မြေလတ်အသံ၊ မတ် ၁၇၊ ၂၀၂၃။

စစ်ကိုင်းတိုင်း၊ ကန့်ဘလူမြို့နယ်၊ ခါးတောက်ရင်းရွာမှာ စစ်ရှောင်နေရလို့ ရွာသားတွေ နေထိုင်ခြင်းမရှိတော့တဲ့ အိမ်တွေကိုဖျက်ပြီး စစ်ကောင်စီတပ်တွေက အထိုင်စခန်းချဖို့ လုပ်ဆောင်နေတယ်လို့ သိရပါတယ်။

ပြီးခဲ့တဲ့မတ်လ ၁၃ ရက်က ယင်းသာရွာနဲ့ ခါးတောက်ရင်းရွာမှာ ပျူစောထီးသင်တန်းဆင်းပွဲ ပြုလုပ်ခဲ့ပြီးနောက် အခုလိုရွာမှာ အထိုင်ချဖို့ လုပ်ဆောင်နေတာ ဖြစ်တယ်လို့ ဆိုပါတယ်။

“ရွာက လူမနေတဲ့အိမ်တွေကိုဖျက်ပြီး အဲ့ရွာမှာ စခန်းချမလို့တဲ့။ သူတို့စခန်းဆောက်ဖို့ ရွာထဲက တအိမ် ၅ သောင်းကောက်တယ်။ မပေးတဲ့အိမ်ဆို ခေါ်ရိုက်တာ။ တပတ်အတွင်းမပေးရင် မိသားစုလိုက်သတ်မယ် ပြောတယ်။ အိမ်ဖျက်တာတောင် သူတို့မဖျက်ဘူး။ ရွာသားတွေကို ခိုင်းတာ။ လစဥ်ငွေကောက်တာ ခံရတော့မယ်ထင်တယ်” လို့ ရွာနီးစပ်ဒေသခံတဦးက ပြောပါတယ်။

အခုလက်ရှိအချိန်ထိ စစ်သားနဲ့ပျူစောထီးအဖွဲ့တွေဟာ မှော်တော်ရွာနဲ့ ကိုင်းရိုးရွာဘက်မှာ နေထိုင်နေပြီး ခါးထောက်ရင်းရွာကို ထပ်မံတပ်စွဲဖို့ လုပ်နေကြတာဖြစ်သလို မှော်တော်ရွာအနီးက ကျေးရွာတွေကိုလည်း ချိန်းခြောက်ပြီး မီးကြေးကောက်ခံတာတွေ လုပ်လေ့ရှိတယ်လို့ ဆိုပါတယ်။

ကန့်ဘလူနဲ့ ကျွန်းလှနယ်တွေမှာရှိတဲ့ ကျေးရွာတွေကို ပျူစောထီးခေါင်းဆောင်ဖြစ်တဲ့ ဘုန်းကြီးဝါသဝက ဦးဆောင်ကာ ပျူစောထီးသင်တန်းတက်ခိုင်းတာတွေ၊ ရွာတွေမှာ အထိုင်ချတပ်စွဲတာတွေလည်း လုပ်လေ့ရှိပြီး ကန့်ဘလူနယ်ထဲက ကျေးရွာ ၄၀ ကျော်မှာလည်း ပျူစခန်းတွေ ဖွင့်လှစ်ထားတယ်လို့ သိရပါတယ်။

ပုံစာ – ယင်းသာရွာနဲ့ ခါးတောက်ရင်းရွာမှာ မတ်လ ၁၃ ရက်က ပြုလုပ်ခဲ့သည့် ပျူသင်တန်းဆင်းပွဲ။

စာတည်း – လင်း

ရွှေဘို၊ မတ် ၁၆၊ ၂၀၂၃။

စစ်ကိုင်းတိုင်း၊ ရွှေဘိုမြို့နယ်၊ ညောင်းကိုင်းကျေးရွာက ထွက်လာတဲ့ ပျူစောထီးကားကို ဒေသခံကာကွယ်ရေးတပ်တွေက မိုင်းဆွဲတိုက်ခိုက်ခဲ့ရာ ပျူစောထီး ၂ ဦး သေဆုံးခဲ့တယ်လို့ သိရပါတယ်။

