စစ်ကိုင်း

ခင်ဦး၊ မတ် ၄၊ ၂၀၂၃။

စစ်ကိုင်းတိုင်း၊ ခင်ဦးမြို့နယ် အနောက်ဘက်ခြမ်းရှိ ကျေးရွာများကို ဖေဖော်ဝါရီလ ၂၅ ရက်မှ မတ်လ ၂ ရက်နေ့ထိ စစ်တပ်က အင်အား ၁၀၀ ကျော်နဲ့ စစ်ကြောင်းထိုး ဝင်ရောက်ပစ်ခတ်မှုတွေကြောင့် ဒေသခံ ၁ သောင်းကျော် အစားအသောက်နဲ့ ကျန်းမာရေး အခက်အခဲဖြစ်နေတယ်လို့ စစ်ဘေးရှောင်ကူညီစောင့်ရှောက်နေတဲ့ တာဝန်ခံတဦးက ပြောပါတယ်။

“စစ်**တွေက လက်နက်ကြီး၊ လက်နက်ငယ်တွေနဲ့ ပစ်ခတ်ဝင်ရောက်လာပြီး ယာတော်ရွာနဲ့ ကျွန်းတောကြီးရွာတွေကို မီးရှို့ရာကနေ တဖြေးဖြေးကျေးရွာ ၁၀ ရွာထိ ပြေးကုန်ရတယ်။ ၄ ရက်တိတိ ဘေးလွတ်ရာကို တနေရာပြီးတနေရာ ဆက်တိုက်ပြေးနေရလို့ အခက်အခဲများစွာနဲ့ အကူညီတွေ လိုအပ်နေတယ်” လို့ သူက ဆက်ပြောပါတယ်။

မြင်းဒေါင်း၊ မကျီးအုပ်၊ သရက်ပင်စု၊ အင်တိုင်းလေးတောင်ရွာ၊ အင်တိုင်းလေးမြောက်ရွာ၊ယာတော်၊ မြင်းကျ၊ ကျွန်းတောကြီး၊ ဥယာဥ်နဲ့ သာဝတ္ထိရွာ စတဲ့ကျေးရွာ ၁၀ ရွာက ဒေသခံတွေ အခုချိန်ထိ နေရပ်မပြန်နိုင်သေးသလို အဲဒီရွာတွေက မီးရှို့ခံရတဲ့ အိမ်အရေအတွက်ကိုလည်း အခုချိန်ထိ အတိအကျ မသိရသေးဘူးလို့ ဆိုပါတယ်။

အဝတ်တထည် ကိုယ်တခုဖြင့် ထွက်ပြေးနေရပြီး နီးစပ်ရာရွာတွေက ထမင်းထုပ်လာဝေမှသာ စားနေရတာ၊ သက်ကြီးရွယ်အိုနဲ့ ကလေးငယ်တွေလည်း ကျန်းမာရေးထိခိုက်မှုတွေ ရှိလာသလို ဆေးဝါးတွေလည်း လိုအပ်နေတယ်လို့ ဆိုပါတယ်။

အာဏာသိမ်းပြီးချိန်မှ ယနေ့အထိ ခင်ဦးမြို့နယ်အတွင်း စစ်ကောင်စီဘက်က ကျေးရွာ ၆၆ ရွာမှ နေအိမ်ပေါင်း ၄၀၀၀ ကျော် မီးရှို့ဖျက်ဆီးထားခဲ့ပြီး ရဲဘော်နဲ့ပြည်သူပေါင်း ၂၅၀ ကျဆုံး ထားပြီလို့ ဆိုပါတယ်။

ချောင်းဦး၊ မတ် ၄၊ ၂၀၂၃။

စစ်ကိုင်းတိုင်း၊ ချောင်းဦးမြို့နယ်၊ ခင်မွန်ရွာကို စစ်ကောင်တပ်တွေက ဝင်ရောက်မီးရှို့တဲ့အပြင် လက်နက်ကြီးတွေနဲ့ပါ ပစ်ခတ်ခဲ့လို့ ဒေသခံ ၂ ဦး သေဆုံးပြီး၊ ၇ ဦး ဒဏ်ရာရရှိခဲ့ပါတယ်။

