ပြည်၊ မတ် ၂၈၊ ၂၀၂၅။

ပဲခူးတိုင်း၊ ပြည်မြို့နယ်၊ မှော်ဇာအုပ်စု၊ သုံးပန်လှဘုန်းကြီးကျောင်းဝန်းရှိ ရှေးဟောင်းကျောင်းတိုက် ငလျင် ကြောင့်ပြိုကျပျက်စီးခဲ့တယ်လို့ ပြည်မြို့ခံတွေဆီကသိရပါတယ်။

မတ်လ ၂၈ ရက်ဒီနေ့လယ် ၁ နာရီခန့်မှ လှုပ်ခတ်ခဲ့တဲ့ငလျင်ဒဏ်ကြောင့် ရှေးဟောင်းကျောင်းတိုက်ကျောင်းကြီးရဲ့အနောက်ဘက်ခြမ်းပြိုကျခဲ့တာဖြစ်ပြီး လူထိခိုက်မှုတွေမရှိခဲ့ဘူးလို့ ပြည်မြို့ခံတဦးကပြောပါတယ်။

■ တိုင်းစစ်ဌာနချုပ်အပါအဝင် စစ်ကောင်စီတပ်အဆောက်အဦတချို့လည်း ပြိုကျဟုဆို

မြေလတ်အသံ၊ မတ် ၂၈၊ ၂၀၂၅။

အင်အားပြင်းငလျင်လှုပ်ခတ်မှုကြောင့် စစ်ကောင်စီရုံးစိုက်ရာနေပြည်တော်ကောင်စီနယ် မြေမှာ ကုတင် ၁၀၀၀ ဆေးရုံဝန်ကြီးဌာနအဆောက်အဦတချို့အပါအဝင် နေရာအများ အပြား အပျက်အစီးများခဲ့ပြီး လူသေဆုံးမှုတွေလည်းရှိခဲ့တယ်လို့ ဒေသခံတွေထံက သိရပါ တယ်။

ဇမ္မူသီရိမြို့နယ်ရှိ ကုတင် ၁၀၀၀ ဆေးရုံ၊ စွမ်းအင်နဲ့နိုင်ငံခြားရေးဌာနတွေအပါ ဝန်ကြီးဌာနရုံး တချို့၊ ဝန်ထမ်းအိမ်ယာ၊ Ocean ကုန်တိုက်စတဲ့ အဆောက်အဦတွေအပြင် နေပြည်တော် အတွင်း လမ်းတွေမှာလည်း ကွဲအက်ပျက်စီးတာတွေရှိခဲ့တယ်လို့ ဆိုပါတယ်။

“ (ဆေးရုံ) မျက်နှာကျက်တွေပြိုကျပြီး လူထိခိုက်တာတွေရှိတယ်။ နေပြည်တော်မှာ ထိခိုက် သေဆုံးများတယ်” လို့ နေပြည်တော်အတွင်း ကူညီကယ်ဆယ်ရေးလုပ်ဆောင်ပေးနေသူ တဦးက မြေလတ်အသံကို ပြောပါတယ်။

ငလျင်ကြောင့် နေပြည်တော်အတွင်းလမ်းပိုင်းတွေမှာ ထိခိုက်ပျက်စီးမှုတွေများတာကြောင့် ကား လမ်းတချို့ ပိတ်နေကာ သွားလာရခက်ခဲနေတယ်လို့ ဆိုပါတယ်။

နေပြည်တော်မြို့ခံတဦးက “ နေပြည်တော် ကားလမ်းတွေပိတ်နေတယ်။ အစိုးရရုံးခန်းတွေ ထိတယ်။ (ငလျင်လှုပ်တဲ့အချိန်) ကားလမ်းပေါ်မှာ ကားတွေလူးပြီးမောင်းမရဖြစ်တယ်။ ဆိုင်ကယ်တွေမောင်းနေရင်း လဲ ကျကြတယ်” လို့ ပြောပါတယ်။

