နွားထိုးကြီး၊ စက်တင်ဘာ ၁၀၊ ၂၀၂၅။

မန္တလေးတိုင်း၊ နွားထိုးကြီးမြို့နယ်၊ မကျီးကန်ရွာကို စစ်ကော်မရှင်တပ်က စက်တပ်လေထီးနဲ့ ဗုံးကြဲချခဲ့တာကြောင့် ပြည်သူ ၅ ဦးဒဏ်ရာရတယ်လို့ မကျီးကန်တိုက်နယ်ပကဖ ရပ်ကျေးတာဝန်ရှိသူတွေဆီက သိရပါတယ်။

စက်တင်ဘာ ၉ ရက် မနက် ၉ နာရီခွဲမှာ စစ်ကော်မရှင်ဘက်က စက်တပ်လေထီး ၅ စီးအသုံးပြုပြီး ကျေးရွာထဲကို ဗုံးသီး ၅ လုံးကြဲချခဲ့တယ်လို့ဆိုပါတယ်။

“ရွာအရှေ့ဘက် ၂ လုံး။ ရွာထဲကို ၃ လုံး။ ရွာထဲကျချိန် ပြည်သူ ၄ ယောက်ဒဏ်ရာရတယ်။ ရပ်ကျေး ၁ ယောက်ဒဏ်ရာရတယ်။ ဒေါ်ပိုတို့ အိမ်ဝိုင်းထဲကို တည့်တည့်ကျတာ။ တဲတွေဘာတွေပျက်စီး၊ ကားတွေဆို စုတ်ပြတ်သတ်သွားတာ”လို့ မကျီးကန်တိုက်နယ်ပကဖရပ်ကျေးတာဝန်ရှိသူတဦးက ပြောပါတယ်။

ဗုံးပေါက်ကွဲမှုကြောင့် အသက် ၂၀ အရွယ် ရပ်ကျေးပကဖအဖွဲ့ဝင် ၁ ဦး၊ အသက် ၆၀ အရွယ် ဒေါ်ပိုနဲ့ဦးလှတင့်၊ အသက် ၃၀ အရွယ် အမျိုးသား ၂ ဦး တို့ဟာ လက်၊ ဦးခေါင်းနဲ့ ခန္ဓာကိုယ်တွေမှာ အစမှန်ဒဏ်ရာရခဲ့တယ်လို့ ဆိုပါတယ်။

ဒါ့အပြင် နေအိမ် ၂ လုံး၊ ကား ၁ စီးပျက်စီးပြီး နွား ၄ ကောင်သေဆုံးသွားတယ်လို့ သိရကာ ဗုံးကြဲခံရချိန် ကျေးရွာကို စစ်ကြောင်းထိုးနေတာမျိုး၊ တိုက်ပွဲဖြစ်ပွားနေတာမျိုးမရှိဘူးလို့ သူကဆက်ပြောပါတယ်။

ဩဂုတ် ၂ ရက်ကလည်း နွားထိုးကြီးမြို့နယ်၊ သန်းပင်လှကျေးရွာမှာ စစ်ကော်မရှင်ဘက်က Y12 နဲ့ လေကြောင်းကနေဗုံးကြဲခံရလို့ ကလေး ၁ ဦးသေဆုံးပြီး ၄ ဦးဒဏ်ရာရတယ်လို့ သိရပါတယ်။

စာတည်း – လင်း

နတ်မောက်၊ စက်တင်ဘာ ၆၊ ၂၀၂၅။

မကွေးတိုင်း၊ နတ်မောက်မြို့နယ်၊ ရုံးပင်ကွက်ကျေးရွာမှာ စစ်ကော်မရှင်တပ်ဖွဲ့ဝင်တွေက စက်တပ်လေထီးနဲ့ ဗုံးကြဲခဲ့တာကြောင့် အမျိုးသား ၁ ဦးသေဆုံးပြီး ၂ ဦးဒဏ်ရာရခဲ့တယ်လို့ နတ်မောက်ဂဠုန်တပ်ဖွဲ့ဆီက သိရပါတယ်။

