စစ်ကောင်စီတပ်ဖွဲ့

အလောင်းလာကောက်တဲ့အဖွဲ့ကို ဒရုန်းနဲ့ဗုံးထပ်ချလို့ ၄ ဦးဒဏ်ရာရ

ရွှေဘို၊ ဇူလိုင် ၂၃၊ ၂၀၂၅။

စစ်ကိုင်းတိုင်း၊ ရွှေဘိုမြို့နယ်၊ ရွှေဘို-ရေဦးလမ်းပိုင်းတနေရာမှာ ဆိုင်ကယ် ၃ စီးနဲ့ မိုင်းလာထောင်တဲ့ စစ်ကောင်စီတပ်ဖွဲ့ တိုက်ခိုက်ခံရပြီး ၄ ဦးသေဆုံးတယ်လို့ ရွှေဘိုခရိုင်အမှတ် ၄ တပ်ရင်းသတင်းတာဝန်ခံထံက သိရပါတယ်။

ဇူလိုင် ၂၂ ရက်ယမန်နေ့ မနက် ၆ နာရီကျော်မှာ စစ်ကောင်စီတပ်နဲ့ရဲတပ်ဖွဲ့ပူးပေါင်းအင်အား ၆ ဦးဟာ ရွှေဘိုကနေ လိပ်ချင်းကျေးရွာဘက်ကို ဆိုင်ကယ် ၃ စီးနဲ့မောင်းနှင်လာစဥ် ကြားဖြတ်ပစ်ခတ်ခဲ့တာလို့ ဆိုပါတယ်။

” လိပ်ချင်းဘက်လာပြီး မိုင်းလာလာထောင်တာပေါ့။ ကျနော်တို့ဘက်ကနေ ကြားထဲကနေဖြတ်ပစ်တာ။ လာတာက ၃ စီးမှာ ၂ စီးက ကပ်လာတာ။ နောက်ဆုံး ၁ စီးက ခပ်လှမ်းလှမ်းကျန်နေတော့ ရှေ့က ၂ စီးကိုပဲ ပစ်လိုက်ရတယ်။ နောက်ဆုံး ၁ စီးက ခံပစ်နေတာနဲ့ဘဲ ပစ္စည်းအကုန် လုံးမရလိုက်ဘူး”လို့ ရွှေဘိုခရိုင်အမှတ် ၄ တပ်ရင်း သတင်းတာဝန်ခံက မြေလတ်အသံကို ပြောပါတယ်။

အဆိုပါပစ်ခတ်မှုအတွင်း စစ်ကောင်စီတပ်ဖွဲ့ဝင်နဲ့ရဲတပ်ဖွဲ့ဝင် ၄ ဦးသေဆုံးခဲ့ပြီး BA 63 (G3) သေနတ် ၁ လက်၊ ကျည်ဘောက် ၂ ခု၊ ကျည် ၁၆၈ တောင့်၊ လက်ပစ်ဗုံး ၁ လုံးနဲ့ ဆက်စပ်ပစ္စည်းတချို့ သိမ်းဆည်းရရှိခဲ့တယ်လို့ ဆိုပါတယ်။

ပစ်ခတ်မှုဖြစ်ပြီးနောက် ၁ နာရီကျော်အကြာမှာ စစ်ကောင်စီဘက်က သေဆုံးသူတွေရဲ့အလောင်းတွေကို လာကောက်ချိန် ဒရုန်းနဲ့ဗုံးသီးချထပ်မံတိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၄ ဦး ဒဏ်ရာရရှိခဲ့တယ်လို့ သိရပါတယ်။

အဆိုပါ တိုက်ခိုက်မှုကိုတော့ ရွှေဘိုခရိုင်တပ်ရင်း ၄၊ တပ်ခွဲ ၁ နဲ့ မဟူရာရွှေဘိုသားတပ်ဖွဲ့ဝင်တွေက တိုက်ခိုက်ခဲ့တာဖြစ်ပြီး တော်လှန်ရေးတပ်ဖွဲ့တွေဘက်က ထိခိုက်မှုမရှိခဲ့ဘူးလို့ ဆိုပါတယ်။

ဇွန် ၂၈ ရက်ကလည်း ရွှေဘိုမြို့နယ်၊ ဟင်္သာကြီးကျေးရွာ ပျူစောထီးစခန်း၊ စစ်ကောင်စီစခန်းကုန်းနဲ့ ဘိုးနတ်တောင်စခန်းတွေကို တိုက်ခိုက်ခဲ့ရာမှာ စစ်ကောင်စီတပ်ဖွဲ့ဝင် ၂၄ ဦးသေဆုံးခဲ့တယ်လို့ သိရပါတယ်။

စာတည်း – ဟိန်းစံ

မြိုင်၊ ဧပြီ ၁၀၊ ၂၀၂၅။

ဒိန်းဂျား၊ ဟယ်သာ

မကွေးတိုင်း၊ မြိုင်မြို့၊ စက်မှု ၂ ကနေ ကင်းပတ်ထွက်လာတဲ့ စစ်ကောင်စီတပ်သားတွေပစ်ခတ် တိုက်ခိုက်ခံရလို့ ၁ ဦးသေဆုံးခဲ့တယ်လို့ ဝံပုလွေပြောက်ကျားတပ်ဖွဲ့-မြိုင် ဆီက သိရပါတယ်။

