မှုခင်း

ဂန့်ဂေါ၊ အောက်တိုဘာ ၂၉၊ ၂၀၂၆။

မကွေးတိုင်း၊ ဂန့်ဂေါမြို့နယ်မှာ ဘုရားပွဲသွားရင်း သမီးရည်စားကိစ္စနဲ့ စကားများရန်ဖြစ်ထားတဲ့ လူငယ်တွေဆုံပြီး ခိုက်ရန်ဖြစ်ပွးရာ ၁၅ နှစ်အရွယ် ကလေး ၁ ဦး သေဆုံးပြီး ၃ ဦးဒဏ်ရာရတယ်လို့ ဒေသခံရွာသားတွေဆီက သိရပါတယ်။

အောက်တိုဘာလ ၂၆ ရက်နေ့ ညနေ ၃ နာရီခန့်က ဂန့်ဂေါမြို့နယ် လယ်မကျေးရွာက မောင်လမင်းခန့်နဲ့ သူငယ်ချင်း ၅ ဦးတို့ မဲနတ်တောင်ဘုရားပွဲကိုသွားရင်း မဲရွာအနီးမှာ သမီးရည်းစားကိစ္စနဲ့ စကားများဖူးတဲ့ မဲရွာသား မောင်နေမျိုးသူတို့အုပ်စုရောက်လာပြီး စကားများရန်ဖြစ်ကြခဲ့ကြတာ ဖြစ်ပါတယ်။

လယ်မရွာသား မောင်လမင်းခန့်နဲ့ မဲရွာသား မောင်နေမျိုးသူတို့ဟာ သမီးရည်းစားကိစ္စ စကားများထားကြသူတွေဖြစ်ပြီး၊ ဘုရားပွဲအသွား မဲရွာအနီးမှာ ခိုက်ရန်ဖြစ်ပွါးခဲ့ကြတာ ဖြစ်ပါတယ်။

ရန်ပွဲအတွင်းမှာ မဲရွာသား မောင်နေမျိုးသူနဲ့ ချိုတူးဆိုသူ လူငယ် ၂ ဦးဟာ သူတို့ပါလာတဲ့ ဓားတွေနဲ့ ထိုးလိုက်လို့ လယ်မရွာသားတွေဖြစ်တဲ့ အသက် ၁၅ နှစ်အရွယ် မောင်သျှားချစ်မှာ အဆုတ်ထိပြီး သေဆုံးခဲ့ရသလို အသက် ၁၆ ကနေ ၂၀ ကြားအရွယ်ရှိ မောင်နေတိုးအပါအဝင် ၃ ဦးလည်း ဒဏ်ရာရခဲ့တယ်လို့ သိရပါတယ်။

“ခုသေတဲ့ကလေးက ရန်ဖြစ်တဲ့အခါမှာ ကြောက်ပြီးဘေးမှာ ထိုင်နေတာကို ဓားထိုးခံရတာ။ ကျန်တဲ့ကလေးတွေကလည်း ထိုးကျကြိတ်ကြရင်း ဓားထိုးခဲ့ရပြီး ဒဏ်ရာရတာရှိတယ်။ နောက်တယောက်ဆိုလည်း ဒဏ်ရာများတယ်။ ဆေးရုံပို့ထားရတယ်။ နောက်နှစ်ယောက်ကတော့ အနည်းအကျဉ်းလောက်ထိထားတာ”လို့ လယ်မရွာခံတဦးက ပြောပါတယ်။

ရန်ပွဲမှာ ပါဝင်သူတွေကို ကျေးရွာတာဝန်ရှိသူတွေက ခေါ်ယူစစ်ဆေးပြီးနောက် ဓားထိုးမှုကျူးလွန်သူ အသက် ၂၀ အရွယ် မောင်နေမျိုးသူနဲ့ ချိုတူးတို့ ၂ ဦးကိုတော့ မြို့နယ်ပလဖအဖွဲ့က ဖမ်းဆီးထားတယ်လို့ သိရပါတယ်။

