ကန့်ဘလူ

ကန့်ဘလူ၊ မတ် ၁၆၊ ၂၀၂၃။

စစ်ကိုင်းတိုင်း၊ ကန့်ဘလူခရိုင်၊ ကျွန်းလှမြို့ပေါ် ရပ်ကွက်တချို့မှာရှိတဲ့ ပြည်သူတွေကို အုပ်ချုပ်ရေးမှူးက ဦးဆောင်ပြီး ပြည်သူ့စစ်သင်တန်းတက်ဖို့ စေခိုင်းခဲ့တယ်လို့ ဒေသခံတွေဆီက သိရပါတယ်။

ကျွန်းလှမြို့၊ ရှမ်းစုရပ်ကွက်မှာ နေထိုင်တဲ့ စစ်ကောင်စီခန့်အုပ်ချုပ်ရေးမှူး သန်းထိုက် နဲ့အတူ သူရဲ့နောက်လိုက် ၂ ဦးဖြစ်တဲ့ ငတူးနဲ့ ငဝင်းတို့က ဦးဆောင်ပြီး ပြည်သူ့စစ်သင်တန်းကို မဖြစ်မနေတက်ရမယ်လို့ ပြောဆိုခဲ့တာလို့ ကျွန်းလှတက်ကြွလှုပ်ရှားသူများအဖွဲ့က မြေလတ်အသံကို ပြောပါတယ်။

“အခုက သင်တန်းကို မတက်မနေ တက်ရမဲ့သဘော။ သူတို့ဘက်က လူအင်အားမရှိတော့ ပြည်သူတွေကို ဖိအားပေး ခြိမ်းခြောက်တယ်လို့ ပြောလို့ရတယ်။ ရပ်ကွက်က လူတွေလည်း ပြဿနာ ပိုကြီးမှာ ကြောက်ကြတော့ အကုန်သွားကြတာ များတယ်။ အစည်းအဝေးကိုလည်း သူတို့ရပ်ကွက်က အုပ်ချုပ်ရေးမှူးတွေ ဦးဆောင်ပြီးလုပ်ကြတာ” လို့ ပြောပါတယ်။

မတ်လ ၁၄ ရက်က ပြုလုပ်ခဲ့တဲ့ အစည်းအဝေးပွဲမှာ အုပ်ချုပ်ရေးမှူးလည်း ဖြစ်သလို ပျူခေါင်းဆောင်လည်း ဖြစ်တဲ့ သန်းထိုက်က ရပ်ကွက်သူ၊ ရပ်ကွက်သားတွေအနေနဲ့ ပြည်သူတွေကို ကာကွယ်ဖို့၊ ပြည်သူ့စစ်မရှိတဲ့ရွာတွေ မီးရှို့ဖျက်ဆီးခံရတဲ့အတွက် မဖြစ်မနေ ပြည်သူ့စစ်သင်တန်းတက်ရမည်ဖြစ်ကြောင်း၊ ကိုယ့်အသိစိတ်နဲ့ကိုယ် တက်ရောက်ကြဖို့နဲ့ မတက်ရောက်တဲ့ သူတွေကိုလည်း မဲနှိုက်ရွေးချယ်သွားမယ်လို့ ပြောဆိုခဲ့ကြောင်းကို ကျွန်းလှတက်ကြွလှုပ်ရှားသူများအဖွဲ့က ထုတ်ပြန်ရေးသားထားပါတယ်။

ပြည်သူ့စစ်သင်တန်းတက်ဖို့ အစည်းအဝေးခေါ်ယူပြီးတဲ့နောက်မှာ ပျူစောထီးတပ်ဖွဲ့တွေက ကျွန်းလှမြို့အဝင်အထွက်ဂိတ်တွေကို ပြန်လည်ပိတ်ထားခဲ့တဲ့အပြင် ဖြတ်သန်းသွားလာမှုကိုလည်း ကန့်သတ်ထားတယ်လို့ သိရပါတယ်။

ပြီးခဲ့တဲ့ ဇန်နဝါရီလ ၂၂ ရက်ကလည်း ကန့်ဘလူမြို့နယ်၊ ဇီးကုန်းတိုက်နယ်အတွင်းမှာ နေထိုင်တဲ့ ပြည်သူတွေကို ပျူစောထီးတပ်ဖွဲ့က လက်နက်အားကိုးပြီး ပျူသင်တန်းတက်ရောက်ခိုင်းတဲ့အပြင် ပြည်သူတွေဆီကနေလည်း ငွေကြေးကောက်ခံတာတွေ လုပ်ခဲ့တယ်လို့ ဆိုပါတယ်။

