စစ်ကိုင်း

ဘုတလင်၊ ဇွန် ၁၈၊ ၂၀၂၅။

စစ်ကိုင်းတိုင်း၊ ဘုတလင်မြို့နယ်အတွင်းမှာ ဒေါ်အောင်ဆန်းစုကြည်ရဲ့ အသက် ၈၀ မွေးနေ့အကြို အထိမ်းအမှတ်အဖြစ် ပန်းသပိတ်နှိုးဆော်တဲ့စာစောင်တွေဖြန့်ဝေခဲ့တယ်လို့ ဒေါင်းရာဇာပင်မ သပိတ်စစ်ကြောင်း-ဘုတလင်မြို့ ဆီက သိရပါတယ်။

ဇွန် ၁၆ ရက်က‌နေ ဒီကနေ့ ၁၈ ရက်အထိ ဘုတလင်မြို့နယ်ထဲကကျေးရွာတွေမှာ စာစောင်ဖြန့်ဝေတာ၊ စာစောင်တွေကို ဓါတ်တိုင်တွေကပ်တာတွေကို လူအင်အား ၃၀ ဝန်းကျင်လောက်နဲ့ လုပ်ခဲ့တာလို့ ဒေါင်းရာဇာပင်မသပိတ်စစ်ကြောင်း-ဘုတလင်မြို့ အတွင်းရေးမှူးက ပြောပါတယ်။

မြေလတ်အသံ၊ ဇွန် ၁၈၊ ၂၀၂၅။

စစ်ကိုင်းတိုင်း၊ ခင်ဦးမြို့နယ်မှာ ဒေါ်အောင်ဆန်းစုကြည် အသက် ၈၀ နှစ်ပြည့် မွေးနေ့အကြို အထိမ်းအမှတ်အဖြစ် ကျွန်းပင် အပင် ၈၀၀ ကို စိုက်ပျိုးခဲ့တယ်လို့ ခင်ဦးမြို့နယ်ပြည်သူ့အုပ်ချုပ်ရေး အဖွဲ့ကထုတ်ပြန်ပါတယ်။

ဇွန် ၁၈ ရက်နေ့မှာ ခင်ဦးမြို့နယ်သယံဇာတနဲ့ သဘာဝပတ်ဝန်းကျင်ထိန်းသိမ်းရေးဝန်ကြီးဌာန၊ မြို့နယ်သယံဇာတစီမံအုပ်ချုပ်မှု ဥက္ကဌရဲ့ စီစဥ်ဆောင်ရွက်မှုနဲ့စိုက်ပျိုးခဲ့ကြတာလို့ ဆိုပါတယ်။

ကျွန်းပင်တွေ စိုက်ပျိုးနေချိန်မှာ “Happy Birthdayပါ အမေစု၊ အမေစု ကျန်းမာပါစေ၊ အမေစု အသက်ရာကျော် ရှည်ပါစေ၊ အမေစု မတရားဖမ်းဆီးအချုပ်အနှောင်ဘေးမှ အမြန်ဆုံးလွတ်မြောက်ပါစေ၊ အမေစုနဲ့အတူ မတရားဖမ်းဆီးခံထားရသော နိုင်ငံရေးအကျဥ်းသားများအားလုံး အမြန်ဆုံး လွတ်မြောက်ပါစေ”လို့ ဆုတောင်းမေတ္တာတွေပို့သခဲ့ကြတယ်လို့ သိရပါတယ်။

ကျွန်းပင်စိုက်ပျိုးတာကို မြို့နယ်ပအဖ နာယက၊ မြို့နယ်ပအဖ ဒုတာဝန်ခံ၊ ရွှေဘိုခရိုင်တပ်ရင်း(၃) မှ တပ်ရင်းမှူး၊ မြို့နယ်ပကဖ ဒုတာဝန်ခံ၊ လူသားစာနာ တာဝန်ခံအပါအဝင် တော်လှန်ရေးအဖွဲ့စုံက တာဝန်ရှိသူ၊ တပ်ဖွဲ့ဝင်တွေပူးပေါင်းပါဝင်ခဲ့ကြတယ်လို့ သိရပါတယ်။

