MLAT

ရွှေဘို၊ ဖေဖော်ဝါရီ ၂၄၊ ၂၀၂၆။

စစ်ကိုင်းတိုင်း၊ ရွှေဘိုခရိုင်၊ ဝက်လက်မြို့နယ်အတွင်း စစ်ရေးလှုပ်ရှားနေတဲ့ ပြည်သူ့ကာကွယ်ရေးတပ်မတော် – PDF ရွှေဘိုခရိုင်တပ်ရင်း ၁၅ တပ်ခွဲ ၃ က တပ်ဖွဲ့ဝင် ၂၀ ကျော် PDF အဖြစ်ကနေ နုတ်ထွက်သွားတယ်လို့ အဲ့ဒီတပ်ခွဲထံက သိရပါတယ်။

တပ်ခွဲ ၃ တပ်ဖွဲ့ဝင် ၂၀ ကျော်ဟာ ရွှေဘိုခရိုင်တပ်ရင်း ၁၅ ထံ ပြီးခဲ့တဲ့ ဒီဇင်ဘာလအတွင်းက နုတ်ထွက်စာတင်ပြခဲ့ပြီးနောက် ၂ လကျော်အကြာ ဖေဖော်ဝါရီ ၂၂ ရက်မှာ ထုတ်ယူထားတဲ့လက်နက်ခဲယမ်းနဲ့တွေကို ပြန်လည်အပ်နှံပြီး နုတ်ထွက်ခဲ့တာလို့ ဆိုပါတယ်။

” နုတ်ထွက်စာတင်ထားတာ ၂ လလောက်ရှိပြီး။ ခွဲ ၃ ကရဲဘော်တွေက အဆင်မပြေတော့ဘူး။ ရဲဘော်တွေမှာ ကုန်ထမ်းစားနေရတယ်။ အထက်ကလည်း ဘာမှ မထောက်ပံတော့ကျ ကြာရှည်ကလည်း မရပ်တည်နိုင်တော့ဘူး။ အကြွေးတွေလည်းနစ်နေပြီ။ အဲဒါကြောင့်မို့ပါ ” လို့ PDF အဖြစ်ကနေ နုတ်ထွက်လိုက်တဲ့ တပ်ခွဲ ၃ တပ်ခွဲမှူးဟောင်း ဗိုလ်ချုပ် က မြေလတ်အသံကို ပြောပါတယ်။

လက်ရှိမှာ PDF အဖြစ်ကနေ နုတ်ထွက်လာခဲ့ပေမယ့် ထောက်ပို့ပြည်သူတွေအဖြစ် ဆက်လက်ရပ်တည်သွားမှာဖြစ်တယ်လို့ တပ်ခွဲမှူးဟောင်း ဗိုလ်ချုပ် က ဆက်ပြောပါတယ်။

ရွှေဘိုခရိုင်တပ်ရင်း ၁၅ ကနေ ထုတ်ယူထားတဲ့ သေနတ် ၁၀ လက်၊ ခဲယမ်းနဲ့စစ်အသုံးအဆောင်ပစ္စည်းတွေကို တပ်ရင်းမှူးထံ တိုက်ရိုက်အပ်နှံပြီးနုတ်ထွက်တာမဟုတ်ဘဲ တိုက်နယ်ပကဖကနေတဆင့် အပ်နှံခဲ့တာလို့ သိရပါတယ်။

တပ်ခွဲ ၃ က အပ်နှံတဲ့ စစ်လက်နက်ခဲယမ်းတွေကို လက်ခံထားတဲ့ တိုက်နယ်ပကဖတွေကတဆင့် ရွှေဘိုခရိုင်တပ်ရင်း ၁၅ တပ်ရင်းမှူးထံကို ယမန်နေ့ ဖေဖော်ဝါရီ ၂၃ ရက်မှာ ဆက်လက်လွှဲပြောင်းပေးပြီးဖြစ်တယ်လို့ ဖြစ်စဥ်အခြေအနေကိုသိထားတဲ့ ဒေသအခြေစိုက် PDF အဖွဲ့ဝင်တဦးက ပြောပါတယ်။

” ခွဲ ၃ ဗိုလ်ချုပ်တို့အဖွဲ့က ဗိုလ်ကောက်ရိုးနဲ့အဆင်မပြေတာလို့တော့ သိရတယ်။ အဲဒီတော့ တပ်ရင်းကတပ်ဆင်ထားတဲ့ အီကွေးမန့်(ချပ်ဝတ်တန်ဆာ)၊ လက်နက်ကအစ တိုက်နယ်ကိုအသိသက်သေထားပြီး အပ်သွားတာလို့ သိရတယ်။ အဓိကထောက်ပံမှုမရှိတာ၊ ရင်းမှူးနဲ့အဆင်မပြေတာကြောင့်လို့တော့ သိရတယ်” လို့ ဒေသကာကွယ်ရေးအဖွဲ့ဝင်တဦးက ပြောပါတယ်။