ကန့်ဘလူ၊ မတ် ၁၄၊ ၂၀၂၃။

စစ်ကိုင်းတိုင်း၊ ကန့်ဘလူခရိုင်၊ ကျွန်းလှမြို့ပေါ် ရပ်ကွက်တွေက ဒေသခံတွေကို စစ်သားနဲ့ပျူစောထီးတွေက ဖိအားပေးပြီး ကင်းစောင့်ခိုင်းတာတွေ လုပ်နေတယ်လို့ သိရပါတယ်။

အခု မတ်လအစောပိုင်းက စတင်ကာ ပိတောက်မြိုင်၊ ပျဉ်းမမြိုင်၊ အင်ကြင်းမြိုင်၊ သစ်ရာမြိုင်၊ သပြေမြိုင်၊ သူဌေးကုန်း စတဲ့ရပ်ကွက်တွေမှာ ဆယ်အိမ်စုတစုလျှင် ၁ ဦးနှုန်းနဲ့ မြို့အဝင်အထွက် ဂိတ်တွေမှာ ကင်းစောင့်ဖို့ ဖိအားပေးနေတာလို့ ကျွန်းလှတက်ကြွလှုပ်ရှားသူများအဖွဲ့က တာဝန်ရှိသူတဦးက ပြောပါတယ်။

“တချို့ရပ်ကွက်တွေ ကင်းစပြီး စောင့်နေရပါပြီ။ ပြီးခဲ့တဲ့မတ်လ ၂ ရက်နေ့ကစပြီး ကင်းစောင့်နေရတယ်။ အခုလို ကင်းစောင့်ဖို့ကိုလည်း ကျွန်းလှမြို့ပေါ်မှာက အုပ်ချုပ်ရေးမှူးတွေ၊ ပျူစောထီးတွေကပဲ ကင်းစောင့်ဖို့ကို စီစဉ်ခဲ့တာ။ ကင်းမစောင့်ချင်တဲ့ သူတွေလည်း ရရာပိုက်ဆံတွေချေးပြီး ပေးရတယ်” လို့ ကျွန်းလှတက်ကြွလှုပ်ရှားသူများအဖွဲ့က တာဝန်ရှိသူတဦးက ပြောပါတယ်။

ကင်းမစောင့်တဲ့အိမ်တွေကိုလည်း တအိမ်ကို ၁ သောင်းနှုန်းတောင်းတယ်လို့ သိရကာ၊ မတ်လ ၁၃ ရက်မနေ့ကလည်း ကျွန်းလှမြို့ပေါ်က ရပ်ကွက်သစ်ဖြစ်တဲ့ သူဌေးကုန်းရပ်ကွက်က ဒေသခံတွေကို ပျူစောထီးအဖွဲ့တွေက ကင်းစောင့်ဖို့အတွက် အစည်းအဝေးခေါ်ဖိအားပေးခဲ့သေးတယ်လို့ ဆိုပါတယ်။

ဒါ့အပြင် စစ်သားနဲ့ ပျူစောထီးတွေဟာ ကျွန်းလှမြို့ အဝင်၊ အထွက်တွေမှာ ဂိတ်တွေဆောက်လုပ်ထားပြီး စျေးရောင်းစျေးဝယ်လာတဲ့ ပြည်သူတွေဆီကနေလည်း ငွေကြေးတောင်းခံတာတွေ ပြုလုပ်လေ့ရှိနေတယ်လို့လည်း သိရပါတယ်။

စာတည်း – လင်း

ကန့်ဘလူ၊ မတ် ၁၂၊ ၂၀၂၃။

စစ်ကိုင်းတိုင်းဒေသကြီး၊ ကန့်ဘလူမြို့နယ်၊ နဂါးပေါ်ကျေးရွာက အုပ်ချုပ်ရေးမှူးအပါအဝင် ပျူစောထီး ၂ ဦး စုစုပေါင်း ၃ ဦး ပစ်ခတ်ရှင်းလင်းခံရတယ်လို့ သိရပါတယ်။

