မြေလတ်အသံ၊ သြဂုတ် ၁၇၊ ၂၀၂၅။

မန္တလေးတိုင်း၊ မိုးကုတ်မြို့ပေါ်က နေရာ ၂ခုကို စစ်ကောင်စီတပ်က သြဂုတ် ၁၇ ရက်ဒီမနက် ၈ နာရီကျော်မှာ ဗုံးကြဲတိုက်ခိုက်ခဲ့တာကြောင့် ကလေး ၁ ဦးအပါအဝင် အမျိုးသား ၃ ဦးသေဆုံးပြီး ၁ ဦးပျောက်ဆုံးနေတယ်လို့ ဒေသခံတွေကပြောပါတယ်။

တိုက်ခိုက်ရေးလေယာဥ် ၁ စီးနဲ့ မိုးကုတ်မြို့၊ စစ်တန်းရက်ကွက်ရှိ ပတ္တမြားငမောက်တည်းခိုခန်းရှေ့ ၁ လုံး၊ အစိုးရဘဏ်ရှေ့ ၁ လုံး စုစုပေါင်းဗုံးသီး ၂ လုံးကြဲချခဲ့ရာ လမ်းပေါ်သွားလာနေတဲ့ အသက် ၁၀နှစ် အရွယ် ကလေး(ကျား) ၁ ဦးနဲ့ အသက် ၃၀ အရွယ် အမျိုးသား ၂ ဦးတို့သေဆုံးပြီး စျေးသည်အမျိုးသမီး ၁ ဦးလည်း ပျောက်ဆုံးနေတယ်လို့ ဆိုပါတယ်။

“ဗုံးကျတဲ့နေရာမှာ တည့်တည့်ရောက်နေခဲ့တာ။ သေဆုံးသူတွေက တည်းခိုခန်းရှေ့နားကလူတွေပါ။ပဲ ပြုတ်သည် ၁ ဦးလည်းပါတယ်ပြောတယ်ဗျ။ သူမက အလောင်းမတွေ့ပါ။ ပျောက်ဆုံးအခြေအနေ။ သူ့ပစ္စည်းတွေထားခဲ့ပြီး ပြေးသွားခဲ့တာလား၊ လွင့်စင်သွားခဲ့တာလား မသဲကွဲသေးပါ”လို့ မြို့ခံအမျိုးသားတဦးက ပြောပါတယ်။

ဗုံးကြဲနေရာတွေကို ကယ်ဆယ်ရေးဆောင်ရွက်ပေးနေသူအမျိုးသား ၁ ဦးကလည်း သေဆုံးသူ ၃ ဦး နဲ့ ပျောက်ဆုံးအမျိုးသမီး ၁ ဦးရှိပြီး အခြားထိခိုက်ဒဏ်ရာရရှိသူမရှိခဲ့ဘူးလို့ အတည်ပြုပြောဆိုပါတယ်။

ပြီးခဲ့တဲ့သြဂုတ် ၁၄ ရက်ကလည်း မိုးကုတ်မြို့အရှေ့ပိုင်း ရွှေတိုင်ရက်ကွက်ရှိ လင်းရောင်ခြည်ဘုန်းကြီးကျောင်းဝန်းကျင်ကို ပေါင် ၅၀၀ ဗုံးသီး ၁လုံးကြဲချခဲ့ရာ ကိုယ်ဝန်သည်အမျိုးသမီး ၂ ဦး၊ ၅နှစ် အရွယ်ကလေး(ကျား) ၁ ဦးတို့အပါအဝင် ၂၁ ဦးသေဆုံးခဲ့တယ်လို့ သိရပါတယ်။

စာတည်း – လင်း

ဆင်ဖြူကျွန်း၊ ဩဂုတ် ၁၆၊ ၂၀၂၅။

မကွေးတိုင်း၊ ဆင်ဖြူကျွန်းမြို့နယ်အတွင်း စစ်ကောင်စီတပ်တွေပစ်တဲ့ လက်နက်ကြီးထိမှန်ပြီး ကလေး ၁ ဦးနဲ့ အမျိုးသား ၁ ဦးထိခိုက်ဒဏ်ရာရခဲ့တယ်လို့ ဆင်ဖြူကျွန်းမြို့ခံတွေဆီက သိရပါတယ်။

ဆင်ဖြူကျွန်းမြို့နယ်၊ ရွာသစ်ရွာဘုန်းကြီးကျောင်းအနီးမှာ အထိုင်ချတပ်စွဲနေတဲ့ ပခုက္ကူအခြေစိုက် တပ်မ ၁၀၁ လက်အောက်ခံ အင်အား ၇၀ ရှိ စစ်ကောင်စီတပ်တွေက သြဂုတ် ၁၅ ရက် ည ၁၀ နာရီကျော်မှာလက်နက်ကြီးနဲ့ပစ်ခတ်ရာ ဒေသခံတွေကို ထိမှန်ဒဏ်ရာရခဲ့တာပါ။

“ပထမ ၁ လုံးက သရက်ချဉ်ရွာနဲ့ မိုးဝန်းရွာကြားက သံတိုသံစဝယ်တဲ့ဆိုင်ဘေးကျပြီးတော့ အသက် ၃၀ အရွယ် အမျိုးသား ၁ ဦး လက်ထိသွားပါတယ်၊ လက်ထိသွားတဲ့ လူနာကို ဆင်ဖြူကျွန်းဆေးရုံပို့တော့ ဆေးရုံက မကွေးကိုလွှဲပါတယ်၊ လက်ဖြတ်ရမယ်လို့လည်း ကြားပါတယ်။”လို့ ဆင်ဖြူကျွန်းမြို့ခံတဦးက ပြောပါတယ်။

ဗုံးစထိမှန်ဒဏ်ရာရသူတွေဟာ သရက်ချဥ်ရွာက စာကျက်နေတဲ့ အသက် ၁၃ နှစ်အရွယ် မသဲသဲတုံနဲ့ သရက်ချဥ်ရွာနဲ့ မိုးဝန်းရွာကြားရှိ ပလုံဆိုင်က အသက် ၃၀ အရွယ် ကိုအေးမောင်တို့ ထိခိုက်ဒဏ်ရာရခဲ့ကာ သူကတော့ ဒဏ်ရာစိုးရိမ်ရတာကြောင့် မကွေးဆေးရုံကိုပို့ထားရတယ်လို့ ဆိုပါတယ်။

