စစ်ကိုင်း

စစ်ကိုင်း၊ ဧပြီ ၁၀၊ ၂၀၂၃။

စစ်ကိုင်းတိုင်း၊ ကျွန်းလှမြို့ပေါ်ရှိ စစ်သားနဲ့ ပျူစောထီးအဖွဲ့တွေက အမျိုးသား ၂ ဦးစီး ဆိုင်ကယ်တွေကို ဖမ်းဆီးပြီး၊ ရိုက်နှက်ငွေတောင်းတာတွေကို လုပ်နေတယ်လို့ သိရပါတယ်။

ဧပြီလ ၉ ရက် မနေ့ကမနက်ပိုင်းမှာစတင်ကာ ဖမ်းဆီးနေတာဖြစ်ပြီး၊ ကျွန်းလှမြို့အနီး ကျေးရွာတွေကနေ ကျွန်းလှမြို့ပေါ်ကို လာသူအများစု ဖမ်းဆီးခံခဲ့ရတယ်လို့ ကျွန်းလှတက်ကြွလှုပ်ရှားသူများအဖွဲ့မှ တာဝန်ရှိသူက ပြောပါတယ်။

“ဒီနေ့ (ဧပြီ ၁၀)မနက်တော့ အဖမ်းခံရတဲ့ အနီးအနားဝန်းကျင်ရွာက လူတွေအများကြီးလို့ လှမ်းပြောကြတယ်။ မြို့ပေါ်လူထုအနေနဲ့လည်း ဖုန်းလက်ခံပြောဖို့ကို လန့်နေကြတာဆိုတော့ အသေးစိတ်မေးဖို့ မရဘူး” လို့ ဆိုပါတယ်။

စစ်သားနဲ့ ပျူစောထီးတွေက မြို့ပေါ်မှာ နေရာခွဲ၊ ဂိတ်ချပြီး ဖမ်းဆီးစစ်ဆေးနေတာလို့ အထက်ပါတာဝန်ခံက ဆက်ပြောပါတယ်။

“ဂိတ်တွေက မြို့ရဲ့မြောက်အဝင်မှာ တဂိတ်၊ မြို့အနောက် သစ်ရာမြိုင်စျေးအနီးမှာ တဂိတ်၊ တောင်ဘက်မြို့အဝင်မှာ တဂိတ် ပေါင်းသုံးခုရှိတယ်လို့ သိရတယ်။ မနေ့ကတော့ ဒီဂိတ်တွေအပြင် ဘူတာကြီးရှေ့မှာကော တဂိတ်ချထားတယ်လို့ သိရတယ်” လို့ ဆိုပါတယ်။

ဖမ်းဆီးရမိထားတဲ့ ဆိုင်ကယ်တွေကို အပိုင်သိမ်းပြီး၊ ဆိုင်ကယ်မောင်းနှင်သူနဲ့ လိုက်ပါလာသူ‌‌တွေကို ငွေနဲ့ ပြန်လည်ရွေးယူခိုင်းတဲ့အပြင် ရိုက်နှက်စစ်ဆေးမှုတွေကိုပါ ပြုလုပ်နေတာလို့ သိရပါတယ်။

ကျွန်းလှမြို့ပေါ်မှာ စစ်ကောင်စီလက်အောက်ခံ ရုံးနဲ့ ကင်းစခန်းတွေ တိုက်ခိုက်ခံရပြီးနောက် အခုလို အမျိုးသားတဦးထက်ပိုပြီး ဆိုင်ကယ်မစီးရအမိန့်ကို ထုတ်ပြန်လိုက်တာလို့လည်း ဆိုပါတယ်။

ပြီးခဲ့တဲ့နှစ် နိုဝင်ဘာလကလည်း ကျွန်းလှမြို့ပေါ်မှာ အမျိုးသားဆိုရင် တဦးထက်ပိုပြီး ဆိုင်ကယ်စီးနင်းခွင့်မရှိ‌ဟုဆိုပြီး စစ်ကောင်စီလက်အောက်ခံ ကျွန်းလှမြို့နယ် အထွေထွေ အုပ်ချုပ်ရေးဦးစီးဌာနက အမိန့်ထုတ်ပြန်ခဲ့ပြီးနောက် ခုလိုဖမ်းဆီးမှုမျိုးကို ရက်ပိုင်းသာ လုပ်ဆောင်ခဲ့သေးတယ်လို့ သိရပါတယ်။

