မြေလတ်အသံ၊ နိုဝင်ဘာ ၂၃၊ ၂၀၂၅။
မြေလတ်ဒေသကသတင်းတွေကို တင်ဆက်ပေးနေတဲ့ မြေလတ်အသံသတင်းဌာနရဲ့ တနေ့တာသတင်း အစီအစဉ်ဖြစ်ပါတယ်။
စတဲ့သတင်းတွေကို တင်ဆက်ထားပါတယ်။
မြေလတ်အသံ၊ နိုဝင်ဘာ ၂၂၊ ၂၀၂၅။
ဒီနေ့ညယှဉ်ပြိုင်ကစားနေတဲ့ ပရီးမီးယားလိဂ် ပွဲစဉ် ၁၂ မှာ လက်ရှိချန်ပီယံ လီဗာပူးလ်အသင်းက နော်တင်ဟမ်ဖောရက်စ်ကို ၃ ဂိုး ဂိုးမရှိနဲ့ ဂိုးပြတ်ရှုံးနိမ့်ခဲ့ပါတယ်။
လီဗာပူးလ်က ဆိုဘော့ဇ်လိုင်းကို ညာနောက်ခံလူအဖြစ် ပွဲထွက်ခဲ့ပြီး ဂက်ပို၊ အီဆက်၊ ဆာလာ တိုက်စစ်အတွဲနဲ့ ပွဲထွက်လာခဲ့ကာ ဘောလုံးပိုင်ဆိုင်မှု ၇၅ ရာခိုင်နှုန်းအထိ ရယူထားနိုင်ခဲ့ပေမယ့် သွင်းဂိုးတွေတော့ ရယူနိုင်ခြင်းမရှိခဲ့ပါဘူး။
ပထမပိုင်း ၃၃ မိနစ်မှာ ဖောရက်စ်ရဲ့ တလုံးတည်းသော ထောင့်ကန်ဘောကနေ နောက်ခံလူ မူရီလို က အပြင်းကန်သွင်းပြီး ဖောရက်စ်အသင်း ဦးဆောင်ဂိုးရရှိခဲ့ပေမယ့် ဂိုးပေါက်ကန်သွင်းမှု ၁၀ ကြိမ်အထိရှိခဲ့တဲ့ လီဗာပူးလ်ကတော့ သွင်းဂိုးမရရှိခဲ့လို့ ပထမပိုင်းကို ၀-၁ ရလဒ်နဲ့ ပြီးဆုံးခဲ့ပါတယ်။
ဒုတိယပိုင်းစစချင်းမှာပဲ ဖောရက်စ်အတွက် ဒုတိယသွင်းဂိုးကို နောက်ခံလူ ဆဗွန်နာက ထပ်မံသွင်းယူခဲ့လို့ လီဗာပူးလ်အတွက် ပိုမိုခက်ခဲလာခဲ့ပြီး ပွဲကစားချိန် ၇၈ မိနစ်မှာ ဂစ်ဘ်ဝှိုက်ရဲ့ သွင်းဂိုးကို ထပ်မံခွင့်ပြုခဲ့ပြီးတဲ့နောက် လီဗာပူးလ်အသင်း ပြန်မလာနိုင်တော့ဘဲ ၀-၃ ရလဒ်နဲ့ ဂိုးပြတ် ရှုံးနိမ့်ခဲ့ရတာပါ။
ဒဏ်ရာရကစားသမားအချို့ရှိနေပေမယ့် နည်းပြ အာနေးဆလော့အနေနဲ့ အကောင်းဆုံးလူစာရင်းကို ပွဲထုတ်ခဲ့တာဖြစ်ပြီး အိမ်ကွင်းမှာ ဂိုးပြတ်ရှုံးနိမ့်ခဲ့ရတာဟာ ချန်ပီယံပြေးလမ်းပေါ်ပြန်တက်ဖို့ ကြိုးစားနေတဲ့လီဗာပူးလ်အတွက် ပိုမိုခက်ခဲတဲ့ အခြေအနေ ဖြစ်ခဲ့ရပါတယ်။
မန်စီးတီးနဲ့ ဖောရက်စ်တို့ကို ၂ ပွဲဆက် ၃ ဂိုးပြတ်ရှုံးခဲ့တဲ့ လီဗာပူးလ်ဟာ လက်ရှိမှာ အဆင့် ၁၁ အထိ (ယာယီ)ရောက်ရှိသွားခဲ့ပြီး အန်ဖီးလ်မှာ နိုင်ပွဲရှာဖွေခဲ့တဲ့ နော်တင်ဟမ်ဖောရက်စ်ကတော့ အဆင့် ၁၆ နေရာမှာ (ယာယီ) ရပ်တည်နေပါတယ်။