သေဆုံးသူ လူငယ်ရဲ့ နာရေးကိုတော့ အောက်တိုဘာလ ၂၈ ရက်နေ့မှာ ကျေးရွာသုသာန်မှာပင် သဂြိုလ်လိုက်ပြီး ပလဖ ဖမ်းဆီးထားသူ ၂ ဦးကိုတော့စစ်ဆေးနေဆဲဖြစ်တယ်လို့ သိရပါတယ်။

သတင်း – မောင်မှိုင်း

ညောင်လေးပင်၊ အောက်တိုဘာ ၂၆၊ ၂၀၂၆။

ပဲခူးတိုင်း၊ ညောင်လေးပင်မြို့၊ မြို့မ ၄ ရပ်ကွက်၊ ရွှေကန်သာ (-) လမ်းက အသက် ၁၃ နှစ်အရွယ် သမီးဖြစ်သူကို အကြိမ်ကြိမ် အဓမ္မပြုကျင့်တဲ့ ဖခင်ကို ပုဒ်မ ၃၇၆ နဲ့ အမှုဖွင့်ထားတယ်လို့မြို့ခံတွေထံက သိရပါတယ်။

အမှုဖွင့်ဖမ်းဆီးခံရသူက အသက် ၅၀ ကျော်အရွယ် ဦးအာကာမိုးဆိုသူဖြစ်ပြီး အောက်တိုဘာလ ၂၄ ရက်နေ့မှာ ညောင်လေးပင်မြို့မရဲစခန်းမှာ ရာဇသတ်ကြီးပုဒ်မ ၃၇၆ နဲ့ အမှုဖွင့် ဖမ်းဆီးထားတယ်လို့ ဆိုပါတယ်။

“မိခင်ဖြစ်သူကိုယ်တိုင် ရဲစခန်းမှာ အမှုဖွင့်လို့ ရဲက လာဖမ်းသွားတာ။ ကလေးငယ်ရဲ့ အခြေအနေ မူမမှန်တာကို မိခင်ကသိရှိပြီး မေးမှ ကလေးကပြောလို့ မိခင်က သိသွားတာ။ ဖခင်ခြိမ်းခြောက်မှုခံထားရတော့ ကလေးက မပြောရဲဘူးဖြစ်နေသေးတာ”လို့ မြို့ခံအမျိုးသားတဦးက ပြောပါတယ်။

ပြီးခဲ့တဲ့ ဩဂုတ်လလောက်ကစတင်ပြီး ဦးအာကာမိုးဟာ သမီးဖြစ်သူကို မိန်းမဖြစ်သူ စျေးရောင်းသွားချိန်တိုင်း သားမယားအဖြစ်ပြုကျင့်ခဲ့ပြီး မိခင်ဖြစ်သူကို ပြန်ပြောပါက သတ်ပစ်ဟုဆိုကာ ခြိမ်းခြောက်ထားတာလို့ ပြောပါတယ်။

၂ လတာ ​ ကာလအတွင်းမှာ ဦးအာကာမိုးက သမီးဖြစ်သူကို သားမယားပြုကျင့်မှ ၅ ကြိမ်ထက်မနည်း ကျူးလွန်ထားပြီး သမီးဖြစ်သူမှ ထုတ်ဖော်ပြောဆိုရဲတာမျိုးမရှိဘဲနေထိုင်ခဲ့ရာ သမီးဖြစ်သူရဲ့ နေထိုင်မှု မူမမှန်တာကြောင့် မိခင်ဖြစ်သူကိ အတင်းအကြပ်မေးမှ ဖြစ်စဥ်ကို သိရတာလို့ သိရပါတယ်။

ပြီးခဲ့တဲ့ ၂၀၂၅ ခုနှစ် စက်တင်ဘာလကလည်း ပဲခူးမြို့နယ်၊ ကြွယ်ကုန်းကျေးရွာမှာ အသက် ၁၁ နှစ်အရွယ် G4 ကျောင်းသူကို အိမ်နီးချင်းဖြစ်သူ နိုင်လင်းဝေဆိုသူက အဓမ္မပြုကျင်ခဲ့တာကြောင့် ပြစ်မှုကျုးလွန်သူကို ပဲခူးမြို့နယ် တရားရုံးက ထောင်ဒဏ် ၂၅ နှစ်ချမှတ်ခဲ့တယ်လို့ သိရပါတယ်။