PDF တွေအနေနဲ့ တပ်ဖွဲ့ဝင်အဖြစ်ကနေ နုတ်ထွက်လိုပါက သက်ဆိုင်ရာတပ်ရင်းကတဆင့် ဝန်ကြီးဌာနအဆင့်ဆင့်ကို တင်ပြပြီး ခွင့်ပြုချက်ရယူဖို့လိုအပ်တယ်လို့ ရွှေဘိုခရိုင်အတွင်းက တော်လှန်ရေးတပ်ဖွဲ့တခုရဲ့ခေါင်းဆောင်တဦးထံက သိရပါတယ်။

တပ်ခွဲ ၃ က ဗိုလ်ချုပ်တို့အဖွဲ့ဟာ ယခင်က LPDF အနေနဲ့ ရပ်တည်ခဲ့ပြီး ၂၀၂၂ အတွင်းမှာ အမျိုးသားညီညွတ်ရေးအစိုးရ-NUG လက်အောက်ရွှေဘိုခရိုင်တပ်ရင်း ၁၅ ရဲ့တပ်ခွဲ ၅ အနေနဲ့ဝင်ရောက်ခဲ့ပြီးနောက် ဗိုလ်ကောက်ရိုး တပ်ရင်းမှူးတာဝန်ရယူချိန်မှာ တပ်ခွဲ ၃ အဖြစ် ပြောင်းလဲဖွဲ့စည်းခဲ့တာလို့ သိရပါတယ်။

မြေလတ်အသံ၊ ဖေဖော်ဝါရီ ၁၈၊ ၂၀၂၆။

စစ်ကိုင်းတိုင်း၊ ပုလဲမြို့နယ်အတွင်း စစ်ရေးလှုပ်ရှားနေတဲ့ ဗမာ့အမျိုးသားတော်လှန်ရေးတပ် – BNRA တပ်ဖွဲ့ခေါင်းဆောင် ဗိုလ်နဂါး လက်နက်ခဲယမ်းတွေနဲ့အတူ လာရောက်ပူးပေါင်းလာတယ်လို့ စစ်ကော်မရှင်က ဒီကနေ့ညပိုင်းမှာ သတင်းထုတ်ပြန်ပါတယ််။

ဒီကနေ့ ညနေ ၄ နာရီ ၅၀ မိနစ်မှာ ဗိုလ်နဂါးနဲ့မိသားစုဟာ လက်နက်ငယ် ၆ လက်နဲ့အတူ ပုလဲမြိုနယ်အတွင်းက တပ်စခန်းတခုကို လာရောက်ပူးပေါင်းလာတာလို့ ထုတ်ပြန်ချက်က ဆိုပါတယ်။

ဖေဖော်ဝါရီ ၁၇ ရက် ယမန်နေ့မနက်အစောပိုင်းမှာ ပုလဲနယ်အတွင်းက BNRAနဲ့ GZA တပ်စခန်းတချို့ အမျိုးသားညီညွတ်ရေးအစိုးရ-NUG လက်အောက်တပ်တွေရဲ့ တိုက်ခိုက်မှုခံခဲ့ရပြီးတဲ့နောက် ပုလဲနယ် အတွင်း နှစ်ဖက်တပ်တွေအကြား စစ်ရေးတင်းမာနေခဲ့တာပါ။

တိုက်ခိုက်ခံရမှုကြောင့် BNRA တပ်ဖွဲ့ဝင် ၁၀ ဦးခန့်သေဆုံးတယ်လို့ ဗိုလ်နဂါးက ပြောဆိုထားပြီး တော်လှန်ရေးတပ်ဖွဲ့တွေအချင်းချင်းတိုက်ခိုက်မှုတွေအပေါ် လူမှုကွန်ယက်တွေမှာလည်း ဝေဖန်မှုတွေမြင့် တက်နေတာလည်း ဖြစ်ပါတယ်။

ဗိုလ်နဂါး စစ်ကော်မရှင်တပ်ထံပူးပေါင်းလာတဲ့ စစ်ကော်မရှင်ရဲ့ထုတ်ပြန်ချက်နဲ့ပတ်သက်ပြီး BNRA တပ်ဖွဲ့ထံ မြေလတ်အသံက ဆက်သွယ်နေပေမယ့် အဆက်အသွယ်မရသေးပါဘူး။

■ ရုပ်ရှင်ရုံတွေမှာ နိုင်ငံတော်အလံအလေးမပြု၊ နိုင်ငံတော်သီချင်းမဆိုတာတွေကိုတွေ့ရပြီး တိုင်းချစ်ပြည်ချစ်စိတ် အားနည်းနေတယ်လို့ ဆို

