ့ပေမယ့် ကပစစက်ရုံမှူးတွေကိုတော့ အရပ်ဘက်ပို့ဆောင်တာတော့ ရှားပါတယ်။

ယခင် ဒုတိယကာကွယ်ရေးပစ္စည်းထုတ်လုပ်ရေးအရာရှိချုပ် ဗိုလ်ချုပ် ကိုကိုလွင် ကို လက်ရှိစွမ်းအင် ဝန်ကြီးအဖြစ် ခန့်အပ်ခဲ့ပြီး လက်ရှိမှာလည်း ဦးကိုကိုလွင်က ပန်းတောင်းမြို့နယ်ပြည်သူ့လွှတ်တော် အမတ်အဖြစ် ကြံ့ခိုင်ရေးပါတီကနေ အနိုင်ရထားပါတယ်။

ဗိုလ်ချုပ် ကိုကိုလွင်နဲ့ ကပစတပ်က အင်ဂျင်နီယာအရာရှိတွေဟာ နေပြည်တော်က စစ်ခေါင်းဆောင် မင်းအောင်လှိုင်ဦးဆောင်တည်တဲ့ မာရဝိဇယဘုရားကို ဦးစီးတည်ဆောက်ခဲ့တာဖြစ်ပြီး အဲ့ဒီဘုရားပြီးစီးချိန် ၂၀၂၃ နှစ်လယ်ပိုင်းမှာ စွမ်းအင်ဝန်ကြီး ဖြစ်လာခဲ့တာလည်း ဖြစ်ပါတယ်။

မြေလတ်အသံ၊ မတ် ၁၈၊ ၂၀၂၆။

အရှေ့အလယ်ပိုင်းစစ်ပွဲစတင်ဖြစ်ပွားခဲ့ပြီးနောက် ထိုင်းနိုင်ငံကို ဦးတည်ပျံသန်းမယ့် လေယာဉ်ခရီးစဉ်ပေါင်း ၁ ထောင်ခန့် ဖျက်သိမ်းခဲ့ရကြောင်း ထိုင်းလေကြောင်းရေဒီယို (Aeronautical Radio of Thailand) က ထုတ်ပြန်ထားတယ်လို့ Bangkok Post သတင်းဌာနမှာ ဖော်ပြပါတယ်။

ဖေဖော်ဝါရီ ၂၈ ရက်မှာ အမေရိကန်နဲ့ အစ္စရေးတို့က တီဟီရန်မြို့ကို တိုက်ခိုက်ခဲ့ရာကနေ ပဋိပက္ခတွေစတင်လာခဲ့ပြီးနောက် အရှေ့အလယ်ပိုင်းအခြေစိုက်လေကြောင်းလိုင်းတွေရဲ့ ခရီးစဉ်တွေအပေါ် သိသာထင်ရှားတဲ့ သက်ရောက်မှုတွေရှိလာခဲ့ကြောင်း Aerothai ရဲ့ ခေတ္တဥက္ကဋ္ဌဖြစ်သူ Mr. Surachai Nuprom က ဗုဒ္ဓဟူးနေ့မှာ ပြောကြားခဲ့တယ်လို့ ဆိုပါတယ်။

အရှေ့အလယ်ပိုင်းရှိ လေကြောင်းလိုင်းတွေဟာ ထိုင်းနိုင်ငံကို ပျံသန်းမယ့် ခရီးစဉ်ပေါင်း ၁ ထောင်ခန့်ကို ဖျက်သိမ်းခဲ့ကြောင်းသိရပြီး ခရီးစဉ် ၆၀၀ ခန့်မှာ သုဝဏ္ဏဘူမိလေဆိပ်ကို ဆင်းသက်မယ့်ခရီးစဉ်တွေဖြစ်ပြီး ၄၀၀ ခန့်မှာ ဖူးခက်လေဆိပ်ကို ဆင်းသက်မယ့် ခရီးစဉ်တွေဖြစ်တယ်လို့ ၎င်းက ပြောကြားခဲ့ပါတယ်။

ဒါ့အပြင် ခရာဘီ၊ ချင်းမိုင်နဲ့ ဒွန်မောင်းလေဆိပ်တွေမှာလည်း အလားတူ လေယာဉ်ခရီးစဉ် ဖျက်သိမ်းမှုတွေ ရှိခဲ့ပြီး ရပ်နားလိုက်ရတဲ့ လေယာဉ်ခရီးစဉ်တွေဟာ ဆိုက်ရောက်ခရီးစဉ်အားလုံးရဲ့ ၃ ရာခိုင်နှုန်းခန့်ရှိတယ်လို့ Bangkok Post က ဖော်ပြပါတယ်။