ကနီ၊ အောက်တိုဘာ ၂၃၊ ၂၀၂၆။

စစ်ကိုင်းတိုင်း၊ ကနီမြို့နယ်၊ မဟူတောင်ရိုးပေါ်က လူသွားလူလာ ပြတ်လပ်တဲ့နေရာမှာ စစ်တပ်ထုတ် လက်နက်တွေကိုင်ဆောင်ထားတဲ့ မျက်နှာဖုံးစွပ်ဓားပြတွေက ခရီးသွား အမျိုးသား ၂ ယောက်ဆီက ဆန် ၁ အိတ်နဲ့ ဆီ ၅ ပိဿာ ဓားပြတိုက်သွားတယ်လို့ သိရပါတယ်။

ပြီးခဲ့တဲ့ အောက်တိုဘာ ၂၁ ရက် ညနေ ၅ နာရီခန့်က မဟူတောင်ရိုးပေါ်၊ မျှိုင်းကျေးရွာ ဇရပ်အနီး အမျိုးသား ၂ ဦး မောင်းလာတဲ့ ဆိုင်ကယ်ကို မျက်နှာဖုံးစွပ် လက်နက်ကိုင် ၅ ယောက်က ဓားပြတိုက်ခဲ့တာလို့ ဒေသခံတဦးက မြေလတ်အသံကို ပြောပါတယ်။

အဆိုပါ ခရီးသွား အမျိုးသား ၂ ဦးဟာ မဟူတောင်ရိုးပေါ်လမ်းကိုဖြတ်ပြီး ယာကြီးရွာကိုသွားချိန် လမ်းမှာ စစ်တပ်ထုတ် သေနတ် ၂ လက်ကိုင်ဆောင်ထားသူ မျက်နှာဖုံးစွပ် ဓားပြ ၅ ယောက်က ထိုးကြိတ်နှိပ်စက်ကာ သူတို့ပါလာတဲ့ ဆီ ၅ ပိဿာ နဲ့ ဆန် ၁ အိတ် ဓါးပြတိုက်သွားတယ်လို့ ပြောပါတယ်။

“မျက်နှာဖုံးစွပ်တွေနဲ့လို့ ပြောတာပဲ။ ၅ ယောက် ရှိတယ်။ (*ခ)သေနတ် ၂ လက်ပါတယ်။ ဓားပြတိုက်ရုံတင် မဟုတ်ဘူး။ ပါးတွေ နားတွေရော ရိုက်ခံလိုက်ရတယ်။” လို့ ဖြစ်စဉ်ကိုသိတဲ့ ဒေသခံက ပြောပါတယ်။

ဓားပြအဖွဲ့မှာပါတဲ့ ၂ ဦးက ပစ္စည်းတွေ ရရှိပြီးတဲ့နောက် သတ်ဖို့ ပြောပေမယ့် ကျန် ၃ ဦးက မသတ်ဖို့ တားတာကြောင့် အသက်မသေဘဲ ပြန်ခွင့်ရခဲ့တာလို့ သူက ဆက်ပြောပါတယ်။

“အရိုက်ခံရတာပဲရှိတာ။ သတ်ပစ်မယ်ပြောတော့ အထဲက သူတို့အချင်းချင်း သတ်မယ် မသတ်မယ် မညီတော့ရင်းနဲ့ မသတ်ခိုင်းတာပေါ့။ ၂ ယောက်က သတ်မယ်ပြောတာ။ ၃ ယောက်က မသတ်နဲ့လို့ ပြောတာ။” လို့ သူက ပြောပါတယ်။

ကနီမြို့နယ်ထဲက မဟူတောင် ရိုးပေါ်လမ်းဟာ ကျေးရွာတွေနဲ့ အလှမ်းဝေးနေတဲ့အပြင် အခုလို လက်နက်ကိုင် ဓားပြတိုက်မှု ဖြစ်ပွါးခဲ့တာကြောင့် ဒေသခံတွေအနေနဲ့ ခရီးသွားလာဖို့ ကြောက်ရွံ့စိုးရိမ်နေကြရတယ်လို့ ဒေသခံတဦးက ပြောပါတယ်။