ပျူစောထီး ၄ ဦး လိုက်ပါလာတဲ့ကားကို မတ်လ ၁၄ ရက်မနက် ၁၀ နာရီလောက်မှာ ဂျူးမြေဇင်း၊ ထန်းနှောင်းကိုင်းနဲ့ မြို့လှရွာ လမ်းဆုံမှာ တိုက်ခိုက်ခဲ့တာလို့ ဗိုလ်ကျားရိုင်း – ရွှေဘို (LPDF) အဖွဲ့ဆီက သိရပါတယ်။

“၂ ကောင်သေတာ။ ဒီပတ်ချာလည်ရွာတွေမှာ ပြည်သူပိုင်နေအိမ်တွေဆိုလည်း ခိုးဆိုးလုနှိုက်နေတာ၊ ဒီနားနယ်တဝိုက်ကတော့ သူတို့အဆိုးဆုံးပဲ။ စစ်ကြောင်းတွေဆိုလည်း သူတို့လှမ်းလှမ်းခေါ်တာပဲ။ မိုင်းက ပဒေသာ ၃ လုံးကွဲတာ” လို့ ပြောပါတယ်။

မိုင်းဆွဲခံရပြီးနောက် သေဆုံးပျူစောထီး ၂ ဦးရဲ့အလောင်းကို မိုင်းဆွဲတဲ့နေရာအနီးက ကြက်ခြံထဲမှာ မီးရှို့ထားခဲ့တယ်လို့လည်း သိရပါတယ်။

ဒီတိုက်ခိုက်မှုကို ဗိုလ်ကျားရိုင်း-ရွှေဘို (LPDF)၊ မတစ်ထောင်-တစ်ကောင်ဘွား (ဒီပဲယင်း)၊ ဗိုလ်ဂျပန်ကြီး (T.T.T) – SHWEBO (LPDF) အဖွဲ့၊ တောင်သူကြီးများအဖွဲ့ -LDF နဲ့ ရွှေဘိုမြို့နယ် တိုက်နယ် -၂ မဟာမိတ်အင်အားစုတွေက ပူးပေါင်းတိုက်ခိုက်ခဲ့တာလို့ သိရပါတယ်။

ပြီးခဲ့တဲ့ မတ်လ ၅ ရက်ကလည်း ညောင်ကိုင်းရွာက ပြန်လာတဲ့ ပျူနဲ့စစ်သားတွေကို ဗိုလ်ကျားရိုင်း – ရွှေဘို(LPDF)အဖွဲ့က ဂျိုးမြေဇင်းနဲ့ မြို့လှရွာအကြားမှာ မိုင်းဆွဲတိုက်ခိုက်ခဲ့ရာ တပ်ကြပ်တဦး ခြေ‌ထောက်ပြတ်ပြီး ပျူစောထီးတဦး သေဆုံးခဲ့ပါသေးတယ်။

စာတည်း – လင်း

စစ်ကိုင်း၊ ဇွန် ၁၈၊ ၂၀၂၃။

စစ်ကိုင်းတိုင်း၊ မုံရွာခရိုင်၊ အရာတော်မြို့နယ်ထဲက ပျက်စီးနေတဲ့ကျေးလက်လမ်းပိုင်းတချို့ကို အရာတော်မြို့နယ် ပြည်သူ့ကာကွယ်ရေးအဖွဲ့ – နဂါးနီတပ်ခွဲ တပ်ဖွဲ့ဝင်တွေက ဒေသခံတွေနဲ့အတူ ကူညီပြုပြင်ပေးခဲ့တယ်လို့ အဲ့ဒီအဖွဲ့ဆီက သိရပါတယ်။

ဇွန်လ ၁၇ ရက် မနေ့ကမနက်ပိုင်းမှာ အရာတော်မြို့နဲ့ကျေးရွာ ၅ ရွာကို ဆက်သွယ်ထားတဲ့ လမ်းပိုင်းနေရာတွေမှာ မိုးရွာတာများပြီး ဒေသခံတွေသွားလာရတာ ခက်ခဲနေလို့ ရဲဘော် အင်အား ၂၀ ကျော်က သွားရောက်ပြုပြင်ပေးခဲ့တာလို့ သိရပါတယ်။

