စစ်ကိုင်း

စစ်ကိုင်း၊ ဖေဖော်ဝါရီ ၁၁၊ ၂၀၂၃။

စစ်ကိုင်းတိုင်း၊ ကန့်ဘလူမြို့နယ်၊ ညောင်ကိုင်းကျေးရွာမှာ အထိုင်ချတပ်စွဲထားတဲ့ စစ်ကောင်စီရဲ့ တပ်စခန်းတခုကို ဖေဖော်ဝါရီလ ၁၀ ရက် မနေ့ကမနက် ၁၀ နာရီလောက်မှာ ဒေသခံကာကွယ်ရေးတပ်ဖွဲ့တွေက ဝင်ရောက်ဖျက်ဆီးခဲ့တယ်လို့ သိရပါတယ်။

ညောင်ကိုင်းရွာမှာ ၅ လနီးပါး အထိုင်ချတပ်စွဲထားတဲ့ အဲ့ဒီတပ်စခန်းကို သွားရောက်တိုက်ခိုက်ချိန် စစ်ကောင်စီတပ်ဖွဲ့ဝင် တဦးလည်း သေဆုံးခဲ့ပြီး အများအပြား ထိခိုက်ဒဏ်ရာရသွားတယ်လို့ Kanbalu Underground Warriors တပ်ဖွဲ့ဝင် တဦးက မြေလတ်အသံကို ပြောပါတယ်။

“သူတို့ (စစ်ကောင်စီ)အထိုင်ချထားတာက၂ နေရာပေါ့။ ရွာပြင်မှာက ဂိတ်ချထားတယ်။ ရွာထဲမှာက အထိုင်ချထားတယ်။ ရွာထဲကို ပြောက်ကျားနည်းနဲ့ ဝင်တိုက်ပြီး စခန်းတွေကို မီးရှို့နိုင်ခဲ့တယ်။ စကစ တဦးလည်း သေသွားတယ်” လို့ ဆိုပါတယ်။

အဲ့ဒီစခန်းကို တိုက်ခိုက်ချိန်မှာ မဟာမိတ်ပူးပေါင်းတပ်ဖွဲ့တွေက လက်နက်ကြီး၊ လက်နက်ငယ်တွေကို အသုံးပြုခဲ့တဲ့အပြင် ဒရုန်းတွေနဲ့ပါ ပစ်ခတ်ခဲ့တယ်လို့ အထက်ပါတပ်ဖွဲ့ဝင်က ဆိုပါတယ်။

ဒီစစ်ဆင်ရေးကို Kanbalu Underground Warriors၊ MPF U.18၊ မြေပြင်လှုပ်ရှားညီနောင်များ၊ ကန့်ဘလူမြို့နယ် L – PDF မဟာမိတ်အဖွဲ့တွေနဲ့ ပူးပေါင်းတိုက်ခိုက်ခဲ့တာဖြစ်ပြီး ပစ်ခတ်ချိန် ၄ နာရီဝန်းကျင်လောက် ကြာခဲ့တယ်လို့ သိရပါတယ်။

ဒါ့အပြင် Kanbalu Underground Warriors တပ်ဖွဲ့အနေနဲ့ ညောင်ကိုင်းကျေးရွာက စစ်ကောင်စီတပ်စခန်းကို သွားရောက်ပစ်ခတ်တာဟာ ၃ ကြိမ်ထက်မနည်း ရှိပြီလို့လည်း ဆိုပါတယ်။

ကလေး၊ ဖေဖော်ဝါရီ ၁၀၊ ၂၀၂၃။

စစ်ကိုင်းတိုင်း၊ ကလေးမြို့၊ ခရိုင်ဆည်မြောင်းရုံးနဲ့သစ်တောရုံးမှာ တပ်စွဲနေတဲ့စစ်ကောင်စီတပ်သားတွေ ၂ ရက်ဆက် တိုက်ခိုက်ခံရပြီး ၉ ဦးသေဆုံးခဲ့တယ်လို့ ကလေး UG တာဝန်ရှိသူတဦးက ပြောပါတယ်။

