စစ်ကိုင်း

စစ်ကိုင်း၊ ဖေဖော်ဝါရီ ၁၇၊ ၂၀၂၃။

စစ်ကိုင်းတိုင်း၊ ကလေးဝမြို့နယ်၊ သဲကြမ်းတံတားအနီးမှာ စစ်ဆေးရေးဂိတ်ဖွင့်ပြီး တောင်တွင်းဒေသမှတဆင့် ကလေးဝမြို့ ၊ ကလေးမြို့တို့ကို တင်ပို့ရောင်းချနေတဲ့ ဒေသခံတောင်သူလယ်သမားတွေရဲ့ ဆန်၊ စပါးတွေကို ဖြတ်သန်းသွားလာခွင့် ပိတ်ပင်ထားတယ်လို့ ဒေသခံတွေဆီက သိရပါတယ်။

အဲဒီစစ်ဆေးရေးဂိတ်ကို ကလေးဝ PDF ၊ မင်းကင်းမြို့နယ် မင်းကင်း PDF တပ်ရင်း ၅ ၊(တောင်တွင်းဒေသ TDPDFတပ်ရင်း) တပ်ခွဲ ၃ နဲ့ တောင်တွင်းဒေသပြည်သူ့ကာကွယ်ရေးအဖွဲ့တို့က ပူးပေါင်းလုပ်ဆောင်ထားတာလို့ အမည်မဖော်လိုတဲ့ တောင်တွင်းဒေသခံ အမျိုးသားတဦးက ပြောပါတယ်။

“စကစကို တော်လှန်နေတဲ့ ပြည်သူတွေက ထောက်ခံအားပေးနေတဲ့ ပြည်သူ့တော်လှန်ရေးတပ်ဖွဲ့တွေက ပြည်သူတွေကို မျက်နှာမမူတဲ့အတွက် အလွန်ပင်စိတ်မကောင်းဖြစ်ရပါတယ်” လို့ ဆိုပါတယ်။

လမ်းသွားလမ်းလာပြည်သူတွေကို စစ်ဆေးတာတွေ၊ အသွားအလာ ကန့်သတ်တာတွေ လုပ်ဆောင်နေတာ ၁ လကျော် ရှိနေပြီဖြစ်လို့ ဒေသခံတွေ အခက်အခဲ ကြုံနေကြရတယ်လို့ ဆိုပါတယ်။

“ကျနော်တို့ တောင်သူ၊ လယ်သမားတွေမှာ လယ်ယာရိတ်သိမ်းစရိတ်အတွက် ပေးချေဖို့ လိုတယ်။ ပြီးတော့ လာမယ့်ရာသီအတွက် စိုက်ပျိုးစားရိတ်တွေကို ဝယ်ယူစုဆောင်းဖို့ လိုတယ်။ ဒါတွေကို ဆန်၊ စပါးတွေ ရောင်းချလို့ ရတဲ့ပိုက်ဆံနဲ့ ဝယ်ရမှာ။ အခုက ကျနော်တို့ရောင်းချဖို့ သွားလာခွင့် ပိတ်ခံထားရတယ်” လို့ ဆိုပါတယ်။

သွားလာခွင့် ပိတ်ထားတာဟာ ၂၀၂၃ ခုနှစ် ဇန်နဝါရီ လဆန်းပိုင်းကစလို့ ဖေဖော်ဝါရီ ၁၇ ရက် ဒီကနေ့အထိ ရှိနေပြီဖြစ်လို့ ဒေသခံတွေအနေနဲ့ ဂိတ်ကို အမြန်ဆုံး ပြန်လည်ဖွင့်လှစ်ပေးဖို့ကို လိုလားနေကြပါတယ်။

