စစ်ကိုင်း

စစ်ကိုင်း၊ ဒီဇင်ဘာ ၁၉၊ ၂၀၂၂။

စစ်ကိုင်းတိုင်း၊ မုံရွာမြို့နယ်က ပျူစောထီးအများစုနေထိုင်တဲ့တောပုရွာကို ဒီဇင်ဘာလ ၁၈ ရက်မနေ့ကညပိုင်းမှာ Farmers Revolution Force – CHU ပူးပေါင်းတပ်ဖွဲ့တွေက လက်နက်ကြီးနဲ့ပစ်ခတ်တိုက်ခိုက်ခဲ့ပါတယ်။

FRF – CHU မုံရွာခရိုင်တပ်ရင်း ၈၊ ၉၊ ၁၀ တပ်ဖွဲ့ဝင်တွေဟာ မဟာမိတ်တွေနဲ့ပူးပေါင်းပြီး မနေ့ကည ည ၉ နာရီ မိနစ် ၂၀ ခန့်မှာ သူတို့ကိုယ်တိုင် ထုတ်လုပ်ထားတဲ့ ၇၀ မမ (Howitzer)နဲ့ အချက် ၃၀ ခန့်ပစ်ခတ်တိုက်ခိုက်ခဲ့တာလို့လည်း သိရပါတယ်။

“Howitzer လေးက အခုမှပွဲထွက်တာ။ စမ်းသပ်တာတွေကလည်း အရင်ကအကြိမ်ကြိမ်လုပ်ခဲ့ပြီးပြီ။ ပွဲအနေအထားရှိတာနဲ့ မဟာမိတ်တွေကလည်းလှမ်းခေါ်တာနဲ့ ပွဲထွက်သုံးမယ်ဆိုပြီး ကျနော်တို့ထွက်လိုက်တာ။ အခုတော့လည်း တဖြည်းဖြည်းအဆင့်မြင့်လာပြီ။ ကျနော်တို့လည်း ကြိုးစားပြီးထုတ်လုပ်နေတယ်” လို့ FRF တပ်ရင်းမှ တပ်ဖွဲ့ဝင်တဦးကပြောပါတယ်။

Farmers Revolution Forve – မုံရွာခရိုင်တပ်ရင်း ၈၊ ၉၊ ၁၀ တို့နဲ့အတူ Aung San Force မုံရွာခရိုင်အမှတ် (၅) တပ်ရင်း၊ SGF၊ Generation Z People’s Defence Forces Monywa၊ ဗန္ဓုလနှင့်အဖွဲ့သားများ၊ Black Wolf Defense Force – Monywa တပ်ဖွဲ့တို့လည်း အခုစစ်ဆင်ရေးမှာ ပူးပေါင်းပါဝင်ခဲ့ကြပြီး ပျူစောထီးတွေဘက်က ထိခိုက်သေဆုံးအခြေအနေကိုတော့ အတည်မပြုနိုင်သေးဘူးလို့လည်း ဆိုပါတယ်။

ပြီးခဲ့တဲ့ဒီဇင်ဘာလ ၁၂ ရက်ကလည်း စစ်ကိုင်းခရိုင်အတွင်းက ပျူစောထီးကျေးရွာလို့လူသိများတဲ့ ကြွယ်ပုံရွာကို Farmers Revolution Force – မုံရွာခရိုင်တပ်ရင်း ၈နဲ့ မဟာမိတ်တွေပူးပေါင်းပြီး ၆၀ မမ လက်နက်ကြီးနဲ့ပစ်ခတ်တိုက်ခိုက်ခဲ့ပါသေးတယ်။