စက်တင်ဘာ ၆ ရက် ဒီနေ့လယ် ၁၂ နာရီခန့်မှာ စစ်ကော်မရှင်ဘက်ကနေ ကျေးရွာအနီးတိုက်ပွဲဖြစ်ပွားတာမရှိဘဲ စက်တပ်လေထီးနဲ့ ကျေးရွာတောင်ဘက် ယာတဲတွေဘက်ကို ဗုံး ၃ လုံးကြဲချသွားတယ်လို့ဆိုပါတယ်။

“တယောက်ကတော့ အစနကိုရှာမရတော့ဘူး။ ကောက်လို့မရဘဲ စုတ်ပြတ်သတ်သွားတယ်။ နွားစာစဥ်းနေတဲ့ သူက စဥ်းနေတာ။ နွားစာလှောင်တဲ့တဲပေါ်ကိုတည့်ကျတာ”လို့ နတ်မောက်ဂဠုန်တပ်ဖွဲ့ တာဝန်ခံကပြောပါတယ်။

ဗုံးထိမှန်တာကြောင့် အသက် ၄၀ အရွယ် ဦးဇော်ထွန်းနေရာမှာသေဆုံးပြီး သမီးဖြစ်သူ အသက် ၁၆ နှစ်အရွယ်မှာ လက်ပြတ်၊ ဆွေမျိုးတော်သူ ဦးဝင်းပုမှာ ခန္ဓာကိုယ်ထိခိုက်ဒဏ်ရာရခဲ့တယ်လို့ သိရပါတယ်။

သေဆုံးသွားသူ အမျိုးသားရဲ့အသားစတွေကို လိုက်ကောက်ပြီး ဒေသခံတွေကချက်ချင်းသင်္ဂြိုဟ်လိုက်ရသလို ထိခိုက်ဒဏ်ရာရသူတွေကိုလည်း နီးစပ်ရာဆေးခန်းပို့ပြီးဆေးကုသနေရတယ်လို့ ဆိုပါတယ်။

ရုံးပင်ကွက်ကျေးရွာမှာ အိမ်ခြေ ၂၀၀ ခန့်ရှိပြီး ကျေးရွာက ဒေသခံအများစုလည်း ဘေးလွတ်ရာကို တိမ်းရှောင်နေကြရပါတယ်။

ဩဂုတ် ၃၀ ရက်ကလည်း နတ်မောက်မြို့နယ်၊ သနပ်ပေါက်ကျောတဲတိုက်တွေအတွင်းကို စက်တပ်လေထီးနဲ့ဗုံးကြဲခံရတာကြောင့် အမျိုးသမီးငယ် ၁ ဦးသေဆုံးပြီး ဖခင်ဖြစ်သူဒဏ်ရာရတယ်လို့ သိရပါတယ်။

စာတည်း – လင်း

ဆားလင်းကြီး၊ ဩဂုတ် ၁၈၊ ၂၀၂၅။

စစ်ကိုင်းတိုင်း၊ ဆားလင်းကြီးမြို့နယ်၊ မိုးကြိုးပြင်ရွာကို စစ်ကောင်စီတပ်က စက်တပ်လေထီးနဲ့ဗုံးကြဲခဲ့တာကြောင့် အသက် ၆၀ အရွယ် အမျိုးသမီး ၁ ဦးသေဆုံးပြီး အသက် ၄၀ အရွယ်အမျိုးသား ၁ ဦး ခြေထောက်ထိမှန် ဒဏ်ရာရခဲ့တယ်လို့ ဒေသခံတွေဆီက သိရပါတယ်။

ဩဂုတ် ၁၈ ရက် ဒီနေ့လယ် ၂ နာရီခွဲက မိုးကြိုးပြင်တောင်ရွာ ရွာထိပ်က လူနေအိမ် ၁ လုံးပေါ်ကို ဗုံးသီးကျပေါက်ကွဲကာ အသက် ၆၀ အရွယ်ရှိ ဒေါ်သောင်းခင်ဆိုသူ ပွဲချင်းပြီးသေဆုံးခဲ့ပြီး ၎င်းရဲ့ သားမတ်ဖြစ်သူ အသက် ၄၀အရွယ် ကိုမင်းသန့်ကတော့ ခြေထောက် ဗုံးစထိမှန်ဒဏ်ရာကြောင့် ခြေထောက်ဖြတ်ပစ်ရမယ့် အခြေအနေရှိတယ်လို့ သိရပါတယ်။