အခုလို ဆန်၊ စပါးရောင်းချတာကို ပိတ်ပင်ထားရတာဟာ တောင်တွင်းဒေသက အခြေခံလူတန်းစား ပြည်သူတွေအနေနဲ့ ဆန်ဝယ်ယူနေရတာ အခက်အခဲ ဖြစ်ပေါ်နေတာကြောင့် ဆန်တွေကို တခြားမြို့တွေကို တင်ပို့မရောင်းချရအောင် ပိတ်ပေးဖို့တောင်းဆိုလာလို့ ယာယီပိတ်ထားတာ ဖြစ်တယ်လို့ ကလေးဝပကဖ မှ တာဝန်ရှိသူတဦးက မြေလတ်အသံကို ပြောပါတယ်။

“ကျနော်တို့က ပိတ်ချင်လို့ ပိတ်ထားတာ မဟုတ်ပါ။ လက်လုပ်လက်စားပြည်သူတွေက ပိုက်ဆံရှိသလောက်လေးပဲ ဆန်ဝယ်တဲ့အခါ ၁ တင်းစ၊ ၁ ခွဲစ၊ ၂ တင်းစ အဲလိုဝယ်ရတာ။ အခုက ဆန်တွေ ဝယ်လို့ မရတော့ဘူး ဖြစ်နေလို့ ပိတ်ပေးပါအုံးဆိုပြီး အကူအညီတောင်းလာလို့ ယာယီပိတ်ပေးထားရတာ ဖြစ်ပါတယ်” လို့ ဆိုပါတယ်။

စစ်ကိုင်း၊ ဖေဖော်ဝါရီ ၁၇၊ ၂၀၂၃။

စစ်အာဏာသိမ်းပြီးနောက် မီးရှို့ဖျက်ဆီးခံရမှု အများဆုံးဖြစ်တဲ့ စစ်ကိုင်းတိုင်းမှာ နေအိမ်တွေ ပြန်လည်ဆောက်လုပ်ပေးရတာတွေ များပြားလာလို့ အိမ်ဆောက်ရာမှာ အသုံးပြုတဲ့ ထန်းရွက်တွေ ရှားပါးလာတယ်လို့ ဒေသခံတွေဆီက သိရပါတယ်။

အရင်ကတော့ ရာသီပြောင်းချိန်တွေမှာပဲ အိမ်အမိုးလဲဖို့အတွက် အသုံးပြုကြလေ့ရှိပြီး အခုကတော့ ရွာလုံးကျွတ်တွေ ပြန်လည်ထူထောင်ရတဲ့အတွက် ထန်းရွက်ခုတ်ယူမှုနှုန်းတွေ အဆမတန်များလာကာ စတင်ရှားပါးလာပြီလို့ ဆိုပါတယ်။

“ဟိုးနှစ်တွေတော့ ပုံမှန်အမိုးလဲတာလောက်ပဲ။ ခုဟာကျ အစကနေအဆုံးထိ ရွာလုံးကျွတ်ကြီး ပြန်ဆောက်ရတာဆိုတော့ တော်တော်လေးတော့ ကုန်တာပေါ့။ အိမ်တလုံးကို ထန်းရွက် ၃၅၀ လောက် ကုန်တယ်။ တပင်မှ အလွန်ဆုံးရ အရွက် ၃၀၊ အဲ့အရွက် ၃၀ ကလည်း တကယ်ကိုမှ အပင်ကိုဝဲကျနေတဲ့ဟာမှ ရတာ။ အိမ်တလုံးကို အနည်းဆုံး ၁၀ ပင် ၁၅ ပင်လောက်ကုန်တယ်” လို့ စစ်ရှောင်တွေအတွက် နေအိမ်တွေ ပြန်လည်တည်ဆောက်ပေးနေတဲ့ S&C အဖွဲ့ တာဝန်ခံက ပြောပါတယ်။

ပြန်လည်ထူထောင်ရေး လုပ်ကိုင်နေသူတွေအနေနဲ့လည်း အမိုးအကာလုပ်ဖို့အတွက် မိုးကာ၊ သွပ်နဲ့၊ တခြားအစားထိုးပစ္စည်းတွေ သုံးဖို့ စီစဉ်နေကြပြီး အိမ်တလုံးကို ၅ သိန်းဝန်းကျင်နဲ့ ကုန်ကျစရိတ် ပိုများသွားနိုင်တဲ့အတွက် ငွေကြေးအခက်ခဲရှိလာနိုင်တယ်လို့ ဆိုပါတယ်။