ပဲခူး၊ အောက်တိုဘာ ၂၂၊ ၂၀၂၆။

ပဲခူးတိုင်း၊ ပဲခူးမြို့နယ်၊ ဘုရားကြီးမြို့၊ ဝမ်းဘဲအင်းကျေးရွာ တံတားအနီး ရန်ကုန်-မန္တလေး လမ်းဟောင်းပေါ်မှာ အရက်သောက်ပြီး လမ်းဖြတ်ကူးသူတဦး လူနာတင်ယာဥ်က တိုက်မိပြီး သေဆုံးသွားတယ်လို့ သိရပါတယ်။

အောက်တိုဘာလ ၂၁ ရက်နေ့ ည ၁၂ နာရီခန့်မှာ ဒိုက်ဦးဘက်ကနေ ဘုရားကြီးမြို့ဘက်ကို လူနာတင်ပြီး မောင်းနှင်လာတဲ့ လူနာတင်ယာဉ်ဟာ ကားလမ်းမိုင်တိုင်အမှတ် ၅၀/၁ နဲ့ ၅၀/၂ အရောက်မှာ ရုတ်တရက်လမ်းဖြတ်ကူးလာသူ အမျိုးသားကို တိုက်မိခဲ့တာလို့ ဆိုပါတယ်။

လူနာတင်ယာဉ်ကတော့ မန္တလေး၊ ချမ်းမြသာစည်မြို့နယ်က မြရည်နန္ဒာလူမှုကူညီရေးအသင်းရဲ့ ဥက္ကဌဖြစ်သူ ဦးချစ်ဦးမောင် မောင်းနှင်လာတာဖြစ်ပြီး ကူညီဖို့ သူနဲ့အတူ အသင်းသားအချို့လည်း ပါလာတယ်လို့ သိရပါတယ်။

“ဖြစ်တဲ့အချိန် မှောင်မဲနေတာ။ သူက ပုဆိုးကြီးခြုံပြီး လမ်းပေါ်တက်ပြေးလာတာ။ ကားကရှောင်တော့ ရှောင်သေးတယ်။ တဖက်မှာလည်း တွဲကားကြီး။ ရုတ်တရက်ကြီး ပုဆိုးကြီးခြုံပြီး ကားဘက်ကိုပြေးလာတော့ ကားအရှေ့ဘယ်ခြမ်းနဲ့ တိုက်မိတာ။ အရက်နံ့လည်းရနေသေးတယ်”လို့ ဖြစ်စဥ်ကိုသိသူတဦးက ပြောပါတယ်။

ယာဥ်တိုက်မှုကြောင့် လမ်းပေါ်တက်လာသူ ဝမ်းဘဲအင်းရွာနေ အသက် ၄၈ နှစ်အရွယ် ဦးသောင်းတင်မှာ မျက်နှာ၊ နား၊ ဝမ်းဗိုက်၊ နှာခေါင်းတို့မှာ ထိခိုက်ဒဏ်ရာတွေနဲ့နေရာမှာပင် သေဆုံးသွားတယ်လို့ သိရပါတယ်။

ဒါ့အပြင် လူမှုကူညီရေးအသင်းယာဉ်ပေါ်လိုက်ပါလာသူ ယာဥ်မောင်းအပါအဝင် ၃ ဦးမှာ ရင်ဘတ်အောင့် ပွန်းပဲ့ဒဏ်ရာ အနည်းငယ်စီသာ ရခဲ့ကြတယ်လို့ ဆိုပါတယ်။

ယာဥ်တိုက်မှုကြောင့် ယာဥ်မောင်းဖြစ်သူ ဦးချစ်ဦးမောင်ကို ဘုရားကြီးနယ်မြေရဲစခန်းကနေ ဖမ်းဆီးထားတယ်လို့ သိရပါတယ်။