အဲ့ဒီစစ်ကောင်စီတပ်တွေဟာ ဩဂုတ် ၁၀ ရက်ကတည်းက ရွာသစ်ဘုန်းကြီးကျောင်းအနီးမှာ တပ်စွဲနေတာဖြစ်ပြီး ညတိုင်းလက်နက်ကြီးတွေနဲ့ ပစ်ခတ်လုပ်လေ့ရှိတယ်လို့လည်း ဆင်ဖြူကျွန်းမြို့ခံတဦးဆီက သိရပါတယ်။

ရွာသစ်ဘုန်းကြီးကျောင်းနဲ့ ၁ မိုင် အကွာ ဆင်ဖြူကျွန်းမြို့ နွယ်တမယ်ရွာမှာလည်း စစ်ကောင်စီတပ်က အထိုင်ချပြီး လက်နက်ကြီးတွေ ပစ်ခတ်တာတွေလုပ်နေတယ်လို့ သိရပါတယ်။

စာတည်း – လင်း

ဒေသခံရိက္ခာတွေနဲ့ပစ္စည်းတွေပါယူသွားလို့ ကျပ်သိန်း ၁၀၀ ကျော်ဆုံးရှုံးနိုင်ဟုဆို

ပေါက်၊ ဩဂုတ် ၁၄၊ ၂၀၂၅။

မကွေးတိုင်း၊ ပေါက်မြို့နယ်က ရွာ ၁၀ ရွာကျော်ကို စစ်ကောင်စီတပ်က သြဂုတ် ၁၃ ရက် မနေ့ကစစ်ကြောင်းထိုးမွှေနှောက်ပြီး ဒေသခံအမျိုးသားတွေကိုလည်းဖမ်းဆီးသွားတယ်လို့ ပေါက်မြို့ဒေသခံဆီက သိရပါတယ်။

ပခုက္ကူအခြေစိုက်တပ်မ ၁၀၁ ကနေ ရိက္ခာယာဥ်တန်း ၁၀၀ ကျော်၊ အင်အား ၂၀၀ ဝန်းကျင်ပါတဲ့ စစ်ကြောင်းက ဆယ်၀ရွာ၊ ထန်းတောကုန်းရွာ၊ ပျဥ်းချောင်းရွာ၊ အောက်ကျင်းရွာ၊ ဆင်သေရွာ၊ ကျွန်းပင်စုရွာ၊ ငမို့လေးရွာ၊ ငမို့ကြီးရွာ၊ ရွှေလှံရွာ၊ မြင်းခြံကုန်းရွာ၊ ရေပြာရွာ၊ ဘုရားတောင်ရွာ၊ မကျီးစင်ရွာ၊ ညောင်ပင်သာရွာ၊ ဆယ်ပင်းရွာ၊ ဇီးတောရွာ၊ လယ်ဘဲ့ရွာ၊ ကျူတောရွာ၊ နတ်ဦးယဉ်ရွာနဲ့ သမားတော်ရွာ တို့ကိုဝင်ရောက်ခဲ့တာလို့ ဆိုပါတယ်။

“ရေပြာရွာနားအနီးတဝိုက်က ကျေးရွာ ၁၀ ရွာကျော်က ပစ္စည်းတွေသယ်သွားတာ၊ ဆန်အိတ်တွေ၊ မြေပဲ‌အိတ်တွေ၊ စက်ပစ္စည်းတွေ သယ်သွားတာ၊ ဆယ်ဝရွာက ပစ္စည်းတွေတော့ သယ်မသွားဘူး၊ ရွာကိုတော့ ဝင်မွှေသွားတယ်၊ ချက်ပြုတ်ပြီးလည်း စားသောက်သွားကြတယ်၊” လို့ ပေါက်မြို့ခံတဦး ကပြောပါတယ်။

ဒါ့အပြင် စစ်ကြောင်းဝင်ချိန် ဘုရားတောင်ရွာက အသက် ၃၀ နဲ့ ၄၀ ကျော်အရွယ် အမျိုးသား ၇ ဦးကိုလည်း ဖမ်းဆီးသွားပြီး ဒီနေ့ထိပြန်မလွတ်သေးဘူးလို့ ဆိုပါတယ်။

“မနေ့က ဘုရားတောင်ရွာကို စစ်ကြောင်းဝင်တာ၊ ပြည်သူ ၇ ဦးကို ဖမ်းသွားတယ်၊ အခုထိ ပြန်မလွှတ်သေးပါဘူး၊ ဖမ်းသွားတာက အမျိုးသားတွေပါ၊ ရွာထဲမှာတွေ့တာနဲ့ ဖမ်းသွားတာ၊ ဘာကြောင့် ဖမ်းတာလည်းတော့ မသိဘူး” လို့ ပေါက်မြို့ခံ ကိုလရောင်က ပြောပါတယ်။

အဆိုပါစစ်ကြောင်းဟာ ကျေးရွာတွေထဲကိုဝင်ချိန်မှာ နေအိမ်တွေကပစ္စည်းတွေနဲ့ ရိက္ခာတွေကိုသယ်ယူသွားတာကြောင့် အနည်းဆုံး စုစုပေါင်းကျပ်သိန်း ၁၀၀ ဝန်းကျင်လောက်ဆုံးရှုံးနိုင်တယ်လို့လည်းဆိုပါတယ်။

တော်လှန်ရေးတပ်တွေက လမ်းပိုင်းတွေဖြတ်တောက်ထားတာကြောင့် ပေါက်မြို့နယ်ထဲက ပျူစောထီး အားကောင်းတဲ့ရွာတွေမှာလည်း ရိက္ခာပြတ်လပ်နေတာတွေရှိပြီး စစ်ကောင်စီဘက်က လေကြောင်းကနေပဲ ရိက္ခာပို့ပေးနေရတယ်လို့ ကိုလရောင်က ပြောပါတယ်။