ဝက်လက်၊ ဇွန် ၁၈၊ ၂၀၂၅။

စစ်ကိုင်းတိုင်း၊ ဝက်လက်မြို့နယ်အတွင်း ဂိတ်ကြေးအခွန်ငွေကောက်ခံမှုအပေါ် ဒေသခံပြည်သူတွေက ဆန္ဒထုတ်ဖော်ခဲ့ကြပြီးနောက် အခွန်ကောက်ခံမှုယာယီရပ်နားထားပြီး နှုန်းထားလျှော့ချကောက်ခံဖို့ ညှိနှိုင်းနေတယ်လို့ ဝက်လက်မြို့နယ်ပကဖတာဝန်ရှိသူတွေထံက သိရပါတယ်။

အခွန်ကောက်ခံမှုကို ဇွန် ၁၃ ရက်က စတင်ရပ်နားထားပြီး ယခုရက်ပိုင်းအတွင်း လမ်းပိုင်းအသုံးပြုတဲ့ယာဥ်အားလုံး အခွန်ငွေကင်းလွတ်စွာနဲ့ သွားလာနိုင်မှာဖြစ်တယ်လို့ ဆိုပါတယ်။

” မိုးတွေကလည်းဆက်တိုက်ရွာနေတယ်။ စစ်ကြောင်းကလည်း စစ်ကိုင်းဘက်နေလာနေတယ်။ ရွှေဘို-မန္တလေးကားလမ်းကြောကြီးကလည်း ပိတ်နေတယ်။ အုန်းတောကနေ ဒီဘက်ခြမ်းထိပိတ်နေလို့ ရပ်နားထားတယ်။ အခွန်ကိစ္စက အဓိကဝန်ကြီးဌာနကရှင်းရမှာ ခုကကြားကာလဆိုတော့ အဆင်ပြေချောမွေ့ အောင်အောက်ခြေမှာ ညှိနှိုင်းဆောက်ရွက်ထားကြပါတယ်”လို့ ဝက်လက်မြို့နယ်ပကဖတာဝန်ရှိသူတဦးက မြေလတ်အသံကို ပြောပါတယ်။

အခွန်ကောက်ခံမှုကို ယခင်သတ်မှတ်ထားတဲ့ ၁ ပေပါ ၁၅,၀၀၀ ကျပ်နှုန်းကနေ လျှော့ချကောက်ခံသွားမှာဖြစ်ပြီး နှုန်းထားကို သယ်ယူလာတဲ့စက်သုံးဆီအမျိုးအစားပေါ် မူတည်သတ်မှတ်မှာဖြစ်ကာ ပြင်ဆင်ကောက်ခံမယ့်နှုန်းထားကိုတော့ ညှိနှိုင်းနေဆဲဖြစ်တယ်လို့ ဆိုပါတယ်။

အခွန်ပြန်လည်ကောက်ခံမည့်အခြေအနေကိုတော့ ဒေသခံတွေသိရှိအောင် ပြန်လည်အသိပေးသွားမှာဖြစ်တယ်လို့ သိရပါတယ်။

ဝက်လက်မြို့နယ်အတွင်းခရိုင်ချင်းဆက်လမ်းတွေမှာ ဖွင့်လှစ်ထားတဲ့ ရှိန်းမကားတိုက်နယ်ပကဖအဖွဲ့ ဂိတ်တွေက စက်သုံးဆီသယ်ယူတဲ့ကားတွေကို အခွန်အနေနဲ့ ၁ ပေပါ ၁၅,၀၀၀ ကျပ်နှုန်းကောက်ခံတာကြောင့် ဇွန် ၁၁ နဲ့ ၁၂ ရက်တွေမှာ မင်းကုန်းလေးရွာအနီးမှာ စက်သုံးဆီသယ်ဆောင်ရောင်းချနေကြတဲ့ ဝက်လက်ဒေသခံ ၃၀၀ ဝန်းကျင်က ရာနဲ့ချီတဲ့ကားတွေနဲ့ ဆန္ဒထုတ်ဖော်ခဲ့တာပါ။

ဒေသခံတွေဘက်က အခွန်ငွေကို ဆီ ၁ ပေပါ ၅,၀၀၀ ကျပ်နှုန်းသာ လျှော့ချကောက်ခံပေးဖို့ တောင်းဆိုဆန္ဒပြခဲ့တာဖြစ်ပြီး ဒေသအာဏာပိုင်တွေဘက်ကတော့ အဆိုပါနှုန်းထားအထိ လျှော့ချကောက်ခံဖို့အဆင်မပြေဘူးလို့ သိရပါတယ်။