ချောင်းဦး၊ အောက်တိုဘာ ၁၆၊ ၂၀၂၆။

စစ်ကိုင်းတိုင်း၊ ချောင်းဦးမြို့၊ ချောင်းဦးတောင်ရပ်ကွက်မှာ လင်မယား (၂) ဦးပစ်သတ်ခံရတယ်လို့ ချောင်းဦးမြို့နယ်ပကဖ တာဝန်ရှိသူတွေထံက သိရပါတယ်။

ပစ်သတ်ခံရသူတွေက အသက် (၃၅) နှစ်အရွယ် ကိုအေးမင်းထွန်း၊ ဇနီးဖြစ်သူ အသက် (၂၈) နှစ်အရွယ် မခိုင်ဇင်ဖြိုးတို့ဖြစ်ပြီး အောက်တိုဘာလ (၁၄) ရက်နေ့ညပိုင်း သူတို့နေအိမ်မှာ ပစ်သတ်ခံရတာလို့ ဆိုပါတယ်။

“ရှင်းလင်းခံရတဲ့ ဖြစ်စဥ်ရှိလို့ အဲ့ဒီည** တွေခြေရှုပ်နေတယ်လို့တော့ သိရတယ်။ ဘယ်အဖွဲ့တွေလုပ်တယ်ဆိုတာတော့ မသိရသေးဘူး။ မြို​ပေါ်မှာက ပျူနဲ့** တွေက စိုးမိုးထားပြီး ခြေရှုပ်နေကြတာဆိုတော့”လို့ ချောင်းဦးမြို့နယ်ပကဖတာဝန်ရှိသူက ပြောပါတယ်။

ပစ်သတ်ခံရသူလင်မယားက အလုပ်အကိုင်အနေနဲ့ နှစ်လုံးသုံးလုံး ချဲဒိုင်ကိုင်သူတွေလို့ သိထားရပြီး စစ်တပ်၊ ပျူတွေနဲ့ပတ်သက်မှုတွေလည်း ရှိသလို အဲဒီကိစ္စကြောင့် ရှင်းလင်းခံရတာလား ငွေကြေးနဲ့ လူမှုရေးကိစ္စတွေကြောင့် ပစ်သတ်ခံရတာလားဆိုတာ စုံစမ်းနေဆဲလို့ ဆိုပါတယ်။

သေနတ်သမားတွေပစ်ခတ်လို့ လင်မယား (၂) ဦးဟာ နေအိမ်မှာပင်သေဆုံးသွားပြီး ပစ်ခတ်သွားတဲ့အဖွဲ့တွေဘက်ကတော့ အောက်တိုဘာလ (၁၆) ရက်နေ့အထိ သတင်းထုတ်ပြန်တာ မရှိသေးပါဘူး။

ချောင်းဦးမြို့ပေါ်ကို စစ်တပ်ဘက်က အပြည်အဝထိန်းချုပ်ထားသလို ပစ်ခတ်မှုဖြစ်တဲ့နေရာကလည်း ချောင်းဦးမြို့မရဲစခန်းနဲ့ မီတာ (၃၀၀) ခန့်သာ ဝေးတယ်လို့ သိရပါတယ်။

စာတည်း – စိုးဦး

ဇီးကုန်း၊ အောက်တိုဘာ ၁၆၊ ၂၀၂၆။

ပဲခူးတိုင်းအနောက်ခြမ်း၊ ဇီးကုန်းမြို့မှာ စစ်တပ်ကဗိုလ်ကြီးတဦးရဲ့ဖခင်ကို တားဆီးရှာဖွေစစ်ဆေးရာ ဆေးဝါးပစ္စည်းတွေ တွေ့ရှိခဲ့လို့ အာဏာသိမ်းစစ်တပ်က ဖမ်းဆီးထားပြီး စစ်ဆေးမှုတွေ ပြုလုပ်နေတယ်လို့ မြို့ခံတဦးဆီက သိရပါတယ်။

ဇီးကုန်းမြို့နယ်၊ ဘုရားကြီးကုန်းကျေးရွာအုပ်စု၊ ကြားစုကျေးရွာက အသက် ၆၀ နှစ်ဝန်းကျင် ဦးစိုးသိန်းကို ဇီးကုန်းမြို့ အမှတ် (၁)ရပ်ကွက်၊ ဂုံးလမ်း မြို့ဦးဘုန်းတော်ကြီးကျောင်းအနီးမှာ ပြီးခဲ့တဲ့ အောက်တိုဘာလဆန်ပိုင်းက ဖမ်းဆီးခံခဲ့ရတာ ဖြစ်ပါတယ်။