ခုလိုစစ်ကြောင်းထိုးနေတာကြောင့် အထက်ပါကျေးရွာတွေက ဒေသခံ ၁ သောင်းကျော်လည်း ထွက်ပြေးတိမ်းရှောင်နေကြရတယ်လို့ ဆိုပါတယ်။

လက်ရှိမှာတော့ အဲ့ဒီစစ်ကြောင်းနဲ့ ရိက္ခာယာဉ်တန်း ၁၀၀ ကျော်ဟာ ပေါက်မြို့နယ်၊ ရေပြာတံတားအနီးမှာ ယာဉ်တန်းနဲ့အတူ တပ်ဖြန့်ထားပြီး မိုင်းရှင်းလင်းရေးတွေ လုပ်နေတယ်လို့ သိရပါတယ်။

ဒါ့အပြင် ပေါက်မြို့နယ်၊ တိုက်တောရိုးရွာကို သြဂုတ် ၁၄ ရက် ဒီမနက် ၈ နာရီလောက်မှာ စစ်ကောင်စီတပ်က မီးရှို့ဖျက်ဆီးခဲ့တယ်လို့ ပေါက်မြို့ခံတွေဆီက သိရပါတယ်။

ဆိပ်ဖြူမြို့နယ်၊ ရွှေဘိုးကျွန်းရွာအခြေစိုက် ကပစ ၂၂ က အင်အား ၁၈၀ ဝန်းကျင်ပါစစ်ကောင်စီ စစ်ကြောင်းဟာ သြဂုတ် ၁၃ ရက်မနေ့ကမနက်ပိုင်းမှာ စတင်စစ်ကြောင်းထိုးလာခဲ့ပြီး သပြေ တောတိုက်မှာညအိပ်တပ်စွဲပြီးနောက် ဒီမနက်ပိုင်းမှ တိုက်တောရိုးရွာကိုဝင်ပြီး မီးရှို့ခဲ့တာလို့ ဆိုပါတယ်။

“တိုက်တောရိုးရွာကလည်း ပေါက်နယ်တောင်ပိုင်း နယ်စပ်မှာရှိတာ၊ မနက် ၈ နာရီထိုးလောက်မှာ ရွာထဲဝင်ပြီး ပြည်သူနေအိမ်တွေကို မီးရှို့သွားတယ်၊ နေအိမ်တော့ အတိအကျမရသေးဘူး၊ ရွာကတော့ သေးသေးလေးပဲ၊ တရွာလုံးပေါင်းမှ အိမ်ခြေ ၃၀ လောက်ရှိတာ”လို့ ပေါက်မြို့ခံတဦးက ပြောပါတယ်။

စစ်ကြောင်းဝင်လာတဲ့ လမ်းတလျောက်မှာလည်း ချောင်းဆုံရွာက ကားသမား ၁ ဦးကို ရိုက်နှက်ဖမ်းဆီးခဲ့ပြီး ချောင်းဆုံရွာလမ်းစုံအရောက်မှ ပြန်လွှတ်ခဲ့တယ်လို့ ဆိုပါတယ်။

ဒါ့အပြင် ချောင်းဆုံရွာလမ်းစုံမှာ ကင်းပုန်းဝပ်တပ်စွဲနေချိန်မှာလည်း လက်နက်ကြီးတွေနဲ့ ပစ်ခတ်တဲ့အတွက် သပြေတောတိုက်ရှိ ဒေသခံနေအိမ်ပေါ်ကျကာ မီးလောင်ပြီး နွား ၁ ကောင်သေဆုံးကာ ၂ ကောင် ထိခိုက်ခဲ့တယ်လို့ သိရပါတယ်။

လက်ရှိမှာစစ်ကြောင်းက ကပစ ၂၂ တပ်ထဲကို ပြန်ဝင်သွားတယ်လို့ သိရကာ ပြီးခဲ့တဲ့ ဩဂုတ် ၁၀ ရက်က လည်း ပေါက်မြို့နယ်အတွင်းက ရွာ ၁၂ ရွာကျော်ကို စစ်ကောင်စီတပ်က ဗုံး ၅၀ ကျော်ကြဲချတာကြောင့် ကလေးအပါအဝင် ၅ ဦး သေဆုံးခဲ့ပါသေးတယ်။

စာတည်း – လင်း

မြေလတ်အသံ၊ သြဂုတ် ၁၄၊ ၂၀၂၅။

ပဲခူးတိုင်း၊ သဲကုန်းမြို့နယ်ကို စစ်ကြောင်းထိုးဝင်ရောက်နေတဲ့ စစ်ကောင်စီတပ်ဖွဲ့ဝင်တွေက ကျေးရွာ ၃ ရွာကို မီးရှို့ဖျက်ဆီးခဲ့ကာ ဒေသခံတွေလည်းထွက်ပြေးနေကြရတယ်လို့ ပြည်ခရိုင်အမှတ် ၁ တပ်ရင်း ၃၆၀၁ တပ်ခွဲ ၂ Royal Tiger Force မှ တပ်ဖွဲ့ဝင် Ronnie ကပြောပါတယ်။

သြဂုတ် ၁၂ ရက်မှာ ဓားသွေးကျောက်ရွာက နေအိမ် ၁၄ လုံး၊ သြဂုတ် ၁၃ ရက်မှာ သရက်ကိုင်းရွာက နေအိမ် ၃လုံးမီးရှို့ခဲ့ပြီး သြဂုတ် ၁၄ ရက်မနက်ပိုင်းမှာလည်း ရုံးပင်တက်ရွာကို ဝင်ရောက်မီးရှို့နေဆဲ ဖြစ်တယ်လို့ ဆိုပါတယ်။

“ရုံးပင်တက်ရွာကို အခုမနက် ၇ နာရီခန့်လောက်ကမီးစရှို့ခဲ့တာပါ။ အခု အချိန်ထိရှို့နေကြတုန်းပါပဲ။ လက်နက်ကြီးတွေနဲ့လည်း ပတ်ပတ်လည်ပစ်ခတ်နေပါတယ်။”လို့ ပြည်ခရိုင်အမှတ် ၁ တပ်ရင်း ၃၆၀၁ တပ်ခွဲ၂ Royal Tiger Force မှ တပ်ဖွဲ့ဝင် Ronnie ကပြောပါတယ်။