စာတည်း – လင်း

စစ်ကိုင်း၊ ဧပြီ ၉၊ ၂၀၂၃။

စစ်ကိုင်းတိုင်း၊ စစ်ကိုင်းမြို့နယ်၊ ထီးဆောင်း-အရာတော်လမ်းပိုင်း၊ ထီးဆောင်းရွာမြောက်ဘက်၊ နောင်ကြီးအိုင်လမ်းပေါ်မှာ ဧပြီလ ၉ ရက် ဒီကနေ့မနက် ၉ နာရီခွဲခန့်က လမ်းသွားလမ်းလာအမျိုးသမီး ၂ ဦး ပစ္စည်းလုယက်ခံခဲ့ရတယ်လို့ ဒေသခံတွေဆီက သိရပါတယ်။

တပ်မ ၃၃ လက်အောက်ခံ စစ်ကောင်စီတပ်သားတွေတပ်စွဲထားတဲ့ ထီးဆောင်းရွာအနီးမှာ လုယက်ခံခဲ့ရတာဖြစ်ပြီး လုယက်မှု ကျူးလွန်သူတွေဟာလည်း အဲ့ဒီတပ်မ ၃၃ စစ်ကောင်စီတပ်သားတွေလို့ ဒေသခံတဦးက မြေလတ်အသံကို ပြောပါတယ်။

“ထီးဆောင်းမှာ တပ်စွဲထားတဲ့ကောင်တွေလုပ်တာပါ၊ လုခံရတဲ့နေရာနဲ့သူတို့နဲ့ ၄ ဖာလုံ လောက်ဘဲဝေးတယ်။ ဧရိယာကလည်း သူတို့ကျင်လည်နေတဲ့ ဧရိယာပါ။ သူတို့တပ်တွေအင်အားလာဖြည့်လို့ လူတွေများတယ်ဆိုပေမယ့် အနေကြာတဲ့စစ်သားတွေကို ရွာခံတွေကသူတို့ကိုမျက်မှန်းတန်းမိနေပြီးသားပါ” လို့ ပြောပါတယ်။

အဲ့ဒီ အမျိုးသမီး ၂ ဦးကို အရပ်ဝတ် ဝတ်ဆင်ထားတဲ့အမျိုးသားတွေက ဓားထောက်လုယက်ခဲ့တာဖြစ်ပြီး လုယက်ခံရတဲ့နေရာအနီးမှာလည်း စစ်ကောင်စီတပ်ထုတ် MA – 3 သေနတ်တွေကို ကိုင်ဆောင်ထားသူတွေက အခြေအနေစောင့်ကြည့်ပေးနေတယ်လို့ ဆိုပါတယ်။

“လုတဲ့ကောင်တွေက ဓားထောက်လုတာ၊ ဘေးနားမှာ စစ်တပ်သုံး MA 3 သေနတ်တွေကိုင်ထားတဲ့ ကောင်တွေကလည်းစောင့်ပေးနေတာ၊ အကုန်လုံးအရပ်ဝတ်တွေနဲ့။ ပြီးရင် PDF လုပ်ပါတယ်ဆိုပြီး ဝါဒဖြန့်ဖို့ထင်တယ်” လို့ သူက ဆက်ပြောပါတယ်။

လုယက်မှုကျူးလွန်သူတွေဟာ စစ်ကောင်စီတပ်သားတွေလို့ ဒေသခံတွေကပြောဆိုပေမယ့် မြေလတ်အသံအနေနဲ့ သီးခြားအတည်ပြုနိုင်တာမျိုး မရှိသေးပါဘူး။