မတ်လ ၃ ရက် မနေ့ကမနက် ၈ နာရီခန့်မှာ မုံရွာအခြေစိုက် အနောက်မြောက်တိုင်း စစ်ဌာနချုပ် – နမခ ဘက်ကနေ အင်အား ၁၅၀ ကျော်နဲ့လာတဲ့ စစ်ကောင်စီတပ်ဟာ ခင်မွန်ရွာကို ဝင်ရောက်မီးရှို့ ခဲ့တာဖြစ်သလို အကြောင်းမဲ့လက်နက်ကြီးတွေနဲ့ ပစ်လို့ ဒေသခံတွေ ထိခိုက်သေဆုံးခဲ့ရတာလည်း ဖြစ်ပါတယ်။

“မနေ့က နမခက စကစတွေကော စွမ်းရည်ထက် ဆီဆိုင်နားမှာ အမြဲလိုရှိနေတဲ့ စကစအဖွဲ့တွေကော ထောင်သားပြောင်းတာ လိုက်ပို့တာနဲ့ တူတယ်။ သူတို့စစ်ကြောင်း မိုင်းဆွဲခံရတော့ ရွာတွေကို ဝင်မွှေသွားတာ။ ကြေးမုံရွာ၊ ခင်မွန်နဲ့ စုစုပေါင်း ၄ ရွာလောက်ကို မွှေသွားတာ။ အဆိုးဆုံးက ခင်မွန်ရွာ ဖြစ်သွားတယ်။ ကျန်ရွာတွေကတော့ အဲလိုမဖြစ်လိုက်ဘူး။ ရွာကို ဝင်တာ လက်နက်ကြီး၊ လက်နက်ငယ်တွေနဲ့ ပစ်ဝင်တာ” လို့ Chaung Oo Revolution မှ တာဝန်ရှိသူ အမျိုးသမီး ရဲဘော်တဦးက ပြောပါတယ်။

စစ်အုပ်စုက သေနတ်နဲ့ပစ်လို့ အသက် ၁၃ နှစ်အရွယ် မောင်ပြည့်ဖြိုးဦးနဲ့ အသက် ၆၇ နှစ်အရွယ် ဒေါ်စမ်းကြည်တို့ ၂ ဦး သေဆုံးပြီး၊ ၇ ဦး ဒဏ်ရာရခဲ့သလို နေအိမ် ၇၀ နီးပါးလည်း မီးလောင်ပျက်စီးခဲ့တယ်လို့ သိရပါတယ်။

ခင်မွန်ရွာဟာ အိမ်ခြေ ၁၅၀၀ နီးပါးရှိတဲ့ ရွာကြီးတရွာ ဖြစ်ပြီး စစ်တပ်က ဝင်ရောက်ဖျက်ဆီးပြီးနောက် ဒေသခံ ၅၀၀၀ ကျော်လည်း ရွာကနေ ထွက်ပြေးနေရတယ်လို့ ဆိုပါတယ်။

၂၀၂၂ ခုနှစ်၊ အောက်တိုဘာလ ၆ ရက်ကလည်း စစ်ကောင်စီတပ်ဟာ ခင်မွန်ရွာကို ဝင်ရောက်လာပြီး ဒေသခံ NLD ပါတီဝင် နေအိမ် ၅ လုံးကို မီးရှို့ဖျက်ဆီးခဲ့သေးသလို ဒေသခံရာကျော်ကိုလည်း ဖမ်းဆီးရိုက်နှက် စစ်ဆေးပြီးမှ ပြန်လွတ်ပေးခဲ့တယ်လို့ သိရပါတယ်။

ဝက်လက်၊ မတ် ၄၊ ၂၀၂၃။

စစ်ကောင်စီတပ်သားတွေ မီးရှို့ဖျက်ဆီးခဲ့တဲ့ စစ်ကိုင်းတိုင်း၊ ဝက်လက်မြို့နယ်က မုဆိုးခြုံဘူတာရွာကို ဒေသခံကာကွယ်ရေးတပ်တွေက မတ်လ ၂ ရက်နဲ့ ၃ ရက်မှာ သန့်ရှင်းရေးလုပ်အားပေးခဲ့ကြပါတယ်။