ဖေဖော်ဝါရီလ ၈ ရက်ည ၈ နာရီခန့်မှာ ဆည်မြောင်းရုံးထဲကင်းစောင့်နေတဲ့ စစ်ကောင်စီတပ်သား ၁၅ ဦးကို ၄၀ မမနဲ့ ၃ လုံးပစ်ခတ်ခဲ့ရာ ၆ ဦးသေဆုံးခဲ့သလို ဖေဖော်ဝါရီလ ၉ ရက်ည ၆ နာရီမှာ အဲဒီရုံးကိုရောက်လာတဲ့ အင်အား ၄၀ ပါစစ်ကြောင်းကို ၄၀ မမနဲ့ ၂ လုံးနဲ့ ပစ်ခတ်ခဲ့ရာ ၃ ဦးသေဆုံးခဲ့တယ်လို့ ကလေးမြို့မြို့ပြစီမံချက် UG တပ်ရင်း ဦးဆောင်သူရန်မင်းနိုင်က ပြောပါတယ်။

“ကျနော်တို့ကပစ်ကတည်းက အနီးကပ်ပစ်တာလေ။ သေဆုံးတာကို မြင်ရတာပေါ့။ ကိုက်သုံးဆယ်လောက်ပဲဝေးတာကို။ ၉ ယောက်သေဆုံးတာကို ကျနော်တို့မျက်စီနဲ့မြင်ပြီးအတည်ပြုခဲ့တာပါ” လို့ ဆိုပါတယ်။

တိုက်ခိုက်ခံရတဲ့ စစ်ကောင်စီတပ်တွေဟာ ကလေးမြို့ဒေသကွပ်ကဲရေးစစ်ဌာနချုပ်က ဖြစ်ပြီး သူတို့ဟာ ဆည်မြောင်းရုံးနဲ့သစ်တောရုံးမှာ အထိုင်ချနိုင်ဖို့ ကြိုးပမ်းနေကြတာ ဖြစ်တယ်လို့ ကိုရန်မင်းနိုင်က ပြောပါတယ်။

“တိုက်ခိုက်တဲ့အချိန်အတွင်းမှာတော့ စကစတွေဖက်က ရမ်းသမ်းပစ်ခတ်တာတွေရှိခဲ့တယ်။ ဒါပေမဲ့ရဲဘော်တွေအထိအခိုက်မရှိခဲ့ဘူး။ မြို့ထဲနဲ့မြို့နားနီးတဲ့အထိုင်ဂိတ်တွေမှာတော့ ဒကစနဲ့တပ်မ ၂၂ ကကောင်တွေများတယ်” လို့ ဆိုပါတယ်။

ပြီးခဲ့တဲ့ဖေဖော်ဝါရီ ၆ ရက်မှာလည်း တောင်ဇလပ်ရပ်ကွက်မှာ စစ်ဆေးရေးဂိတ်အသစ်ချဖို့ အင်အား ၃၀ ခန့်နဲ့လာကြတဲ့ စစ်ကောင်စီတွေ တိုက်ခိုက်ခံရပြီး သုံးပွင့်ဗိုလ်ကြီးတဦးအပါအဝင် ၆ ဦးသေဆုံးခဲ့တယ်လို့ သိရပါတယ်။

စစ်ကိုင်း၊ ဖေဖော်ဝါရီ ၁၀၊ ၂၀၂၃။

စစ်ကိုင်းတိုင်း၊ ကန့်ဘလူမြို့နယ်၊ စံပါယ်နံသာ ရဲစခန်းသိမ်းတိုက်ပွဲမှာ စစ်ကောင်စီဘက်က ၂၀ နီးပါး သေဆုံးပြီး ကာကွယ်ရေး ရဲဘော်တွေဘက်က ၄ ဦး မစိုးရိမ်ရ ဒဏ်ရာတွေ ရရှိခဲ့တယ်လို့ သိရပါတယ်။