စစ်ကိုင်း၊ ဒီဇင်ဘာ ၁၉၊ ၂၀၂၂။

စစ်ကိုင်းတိုင်း၊ ရွှေဘိုမြို့ပေါ်က ဧရာဝတီဘဏ်ကိုစောင့်နေတဲ့ စစ်သားတွေကို ဒီဇင်ဘာလ ၁၉ ရက် ဒီနေ့ညနေပိုင်းမှာလက်ပစ်ဗုံး ၂ လုံးနဲ့ ပစ်သွင်းတိုက်ခိုက်ခဲ့တယ်လို့ Burma Rangers – ShweBo က သတင်းထုတ်ပြန်ထားပါတယ်။

ရွှေဘိုမြို့၊ လမ်းမတော်‌အရှေ့ဘက်ရှိ ချမ်းသာကြီးဘုရားအနီးက ဧရာဝတီဘဏ်မှာစောင့်နေတဲ့စစ်သားတွေကို ဒီညနေ ၆ နာရီလောက်မှာ တိုက်ခိုက်ခဲ့တာလို့ဆိုပါတယ်။

“အဲဒီဘဏ်မှာလုံခြုံရေးယူထားတာက ပုံမှန်ကတော့ ၇ ယောက်လောက်ရှိမယ်။ ဘယ်တပ်ကဆိုတာတော့ မသိရဘူး။ ဘဏ်ရှေ့မှာဘန်ကာလုပ်ထားပါတယ်၊ ဘဏ်ကာရဲ့နောက်ကျောဘက်ကိုကျပီးကွဲတယ်။ စစ်သားတွေ သေဖို့ရာခိုင်နှုန်းများပါတယ်” လို့ Burma Rangers အဖွဲ့တာဝန်ခံ ဗိုလ်အေဒီက ပြောပါတယ်။

စစ်ကောင်စီတပ်ရဲ့ထိခိုက်သေဆုံးစာရင်းကိုစုံစမ်းဆဲဖြစ်ပြီး၊ တော်လှန်ရေးရဲဘော်တွေ ထိခိုက်မှုမရှိ ဆုတ်ခွာနိုင်ခဲ့တယ်လို့လည်း ထုတ်ပြန်ချက်မှာဖော်ပြထားပါတယ်။

သူတို့အဖွဲ့ဟာ ဒီဇင်ဘာလ ၁၆ ရက်ကလည်း ရွှေဘိုမြို့နယ်၊ ကျောက်မြောင်းကနေ ရွှေဘိုမြို့ကိုလာတဲ့စစ်ကောင်စီ Klugar ကားကို ကျောက်မြောင်းလမ်းမပေါ် ‌က အုံးပေါက်ကျေးရွာအနောက်ဖက်မှာ ပဒေသာမိုင်း ၈ လုံးနဲ့မိုင်းဆွဲတိုက်ခိုက်ခဲ့ပါသေးတယ်။

စစ်ကိုင်း၊ ဒီဇင်ဘာ ၁၅၊ ၂၀၂၂။

စစ်ကိုင်းတိုင်း၊ ရေဦးမြို့နယ်၊ ချမ်းသာရွာမှာရှိတဲ့ ဘုရင်ဂျီဘုရားကျောင်းနဲ့ ခရစ်ယာန်သီလှရှင်ကျောင်းကိုဖျက်စီးကာ ရွာကိုလည်း ရွာလုံးကျွတ် မီးရှို့သွားပြီး ပြည်သူတဦးလည်း သတ်ဖြတ်ခံခဲ့ရတယ်လို့ ဒေသခံတွေက တဆင့် သိရပါတယ်။

ဒီဇင်ဘာ ၁၄ရက် မနေ့က ညနေ ၄နာရီဝန်းကျင်က တတိယအကြိမ်မြောက် မီးရှို့ခံရတာဖြစ်ပြီး အိမ်ခြေ ၅၀၀ကျော်ရှိတဲ့ရွာကြီးက ၁၀အိမ်လောက်ပဲကျန်တော့ကာ အိမ်ကြီးအိမ်ကောင်းမှန်သမျှရွေးရှို့ခံလိုက်ရတာဖြစ်တယ်လို့ ဆိုပါတယ်။