ဒါ့အပြင် စစ်ရုံးချုပ်၊ နေပြည်တော်တိုင်းစစ်ဌာနချုပ်နဲ့ ခလရ ၈၅ တပ်ရင်းတွေမှာ အဆောက် အဦပြိုကျမှုတွေရှိတယ်လို့ CDM ဗိုလ်ကြီး ဇင်ယော် က တပ်တွင်းသတင်းရင်းမြစ်တွေရဲ့ ပြောဆိုချက်ကို ကိုးကားပြီး ၎င်းရဲ့လူမှုကွန်ယက်မှာ ရေးသားထားပါတယ်။

စစ်ကောင်စီကို ထောက်ခံရေးသားနေတဲ့ တယ်လီဂရမ်ချန်နယ်တချို့မှာလည်း နေပြည်တော် အတွင်း ဝန်ထမ်းအိမ်ယာပျက်စီးမှုတွေမှာ ပိတ်မိနေသူတွေရှိ အကူအညီတောင်းခံနေကြတယ်လို့ ဖော်ပြကြပါတယ်။

ငလျင်လှုပ်ခတ်မှုကြောင့် လူထိခိုက်သေဆုံးမှုနဲ့ ပျက်စီးမှုအခြေအနေအသေးစိတ်တွေကို တော့ ဆက်လက်စုံစမ်းနေဆဲဖြစ်ပါတယ်။

ပုံစာ – နေပြည်တော် MOGE ရုံး

တံတားဦး၊ မတ် ၂၈၊ ၂၀၂၅ ။

ငလျင်လှုပ်ခတ်မှုကြောင့် ရန်ကုန်-မန္တလေးအမြန်လမ်းပိုင်းနေရာတချို့မှာ ပျက်စီးမှုတွေဖြစ်ပေါ်ခဲ့ပြီး လမ်းပျက်စီးမှုတွေကြောင့် လတ်တလောကားတွေသွားလာလို့မရဘူးလို့ ခရီးသွားတွေထံက သိရပါတယ်။

ယနေ့ မတ် ၂၈ ရက် နေ့လယ် ၁ နာရီခန့်မှာ လှုပ်ခတ်တဲ့ အင်အား ၇.၇၆ ရစ်ချက်စတာ စကေးရှိ အင်အားပြင်းငလျင်ကြောင့် အမြန်လမ်းမိုင်တိုင် ၃၆၂ အနီးမှာ ကားလမ်းအက်ကွဲတာ၊ ပြတ်ကျတာနဲ့ လှိုင်းတွန့်ပုံစံခုံးထွက်လာတာတွေ ဖြစ်ပေါ်ခဲ့တာအပြင် အမြန်လမ်းရဲ့နောက်ထပ်နေရာ ၁၀ ခုထက်မနည်းမှာ ပျက်စီးမှုရှိခဲ့တယ်လို့ ဆိုပါတယ်။

” ပထမ ရုတ်တရက်ဆိုတော့ ကားဘီးကွဲတာထင်တာ။ နောက်မှ ငလျင်လှုပ်တာသိရပြီး ကားပါရပ်လိုက်ရတာ။ လမ်းပိုင်းမှာ အပျက်အစီးအများကြီးတွေ့ရတယ်” လို့ အမြန်လမ်းအသုံးပြုနေတဲ့ ခရီးသွားတဦးက မြေလတ်အသံကို ပြောပါတယ်။

လတ်တလောမှာ လမ်းပိုင်းနေရာတချို့ ပျက်စီးနေတာကြောင့် ကားတွေသွားလာလို့မရဘဲ ရပ်တန့်ထားရပြီး ငလျင်လှုပ်ခတ်မှုကြောင့် စစ်ကိုင်း၊ မန္တလေး၊ နေပြည်တော်မြို့တွေအပါအဝင် နေရာအများအပြားမှာ အဆောက်အဦတွေပြိုကျတဲ့အထိ ထိခိုက်ပျက်စီးမှုတွေဖြစ်ပေါ်ခဲ့ကာ လက်ရှိမှာ ဒေသအလိုက်လူမှုကူညီရေးအသင်းအဖွဲ့တွေက ကူညီကယ်ဆယ်ရေးတွေ လုပ်ဆောင်ပေးနေတယ်လို့ သိရပါတယ်။

ဓါတ်ပုံ – Ashin Kavi Nanda Facebook.