“ရွာရဲ့ ရွာဦးခေါင်း၊ ရွာထိပ်ပေါ့၊ ပုသိမ်-မုံရွာလမ်း အနောက်ဘက်၊ ထိခိုက်ဒဏ်ရာကတော့ မိခင်ဖြစ်သူ ဒေါ်သောင်းခင်ကတော့ ပွဲချင်းပြီး သေဆုံးသွားပြီးတော့ သားမက်ဖြစ်သူ တယောက်ကတော့ ခြေထောက် ဖြတ်ပစ်ရမယ့် အနေအထားထိ ရောက်သွားတယ်။” လို့ ဆားလင်းကြီး ဒေသခံတဦးက ပြောပါတယ်။

တိုက်ပွဲဖြစ်တာမရှိဘဲ အနောက်မြောက်တိုင်းစစ်ဌာနချုပ်ဘက်က တက်လာတဲ့ ပါရာမော်တာနဲ့ ခုလို ကြဲချသွားတာဖြစ်ပြီး ဗုံးသီးကျတဲ့နေအိမ်လည်း ပျက်စီးခဲ့တယ်လို့ သိရပါတယ်။

ဗုံးကြဲပြီးနောက် လေကြောင်းအန္တရာယ်အပြင် ဝမ်ပေါင်ကုမ္ပဏီကနေ စစ်ကောင်စီတပ်က ခြေလျင်စစ်ကြောင်းထိုးလာတာကြောင့် မိုးကြိုးပြင်နဲ့ အနီးဝန်းကျင်က ဒေသခံတွေ ထွက်ပြေး တိမ်းရှောင်နေရတယ်လို့ သိရပါတယ်။

ဒီကနေ့တရက်တည်းမှာပဲ ဆားလင်းကြီးအပြင် ဝက်လက်မြို့နယ်နဲ့ ဒီပဲယင်းမြို့တို့မှာလည်း စစ်ကောင်စီတပ်က လေကြောင်းကနေဗုံးကြဲတိုက်ခိုက်ခဲ့တာကြောင့် သံဃာတွေအပါအဝင် ဒေသခံ ၁၀ ဦးထက်မနည်း သေဆုံးခဲ့ပါတယ်။

စာတည်း – လင်း

ချောင်းဦး၊ ဩဂုတ် ၁၊ ၂၀၂၅။

စစ်ကိုင်းတိုင်း၊ မုံရွာမြို့နဲ့ ချောင်းဦးမြို့မှာ စစ်ကောင်စီတပ်က စက်တပ်လေထီးနဲ့ဗုံးကြဲတဲ့အပြင် လက်နက်ကြီးတွေနဲ့ပါပစ်ခတ်တာကြောင့် ထိခိုက်ဒဏ်ရာရသူ ၇ ဦးရှိခဲ့တယ်လို့ ဒေသခံတွေဆီက သိရပါတယ်။

ဩဂုတ် ၁ ရက် နေ့လယ် ၁၀ နာရီခန့်လောက်က စက်တပ်လေထီး ၁ စီးနဲ့ မုံရွာမြို့နယ် ချောင်းဆုံရွာထိပ်ကို ဗုံး ၁ လုံးကြဲချတိုက်ခိုက်ချိန် တော်လှန်ရေးတပ်ဖွဲ့ဝင် ၁ ဦးနဲ့ အမျိုးသား ၁ ဦး စိုးရိမ်ရ ဒဏ်ရာရခဲ့ပါတယ်။

