ကန့်ဘလူ

စစ်ကိုင်း၊ မေ ၂၀၊ ၂၀၂၃။

စစ်ကိုင်းတိုင်း၊ ကန့်ဘလူခရိုင်၊ ဇီးကုန်းတိုက်နယ်၊ ဆူးတပ်ရွာကနေအိမ်တွေကို စစ်ကောင်စီတပ်တွေက မေလ ၁၉ ရက် မနေ့မနက် ၈ နာရီလောက်မှာ ဒုတိယအကြိမ်ထပ်မံမီးရှို့ခဲ့တယ်လို့ ကျွန်းလှတက်ကြွလှုပ်ရှားသူများအဖွဲ့က ထုတ်ပြန်ထားပါတယ်။

ဆူးတပ်ကျေးရွာထဲကို ခမရ – ၃၆၈ တပ်မှအင်အား ၁၅၀ နီးပါးပါ စစ်အုပ်စုက မနက် ၅ နာရီ ၁၅ မိနစ်လောက်မှာ လက်နက်တွေပစ်ဖောက်ဝင်ရောက်လာပြီး ၁ နာရီကျော်လောက်မှာတော့ အဲဒီရွာကနေအိမ်တွေကို ဝင်ရောက်မွှေနှောက်ကာ မီးရှို့တာတွေပါ လုပ်ဆောင်ခဲ့တာလို့ ကျွန်းလှဒေသခံ ကိုသက်တိုးက ပြောပါတယ်။

“နေအိမ်က ၁၅ လုံးလောက် မီးလောင်သွားတယ်လို့ကြားတယ်။ အခုချိန်ထိ ရွာထဲကို ပြန်မဝင်ရသေးဘူး၊ ဖမ်းဆီးခံရတဲ့ပြည်သူတွေ ရှိလား၊မရှိလားဆိုတာတော့ မကြားသေးဘူး၊ မနေ့ကဆူးတပ်ရွာကို မီးရှို့ပြီးပြန်ထွက်ချိန်မှာ ကာကွယ်ရေးတပ်ဖွဲ့တွေနဲ့ ထိတွေ့ပစ်ခတ်မှုတွေဖြစ်သေးတယ်။ ထိခိုက်ကျဆုံးမှုတွေတော့ မသိရဘူး” လို့ ဆိုပါတယ်။

အဲ့ဒီစစ်ကောင်စီတပ်တွေဟာ ရွာကိုမီးရှို့ပြီး မနက် ၉ နာရီလောက်မှာတော့ ဆူးတပ်ရွာနဲ့ တမိုင်ခွဲလောက်ဝေးတဲ့ ဖုတ်ကုန်းကျေးရွာထဲကို လက်နက်တွေပစ်ဖောက်ပြီး ဝင်ရောက်သွားခဲ့တယ်လို့ ဆိုပါတယ်။

ဆူးတပ်ကျေးရွာမှာ အိမ်ခြေ ၃၀၀ နီးပါးရှိပြီး ပြီးခဲ့တဲ့ ၂၀၂၂ ခုနှစ်၊ ဒီဇင်ဘာ ၁၃ ရက်ကလည်း အဲ့ဒီရွာက နေအိမ် ၅၉ လုံးကို စစ်အုပ်စုက မီးရှို့ဖျက်ဆီးသွားခဲ့ပါသေးတယ်။

စာတည်း – လင်း

စစ်ကိုင်း၊ မေ ၁၉၊ ၂၀၂၃။

စစ်ကိုင်းတိုင်း၊ ကန့်ဘလူမြို့နယ်ထဲက စစ်ဘေးရှောင် အမျိုးသားတဦးဟာ မိုးကြိုးပစ်ခံရပြီး သေဆုံးခဲ့တယ်လို့ ဒေသခံတဦးဆီက သိရပါတယ်။။

သေဆုံးသူဟာ ကန့်ဘလူမြို့နယ်၊ ချပ်ကုန်းရွာက အသက် ၂၄ နှစ်အရွယ် ကိုနော်မှိုင်းဖြစ်ပြီး မေလ ၁၆ ရက် ညနေ ၆ နာရီခွဲအချိန်ခန့်မှာ ကိုးတောင်ဘို့တိုက်နယ်က တဲတိုက်အနီးမိုးကြိုးပစ်ခံရတာဖြစ်တယ်လို့ ဆိုပါတယ်။