“လမ်းက ချိုင့်ခွက်တွေ မြောင်းတွေလိုဖြစ်နေတော့ သွားလာရတာခက်ခဲနေတယ်။ ယာဥ်အန္တရာယ် ဖြစ်မှာစိုးတာနဲ့ ကျေးလက်နေပြည်သူတွေ အဆင်ပြေဖို့ ကူညီလုပ်ကိုင်ရတာပါ”လို့ အရာတော်မြို့နယ် ပြည်သူ့ကာကွယ်ရေးအဖွဲ့ နဂါးနီတပ်ခွဲမှ သတင်းတာဝန်ခံက မြေလတ်အသံကို ပြောပါတယ်။

နဂါးနီတပ်ခွဲဟာ ပြည်သူကိုအခြေပြုထားတဲ့အဖွဲ့ဖြစ်သလို ပြည်သူကို စည်းရုံးရင်းနဲ့ တိုက်ပွဲဝင်မှ အောင်နိုင်မယ်လို့ ခံယူထားတဲ့အတွက် ပြည်သူတွေရဲ့အခက်အခဲကို ကူညီဆောင်ရွက်ပေးရတာ ဖြစ်တယ်လို့ သူကဆက်ပြောပါတယ်။

ပြီးခဲ့တဲ့ ဖေဖော်ဝါရီလ ၁၉ ရက်နေ့ကလည်း နဂါးနီပြည်သူ့ကာကွယ်ရေးတပ်ဖွဲ့ အနေနဲ့ ရွှေဘိုမြို့နယ်က စစ်ရှောင်ပြည်သူတွေကို စားနပ်ရိက္ခာတွေ ကူညီထောက်ပံ့ပေးခဲ့တယ်လို့ သိရပါတယ်။

အဲ့ဒီအဖွဲ့ဟာ ပြည်သူအကျိုးပြုလုပ်ငန်းတွေလုပ်ကိုင်ရာမှာ လမ်းတံတားပြင်ရုံသာမက ရပ်ရွာလုံခြုံရေးနဲ့ စစ်ဘေးရှောင်တွေကို ကူညီပံပိုးတာတွေလည်း လုပ်ကိုင်နေပြီး၊ စစ်ကောင်စီကို တိုက်ခိုက်ဖို့အတွက် လက်နက်ကြီးတချို့ကိုပါ ထုတ်လုပ်တာတွေလုပ်နေတယ်လို့ သိရပါတယ်။

စာတည်း – လင်း

စစ်ကိုင်း၊ ဇွန် ၁၈၊ ၂၀၂၃။

စစ်ကိုင်းတိုင်း၊ ဝက်လက်မြို့နယ်အတွင်းမှာ စစ်ကောင်စီတပ်သားတွေက အကြောင်းမဲ့ လက်နက်ကြီး၊ လက်နက်ငယ်တွေနဲ့ ပစ်ခတ်လို့ ဇွန်လ ၁၆ ရက် တရက်တည်းမှာတင် စစ်ကောင်စီလက်အောက်ခံ ကျေးရွာအုပ်ချုပ်ရေးမှူးရဲ့ သားဖြစ်သူအပါ ၂ ဦး သေဆုံးခဲ့တယ် လို့ ဝက်လက် ပကဖအဖွဲ့ဆီက သိရပါတယ်။

၁၆ ရက်မနက်ပိုင်းက ဝက်လက်မြို့အနောက်ဘက်၊ မူးဆည်ဘောင်အနီး တပ်စွဲထားတဲ့ စစ်ကောင်စီတပ်က လက်နက်ငယ်တွေနဲ့ ပစ်ခတ်တာကြောင့် သခွတ္တောရွာမမှာ နေထိုင်တဲ့ အသက် ၃၃ နှစ်အရွယ် ကိုရဲမော် ကျည်ထိမှန်သေဆုံးခဲ့ပြီး၊ ညနေပိုင်းမှာတော့ လှတောရွာဘက်ကနေ ပစ်လိုက်တဲ့ လက်နက်ကြီးကျည်က အသက် ၂၃ နှစ်အရွယ် ကိုထက်ဝေစိုးကို ထိမှန်သေဆုံးခဲ့တာလည်း ဖြစ်ပါတယ်။