ဒါ့အပြင် နေ့လယ် ၁၀ နာရီ ၁၅ မိနစ်မှာ ချောင်းဦးမြို့နယ်၊ ရွှေဒါးကျကျေးရွာအနီးကို ဗုံး ၁ လုံးကြဲချ တိုက်ခိုက်ချိန် အမျိုးသား ၂ ဦးထိခိုက်ပြီး၊ ၁၀ နာရီခွဲမှာ မြပုလဲခြံကနေ လက်နက်ကြီးနဲ့ ၆ လုံး ထပ်မံ ပစ်ခတ်ခဲ့တာကြောင့် ရွှေဒါးကျကျေးရွာက အမျိုးသမီး ၁ ဦး၊ အမျိုးသား ၂ ဦးထိခိုက်ဒဏ်ရာခဲ့တာလို့ ဆိုပါတယ်။

“စိုးရိမ်ရတဲ့လူ ၂ ဦးတော့ပါတယ်၊ သူတို့က လေကြောင်းကနေတိုက်ခိုက်အပြီး မြပုလဲခြံကနေ လက်နက်ကြီးနဲ့ ၆ လုံးလောက်ပစ်တယ်၊ ချောင်းဦး တာဘောင်အစပ်တွေကို လှမ်းထုတာ၊ အဲ့ဒီမှာလည်း ပြည်သူအထိအခိုက်ရှိသေးတယ်၊ ၃ ဦးလောက်ထိခိုက်တယ်”လို့ ရွှေဒါးကျဒေသခံတဦးက ပြောပါတယ်။

လက်ရှိမှာ ဒဏ်ရာရသူတွေကိုတော်လှန်ရေးဆေးပေးခန်းတွေမှာ အသီးသီးကုထားပြီး ကုသလို့မနိုင်တဲ့ သူတွေကိုတော့ တခြားဆေးရုံတွေကိုပို့ပြီးကုသနေတယ်လို့ ဆိုပါတယ်

ဒါ့အပြင် ချောင်းဆုံရွာထိပ်က ဆိုင်တခုလည်း ဗုံးကျရောက်ပေါက်ကွဲပျက်စီးခဲ့သလို ဒေသခံတွေလည်း တိမ်းရှောင်နေကြတယ်လို့ အထက်ပါဒေသခံကဆက်ပြောပါတယ်။

ဇူလိုင် ၂၉ ရက် ညနေ ၄ နာရီခွဲလောက်က ချောင်းဦးမြို့နယ်၊ မုံရွာ-မန္တလေးလမ်းမပေါ် မြပုလဲဂိတ်မှာ တပ်စွဲထားတဲ့ စစ်ကောင်စီတွေဟာ ကျီကုန်းရွာကို ၈၀ မမ လက်နက်ကြီး ၂ လုံးနဲ့ ပစ်ခတ်ခဲ့တာကြောင့် ကလေး ၁ ဦးအပါ အမျိုးသမီး ၂ ဦးသေဆုံးပြီး ၅ ဦးထိခိုက်ဒဏ်ရာရရှိခဲ့ပါသေးတယ်။

စာတည်း – လင်း

မြိုင်၊ ဇူလိုင် ၅၊ ၂၀၂၅။

မကွေးတိုင်း၊ မြိုင်မြို့နယ်၊ အိုရင်းကျေးရွာကို စစ်ကောင်စီတပ်က စက်တပ်လေထီး ၂ စီးနဲ့ဗုံးကြဲတိုက်ခိုက်ခဲ့တာကြောင့် ဒေသခံအမျိုးသား ၁ ဦးထိမှန်သေဆုံးခဲ့တယ်လို့ အညာမြေအရပ်ဖက်အဖွဲ့အစည်း (မြိုင်) ဆီက သိရပါတယ်။

ဇူလိုင် ၅ ရက် ဒီနေ့မနက် ၁၁ နာရီလောက်မှာ ဗုံးကြဲတိုက်ခိုက်ခဲ့တာကြောင့် အသက် ၄၃ နှစ်အရွယ် အမျိုးသား ၁ ဦးရဲ့ ကျောဘက်ကိုထိမှန်ပြီးသေဆုံးခဲ့တာလို့ ဆိုပါတယ်။