“အကိုတို့အိမ်ဆို ၂ကြိမ်မြောက်ရှို့ခံရတာပေါ့၊ ဒုတိယအကြိမ်တလုံးပါတယ်၊ ခုတတိယအကြိမ် ထပ်ဆောက်ထားတဲ့အိမ်တလုံးပါသွားတယ်၊ အိမ်တောင်မှအပြီးမဆောက်ရသေးဘူး၊ ကျောင်းကြီးကတော့ မီးလောင်တဲ့ထဲမပါပေမယ့် အပျက်စီးများတယ်၊ ဘုရားရှိခိုးကျောင်းဆောင်ကြီးထဲမှာလည်း သောက်စားပြီး‌တော့ ဖျက်ဆီးသွားတာတွေရှိတယ်၊ မယ်သီလှကျောင်းထဲမှာလည်း ဖျက်ဆီးထားတာတွေရှိတယ်၊ အိမ်ဆိုလည်း လေး၊ငါး၊ဆယ်လုံးလောက်ပဲကျန်တော့တယ်”လို့ ချမ်းသာရွာသားတဦးက ပြောပါတယ်။

စစ်ကောင်စီတပ်တွေဟာ ဒီဇင်ဘာ၁၄ရက် တရက်တည်း ကုန်းသာ၊ ချမ်းသာ၊ ရွာသစ်ရွာတွေကို ရွာလုံးကျွတ်မီးရှို့ရုံသာမက ချမ်းသာရွာရဲ့ ဗုဒ္ဓဘာသာပိုင်းဖြစ်တဲ့ အိုးသယ်ခွက်အပိုင်းက ဗုဒ္ဓဘာသာဝင်အမျိုးသားတဦးကိုလည်း ခေါင်းဖြတ်သတ်သွားတယ်လို့ ဆိုပါတယ်။

ချမ်းသာရွာဟာ မေလ ၇ရက်က ပထမဆုံးအကြိမ်မီးရှို့ခံခဲ့ရပြီး အိမ် ၂၄လုံး ပျက်စီးခဲ့ကာ၊ ဇွန်လ ၇ရက်က ဒုတိယအကြိမ်အဖြစ် ၁၁၁လုံး မီးလောင်ခဲ့ပြီး၊ ခုတတိယအကြိမ်မှာတော့ ရွာလုံးကျွတ်ပါသွားတာဖြစ်တယ်လို့ သူကပြောပါတယ်။

ချမ်းသာရွာဟာ ပေါ်တူဂီနွယ်ဖွား ခရစ်ယာန်ဘာသာဝင်တွေနဲ့ ဗုဒ္ဓဘာသာဝင်တွေယှဉ်တွဲနေထိုင်တဲ့ရွာကြီးဖြစ်ကာ ရွာလူဦးရေရဲ့ သုံးပုံတပုံခန့်ကသာ ဗုဒ္ဓဘာသာဝင်တွေဖြစ်တယ်လို့ ဆိုပါတယ်။

အခုလက်ရှိ စစ်ကောင်စီအဖွဲ့တွေ ရွာထဲက ထွက်သွားကြပေမယ့် လေကြောင်းသတင်းလည်းကြားနေရလို့ ပြည်သူတွေကတော့ ဆက်လက်ရှောင်တိမ်းနေဆဲဖြစ်ကာ အဆိုပါစစ်ကြောင်းက ဒီပဲယင်းက ရွာ ၁၉ရွာကို မီးရှို့ခဲ့တဲ့ စစ်ကြောင်းဖြစ်တယ်လို့လည်း သိရပါတယ်။