ဒါ့အပြင် စနေနေ့ည အခြားသောပွဲစဉ်တွေမှာတော့ ချဲလ်ဆီး၊ ဘရိုက်တန်၊ ဖူလ်ဟမ်နဲ့ ခရစ္စတယ်ပဲလေ့စ်တို့ အနိုင်ရရှိခဲ့ကြပြီး ဘုန်းမောက်နဲ့ဝက်ဟမ်းကတော့ ၂ ဂိုးစီ သရေရလဒ် ထွက်ပေါ်ခဲ့ပါတယ်။
မြေလတ်အသံ၊ နိုဝင်ဘာ ၂၂၊ ၂၀၂၅။
မြေလတ်ဒေသကသတင်းတွေကို တင်ဆက်ပေးနေတဲ့ မြေလတ်အသံသတင်းဌာနရဲ့ တနေ့တာသတင်း စတဲ့သတင်းတွေကို တင်ဆက်ထားပါတယ်။
စတဲ့သတင်းတွေကို တင်ဆက်ထားပါတယ်။
မြေလတ်အသံ၊ နိုဝင်ဘာ ၂၂၊ ၂၀၂၅။
ထိုင်းနိုင်ငံတောင်ပိုင်း၊ ထိုင်း – မလေးနယ်စပ်၊ ဆုန်ခလာခရိုင်၊ ဟတ်ယိုင်မြို့မှာ မိုးဆက်တိုက်ရွာသွန်းခဲ့လို့ ရေကြီးရေလျှံနေပြီး အစိုးရက အနီရောင်အဆင့် အရေးပေါ်အခြေအနေကြေညာကာ ဒေသခံတွေကို ဘေးလွတ်ရာရွှေ့ပြောင်းပေးနေတယ်လို့ ထိုင်းဒေသတွင်းသတင်းတွေမှာ ဖော်ပြထားပါတယ်။
နိုဝင်ဘာ ၂၁ ရက် ည ၁၀ နာရီမှာ ဟတ်ယိုင်မြို့တော်ဝန်က အရေးပေါ်အခြေအနေ အနီရောင်အဆင့်ကြေညာပြီး ဒေသခံတွေကို ကုန်းမြင့်နေရာတွေနဲ့ ရေဘေးကင်းလွတ်တဲ့နေရာတွေကို စတင်ရွှေ့ပြောင်းပေးဖို့ ညွှန်ကြားခဲ့တယ်လို့ သိရပါတယ်။
၃ ရက်တာ မိုးသည်းထန်စွာရွာသွန်းခဲ့လို့ စုစုပေါင်းမိုးရေချိန် ၅၉၅ မီလီလီတာအထိရောက်ရှိခဲ့ကြောင်း မြို့တော်ဝန်က သတင်းထုတ်ပြန်ခဲ့ပါတယ်။
နိုဝင်ဘာ ၂၂ ရက် ဒီနေ့မနက်မှာတော့ ဝန်ကြီးချုပ် အနုတင်က နိုင်ငံတောင်ပိုင်းရေလွှမ်းမိုးမှုအတွက် တုန့်ပြန်မှုနဲ့ ကူညီကယ်ဆယ်ရေးအစီအစဉ်တွေ ကြိုတင်ပြင်ဆင်ထားပြီး လက်ရှိမှာ အရေးပေါ်ကူညီကယ်ဆယ်ရေးတွေ လုပ်ဆောင်ပေးနေတယ်လို့ ဆိုပါတယ်။
ref ; Bangkok Post , The Nation
Photo – The Nation
မြေလတ်အသံ၊ နိုဝင်ဘာ ၂၁၊ ၂၀၂၅။
မြေလတ်ဒေသကသတင်းတွေကို တင်ဆက်ပေးနေတဲ့ မြေလတ်အသံသတင်းဌာနရဲ့ တနေ့တာသတင်း စတဲ့သတင်းတွေကို တင်ဆက်ထားပါတယ်။