မတ်လ ၁၀ ရက်နေ့ည ၉ နာရီကျော်ခန့်မှာ နဂါးပေါ်ရွာနေ ပျူစောထီး ထွန်းညွှန့် (၃၂ နှစ်) နဲ့အတူ နေအိမ်မှာရှိနေတဲ့ ပျူစောထီး ဦးအုန်းကြိုင် (၅၂ နှစ်) နဲ့ အုပ်ကြီး ဇော်အောင် (၅၀ နှစ်) ကို ဝင်ရောက်ပစ်ခတ်ရှင်းလင်းခဲ့တာ ဖြစ်တယ်လို့ ကန့်ဘလူ ပကဖ အဖွဲ့ဝင်တဦးက ပြောပါတယ်။

“သွားရှင်းတုန်းကတော့ ထွန်းညွန့်နဲ့ အုန်းကြိုင်ကို ဝင်ရှင်းတာ။ ဖြစ်ချင်တော့ အုပ်ကြီးကလည်း ရှိနေတာ။ အုပ်ကြီးက ရွာကိုတော့ နည်းနည်းငဲ့တယ်။ ပျူရွာဖွဲ့ခိုင်းတာကို သူက မလုပ်တာ။ ၃ ယောက်စလုံးက သေနတ်ကိုင်တာ။ သူက စကစခန့်အုပ်ကြီးဆိုတော့ ပါသွားတာပေါ့” လို့ ပြောပါတယ်။

ပစ်ခတ်ရှင်းလင်းချိန်မှာ အုန်းကြိုင် ဆိုသူဟာ ထွက်ပြေးတာကြောင့် ကျေးရွာသုသာန်အနီးမှာ ထပ်မံပစ်ခတ်ရှင်းလင်းလိုက်ရတယ်လို့ ဆိုပါတယ်။

သေနတ်နဲ့ ပစ်ခတ်ရှင်းလင်းခံရလို့ ထွန်းညွန့်နဲ့ အုပ်ကြီးဇော်အောင်ဟာ ထွန်းညွန့်နေအိမ်မှာ သေဆုံးသွားပြီး အုန်းကြိုင်ဆိုသူကတော့ ရွာသုသာန်နားမှာ သေဆုံးသွားတယ်လို့ သိရပါတယ်။

အုပ်ချုပ်ရေးနဲ့အဖွဲ့ ရှင်းခံရပြီးနောက် မတ်လ ၁၁ ရက်နေ့မနက်မှာ စစ်ကောင်စီတပ်ဖွဲ့ဟာ ကျေးရွာထဲကို ရောက်လာပြီး ဒေသခံတွေကို စစ်ဆေးမေးမြန်းတာ PDF မိသားစုဝင်တွေလို့ ထင်တဲ့ ပြည်သူတွေကို စာရင်းမှတ်သွားတယ်လို့ သိရပါတယ်။

၂၀၂၂ ခုနှစ် စက်တင်ဘာလ ၅ ရက်နေ့ကလည်း ကန့်ဘလူမြို့နယ်၊ အင်ကြင်းစုကျေးရွာက စစ်ကောင်စီခန့်အုပ်ချုပ်ရေးမှူး ဦးကြည်လွင်နဲ့ သတင်းပေး ခင်မောင်သိန်းဆိုသူဟာလည်း ရှင်းလင်းခံရလို့ သေဆုံးခဲ့သေးတယ်လို့ သိရပါတယ်။

ကန့်ဘလူ၊ မတ် ၉၊ ၂၀၂၃။

စစ်ကိုင်းတိုင်း၊ ကန့်ဘလူခရိုင်အတွင်းမှာ ပြီးခဲ့တဲ့ ဖေဖော်ဝါရီလအတွင်း စစ်ကောင်စီတပ်တွေရဲ့ လက်ချက်ကြောင့် နေအိမ်နဲ့ဆိုင်ခန်း ၇၀၀ ကျော် မီးလောင်ပျက်စီးပြီး၊ ပြည်သူ ၃ ဦး သေဆုံးကာ ၁၆ ဦး ဒဏ်ရာရခဲ့တယ်လို့ သိရပါတယ်။