ချမ်းသာရွာကို စစ်ကောင်စီက တတိယအကြိမ်ဝင်မရှို့ခင် ပြီးခဲ့တဲ့အခေါက်တွေမှာ အဲ့ဒီရွာက ပေါ်တူဂီမျိုးနွယ်ဝင်တွေကို ရွာထဲကအပြီးတိုင်ထွက်သွားဖို့နဲ့ ထွက်မသွားရင်လူမျိုးသုန်းသတ်ပစ်မယ်ဆိုပြီး ရွာထဲက အိမ်နံရံအချို့မှာ စာရေးသားပြီးခြိမ်းခြောက်ခဲ့ပါသေးတယ်။

စစ်ကိုင်း၊ ဒီဇင်ဘာ ၂၂၊ ၂၀၂၂။

စစ်ကိုင်းတိုင်း၊ မုံရွာမြို့နယ်၊ တောပုကျေးရွာအနောက်ခြမ်းရှိ တောဝါကျောင်းအနီးမှာ ကင်းပုန်းဝပ်နေတဲ့ပျူစောထီးတွေ ဒီဇင်ဘာလ ၂၁ ရက်မနေ့ကညနေပိုင်းမှာ လက်နက်ကြီးနဲ့ပစ်ခတ်ခံရပြီး ၅ ဦးခန့်သေဆုံးခဲ့တယ်လို့ သိရပါတယ်။

အင်အား ၂၀ ဝန်းကျင်နဲ့ကင်းပုန်းဝတ်နေတဲ့ပျူစောထီးတွေကို မနေ့ကညနေ ၅ နာရီဝန်းကျင်မှာ ဒေသခံကာကွယ်ရေးတပ်တွေက ၄၀ မမ လက်နက်ကြီး ၃ လုံးနဲ့ပစ်ခတ်တိုက်ခိုက်ခဲ့တာလည်းဖြစ်ပါတယ်။

“ကျနော်တို့ဘက်က ပထမ ၁ လုံးပစ်တော့ သူတို့ဘက်က ၂ ချက်တော့ပြန်ပစ်တယ်။ တောပုရွာရဲ့ အနောက်ဘက်ခြမ်းက တောဝါကျောင်းနားက ငှက်ပျောခြံထဲမှာ ကင်းပုန်းဝတ်နေတာ။ ပစ်ပြီးလို့ မျက်မြင်ကတော့ ၁ ကောင်ထမ်းသွားတာတွေ့ရတယ်။ ဒီနေ့မနက်တောပုရွာရဲ့ နယ်မြေခံတယောက်ပြောပြချက်အရ ပျူ ၅ ကောင်သင်္ဂြိုဟ်တယ်လို့ပြောတယ်” လို့ တိုက်ခိုက်မှုမှာပါဝင်တဲ့ မုံရွာခရိုင်တပ်ရင်း(၇) -Lightning People Defence Force ရဲ့ တပ်ခွဲမှူးက ပြောပါတယ်။

တောပုရွာဟာ ပျူစောထီးအများစုနေထိုင်တဲ့ကျေးရွာဖြစ်သလို စစ်ကောင်စီတပ်တွေလည်း မကြာခဏတပ်စွဲနေထိုင်လေ့ရှိတဲ့ရွာလည်းဖြစ်ပါတယ်။

ပြီးခဲ့တဲ့ဒီဇင်ဘာလ ၁၅ ရက်ကလည်း အဲ့ဒီရွာကို မုံရွာခရိုင်တပ်ရင်း(၇) – Lightning People Defence Forceအဖွဲ့က လက်နက်ကြီးနဲ့ပစ်ခတ်တိုက်ခိုက်ခဲ့ရာ စစ်သား ၂ ဦးနဲ့ ပျူစောထီး ၂ ဦးသေဆုံးခဲ့တယ်လို့ သိရပါတယ်။