စတဲ့သတင်းတွေကို တင်ဆက်ထားပါတယ်။
မန္တလေး ၊ နိုဝင်ဘာ၂၁၊ ၂၀၂၅။
ပြည်သူ့ကာကွယ်ရေးတပ်မတော်(မန္တလေး) ဗဟိုဦးဆောင်ကော်မတီဝင်တွေဖြစ်တဲ့ တပ်ဖွဲ့ဌာနကြီးမှူး ၂ ဦးကို တန်ဖိုးကြီးတပ်ပိုင်ပစ္စည်းအလွဲသုံးစားမှုနဲ့ ဖမ်းဆီးထားတယ်လို့ MDY-PDF က ဒီကနေ့ နိုဝင်ဘာ ၂၁ ရက်မှာ ထုတ်ပြန်ပါတယ်။
ဖမ်းဆီးခံရသူတွေဟာ MDYPDF တပ်ဖွဲ့မှာ စစ်ရေးဌာနကြီးမှူးတာဝန်ယူထားတဲ့ ကိုမုန်တိုင်းနဲ့ ဘဏ္ဍာရှာဖွေရေးဌာနကြီးမှူး တာဝန်ယူထားတဲ့ ကိုနိုင်ကြီးတို့ဖြစ်ပြီး ၎င်းတို့ ၂ ဦးဟာ တပ်ပိုင်တန်ဖိုးကြီးဘဏ္ဍာပစ္စည်းတချို့ကို တရားမဝင်ထုတ်ယူသွားခဲ့ပြီး ပြန်လည်အပ်နှံခြင်းမရှိတာကြောင့် ဖမ်းဆီးခဲ့တာလို့ ဆိုပါတယ်။
ဒီဖြစ်စဥ်အတွက်ဩဂုတ်လကပြုလုပ်တဲ့တပ်ဖွဲ့တွင်းအစည်းအဝေးမှာ ၎င်းတို့ကိုယ်တိုင်တက်ရောက်ပြီး တပ်ဖွဲ့ကပေးတဲ့ ပြစ်ဒဏ်ကိုခံယူမှာဖြစ်သလို ပစ္စည်းတွေကိုလည်း ပြန်လည်အပ်နှံမှာဖြစ်ကြောင်း ပြောဆိုခဲ့ပေမယ့် ပြန်လည်အပ်နှံတာမရှိလို့ နိုဝင်ဘာ ၁၅ ရက်မှာ ဖမ်းဆီးခဲ့တာလို့ ထုတ်ပြန်ဖော်ပြပါတယ်။
လက်ရှိမှာ တပ်ဖွဲ့ဌာနကြီးမှူး ၂ ဦးရဲ့ လက်ရှိတာဝန်တွေအားလုံးကနေ ရပ်ဆိုင်းထားပြီး လက်နက်ဖြုတ်သိမ်းကာ အချုပ်ချအရေးယူထားတယ်လို့ ဆိုပါတယ်။
တပ်ဖွဲ့ဝင် ၂ ဦးဟာ ထိပ်ပိုင်းခေါင်းဆောင်တွေဖြစ်သလို ပြစ်မှုအရ တပ်တွင်းစီရင်ဆုံးဖြတ်ဖို့မသင့်တာကြောင့် အမျိုးသားညီညွတ်ရေးအစိုးရ – NUGMOD လက်အောက်ရှိ ပြည်သူ့ကာကွယ်ရေးတပ်မတော်၊ စစ်ရုံးချုပ်ကို အမှုတွဲပေးပို့ထားတယ်လို့ ထုတ်ပြန်ဖော်ပြထားပါတယ်။
မြေလတ်အသံ၊ နိုဝင်ဘာ ၂၀၊ ၂၀၂၅။
မြေလတ်ဒေသကသတင်းတွေကို တင်ဆက်ပေးနေတဲ့ မြေလတ်အသံသတင်းဌာနရဲ့ တနေ့တာသတင်း စတဲ့သတင်းတွေကို တင်ဆက်ထားပါတယ်။
စတဲ့သတင်းတွေကို တင်ဆက်ထားပါတယ်။
မြေလတ်အသံ၊ နိုဝင်ဘာ ၂၀၊ ၂၀၂၅။