လုယက်ခံရတာကြောင့် လမ်းသွားလမ်းလာ အမျိုးသမီး ၂ ဦးဆီကနေ ဟန်းချိန်း နဲ့ လက်စွပ်တွေအပါ စုစုပေါင်း ရွှေ ၁ ကျပ်သားခန့်နဲ့ ငွေသား ၁ သိန်းကျပ် ပါသွားတယ်လို့ သိရပါတယ်။

အဲ့ဒီထီးဆောင်း-အရာတော်လမ်းပိုင်းမှာ စစ်ကောင်စီတပ်သားတွေဟာ လမ်းသွားလမ်းလာတွေကို စစ်ဆေးရေးအကြောင်းပြ ငွေတောင်းခံတာတွေ လုပ်ဆောင်ပေမယ့် အခုလိုလုယက်တာကတော့ ပထမဆုံးဖြစ်တယ်လို့ ဒေသခံတွေက ပြောပါတယ်။

စစ်ကောင်စီ စစ်ကိုင်းမြို့နယ်စီမံအုပ်ချုပ်ရေးမှူးဟာ ဦးကျော်စွာမောင်စိုးဆိုသူ ဖြစ်ပြီး စစ်တက္ကသိုလ် DSA အပတ်စဉ် ၄၆ ဆင်းသူဖြစ်ကာ ဗိုလ်မှူးအဆင့်ကနေ မြို့နယ်စီမံအုပ်ချုပ်ရေးမှူးဖြစ်လာသူဖြစ်တယ်လို့ သိရပါတယ်။

မြေလတ်အသံ၊ ဧပြီ ၈၊ ၂၀၂၃။

စစ်ကောင်စီနဲ့ သူတို့အပေါင်းအပါတွေ ပြုလုပ်မယ့် သင်္ကြန်မဏ္ဍပ်တွေကိုတိုက်ခိုက်ဖို့ ဘယ်တော်လှန်ရေးအဖွဲ့ကိုမဆို လက်နက်ခဲယမ်းထောက်ပံပေးမယ်လို့ စစ်ကိုင်းတိုင်းအခြေစိုက် ဝရဇိန်လက်နက်ထုတ်လုပ်ရေးနဲ့ ပြုပြင်ရေးအဖွဲ့ တာဝန်ရှိသူကပြောပါတယ်။

စစ်ကောင်စီဘက်က ပြုလုပ်မယ့်သင်္ကြန်ပွဲကို လက်မခံတာကြောင့် ရတဲ့နည်းလမ်းနဲ့ တိုက်ခိုက်သွားမှာဖြစ်သလို တိုက်ခိုက်ရာမှာလည်း ပြည်သူတွေမထိခိုက်စေမယ့် နည်းလမ်းနဲ့လုပ်လိုတဲ့ ဘယ်အဖွဲ့အစည်းကိုမဆို လက်နက်ခဲယမ်းထောက်ပံပေးဖို့ စီစဥ်ရတာ ဖြစ်တယ်လို့ ဆိုပါတယ်။

“ကျနော်တို့ဘက်ကတော့ စကစ လုပ်မယ့် သင်္ကြန်ကို ဘယ်နည်းနဲ့မှ လက်မခံနိုင်ဘူး။ ဒါကြောင့် မရရတဲ့နည်းနဲ့ဖျက်မှာဘဲ။ သူတို့ကတော့ တိုင်းပြည်ဘာမှမဖြစ်တဲ့ ပုံစံနဲ့ ပျော်ပါးပြမှာလေ။ စကစ ကို တိုက်ခိုက်နေတဲ့ ဘယ်အဖွဲ့ကိုမဆို ငှားရမ်းထုတ်ပေးသွားမှာ။ ဘယ်တိုင်းဘယ်ဒေသဆိုပြီး မသတ်မှတ်ထားဘူး၊ ထုတ်ပေးတဲ့ လက်နက်တွေကိုလည်း ကာလတခုပြီးရင် ပြန်အပ်ရမှာပါ။ ကျည်ကလည်း မရှိတဲ့အဖွဲ့ဆိုရင် ထိုက်သင့်သလောက် ကျည်တွေပါထုတ်ပေးမှာပါ”လို့ ပြောပါတယ်။