သတင်း – ကျော်ကြီး၊ စာတည်း – ဟိန်းစံ

စဥ့်ကိုင် ဧပြီ ၁၂၊ ၂၀၂၃။

မန္တလေးတိုင်းဒေသကြီး၊ စဥ့်ကိုင်မြို့နယ်၊ တဘက်ဆွဲကျေးရွာမှာ အမိုးနီးယား ယိုစိမ့်မှုကြောင့် လူပေါင်း ၃၀ ကျော် အဆိပ်သင့်မှု ဖြစ်ပွားခဲ့တယ်လို့ သိရပါတယ်။

ဧပြီလ ၁၁ ရက် ၁ နာရီခန့်မှာ တဘက်ဆွဲကျေးရွာရှိ လေထိုးကွန်ပရက်ဆာနဲ့ လေလှောင်အိုးရောင်းဝယ်ရေး အလုပ်ရုံကနေ အမိုးနီးယား ၈၀၀ လီတာအိုးမှ အမိုးနီးယားတွေ ယိုစိမ့်ခဲ့တာဖြစ်ပြီး ပတ်ဝန်းကျင်နေ ပြည်သူတွေ အဆိပ်သင့်မှု ဖြစ်ခဲ့တယ်လို့ ဒေသခံတဦးက ပြောပါတယ်။

“အောက်ဆီဂျင်အိုးဖြည့်လုပ်ငန်း ရှိတယ်။ အဲဒီမှာ သုံးတဲ့အိုးတွေကို ဆေးကြောဖို့ လုပ်ကြတဲ့အချိန်မှာ အရည်တွေရှိနေတဲ့ အိုးကို မှားဖွင့်မိပြီး အငွေ့တွေက ပတ်ဝန်းကျင်ကို ပြန့်ကုန်တာလို့ သိရတယ်။ အဲဒီအနံကို ရှုမိတဲ့သူတွေက တော်တော်များတယ်။ အဲ့ထဲကမှ လူအချို့က ဆေးရုံပို့ရတဲ့အခြေနေထိ ဖြစ်ကုန်တာ” လို့ ပြောပါတယ်။

အမိုးနီးယားအငွေ့တွေ ရှုမိလို့ ကလေးငယ် ၁၁ ဦးအပါအဝင် လူပေါင်း ၃၀ ကျော်ဟာ မေ့လဲတာ၊ မူးမော်တာနဲ့ အော့အန်တာတွေဖြစ်ခဲ့တယ်လို့ ဆိုပါတယ်။

အမိုးနီးယားအဆိပ်သင့်သူတွေကို ဒေသလူမှုကူညီရေးအသင်းတွေက မန္တလေးဆေးရုံ၊ စဥ့်ကိုင်ဆေးရုံအပါအဝင် နီးစပ်ရာ ဆေးရုံဆေးခန်းတွေကို အောက်ဆီဂျင်ပေးကာ သယ်ဆောင်ပြီး ဆေးကုသမှုပေးနေရတယ်လို့ သိရပါတယ်။

ဆေးရုံဆေးခန်းရောက်ရှိချိန် ဆေးကုသမှုခံယူပြီးနောက် သက်သာလာသူတချို့ နေအိမ်ပြန်ခဲ့တာရှိပြီး တချို့ကတော့ ဆေးရုံမှာ ဆေးကုသမှု ဆက်လက်ခံယူနေဆဲဖြစ်ကာ စိုးရိမ်ရသူ မရှိဘူးလို့ သိရပါတယ်။

စာတည်း – လင်းဇေ

ယင်းမာပင်၊ ဖေဖော်ဝါရီ ၂၃၊ ၂၀၂၃။

စစ်ကိုင်းတိုင်း၊ ယင်းမာပင်မြို့နယ် အခြေစိုက် တပ်ရင်း ၂၇ ရဲ့ တပ်ခွဲ – ၁ဖြစ်တဲ့ အမိမြေတော်လှန်ရေးတပ်ဖွဲ့ဟာ တိုက်ပွဲနားချိန်တွေနဲ့ တိုက်ပွဲကာလတွေမှာပါ သဘာဝပတ်ဝန်းကျင် ထိန်း‌သိမ်းရေးလုပ်ငန်းတွေကို လက်လှမ်းမိသလောက် ပူးတွဲလုပ်ဆောင်နေတယ်လို့ သိရပါတယ်။