“ကျနော်တို့ဒေသမှာ နေ့စဥ်နဲ့အမျှ မီးရှို့ခံနေရတော့ ထန်းရွက်ရှားလာတာပါ။ ၂ ခန်းတွဲ အိမ်တလုံးကို ထန်းရွက် ၂၅၀ ကနေ ၃၀၀ လောက်ကုန်ပါတယ်။ လူများလို့ တဲ့၊ ဇောင်းပါထပ်ထည့်ရင် ၃၀၀ ကျော် ၄၀၀ လောက်ကုန်ပါတယ်” လို့ ဒေသခံရွာသားတဦးက ပြောပါတယ်။

အာဏာသိမ်းပြီး ၂ နှစ်အတွင်း မီးရှို့ဖျက်ဆီးခံရမှုတွေရဲ့ ၇၁ ရာခိုင်နှုန်းဟာ စစ်ကိုင်းတိုင်းထဲက ဖြစ်ပြီး၊ နေအိမ် ၄၃၂၁၆ လုံးထပ်မနည်း မီးရှို့ဖျက်ဆီးခံထားရတယ်လို့ ISP Myanmarရဲ့ စစ်တမ်းတွေအရ သိရပါတယ်။

စစ်ကိုင်း၊ ဖေဖော်ဝါရီ ၁၇၊ ၂၀၂၃။

စစ်ကိုင်းတိုင်းဒေသကြီး၊ ရွှေဘိုခရိုင်၊ ခင်ဦးမြို့နယ် တောင်ဘက်ခြမ်းမှာရှိတဲ့ လက်ပံလှကျေးရွာက နေအိမ် ၂၅၀ ကျော်ကိုမီးရှို့ဖျက်ဆီးသွားတဲ့အပြင်၊ မီးရှို့တဲ့အထဲမှာ အသက် ၇၀ ကျော် သီလရှင်ဆရာကြီးတပါးလည်း ပါဝင်ကာ ပျံလွန်တော်မူသွားတယ်လို့ ဒေသခံတွေဆီက သိရပါတယ်။

စစ်ကောင်စီနဲ့ ပျူစောထီးတွေက အင်အား ၁၀၀ နီးပါးနဲ့ လက်ပံလှကျေးရွာကို ဖေဖော်ဝါရီ ၁၃ ရက်နေ့ ညနေ ၃ နာရီလောက်မှာ စတင်ဝင်ရောက်ခဲ့ပြီးနောက် နေအိမ်တွေကို မီးရှို့ဖျက်ဆီးသွားတဲ့အပြင်၊ နာမကျန်းဖြစ်နေလို့ ထွက်‌မပြေးနိုင်တဲ့ အသက် (၇၀) သီလရှင်ဆရာကြီး တပါးကိုလည်း အရှင်လတ်လတ် မီးရှို့သတ်ဖြတ်သွားတယ်လို့ ခင်ဦးမြို့နယ် သတင်းမှန်ပြန်ကြားရေးတာဝန်ခံတဦးက မြေလတ်အသံကို ပြောပါတယ်။

“မီးရှို့ခံရတဲ့ ဆရာလေးက အသက်ကြီးမှ သီလရှင်ဝတ်တာပါ။ စစ်ကိုင်းကနေ သီလရှင်ဝတ်ပြီး ရွာကိုပြန်လာနေတာပါ။ ရွာမှာက သီလရှင်ကျောင်းမရှိတော့ အိမ်မှာပဲ နေတာပါ ။ ဆရာလေးက လက်ပံလှရွာသားပါပဲ” လို့ ဆိုပါတယ်။

စစ်ကောင်စီဟာ နေအိမ်တွေကို မီးရှို့ပြီး ညနေ ၅ နာရီကျော်လောက်မှာတော့ လက်ပံလှကျေးရွာကနေ ပြန်လည်ထွက်ခွာသွားတယ်လို့ ဆိုပါတယ်။