ပြည်သူတွေအနေနဲ့ ပါဝင်ဆင်နွှဲတာမလုပ်ဘဲ စစ်ကောင်စီအပါအဝင် သူတို့နဲ့ပတ်သက်သူတွေ ပြုလုပ်ထားတဲ့ သင်္ကြန်မဏ္ဍပ်တွေနဲ့ ဝေးဝေးနေဖို့ လိုတယ်လို့ ဆိုပါတယ်။

လက်နက်ထုတ်ပေးရမှာလည်း တပ်ဖွဲ့ကထုတ်ပြန်ထားတဲ့ လက်နက်ဌားရမ်းခြင်း စည်းကမ်းတွေကို လိုက်နာရမှာဖြစ်ပြီး၊ အဓိက ပြည်သူတွေထိခိုက်အောင် မလုပ်ဖို့ တင်းကြပ်တားမြစ်ထားတယ်လို့ သိရပါတယ်။

ဒါ့အပြင် ခုလိုလက်နက်တွေ ငှားရမ်းထုတ်ပေးမှာနဲ့ ပက်သက်ပြီး မုံရွာအခြေစိုက် PDF အဖွဲ့တဖွဲ့မှ အဖွဲ့ဝင်တဦးကလည်း ခုလိုပြောပါတယ်။

“ကျနော်တို့ဘက်ကည်း ဒီသင်္ကြန်ကာလမှာ စကစ လုပ်တဲ့ သင်္ကြန်ပွဲတော်ကို ရတဲ့နည်းနဲ့တိုက်ခိုက်ဖို့ အဖွဲ့ပေါင်း ၂၀ လောက်ပါတဲ့ မဟာမိတ်အဖွဲ့ကို ဖွဲ့စည်းနေတယ်။ အချို့အဖွဲတွေမှာ လက်နက်လိုအပ်ချက်တွေရှိနေတာရှိတော့ ထောက်ပံပေးမယ်ဆိုတာက ကောင်းပါတယ်။ ဒါပေမယ့် ဘယ်လိုမူဝါဒနဲ့ပေးမှာလဲ၊ လာငှားတဲ့ အဖွဲ့များရင်လဲ သူတို့ဘက်က ထုတ်ပေးနိုင်မယ့် အခြေနေရှိမလားဆိုတာကတော့ ကြည့်ရဦးမယ်”လို့ ဆိုပါတယ်။

စစ်ကောင်စီကို တိုက်လိုတဲ့အဖွဲ့တွေကို စနိုက်ပါအပါအဝင် လက်နက်ငယ်တွေနဲ့ ခဲယမ်းတွေကို ဌားရမ်းထုတ်ပေးသွားမှာဖြစ်ပြီး၊ ထုတ်လုပ်ထားတဲ့ လက်နက်တွေထဲကနေ အချိုးချ ခွဲဝေပေးသွားမှာဖြစ်တယ်လို့ သိရပါတယ်။

ဟုမ္မလင်း၊ ဧပြီ ၈၊ ၂၀၂၃။

စစ်ကိုင်းတိုင်း၊ ဟုမ္မလင်းမြို့နယ် သပိတ်ခေါင်းဆောင်အပါအဝင် နိုင်ငံရေးတက်ကြွလှုပ်ရှားသူ ၉ ဦးကို စစ်ကောင်စီက နှစ်ရှည်ထောင်ဒဏ်တွေ ချမှတ်ခဲ့ပြီး ရှမ်းနီအဆိုတော်တဦးလည်း ပါဝင်တယ်လို့ သိရပါတယ်။

ဧပြီလ ၇ ရက်နေ့က ဟုမ္မလင်းမြို့နယ်တရားရုံးကနေ အမိန့်ချမှတ်ခဲ့တာဖြစ်ပြီး ဖမ်းဆီးခံရတာ တနှစ်နီးပါးကြာမှ ထောင်ဒဏ်တွေ ချမှတ်ခံရတာ ဖြစ်တယ်လို့ ဆိုပါတယ်။