ထိုင်းနိုင်ငံ၊ ချွန်ပူရီခရိုင်ရှိ စက်ရုံတခုမှာ မြန်မာအလုပ်သမား ယောက်ျားလေးတဦး ကြိတ်စက်ထဲပြုတ်ကျခဲ့ပြီး ကြေမွသေဆုံးသွားတယ်လို့ ထိုင်းဒေသတွင်းသတင်းတွေမှာ ဖော်ပြပါတယ်။
နိုဝင်ဘာ ၂၀ ရက် ဒီနေ့လယ် ဒေသစံတော်ချိန် ၁၂ နာရီခန့်မှာ ချွန်ပူရီခရိုင်၊ ဘန့်ဘိုင်မြို့နယ်၊ ခလောင်းခရီးဝ်ရပ်ကွက်ရှိ စက်ရုံတခုမှာ ကြိတ်စက်အတွင်းလူပြုတ်ကျသေဆုံးခဲ့ကြောင်း အကြောင်းကြားခဲ့လို့ ဒေသခံရဲတပ်ဖွဲ့နဲ့ ကယ်ဆယ်ရေးအဖွဲ့တွေ သွားရောက်စစ်ဆေးခဲ့တယ်လို့ ဆိုပါတယ်။
အဲ့ဒီစက်ရုံမှာ ကြိတ်စက်အကြီးစားတခုကို တွေ့ရှိခဲ့ရပြီး ကြိတ်စက်အတွင်း ကြေမွသေဆုံးနေတဲ့ အသက် ၂၄ နှစ်အရွယ် မြန်မာအလုပ်သမား ကိုဇော်ကို ရဲ့အစိတ်အပိုင်းတွေကို ကယ်ဆယ်ရေးသမားတွေက ဖယ်ထုတ်ပေးခဲ့ရတယ်လို့ သိရပါတယ်။
သေဆုံးသူ ကိုဇော်ကို ဟာ နာရီပေါင်းများစွာ အလုပ်လုပ်ခဲ့ရတာကြောင့် အိပ်ငိုက်ပြီး ကြိတ်စက်အတွင်းပြုတ်ကျသေဆုံးတယ်လို့ စုံစမ်းစစ်ဆေးရေးအဖွဲ့က ကနဦး ယူဆထားကြကာ ဥပဒေအရ အရေးယူဆောင်ရွက်မှုတွေလုပ်ဆောင်နိုင်ဖို့အတွက် လက်ရှိမှာ CCTV မှတ်တမ်းတွေကို ပြန်လည်ကြည့်ရှုတာအပါအဝင် လုပ်ဖော်ကိုင်ဖက်တွေကို ခေါ်ယူစစ်ဆေးမှုတွေ ပြုလုပ်နေတယ်လို့ သိရပါတယ်။
Ref ; Khaosod , Matichon Online
ရေတာရှည်၊ နိုဝင်ဘာ ၂၀၊ ၂၀၂၅။
ပဲခူးတိုင်းအရှေ့ခြမ်း ရေတာရှည်မြို့နယ်ပြည်သူ့ကာကွယ်ရေးတပ်ဖွဲ့(ပကဖ)ကို ထောက်ပံ့ပေးနေတဲ့ ထောက်ပို့အမျိုးသမီးတဦးကို ပြည်သူ့ကာကွယ်ရေးတပ်ဖွဲ့ – PDF တွေက ဖမ်းဆီးသတ်ဖြတ်ခဲ့တယ်လို့ မိသားစုနဲ့နီးစပ်သူတွေထံက သိရပါတယ်။
အသတ်ခံရသူမှာ လယ်ပြင်မကျေးရွာ၊ ကိုးပင်-သာဂရလမ်းပိုင်းမိုင်တိုင် ၃၂ အနီးနေ ကုန်စုံဆိုင်နဲ့ဆိုင်ကယ်အပိုပစ္စည်းအရောင်းဆိုင်ဖွင့်လှစ်ထားတဲ့ အသက် ၅၀ နှစ်ဝန်းကျင်ရှိ ဒေါ်ဆန်းမြင့်ဆိုသူအမျိုးသမီးဖြစ်ပြီး နိုဝင်ဘာ ၄ ရက် ည ၉ နာရီခန့်မှာ ၎င်းနေအိမ်ကို တောင်ငူခရိုင် PDF တပ်ရင်း ၃၅၀၁ တပ်ခွဲ ၅ တပ်ခွဲမှူး ဗိုလ်ကြက်သွန် ဦးစီးအင်အား ၁၀ ဦးကျော်က ဝင်ရောက်ဖမ်းဆီးခဲ့တာလို့ ဆိုပါတယ်။
