တိုက်ခိုက်မှုအတွင်း စစ်ကောင်စီတပ်ဖွဲ့ဝင် ၉ ဦးသေဆုံး

ငဖဲ၊ မေ ၁၊ ၂၀၂၅။

မကွေးတိုင်း၊ ငဖဲမြို့နယ်အတွင်း အမ်း-ပဒါန်းလမ်းပိုင်းမှာ လုံခြုံရေးယူလာတဲ့စစ်ကောင်စီတပ်ဖွဲ့ဝင်တွေကို ဝင်ရောက်တိုက်ခိုက်ရာ ၉ ဦးသေဆုံးပြီး လက်နက်ခဲယမ်းတွေလည်းသိမ်းဆည်းခဲ့တယ်လို့ Chin Defence Force – Asho ဆီက သိရပါတယ်။

အဆိုပါ အင်အား ၂၀ ကျော်ပါ ကပစ ၁၃ ကစစ်ကောင်စီတပ်ဖွဲ့ဝင်တွေကို ဧပြီ ၃၀ ရက် မနက် ၈ နာရီက စတင်တိုက်ခိုက်ခဲ့ပြီး တိုက်ခိုက်ချိန် မိနစ် ၃၀ ကြာခဲ့တယ်လို့ ဆိုပါတယ်။

“အမတ ၃၇၅၊ နစခ ၄၀၉၊ နစခ ၉၀၅ ဆိုပြီး ရှိပါတယ်၊ အဲ့ဒီတပ်တွေကနေ နတ်ရေကန်ကို ရိက္ခာတို့ လူအဖြည့်အတင်းအပြောင်းအလဲလုပ်ဖို့ အတွက် ကားတက်ပြီဆိုရင် ကားလမ်းဘေးကိုလာပြီး လုံခြုံရေးယူပေးကြတာ၊” Chin Defence Force-Asho ပြောရေးဆိုခွင့်ရှိသူ ဆလိုင်းရိုးချင်းက ပြောပါတယ်။

အဆိုပါတိုက်ပွဲအတွင်း စစ်ကောင်စီတပ်ဖွဲ့ဝင် ၉ ဦးသေဆုံးပြီး MA သေနက် ၉ လက်၊ ကျည်ဘောက်နဲ့ ခဲယမ်းအချို့ သိမ်းဆည်းရခဲ့တယ်လို့ ဆိုပါတယ်။

တိုက်ခိုက်ခံရပြီးနောက် အဆိုပါစစ်ကြောင်းဟာ ငဖဲမြို့နယ်၊ ပဇီကျေးရွာဘုန်းကြီးကျောင်းထဲကို ပြန်လည်ဝင်ရောက်သွားတယ်လို့ သိရပါတယ်။

နတ်ရေကန်လေကြောင်းရန်ကာကွယ်ရေးတပ်စခန်းရဲ့ ကာကင်းဖြစ်တဲ့ ပဇီရွာဘုန်းကြီးကျောင်းထဲမှာ တပ်မ ၉၉၊ ကပစ ၂၊ ကပစ ၁၀၊ ကပစ ၁၃၊ ကပစ ၁၄ စတဲ့တပ်တွေက စစ်ကောင်စီတပ်ဖွဲ့ဝင် အင်အား ၁၃၀ တပ်စွဲနေထိုင်နေတာလို့လည်း ဆိုပါတယ်။

စာတည်း – လင်း

မြေလတ်အသံ၊ မတ် ၁၁၊ ၂၀၂၅။

စစ်ကောင်စီလက်လွှတ်လိုက်ရတဲ့ ရခိုင်ပြည်နယ်၊ အမ်းမြို့အခြေစိုက် အနောက်ပိုင်းတိုင်းစစ်ဌာနချုပ်(နပခ)တိုက်ပွဲတွေကို စစ်ကူသွားရောက်ရတဲ့ မကွေးမြို့အခြေစိုက် တပ်မ ၈၈နဲ့လက်အောက်ခံတပ်ရင်းတွေက စစ်ကောင်စီတပ်ဖွဲ့ဝင် ၃၀၀ ဦးထက်မနည်း သေဆုံး/ပျောက်ဆုံးမှုတွေရှိနေတယ်လို့ အဲ့ဒီတပ်မနဲ့ နီးစပ်သူတဦးထံက သိရပါတယ်။