“သူတို့ကို စဖမ်းတည်းက၂၂၂ စစ်တပ်ထောင်နဲ့ ဟုမ္မလင်း မြို့မရဲစခန်းမှာ ထားတယ်၊ လိုသလိုပေါ့။ တပ်က စစ်ချင်ရင် တပ်ကိုခေါ်သွားတယ်။ ရဲက စစ်ချင်ရင် ရဲဆီခေါ်လာပြန်တယ်။ အဲ့လို လုံးချာလိုက်နေတာပဲ။ အခုအမိန့်ချပြီဆိုတော့ ခန္တီးထောင်ပို့မယ် ထင်တယ်” လို့ ဟုမ္မလင်း ဒေသခံတဦးက ပြောပါတယ်။

ဟုမ္မလင်းသပိတ်ခေါင်းဆောင်ဖြစ်တဲ့ ကိုကျော်ဝင်းစိန်ကို ထောင်ဒဏ် ၁၁ နှစ်နဲ့ ၆လ၊ ရှမ်းနီအဆိုတော်တဦးဖြစ်တဲ့ ကိုစိုင်းဝေယံကို ၁၃ နှစ်၊ CDM ကျောင်းဆရာမ ဒေါ်နွဲ့နွဲ့အောင်၊ အမေ့အိမ် စာသင်ကျောင်းက ကိုသက်ထွန်းဦး၊ ကိုအောင်ဟိန်းနဲ့ ကိုအောင်ကိုမင်းတို့ကို ၁၀ နှစ် အသီးသီးချမှတ်ခဲ့ပြီး၊ အကြမ်းဖက်အားပေးမှုအဖြစ် နေနော်နဲ့ ဖြိုးသက်တင်ကို ၅ နှစ်၊ ကိုအောင်မြင့်ဦးကို ၃ နှစ် အသီးသီးချမှတ်ခဲ့ပါတယ်။

ရှမ်းနီအဆိုတော်တဦးဖြစ်တဲ့ ကိုစိုင်းဝေယံအောင်ဟာ အခုလက်ရှိ စစ်ကောင်စီလက်အောက်မှာ တိုင်းရင်းသားရေးရာဝန်ကြီးအဖြစ် လုပ်နေတဲ့ စိုင်းနိုင်နိုင်ကျော်အတွက် ရှမ်းနီမြေမှာ ရှမ်းနီနိုင်ရမည် မဲဆွယ်သီချင်းကို အာဏာမသိမ်းခင်က သီဆိုပေးခဲ့ဖူးသူဖြစ်ပြီး၊ စစ်ကောင်စီဘက်ပါသွားချိန်မှာ ဆဲဆိုမိလို့ အဖမ်းခံခဲ့ရတာဖြစ်ပြီး အခုလက်ရှိ နှစ်ရှည်ထောင်ဒဏ်ပါ ချမှတ်ခံခဲ့ရတာ ဖြစ်ပါတယ်။

ဟုမ္မလင်းသပိတ်ခေါင်းဆောင် ကိုကျော်ဝင်းနိုင်ကလည်း ပြီးခဲ့တဲ့နှစ် ဩဂုတ်လတုန်းက မန္တလေးမှာ ဆေးကုသနေချိန် ဖမ်းဆီးခံခဲ့ရတာဖြစ်ပြီး အခုလက်ရှိအချိန်ထိ အမိန့်မချမှတ်ဘဲ ဖမ်းဆီးခံထားရတဲ့ ဟုမ္မလင်းပြည်သူ ၂၀ ကျော် ရှိသေးတယ်လို့လည်း သိရပါတယ်။

မုံရွာ၊ ဧပြီ ၈၊ ၂၀၂၃။

စစ်ကိုင်းတိုင်း၊ မုံရွာမြို့တနေရာမှာ တော်လှန်လူငယ်များကွန်ယက် (မုံရွာ) အဖွဲ့က ရုန်းကန်တော်လှန်ပြည်သူ့အသံ သံချပ်ကို ဧပြီလ ၇ ရက်မနေ့က ပြုလုပ်ခဲ့ပါတယ်။