စစ်ကောင်စီတပ်ဟာ ကျေးရွာတွေကို စစ်ကြောင်းထိုးဝင်ရောက်ချိန် မီးရှို့တာ၊ လက်နက်ကြီး ပစ်ခတ်တာ၊ ပြည်သူသွားလမ်းတွေမှာ မိုင်းထောင်တာတွေကြောင့် နေအိမ်၊ ဆိုင်ခန်းတွေ မီးလောင်တာနဲ့ ဒေသခံတွေ ထိခိုက်သေဆုံးတာတွေ ရှိခဲ့တာလို့ ကျွန်းလှ-ကန့်ဘလူ တက်ကြွလှုပ်ရှားသူများအဖွဲ့ (ကန့်ဘလူခရိုင်)မှ တာဝန်ရှိသူက ပြောပါတယ်။

“ခုရတဲ့စာရင်းတွေက ဖေဖော်ဝါရီလ ၁ ရက်ကနေ ၂၈ ရက်အထိ မြေပြင်က ပေးပို့လာတဲ့ သတင်းအချက်အလက်အရ ပြုစုထားတာ ဖြစ်ပါတယ်။ ထိခိုက်သေဆုံး၊ မီးလောင်ပျက်စီးတာက စကစ အဖွဲ့တွေလုပ်တာကော သူ့လက်အောက်က ပျူစောထီးတွေ လုပ်တာကော ပါတယ်” လို့ ပြောပါတယ်။

မီးရှို့ဖျက်ဆီးခံရလို့ ကန့်ဘလူမြို့နယ်ရှိ မြေမွန်၊ တရော်ကိုင်း၊ ချောင်းကြား၊ ပိတောက်ပင်နဲ့ ပေါက်တော စတဲ့ကျေးရွာတွေက နေအိမ် ၂၆၇ လုံးနဲ့ ကျွန်းလှမြို့နယ်၊ ကြာတကန်ရွာက နေအိမ် ၃၅ လုံး မီးလောင်ပြာကျခဲ့တယ်လို့ ဆိုပါတယ်။

ဒါ့အပြင် စစ်တပ်က ပစ်ခတ်တဲ့ လက်နက်ကြီးကျည်ထိလို့ ကန့်ဘလူမြို့နယ်၊ ကိုးတောင်ဘို့တိုက်နယ်၊ ကိုးတောင်ဘို့ဈေးက ၆ ပေပတ်လည် ဆိုင်ခန်း ၃၇၁ ခန်းနဲ့ ဘူတာအနီးက ဈေးဆိုင်တန်း ၅၀ ခန့် မီးလောင်ပျက်စီးဆုံးရှုံးခဲ့ရတယ်လို့ သိရပါတယ်။

အလားတူ ထန်းကုန်းတိုက်နယ်၊ ကိုင်းရိုးရွာမှ အမျိုးသား ၁ ဦးနဲ့ အမျိုးသမီး ၂ ဦးကို စစ်တပ်က ဖမ်းဆီးသတ်ဖြတ်ခဲ့ကာ သင်ပေါင်းကျင်းရွာမှ ၁၅ နှစ်အရွယ် ကလေး ၁ ဦးလည်း မိုင်းနင်းမိပြီး သေဆုံးခဲ့တာ ဖြစ်ပါတယ်။

ဒါ့အပြင် ပျူစောထီးတွေ ထောင်ထားတဲ့ မိုင်းကိုနင်းမိပြီး ထန်းကုန်းတိုက်နယ်၊ သင်ပေါင်းကျင်းရွာနဲ့ ညောင်ဇင်လေးရွာမှ ဒေသခံ ၇ ဦးနဲ့ ဂွေးကုန်းရွာက ၉ ဦး ထိခိုက်ဒဏ်ရာရခဲ့ပါတယ်။

ကိုးတောင်ဘို့တိုက်နယ်၊ ကြခတ်အိုက်ရွာက ပြည်သူ ၃ ဦးလည်း စစ်အုပ်စုရဲ့ဖမ်းဆီးတာကို ခံထားရပြီး ဒီကနေ့အထိ ပြန်မလွတ်သေးဘူးလို့ သိရပါတယ်။