“နှစ်ဦးစလုံးက နှမ်းခင်းထဲ အလုပ်လုပ်နေရင်း စစ်တပ်က ရမ်းပစ်တဲ့ကျည်နဲ့ သေဆုံးရတာ။ ကိုရဲမော်က နေရာတင်သေတာ၊ ထက်ဝေစိုးက ည ၁၂ နာရီလောက်မှာသေတာ”လို့ ဒေသခံတဦးက ပြောပါတယ်။

သူတို့ ၂ ဦးဟာ သခွတ္တောရွာမှာ နေထိုင်သူတွေဖြစ်ကာ ကိုရဲမော်က ရွာအနောက်ဘက်ရှိ နှမ်းခင်းမှာ ကျည်ထိမှန်ခဲ့တာဖြစ်ပြိး ကိုထက်ဝေစိုးကတော့ ရွာတောင်ဘက်ရှိ နှမ်းခမ်းတခုမှာ ရှိနေချိန် ကျည်ထိမှန်ခဲ့တာလို့ သိရပါတယ်။

ကိုထက်ဝေစိုးရဲ့ ဖခင်က သခွတ္တောရွာ အုပ်ချုပ်ရေးမှူးဖြစ်ပြီး လက်ရှိရွာမှာမနေဘဲ ဝက်လက်မြို့ပေါ်က ဝန်ထမ်းအိမ်ရာတခုမှာ နေထိုင်နေတာလို့လည်း အထက်ပါဒေသခံက ဆက်ပြောပါတယ်။

ဇွန်လ ၁၇ ရက် မနေ့ကမနက် ၉ နာရီမှာ ကိုရဲမော်ရဲ့အလောင်းကို မြေမြှုပ်သဂြိုဟ်ပြီး ၁၁ နာရီလောက်မှာတော့ ကိုထက်ဝေစိုးရဲ့အလောင်းကို မီးသဂြိုဟ်ခဲ့တယ်လို့ သိရပါတယ်။

ပြီးခဲ့တဲ့နှစ် ဇွန်လဝန်းကျင်ကလည်း သခွတ္တောရွာတောင်ပိုင်းက နေအိမ် ၂၀ ကိုစစ်တပ်ကမီးရှို့လို့ ပြာကျပျက်စီးခဲ့ရပါသေးတယ်။

စာတည်း – လင်း

စစ်ကိုင်း၊ ဇွန် ၁၇၊ ၂၀၂၃။

စစ်ကိုင်းတိုင်း၊ စစ်ကိုင်းမြို့နယ်၊ ကျီကုန်းရွာက နေအိမ်တွေကို စစ်ကောင်စီတပ်က ဇွန်လ ၁၇ ရက် ဒီနေ့ မနက် ၇ နာရီခွဲလောက်မှာ ဝင်ရောက်မီးရှို့သွားတယ်လို့ ဒေသခံတွေဆီက သိရပါတယ်။

အင်အား ၁၀၀ နီးပါးရှိ စစ်ကောင်စီစစ်ကြောင်းဟာ ပေါက်မရွာကနေတဆင့် ကျီကုန်းရွာထဲကို သေနတ်ပစ်ဖောက် ဝင်ရောက်လာပြီး လူနေအိမ် ၉ လုံးကို မီးရှို့ဖျက်ဆီးသွားတာလို့ ဆိုပါတယ်။

ကျီကုန်းရွာကို မီးဝင်ရှို့ပြီး မနက် ၁၀ နာရီလောက်မှာ တမိုင်လောက်ဝေးတဲ့ကန်တော်ရိုးရွာထဲကို ထပ်ဝင်ပြီး မီးရှို့တယ်။ သူတို့ကန်တော်ရိုးဘက် ထွက်သွားတော့မှ ရွာထဲကို ပြန်ဝင်လာပြီး မီးငြှိမ်းရတာ” လို့ Local PDF တပ်ဖွဲ့က အမေ့သား (စစ်ကိုင်း)ခေါင်းဆောင် ကိုဘိုလေး က ပြောပါတယ်။