မြေလတ်အသံ၊ ဖေဖော်ဝါရီ ၄၊ ၂၀၂၆။

နိုင်ငံ့လူဦးရေရဲ့အများစုဟာ ကိုယ့်ကိုယ်ကိုယ်တိုးတက်အောင်ဆောင်ရွက်နိုင်မှုမရှိတဲ့အတွက် ဆင်းရဲမွဲတေမှုများနေတယ်လို့ အာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင် က ပြောဆိုလိုက်ပါတယ်။

ဖေဖော်ဝါရီ ၃ ရက် ယမန်နေ့က နေပြည်တော်၊ နိုင်ငံတော်ကာကွယ်ရေးတက္ကသိုလ် သင်တန်းသားအရာရှိကြီးတွေကို စစ်ခေါင်းဆောင်က Video Conferencing နဲ့ ပြောကြားမှုမှာ ပညာရေးကဏ္ဍနဲ့ပတ်သက်ပြီး ပြောကြားရာမှာ အခုလိုထည့်သွင်းပြောဆိုခဲ့တာပါ။

” နိုင်ငံ့လူဦးရေရဲ့အများစုဟာ မိမိတို့ကိုယ်ကိုဖွံ့ဖြိုးတိုးတက်ရေးကို ဆောင်ရွက်နိုင်မှုမရှိတဲ့အတွက် ဆင်းရဲမွဲတေမှုလည်း များပြားကြောင်း၊ ဆင်းရဲမွဲတေမှုများရှိနေသမျှကာလပတ်လုံး ပုဂ္ဂိုလ်ရေးခံစားချက်များရှိပြီး မနာလိုခြင်း၊ မကျေနပ်ခြင်းများ ဖြစ်ပေါ်နိုင်ကြောင်း” ဆိုကာ ပြောပါတယ်။

နိုင်ငံရဲ့သမိုင်းကြောင်းမှာ ဖြစ်ပေါ်ခဲ့တဲ့ နိုင်ငံမတည်ငြိမ်မှုဖြစ်စဥ်တွေဟာ ပညာရေးဆိုင်ရာ အားနည်းချက်ကြောင့်ဖြစ်တာကို တွေ့ရှိရတယ်လို့လည်း သူက ဆိုပါတယ်။

“ပညာရေးကဏ္ဍမြှင့်တင်ရေးကို မဖြစ်မနေဆောင်ရွက်ရမှာဖြစ်ကြောင်း၊ အခြေခံပညာကျောင်းများမှ စတင်၍ နိုင်ငံတော်အလံ အလေးပြုခြင်းများကို နေ့စဥ်ဆောင်ရွက်ရခြင်းအားဖြင့် နိုင်ငံချစ်စိတ်များဖြစ်ပေါ်လာမှာဖြစ်ကြောင်း၊ အဲ့ဒီလိုမဆောင်ရွက်ရသူများအနေဖြင့် နိုင်ငံချစ်စိတ် တစထက်တစလျော့နည်းလာမှာဖြစ်ကြောင်း၊ ဒ့ါကြောင့် ကျောင်းနေအရွယ်ကလေးငယ်များအားလုံး ကျောင်းနေစေရေး နိုင်ငံသားအားလုံး ဝိုင်းဝန်းဆောင်ရွက်သွားကြရန်လိုကြောင်း” ဆိုကာ ပြောပါတယ်။

စစ်ခေါင်းဆောင်ဟာ လက်ရှိဖြစ်ပေါ်နေတဲ့ နိုင်ငံမတည်ငြိမ်မှုတွေဟာ ပညာရေးအားနည်းတာကြောင့် ဆိုကာ မကြာခဏပြစ်တင်ဝေဖန်လေ့ရှိတာပါ။

ဒါ့အပြင် ရုပ်ရှင်ရုံတချို့မှာ နိုင်ငံတော်အလံကို အလေးမပြုတာ၊ နိုင်ငံတော်သီချင်းသီဆိုမှုမရှိတာတွေ သိရှိရပြီး အဲ့ဒီအပြုအမှုတွေကတဆင့် တိုင်းချစ်ပြည်ချစ်စိတ် အားနည်းနေတာကို တွေ့ရတယ်လို့ ပြောဆိုပါတယ်။