အရှေ့အလယ်ပိုင်း မငြိမ်မသက်မှု၊ လေကြောင်းပိုင်နက်ပိတ်ထားမှုနဲ့ လက်ရှိ စွမ်းအင်အကျပ်အတည်းတွေကြောင့် လေကြောင်းလိုင်းတွေက လေယာဉ်လက်မှတ်ခတွေကို တိုးမြှင့်လိုက်ပြီး လေကြောင်းခရီးသွားလာမှု လျော့နည်းသွားတာကြောင့် ယခုနှစ်မှာ လေကြောင်းကဏ္ဍအနေနဲ့ ယခင်နှစ်ထက် ၃ ရာခိုင်နှုန်းခန့်သာ တိုးတက်နိုင်တော့မှာဖြစ်တယ်လို့ Mr. Surachai က ပြောကြားခဲ့ပါတယ်။

Source – Bangkok Post

ညောင်လေးပင်၊ မတ် ၉၊ ၂၀၂၆။

ပဲခူးတိုင်း၊ ညောင်လေးပင်မြို့နယ်အတွင်းကျေးရွာတွေကနေ ဖမ်းဆီးခံထားရတဲ့ ဒေသခံ ၄၀ ကျော်ကို စစ်ကော်မရှင်စစ်ကြောင်းက သတ်ဖြတ်ခဲ့တယ်လို့ မတ်လ ၉ ရက်ဒီကနေ့မှာ အမျိုးသားညီညွတ်ရေးအစိုးရ – NUG ကာကွယ်ရေးဝန်ကြီးဌာနက ထုတ်ပြန်ပါတယ်။

တပ်မ ၇၇ ဦးဆောင်တဲ့ အင်အား ၁၀၀ ကျော်ပါစစ်ကြောင်း ၄ ကြောင်းက မတ်လ ၅ ရက်မနက် ၅ နာရီဝန်းကျင်မှာ ရေတွင်းကန်း၊ ခရုကုန်းနဲ့ ကျောင်းကုန်းရွာ တွေကိုဝင်ရောက်ကာ ဒေသခံ ၃၀၀ ကျော်ကို ဖမ်းဆီးပြီး အဲ့ဒီထဲက ၄၀ ကျော်ကို သတ်ဖြတ်ခဲ့တာလို့ ဆိုပါတယ်။

အသတ်ခံရသူတွေထဲမှာ ကလေး ၃ ဦး၊ ကိုယ်ဝန်ဆောင်အမျိုးသမီး ၁ ဦးနဲ့ သက်ကြီးရွယ်အိုတွေလည်း ပါဝင်တယ်လို့လည်း ထုတ်ပြန်ချက်မှာ ဖော်ပြထားပါတယ်။

မန္တလေး၊၂၀၂၆၊မတ်၉။

မန္တလေးမြို့နဲ့ ပြင်ဦးလွင်မြို့ရှိ ရပ်ကွက်တွေမှာ ကား၊ ဆိုင်ကယ်ဆီဖြည့်ပါက စုံ၊ မ ကန့်သတ်ချက်အပြင် ဝှီးတက် (Wheel Tag) နဲ့ ဒစ်စဝိုင်း(Disk/Disc)ကဒ်တွေပါမှသာ ဆီဖြည့်ခွင့်ရမယ်ဆိုပြီး စစ်ကော်မရှင်လက်အောက်ခံအုပ်ချုပ်ရေးအဖွဲ့တွေက လိုက်လံအသိပေးကြေညာခဲ့တယ်လို့ ဒေသခံတွေဆီက သိရပါတယ်။

မတ်လ ၈ ရက်မှာ ပြင်ဦးလွင်မြို့နဲ့ မတ်လ ၅ ရက်က မန္တလေးမြို့ပေါ်ရပ်ကွက်တွေမှာ သက်ဆိုင်ရာရပ်ကွက်အုပ်ချုပ်ရေးရုံးက လိုက်လံကြေညာတာဖြစ်ပြီး ကားဆိုရင် ဝှီးတက်၊ ဆိုင်ကယ်ဆိုရင် ဒစ်စဝိုင်းကဒ်ပါရမယ်လို့ကြေညာခဲ့တာလို့ ဆိုပါတယ်။