ဖေဖော်ဝါရီ ၉ ရက် မနက် ၄ နာရီဝန်းကျင်ကနေ ၆ နာရီဝန်းကျင်ထိ အနီးကပ်တိုက်ပွဲ ဖြစ်ပွားခဲ့ပြီး ဂျက်လေယာဉ်တက်လာတဲ့အတွက် စခန်းထဲထိ ဝင်မစီးဘဲ ပြန်ဆုတ်ခဲ့ရတယ်လို့ မြေပြင်နဲ့နီးစပ်သူ အမျိုးသားတဦးက ဆိုပါတယ်။

“စစ်**တွေစုပြီး အိပ်ကောင်းနေတဲ့အချိန် အလစ်ဝင်ပစ်ကြတာ။ ပစ်ရင်းနဲ့ ဝင်သိမ်းနိုင်တဲ့ အဆင့်ထိ ရောက်နေပြီ။ သူတို့က ဖရိုဖရဲ ဖြစ်နေပြီ။ ဝင်သိမ်းမယ်ဆိုရင် သိမ်းလို့ရနေပြီကို အဲ့အတွင်းထဲကိုက မဝင်နိုင်ဘူး တေ့ပစ်ရတာကို၊ လက်နက်တွေဝင်သိမ်းမယ်လုပ်တော့ ဂျက်ဖိုက်တာ တက်လာတာနဲ့ ချက်ချင်း ပြန်ဆုတ်လာရတာ။ အနီးကပ် ပစ်ရတာဆိုတော့ သေတာ ဒဏ်ရာရတာတွေ အကုန်လုံး မြင်ရတယ်” လို့ ပြောပါတယ်။

တိုက်ပွဲအတွင်း စစ်ကောင်စီဘက်က ၂၀ နီးပါးသေဆုံးကာ အထိနာခဲ့လို့ ကန့်ဘလူမြို့အဝင်မှာရှိတဲ့ ၆၀၀၆ အမြှောက်တပ်ကနေ လက်နက်ကြီးပစ်ကူပေးပြီး၊ စခန်းနားမှာရှိတဲ့ အိမ်တွေကိုလည်း စခန်းသိမ်းတိုက်ပွဲမှာ ပါတယ်ဆိုပြီး စွပ်စွဲကာ မီးပတ်ရှို့လို့ အိမ် ၅ အိမ် မီးလောင်ခဲ့တယ်လို့ သိရပါတယ်။

မဟာမိတ်ရဲဘော်တွေဘက်ကတော့ ရဲဘော် ၄ ဦး ခြေထောက် ထိမှန်ဒဏ်ရာ၊ လက်မောင်း ထိမှန်ဒဏ်ရာနဲ့ ပုခုံးရှပ်ထိဒဏ်ရာတွေရခဲ့ပြီး မစိုးရိမ်ရဘူးလို့ ဆိုပါတယ်။

“ပြင်ဆင်တာက ည ၁၂ နာရီ ၁ နာရီလောက်ထဲက၊ ပစ်တာက တဘက်ထဲ မဟုတ်ဘူး။ သူတို့ထွက်မယ့် လမ်းတွေပါပိတ်ပြီးနေရာယူတာဆိုတော့ ဟိုဘက်အဖွဲ့ ဒီဘက်အဖွဲ့ ချိတ်ဆက်နေရတာနဲ့ မနက်မှပစ်ရတာ။ သွားထဲက စခန်းသိမ်းဖို့ဆိုပြီး သွားတာ။ သိမ်းလုသိမ်းဆဲမှာမှ ဂျက်ဖိုက်တာက တက်လာတော့ ဘာလိုမှ လုပ်မရတော့ဘူး။” လို့ ဆိုပါတယ်။

အခုလက်ရှိ စခန်းထဲမှာ ၆၀၀၆ တပ်ကနေ စစ်ကူလာတဲ့ကား ၂ စီး ရောက်ရှိနေပြီး၊ ဒီကနေ့မနက် ၈ နာရီအချိန်ထိ အမြှောက်တပ်ထဲကနေ လက်နက်ကြီးတွေနဲ့ ပစ်ခတ်နေဆဲဖြစ်ကာ အင်းလယ်ကြီးရွာထိပ်ကို ၂ လုံး ကျရောက်ပေါက်ကွဲခဲ့တယ်လို့ သိရပါတယ်။