ပြီးခဲ့တဲ့သြဂုတ် ၁၁ ရက်မနက်ပိုင်းမှာ သဲကုန်းမြို့ပေါ်ကနေ သစ်နီတောကျေးရွာကို စစ်ကောင်စီတပ်ဖွဲ့ ဝင် ၁၂၀ ဝန်းကျင်က ဖောကား ၅ စီးနဲ့ ၁ ကြိမ်၊ ဖောကား ၂ စီးနဲ့ ၁ ကြိမ် ရောက်ရှိလာခဲ့ပြီးနောက် ကျေးရွာတွေကိုအခုလို စစ်ကြောင်းထိုးမီးရှို့နေတာလို့ ဆိုပါတယ်။

အဲ့ဒီစစ်ကောင်စီတပ်တွေစတင်စစ်ကြောင်းထိုးလာတဲ့ သြဂုတ် ၁၁ ရက် ညနေ ၆ နာရီမှာ ပြည်ခရိုင် ပကဖ တိုက်ခိုက်ရေးအဖွဲ့၊ သဲကုန်း၊ ပေါင်းတည်ပကဖ အဖွဲ့ ၃ ဖွဲ့တို့က ရုံးပင်တက်ရွာအနောက်ကုန်းမှာ မိုင်းဆွဲတိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၁၃ ဦးသေဆုံးခဲ့တယ်လို့ သြဂုတ် ၁၂ ရက်မှာ ပြည်ခရိုင်ပကဖ ကထုတ်ပြန်ထားပါတယ်။

စာတည်း – လင်း

စစ်ရေးတင်းမာနေလို့ လမ်းပိုင်း ၂ ခု အသုံးမပြုဖို့ သတိပေး

သိုက်ထွန်း၊ မြတ်

မုံရွာ၊ သြဂုတ် ၁၂၊ ၂၀၂၅။

စစ်ကိုင်းတိုင်း၊ မုံရွာ-အရာတော်လမ်းပိုင်းမှာ ဩဂုတ် ၈ ရက်ကစတင်ကာ စစ်ကြောင်းထိုးမီးရှို့နေတဲ့ စစ်ကော်မရှင်တပ်ဖွဲ့ဆီကို BTR အပေါ့စား အမြောက်သံချပ်ကာ ၂ စီးနဲ့ လူအင်အားရာချီထပ်တိုးပို့ဆောင်ထားတာကြောင့် စစ်ရေးတင်းမာနေတယ်လို့ မြေပြင်တော်လှန်ရေးတပ်ဖွဲ့ဝင်တွေနဲ့ ဒေသခံတွေဆီက သိရပါတယ်။

ဩဂုတ် ၁၁ ရက် မနေ့က မုံရွာစီးပွားရေးတက္ကသိုလ်ကနေ BTR သံချပ်ကာအမြောက်ကား ၂ စီးနဲ့ သံပြားကာကားတွေနဲ့တင်ဆောင်လာတဲ့ လူအင်အား ၁၀၀ ကျော်ကို ထပ်မံဖြည့်တင်းခဲ့တာဖြစ်ပြီး လက်ရှိမှာ ကျောက္ကာရွာ ရွှေဂူနီဘုရားနဲ့ ရွှေဂူဖြူဘုရားတွေမှာ တပ်စွဲထားတယ်လို့ ဆိုပါတယ်။

” စစ်တပ်က အင်အားများတယ်။ လက်နက်ကြီးထုလိုက်၊ လက်နက်ငယ်ပစ်လိုက်အသံတွေကြားရတယ်။ မုံရွာအထွက်ကနေ ကျောက္ကာထိ စစ်ကောင်စီက လှုပ်ရှားမှု ဆက်တိုက်လုပ်နေတယ်”လို့ မုံရွာဒေသခံတဦးက မြေလတ်အသံကိုပြောပါတယ်။

ဩဂုတ် ၈ ရက် ကစတင်ပြီး မုံရွာ-‌ကျောက္ကာ-အရာတော်လမ်းပိုင်းကို စစ်ကော်မရှင်တပ်က အမြောက်ကား ၂ စီး အပါ အင်အားရာနဲ့ချီကာ စစ်ကြောင်းထိုးလာတာဖြစ်ပြီး အဲ့ဒီနေ့ညနေပိုင်းမှာပဲ ကျောက္ကာရွာကို ဝင်ရောက်မီးရှို့ခဲ့တာပါ။

​ယမန်နေ့မှာ အင်အားထပ်မံဖြည့်တင်းထားပြီးနောက် မုံရွာ-အရာတော်လမ်းပိုင်းမှာ အမြောက်ကား ၄ စီး၊ လူအင်အား ၂၀၀ ကျော်အထိ အသုံးပြုကာ ဆက်လက်စစ်ကြောင်းထိုးနေပြီး လမ်းပိုင်းစိုးမိုးမှုရယူချင်တာကြောင့်လို့ မုံရွာမြို့နယ်ပြည်သူ့ကာကွယ်ရေးတပ်ဖွဲ့ တာဝန်ရှိသူတဦးက ပြောပါတယ်။

” လမ်းပိုင်းစိုးမိုးမှု ရချင်တာရော ကုန်စည်စီးဆင်းမှု ဖြတ်တောက်ချင်တာရောပါမယ်ဗျ” လို့ သူက ပြောပါတယ်။

ဒါ့အပြင် မုံရွာ-အရာတော်လမ်းပိုင်း စစ်ကြောင်းထိုးလာတာဟာ အရာတော်မြို့နယ်အတွင်းက ပျူစောထီးအထိုင်စခန်းရှိတဲ့ ကျေးရွာတွေနဲ့ အရာတော်မြို့အခြေစိုက် အမှတ် ၁၀ စစ်အခြေခံလေ့ကျင့်ရေးတပ် (စခတ ၁၀)၊ အမှတ် ၅၀၀၄ သံချပ်ကာတပ်ရင်း နဲ့ အမှတ် ၃၆၉ အမြောက်တပ်ရင်းတွေကို ရိက္ခာနဲ့ စစ်လက်နက်ခဲယမ်းပို့ဆောင်လိုတာကြောင့်လို့လည်း ဒေသခံတွေက ခန့်မှန်းပါတယ်။