“သူတို့(ကိုနော်မှိုင်း)နေတဲ့ တဲကသစ်ပင်ဘေးကပ်ဆောက်ထားတာ မိုးကြိုးကသစ်ပင်ကိုပစ်တာမှာ တဲထဲကို နွားဆွဲလာတဲ့ကိုနော်မှိုင်းကို ထိသွားပြီး နေရာမှာပဲဆုံးတာ နွားကတော့ဘာမှမဖြစ်ဘူး “ လို့ဒေသခံတဦးက ပြောပါတယ်။

ကိုနော်မှိုင်းမှာ ဦးခေါင်းမီးလောင်သဏ္ဍန် ဒဏ်ရာရခဲ့ပြီး တဲအိမ်ကိုလည်း မီးလောင်သွားတယ်လို့သူက ဆက်ပြောပါတယ်။

သေဆုံးသူမှာ ဇနီးနဲ့ ၂ နှစ်သားအရွယ်ကလေးတဦး ကျန်ရစ်ခဲ့ပြီး အလောင်းကိုမနေ့နေ့လယ်က သဂြိုဟ်ခဲ့တယ်လို့ သိရပါတယ်။

ကိုနော်မှိုင်းတို့မိသားစုဟာ ကိုးတောင်ဘို့တိုက်နယ်အတွင်းကို ပြီးခဲ့တဲ့နှစ်ဆန်းဝန်းကျင်လောက်ကတည်းကအခြားရွာသားအချို့နဲ့ပြောင်းရွှေ့နေထိုင်တဲ့ အနေကြာစစ်ရှောင်တဦးဖြစ်ပြီး ကိုးတောင်ဘို့တိုက်နယ်အတွင်း စစ်ရှောင်ထဲက ပထမဆုံးမိုးကြိုးထိမှန်သေဆုံးသူဖြစ်တယ်လို့ သိရပါတယ်။

ကန်ဘလူမြို့နယ်မှာ မေလ ၁၅ ရက်နေ့ကလည်း ချပ်သင်းတိုက်နယ်က အသက် ၅၃ နှစ်အရွယ် စစ်ရှောင်အမျိုးသမီးတဦး မြွေကိုက်ခံရသလို မေလ ၁၂ ရက်နေ့ကလည်း ဇီးကုန်းတိုက်နယ်က အသက် ၁၇ နှစ်အရွယ်လူငယ်တဦး မြေကိုက်ခံခဲ့ရပါသေးတယ်။

စာတည်း – 007

ကန့်ဘလူ၊ ဧပြီ ၂၅၊ ၂၀၂၃။

စစ်ကိုင်းတိုင်း၊ ကန့်ဘလူမြို့နယ်အတွင်းမှာ ဧပြီလ ၂၄ ရက်မနေ့ညပိုင်းက စစ်ကောင်စီတပ်တွေနဲ့ ဒေသခံကာကွယ်ရေးတပ်တို့ အပြန်အလှန်ပစ်ခတ်မှုဖြစ်ပြီး စစ်ကောင်စီဘက်ကပစ်လိုက်တဲ့ လက်နက်ကြီးကျည်တွေက ချပ်သင်းကျေးရွာကို ကျရောက်ခဲ့တာကြောင့် နေအိမ်တွေ မီးလောင်ပျက်စီးခဲ့တယ်လို့ သိရပါတယ်။

ချပ်ကြီးရွာမှာ အထိုင်ချတပ်စွဲနေတဲ့ စစ်ကောင်စီအဖွဲ့တွေနဲ့ ကျေးရွာအနီးမှာ မနေ့ည ၇ နာရီလောက်က ပစ်ခတ်မှုဖြစ်ချိန် စစ်ကောင်စီဘက်ကပစ်လိုက်တဲ့ လက်နက်ကြီးကျည်က ရွာနဲ့ ၂ နိုင်သာသာဝေးတဲ့ ချပ်သင်းရွာကို ကျရောက်ပေါက်ကွဲခဲ့ရာမှာ အိမ်ခြေ ၅၀ မီးလောင်ပျက်စီးခဲ့တာပါ။