တပ်ဖွဲ့စခန်းအဖြစ် စတင်တည်ထောင်ချိန်ကတည်းက စခန်းအနီးနားက သစ်တောမှာ သစ်ဝါးခုတ်ခြင်းနဲ့ အလွန်ကျွံ အမဲလိုက်ခြင်းတွေကို တားမြစ်ပြီး ထိန်းသိမ်းစောင့်ရှောက်မှု လုပ်ခဲ့ကာ၊ တဖက်မှာလည်း ရွာသားတွေအတွက် ကျန်းမာရေးကုသမှုတွေ အခမဲ့ လုပ်ပေးတယ်လို့ ဆိုပါတယ်။

“သစ်တောပြုန်းတီးတဲ့အခါ ခံစားရမဲ့ အကျိုးဆက်၊ ရှားပါးသတ္တဝါတွေ ရှိတယ်ပေါ့နော်။ လိုအပ်တာထပ်ပိုပြီး အမဲလိုက်မိရင် ‌မျိုးတုန်းပျောက်ကွယ်မယ် ဆိုတာမျိုးလောက်တော့ သိသလောက် မျှဝေပေး ဖြစ်ပါတယ်။ နေထိုင်ရေးအတွက် ခုတ်ဖို့လိုအပ်မယ်ဆိုရင် ပကဖနဲ့ ချိတ်ဆက်ဖို့ ပြောပါတယ်။ ကျတော်တို့က စစ်တိုက်နေရုံနဲ့ မပြီးဘူးဗျ။ သဘာဝပတ်ဝန်းကျင်ကို တတ်နိုင်သလောက် ထိန်းသိမ်းဖို့ တာဝန်ရှိတယ်။” လို့ ရဲဘော်မင်းကိုက ပြောပါတယ်။

တပ်ဖွဲ့ကင်းလှည့်ချိန်တွေနဲ့ ကြုံရင်ကြုံသလို ရွာသားတွေကို ပညာပေးပြောပြတာတွေ လုပ်ပြီး အမဲလိုက်ခြင်းကို ကန့်သတ်လိုက်လို့ စားဝတ်နေရေး အခက်ခဲကြုံရင်လည်း တပ်ရင်းကနေ တတ်နိုင်သလောက် အကူညီတွေ ပေးသွားမယ်လို့ ဆိုပါတယ်။

တိုက်ပွဲမရှိချိန်တွေမှာတော့ ကျယ်ကျယ်ပြန့်ပြန့် လုပ်နိုင်ပေမယ့် တိုက်ပွဲရှိနေရင်တော့ လက်လှမ်းမှီတဲ့ နယ်မြေလောက်ပဲ အသိပညာပေးနိုင်ကာ အခုနောက်ပိုင်းဆို သစ်ဝါးခုတ်တာတွေ နည်းပါးသွားပြီလို့လည်း သူကဆက်ပြောပါတယ်။

အခုလို အမဲလိုက်တာတွေ၊ သစ်၊ ဝါးခုတ်တာတွေကို တားဆီးလိုက်ပေမယ့် တဖက်မှာလည်း ရွာသားတွေအတွက် ကျန်းမာရေးနဲ့ သားဖွားခြင်းဆိုင်ရာတွေကို နယ်မြေဆင်း ကုပေးတာ၊ ဆေးခန်းဖွင့်ပြီး ကုသပေးတာတွေ အခမဲ့လုပ်ဆောင်နေတယ်လို့ သိရပါတယ်။

လက်ရှိအချိန်မှာတော့ တပ်ဖွဲ့ဝင်တွေအနေနဲ့ ပတ်ဝန်းကျင် ထိန်းသိမ်းရေးသာမက နယ်မြေလုံခြုံရေးအတွက်လည်း လုပ်ဆောင်နေပြီး ကုန်ကားတွေမှာ စစ်တပ်ထုတ်ကုန် ပါ၊မပါကိုပါ စောင့်ကြည့်စစ်ဆေးမှုတွေ လုပ်နေတယ်လို့ သိရပါတယ်။