စစ်ကော်မရှင်တပ်က မုံရွာ-အရာတော်လမ်းဘေးကျေးရွာတွေကို မြေပြင်စစ်ကြောင်းထိုးနေတဲ့အပြင် ဩဂုတ် ၁၀ ရက် ညပိုင်းနဲ့ ၁၁ ရက်တွေမှာ အရာတော်-မုံရွာအစပ်ရှိ အောင်သာကုန်းရွာကို ပါရာမော်တာတွေနဲ့ ဗုံးကြဲချခဲ့တာကြောင့် အရပ်သား ၂ ဦးထိခိုက်ဒဏ်ရာရခဲ့တယ်လို့ သိရပါတယ်။

ဒါ့အပြင် သြဂုတ် ၁၀ ရက် နေ့လယ် ၁၂ နာရီခန့်မှာ မုံရွာစီးပွားရေးတက္ကသိုလ်မှာတပ်စွဲနေတဲ့ စစ်ကော်မရှင်တပ်က ကိုင်းတောရွာအနောက်ဖက်ကို စစ်ကြောင်းတကြောင်းခွဲထိုးနေတယ်လို့လည်း ဒေသခံတွေက ဆိုကြပါတယ်။

ဒီစစ်ကြောင်းတွေနဲ့ လေကြောင်းအန္တရာယ်တွေကြောင့် မုံရွာ-အရာတော်လမ်းပိုင်းနံဘေးရှိ ဇလုပ်၊ ကိုင်းတော၊ ရေကန်စု၊ ထနောင်းဝန်း၊ ရွာတုံ၊ ကျောက္ကာ စတဲ့ကျေးရွာတွေက ဒေသခံ ၇,၀၀၀ကျော် စစ်ဘေးရှောင်နေကြရဆဲဖြစ်တယ်လို့ သိရပါတယ်။

စစ်ကော်မရှင်စစ်ကြောင်းတွေ အင်အားအလုံးအရင်းနဲ့ မုံရွာကနေ အရာတော်အစပ်ကျေးရွာတွေအထိ စစ်ကြောင်းထိုးနေလို့ တိုက်ပွဲတွေဖြစ်လာနိုင်တာကြောင့် မုံရွာ-အရာတော်လမ်းပိုင်းနဲ့ ကျောက္ကာ-ဗောဓိတထောင်လမ်းပိုင်းတွေကို အသုံးမပြုကြဖို့ မုံရွာမြို့နယ်သတင်းမှန်ပြန်ကြားရေးကလည်း သတိပေးထုတ်ပြန်ထားပါတယ်။

စာတည်း – ဟိန်းစံ

ပေါက်၊ ဩဂုတ် ၁၂၊ ၂၀၂၅။

မကွေးတိုင်း၊ ပေါက်မြို့နယ် အရှေ့ပိုင်းရှိ ကျေးရွာ ၁၂ ရွာထက်မနည်းကို စစ်ကော်မရှင်တပ်က လေယာဥ်နဲ့ ဗုံးကြဲချခဲ့လို့ ကလေး ၁ ဦးအပါ အရပ်သား ၄ ဦး သေဆုံးခဲ့တယ်လို့ ဒေသခံတွေဆီက သိရပါတယ်။

ဩဂုတ် ၁၀ ရက် မနက် ၉ နာရီကျော်မှာ စစ်ကော်မရှင်လေတပ် သယ်ယူပို့ဆောင်ရေးလေယာဥ် Y-12 နဲ့ ပေါက်မြို့နယ် ရေပြာ၊ ရှခွလေး၊ မုန်တော၊ ကမ်းပျို၊ သနပ္ပင်ဇင်း၊ တင်ငုတ်ပြင်၊ ညောင်ပင်တိုက်၊ ရွှေလှံ၊ မြင်းခြံကုန်း၊ ကျွန်းပင်စု၊ ဆင်သေ၊ ငမိုးကြီး၊ ငမိုးလေး၊ ကမ်းတောကုန်း၊ ပြင်းချောင်း၊ ဆယ်ဝ စတဲ့ ရွာတွေကို ဗုံးအလုံးရေ ၅၀ ကျော် ကြဲချခဲ့တဲ့အပြင် ပေါက်အခြေစိုက် ကပစ ၂၄ တပ် ကလည်း ဟောင်ဝစ်ဇာလက်နက်ကြီးတွေနဲ့ ပစ်ခတ်ခဲ့တယ်လို့ ဆိုပါတယ်။

“ တိုက်ပွဲကမဖြစ်ဖူး၊ ပေါက် ကပစ ၂၄ ကနေ ပထမ ဟောင်ဝစ်စာနဲ့ လှမ်းထု(ပစ်)တာ။ ၃ လုံးတွဲ ၂ ခါ ထုပြီး Y 12 က တခါတည်း ‌အပေါ်ကနဲ့ ဗုံးကြဲချတာ။ ရှခွလေးရွာကိုတော့ ၃ လုံးချတယ်၊ ၁ လုံးကွဲတယ်၊ ကမ်းပျိုရွာမှာတော့ ၅ လုံးတွဲချတာ၊ တခါချရင် ၄၊ ၅ လုံးချတာ” လို့ ဗုံးကြဲခံရတဲ့ရွာတွေက စစ်ရှောင်တွေကို ကူညီပေးနေသူတဦးက မြေလတ်အသံကို ပြောပါတယ်။

ဗုံးကြဲခံရမှုကြောင့် ရှခွလေးကျေးရွာက အသက် ၃ နှစ်ကျော်မိန်းကလေး ၁ ဦးနဲ့ အမျိုးသား ၁ ဦး၊ ကမ်းပျိုရွာက အမျိုးသား ၁ ဦး၊ တင်ငုတ်ပြင်ရွာက အသက် ၄၀ ကျော်အမျိုးသား ၁ ဦးနဲ့ ညောင်ပင်တိုက်ရွာက ၁ ဦး စုစုပေါင်း ၅ ဦးသေဆုံးခဲ့ပြီး ကျေးရွာ ၆ ရွာထက်မနည်းက အရပ်သား ၃၀ ခန့် ထိခိုက်ဒဏ်ရာရရှိခဲ့တယ်လို့ သိရပါတယ်။