“မနေ့မနက်က ချပ်ကြီးက ပျူနဲ့စကစတွေက တပ်ကုန်းဘက်ကနေ လက်နက်ကြီးတွေနဲ့ရမ်းသမ်းပစ်လို့ လက်နက်ကြီးတွေက ပင့်သာကြီးရွာထဲကို ကျပြီး လူထိခိုက်သေဆုံးတာရှိတယ်။ ညဘက်လည်းကျကော သူတို့ဘက်က လက်နက်ကြီးတွေနဲ့ထပ်ပြီး ရမ်းသမ်းပစ်နေလို့ ဒီဘက်က အဖွဲ့တွေကလည်း သွားပစ်တာ။ အဲဒီချိန်မှာ စကစ ဘက်ကပစ်တဲ့ လက်နက်ကြီးအချို့က ချပ်သင်းရွာထဲကျပြီး နေအိမ်အချို့ မီးလောင်ရာကနေ မီးတွေကူးပြီး တော်တော်များများလောင်သွားတာ”လို့ တိုက်ခိုက်မှုမှာပါဝင်တဲ့ ရဲဘော်တဦးက ပြောပါတယ်။

အပြန်အလှန်ပစ်ခတ်ချိန် ၁ နာရီခန့်ကြာပြီးနောက် ဒေသကာကွယ်ရေးအဖွဲ့တွေဘက်က ထိခိုက်ကျဆုံးတာမရှိဘဲ စစ်ကောင်စီနဲ့ပျူဘက်က ထိခိုက်သေဆုံးရှိနိုင်ကာ စာရင်းအတိအကျကိုတော့ မသိရှိရသေးဘူးလို့ ဆိုပါတယ်။

ဒါ့အပြင် “ချပ်ကြီးမှာရှိနေတဲ့ စစ်ကောင်စီတပ်ကို ဒေသကာကွယ်ရေးအဖွဲ့တွေက မျက်နှာမူပြီးတိုက်တာ၊ စကစ ဘက်ကတော့ ချပ်ကြီးဘက်ကနေ ချပ်သင်းဘက်ကိုပစ်တာဆိုတော့ ဘယ်သူပစ်လို့ ရွာမီးလောင်တယ်ဆိုတာ သိသာပါတယ်”လို့ အထက်ပါရဲဘော်က ဆက်ပြောပါတယ်

ချပ်သင်းကျေးရွာဟာ ပြီးခဲ့တဲ့ မတ်လ ဒုတိယအပတ်ကတည်းက စစ်ကောင်စီတပ်တွေရဲ့ စစ်ကြောင်းထိုးမှုကြောင့် ဒေသခံအများစုက နေအိမ်တွေမှာမနေရဲဘဲ ထွက်ပြေးနေရပြီး အနည်းစုသာ ရွာမှာကျန်နေခဲ့တာကြောင့် ခုဖြစ်စဥ်မှာ ဒေသခံအတွေအနေနဲ့ ထိခိုက်သေဆုံးမှုတွေ မရှိခဲ့ဘူးလို့လည်း ဆိုပါတယ်။

မတ်လ ၃ ရက်မနက်အစောပိုင်းက ချပ်ကြီးရွာမှာရှိနေတဲ့ စစ်ကောင်စီတပ်ကို KB2 တပ်ရင်း၊ ချပ်သင်းတိုက်နယ် ပကဖအဖွဲ့တွေအပြင် ပူးပေါင်းအဖွဲ့တွေက တိုက်ခိုက်လို့ စစ်သားနဲ့ပျူ ၄၀ ကျော်သေဆုံးခဲ့ပြီး လက်နက် ၁၅ လက်အပါမဝင် ဆက်စပ်ပစ္စည်းတွေ သိမ်းဆည်းရမိခဲ့တယ်လို့လည်း တိုက်ခိုက်ရေးမှာပါဝင်တဲ့ ရဲဘော်တွေဆီက သိရပါတယ်။