အမ်းနပခ ကျဆုံးသွားတဲ့ ဒီဇင်ဘာလကနေ ဖေဖော်ဝါရီလအထိ ၃ လအတွင်း တပ်မ ၈၈ လက်အောက်နည်းဗျူဟာ ၂ ခုရဲ့လက်အောက်ခံတပ်ရင်း ၅ ရင်းက စစ်ကောင်စီတပ်ဖွဲ့ဝင်တွေ အမ်း-ပဒါန်းလမ်းပိုင်းကတဆင့် အမ်းမြို့ နပခကို စစ်ကူသွားရောက်ရာက ရခိုင်ရိုးမတကြောမှာ တိုက်ခိုက်ခံရပြီး သေဆုံးမှုများပြားခဲ့တာလို့ ဆိုပါတယ်။

“ ၃၁၇ (ခမရ) တင် ၁၀၀ လောက် ပျောက်ဆုံးဖြစ်နေတယ်။ ၈၃ (ခလရ) ကလည်း အကျများတယ်။ ခုထိ ပျောက်ဆုံးစာရင်းသွင်းထားတယ်” လို့ မကွေးတပ်မ ၈၈ နဲ့ နီးစပ်သူတဦးက မြေလတ်အသံကို ပြောပါတယ်။

အမ်း နပခ ကို တပ်မ ၈၈ နဲ့လက်အောက်ခံတပ်တွေဖြစ်တဲ့ ခမရ ၄၁၅၊ ၄၁၆၊ ၃၁၇၊ ၃၀၁၊ ခလရ ၈၃ တပ်ရင်းတွေက အမ်း-ပဒါန်းလမ်းပိုင်းကတဆင့် အမ်းမြို့ကို စစ်ကူသွားရောက်ရာက အမ်းမြို့အနီး ရခိုင်ရိုးမပေါ်မှာ အာရက္ခတပ်တော်-AAတပ်ဖွဲ့ ရဲ့ တိုက်ခိုက်မှုတွေကို ခံခဲ့ရတာပါ။

အာရက္ခတပ်တော် AA ရဲ့ ၂၀၂၄ ဒီဇင်ဘာ ၆ ရက်တိုက်ပွဲသတင်းထုတ်ပြန်ချက်အရ အမ်းမြို့ကို စစ်ကူလာတဲ့ တပ်မ ၈၈ လက်အောက် နည်းဗျူဟာစစ် ကြောင်းတခုကို အမ်းမြို့မြောက်ဘက်ရိုးတောင်လမ်းမတနေရာမှာ ၃ ရက်ကြာပိတ်ဆို့တိုက်ခိုက်ခဲ့ပြီးတဲ့နောက် စစ်ကောင်စီတပ်ဖွဲ့ဝင်ရုပ်အလောင်း ၁၀၀ ကျော်ရရှိကာ စစ်သုံ့ပန်းတချို့ကို ဖမ်းဆီးနိုင်ခဲ့ပြီး လက်နက်၊ခဲယမ်းအများအပြားရရှိခဲ့တယ်လို့ ဒီဇင်ဘာ ၆ ရက်မှာ ထုတ်ပြန်ထားပါတယ်။