အိမ်ခြေ ၄၀၀ ကျော်ရှိတဲ့ လက်ပံလှကျေးရွာဟာ အခုလို မီးရှို့ခံရတာဟာ ဒုတိယအကြိမ် ရှိပြီးဖြစ်တယ်လို့လည်း တာဝန်ခံက ဆက်ပြောပါတယ်။

“ကျတော်မှတ်မိသလောက် ပြီးခဲ့တဲ့ ၆ /၇ လပိုင်းလောက်က လက်ပံလှကျေးရွာက နေအိမ် ၁၄ လုံးကို စစ်ကောင်စီက မီးရှို့သွားပါတယ်။ အခုက ဒုတိယအကြိမ် မီးရှို့ခံရတာပါ” လို့ ဆိုပါတယ်။

စစ်ကောင်စီတပ်ဖွဲ့တွေ ကျေးရွာထဲက ပြန်လည်ထွက်ခွာသွားပေမဲ့လည်း ဒေသခံတွေက ရွာထဲကို ပြန်လည်ဝင်ရောက်နေထိုင်ခြင်း မရှိသေးဘူးလို့ ဆိုပါတယ်။

အဲဒီစစ်ကောင်စီစစ်ကြောင်းဟာ ဖေဖော်ဝါရီလ ၁၁ ရက်နေ့ကနေ ၁၅ ရက်နေ့အထိ ခင်ဦးမြို့နယ်ထဲက သနပ်စိန်ကျေးရွာ၊‌ စောကြီးကျေးရွာ၊ ကွမ်းတိုင်းကျေးရွာ၊ မင်းကံကြီးကျေးရွာ၊ လက်ပံလှကျေးရွာ၊ လောင်းရှည်ကျေးရွာနဲ့ ချောင်းဆုံကျေးရွာ ၇ ရွာမှာရှိတဲ့ နေအိမ်တွေကို မီးရှို့ဖျက်ဆီးသွားခဲ့ပါတယ်။

စစ်ကိုင်း၊ ဖေဖော်ဝါရီ ၁၇၊ ၂၀၂၃။

စစ်ကိုင်းတိုင်း၊ မုံရွာမြို့အဝင် မုံရွာ-အမြင့်လမ်းထိပ်ပိုင်းမှာ စစ်ကောင်စီတပ်ဖွဲ့ဝင်တွေဟာ အရပ်ဝတ်တွေဝတ်ထားပြီး လမ်းသွားလမ်းလာ ပြည်သူတွေဆီကနေ ငွေကြေးကောက်ခံနေတယ်လို့ ဒေသခံတွေဆီက သိရပါတယ်။

ဖေဖော်ဝါရီလ ၁၃ ရက်ကစပြီး မုံရွာ−အမြင့်လမ်းထိပ်ပိုင်းမှာ အင်အား ၄ ဦးနဲ့ ဂိတ်ချထားပြီး လမ်းသွားလမ်းလာ ပြည်သူတွေဆီကနေ ငွေကြေးကောက်ခံတာတွေအပြင် ဖုန်း၊ ဆိုင်ကယ်၊ ကားတွေကို စစ်ဆေးတာတွေပါ လုပ်နေတာလို့ မုံရွာမြို့ခံတဦးက ပြောပါတယ်။

“သူတို့ကောက်တဲ့နေရာက အဓိကကျပြီး မြို့အဝင်လို ဖြစ်နေတာ။ အရင်အဲ့နေရာက အခုလို တပ်စွဲမထားဘူးဗျ။ ဟိုတလောက ပြည်သူကာကွယ်ရေးတပ်ဖွဲ့တွေက ပစ်သွားတာ သုံးယောက်လောက် ကျသွားပြီး အခုအဲ့နေရာကို တပ်စွဲထားပြီး ပိုက်ဆံကောက်တာ။ ဖုန်းတွေစစ်၊ ဆိုင်ကယ်တွေစစ် လုပ်နေကြပြီး ငွေညစ်တာပါ” လို့ ဆိုပါတယ်။