” နိုင်ငံသားတိုင်းအနေဖြင့် နိုင်ငံတော်ရဲ့ဖြစ်တည်မှု၊ ပထဝီဝင်အနေအထားနဲ့ အမျိုးသားရေးစရိုက်လက္ခဏာများ နိုင်ငံတော်နဲ့သက်ဆိုင်တဲ့ အထိမ်းအမှတ်တံဆိပ်များ၊ နိုင်ငံတော်အလံ၊ နိုင်ငံတော်သီချင်းတို့အပါအဝင် အထွဋ်အမြတ်ထားရမှာများကို လေးစားတန်ဖိုးထား ချစ်မြတ်နိုးကြရန်လိုကြောင်း၊ ဆိုရှယ်မီဒီယာပလက်ဖောင်းများမှာ ဖော်ပြချက်များအရ အချို့ရုပ်ရှင်ရုံများမှာ နိုင်ငံတော်အလံကိုပင်အလေးမပြုကြသူများနဲ့ နိုင်ငံတော်သီချင်းသီဆိုခြင်းမရှိကြသည်ကို စိတ်မကောင်းဖြစ်ဖွယ်သိရှိရကြောင်း၊ အဲ့ဒီလိုအပြုအမှုများကို ကြည့်ခြင်းအားဖြင့် နိုင်ငံသားတိုင်းအနေဖြင့် တိုင်းချစ်ပြည်ချစ်စိတ်အားနည်းနေတာကို တွေ့ရကြောင်း” လို့ ပြောပါတယ်။

မြေလတ်အသံ၊ ဇန်နဝါရီ ၃၁၊ ၂၀၂၆။

ရှော့တိုက်ဒုံးထိမှန်တယ်လို့ သတင်းတွေထွက်ပေါ်ခဲ့တဲ့ မန္တလေး၊ အလယ်ပိုင်းတိုင်းစစ်ဌာနချုပ် (လပခ) တိုင်းမှူး ဗိုလ်မှူးချုပ် တင်မင်းလတ် စစ်ဆေးရုံမှာလူနာကြည့်ရှုခဲ့ကြောင်း စစ်တပ်ပိုင်မြဝတီရုပ်သံက ယမန်နေ့ညပိုင်းမှာ သတင်းထုတ်ပြန်လာပါတယ်။

နန်းတွင်းအခြေစိုက် အမှတ် ၁ စစ်မြေပြင်ဆေးတပ်ရင်း (မဆရ ၁) ဆေးရုံမှာ တက်ရောက်နေတဲ့ လူနာတွေကို တိုင်းမှူး တင်မင်းလတ် က ယမန်နေ့ ဇန်နဝါရီ ၃၀ ရက်မှာ သွားရောက်ကြည့်ရှုခဲ့တယ်လို့ ညပိုင်းသတင်းရုပ်သံမှာ ထုတ်ပြန်လာတာပါ။

ဇန်နဝါရီ ၂၇ ရက်က စစ်ခေါင်းဆောင် မင်းအောင်လှိုင် တည်းခိုနေတဲ့ မန္တလေးနန်းတွင်း လပခအတွင်းကို ရှော့တိုက်ဒုံး ၅ လုံးနဲ့ ပစ်ခတ်ခဲ့ကြောင်း၊ ပစ်ခတ်မှုအတွင်း လပခတိုင်းမှူးနေအိမ်ထိမှန်ခဲ့ပြီး ဗိုလ်မှူးချုပ်အဆင့်ထက်မနိမ့်သော စစ်အရာရှိကြီး ၁ ဦးထိမှန်ကာ ပြင်ဦးလွင်စစ်ဆေးရုံကို ပို့ဆောင်ထားရကြောင်း BWM အဖွဲ့က သတင်းထုတ်ပြန်လာပြီးနောက် တိုင်းမှူး ဗိုလ်မှူးချုပ် တင်မင်းလတ် ရှော့ဒုံးထိမှန် ဒဏ်ရာစိုးရိမ်ရတယ်ဆိုကာ သတင်းတွေ ဆက်လက်ထွက်ပေါ်လာတာပါ။

စစ်ကော်မရှင်တပ်သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ် ဇော်မင်းထွန်း ကတော့ နန်းတွင်း လပခ ကို ရှော့တိုက်ဒုံးကျရောက်ပေါက်ကွဲမှုမရှိကြောင်း၊ သတင်းမှားများဖြစ်ကြောင်း ၎င်းတို့ကို ထောက်ခံရေးသားနေတဲ့ သတင်းမီဒီယာတွေကတဆင့် ငြင်းဆန်ထားပါတယ်။

လပခနဲ့ ကျုံးမြို့ရိုးအနီးနေထိုင်သူမန္တလေးမြို့ခံတဦးကတော့ အခင်းဖြစ်နေ့က နန်းတွင်းလပခနဲ့အနီးတဝိုက်မှာ ပေါက်ကွဲသံတစုံတရာမကြားရကြောင်း ပြောပါတယ်။

” ကျုံးတောင်ဘက်ရော မြောက်ဘက်ရော ဘာသံမှမကြားပါဘူး။ ၂၈ ရက်နေ့က မြို့ထဲနေရာ ၄ ခုလောက်ကို စစ်တပ်က ဝင်စီးတာတော့ကြားလိုက်တယ်။ ကျန်တာတော့ဘာမှမကြားဘူး” လို့ သူက ပြောပါတယ်။