သေဆုံး၊ ဒဏ်ရာရသူတွေရဲ့ အသေးစိတ်အချက်အလက်တွေကို မြေလတ်အသံက ဆက်လက်စုံစမ်းနေဆဲဖြစ်ပါတယ်။

ဗုံးကြဲခံရပြီးနောက် စစ်ကော်မရှင်ရဲ့လေကြောင်းအန္တရာယ်ကြောင့် ပေါက်မြို့နယ်အရှေ့ပိုင်းက ကျေးရွာ ၁၆ ရွာက ဒေသခံတွေ ကျေးရွာပြင်ပကို တိမ်းရှောင်နေထိုင်နေရတယ်လို့ သိရပါတယ်။

ဇူလိုင် ၂၇ ရက်ကလည်း ပေါက်မြို့နယ်၊ စဖဲကျေးရွာဆေးပေးခန်းကို စစ်ကော်မရှင်တပ်က တိုက်ခိုက်ရေးဗုံးကြဲလေယာဥ်နဲ့ ဗုံးကြဲချခဲ့တာကြောင့် ဆေးခန်းလာပြသူ အရပ်သား ၂ ဦးသေဆုံးခဲ့သေးတယ်လို့ သိရပါတယ်။

စာတည်း – ဟိန်းစံ

စစ်ကိုင်း၊ ဩဂုတ် ၁၁၊ ၂၀၂၅။

စစ်ကိုင်းတိုင်း၊ စစ်ကိုင်းမြို့နယ်၊ တလိုင်းရွာမြောက်ဘက်လမ်းခွဲတနေရာကို စစ်ကောင်စီတပ်ကလေကြောင်းကနေ ဗုံးကြဲတိုက်ခိုက်တဲ့အပြင် စက်လက်တွေနဲ့ပါပစ်ခတ်ခဲ့တာကြောင့် ဆီဘောက်စာကားတွေတွေမီးလောင်ပြီး လူဆယ်နဲ့ချီသေဆုံးခဲ့တယ်လို့ ရွှေဘိုခရိုင်အမှတ် ၁၈ တပ်ရင်း တပ်ခွဲ ၄ Bo Tiger ဆီက သိရပါတယ်။

ဩဂုတ် ၁၁ ရက် ညနေ ၃ နာရီလောက်မှာ အဆိုပါလမ်းခွဲတနေရာကို ဂျက်ဖိုက်တာနဲ့ ပေါင် ၁၅၀ ဗုံး ၃ လုံးကြဲချပြီး စက်လက်တွေနဲ့ပစ်ခတ်တာလို့ ဆိုပါတယ်။

“စစ်ကောင်စီစစ်ကြောင်းက စဉ့်ကိုင်မှာရှိတာ၊ စစ်ကြောင်းတွေ ထွက်ပေါက်ရှာပြီးတော့ ပြည်သူတွေရဲ့ ကားတန်းတွေကို ပစ်သွားတာ၊ ဆီကား ၃ စီးမီးလောင်ပျက်စီးသွားတယ်၊ ပြည်သူတွေလည်း တော်တော်များများသေဆုံးမှုတွေနဲ့ ဒဏ်ရာရသူတွေလည်းရှိတယ်၊ ဂျက်ဖိုက်တာနဲ့ ၃ ကြိမ်တိုက်ခိုက်မှုလုပ်ပြီးတော့ စက်လက်နဲ့ကို ပစ်သွားသေးတယ်” လို့ ရွှေဘိုခရိုင်အမှတ် ၁၈ တပ်ရင်း တပ်ခွဲ ၄ Bo Tiger ခေါင်းဆောင် ဗိုလ်ကျားကြီးက ပြောပါတယ်။

ပစ်ခတ်မှုကြောင့် ဆီဘောက်စာကား ၃ စီးမီးလောင်ကာ ခရီးသွား ၁၀ ဦးဝန်းကျင်သေဆုံးပြီး ၄၀ ဦးခန့် ဒဏ်ရာရတယ်လို့ ကနဦးသိရတယ်လို့ ဆိုပါတယ်။

ခုဗုံးကြဲခံရတဲ့နေရာဟာ စစ်ကောင်စီတပ်တွေစစ်ကြောင်းထိုးနေတဲ့ စဥ့်ကိုင်မြို့နယ်နဲ့ ၁ မိုင်ခွဲကွာဝေးပြီး စစ်ကြောင်းကြောင့် ကားတွေပိတ်မိနေတာ ၁၀ ရက်ရှိနေပြီလို့ သိရပါတယ်။

“ခရီးသွားကားသမားတွေ တော်တော်များများဒုက္ခရောက်နေတာ၊ စစ်ရေးကြောင့် ပိတ်ဆို့ခံထားရတာ၊ ကားတွေလည်း စုတ်ပြတ်သတ်လို့ပါ၊ ပိတ်မိနေတဲ့ကားက ၁၀၀ ကျော်လောက်ရှိတယ်၊ စစ်ကိုင်း-မန္တလေး ခရီးသွားပြည်သူတွေပါ၊ တိုက်ပွဲကမရှိဘူး၊ သက်သက်မဲ့ကိုပစ်တာ၊ ၄၀ လောက်ဒဏ်ရာရတာရှိတယ်၊ သေဆုံးတာက ၁၀ ဦးလောက်ရှိတယ်၊ ကားသမားတွေထဲက မိသားစုဝင်တွေသေတာလည်းရှိတယ်”လို့ သူက ဆက်ပြောပါတယ်။

လက်ရှိမှာတော့ ဒဏ်ရာရတဲ့ပြည်သူတွေကို ဆေးဝါးကုသမှုလုပ်ပေးနေပြီး သေဆုံးအလောင်းတွေကိုတော့ တိုက်ခိုက်ခံရတဲ့နေရာမှာပဲသင်္ဂြိုဟ်နေတယ်လို့ သိရပါတယ်။