” ဒေါ်ဆန်းမြင့်က အဲ့ဒီလမ်းမဘေးမှာ အိမ် ၂ လုံးနဲ့ သူတို့တအိမ် ကပ်လျက်မှာ သားတွေက တအိမ်အဲ့လိုနေတာ။ ပထမကအိမ်ကိုလေထိုးပိုက်ခဏငှားပါအုန်းဆိုပြီးတံခါးခေါက်တယ်တဲ့၊ ကလေးတွေက မထူးတော့ အိမ်ရှင်တို့ဆိုပြီးထပ်ခေါ်ပြီးမှ ခြံစည်းရိုးတွေဖြဲကားကျော်တက်ဝင်လာပြီး အကုန်ဒူးထောက်၊ လက်မြှောက်၊ ဝမ်းလျားမှောက်ထားဆိုပြီး ဒေါ်ဆန်းမြင့်ပါ ၃ ဦးကို ကောင်းထိုက်ဆိုင်ဘက်ကို ခေါ်ထုတ်သွားတာ” လို့ ဖြစ်စဥ်ကိုသိရှိတဲ့မိသားစုနဲ့နီးစပ်သူတဦးက မြေလတ်အသံကို ပြောပါတယ်။
အခင်းဖြစ်ပွားချိန်မှာနေအိမ်တွင်းမိသားစုဝင် ၆ ဦးရှိနေပြီး အဲ့ဒီထဲကဒေါ်ဆန်းမြင့်နဲ့အတူ အမျိုးသားဖြစ်သူ ဦးဝင်းသန်း၊ သားမက်ဖြစ်သူ တင်ထူးတို့ ၃ ဦးကို အထက်ပါတပ်ဖွဲ့ဝင်တွေက ပေ ၁၀၀ ခန့်အကွာရှိ ကောင်းထိုက်စျေးဆိုင်ဆီကို ဖမ်းဆီးခေါ်ဆောင်သွားတယ်လို့ သိရပါတယ်။
” ဦးကြက်သွန်က ဆန်းမြင့်ဆိုတာနင်လားလို့မေးတယ်။ (ဒေါ်ဆန်းမြင့်က)ဟုတ်တယ် ကျွန်မပဲလို့ ပြန်ဖြေတယ်။ ဒေါ်ဆန်းမြင့်ကယဥ်ယဥ်ကျေးကျေးပဲပြန်ဖြေတယ်။ နင်က ပကဖထောက်ပို့လား ဆိုပြီးမေးတယ်။ ဟုတ်တယ် ကျွန်မက ပကဖထောက်ပို့ပါဆိုပြီးဖြေတယ်။ နင်တို့ အဲ့ကိစ္စတွေရှင်းဖို့လာတာဆိုပြီး ကြက်သွန်ကပြောတယ်။ ပြီးတော့လူခွဲမယ်ဆိုပြီး ဒေါ်ဆန်းမြင့်ကိုခေါ်သွားတာ” လို့ သူကဆက်ပြောပါတယ်။
အဲ့ဒီနောက် ဒေါ်ဆန်းမြင့်တဦးတည်းကို သီးခြားဆက်လက်ချုပ်နှောင်ထားပြီး အမျိုးသားနဲ့သားမက်ဖြစ်သူအပါ ၎င်းတို့နေအိမ် ၂ ခုက မိသားစုဝင် ၁၀ ဦးကျော်ကို ကားလမ်းမဘေးတောတွင်းကနေအိမ်တခုမှာ ဆက်လက်ဖမ်းဆီးထားကာ နေအိမ်တွင်း ငွေနဲ့အဖိုးတန်ပစ္စည်းတွေကို သိမ်းယူခဲ့တယ်လို့ သိရပါတယ်။