၂၀၂၄ ဒီဇင်ဘာလကစတင်ကာ စစ်ကောင်စီက ဒေသကာကွယ်ရေးအဖွဲ့တွေထိန်းချုပ်ထားတဲ့ စစ်ကိုင်းနဲ့မန္တလေးတိုင်းအတွင်း စက်သုံးဆီသယ်ဆောင်ရောင်းချမှု ကန့်သတ်လိုက်တာကြောင့် ဒေသခံတွေက စက်သုံးဆီတွေကို အဆင်ပြေတဲ့လမ်းကြောင်းကနေသယ်ယူပြီး ကန့်သတ်ခံထားရတဲ့ဒေသတွေကို ပို့ဆောင်ရောင်းချနေကြတာလို့ ဝက်လက်မြို့နယ်ပကဖထံက သိရပါတယ်။

စာတည်း – ဟိန်းစံ

မြေလတ်အသံ၊ ဇွန် ၁၇၊ ၂၀၂၅။

စစ်ကိုင်းတိုင်း၊ မုံရွာမြို့အခြေစိုက် အနောက်မြောက်တိုင်းစစ်ဌာနချုပ် (နမခ) ၁၀၇ မမ ရှော့တိုက်ဒုံး ၃ လုံးနဲ့ ပစ်ခတ်တိုက်ခိုက်ခဲ့တယ်လို့ Brave Warriors for Myanmar BWM အဖွဲ့ဆီက သိရပါတယ်။

ဇွန် ၁၄ ရက် ည ၁၀ နာရီ ၁၀ မိနစ်ခန့်က ပစ်ခတ်တိုက်ခိုက်ခဲ့တာဖြစ်ပြီး ရှော့တိုက်ဒုံး ၃ လုံးဟာ နမခ စစ်ဆင်ရေးရုံး၊ လေ့ကျင့်ရေးရုံးနဲ့ အရာရှိရိပ်သာနေရာတွေကို ကျရောက်ပေါက်ကွဲပြီး အဆောက်အဦတချို့ မီးလောင်ခဲ့တယ်လို့ ဆိုပါတယ်။

” ကျတော်တို့ ရည်ရွယ်ချက်ကတော့ ပြည်သူတွေမလုံခြုံရသလို သူတို့ စစ်ခေါင်းဆောင်တွေလည်း နေ့စဥ်နဲ့အမျှ ထိတ်လန့်နေစေရဖို့ အခုလိုမစ်ရှင်တွေ လုပ်ဖြစ်တာပါ”လို့ BWMအဖွဲ့တာဝန်ရှိသူတဦးက မြေလတ်အသံကို ပြောပါတယ်။

ရှော့ဒုံးကျရောက်ပေါက်ကွဲမှုအတွင်း အရာရှိ ၂ ဦးအပါ စစ်ကောင်စီတပ်ဖွဲ့ဝင် ၅ ဦး နေရာမှာသေဆုံးကာ ၁၀ ဦးကျော် ထိခိုက်ဒဏ်ရာရရှိပြီး ဒဏ်ရာရသူတွေကို စစ်တပ်ဆေးရုံနဲ့ ပြည်သူ့ဆေးရုံကြီးသို့ ပို့ဆောင်ထားတယ်လို့ ဆိုပါတယ်။

” အဲ့နေ့ညက တအုံးအုံးနဲ့ မြို့ပေါ်ကနေကို အသံတွေကြားနေရတာ။ အနောက်မြောက်ဘက်ကနေ အသံကလာတာ။ နမခဘက်ဆီကဘဲလို့တော့ ထင်မိလိုက်သေးတယ်။ ရွာတွေထဲ လှမ်းထုတယ်ထင်တာ။”လို့ မုံရွာမြို့ခံအမျိုးသမီးတဦးက မြေလတ်အသံကို ပြောပါတယ်။

ရှော့တိုက်ဒုံးနဲ့ ပစ်ခတ်ပြီးနောက်မှာတော့ နမခတပ်တွင်းထဲက စစ်ကောင်စီတွေဟာ လက်နက်ကြီးတွေနဲ့ ပြန်လည်ပစ်ခတ်တာတွေလုပ်ဆောင်ခဲ့ပြီး အဆိုပါစစ် ဆင်ရေးကို Brave Warriors for Myanmar (BWM)ရဲ့ဦးဆောင်စီမံမှုနဲ့ မဟာမိတ်အဖွဲတွေဖြစ်တဲ့ Shadow(မုံရွာ)၊ ရွှေတြိဂံမဟာမိတ်တပ်ရင်း၊ Justice Brothers Force အဖွဲ့တို့ ပူးပေါင်းလုပ်ဆောင်ခဲ့တယ်လို့ သိရပါတယ်။