အမ်းနပခ လက်လွှတ်ရပြီးနောက် စစ်ကောင်စီတပ်က လက်ရှိ အမ်း-ငဖဲနယ်စပ်ရခိုင်ရိုးနယ်ခြားတိုက်ပွဲတွေကို အနောက်ပိုင်းတိုင်းစစ်ဌာနချုပ်က ဆုတ်ခွာလာတဲ့ လက်ကျန်စစ်ကောင်စီတပ်သားတွေအပြင် တပ်မ ၈၈၊ တပ်မ ၉၉၊ ပဒါန်းတပ်နယ်က တပ်ရင်းတွေဖြစ်တဲ့ မစခ ၉၀၅၊ အမတ ၃၇၅၊ အမတ ၄၀၉၊ ကပစ ၁၄ တပ်တွေက စစ်ကောင်စီတပ်တွေနဲ့ ပြန်လည်တိုက်ခိုက်နေတာပါ။

အမ်းနဲ့ နယ်မြေထိစပ်နေတဲ့ ငဖဲမြို့နယ်အတွင်းလှုပ်ရှားနေတဲ့ အာရက္ခတပ်တော် AAနဲ့မဟာမိတ်တွေဖြစ်တဲ့ PRA မကွေး၊ CDF Ashoတပ်ဖွဲ့တွေကလည်း အမ်းတိုက်ပွဲတွေကနေ ထွက်ပြေးလာတဲ့ စစ်ကောင်စီတပ်သားအများအပြားကို မကြာခဏဖမ်းဆီးရမိထားကာ အဲ့ဒီထဲမှာ တပ်မ ၈၈ လက်အောက်တပ်ရင်းတွေက စစ်ကောင်စီတပ်ဖွဲ့ဝင်တွေလည်း ပါဝင်နေတာပါ။

အမ်းနဲ့ဆက်စပ်တိုက်ပွဲတွေအတွင်း တပ်မ ၈၈ ထိခိုက်သေဆုံးမှုတွေအနက် စစ်မှုထမ်းဥပဒေနဲ့ စုဆောင်းခံရသူ စစ်ကောင်စီတပ်သားအများစုပါဝင်တယ်လို့ အဲ့ဒီတပ်မနဲ့နီးစပ်သူက ဆိုပါတယ်။

“ အသက် ၁၈၊ ၂၀ ဝန်းကျင် ပစ(ပြည်သူ့စစ်မှုထမ်းသင်တန်းဆင်းတပ်ဖွဲ့ဝင်) တွေများတယ်။ စစ်မှုထမ်းအပတ်စဥ်ကတော့ အစုံပဲ။ တချို့ဆို သင်တန်းသာဆင်းလာတာ ကျည်တောင်မထိုးတတ်ဘူး။ ပျောက်ဆုံးဆိုရင် အလောင်းမရဘူး၊ ထွက်ပြေးတယ်ယူဆပြီး ဘာခံစားခွင့်မှမရှိဘူး” လို့ ပြောပါတယ်။

လက်ရှိ တပ်မ ၈၈ လက်အောက်တပ်ရင်းတချို့ အမ်း-ငဖဲတိုက်ပွဲနယ်မြေတွေကနေ ဖေဖော်ဝါရီလအတွင်းမှာ မကွေးမြို့ကို ပြန်လည်ခေါ်ဆောင်ထားတယ်လို့ဆိုပါတယ်။

ငဖဲ၊ ဖေဖော်ဝါရီ ၂၆၊ ၂၀၂၅။

မကွေးတိုင်း၊ ငဖဲမြို့နယ်၊ အမ်း-ပဒါန်းလမ်းပိုင်းရှိ နတ်ရေကန်ကာကင်းစခန်းတွေကနေ ထွက်ပြေးလာတဲ့ စစ်ကောင်စီတပ်ဖွဲ့ဝင် ၂၃ ဦး ကို အရှင်ဖမ်းမိထားတယ်လို့ Chin Defence Force-Asho ချင်းကာကွယ်ရေးတပ်-အရှိုက ဒီကနေ့ ဖေဖော်ဝါရီ ၂၆ ရက်မှာ ထုတ်ပြန်ပါတယ်။