နိုဝင်ဘာ ၅ ရက်မှာသီးခြားဖမ်းဆီးထားတဲ့ ဒေါ်ဆန်းမြင့်နဲ့တွေ့ခွင့်ပေးဖို့ မိသားစုဝင်တွေက တောင်းဆိုရာမှာ တပ်ခွဲ ၅ တပ်ဖွဲ့ဝင်တင့်ကား ဆိုသူက ဒေါ်ဆန်းမြင့်ကို သတ်လိုက်ပြီးဖြစ်ကြောင်းပြောဆိုခဲ့ကာ မိသားစုဝင်အားလုံးကိုလက်ရှိနေအိမ်တွေအပါ ကိုးပင်-သာဂရအပိုင် ၁၅ မိုင်အတွင်း ဆက်မနေကြဖို့ပြောဆိုကာ ပြန်လွှတ်ပေးခဲ့တာကြောင့် ဘေးလွတ်ရာကို ထွက်ပြေးလာကြရတယ်လို့ ဆိုပါတယ်။
” တင့်ကားဆိုသူပြောတာက ကလေးတွေတော့ ကယ်လို့ရမယ်။ ဒေါ်ဆန်းမြင့်ကိုတော့ မကယ်ပေးနိုင်တော့ဘူး။ ငါတို့သတ်ပစ်လိုက်ပြီ ဆိုပြီးပြောတယ်” လို့ ပြောပါတယ်။
ရေတာရှည်ပကဖအနေနဲ့ ဒေါ်ဆန်းမြင့် အသတ်ခံရတဲ့ဖြစ်စဥ်ကိုသိရှိထားပြီး ဒေါ်ဆန်းမြင့် ဟာ ၂၀၂၂ ကစတင်ကာတပ်ဖွဲ့အတွက် လစဥ်ငွေကျပ် ၁၀ သိန်းထောက်ပံ့တာအပြင် ရိက္ခာအတွက်ဆန်အိတ်၊ တပ်ဖွဲ့အသုံးပြုမယ့် ဆိုင်ကယ်၊ ဆေးဝါးတွေကို မကြာခဏထောက်ပံ့ပေးနေတာဖြစ်ပြီး ယခင်ကတည်းက NLD ပါတီဝန်းရံသူတဦးဖြစ်တယ်လို့ မြို့နယ်ပကဖဒုတာဝန်ခံက အတည်ပြုပြောပါတယ်။
” ဂုဏ်ပြုမှတ်တမ်းလွှာ တောင်းတာမျိုးတွေတော့ ဂုဏ်ပြုမှတ်တမ်းလွှာထုတ်ပေးရတာမျိုးတွေတော့ မရှိပါဘူး။ လျှို့ဝှက်သိပ်သည်းစွာ သူ့အနေနဲ့ ထောက်ပံ့တာမျိုးတွေတော့ ရှိခဲ့ဖူးတယ်။ အဲ့ဒီထောက်ပံ့တာတွေ အဓိက က သူ့အနေနဲ့ တိတိကျကျ တိတိပပနဲ့ထဲထဲဝင်ဝင် ထောက်ပံ့တာတွေကို ကျနော်တို့အနေနဲ့ မှတ်တမ်းမှတ်ရာတော့ လုပ်ထားတာတော့ ရှိပါတယ်ဗျ” လို့ ပြောပါတယ်။
ပကဖထောက်ပို့ ဒေါ်ဆန်းမြင့်ကို သတ်ခဲ့တယ်လို့ စွပ်စွဲခံထားရတဲ့ ၃၅၀၁ တပ်ရင်း တပ်ခွဲ ၅ ဗိုလ်ကြက်သွန်အဖွဲ့ကို မြေလတ်အသံက အကြိမ်ကြိမ် ဆက်သွယ်မေးမြန်းခဲ့ပေမယ့် သတင်းတင်ပြချိန်အထိ ဆက်သွယ်လို့မရခဲ့ပါဘူး။
ဖြစ်စဥ်နဲ့ပတ်သက်ပြီး တောင်ငူခရိုင် ၃၅၀၁ တပ်ရင်းကို ဆက်လက်မေးမြန်းရာမှာ တစုံတရာတုံ့ပြန်ပြောဆိုတာမရှိပါဘူး။
တပ်ရင်း ၃၅၀၁ နဲ့နီးစပ်သူတဦးကတော့ အခင်းဖြစ်ပွားခဲ့မှုမှန်ကန်ပြီး အသတ်ခံရသူအမျိုးသမီးဟာ စစ်တပ်ကို ထောက်ပံ့ပေးနေသူလို့ သတင်းတွေထွက်ပေါ်ထားတယ်လို့ ဆိုပါတယ်။