ဒါ့အပြင် ဆိုင်ကယ် ၁ စီးကို ၁ ကြိမ် ဓါတ်ဆီ ၂ လီတာ၊ သုံးဘီး ၁ စီးကို ၄ လီတာနဲ့ အိမ်စီးကား ၁ စီးကို ၁၂ လီတာသာ ရောင်းချသွားမယ်လို့လည်း သိရပါတယ်။

“အဓိက က လိုင်စင်မဲ့ယာဉ်တွေ ပေးမရောင်းတော့ဘူးလို့ သိရတယ်။ ဒါပေမယ့် ၁ ကြိမ်ကို ၂ လီတာပဲ ရောင်းတာကျ လုပ်ငန်းသုံးဆိုင်ကယ်‌တွေအတွက် အဆင်မပြေဘူး။ စုံ၊မ ရက်ကလည်းခွဲထားတော့ ၁ ရက် ၁ လီတာပဲ ပေးသုံးသလိုဖြစ်နေတာ။ အဓိကကတော့ ပစ္စည်းပို့တဲ့သူတွေ ခက်ခဲကုန်တာပေါ့”လို့ ‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌မြို့ခံတဦးက ပြောပါတယ်။

စစ်ကော်မရှင်က ယခုမတ်လ ၇ ရက်ကစတင်ပြီး ယာဉ်မောင်းနှင်ခွင့်ကို စုံနံပါတ်ယာဉ်တွေက စုံရက်မှာ မောင်းရမှာဖြစ်ပြီး မနံပါတ်ယာဉ်တွေဟာ မရက်မှာ မောင်းနှင်ရမယ်လို့ သတ်မှတ်ထားခဲ့တာပါ။

ဒါပေမယ့် သတ်မှတ်တဲ့ရက်ကနေ မတ်လ ၁၃ ရက်အထိ ပညာပေးကာလသတ်မှတ်ထားကာ ၁၃ ရက် နောက်ပိုင်းမလိုက်နာတဲ့ ယာဉ်တွေကိုဒဏ် ငွေ ၂ သောင်း၊ ထောင်ဒဏ် ၁ လ၊ ဒဏ် ၂ ရပ်လုံးချမှတ်သွားမယ်လို့ မတ်လ ၆ ရက်မှာ ထုတ်ပြန်ကြေညာထားခဲ့ပါတယ်။

သတင်း – MG

မန္တလေး၊ မတ် ၇၊ ၂၀၂၆။

မန္တလေးမြို့၊ ပြည်ကြီးတံခွန်မြို့နယ်၊ စက်မှု ၁ ရပ်ကွက်ရှိ သံရည်ကျိုအလုပ်ရုံ ၁ ခုမှာ သံတိုသံစရွေးနေစဉ် ပေါက်ကွဲမှုဖြစ်ပြီး အမျိုးသား ၃ ဦးနဲ့ အမျိုးသမီး ၃ ဦး ထိခိုက်ဒဏ်ရာရခဲ့တယ်လို့ မြို့ခံတွေက ပြောပါတယ်။

စက်မှု ၁၊ ၄၇လမ်း၊၁၄၂ (A) လမ်းထောင့်ရှိ၊ စိန်စွန်ညိုသံရည်ကျိုလုပ်ငန်းအတွင်း မတ်လ ၆ ရက် ယမန် နေ့ညနေပိုင်းက သံတိုသံစအမျိုးအစားခွဲခြားမှုလုပ်ဆောင်နေစဉ် ပေါက်ကွဲမှုဖြစ်ခဲ့တာလို့ ဆိုပါတယ်။

“လက်ပစ်ဗုံးပါလာတယ်လို့ ကြားတာပဲ။ ပေါက်ကွဲသံက တော်တော်ကျယ်တာ။ ခဏနေတော့ စစ်သားနဲ့ပျူတွေ ရောက်လာတယ်။ ဘာပေါက်ကွဲတာလို့ တိတိကျကျတော့ မသိဘူး”လို့ ဖြစ်စဥ်ကိုသိရှိတဲ့ မြို့ခံတဦးက မြေလတ်အသံကို ပြောပါတယ်။

ပေါက်ကွဲမှုကြောင့် သံရည်ကျိုလုပ်ငန်းအလုပ်သမားတွေဖြစ်တဲ့ ငါးဇွန်နဲ့ ပြည်ကြီးတံခွန်မြို့နယ်နေ ဒေါ်သင်းလဲ့ ၅၀ နှစ်၊ မောင်နေထူးအောင် ၁၈ နှစ်၊ မောင်ယဉ်အောင် ၂၆ နှစ်၊ မစန်းမာထွေး ၂၈ နှစ်၊ မသဲစုလှိုင် ၂၄ နှစ် နဲ့ ကိုသန်းနိုင်ဦး ၂၆ နှစ်တို့ ၆ ဦး ထိခိုက်ဒဏ်ရာတွေ အသီးသီးရရှိခဲ့တာပါ။