သတင်း – ဒိန်းဂျား၊ စာတည်း – လင်း

သိုက်ထွန်း၊ ခေတ်သဒ္ဒါ

မုံရွာ၊ သြဂုတ် ၇၊ ၂၀၂၅။

စစ်ကိုင်းတိုင်း၊ မုံရွာမြို့မှာ စစ်ကောင်စီတပ်ဖွဲ့ဝင်တွေက ပေါ်တာဆွဲဖမ်းဆီးတာတွေ ခပ်စိပ်စိပ်လုပ်လာပြီး ဒေသခံ ၄၀ ခန့်ဖမ်းဆီးခံထားရတယ်လို့ မြို့ခံတွေဆီက သိရပါတယ်။

မုံရွာမြို့ရဲ့ ပေ ၈၀ လမ်း၊ ရန်ကင်းမီးပွိင့်၊ ကျောက္ကာလမ်း၊ ကမ်းနားလမ်း၊ မြို့ပေါ်ရပ်ကွက်တွေထဲနဲ့ မြို့အနီးကျေးရွာတွေမှာ ဇူလိုင်နောက်ဆုံးပတ်ကတည်းက စတင်ဖမ်းဆီးနေတာလို့ ဆိုပါတယ်။

“ဇူလိုင် ၂၄ ရက်ပတ်ဝန်းကျင်ကတည်းက ပေါ်တာဆွဲနေတာ။ ခုရက်ပိုင်းပိုကြမ်းလာတယ်။ အချို့နေအိမ် အလုပ်ရုံထဲ ဝင်ဆွဲတယ်ပြောတယ်။ လောလောဆယ်တော့ နေရာတနေရာပြီး တနေရာ ရွှေ့ပြောင်းပြီး အလစ်အငိုက်ဆွဲနေတာ”လို့ ဒေသခံအမျိုးသားတဦးကပြောပါတယ်။

စစ်ကောင်စီတပ်ဟာ စစ်မှုထမ်းသင်တန်း အပတ်စဥ် ၁၆ နဲ့ ၁၇ အတွက် လူမပြည့်မီသေးတာကြောင့် ခုလိုပေါ်တာ ဆွဲဖမ်းဆီး တာဖြစ်နိုင်ပြီး သြဂုတ် ၇ ရက်ဒီကနေ့အထိ ဖမ်းဆီးခံထားရသူ ၄၀ ဝန်းကျင်ရှိကာ အဲ့ဒီထဲက ၅ ဦးကိုသာပြန်လွှတ်လိုက်တယ်လို့ သိရကြောင်း သူကဆက်ပြောပါတယ်။

ဒီအရေအတွက်ဟာ ဒေသခံတွေ လက်လှမ်းမီသလောက်သိရှိတဲ့အရေအတွက်ဖြစ်ကာ မြေပြင်မှာ ဒီထက်ပိုများနိုင်တယ်လို့လည်း ဆိုပါတယ်။

စစ်ကောင်စီတပ်တွေဟာ ယူနီဖောင်းဝတ်နဲ့အပြင် အရပ်ဝတ်တွေနဲ့ပါစောင့်ကြည့်ဖမ်းဆီးနေတာဖြစ်ပြီး ခုလိုဖမ်းဆီးတာတွေ လုပ်နေတာကြောင့်လူငယ်တွေလည်း လမ်းပေါ်ကိုမထွက်ရဲကြဘူးလို့ ဆိုပါတယ်။

သြဂုတ် ၃ ရက်မှာလည်း မုံရွာမြို့၊ စက်မှုဇုန်ရပ်ကွက်က ရေဦးဆန်ဆိုင်ဂိတ်၊ ရန်ကင်း ရပ်ကွက်ထဲရှိ အသောကလမ်း၊ ကမ်းနားလမ်း၊ ရေကူးကန်လမ်းနဲ့ ဗိုလ်တေဇလမ်းတွေမှာ လက်နက်ကိုင် စစ်ကောင်စီ အဖွဲ့ဝင် အင်အား ၇ ဦးကျော်နဲ့ လဝကရုံးက ဝန်ထမ်းအချို့ဟာ အံစာတုံးကား ၁ စီး၊ စစ်ကား ၁ စီးနဲ့ လမ်းသွားလမ်းလာအမျိုးသားတွေကို ဖမ်းဆီးခဲ့တယ်လို့ နောက်ထပ်မြို့ခံတဦးက ပြောပါတယ်။

ဖမ်းဆီးခံရသူတွေထဲမှာ မုံရွာမြို့ပေါ်ရှိ ရုံကြီး၊ ဆူးလေကုန်း၊ အောင်ချမ်းသာ၊ စက်မှုဇုန်၊ အင်းရွာသစ်၊ သလ္လာ၊ ချမ်းမြသာစည်စတဲ့ ရပ်ကွက်တွေက အမျိုးသားတွေနဲ့ မုံရွာမြို့အနီးရှိ လယ်ဇင်ကျေးရွာနဲ့ သက္ကယ်ကျင်းရွာက အမျိုးသားတွေလည်းပါဝင်တယ်လို့ ဆိုပါတယ်။

“အဲ့ ၃ ရက်နေ့ကတော့ စစ်ကားပေါ်ကို လူအပြည့်ဘဲ။ ၂၀ ဦးရေ ဝန်းကျင်လောက်တော့ ပါမယ်။ ညနေဘက် ၆ နာရီလောက်ကျ ဗိုလ်ချုပ်လမ်းပေါ်ကနေ အနောက်တန်းတန်း မောင်းချသွားတာ။ အဲ့နေ့က ညနေဘက်လူငယ်တွေ သိပ်မထွက်ကြဘူး။ လမ်းပေါ်မှာ လူကြီးပိုင်းတွေပဲ တွေ့ရတာ။”လို့ မြို့ခံအမျိုးသားတဦးက မြေလတ်အသံကို ပြောပါတယ်။