အလားတူ မကွေးတိုင်း၊ မြိုင်မြို့နယ်က ပျူစောထီးအထိုင်ချတပ်စွဲထားတဲ့ ကန်နီရွာရှိ ကင်းမျှော်စင်မှာ ကင်းစောင့်နေတဲ့ ပျူစောထီးတပ်ဖွဲ့ဝင် ၁ ဦးကို ကာ ကွယ်ရေးတပ်ဖွဲ့တွေက စနိုက်ပါနဲ့ပစ်ခတ်ခဲ့ရာ သေဆုံးခဲ့တယ်လို့သိရပါတယ်။

ဇွန် ၁၀ ရက် မနက် ၇ နာရီဝန်းကျင်မှာ ကန်နီရွာအရှေ့ပိုင်းရှိ မီတာ ၄၀ ဝန်းကျင်အမြင့်ရှိ မျှော်စင်ပေါ်ကို ကင်းစောင့်ဖို့တက်သွားတဲ့ ပျူစောထီးကို ပစ်ခတ်ခဲ့တာလို့ ဗစ်တာပျောက်ကျားတပ်ဖွဲ့မှ ကိုဗစ်တာက ပြောပါတယ်။

ကန်နီရွာမှာ ဂျိုးသိမ်းမျှော်စင်ခေါ် မြင့်စင် ၁၇ ခုရှိပြီး အဆိုပါမျှော်စင်တွေအနက် ယခုပစ်ခတ်ခဲ့တဲ့ မျှော်စင်ဟာအမြင့်ဆုံး ဖြစ်တယ်လို့သိရပါတယ်။

ပစ်ခတ်မှုကို ဗစ်တာပျောက်ကျားတပ်ဖွဲ့၊ ပခုက္ကူခရိုင်တပ်ရင်း ၂ တပ်ခွဲ ၂ ၊မုံရွာခရိုင်တပ်ရင်း ၂၅ တပ်ခွဲ ၂ sniper အဖွဲ့၊ အညာမြေပျောက်ကျားတပ်ဖွဲ့မြို့ နယ်(ပကဖ)၊ လျှပ်စီးပျောက်ကြားတပ်ဖွဲ့(မြို့နယ်ပကဖ)မဟာမိတ်အဖွဲ့တို့ ပူးပေါင်းလုပ်ဆောင်ခဲ့တာလို့ သိရပါတယ်။

ဒါ့အပြင် မန္တလေးတိုင်း၊ ငါန်းဇွန်မြို့နယ် မြို့သာရဲစခန်းကနေ ဂိတ်ကြေးကောက်ဖို့ထွက်လာတဲ့ စစ်ကောင်စီတပ်ဖွဲ့ဝင်တွေကို မြို့သာဆေးရုံအနီးမှာ မိုင်းဆွဲတိုက်ခိုက်ခဲ့တယ်လို့ နဂါးနီပြောက်ကျားတပ်ဖွဲ့- မြင်းခြံဆီက သိရပါတယ်။

ဇွန် ၁၆ ရက် မနက် ၅ နာရီ ၅၀ မိနစ်မှာ အင်အား ၂၅ ဦးဝန်းကျင်ရှိ စစ်ကောင်စီတပ်ဖွဲ့ဟာ မြို့သာဆေးရုံအနီး ဂိတ်ချဖို့လုပ်ဆောင်နေစဥ် တိုက်ခိုက်ခဲ့တာလို့ ဆိုပါတယ်။

မိုင်းဆွဲတိုက်ခိုက်မှုကြောင့် စစ်ကောင်စီတပ်ဖွဲ့ဝင် ၃ ဦးသေဆုံးပြီး ၄ ဦးဒဏ်ရာရှိခဲ့ကြောင်း မြေပြင်သတင်းပေးတွေကတဆင့် စုံစမ်းသိရှိရပြီး ဒဏ်ရာရသူတွေကို မြို့သာဆေးရုံကတဆင့် မန္တလေးဆေးရုံကို သယ်ဆောင်သွားတယ်လို့ နဂါးနီပြောက်ကျားတပ်ဖွဲ့-မြင်းခြံတာဝန်ခံက ဆိုပါတယ်။

အထက်ပါ စစ်ကောင်စီတပ်ဖွဲ့တွေ သေဆုံးထိခိုက်မှုနဲ့ပတ်သက်ပြီး မြေလတ်အသံက သီးခြားအတည်မပြုနိုင်ပါဘူး။