“တောထဲမှာလည်းရှောင်နေကြရတယ်။ တချို့တလေ ရွာပြန်လာကြတာပေါ့၊ ရွာထဲကိုတစ်လုံးကျတာ ရွာအပြင်နှစ်လုံးကျတာ ရွာထဲကိုကျတဲ့တစ်လုံးကနေအိမ်ရှေ့က ဝါးရုံပင်မှာ ပုန်းနေတဲ့အမျိုးသားတစ်ဦး ထိမှန်သေဆုံးတာပေါ့”လို့ အညာမြေအရပ်ဖက်အဖွဲ့အစည်း (မြိုင်) တာဝန်ရှိသူက ပြောပါတယ်။

ခုလိုလေကြောင်းတိုက်ခိုက်မှုတွေရှိနေတာကြောင့် ကျေးရွာနေပြည်သူတွေကိုလည်း လေကြောင်းရန် အသိပညာပေးဟောပြောပွဲတွေပြုလုပ်ဖို့လည်းလိုအပ်နေတယ်လို့ ဆိုပါတယ်။

“အမှန်ကတော့ အသိပညာပေးဟောပြောပွဲတွေဘာတွေမရှိတော့ လူထုကလည်း မသိကြတာပါ။ မြို့နယ်ကလည်း လာလုပ်ပေးတာလည်းမကြားဖူးပါဘူး။ တကယ်လို့သာ ရှောင်နည်းတိမ်းနည်း အသိပညာတွေရှိရင် အသက်မဆုံးရှုံးလောက်ဘူးပေါ့” လို့အညာမြေအရပ်ဖက်အဖွဲ့အစည်း(မြိုင်)မှ တာဝန်ရှိသူတစ်ဦး ကဆိုပါတယ်။

ဒါ့အပြင် အိုးရင်းကျေးရွာနဲ့ ၃ မိုင်ခန့်အကွာ ကမ္မမြို့တဝိုက်ရောက်ရှိနေတဲ့ ပခုက္ကူတပ်မ ၁၀၁ က စစ်ကြောင်းကလည်း အင်အားထောင်ကျော်ရှိနေတယ်လို့ ဆိုပါတယ်။

အဲ့ဒီစစ်ကြောင်းသွားနိုင်ဖို့ လေကြောင်းကနေ နေ့စဥ်နီးပါး ပစ်ကူပေးလေ့ရှိကာ ဇူလိုင် ၄ ရက် မနက် ၆ နာရီခန့်ကလည်း ကမ္မအနီးတဝိုက်ကို Y8 လေယာဥ်နဲ့ဗုံးကြဲခဲ့တာကြောင့် စစ်ရှောင်အမျိုးသား ၂ ဦးသေဆုံးခဲ့ပါသေးတယ်။

စာတည်း – လင်း

ချောင်းဦး၊ မေ ၁၀၊ ၂၀၂၅။

စစ်ကိုင်းတိုင်း၊ ချောင်းဦးမြို့နယ်၊ သုံးပန်လှကျေးရွာမှာ လေကြောင်းကနေနဲ့ဗုံးကြဲခံရလို့ ရှင်ပြုခါနီးသားအဖ ၂ ဦးအပါ အရပ်သား ၃ ဦးသေဆုံးပြီး ၃ ဦးဒဏ်ရာရရှိခဲ့တယ်လို့ ဒေသခံတွေထံက သိရပါတယ်။

မေ ၁၀ ရက် ဒီကနေ့မနက် ၁၁ နာရီကျော်မှာ စစ်ကောင်စီတပ်ရဲ့ စက်တပ်လေထီး ၁ စီးက ကျေးရွာအတွင်းကို ၁၂၀ မမ ဗုံးသီးအပါ ဗုံး ၃ လုံး ကြဲတိုက်ခိုက်ခဲ့ရာ နေအိမ်တွေပေါ်ကျရောက်ပေါက်ကွဲခဲ့တာလို့ ဆိုပါတယ်။