အဲ့ဒီကျေးရွာက ဒေသခံတွေအနေနဲ့ လုပ်အားလိုအပ်ချက်တွေ ရှိနေတဲ့အပြင် မတော်တဆ ထိခိုက်မှုတွေလည်း မဖြစ်စေချင်တဲ့အတွက် ကာကွယ်ရေးရဲဘော် ၃၀ ဦး ဝန်းကျင်က ကူညီရှင်းလင်းပေးခဲ့တာလို့ ဆိုပါတယ်။

“မီးလောင်သွပ်တွေ၊ သစ်တိုသစ်စတွေနဲ့ မီးလောင်ကျွမ်းပျက်စီးသွားတဲ့ ပစ္စည်းတွေ၊ ပြာတွေကို မီးဘေးသင့်ပြည်သူတွေရဲ့ ဆန္ဒအတိုင်း ရှင်းလင်းပေးခဲ့သလို မီးလောင်ခံထားရတဲ့ အုတ်တိုက်တွေကိုလည်း ဖြိုဖျက်ပေးခဲ့ရတာတွေ၊ အိမ်တိုင်တွေ ချွတ်ပြီး စုပုံပေးရတာတွေလည်း ရှိတယ်” လို့ EAgle Guerrilla Force ရဲ့ တပ်ရင်းမှူး ဗိုလ်ကောက်ရိုးက ပြောပါတယ်။

မုဆိုးခြုံဘူတာရွာကို စစ်ကောင်စီတပ်သားတွေက မတ်လ ၁ ရက်မှာ စစ်ကြောင်းထိုး မီးရှို့ခဲ့တာကြောင့် နေအိမ် ၅၂ လုံး မီးလောင်ပျက်စီးခဲ့တာလည်း ဖြစ်ပါတယ်။

စစ်ကိုင်း၊ မတ် ၃၊ ၂၀၂၃။

စစ်ကိုင်းမြို့နယ်၊ ရွာသစ်ကြီးကျေးရွာမှာ နေထိုင်တဲ့ စစ်ကောင်စီလမ်းပြ ပျူစောထီးတပ်ဖွဲ့ဝင် တဦးကို သူနေထိုင်ရာ ရွာကအိမ်မှာပဲ ဒေသကာကွယ်ရေးပူးပေါင်းတပ်ဖွဲ့က သွားရောက်ပစ်ခတ်ခဲ့လို့ သေဆုံးသွားခဲ့တယ်လို့ သိရပါတယ်။

ရွာသစ်ကြီးရွာသား ပျူစောထီး ဦးအေးလွင်ဟာ စစ်ကောင်စီတပ်ဖွဲ့တွေနဲ့ ပူးပေါင်းပြီး သူနဲ့အဆင်မပြေတဲ့ ပြည်သူတွေကို ဖမ်းဆီးစေခိုင်းတာတွေ ပြုလုပ်နေလို့ ထွက်ပြေးနေရတဲ့ ပြည်သူတွေရှိသလို ဖမ်းဆီးခံရတဲ့ ပြည်သူတွေလည်း ရှိတယ်လို့လည်း ယက္ခညီနောင် PDF – Mandalay တပ်ဖွဲ့ဝင်တဦးက ပြောပါတယ်။

“ကျနော်တို့ ပျူစောထီး အေးလွင်ကိုပဲ ပစ်ခဲ့တာပါ။ ကျန်တဲ့သူတွေကို ဘာမှမလုပ်ခဲ့ပါဘူး။ ကျနော်တို့အနေနဲ့ကတော့ စစ်ကောင်စီဒေါက်တိုင် ပြည်သူတွေကို အမြဲဒုက္ခပေးနေတဲ့ ပျူတွေ၊ ဒလန်တွေကို နယ်စီးမခြားဘဲ တိုက်ခိုက်ရှင်းလင်းသုတ်သင်သွားပါမယ်” လို့ ဆိုပါတယ်။

ဖေဖော်ဝါရီ ၂၈ ရက်နေ့က ပြုလုပ်ခဲ့ပေမဲ့လည်း ရဲဘော်တွေ ဘေးကင်းရာကို မရောက်ရှိသေးတဲ့အတွက် မတ်လ ၃ ရက် ဒီကနေ့မှ ထုတ်ပြန်ရခြင်း ဖြစ်တယ်လို့လည်း ဆိုပါတယ်။