အဲ့ဒီစစ်သားတွေဟာ ဖေဖော်ဝါရီလ ၁၇ ရက် ဒီမနက်ပိုင်းအထိ အဲ့ဒီနေရာမှာ ရှိနေပြီး၊ လမ်းသွားပြည်သူတွေကို ဆဲဆိုကြိမ်းမောင်းတာတွေအပြင် သေနတ်နဲ့ချိန်ကာ ချိန်းခြောက်ပြောဆိုတာတွေပါ လုပ်တယ်လို့ အထက်ပါမြို့ခံတဦးက ဆက်ပြောပါတယ်။

ပြီးခဲ့တဲ့ ဖေဖော်ဝါရီလ ၁၁ ရက် မနက်မှာလည်း မုံရွာ-အမြင့်လမ်း ကညန ရုံး အနီးနားမှာ စစ်ကောင်စီတပ်ဖွဲ့တွေက အိမ်စီးကား ၅ စီးနဲ့ ရောက်ရှိလာပြီး လမ်းသွားပြည်သူတွေကို စစ်ဆေးမှုတွေ လုပ်ခဲ့သေးတယ်လို့ သိရပါတယ်။

စစ်ကိုင်း၊ ဖေဖော်ဝါရီ ၁၆၊ ၂၀၂၃။

စစ်ကိုင်းတိုင်း၊ ကနီမြို့ပေါ်မှာ စစ်ကောင်စီတပ်သား ၂ ဦး ကင်းလှည့်ချိန် ရန်ဖြစ်စကားများရာမှ အချင်းချင်းပစ်ခတ်မှုဖြစ်ပြီး တပ်သားတဦး သေဆုံးသွားတယ်လို့ ‌ဒေသခံတွေဆီက သိရပါတယ်။

ဖေဖော်ဝါရီလ ၁၅ ရက်ည ၇ နာရီလောက်မှာ စစ်ကောင်စီတပ်သား ၂ ဦးဟာ ကင်းလှည့်နေရင်း ကနီမြို့ အမှတ်(၃)ရပ်ကွက် မြန်မာစီးပွားရေးဘဏ်အနီးက အစိုးရသစ်စက်ဝန်းအတွင်းမှာ အချင်းချင်း ပစ်ခတ်မှု ဖြစ်ပွားခဲ့တယ်လို့ ကနီမြို့ခံ အမျိုးသမီးတဦးက မြေလတ်အသံကို ပြောပါတယ်။

“အာဏာသိမ်းချိန်ကစလို့ မြို့ကိုအစောင့်ယူထားတဲ့ သူတွေပါရှင့်၊ အချင်းချင်း ကင်းလှည့်ရင်း နောက်ကနေ ပစ်တာပါ။ သူတို့က ကနီထွေအုပ်ရုံးမှာ အထိုင်ထားပါတယ်” လို့ ဆိုပါတယ်။

ပစ်ခတ်ခံရသူ အသက် ၃၀ နှစ်အရွယ် တပ်သား ဖိုးကြယ် (ခေါ်) အောင်တိုးထွန်းဟာ ဖေဖော်ဝါရီလ ၁၆ ရက် ဒီကနေ့မနက်ပိုင်းက ကနီပြည်သူ့‌ဆေးရုံမှာ ဆေးကုသမှုခံနေရင်း သေဆုံးသွားခဲ့ပြီး၊ ကျန်တပ်သားတဦးကတော့ လက်နတ်ယူပြီး ထွက်ပြေးသွားတယ်လို့ အထက်ပါ ဒေသခံအမျိုးသမီးက ဆက်ပြောပါတယ်။

“သေဆုံးတာက ကနီဆေးရုံမှာ ဆေးကုသရင်း ဒီနေ့မနက်ခင်း ၄ နာရီက သေဆုံးသွားတယ်။ နေ့လည် ၁ နာရီလောက်သင်္ဂြိုဟ်တယ်။ သေဆုံးမှုကို မြို့ပေါ်ကနေ စုံစမ်းသိရှိရတာပါ” လို့ ဆိုပါတယ်။