စာတည်း – လင်း

ကန့်ဘလူ၊ မတ် ၆၊ ၂၀၂၃။

စစ်ကိုင်းတိုင်း၊ ကန့်ဘလူခရိုင်၊ ကျေးရွာသုံးရွာက နေအိမ် ၅၅ လုံးကို ၂ ရက်အတွင်း စစ်ကောင်စီ၊ ပျူစောထီးတပ်ဖွဲ့တွေက မီးရှို့ဖျက်ဆီးခဲ့တယ်လို့ ဒေသခံတွေဆီက သိရပါတယ်။

မီးရှို့ခံရတဲ့ ကျေးရွာသုံးရွာဟာ ချပ်သင်းရွာ၊ ပင့်သာရွာ နဲ့ အောက်တဲရွာ တို့ဖြစ်ပြီး မတ်လ ၄ ရက်နေ့က ကိုးတောင်ဘို့တိုက်နယ်ထဲမှာရှိတဲ့ အောက်တဲရွာကို မနက် ၆ နာရီလောက်မှာ စစ်ကောင်စီလက်အောက်ခံ ခြေလျင်တပ်ရင်း (၁၃၇)က အင်အား ၅၀ ကျော်နဲ့ ကျေးရွာက နေအိမ် ၂ လုံးကို မီးရှို့ဖျက်ဆီးခဲ့တယ်လို့ ကျွန်းလှတက်ကြွလှုပ်ရှားသူများအဖွဲ့မှ တာဝန်ရှိသူတဦးက ပြောပါတယ်။

“အဲဒီကျေးရွာ သုံးရွာက အကွာအဝေးတွေတော့ ကျနော်တို့ အတိအကျ ပြောမရပါဘူး။ ရွာတွေကို မီးရှို့တဲ့အဖွဲ့တွေကလည်း မတူပါဘူး။ အောက်တဲရွာက အခုအကြိမ်နဲ့ဆို မီးရှို့ခံရတာ တတိယအကြိမ်မြောက်ပါ။ နေအိမ်စုစုပေါင်း ၄၂ လုံး အထိ မီးလောင်သွားပါပြီ” လို့ ဆိုပါတယ်။

အဲဒီနေ့မှာပဲ ချပ်သင်းရွာထဲက အုတ်တိုက် (၇) လုံးကို ပျူစောထီးတပ်ဖွဲ့တွေက မီးရှို့ဖျက်ဆီးသွားခဲ့ပြန်တယ်လို့ သိရပါတယ်။

အလားတူ မတ်လ ၄ ရက်နဲ့ ၅ ရက်နေ့မှာ ပင့်သာ(တည်ပင်)ရွာကို ပျူစောထီးတပ်ဖွဲ့တွေက အင်အား ၂၀၀ ကျော်နဲ့ ၂ ရက်ဆက်တိုက် မီးရှို့ဖျက်ဆီးခဲ့တဲ့အတွက် ပြည်သူပိုင်နေအိမ် ၅၁ လုံးနဲ့ လယ်ယာသုံးပစ္စည်းတချို့ မီးလောင်ပျက်စီးသွားပါတယ်။

“ပင့်သာရွာက ပြီးခဲ့တဲ့ ၂၀၂၂ ခုနှစ် သြဂုတ်လကတည်းက ပထမအကြိမ် မီးရှို့ခံရတာပါ။ အခုအကြိမ်နဲ့ဆို လေးကြိမ်မြောက် ရှိပါပြီ။ နေအိမ် ၁၅၀ လုံးအထိ မီးလောင်ပျက်စီးသွားတယ်” လို့ အဆိုပါတာဝန်ခံက ဆက်ပြောပါတယ်။

အခုလက်ရှိမှာ ပျူစောထီးတပ်ဖွဲ့တွေကို စစ်ကောင်စီတပ်က လက်နက်တပ်ဆင်ပေးလိုက်တဲ့အတွက် ပျူစောထီးတပ်ဖွဲ့ဟာ ကန့်ဘလူခရိုင်ထဲက ကျေးရွာ‌တွေဖြစ်တဲ့ ကိုးတောင်ဘို့၊ ချပ်သင်း နဲ့ ပင့်သာတိုက်နယ်အတွင်း စစ်ကြောင်းထိုးမီးရှို့မှုတွေ ဆက်တိုက်ပြုလုပ်လာတဲ့အတွက် ဒေသခံပြည်သူ သုံးသောင်းကျော်ဟာ ထွက်ပြေးတိမ်းရှောင်နေရတယ်လို့လည်း ကျွန်းလှတက်ကြွလှုပ်ရှားသူများအဖွဲ့က ထုတ်ပြန်ထားပါတယ်