စစ်ကိုင်း၊ နိုဝင်ဘာ ၂၂၊ ၂၀၂၂။

စစ်ကိုင်းတိုင်း၊ ကန့်ဘလူမြို့နယ်၊ ကျောက်တိုင်ရွာနဲ့ ကျီစုရွာကို စစ်ကောင်စီတပ်တွေက ဝင်ရောက်စီးနင်းပြီး ရွာကိုမီးတင်ရှို့ခဲ့ကာ စစ်‌ကြောင်းထွက်ပြီအထင်နဲ့ မီးဝင်ငြိမ်းတဲ့ ရွာသားတွေကိုလည်း သေနတ်နဲ့ပစ်ခတ်ခဲ့တယ်လို့ သိရပါတယ်။

ကာဘိုးရွာက ထွက်လာတဲ့ အင်အား ၁၀၀ ဝန်းကျင်ရှိစစ်ကြောင်းဟာ နိုဝင်ဘာလ ၂၂ ရက် ဒီကနေ့ မနက် ၁၀ နာရီလောက်က ကျောက်တိုင်ရွာကို မီးစတင်ရှိုခဲ့ပြီး၊ နေ့လည် ၁ နာရီလောက်မှာ ကျီစုရွာကို မီးဆက်ရှို့ကာ လက်ရှိအချိန်ထိလည်း မီးတင်နေတုန်းပဲလို့ ဒေသခံကာကွယ်ရေး ရဲဘော်တဦးက ပြောပါတယ်။

“မီးဝိုင်းကူငြှိမ်းဖို့သွားကြရာကနေ ပစ်ခံရတာ။ ရွာထဲဝင်စပဲ ရှိသေးတယ်။ တချို့ဆို မီးငြှိမ်းဖို့ ရေပုံးကို မကိုင်ရသေးဘူး။ ကင်းပုန်းကနေ ပစ်လိုက်တာ။ အဲ့ချိန်မှာ ဝရုန်းသုန်းကားနဲ့ ထွက်ပြေးကြတာ။ တချို့မပြေးနိုင်တဲ့ ပြည်သူတွေကျ ရွာထဲမှာပိတ်မိကျန်ခဲ့တယ်။ သူတို့က တရစပ်ပစ်နေတော့ ကျနော်တို့လည်း ပြေးခဲ့ရတာ”လို့ ပြောပါတယ်။

လက်ရှိအချိန်ထိ ကျည်ထိမှန်ထားတဲ့ ပြည်သူ ၁၀ ဦးကျော်ရှိနေတယ်လို့ သိရပြီး၊ ၇ ဦးကိုတော့ ကယ်ထုတ်ထားနိုင်ခဲ့ကာ ရွာထဲမှာ နောက်ထပ် ကယ်ထုတ်ရမယ့်လူတွေလည်း ကျန်နေသေးတယ်လို့ ဆိုပါတယ်။

မီးလောင်တဲ့အချိန်မှာ အနီးကျေးရွာက ဒေသခံတွေလည်း လာရောက်ငြိမ်းသတ်နေတာကြောင့် ကျည်ထိမှန်တဲ့သူတွေက ဘယ်ရွာကလဲဆိုတာကို အတိအကျမသိရသေးသလို၊ အဲ့ဒီထဲမှာ ကာကွယ်ရေးရဲဘော်အချို့လည်း ပါဝင်နေတယ်လို့ သိရပါတယ်။

အများစုက ပေါင်နဲ့ ခြေထောက်မှန်တဲ့သူတွေဖြစ်ပြီး၊ ကျောဘက်မှာ ကျည်မှန်တဲ့သူကတော့ တဦးရှိတယ်လို့ သိရကာ၊ ၂ ရွာပေါင်း မီးလောင်ပျက်ဆီးတဲ့ နေအိမ်အရေအတွက်နဲ့ အနောက်ဆက်တွဲအခြေအနေတွေကိုတော့ မြေလတ်အသံက ဆက်လက်စုံစမ်းနေဆဲပါ။