စစ်ကောင်စီတပ်သား ဖိုးကြယ် (ခေါ်) အောင်တိုးထွန်း သေဆုံးမှုနဲ့ပတ်သက်ပြီး ကနီမြို့ထဲမှာ စစ်ဆေးမှုတွေ ပြုလုပ်နေကြောင်းနဲ့ ထွက်ပြေးလွတ်မြောက်နေတဲ့ တပ်သားတဦးကိုလည်း အခုချိန်ထိ ပြန်လည်ဖမ်းဆီးလို့ မရသေးဘူးလို့လည်း သိရပါတယ်။

စစ်ကိုင်း၊ ဖေဖော်ဝါရီ ၁၆၊ ၂၀၂၃။

စစ်ကိုင်းတိုင်း၊ ရွှေဘိုမြို့နယ်ထဲက ပန်းလှိုင်ရွာနဲ့ မုန်စီရွာက နေအိမ်တွေကို စစ်ကောင်စီတပ်ဖွဲ့က တရက်တည်းမှာပဲ မီးရှို့ဖျက်ဆီးသွားတယ်လို့ ဒေသခံတွေဆီက သိရပါတယ်။

ဖေဖော်ဝါရီလ ၁၅ ရက်မနေ့ကညနေ ၅ နာရီလောက်မှာ အင်အား ၇၀ နီးပါးရှိတဲ့ စစ်ကောင်စီစစ်ကြောင်းဟာ ရွာချင်းကပ်လျက်ရှိတဲ့ ပန်းလှိုင်ရွာနဲ့ မုန့်စီရွာထဲကို တပြိုင်တည်းဝင်လာပြီး နေအိမ်တွေကို မီးရှို့ခဲ့တာလို့ ဒေသခံတဦးက ပြောပါတယ်။

“အခုလက်ရှိတော့ အိမ်ခြေ ဘယ်လောက်ပါသွားတယ်ဆိုတာ မသိရသေးပါဘူး။ အတည်ပြုနေဆဲပါ။ ရှို့တာတွေက ရွာလုံးကျွတ်နီးပါးတွေအထိပါပဲ” လို့ ဆိုပါတယ်။

မီးရှို့ခဲ့ပြီးနောက် အဲဒီစစ်ကြောင်းဟာ ပန်းလှိုင်ရွာထဲမှာ တပ်စွဲနေခဲ့ပြီး ဒီနေ့မနက်မှာလည်း အဲ့ဒီရွာက နေအိမ်တွေကို ဆက်ပြီးမီးရှို့ခဲ့တယ်လို့ ပန်းလှိုင်ရွာ ဒေသခံတဦးက ပြောပါတယ်။

ကျေးရွာ ၂ ရွာပေါင်းမှ အိမ်ခြေ ၅၀၀ နီးပါးရှိပြီး အဲ့ဒီရွာတွေကို အခုလို မီးရှို့ခံရတာဟာ ပထမအကြိမ် ဖြစ်တယ်လို့လည်း အထက်ပါ ဒေသခံက ဆက်ပြောပါတယ်။

“စခတွေက ရွာထဲကနေ ပြန်ထွက်သွားပေမယ့် ရွာသားတွေကို ရွာထဲမဝင်ခိုင်းသေးဘူး။ စခတွေ ထွက်သွားတဲ့ ရွာနဲ့ ပန်းလှိုင်ရွာက နီးနီးလေးပဲမို့ နောက်ကြောင်းပြန်လှည့်လာတော့ ပိုပြီးအန္တရာယ်ရှိတယ်လေ” လို့ ဆိုပါတယ်။