” လူတွေက တစစီ ဖြစ်သွားတာလေ။ အသားစတွေပဲ ကျန်ခဲ့တယ်။ အိမ်ခြေအပျက်အစီးကတော့ ၅လုံးလောက်ပဲရှိပါတယ်။”လို့ ချောင်းဦးဒေသခံအမျိုးသမီးတဦးက မြေလတ်အသံကို ပြောပါတယ်။

ဗုံးကျရောက်ပေါက်ကွဲလို့ ရှင်ပြုပွဲလုပ်မယ့်မိသားစုဝင်တွေဖြစ်တဲ့ အသက် ၃၀ နှစ်အရွယ် ကိုနန်းကို ၊ ၎င်းရဲ့သားဖြစ်သူ အသက် ၁၂ နှစ်အရွယ် မောင်ဖြိုးကိုသန့်တို့ သေဆုံးခဲ့ပြီး ဇနီးဖြစ်သူ အသက် ၂၈နှစ် အရွယ် မသဲသဲစိုးနဲ့ သမီးဖြစ်သူ မသွန်းသီရိကို အသက် ၅ နှစ်တို့မှာ ဒဏ်ရာရရှိခဲ့တယ်လို့ သိရပါတယ်။

” မိခင်နဲ့သမီးလေးက ဆေးရုံမှာတင်ထားရတယ်။ သားလေးကို မနက်ဖြန်မှာ ရှင်ပြုတော့မှာလို့ သိရပါတယ် ။ သူတို့က ပိုက်ဆံမတတ်နိုင်လို့ မဏ္ဍပ်ကို မဆောက်တာပါ။ ဘောက်(Sound Box)လည်း မပါပါဘူး။ သင်္ကန်းကပ်ပြီးပဲ ရှင်ပြုမှာပါ။” လို့ အထက်ပါအမျိုးသမီးက ဆက်ပြောပါတယ်.

ဒါ့အပြင် ဗုံးစထိမှန်တာကြောင့် နောက်ထပ်ရွာခံ အသက် ၃၀ နှစ် ကိုကျော်ဇင်ထွန်း သေဆုံးခဲ့ပြီး ဦးအောင်ကျော်ဦး အသက် ၅၀ နှစ်မှာ ဒဏ်ရာရရှိခဲ့တာကြောင့် သေဆုံးသူ ၃ ဦးနဲ့ ဒဏ်ရာရသူ ၃ ဦး ရှိခဲ့တာပါ။

ဖေဖော်ဝါရီ ၂၅ ရက်မှာလည်း ချောင်းဦးမြို့နယ်၊ ချောင်းမရွာနဲ့ နွယ်ခွေရွာတို့ကို စစ်ကောင်စီတပ်က လေကြောင်းကနေတိုက်ခိုက်ခဲ့တာကြောင့် အမျိုးသား ၃ ဦး၊ အမျိုးသမီး ၇ ဦး သေဆုံးခဲ့ပြီး ၈ ဦး ဒဏ်ရာရရှိခဲ့တယ်လို့ သိရပါတယ်။

စာတည်း – ဟိန်းစံ

တောင်သာ၊ ဧပြီ ၂၁၊ ၂၀၂၅။

မန္တလေးတိုင်း၊ တောင်သာမြို့နယ်၊ သံဘို(ရွာသစ်)ကျေးရွာမှာ စက်တပ်လေထီးနဲ့ဗုံးကြဲခံရပြီး ကလေးငယ် ၁ ဦးအပါအဝင် ၃ ဦးသေဆုံးပြီး ၄ ဦးဒဏ်ရာရတယ်လို့ ဒေသခံတွေနဲ့တောင်သာပကဖဆီက သိရပါတယ်။

ဧပြီ ၂၁ ရက်မနက် ၂ နာရီ ၄၅ မိနစ်ခန့်မှာ မိတ္ထီလာလေတပ်ကနေ တက်လာတဲ့ စက်တပ်လေထီး ၃ စီးဟာ သံဘိုကျေးရွာကို ဒေသခံနေအိမ်တွေအပေါ် ဗုံး ၁၁ လုံးကြဲချခဲ့တယ်လို့ ဆိုပါတယ်။