စာတည်း – လင်း

ကန့်ဘလူ၊ ဧပြီ ၁၁၊ ၂၀၂၃။

စစ်ကိုင်းတိုင်း၊ ကန့်ဘလူခရိုင် မလည်တိုက်နယ် ပဇီကြီးရွာမှာပြည်သူ့အုပ်ချုပ်ရေးအဖွဲ့( ပအဖ) ရုံးဖွင့်ပွဲပြုလုပ်နေချိန် စစ်ကောင်စီက လေယာဉ်နဲ့ လာရောက်ပစ်ခတ်ခဲ့လို့ ဒေသခံပြည်သူ ၅၀ထက်မနည်း ထိခိုက်သေဆုံးသွားတယ်လို့ သိရပါတယ်။

ဧပြီလ ၁၁ရက် ဒီနေ့ မနက် ၇ နာရီကျော်လောက်မှာ တံတားဦးလေတပ်ဆွယ်က တက်လာတဲ့ ဖိုက်တာ ၁ စီးဟာ ပဇီကြီးရွာ ပအဖရုံးဖွင့်ပွဲကို လေကြောင်းကနေ ပထမအကြိမ် ဗုံးကြဲတိုက်ခိုက်သွားခဲ့ပါတယ်။

နောက်ထပ်နာရီဝက်လောက်မှာတော့ နမခ ကနေ ထပ်တက်လာတဲ့ Mi-35တိုက်ခိုက်ယာဥ် ၁ စီးဟာ ပဇီးကြီးရွာပတ်ပတ်လည်ကို ဒုတိယအကြိမ် လေကြောင်းပစ်ခတ်တိုက်ခိုက်ခဲ့တယ်လို့ ကန့်ဘလူဒေသခံတဦးက ပြောပါတယ်။

“အတွင်းစည်းပေါက်ကြားတာဖြစ်ဖြစ် နယ်ခံဒလန်ပေးပို့လို့ပဲဖြစ်ဖြစ် အခုလိုအတိအကျသိပြီး လာပစ်တာခံရတာလို့ပြောတယ်။ အခုနောက်ပိုင်း ထပ်ကြားရတာက ပဇီကြီးရွာအတွင်း ပိတ်မိတဲ့ပြည်သူတွေ အကုန်သေတယ်လို့ ထပ်ကြားရတယ်အသေအပျောက်တအားများနေတယ် ” လို့ ဆိုပါတယ်။

လေယာဉ် ၂စီး နဲ့ အလှည့်ကျ ၁၀ မိနစ်ဝန်းကျင်လောက်လာပစ်သွားတာဖြစ်တဲ့အပြင် မထထမင်းကျွေးရုံဘက်ကိုဗုံချသွားတာဖြစ်လို့ သေဆုံးသူအများစုဟာ အရပ်သားတွေဖြစ်တယ်လို့ ပြောပါတယ်။

“ဗုံးအရေအတွက်ကတော့ ဂျက်ဖိုက်တာနဲ့ချတာ ၂လုံးလောက်ချတယ်လို့ ထင်တယ်။ Mi35 ကတော့ ဗုံးအရေအတွက် မပြောနိုင်တော့ဘူး ဘာလို့လဲဆိုတော့ သူဝိုက်ပစ်သွားတာ အကြာကြီးပစ်သွားတာ” လို့ ဆိုပါတယ်။

အခုလက်ရှိအချိန်မှာ ပဇီကြီးကျေးရွာထဲမှာ ထိခိုက်သေဆုံးမှုတွေများနေတဲ့အတွက်ရှင်းလင်းရေးလုပ်ဆောင်ဖို့ ခက်ခဲနေတဲ့ အခြေအနေဖြစ်တာကြောင့် မြေလတ်အသံအနေနဲ့ အသေးစိတ်အချက်အလက်တွေကို စုံစမ်းနေဆဲဖြစ်ပါတယ်။