ဒေါ်စန်းမြင့်ဟာ အမျိုးသားဒီမိုကရေစီအဖွဲ့ချုပ်-NLD ပါတီဝန်းရံသူအမာခံတဦးဖြစ်ပြီး စစ်တပ်ကို ထောက်ပံ့ပေးနေတယ်ဆိုတဲ့သတင်းနဲ့ပတ်သက်လို့ နားလည်မှုလွဲမှားခြင်းသာဖြစ်နိုင်တယ်လို့ ရေတာရှည်ပကဖဒုတာဝန်ခံက သုံးသပ်ပါတယ်။
” ကျနော်တို့နဲ့ စတင်သိကတည်းကိုက သူက ၂၀၁၀ ရွေးကောက်ပွဲမတိုင်ခင်ကတည်းကိုက သူက NLD ဝန်းရံသူဖြစ်တယ်။ နောက်ပြီး ကျနော်တို့ ဒီပါတီတွေကို ထောက်ခံသူလည်း ဖြစ်တဲ့အတွက်ကြောင့် အဲ့ဒီစစ်တပ်နဲ့ပတ်သက်ပြီးတော့ ဒလန်လုပ်တယ်ဆိုတာကို ကျနော်တို့အနေနဲ့ တိတိကျကျ ပြောလို့မရဘူး။ ဒီကာလက မလွတ်ကင်းတဲ့လူတွေဆိုလို့ရှိရင် လမ်းဘေးမှာနေတယ်ဆိုလို့ရှိရင် စစ်တပ်လာလည်း သူတို့အနေနဲ့ မဖြစ်မနေပေါင်းရတာမျိုးတွေလည်း ရှိရင် ရှိနိုင်တာပေါ့။ ဒါနဲ့ပတ်သက်ပြီးတော့အထင်လွဲတာလည်းဖြစ်နိုင်တာပဲ။ ဒီဒလန်လို့စွပ်စွဲမယ်ဆိုရင်တော့ စစ်ကောင်စီထောက်တိုင်ဒလန်အများစုက ကျနော်တို့တော်လှန်ရေးအင်အားစုဘက်ထဲကို ထောက်ပို့အနေနဲ့ ဝင်လာတယ်ဆိုလို့ရှိရင်တောင်မှ သူ့အနေနဲ့အဖိုးထိုက်အဖိုးတန်တွေနဲ့ အင်တိုက်အားတိုက်လှူဒါန်းတာမျိုးပြုလုပ်ခဲ့မှာ မဟုတ်ဘူးလို့ ကျနော်တို့အနေနဲ့ သုံးသပ်လို့ရပါတယ်”
ဒေါ်ဆန်းမြင့်အသတ်ခံရတာနဲ့ပတ်သက်ပြီး မိသားစုဝင်တွေက ပဲခူးတိုင်းစစ်ဒေသထံ နိုဝင်ဘာ ၁၄ ရက်စွဲနဲ့ အီးမေလ်းကနေတဆင့် တိုင်စာပေးပို့တိုင်ကြားထားတယ်လို့ သိရပါတယ်။
ပဲခူးတိုင်းစစ်ဒေသဘက်ကတော့ မိသားစုဝင်တွေပေးပို့ထားတယ်ဆိုတဲ့ တိုင်စာကို လက်ခံရရှိတာမရှိဘူးလို့ နိုဝင်ဘာ ၁၉ ရက်မှာ မြေလတ်အသံကို ဖြေကြားထားပါတယ်။
မြေလတ်အသံ၊ နိုဝင်ဘာ ၁၉၊ ၂၀၂၅။
မြေလတ်ဒေသကသတင်းတွေကို တင်ဆက်ပေးနေတဲ့ မြေလတ်အသံသတင်းဌာနရဲ့ တနေ့တာသတင်း စတဲ့သတင်းတွေကို တင်ဆက်ထားပါတယ်။
စတဲ့သတင်းတွေကို တင်ဆက်ထားပါတယ်။