ဒေသခံရွာသားတွေကတော့ မနေ့ညကတည်းက ရွာကနေ ထွက်ပြေးတိမ်ရှောင်နေကြရတာလည်း ဖြစ်ပါတယ်။

ဒါ့အပြင် အဲ့ဒီစစ်အုပ်စုဟာ ပန်းလှိုင်ရွာကို မီးရှို့ပြီးချိန်မှာလည်း အနီးကျေးရွာဖြစ်တဲ့ ရေတော်မူရွာဘက်ကို လက်နက်ကြီးနဲ့ပစ်ခတ်ကာ အယောင်ပြထွက်ပြီးတဲ့နောက် ဇီးဖြူကုန်းရွာကို မီးရှို့ခဲ့သေးတယ်လို့ သိရပါတယ်။

ခုလို မီးရှို့လို့ နေအိမ်ဘယ်လောက်ပျက်စီးဆုံးရှုံးခဲ့လည်း ဆိုတာကိုတော့ မြေလတ်အသံက ဆက်လက်စုံစမ်းနေဆဲပါ။

စစ်ကိုင်း၊ ဖေဖော်ဝါရီ ၁၆၊ ၂၀၂၃။

စစ်ကိုင်းတိုင်းဒေသကြီး၊ အရာတော်မြို့၊ ခြေတော်ရာဘုရားနဲ့ ဝါးတောမကျေးရွာသွားလမ်းမှာ စစ်တပ်ကျောင်းကြိုကားမိုင်းဆွဲခံရလို့ ကျောင်းသူ ၁ ဦး သေဆုံးပြီး ၁၀ ဦး ဒဏ်ရာရတယ်လို့ သိရပါတယ်။

ဖေဖော်ဝါရီလ ၁၅ ရက်နေ့ နေ့လည် ၁ နာရီခန့်မှာ အရာတော် အထကကျောင်းကနေ စာမေးပွဲဖြေပြီး စစ်တပ်ကို ပြန်လာတဲ့ တပ်ကျောင်းကားဟာ ခြေတော်ရာဘုရားပွဲကျင်းပတဲ့ ကွင်းနေရာနဲ့ သံချပ်ကားတပ်နေရာ အကြားမှာ မိုင်းဆွဲခံရတာ ဖြစ်တယ်လို့ ဒေသခံတဦးက ပြောပါတယ်။

“စစ်ကားနဲ့ သူတို့တပ်ဝင်းထဲက ကျောင်းသားတွေကို ကြိုပြန်လာတဲ့ကား။ ကလေးတွေက သံချပ်ကာတပ်ထဲက တပ်မိသားစုဝင်ကလေးတွေလို့ သိရတယ်။ အရပ်သားကားနဲ့ ပြန်တာမဟုတ်ဘူး။ စစ်ကားနဲ့ ပြန်နေကြပဲ။ ဒါကို မိုင်းဆွဲတာ။ ထိခိုက်ဒဏ်ရာက သူများတယ်လို့ သိရတယ်” လို့ ပြောပါတယ်။

အဲဒီစစ်တပ်ကျောင်းကြိုကားပေါ်မှာ ကျောင်းသားကျောင်းသူ ၃၈ ဦး လိုက်ပါလာပြီး မိုင်းဆွဲခံရလို့ ကျောင်းသားကျောင်းသူ ၁၀ ဦး ဒဏ်ရာရပြီး ၁ ဦး သေဆုံးသွားတယ်လို့ ဆိုပါတယ်။

စစ်တပ်ကျောင်းကြိုကား မိုင်းဆွဲခံရပြီးချိန်မှာ သံချပ်ကာတပ်ထဲက အပါအဝင် စစ်ကောင်စီတပ်သားတွေ ရောက်လာပြီး ပတ်ဝန်းကျင်ကို ပစ်ခတ်တာတွေ လုပ်ခဲ့သေးတယ်လို့ သိရပါတယ်။

သေဆုံးသူနဲ့ ဒဏ်ရာရကျောင်းသားကျောင်းသူတွေကိုတော့ အရာတော်ပြည်သူ့ဆေးရုံကို ပို့ထားရပြီး ဆေးကုမှုခံယူနေရတယ်လို့ သိရပါတယ်။