ဒဏ်ရာရရှိသူတွေကို မန္တလေးဆေးရုံကြီးမှာ ကုသမှုပေးနေပြီး အဲ့ဒီထဲက ဒေါ်သင်းလဲ့နဲ့ မောင်နေထူး အောင်တို့ ၂ ဦးမှာ ဒဏ်ရာပြင်းထန်(စိုးရိမ်ရ)တယ်လို့လည်း သိရပါတယ်။

ပြည်ကြီးတံခွန်မြို့နယ်ဟာ ပေါက်ကိုယ်တော်ရဲ့ ပျူစောထီးအဖွဲ့ တွေကြီးစိုးတဲ့နယ်မြေဖြစ်ပြီး ၂၀၂၅ အောက်တိုဘာလအတွင်းမှာလည်း ပြည်ကြီးတံခွန်မြို့နယ် (စ) ရပ်ကွက်က သံတိုသံစရောင်းဝယ်‌ရေး ၁ ခုမှာ ပေါက်ကွဲမှုဖြစ်တာကြောင့် မိန်းကလေးငယ် ၁ ဦး သေဆုံးခဲ့ပါသေးတယ်။

သတင်း – MG

ကောလင်း၊ မတ် ၆၊ ၂၀၂၆။

စစ်ကိုင်းတိုင်း၊ ကောလင်းမြို့နယ်အရှေ့ခြမ်းရှိ ကချင်ကုန်းရွာကို စစ်ကော်မရှင်တပ်က ဗုံးကြဲတိုက်ခိုက်ခဲ့တာကြောင့် ကိုယ်ဝန်သည်အမျိုးသမီးအပါအဝင် အမျိုးသမီး ၂ ဦးသေဆုံးပြီး အမျိုးသား ၂ ဦး ဒဏ်ရာရခဲ့တယ်လို့ ဒေသခံတွေက ပြောပါတယ်။

မတ်လ ၅ ရက် မနေ့ကညနေ ၄ နာရီ ၄၀ မိနစ်မှာ စစ်ကော်မရှင်တပ်က စစ်ရေးလှုပ်ရှားမှုမရှိဘဲ ဂျက်ဖိုက်တာနဲ့ ရွှေဘို- မြစ်ကြီနား ကားလမ်းဘေးရှိ ကချင်ကုန်းရွာကို ဗုံးကြဲချိန် အမျိုးသား ၁ ဦးဒဏ်ရာရပြီး ဆိုင်ကယ်နဲ့စျေးရောင်းနေတဲ့ အသက် ၄၀‌ အရွယ်ကိုယ်ဝန်သည်အမျိုးသမီး ၁ ဦး သေဆုံးခဲ့တယ်လို့ ဆိုပါတယ်။

” (ကိုယ်ဝန်သည်အမျိုးသမီးကို) ဆေးမကုလိုက်ရဘူး။ လမ်းမှာတင်သေသွားတာ”လို့ ဒေသခံတဦးက ပြောပါတယ်။

‌အဲ့ဒီဂျက်ဖိုက်တာဟာ ကချင်ကုန်းရွာကိုဗုံးကြဲပြီးနောက် ရှောက်ပင်ချုံရွာဘုန်းကြီး ကျောင်းကိုလည်း သုံးကြိမ်ဗုံးကြဲရာ ကျောင်းစောင့်လင်မယားကို ဗုံးစထိမှန်ခဲ့ပြီး ၄၀ ကျော်အရွယ်အမျိုးသမီးဖြစ်သူဟာ နေရာမှာတင်ပွဲချင်းပြီး သေဆုံးခဲ့တာလို့ သိရပါတယ်။

ပြီးခဲ့တဲ့ မတ်လ ၁ ရက်‌ကလည်း စစ်ကော်မရှင်တပ်က ပင်လည်ဘူးမြို့နယ်တောင်ခြမ်းရှိ လိပ္ပုတ်ရွာကို လေကြောင်းတိုက်ခိုက်ခဲ့တာကြောင့် ပြည်သူ ၈ ဦး သေဆုံးခဲ့ပါသေးတယ်။

သတင်း – MG