ဒါ့အပြင် အဲ့ဒီစစ်ကြောင်းက ဓားစာခံအဖြစ်ဖမ်းဆီးလာတဲ့ အသက် ၃၅ နှစ်ဝန်းကျင်အရွယ် အမျိုးသားတဦးကိုလည်း ကျီကုန်းရွာအတွင်းမှာ လည်လှီးသတ်သွားတယ်လို့ ဆိုပါတယ်။

“သူတို့ (စစ်ကောင်စီ) လမ်းပြဓားစားခံအဖြစ်ဖမ်းလာတဲ့သူကိုလည်း သတ်သွားတယ်။ ဘယ်သူဘယ်ဝါလဲ ဆိုတာတော့ ကျနော်တို့ စုံစမ်းနေတုန်းပါ” လို့ သူကဆက်ပြောပါတယ်။

လက်ရှိမှာ အဲ့ဒီစစ်ကောင်စီစစ်ကြောင်းဟာ ကန်တော်ရွာအတွင်းဝင်ရောက်နေဆဲဖြစ်လို့ ဒေသခံတွေလည်း နီးစပ်ရာကိုထွက်ပြေးတိမ်းရှောင်နေရကာ ကန်တော်ရွာ မီးရှို့ခံရမှုအရေအတွက် များနိုင်တယ်လို့ သိရပါတယ်။

စစ်ကောင်စီတပ်ဟာ စစ်ကိုင်းမြို့နယ်၊ ဆားတောင်တိုက်နယ်အတွင်းက ကျေးရွာတွေကို ဇွန်လ ၁၃ ရက်နေ့ကစတင်လို့ ဝင်ရောက်မီးရှို့နေတာဖြစ်ပြီး သာဇင်ရွာက နေအိမ် ၇၀၀ ကျော် မီးလောင်ပျက်စီးခဲ့ကာ အခြားကျေးရွာ ၃ ရွာထက်မနည်းကိုလည်း ဆက်လက်မီးရှို့ခဲ့တယ်လို့ သိရတယ်။

စာတည်း − ရင်ငြိမ်း

စစ်ကိုင်း၊ ဇွန် ၁၇၊ ၂၀၂၃။

စစ်ကိုင်းတိုင်း၊ မုံရွာမြို့နယ်ထဲက ကျေးရွာတနေရာမှာ ဒီနေ့ မနက်က အသက် ၈၀ ဝန်းကျင် အမေတွေဦးဆောင်ပြီး “ဗေဒါပျံ အံကိုခဲ ပန်းပန်လျက်ပဲ” ဘန်နာကိုင်စွဲကာ ပန်းသပိတ်ပြုလုပ်ခဲ့ကြတယ်လို့ သပိတ်အဖွဲ့ဝင်တွေဆီက သိရပါတယ်။

“ထူးခြားတာက ဒီသပိတ်က အမေတွေချည်းပဲ ပြုလုပ်တဲ့ သပိတ်ဖြစ်တယ်။ အမျိုးသမီးကြီးတွေ အသက် ၆၀၊ ၇၀၊ ၈၀ ဒီအရွယ် အမေတွေချည်းပဲ ပါဝင်ပြီး ပြုလုပ်ခြင်းဖြစ်တယ်။”လို့ မုံရွာလူထုသပိတ်တိုက်ပွဲ ဦးဆောင်ကော်မတီ အဖွဲ့ဝင် မချောစုစံက ပြောပါတယ်။

အဲ့ဒီ ပန်းသပိတ်ကို မုံရွာလူထုသပိတ်တိုက်ပွဲ ဦးဆောင်ကော်မတီ၊ မုံရွာတက္ကသိုလ်ကျောင်းသားများ သမဂ္ဂ၊ အမျိုးသမီးမဟာမိတ်အင်အားစုတို့လည်း ပူးပေါင်း ဝန်းရံခဲ့ကြပါတယ်။

ဒါ့အပြင် သပိတ်အင်အားစုတွေကလည်း ဇွန်လ ၁၉ရက်နေ့မှာ ကျရောက်မယ့် နိုင်ငံတော် အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ရဲ့ ၇၈နှစ်ပြည့်မွေးနေ့မှာ ပန်းသပိတ်ပြုလုပ်ဖို့ တနိုင်ငံလုံးက ပြည်သူတွေကိုလည်း နှိုးဆော်ထားပါသေးတယ်။