မိုင်းဆွဲတိုက်ခိုက်တာကိုတော့ ဘယ်အဖွဲ့က လုပ်ဆောင်ခဲ့တယ်ဆိုတာ ထုတ်ပြန်ထားတာမျိုး မရှိသေးပါဘူး။

စစ်ကိုင်း၊ ဖေဖော်ဝါရီ ၁၅၊ ၂၀၂၃။

စစ်ကိုင်းတိုင်း၊ ယင်းမာပင်မြို့နယ်၊ ဘန့်ဘွေးရွာ တောတိုက်တွေထဲက နေအိမ် ၈ လုံးကို ဖေဖေါ်ဝါရီလ ၁၅ ရက် ဒီနေ့နေ့လယ် ၁၂ နာရီခွဲလောက်မှာ စစ်အုပ်စုက မီးရှို့ဖျက်ဆီးသွားခဲ့ပါတယ်။

စစ်ကောင်စီတပ်နဲ့ ဘန့်ဘွေးရွာခံ ပျူစောထီးအပါအဝင် အင်အား ၁၅ ဦးလောက်က အကြောင်းမဲ့ မီးရှို့ခဲ့ကြတာလို့ ဘန့်ဘွေးရွာသားတဦးက ပြောပါတယ်။

“ဘန့်ဘွေးရွာ တောင်ဘက်တောတိုက်ထဲက နေအိမ် ၈ လုံးကို အကြောင်းမဲ့ မီးရှို့ခဲ့ကြတာပါ။ ရွာသားတွေကို ပစ်ခတ်ဖမ်းဆီးတာမျိုးတော့ မရှိဘူး။ လွန်ခဲ့တဲ့ ၅ လလောက်က အဲဒီတောတိုက်ထဲက နေအိမ် ၃ လုံးကို မီးရှို့သေးတယ်” လို့ ပြောပါတယ်။

စစ်ကောင်စီတပ်ဟာ ဘန့်ဘွေးရွာမှာ လွန်ခဲ့တဲ့တနှစ်လောက်ကတည်းက အင်အား ၇၀ လောက်နဲ့ တပ်စွဲထားတာဖြစ်ပြီး ဘန့်ဘွေးရွာခံအိမ်ထောင်စု ၁၀ စုလောက်နဲ့ပေါင်းကာ နေအိမ်တွေကို မီးရှို့တာ၊ ခရီးသွားပြည်သူတွေကို ရိုက်နှက်ဖမ်းဆီးနေတာတွေ လုပ်နေတာလို့ သူကဆက်ပြောပါတယ်။

ပြီးခဲ့တဲ့ ဇန်နဝါရီလ ၁၇ ရက်ကလည်း ဘန့်ဘွေးရွာက စစ်သားနဲ့ပျူတွေဟာ စစ်ရှောင်နေတဲ့ ဘန့်ဘွေးရွာသား အသက်၂၅ နှစ်အရွယ် ကိုခင်မောင်ဌေးနဲ့ တူဖြစ်သူ အသက် ၁၆ နှစ်အရွယ် မောင်နိုင်လင်းအောင်တို့ ၂ ဦးကို ဘန့်ဘွေးရွာကို ရှောင်ကွင်းဖောက်ထားတဲ့လမ်းမှာ ဖမ်းဆီးသွားခဲ့ပြီး ဒီနေ့ထိတိုင် မိသားစုနဲ့ အဆက်အသွယ် မရရှိသေးဘူးလို့ သိရပါတယ်။

လက်ရှိမှာ အိမ်ခြေ ၃၅၀ လောက်ရှိတဲ့ ဘန့်ဘွေးရွာအတွင်း အိမ်ထောင်စု ၁၀ စုခန့်သာ စစ်ကောင်စီနဲ့ ပေါင်းကာကျန်ရစ်ခဲ့ပြီး ကျန်အိမ်ထောင်စုလူဦးရေ ၁၅၀၀ လောက်ကတော့ လွန်ခဲ့တဲ့ တနှစ်ခွဲခန့်ကတည်းက တောတိုက်တွေထဲမှာ နေထိုင်နေကြရတာလည်း ဖြစ်ပါတယ်။