အဆိုပါတိုက်ပွဲကို ကန့်ဘလူမြို့နယ် ပကဖ၊ ကန့်ဘလူ တပ်ရင်း ၃၊ ၄နဲ့ မဟာမိတ်အဖွဲ့တွေ ပူးပေါင်းလုပ်ဆောင်ခဲ့တာလည်း ဖြစ်ပါတယ်။

စစ်ကိုင်း၊ ဖေဖော်ဝါရီ ၉၊ ၂၀၂၃။

စစ်ကိုင်းတိုင်းဒေသကြီး၊ ကန့်ဘလူမြို့နယ် ကိုးတောင်ဘို၊ စံပယ်နံသာနဲ့ အမှတ် ၆၀၀၆ အမြှောက်တပ် ၃ ခု တိုက်ခိုက်ခံရပြီး စစ်ကောင်စီဘက်က လက်နက်ကြီးပြန်ပစ်လို့ စျေးနဲ့ လူနေအိမ်တွေ မီးလောင်ပျက်စီးခဲ့တယ်လို့ သိရပါတယ်။

ဖေဖော်ဝါရီလ ၈ ရက်နေ့ည ၁၀ နာရီကျော်ခန့်က စတင်ပြီး စံပယ်နံသာကျေးရွာက စစ်ကောင်စီတပ်စွဲထားတဲ့နေရာ၊ ကိုးဘိုတောင်က ခမရ ၃၆၁ တပ်နဲ့ အမှတ် ၆၀၀၆ အမြှောက်တပ်နေရာတွေကို တပြိုင်နက်တိုက်ခိုက်ခဲ့တယ်လို့ ကန့်ဘလူမြို့နယ် ပအဖ တာဝန်ရှိသူက ပြောပါတယ်။

“မနေ့ညက တပြိုင်နက် စကစ နေရာစခန်းတွေကို ဝင်တိုက်တာ။လက်နက်ကြီးတွေနဲ့ သူတို့စခန်းတွေကို ပစ်တာလည်း ရှိတယ်။ အနားကပ် တိုက်တာလည်း ရှိတယ်။ စုပေါင်းတိုက်ပွဲ ဖော်ဆောင်လိုက်တဲ့ သဘောပါ။ စကစဘက်က ထိခိုက်သေဆုံးတာတွေ များတယ်။ သူတို့စခန်းတွေ တိုက်ခိုက်ခံရလို့ လက်နက်ကြီးတွေနဲ့ တရစပ် ပြန်ပစ်တယ်။ ၆၀၀၆ ကနေဆို ဟောင်ဝစ်ဇာ အမြှောက်တွေနဲ့တောင် ပြန်ပစ်တာ” လို့ ပြောပါတယ်။

စစ်ကောင်စီနေရာ ၃ ခု တိုက်ခံရချိန်မှာ စစ်ကောင်စီဘက်က ၁၅ ဦးထက်မနည်း သေဆုံးပြီး ထိခိုက်သေဆုံး အသေးစိတ် သိရဖို့ စုံစမ်းနေတယ်လို့ ဆိုပါတယ်။

စစ်ကောင်စီဘက်က ပစ်ခတ်တဲ့ လက်နက်ကြီးထိလို့ ကိုးတောင်ဘိုစျေး မီးလောင်ပျက်စီးသွားပြီး ဆိုင်ခန်း ၅၀ ကျော် မီးလောင်ပျက်စီးခဲ့တယ်လို့ သိရပါတယ်။

အဲဒီအပြင် ၆၀၀၆ အမြှောက်တပ်က ပစ်တဲ့ လက်နက်ကြီးထိလို့ ထန်းကုန်းကျေးရွာက နေအိမ် ၄ လုံး ပျက်စီးသွားသေးတယ်လို့ သိရပါတယ်။

အဲဒီတိုက်ခိုက်မှုကိုတော့ ကန့်ဘလူမြို့နယ် ပကဖ၊ ကန့်ဘလူ တပ်ရင်း(၂)၊ တပ်ရင်း(၃)အပါအဝင် ကန့်ဘလူမြို့နယ်ထဲက PDF အဖွဲ့တွေ ပူးပေါင်းတိုက်ခိုက်ခဲ့တာ ဖြစ်တယ်လို့ ဆိုပါတယ်။