ဖေဖော်ဝါရီ ၂၄ ရက်ကနေ ၂၆ ရက်အထိ ၃ ရက်တာအတွင်း နတ်ရေကန် ဆက်သွယ်ရေးတာဝါတိုင်ရဲ့မြောက်ဘက် မီတာ ၂,၀၀၀ ခန့်အကွာ တောတွင်းနေရာအသီးသီးတွေကနေ စစ်ကောင်စီတပ်သား ၂၃ ဦးကို လက်နက်ခဲယမ်းတွေနဲ့အတူ ဖမ်းဆီးမိခဲ့တယ်လို့ ဆိုပါတယ်။

စစ်ကောင်စီတပ်သား ၂၃ ဦးထံကနေ MA 1 ၁၃ လက်၊ MA 2 ၁ လက်၊ MA 3 ၃ လက်၊ MA 11 ၂ လက်၊ MA 5 ၁ လက်၊ စုစုပေါင်း လက်နက်ငယ် ၂၀ လက်၊ လက်ပစ်ဗုံး ၁၈ လုံး၊ အီနာဂါ ဗုံးသီး ၁၂ လုံး၊ လက်နက်ငယ် ကျည်မျိုးစုံ ၄,၀၀၀ ကျော်နဲ့ အခြားစစ်အသုံးအဆောင်ပစ္စည်းတွေ သိမ်းဆည်းရမိခဲ့တယ်လို့ ဖော်ပြပါတယ်။

နတ်ရေကန်ဒေသအနီးတဝိုက်အတွင်း တာဝန်ထမ်းဆောင်နေတဲ့ စစ်ကောင်စီတပ်ဖွဲ့ဝင်တွေအနေနဲ့ တော်လှန်ရေးတပ်ဖွဲ့ဝင်တွေနဲ့ ချိတ်ဆက်ပြီးပူးပေါင်းကြဖို့လည်း ထုတ်ပြန်ချက်မှာ တိုက်တွန်းထားပါတယ်။

ပြီးခဲ့တဲ့ ဖေဖော်ဝါရီ ၂၂ ရက်ကလည်း နတ်ရေကန်လေကြောင်းရန်ကာကွယ်ရေးတပ်ကနေ လက်နက်ခဲယမ်းတွေသယ်ဆောင်လာပြီး ဆုတ်ခွာလာတဲ့ အင်အား ၁၀၀ ကျော်ပါ စစ်ယာဉ်တန်း ၄ စီးကို Chin Defence Force-Asho က ကြားဖြတ်တိုက်ခိုက်ခဲ့ရာ စစ်ကောင်စီဘက်က ၇ ဦးသေဆုံးခဲ့ပါသေးတယ်။

မကွေး၊ ဇူလိုင် ၁၁၊ ၂၀၂၄။

မကွေးတိုင်း၊ ငဖဲမြို့နယ်၊ မင်းဘူး-အမ်း လမ်းမပေါ်က မှိန်းစိမ်းလမ်းခွဲမှာ တပ်အပြောင်းအရွှေ့လုပ်ဖို့ ထွက်လာတဲ့ စစ်ကောင်စီတပ်ဖွဲ့တွေ ချုံခိုတိုက်ခိုက်ခံရပြီး ၅ ဦးသေဆုံးကာ သေနတ် ၂ လက် ရခဲ့တယ်လို့ Chin Defence Force-Asho အဖွဲ့ဆီက သိရပါတယ်။

ဇူလိုင် ၉ ရက် မနက် ၉ နာရီကျော်မှာ နတ်ရေကန် လေကြောင်းကာကွယ်ရေးတပ်စခန်းကနေ တုံးကြီး ပိုက်လိုင်းစောင့်တပ်စခန်းကို တပ်ချိန်းဖို့လာတဲ့ စစ်ကောင်စီတပ်သား ၁၀ ဦးကို တိုက်ခိုက်ခဲ့တာပါ။