“ပြည်သူအိမ်ခေါင်ပေါ်ကို တည့်တည့်ချတာ။ အပေါ်ကနေ စက်လက်တွေနဲ့လည်းကုတ်သွားတယ်။ သားအမိ ၂ ယောက်က ပွဲချင်းပြီး။ တအိမ်တည်းက ၅ ယောက်ထိတာ။ “လို့ ဒေသခံအမျိုးသမီးတဦးကပြောပါတယ်။

စက်တပ်လေထီးနဲ့ဗုံးကြဲခံရလို့ အသက် ၉ နှစ်ကျော်အရွယ် မအေးမြတ်စန္ဒာ၊ မိခင်ဖြစ်သူ အသက် ၄၀ အရွယ် မတူး၊ အသက် ၃၅ နှစ်အရွယ် ကိုကျော်သူလင်းတို့သေဆုံးခဲ့ပါတယ်။

ဒါ့အပြင် မသဲသဲဝေ၊ ကိုဝင်းကျော်ရှိန်း၊ မတင့်တင့်ထွန်း၊ မေသက်နှင်းဦးတို့ ၄ ဦးဒဏ်ရာရခဲ့ပြီး ဆေးကုသဖို့ နီးစပ်ရာဆေးရုံကို ပို့ထားရသလို နေအိမ် ၂ လုံးပျက်စီးပြီး နွား ၂ ကောင်သေဆုံးခဲ့တယ်လို့ သိရပါတယ်။

ထိခိုက်သေဆုံးသူတွေကိုတော့ ဒီနေ့မှာပဲ မြေချသင်္ဂြိုဟ်နိုင်ဖို့ စီစဥ်လုပ်ဆောင်နေကြတယ်လို့ ဆိုပါတယ်။

“နေအိမ်ပေါ်တည့်တည့်ကျတာ ဗုံးက။ မနက်အစောကြီးဆိုတော့ တိုက်ပွဲဖြစ်တာလည်းမရှိဘူး။ ရွာမှာ တော်လှန်ရေးအဖွဲ့တွေနေတာမရှိဘူး။ ဖြတ်သွားဖြတ်လာသဘောလောက်ဘဲရှိတာ။ ရွာကိုတမင်သက်သက်ဗုံးချတဲ့သဘောပါ”လို့ တောင်သာမြို့နယ်ပကဖ ပြန်ကြားရေးတာဝန်ခံကပြောပါတယ်။

သံဘိုကျေးရွာက လေကြောင်းကနေ ဗုံးကြဲခံရတာ ၃ ကြိမ်မြောက်ဖြစ်ပြီး အရင် ကြဲခံရချိန်မှာတော့ လူထိခိုက်တာမျိုးတွေမရှိဘဲ တောစပ်နားတွေကျတာကြောင့် နေအိမ်အချို့ဘဲ ပျက်စီးမှုရှိခဲ့တယ်လို့ သိရပါတယ်။

သံဘိုကျေးရွာက အိမ်ခြေ ၆၄ အိမ်ရှိပြီး လူဦးရေ ၂၀၀ ကျော်နေထိုင်ကာ ဗုံးကြဲခံရတာကြောင့် ရွာခံအချို့ကတော့ ယနေ့မနက်ပိုင်းမှာမြို့ပေါ်ပြောင်းရွေ့တာရှိပြီး အများစုကတော့ ရွာက ဗုံးခိုကျင်းတွေမှာ ပုန်းအောင်းနေထိုင်နေကြတယ်လို့ ဆိုပါတယ်။

ဧပြီ ၁၈ ရက်ကလည်း တောင်သာမြို့နယ်၊ နန်းတည်ကျေးရွာပေါ်ကို ဂျက်ဖိုက်တာနဲ့ဗုံးကြဲခံရလို့ ပြည်သူ ၂ ဦးသေဆုံးပြီး ၅ ဦးဒဏ်ရာရကာ နေအိမ် ၇ လုံးပျက်စီးခဲ့တယ်လို့ သိရပါတယ်။