စာတည်း – 007

ကန့်ဘလူ၊ ဖေဖော်ဝါရီ ၂၅၊ ၂၀၂၃။

စစ်ကိုင်းတိုင်း၊ ကန့်ဘလူမြို့နယ် တောင်ခြမ်း၊ ထန်းကုန်းတိုက်နယ်မှာ ဖေဖေါ်ဝါရီလ ၂၅ ရက် ဒီနေ့မနက်အစောပိုင်းက ပြည်သူ ၅ ဦး မိုင်းထိမှန်ခဲ့တယ်လို့ ဒေသခံတဦးက ပြောပါတယ်။

ကန့်ဘလူမြို့နယ်၊ ညောင်ဇင်ရွာအဝင်မှာ ဒီမနက်အစောပိုင်းက ရွာသား ၃ ဦးနဲ့ စျေးလာရောင်းသူ လင်မယား ၂ ဦး မိုင်းထိမှန်ခဲ့တာလို့ ဆိုပါတယ်။

“ညောင်ဇင်ရွာကို ကာဘိုးရွာဘက်ကနေ ဆိုင်ကယ်နဲ့ ဈေးလာရောင်းတဲ့ ဈေးသည်လင်မယားနဲ့ ရွာထဲက အရပ်သား ၃ ဦး ရွာထိပ်မှာ မိုင်းထိမှန်ခဲ့တာပါ။ မိုင်းသံကြားပြီးတော့ သေနတ်ပစ်ဖောက်သံတွေလည်း ကြားနေရတယ်။ ရွာသားတွေ ရွာထဲကနေ ရွာပြင်ထွက်ဖို့တောင် ကြောက်နေရတယ်” လို့ ဒေသခံတဦးက ပြောပါတယ်။

အသက် ၃၀ နဲ့ ၄၀ အရွယ်လောက်ရှိတဲ့ အမျိုးသား ၄ ဦးနဲ့ အမျိုးသမီး တဦးကို မိုင်းထိမှန်ခဲ့တာလို့ သူကဆက်ပြောပါတယ်။

ထိခိုက်သူတွေရဲ့ အသေးစိတ်အချက်အလက်ကို မသိရှိရသေးဘဲ အဲ့ဒီထဲက တဦးကတော့ စိုးရိမ်ရတဲ့ အခြေအနေရှိတယ်လို့ အထက်ပါဒေသခံက ဆက်ပြောပါတယ်။

ညောင်ဇင်ရွာမှာ အိမ်ခြေ ၂၀၀ ဝန်းကျင်လောက်ရှိပြီး ပျူစောထီးအမာခံတွေရှိတဲ့ ကျေးရွာဖြစ်ကာ PDF ရန်ကို ကြောက်တာကြောင့် ထောင်ထားတဲ့မိုင်း ဖြစ်နိုင်တယ်လို့ ဒေသခံတွေက သုံးသပ် ပြောကြားပေမယ့် ဒီမိုင်းတွေကို ဘယ်အဖွဲ့အစည်းက ထောင်ထားလဲဆိုတာကိုတော့ မြေလတ်အသံက သီးခြားအတည်မပြုနိုင်သေးပါဘူး။

ညောင်ဇင်ရွာမှာ ပြီးခဲ့တဲ့ ဖေဖေါ်ဝါရီလ ၁၆ ရက်ကလည်း မိုင်းပေါက်ကွဲမှုဖြစ်ပြီး လယ်တောသွားတဲ့ ပြည်သူတဦးနဲ့ နွား ၂ ကောင် ထိခိုက်ဒဏ်ရာ ရရှိခဲ့ပါသေးတယ်။

ကန့်ဘလူ၊ ဖေဖော်ဝါရီ ၂၂၊ ၂၀၂၃။

စစ်ကိုင်းတိုင်း၊ ကန့်ဘလူခရိုင်၊ ကန့်ဘလူမြို့နယ်မှာ စစ်ကောင်စီ၊ ပျူစောထီးပူးပေါင်းတပ်ဖွဲ့တွေက ၀င်ရောက်မီးရှို့ဖျက်ဆီးခဲ့လို့ ၃ ရက်အတွင်း လူနေအိမ် ၂၄၈ လုံး မီးလောင်ဆုံးရှုံးခဲ့တယ်လို့ ဒေသခံတွေဆီက သိရပါတယ်။