ယင်းပစ်ခတ်မှုကို ယက္ခညီနောင် ပြည်သူ့ကာကွယ်ရေးတပ်ဖွဲ့ ၊ PRFK (Kse)၊ Mahar (SGG) တို့က ပူးပေါင်းဆောင်ရွက်ခဲ့ကြတယ်လို့ သိရပါတယ်။

မတ်လ (၁) ရက်နေ့ကလည်း ယက္ခညီနောင် PDF-Mandalay တပ်ဖွဲ့ဟာ စစ်ကိုင်းမြို့နယ်ထဲက ကျေးရွာတရွာကို ဝင်ရောက်သောင်းကျန်းနေတဲ့ အင်အား (၈၀) နီးပါးရှိတဲ့ စစ်ကောင်စီတပ်ဖွဲ့ကို (၆၀)မမ လက်နက်ကြီးတွေနဲ့ သွားရောက်ပစ်ခတ်ခဲ့ပါသေးတယ်။

စာတည်း – 007

အင်းတော်၊ မတ် ၃၊ ၂၀၂၃။

စစ်ကိုင်းတိုင်း၊ အင်းတော်မြို့ထဲမှာ ညကင်းပတ်နေတဲ့ ရဲကားကို မိုင်းဖောက်ခွဲတိုက်ခိုက်ဖို့ ပြင်ဆင်နေချိန် မိုင်းမတော်တဆမှုဖြစ်ပြီး အင်းတော်မြို့ပြပြောက်ကျားတပ်ဖွဲ့ဝင် ၂ ဦး ကျဆုံးခဲ့တယ်လို့ သိရပါတယ်။

မတ်လ ၂ ရက်မနေ့ည ၈ နာရီခွဲလောက်က အင်းတော်မြို့၊ လမ်းဆုံးမီးပွိုင့်တနေရာမှာ မိုင်းထောင်နေစဥ် ပေါက်ကွဲမှုဖြစ်ပြီး နေရာတင် ကျဆုံးခဲ့ကြတာလို့ အင်းတော်မြို့ပြ ပြောက်ကျားတပ်ဖွဲ့ဝင်တဦးက အတည်ပြုပြောပါတယ်။

“အလောင်းတွေကတော့ ပြန်မရဘူး။ အသားစတွေက တစစီဖြစ်သွားတော့ စခတွေက ဒီမနက်မှာ အသားစတွေ ပြန်ကောက်ပြီး အင်းတော်သချိုင်းမှာ မြေမြှုပ်လိုက်တယ်။ အခုလိုဖြစ်ရပ်မျိုးက ပထမအကြိမ်ပါ။ အရင်ကလည်း မြို့ထဲတွေမှာ လှုပ်ရှားပါတယ်။ **တွေ ထိခိုက်တာပဲရှိခဲ့ဖူးတာ” လို့ ဆိုပါတယ်။

ကျဆုံးခဲ့တဲ့ ရဲဘော်တွေဟာ မိုင်းဆရာတွေဖြစ်သလို အသက် ၂၀ ဝန်းကျင်သာ ရှိသေးတယ်လို့ အထက်ပါတာဝန်ရှိသူက ဆက်ပြောပါတယ်။

“မိုင်းထောင်ရင် တချက်လေး မှားလို့မရဘူး၊ စိတ်ငြိမ်မှ ရတာပါ။ အခုက ညဘက်လည်းဖြစ်တော့ ပိုဆိုးသွားတာပေါ့။ တယောက်က အသက် ၂၂ နှစ်၊ နောက်ထပ်တယောက်က အသက် ၂၄ အရွယ်တွေပါပဲ” လို့ ဆိုပါတယ်။

အင်းတော်မြို့ပြပြောက်ကျားတပ်ဖွဲ့ဟာ အင်းတော်နယ်အတွင်း စစ်ကောင်စီတပ်တွေနဲ့ ဒေါက်တိုင်တွေကို မကြာခဏ တော်လှန်တိုက်ခိုက်နေတဲ့ တပ်ဖွဲ့တခုဖြစ်ပြီး၊ ခုလို ရဲဘော်တွေ ကျဆုံးတာကတော့ ပထမဆုံးအကြိမ် ဖြစ်တယ်လို့ သိရပါတယ်။

စာတည်း – လင်း