“ဦးစိုးသိန်းကို လမ်းမှာဖမ်းတော့ သူ့ဆီက ဂလူးကို့စ်ပုလင်းတွေနဲ့ အခြားဆေးဝါးပစ္စည်းတွေ သိမ်းရတယ်လို့ သတင်းကြားတယ်။ စပြီးဖမ်းသွားကတည်းက ပြည်ကမင်းကြီးတောင်ပေါ် စစ်ကြောရေးကို ခေါ်သွားတာ။ အရင်နေ့ (အောက်တိုဘာ ၁၃) ညနေကတော့ ဇီးကုန်းရဲစခန်းကို ပြန်ရောက်တယ်ကြားတယ်။ သူ့သားက စစ်တပ်က ဗိုလ်ကြီး ခြေလျင်တပ်ကဆိုတာတော့ တမြို့လုံးသိတယ် ဘယ်တပ်ကဆိုတာတော့ မသိဘူး” လို့ မြို့ခံတဦးက ပြောပါတယ်။

အာဏာသိမ်းစစ်တပ်ဟာ မြန်မာပြည်တွင်းမှာ ဒေါ်လာငွေသုံးစွဲမှု လျော့ချဖို့အတွက် နိုင်ငံတကာက ဆေးဝါးအပါအဝင် စာသောက်ကုန်နဲ့ အသုံးအဆောင် ပစ္စည်းတွေအပြင် ဆောက်လုပ်ရေးလုပ်ငန်းသုံးကုန်စည်တွေပါ ပြည်ပက တင်သွင်းခွင့်ပိတ်ထားတာကြောင့် ပြည်တွင်းမှာ ဆေးဝါး(အင်္ဂလိပ်ဆေး) ပြတ်လပ်မှုတွေကြုံတွေ့နေကြရပါတယ်။

ဇီးကုန်းရဲစခန်းကို ပြန်ရောက်ပေမယ့် ထမင်းပို့ခွင့်သာပေးပြီး မိသားစုနဲ့ တွေ့ခွင့်မရသေးဘူးသေးကြောင်းနဲ့ ဖမ်းဆီးခံရချိန်မှာ ကျန်းမာရေးလည်း ကောင်းမွန်နေတယ်လို့ သူကဆက်ပြောပါတယ်။

ပဲခူးတိုင်းအနောက်ခြမ်းမှာ အာဏာသိမ်းစစ်တပ်ဟာ အရပ်သားတွေအပေါ် အကြောင်းမျိုးစုံပြပြီး မကြာခဏဖမ်းဆီးနေပြီး၊ အောက်တိုဘာ ၁၂ ရက်နေ့ကလည်း အုတ်ဖိုမြို့နယ်၊ ကိုင်းကြီးရွာမှာနေထိုင်ကာ၊ ရှားစီးဘိုကျေးရွာ စာသင်ကျောင်းမှာ လက်ထောက်မူလတန်းပြဆရာမအဖြစ် တာဝန်ထမ်းဆောင်နေသူ ဆရာမဒေါ်နှင်းဝတ်ရည်ကိုလည်း Mi Pauk Facebook အကောင့်နဲ့ လူမှုကွန်ရက်စာမျက်နှာက နေနိုင်ငံတော်တည်ငြိမ်ရေးကို ပျက်ပြားအောင်လုပ်တယ်ဆိုပြီး ဖမ်းဆီးထားကြောင်း သိရပါတယ်။

သတင်း – သော်တာအောင်

မင်းဘူး၊ အောက်တိုဘာ ၁၄၊ ၂၀၂၆။

မကွေးတိုင်း၊ မင်းဘူးမြို့နယ်၊ ဖြူကုန်းကျေးရွာမှာ ၅ သိန်းတန် နားကပ်တရံကြောင့် ၇ နှစ်အရွယ် ကလေးငယ်ကို သတ်ဖြတ်ပြီး အလောင်းဖျောက်ထားကာ ကျူးလွန်သူလို့ ယူဆသူက စစ်ပြေးဖြစ်တယ်လို့ ဖြစ်စဥ်ကိုသိတဲ့ ဒေသခံတွေဆီက သိရပါတယ်။