တော်လှန်သင်္ကြန်ကာလအတွက် ဒီသံချပ်ကို ပြုလုပ်ရတာဟာ တော်လှန်ရေးမှာစစ်ကိုင်းတိုင်း သာမက ပြည်သူတရပ်လုံး ပါဝင်လာစေဖို့ ရည်ရွယ်ပြုလုပ်ခဲ့တာလို့ မုံရွာတော်လှန်လူငယ်များကွန်ယက်မှ အဖွဲ့ဝင်တဦးက ပြောပါတယ်။

ဒါ့အပြင် မုံရွာမှာ စစ်ကောင်စီက သင်္ကြန်ကာလအတွင်း စည်ကားအောင် လုပ်ဆောင်မှုတွေရှိနေပြီး ဒီလုပ်ဆောင်မှုတွေနဲ့ပတ်သက်ပြီးတော့လည်း အခုလိုပြောပါတယ်။

“သူတို့အပေါ်မြင်တဲ့ အမြင်အနေနဲ့ကတော့ ရွံစရာကောင်တွေဆိုတာထက် ပြောစရာ ဘာမှမရှိတော့ပါဘူးခင်ဗျ။ ပြည်သူတွေကို ပြောချင်တဲ့စကားဆိုရင်တော့ ကျနော်တိုရဲ့ အဆုံးသတ် တိုက်ပွဲအနေနဲ့ စစ်*နိဂုံး ၂၀၂၃ ဆိုတဲ့ ဆောင်ပုဒ်အတိုင်း ဒီနှစ်ကို အပြီးသတ်ချေမှုန်းမှာမို့ သူတို့အဆုံးသတ်မှသာ ကျနော်တို့ပြည်သူတရပ်လုံး အစစ်အမှန်ပျော်ရွှင်ရတဲ့ ပွဲကြီးကျင်းပကြရအောင်လို့ ပြောချင်ပါတယ်” လို့ မုံရွာတော်လှန်လူငယ်များကွန်ယက်မှ ပြောပါတယ်။

သံချပ်ရိုက်ကူးရေးပြုလုပ်တဲ့နေရာဟာ စစ်တပ်က စစ်ကြောင်းထိုးနေတဲ့နေရာတွေနဲ့ မဝေးသလို ဘယ်လိုထောက်လှမ်းနေမှန်းလည်း မသိတာကြောင့် အန္တရာယ်မကျရောက်အောင် သတိထားပြီး လုပ်ခဲ့ရတယ်လို့ ဆိုပါတယ်။

တိုက်ပွဲတွေကြားက လုပ်ခဲ့ရတဲ့သံချပ်ဖြစ်တဲ့အတွက် အမှားတွေ၊ လိုအပ်ချက်တွေပါလာရင်လည်း သည်းခံနားထောင်ပေးဖို့ မုံရွာတော်လှန်လူငယ်များ ကွန်ယက်က မေတ္တာရပ်ခံထားပါတယ်။

“ရုန်းကန်တော်လှန်ပြည်သူ့အသံ” သံချပ်ကို ကြည့်ရှုချင်တဲ့ ပြည်သူတွေအနေနဲ့ မုံရွာတော်လှန်လူငယ်များ ကွန်ယက်စာမျက်နှာမှာ သွားရောက်ကြည့်ရှုနိုင်ပါတယ်။

ပုလဲ၊ ဧပြီ ၈၊ ၂၀၂၃။

စစ်ကိုင်းတိုင်း၊ ပုလဲမြို့နယ်ထဲက ချောင်းနားတောတိုက်က စစ်ရှောင်စခန်းနဲ့ နောကန်ရွာကို စစ်ကောင်စီတပ်ဖွဲ့တွေက ဧပြီလ ပထမပတ်အတွင်းမှာ မီးရှို့ခဲ့တာကြောင့် လူနေအိမ်ခြေ ၁၀၀ ကျော် မီးလောင်ပြီး အသက်ကြီး အမျိုးသမီးတစ်ဦး မီးလောင်သေဆုံးခဲ့ပါတယ်။