တိုက်ခိုက်တဲ့နေရာက နတ်ရေကန် လေကြောင်းကာကွယ်ရေးတပ်နဲ့ မီတာ ၆၀၀၀ ဝန်းကျင်ကွာဝေးပြီး တိုက်ခိုက်နေစဥ်အတွင်း ပဒါန်းကနေ မကွေးနဲ့ ရခိုင်နယ်စပ်ကဂိတ်တခုကို တပ်သားသစ်သွားပို့ပြီး ပြန်လာတဲ့ စစ်ကောင်စီကားတန်းနဲ့တွေ့ကာ ကားပေါ်ပါလာတဲ့စစ်သားတွေနဲ့ပါ ထပ်မံပစ်ခတ်မှုဖြစ်ခဲ့တယ်လို့ ဆိုပါတယ်။

“၅ မီတာကနေ ၁၀ မီတာအတွင်းတွေပဲ ပစ်ခတ်နေရတာဖြစ်တဲ့အတွက် အရာရှိကားရဲ့ နောက်ခြမ်းကနေပစ်နေတဲ့ စကစ ၂ ဦးကိုလည်း ပစ်ခတ်နိုင်ခဲ့တယ်။ ၅ ဦးသေဆုံးတာကတော့ မျက်မြင်ပဲ။ ကားရဲ့ဘေးမှာ လဲနေတဲ့ စကစရဲ့ အလောင်းတွေရှိတယ်။ သေနတ်သွားယူတဲ့ ရဲဘော်တွေဘက်ခြမ်းမှာလည်း စကစတွေ သေဆုံးနေတာ ရှိတယ်။”လို့ Chin Defence Force-Asho တာဝန်ခံ ဆလိုင်းရိုးချင်းက ပြောပါတယ်။

တိုက်ပွဲအတွင်း စစ်ကောင်စီဘက်က ၅ ဦး ပွဲချင်းပြီးသေဆုံးကာ MA ၁ လက်၊ ဘီအေ ၆၃ G 3 ၁လက်၊ ကျည်ဘောက် ၂ ခုနဲ့ ကျည်ဆန်တချို့ကို သိမ်းဆည်းနိုင်ခဲ့တယ်လို့ ဆိုပါတယ်။

ကားပေါ်မှာပါသွားတဲ့ ဒဏ်ရာရ တပ်သားတွေကို ငဖဲမြို့၊ ပဒါန်းကျေးရွာဘက်ကို ခေါ်ဆောင်သွားကြောင်း သတင်းကြားရတယ်လို့ ဆလိုင်းရိုးချင်းက ပြောပါတယ်။

ဒါ့အပြင် ပဒါန်းအခြေစိုက် အမှတ် ၃၇၅ အမြောက်တပ်ရင်းအနီးက ကျေးရွာတွေမှာလည်း ဇူလိုင် ၁၀ ရက်က အရာရှိတဦး သေဆုံးသွားတဲ့အတွက်ဆိုပြီး စစ်ကြောင်းထိုးတာတွေ၊ စစ်ဆေးတာတွေ လုပ်ခဲ့တယ်လို့ သိရပါတယ်။

အဆိုပါ တိုက်ခိုက်မှုကို Chin Defence Force-Asho နဲ့ ဧရာဝတီ ပြည်သူ့ကာကွယ်ရေးတပ်မတော် စစ်ကြောင်း – APDF တို့ ပူးပေါင်းလုပ်ဆောင်ခဲ့တာဖြစ်ပါတယ်။

ပြီးခဲ့တဲ့ ဇွန် ၂၁ ရက်ကလည်း ငဖဲမြို့နယ်၊ မန်းချောင်းဆည်အနီးက ကျောင်းကုန်းရွာဟောင်း ဂိတ်ကင်းစခန်းရှိ ကပစ ၁၄ က စစ်သားတွေကို တိုက်ခိုက်ခဲ့ရာ စစ်ကောင်စီတပ်သား ၂၀ ဝန်းကျင် သေဆုံးခဲ့တယ်လို့ သိရပါတယ်။

စာတည်း – လင်း