စာတည်း- ဇို

စစ်ကိုင်း၊ ဧပြီ ၇၊ ၂၀၂၃။

စစ်ကိုင်းတိုင်း၊ ကန့်ဘလူခရိုင်ရှိ ကျေးရွာအချို့က နေအိမ် ၁၇၄ လုံးကို စစ်ကောင်စီတပ်ဖွဲ့တွေက ၃ ရက်အတွင်း မီးရှို့ဖျက်ဆီးသွားတယ်လို့ ဒေသခံတွေဆီက သိရပါတယ်။

ကန့်ဘလူခရိုင်၊ ကိုးတောင်ဘို့တိုက်နယ် လျှော်ဖြူကုန်းရွာက နေအိမ်အလုံး ၆၀ ကို ကိုးတောင်ဘို့အထိုင် ခြေလျင်တပ်ရင်း-၁၃၇က စစ်ကြောင်း ၂ ကြောင်းခွဲပြီး ဧပြီလ ၂ ရက်နေ့မှာ ဝင်ရောက်မီးရှို့ခဲ့သလို အဲဒီရက်မှာပဲ နောက်ထပ်စစ်ကြောင်းတကြောင်းက ထန်းကုန်းတိုက်နယ် ဉာဏ်အင်းရွာက အိမ်ခြေ အလုံး ၄၀ ကို မီးရှို့ဖျက်ဆီးသွားခဲ့တယ်လို့ ဆိုပါတယ်။

ယင်းနောက် လျှော်ဖြူကုန်းရွာနဲ့ ဉာဏ်အင်းရွာကို မီးရှို့သွားတဲ့ စစ်ကောင်စီတပ်ဖွဲ့တွေဟာ ဧပြီလ ၃ ရက်နေ့မှာတော့ ထန်းကုန်းတိုက်နယ်၊ အင်းလယ်ကြီးရွာထဲကို ဝင်ရောက်ခဲ့ပြီး နေအိမ် ၇၀ နီးပါးကို မီးရှို့သွားတဲ့အပြင် စိတ်ဝေဒနာရှင်တဦးဖြစ်တဲ့ အသက် (၃၅)နှစ်အရွယ် ကိုဝလီကို ပစ်ခတ်သတ်ဖြတ်သွားတဲ့အပြင် အသက် (၆၅)နှစ်အရွယ် ဦးဌေးမောင်ကိုလည်း လက်ပြန်ကြိုးတုပ်ပြီး မီးရှို့သတ်ဖြတ်သွားခဲ့ပါသေးတယ်။

“ရွာသားတွေက အခုထိ ရွာထဲမဝင်ရသေးဘူး။ တချို့အိမ်တွေကလည်း မီးမငြိမ်းသေးတော့ မီးတွေပြန်ငြိမ်းနေရတယ်။ ရွာသားတွေက ကိုယ့်ယာတောထဲမှာပဲ အဆင်ပြေသလို တဲတွေထိုးပြီး နေနေကြတယ်။ စားဖို့သောက်ဖို့ကကျတော့ တယောက်စီကနေ တယောက်ဝေမျှစားနေရတယ်” လို့ အင်းလယ်ကြီးရွာ ဒေသခံတဦးက ပြောပါတယ်။

ကန့်ဘလူခရိုင်ထဲက မီးရှို့ခံရတဲ့ အဆိုပါကျေးရွာသုံးရွာထဲမှ လျှော်ဖြူကုန်းရွာဟာ အခုအကြိမ်နဲ့ဆို မီးရှို့ခံရတာ ၃ ကြိမ်မြောက်ရှိပြီးဖြစ်တယ်လို့လည်း ကျွန်းလှတက်ကြွလှုပ်ရှားသူများအဖွဲ့က ထုတ်ပြန်ထားပါတယ်။

စာတည်း – 007

ကန့်ဘလူ၊ ဧပြီ ၅၊ ၂၀၂၃။

စစ်ကိုင်းတိုင်း၊ ကန့်ဘလူခရိုင်၊ ထန်းကုန်းတိုက်နယ်၊ အင်းလယ်ကြီးရွာက နေအိမ် ၇၀ ကျော်ကို စစ်ကောင်စီတပ်တွေက မီးရှို့သွားတဲ့အပြင် ရွာသား ၂ ဦးကိုလည်း သတ်သွားတယ်လို့ ဒေသခံတွေဆီက သိရပါတယ်။