ပြီးခဲ့တဲ့ အောက်တိုဘာလ ၇ ရက်နေ့ မနက် ၇ နာရီကျော်ခန့်က မင်းဘူးမြို့နယ်၊ ကူကျေးရွာကနေ ဖြူကုန်းကျေးရွာကို ကျောင်းသွားတက်ရတဲ့ G-2 (နှစ်တန်း)ကျောင်းသူ အသက် ၇ နှစ် အရွယ် မခက်သဒ္ဒါလင်းဟာ ကျောင်းကိုသွားစဥ် ပျောက်ဆုံးသွားခဲ့တာလို့ ဆိုပါတယ်။

ကလေးငယ် ပျောက်ဆုံးပြီး ၅ ရက်အကြာမှာ ဖြူကုန်းကျေးရွာနဲ့ ၂ မိုင်ခန့်အကွာက ချင်းကုန်းကျေးရွာအနီး ရေချောင်းအတွင်းမှာ အောက်တိုဘာလ ၁၂ ရက်နေ့ မနက်ပိုင်းက ဆာလာအိတ်ထဲမှာ ခြေလက်တွေ ကြိုးတုပ်ခံထားပြီး ပါးစပ်ကို အဝတ်နဲ့ပိတ်လျက် သေဆုံးနေတဲ့ မခက်သဒ္ဒါလင်းရဲ့ အလောင်းကို တွေ့ခဲ့ရတယ်လို့ ဆိုပါတယ်။

ကလေးငယ်သေဆုံးမှုနဲ့ ပတ်သက်ပြီး သက်ဆိုင်ရာ အဖွဲ့တွေက လိုက်လံစုံစမ်းချိန် ဖြူကုန်းကျေးရွာ စာသင်ကျောင်းအနီးမှာနေတဲ့ ပြည့်သူ့စစ်ကနေ ထွက်ပြေးလာသူ (စစ်ပြေး) အောင်လင်းထွန်းက အဲ့ဒီနေ့ မနက်ပိုင်းမှာ ကြာပန်းခူးမယ်ဆိုပြီး ကလေးငယ်ကို ခေါ်ဆောင်သွားတာလို့ စုံးစမ်းသိရှိခဲ့ရတယ်လို့ ဆိုပါတယ်။

​ကလေးငယ်ကို သတ်ဖြတ်ပြီး နားကပ်ယူသွားသူလို့ သံသယရှိသူ အောင်လင်းထွန်းအပါအဝင် သူဇနီးနဲ့ သားဖြစ်သူတို့ဟာ ကလေးငယ်ပျောက်ဆုံးသွားတဲ့ မနက်ပိုင်းကတည်းက ကျေးရွာကနေ ပျောက်ဆုံးနေတယ်လို့ ဆိုပါတယ်။

“ကလေးက အသတ်ခံရတာ ဟုတ်တယ်။ အဓိက နားကပ်လိုချင်လို့ သတ်တာဖြစ်တယ်။ တရားခံလို့ ယူဆရသူကိုတော့ ရှောင်နေလို့ လိုက်လံစုံစမ်းနေပါတယ်။ သူကတော့ ပစ ကနေ ထွက်ပြေးလာတဲ့သူပါ။ သံသယရှိတာက သူတို့ပါ။”လို့ ဖြစ်စဥ်ကို သိထားသူ ဒေသကာကွယ်ရေးအဖွဲ့ဝင်တဦးက ပြောပါတယ်။

လူသတ်မှုနဲ့ သံသယရှိသူ အောင်လင်းထွန်းကို ဖမ်းမိနိုင်ရေး မင်းဘူးခရိုင်တပ်ရင်း ၆ တာဝန်ရှိသူတွေက နေရာအနှံ့ လိုက်လံစုံစမ်းရှာဖွေတာတွေ ပြုလုပ်နေတယ်လို့ သိရပါတယ်။