စစ်ကောင်စီဘက်က လက်နက်ကြီး၊ လက်နက်ငယ်တွေအပြင် စက်သေနတ်တွေနဲ့ပါ ပစ်ခတ်နေတဲ့အတွက် နယ်မြေခံကာကွယ်ရေးအဖွဲ့တွေလည်း စောင့်ကြည့်နေကြရပြီး၊ အချိန်မရွေး ထိတွေ့တိုက်ပွဲလည်း ဖြစ်လာနိုင်တယ်လို့ အထက်ပါကာကွယ်ရေးရဲဘော်က ပြောပါတယ်။

စစ်ကိုင်း၊ အောက်တိုဘာ ၈၊ ၂၀၂၂။

စစ်ကိုင်းတိုင်း၊ မုံရွာမြို့မှ ချင်းတွင်းမြစ်အထက်ပိုင်းသို့ ဆန်တက်လာသေ လေယာဉ်ဆီနှင့် လက်နက်ခဲယမ်းများ တင်ဆောင်လာသည့် စစ်သင်္ဘော၁ စီး နှင့် ဖလက်‌သင်္ဘောများကို အောက်တိုဘာလ ၇ ရက်နေ့တွင် မြွေပိုင်းတောင်အနီးတွင် ပစ်ခတ်တိုက်ခိုက်ခဲ့ကြောင်း Golden Triangle Force ဗိုလ်မင်းခေါင်က မြေလတ်အသံကို ပြောသည်။

စစ်သင်္ဘော အပါအဝင် စစ်ကောင်စီ ရေယာဉ်များသည် အောက်တိုဘာလ ၃ ရက်ကတည်းက အလုံ – စစ်ပင်ဆိပ်ကမ်းကနေ ထွက်လာခဲ့ပြီး ပွတ်လုံးရွာအနီးတွင် ကာကွယ်ရေးတပ်ဖွဲ့များမှ ပထမအကြိမ် တိုက်ခိုက်ခဲ့သည်။ အောက်တိုဘာလ ၇ ရက်နေ့တွင် မြွေပိုင်းတောင်အနီးတွင် ဒုတိယအကြိမ်တိုက်ခိုက်ခံရခြင်း ဖြစ်သည်။

ပထမအကြိမ်တိုက်ခိုက်မှုတွင် စစ်ရေယာဉ်တစီး မီးလောင်ခဲ့သည်။ ဒုတိယအကြိမ်တွင် စစ်ကောင်စီဘက် အကျအဆုံးများရှိ၍ ထိခိုက်မှုများစွာ ရရှိထားကြောင်း ကနဦး သတင်းအရ သိရှိထားသော်လည်း မြေလတ်အသံမှ သီခြားအတည်ပြုနိုင်ခြင်း မရှိသေးပါ။

“ပထမအကြိမ်က ကနီနဲ့ချိုင်အကြား ပွတ်လုံးဒေသမှာ ၄ ရက်နေ့ နေ့လည် ၁၂ နာရီမှာ စောင့်ကြိုတိုက်ခိုက်တာ၊ ဒီနေ့ဒုတိယအကြိမ်က ကဲဒေါင့်ရွာရဲ့အထက် မြွေပိုင်း‌တောင်နား ၇ နာရီ ၉ မိနစ်မှ ကျနော်တို့စတင်တိုက်ပွဲဖြစ်တာ၊ စစ်သင်္ဘော ၁ စီးအပါအဝင် ၁၃ စီးကိုပစ်ခတ်ခဲ့တာ၊ ခဲယမ်းလက်နက်ပစ္စည်း ရိက္ခာနဲ့လေယာဉ်ဆီတွေတင်ဆောင်လာတာ၊ အင်အားကတော့ ၁ စီးကို ၃၀ လောက်ပါတယ်၊ ဒီနေ့ကျဆုံးတာကတော့စုံစမ်းနေဆဲပါ၊ ဒီနေ့ည အထိတော့အဲဒီစစ်သင်္ဘောတွေက မင်းကင်းနယ်ထဲမှာ ရှိနေတုန်းပါ” လို့ ဗိုလ်မင်းခေါင်ကပြောသည်။