အင်အား ၁၀၀ ကျော်ရှိတဲ့ စစ်အုပ်စုဟာ ဧပြီလ ၃ ရက် ညနေ ၄ နာရီလောက်မှာ လက်နက်တွေပစ်ဖောက်ဝင်ရောက်လာပြီးနောက် စိတ်ကျန်းမာရေးချို့တဲ့သူ အသက် ၂၅ နှစ်အရွယ် ကိုဝလီနဲ့ အသက် ၇၀ အရွယ် ဦးဌေး‌မောင် တို့ကို သတ်သွားတာလို့ ဒေသခံတဦးက ပြောပါတယ်။

“ကိုဝလီက မွေးရာပါ စိတ်မမှန်တဲ့သူပါ၊ ရွာထဲမှာ သူသွားချင်သလိုသွားနေတာ။ စစ်သားတွေလားလည်းသူမသိဘူး၊ သူသွားချင်သလိုသွားနေတယ်။ ကျနော်တို့မနေ့က (ဧပြီလ ၄) ရွာထဲကို မီးဝင်ငြိမ်းတဲ့အချိန် အူတွေထွက်နေတဲ့ သူ့အလောင်းကို သူ့အိမ်ရှေ့မှာတွေ့တယ်။ ဦးဌေးမောင်အလောင်းကိုတော့ ဒီမနက်မှ သူ့အိမ်ပေါ်မှာတွေ့တယ်”လို့ ဆိုပါတယ်။

ကိုဝလီကိုတော့ စစ်အုပ်စုက လမ်းမှာတင်သေနတ်နဲ့ပစ်သတ်ခဲ့ပြီး ဦးဌေးမောင်ကိုတော့ လက်ပြန်ကြိုးတုပ်ပြီးမီးရှို့သတ်ခဲ့တာလို့လည်း ဆိုပါတယ်။

ဦးဌေးမောင်ကို ကျေးရွာကာကွယ်ရေးပကဖတပ်ဖွဲ့တွေက ကျေးရွာထဲကနေ ထွက်ဖို့ခေါ်ခဲ့ပေမယ့် မလိုက်ပဲ ရွာထဲမှာကျန်နေခဲ့ရာမှာ အခုလို အသတ်ခံလိုက်ရတာလို့ ကျေးရွာပကဖ တပ်ဖွဲ့ဝင်တဦးက ပြောပါတယ်။

“အရင်စစ်ကြောင်းတွေလာတိုင်း ဦးဌေးမောင်ကို ဘာမှမလုပ်ဘူး။ သူက အသက်ကြီးပြီဆိုတော့ အိမ်မှာပဲနေခဲ့တာများတယ်။ ဒီတခေါက်စစ်ကြောင်းလာတော့ သူ့ကိုသွားခေါ်တယ်၊ သူမလိုက်ဘူး အိမ်မှာပဲနေခဲ့မယ်ဆိုပြီး နေခဲ့လိုက်တာ၊ အခုလိုဖြစ်သွားတယ်”လို့ ဆိုပါတယ်။

သေဆုံးသွားတဲ့ ကိုဝလီရဲ့ အလောင်းကိုတော့ ဧပြီလ ၄ ရက်မနေ့က သင်္ဂြုဟ်ပေးလိုက်ပြီး ဦးဌေးမောင်ရဲ့ရုပ်အလောင်းကိုတော့ ဒီမနက်မှ သဂြိုလ်ပေးလိုက်တယ်လို့ သိရပါတယ်။

အိမ်ခြေ ၈၀၀ ကျော်ရှိတဲ့ အင်းလယ်ကြီးရွာဟာ အခုလိုမီးရှို့ခံရတာ ဒုတိယအကြိမ်ရှိပြီဖြစ်ပြီး၊ ပြီးခဲ့တဲ့ ၂၀၂၂ ခုနှစ်၊ အောက်တိုဘာလတုန်းကလည်း စစ်ကောင်စီတပ်ဖွဲ့တွေက အိမ်ခြေ ၁၃၆ လုံးကို မီးရှို့ဖျက်ဆီးသွားခဲ့ပါသေးတယ်။

စာတည်း – လင်း