မှော်ဘီမြို့နယ်၊ ဖူးကြီးအခြေစိုက် ခမရ ၇၀၄ က စစ်သားတွေဟာ ပုလဲမြို့နယ်၊ ကန်ဒေါင့်ရွာမှာ တပ်စွဲထားပြီး ဧပြီလ ၂ ရက်မှာ ပုလဲမြို့နယ်၊ နှောကန်ကျေးရွာက အိမ်ခြေ ၁၁၄ လုံးကို မီးရှို့ခဲ့သလို ဧပြီလ ၆ ရက်မှာလည်း ပုလဲမြို့နယ်ထဲက ချောင်းနားတောတိုက်မှာရှိတဲ့ စစ်ရှောင်တဲ ၅ လုံးကိုလည်း မီးရှို့ခဲ့တယ်လို့ ပုလဲမြို့နယ် (ပကဖ) မှ သတင်းနဲ့ထောက်လှမ်းရေးတပ်တာဝန်ခံ ကိုလွင်ကြီးက ဆိုပါတယ်။

နှောကန်ကျေးရွာကို စစ်ကောင်စီတပ်ဖွဲ့တွေ ဝင်ရောက်မီးရှို့တဲ့အချိန် လေဖြတ်လို့ ထွက်မပြေးနိုင်ဘဲ အိမ်ထဲမှာကျန်ခဲ့တဲ့ အသက် ၆၀ အရွယ်အမျိုးသမီးတဦးကတော့ မီးလောင်သေဆုံးခဲ့ပါတယ်။

မီးရှို့ခံလိုက်ရတဲ့ နှောကန်ကျေးရွာမှာ ဒေသခံ ၅၇၆ ဦး အိုးအိမ်မဲ့ဖြစ်ပြီး၊ လျှပ်စစ်မီတာဘောက် ၅၂ လုံး ဆုံးရှုံးကာ၊ ဓာတ်မီးတိုင် ၃ တိုင်လည်း ပျက်စီးခဲ့တယ်လို့ ပုလဲမြို့နယ်ပြည်သူ့ကာကွယ်ရေးတပ်ဖွဲ့က ထုတ်ပြန်ပါတယ်။

“စစ်ကြောင်းမှာ စစ်ယူနီဖောင်းဝတ် အမျိုးသမီးစစ်သည် ၂ ဦးလောက်ပါလာတာ သေချာမြင်လိုက်ရတယ်။ နှောကန်ရွာကို မီးရှို့တာလည်း သူတို့စစ်ကြောင်းပဲ။ ချောင်းနားတောတိုက်ထဲက စစ်ရှောင်တဲကိုလည်း သူတို့ပဲ မီးရှို့ရင်း ရမ်းသမ်းပစ်လို့ အမျိုးသမီး ၃ ဦးဒဏ်ရာရခဲ့သေးတယ်” လို့ ကိုလွင်ကြီးက ဆက်ပြောပါတယ်။

ချောင်းနားတောတိုက်ထဲက စစ်ရှောင်တဲ ၅ လုံးကို မီးဝင်ရှို့ခဲ့တဲ့အချိန်မှာလည်း စစ်ကောင်စီတပ်ဖွဲ့တွေ ရမ်းသမ်းပစ်ခတ်တာကြောင့် အသက် ၄၀ အရွယ် အမျိုးသမီးတဦး၊ အသက် ၂၀ အရွယ် အမျိုးသားတဦးနဲ့ အသက် ၈ နှစ်အရွယ် ကလေးငယ်တဦး ကျည်ထိမှန်ကာ ဒဏ်ရာရခဲ့တယ်လို့ သူကဆက်ပြောပါတယ်။

လက်ရှိမှာ မီးရှို့ခံလိုက်ရတဲ့ နှောကန်ကျေးရွာနဲ့ ချောင်းနားတောတိုက်မှ စစ်ကောင်စီတပ်တွေ ပြန်လည် ထွက်ခွာသွားပြီးဖြစ်တာကြောင့် ဒေသခံတွေအနေနဲ့ ကျေးရွာထဲသို့ ပြန်လာကြပြီး မီးလောင်ခံထားရတာတွေကို ရှင်းလင်းရေးတွေ လုပ်နေကြရတယ်လို့ သိရပါတယ်။