အဆိုပါ တိုက်ခိုက်မှုကို့ ပြည်သူ့ကာကွယ်ရေးတပ်ရင်း (GTF)၊ တပ်ခွဲ(၂) ယက္ခညီနောင်၊ တပ်ခွဲ(၄) စစ်ကျွန်မခံမြွေဆိုးတသိုက်၊ တပ်ခွဲ (၅) Eagle Freedoom Fighter lChindwin Counter Colum၊ မဟာမိတ်ပူးပေါင်းအဖွဲ့များမှ ပူးပေါင်းတိုက်ခိုက်ခဲ့ခြင်း ဖြစ်သည်။

စစ်ကိုင်း၊ အောက်တိုဘာ ၄၊ ၂၀၂၂။

စစ်ကိုင်းတိုင်း၊ မုံရွာ-အလုံဆိပ်ကမ်းကနေ ချင်းတွင်းမြစ်အထက်ပိုင်းကို ဆန်တက်လာတဲ့ စစ်ကောင်စီဘက်က စစ်သင်္ဘောတစီးအပါအဝင် ထောက်ပို့ရေယာဥ် ၁၃ စီးကို အောက်တိုဘာလ ၃ ရက်မနေ့ကနေ့လည် ၁၁ နာရီလောက်မှာ ကနီမြို့နယ်၊ ကမ်းပြိုရွာအနီးရောက်ချိန် မဟာမိတ်ညီနောင်တွေက ပူးပေါင်းတိုက်ခိုက်ခဲ့တယ်လို့ ကျောက်လုံးကြီး KLG တပ်မဟာတာဝန်ခံက မြေလတ်အသံကိုပြောပါတယ်။

သင်္ဘောပေါ်မှာ လေယာဉ်ဆီအပါအ၀င် ဒဏ်ရာရ စစ်သားတွေနဲ့ ကားတွေ၊ ဆန်အိတ်တွေကို သယ်ဆောင်လာတာဖြစ်ပြီး၊ ကာကွယ်ရေးတပ်ဖွဲ့ဝင်တွေက စနိုက်ပါအပါအ၀င် လက်လုပ်သေနတ်တွေနဲ့ပစ်ခတ်တိုက်ခိုက်ခဲ့တာကြောင့် စစ်ကောင်စီဘက်က ၁၅ ဦး သေဆုံးတယ်လို့လည်း ဆိုပါတယ်။

“သူတို့အိုက်ကွန်နဲ့ ကျနော်တို့ အိုက်ကွန်လိုင်းပူးပြီး သူတို့ပြောတာကြားရတာက ၁၅ ကောင်သေတယ်၊ မဟာမိတ် ၇ ဖွဲ့ပူးပေါင်းတိုက်ခိုက်ခဲ့တာ၊ ကနီမြို့နယ်အတွင်း ကမ်းပြိုရွာအရောက်မှာ ပစ်ခတ်တိုက်ခိုက်ခဲ့တာ၊ ကလေးဝကနေ ခန္ခီးအထိတက်မှာပါ” လို့ ကျောက်လုံးကြီး KLG တပ်မဟာတာဝန်ခံက ဆိုပါတယ်။

ဒီတိုက်ခိုက်မှုကို KLG PDF (ကျောက်လုံးကြီး)၊ ပြည်ထောင်စုလွတ်မြောက်ရေးတပ်ပေါင်းစု၊ ဗိုလ်နှုတ်ခမ်းမွှေးအဖွဲ့၊ Chindwin GZ၊ တပ်ရင်း ၂၂၊ နဂါးညီနောင်၊ New Light Generation PDF၊ ယင်းမာပင် PDA PDF၊ ဒေါင်းလုလင်၊ Spring Guerrilla Platoon တို့ ပူးပေါင်းတိုက်ခိုက်ခဲ့တာလည်း ဖြစ်ပါတယ်။