စစ်မှုထမ်းဖို့ ဖမ်းဆီးသွားသူတွေကို မုံရွာမြို့တော်ခန်းမထဲမှာ ထိန်းသိမ်းထားပြီးနောက် လူဦးရေ အရေအတွက်ပြည့်ပါက မုံရွာမြို့ အနောက်မြောက်တိုင်းစစ်ဌာနချုပ် – နမခဆီကို ပို့ဆောင်တယ်လို့ ဆိုပါတယ်။

သြဂုတ် ၄ ရက်ကနေ ၆ ရက်အထိလည်း မုံရွာမြို့ပေါ် မိုးရွာသွန်းနေပေမယ့် ထန်းတောရပ်ကွက်၊ မုံရွာတောင်၊ စက်မှုဇုန်ရပ်ကွက်၊ မြဝတီရပ်ကွက်နဲ့ အလုံသုံးထောင့်ချွန်းနေရာတွေမှာ လမ်းသွားလမ်းလာ အမျိုးသားတွေကို ဖမ်းဆီးမှုတွေလုပ်ဆောင်ခဲ့တယ်လို့ သိရပါတယ်။

စစ်မှုထမ်းဖမ်းဆီးခံရသူတွေထဲက မြို့ပေါ်နေသူတွေဖြစ်ပါက မှတ်ပုံတင်တွေကို မိသားစုဝင်တွေဆီ ဆက်သွယ်တောင်းခံပြီး လာရောက်မပေးသူတွေကိုတော့ မှတ်ပုံတင်အသစ်ပြန်လည် လုပ်ဆောင် ပေးတယ်လို့လည်း အဓမ္မဖမ်းဆီးခံရသူတဦးရဲ့ မိသားစုဝင်ဆီက စုံစမ်းသိရပါတယ်။

စာတည်း – လင်း

ဂန့်ဂေါ၊ သြဂုတ် ၄၊ ၂၀၂၅။

မကွေးတိုင်း၊ ဂန့်ဂေါမြို့နယ် ကျေးရွာ ၂ ရွာက ဒေသခံပြည်သူ ၁၀ ဦးကို စစ်ကောင်စီတပ်ဖွဲ့ဝင်တွေက စစ်ကြောင်းထိုးဝင်ရောက်ကာ ဖမ်းဆီးခေါ်ဆောင်သွားခဲ့တယ်လို့ ယောအလင်းတန်းအဖွဲ့မှ ကိုဘကောင်းဆီက သိရပါတယ်။

သြဂုတ် ၄ ရက် ဒီနေ့မနက် ၃ နာရီလောက်က ဂန့်ဂေါမြို့နယ်၊ ရှုံးရှီရွာနဲ့ အနောက်ဂန့်ဂေါရွာ ၂ ရွာကို ခလရ ၅၀ က ထွက်ခွာလာတဲ့ စစ်ကောင်စီတပ်ဖွဲ့ဝင်တွေနဲ့ ရှောက်ပင်ရွာမှာ ကင်းချထားတဲ့ စစ်ကောင်စီတပ်ဖွဲ့ဝင်တွေပူးပေါင်းပြီး စစ်ကြောင်းထိုးဝင်ရောက်ခဲ့တယ်လို့ သိရပါတယ်။

အဆိုပါကျေးရွာ ၂ ရွာကို လက်နက်ငယ်တွေနဲ့ ပစ်ခတ်ဝင်ရောက်ပြီးနောက် ပြည်သူ ၁၂ ဦးကို ဖမ်းဆီးကာ အဲ့ဒီထဲက အမျိုးသမီး ၂ ဦးကို ပြန်လည်လွှတ်ပေးခဲ့ပြီး ကျန် ၁၀ ဦးကိုတော့ ဖမ်းဆီးသွားခဲ့တယ်လို့ ဆိုပါတယ်။

“အဲ့ရွာ ၂ ရွာက အိမ်တွေပါ ဆက်နေတာဗျ။ သေနတ်တွေပစ်ပြီး ဝင်လာတုန်း ပြေးဖို့လုပ်တဲ့သူတွေကို ဖမ်းခေါ်သွားတယ် ကြားတယ်။ စစ်မှုထမ်းဖို့ ဖမ်းတာမျိုးတော့ မဟုတ်ဘူး။ ခုချိန်မှာ ကျားမ အရေအတွက်ကို ကျနော်တို့ဘက်က အတည်မပြုနိုင်သေးဘူးဗျ။ ဖုန်းလိုင်းအခက်ခဲကြောင့် ဘာမှ မသိရသေးတာဗျ။”လို့ ယောအလင်းတန်း ကိုဘကောင်းက မြေလတ်အသံကို ပြောပါတယ်။

ဒီမနက် ၆ နာရီခွဲလောက်မှာတော့ စစ်ကြောင်း ၂ ကြောင်းခွဲပြီး ကျေးရွာတွေကပြန်ဆုတ်ခွာသွားရာ ဖမ်းဆီးသွားသူတွေထဲက အမျိုးသမီး ၂ ဦးကို We love GanGaw ဆိုင်းဘုတ်အနီးက တံတားထိပ်မှာ ပြန်လည်လွှတ်ပေးခဲ့တယ်လို့ သူကဆက်ပြောပါတယ်။

“စစ်ကြောင်းက ၂ ကြောင်းခွဲ ဆုတ်သွားတာ။ ၁ ကြောင်းက ရှောက်ပင်ရွာထဲ ပြန်ဆုတ်သွားတယ်။ ၁ ကြောင်းကတော့ ခလရ ၅၀ ထဲက စစ်သားတွေဆိုတော့ စစ်ကား ၃ စီးနဲ့ We love GanGaw တံတားထိပ်မှာ လာကြိုသွားတယ်။”လို့ ကိုဘကောင်းက ပြောပါတယ်။

ကျန်ရှိတဲ့ ပြည်သူ ၁၀ ဦးကိုတော့ စစ်ကားပေါ် တင်ဆောင်ကာ ဂန့်ဂေါမြို့အတွင်းသို့ ဖမ်းဆီး ခေါ်ဆောင်သွားပြီး သြဂုတ် ၄ ရက် ဒီညနေပိုင်းအထိ ပြန်လည်လွတ်မြောက်လာတာ မရှိသေးဘူးလို့ သိရပါတယ်။

စာတည်း – လင်း