အောင်လင်းထွန်းဟာ ပြည်သူစစ်မှုထမ်းဆင်း တပ်သား ၁ ဦးဖြစ်ပြီး စစ်တပ်မှာ ဆက်လက်နေထိုင်လိုစိတ်မရှိတာကြောင့် ၂၀၂၆ ဧပြီလ လောက်ကတည်းက ထွက်ပြေးလားပြီး ဖြူကုန်းကျေးရွာမှာ လာရောက်နေထိုင်သူဖြစ်တယ်လို့ သိရပါတယ်။

ပဲခူး၊ အောက်တိုဘာ ၉၊ ၂၀၂၆။

ပဲခူးတိုင်း၊ ပဲခူးမြို့ မြို့ရှောင်လမ်း၊ သကြီးကုန်းကျေးရွာအနီးမှာ အထည်ချုပ်လုပ်သားတွေ စီးနင်းလာတဲ့ စက်ရုံကြိုပို့ယာဉ်နှစ်စီး မျက်နှာချင်းဆိုင်တိုက်မိပြီး ၂၈ ဦး ဒဏ်ရာရတယ်လို့ မြို့ခံတွေဆီက သိရပါတယ်။

အောက်တိုဘာလ ၈ ရက်နေ့ မနက် ၈ နာရီခန့်က ပဲခူးတက္ကသိုလ်ဘက်ကနေ ကလိကျေးရွာဘက်ကို ယာဉ်မောင်း စိုင်းဝဏ္ဏထွန်း မောင်းနှင်လာတဲ့ HINO RAINBOW ယာဉ်အမျိုးအစား MINI BUS အဖြူရောင်ယာဉ်နဲ့ ကလိကျေးရွာဘက်ကနေ ပဲခူးတက္ကသိုလ်ဘက်ကို ယာဉ်မောင်း သူရအောင် မောင်းနှင်လာတဲ့ MITSUBISHI FUSO EXPRESS ဖြူ/အနီရောင်ယာဥ်တို့ မျက်နှာချင်းဆိုင် တိုက်မိကြတာလို့ ဆိုပါတယ်။

“ကလိဘက်က မောင်းလာတဲ့ ကားသမားက သူအရှေ့က သွားနေတဲ့ ယာဥ်ကိုကျော်တက်ရာမှာ မျက်နှာချင်းဆိုင်က လာတဲ့ကားကို ဝင်တိုက်မိတာ။ သူကားပေါ်ကပါတဲ့ စက်ရုံလုပ်သားတွေအများစုဒဏ်ရာရကြတယ်”လို့ မြို့ခံတဦးက ပြောပါတယ်။

ယာဥ်တိုက်မှုကြောင့် ယာဥ်မောင်းသူရအောင်မောင်းလာတဲ့ ကားပေါ်က VHT နဲ့ K Fine အထည်ချုပ်စက်ရုံတွေက အသက် ၁၈ နှစ်ကနေ ၄၀ ကြားအရွယ် အမျိုးသား ၇ ဦးနဲ့ အမျိုးသမီး ၂၁ ဦး၊ စုစုပေါင်း လုပ်သား ၂၈ ဦးမှာ ဒဏ်ရာရခဲ့ကြပြီး တဘက်ယာဉ်ကတော့ ဝန်ထမ်းတွေ မပါတာကြောင့် ယာဉ်မောင်းပဲ အနည်းငယ် ဒဏ်ရာရခဲ့တာလို့ ဆိုပါတယ်။

ယာဥ်တိုက်မှုကြောင့် ထိခိုက်သူအများစုက ဒဏ်ရာနည်းပါးတာကြောင့် ဆေးရုံထိ ဆေးကုခံယူရတာမျိုး မရှိဘူးလို့ သိရပါတယ်။

အဲဒီယာဥ်တိုက်မှုကြောင့် ယာဉ်မောင်းသူရအောင်ကို ပဲခူးအမှတ် (၂) ရဲစခန်းက အမှုဖွင့် ဖမ်းဆီးထားတယ်လို့ သိရပါတယ်။