ဇန်နဝါရီလ ၃၁ ရက်နေ့က စစ်ကောင်စီအင်အား ၁၅၀ လောက်ဟာ ညောင်ဇင်ကြီးကျေးရွာကို ရောက်လာပြီး နေအိမ်တွေကို အကြောင်းမဲ့ မီးရှို့လို့ ညောင်ဇင်ကြီး၊ မဲသည်၊ အင်းလည်ကြီး၊ ပေလည်​ကျေးရွာတွေ အပါအဝင် ကျေးရွာပေါင်း ၈ ရွာက ဒေသခံတွေဟာ ထွက်ပြေးခဲ့ရသေးတယ်လို့ သိရပါတယ်။

စစ်ကိုင်း၊ ဖေဖော်ဝါရီ ၉၊ ၂၀၂၃။

စစ်ကိုင်းတိုင်း၊ ကန့်ဘလူမြို့နယ်၊ စိန်နားရွာက စစ်သားနဲ့ ပျူစောထီးတွေကို ကာကွယ်ရေးအဖွဲ့တွေ ပူးပေါင်းကာ ဝင်ရောက်တိုက်ခိုက်ခဲ့ပြီး လက်နက်တချို့ပါ သိမ်းဆည်းရမိခဲ့တယ်လို့ သိရပါတယ်။

ဖေဖော်ဝါရီလ ၉ ရက် ဒီကနေ့မနက် ၁ နာရီခန့်က စတင်တိုက်ခိုက်ကာ တိုက်ပွဲ ၁ နာရီကျော် ကြာပြီးနောက်မှာတော့ ရွာကိုသိမ်းနိုင်ခဲ့ပြီး စစ်ကောင်စီဘက်က တပ်ကူတွေ ရောက်လာလို့ အကျဆုံးအခြေအနေကို သေချာမကြည့်နိုင်ဘဲ ပြန်ဆုတ်ခွာခဲ့ကြတယ်လို့ တပ်ဖွဲ့နဲ့ နီးစပ်သူတဦးက ဆိုပါတယ်။

“ပျူစောထီးအများစုက လက်နက်မကောင်းတော့ တိုက်ပွဲဖြစ်နေချိန် ထွက်ပြေးကြတာ၊ ကန့်ဘလူ လက်နက်ကြီးတပ်က‌ လှမ်းထုတယ်။ စစ်ကူတွေကလည်း ရောက်လာဆိုတော့ နယ်မြေရှင်းလင်းရေးက အကြာကြီး မလုပ်နိုင်ခဲ့ဘူး။ ရွာထဲမှာလည်း အကျဆုံးတွေ အများကြီးရှိလောက်သေးတယ်” လို့ ပြောပါတယ်။

ဒီတိုက်ခိုက်မှုကို ရွှေဘိုခရိုင် တပ်ရင်း ၁၆ − Taze Revolution Force-TRF နဲ့ ကန့်ဘလူခရိုင် တပ်ရင်း-၁ရဲ့ တပ်ခွဲ ၁၊ ၂၊ ၄တို့ ပူးပေါင်းတိုက်ခိုက်ခဲ့တာဖြစ်ပြီး၊ အခုအချိန်မှာတော့ စစ်ကူလာတဲ့တပ်တွေ ရွာထဲမှာ ရောက်နေကာ ခံတပ်ကုန်းတွေနဲ့ တိုက်ပွဲအတွင်း ပျက်စီးသွားတာတွေကို ပြန်ပြင်တာတွေ လုပ်နေတယ်လို့ သိရပါတယ်။

ဝင်ရောက်စီးနင်းချိန် ဘန်ကာထဲမှာရှိတဲ့ စစ်သား ၂ ဦးရဲ့ အလောင်းကိုတွေ့ခဲ့ပြီး သူတို့ကိုင်ထားတဲ့ ကာဘိုင်တလက်၊ MA1 တလက်၊ ကျည်ဘောက်နဲ့ ကျည်ဆံတချို့ကို ယူနိုင်ခဲ့တယ်လို့ ဆိုပါတယ်။