ဖေဖော်ဝါရီ ၁၉ ရက်နေ့စလို့ အိမ်ခြေ ၄၀၀ ကျော်ရှိတဲ့ မြေမွန်ရွာကို စစ်ကောင်စီ ခမရ ၃၆၉ တပ်ရင်းက အင်အား ၈၀ နီးပါးနဲ့ မီးရှို့ဖျက်ဆီးသွားခဲ့တာကြောင့် နေအိမ် ၂၁၈ လုံး မီးလောင်ပျက်စီးခဲ့ပြီး၊ ၂၀ ရက်နေ့မှာ အဲဒီစစ်ကြောင်းကပဲ မြေမွန်ရွာရဲ့ တောင်ဘက်မှာရှိတဲ့ တရော်ကိုင်းရွာထဲကို သေနတ်ပစ်ဖောက် ဝင်ရောက်လာကာ နေအိမ် ၂ လုံးကို ထပ်မံမီးရှို့ခဲ့တယ်လို့ ပြောပါတယ်။

ဖေဖော်ဝါရီ ၂၁ ရက်နေ့မှာတော့ ကျွန်းလှမြို့ပေါ်က စစ်ကောင်စီတပ်နဲ့ ကန့်ဘလူမြို့နယ် ပေကုန်း (တောင်)ရွာက ပျူစောထီးတွေ ပေါင်းပြီး အင်အား ၁၂၀ နီးပါးနဲ့ ချောင်းကြားရွာထဲကို ၀င်ရောက်ပြီး နေအိမ် ၂၈ လုံးကို မီးရှို့ဖျက်ဆီးသွားတယ်လို့ ကျွန်းလှ တက်ကြွလှုပ်ရှားသူများအဖွဲ့မှ တာဝန်ခံတဦးက မြေလတ်အသံကို ပြောပါတယ်။

“မြေမွန်ရွာနဲ့ တရော်ကိုင်းရွာက ပထမအကြိမ် မီးရှို့ခံရတာပါ။ ချောင်းကြားရွာက အခုအကြိမ်နဲ့ဆို ၃ ကြိမ်မြောက် မီးရှို့ခံရတာပါ။ ၃ ကြိမ်ပေါင်း နေအိမ်စုစုပေါင်း ၅၉ လုံး မီးလောင်ပျက်စီးသွားပါပြီ။ ခုက ၃ ရက်အတွင်း ရွာ ၃ ရွာကို ၂၄၈ လုံး မီးရှို့ခံလိုက်ရတယ်” လို့ သူက ပြောပါတယ်။

ကန့်ဘလူခရိုင်အတွင်းမှာ စစ်ကောင်စီတပ်ဖွဲ့တွေရဲ့ ကျေးရွာနေအိမ်တွေကို မီးရှို့ဖျက်ဆီးမှုကြောင့် မီးဘေးသင့်စစ်ရှောင်ဒေသခံ ၃ သုံးသောင်းနီးပါးအထိ ထွက်ပြေးတိမ်းရှောင်နေရဆဲ ဖြစ်တယ်လို့ သူက ဆက်လက်ပြောပါတယ်။

“စစ်ရှောင်ဦးရေက တခရိုင်လုံးစာ ခြုံပြီး ပြောပေးတာပါ။ တချို့က ရွာတွေ ပျက်သွားလို့ လုံးဝပြန်ဝင်မရတဲ့ဟာတွေ ရှိပါတယ်။ တစ်နှစ်နီးပါး ရှိပါပြီ။ အဲ့ဒါကြောင့် အကုန်ခြုံပြောပေးတာပါ” လို့ ဆိုပါတယ်။

ပြီးခဲ့တဲ့ ဖေဖော်ဝါရီ ၁၇ ရက်နေ့ကလည်း ကန့်ဘလူခရိုင်၊ ကန့်ဘလူမြို့နယ်၊ ထန်းကုန်းတိုက်နယ်က အသက် (၂၂) နဲ့ အသက် (၃၂)အရွယ် စစ်ရှောင်အမျိုးသား ၂ ဦးကို မီးရှို့သတ်ဖြတ်သွားခဲ့တယ်လို့ သိရပါတယ်။