ဧပြီ ၉ ရက် မနက် ၇ နာရီကျော်မှာ ကင်းပတ်ထွက်လာတဲ့ စစ်ကောင်စီတပ်ဖွဲ့ဝင် ၆ ဦးကို စက်မှု ၂ နဲ့ မီတာ ၅၀၀ အကွာမှာ ပစ်ခတ်တိုက်ခိုက်ခဲ့တာလို့ ဆိုပါတယ်။

“သူတို့ကင်းပတ်ထွက်လာတဲ့ စစ်ကောင်စီတပ်ဖွဲ့ဝင် ၆ ဦးဗျ၊ ဒါကို ၁ ဦးပဲ ပစ်ခတ်နိုင်ခဲ့တယ်။ သူတို့ရဲ့ စက်မှု ၂ ဝန်းကျင်ကို ကင်းပတ်ထွက်တာ၊ ကျနော်တို့က သတင်းရလို့ အသင့်စောင့်နေတာမှာ ထိတွေ့ပစ်ခတ်မှုဖြစ်တာ။ သေဆုံးတာက မျက်မြင်တွေ့ရတာ ၁ ဦးပါ၊ ၂ ဦးကတော့ ထိခိုက် ဒဏ်ရာရတယ်။”လို့ ဝံပုလွေပြောက်ကျားတပ်ဖွဲ့-မြိုင် ခေါင်းဆောင် ဗိုလ်မီးပွား က ပြောပါတယ်။

ပစ်ခတ်တိုက်ခိုက်ပြီးနောက် MA 3 သေနက် ၁ လက်၊ ကျည်ဘောက် ၃ ခု၊ လက်ပစ်ဗုံး ၁ လုံး၊ ၅.၅၆ ကျည် ၁၀၀ ကျော် သိမ်းဆည်းရခဲ့ပြီး ပစ်ခတ်ခံရတဲ့ စစ်ကောင်စီတပ်သားတွေဟာ စက်မှု ၂ ထဲကိုပြန်ဝင်သွားပြီးနောက် ၆၀ မမ လက်နက်ကြီးတွေနဲ့ လှမ်းပစ်တယ်လို့ ဆိုပါတယ်။

အဲ့ဒီတိုက်ခိုက်မှုကို ဝံပုလွေပြောက်ကျားတပ်ဖွဲ့-မြိုင်၊ မြိုင်ပကဖ၊ ဓားမင်းကြီးတပ်ဖွဲ့၊ မြိုင်ညီညွှတ်ရေးတပ်ပေါင်းစု၊ ကိုမုဆိုး အဖွဲ့၊ ကိုစတီး အဖွဲ့၊ ကိုကင်း အဖွဲ့တို့က ပူးပေါင်းပြုလုပ်ခဲ့တာလို့ ဆိုပါတယ်။

မြိုင်မြို့တောင်ဘက် ၄ မိုင်အကွာရှိ စက်မှု ၂ ထဲမှာ စစ်ကောင်စီတပ်ဖွဲ့ဝင်တွေနဲ့ ပျူစောထီး အင်အား ၁၀၀ ဝန်းကျင်ခန့် အထိုင်ချ တပ်စွဲထားပြီး အနီးအနားကျေးရွာနဲ့ ပေါက်မြို့နယ်ကျေးရွာတွေကို စစ်ကြောင်းထိုးမီးရှို့ကာ ပြည်သူပိုင်ပစ္စည်းတွေကိုလည်း ယူဆောင်တာတွေလုပ်တဲ့အတွက် ဒေသခံတွေလည်း တိမ်းရှောင်နေကြရတယ်လို့ သိရပါတယ်။

စာတည်း – လင်း

မြင်းခြံ၊ ဖေဖော်ဝါရီ ၂၇၊ ၂၀၂၅။

မန္တလေးတိုင်း၊ မြင်းခြံခရိုင်၊ မြင်းခြံမြို့၊ အမှတ် ၁၈ ရပ်ကွက်မှာ ဆက်ကြေးကောက်နေတဲ့ စစ်ကောင်စီဂိတ်ကို ဒေသခံကာကွယ်ရေးတပ်ဖွဲ့ဝင်တွေက အနီးကပ်တိုက်ခိုက်ခဲ့တယ်လို့ မြင်းခြံခရိုင်တပ်ရင်း – ၉ Myingyan Black Tiger-MBT အဖွဲ့ဆီက သိရပါတယ်။

ဆက်ကြေးကောက်နေတဲ့ စစ်သား၊ ရဲ နဲ့ ပျူစောထီးအင်အား ၂၀ ဝန်းကျင်ကို ဖေဖော်ဝါရီ ၂၅ ရက်နေ့လယ် ၃ နာရီဝန်းကျင်မှာတိုက်ခိုက်ခဲ့တာလို့ ဆိုပါတယ်။

“ကျနော်တို့ ၃ ဖွဲ့သွားပြီးတော့ ပြောက်ကျားနည်းစနစ်နဲ့ အနီးကပ်သွားတိုက်ခိုက်ခဲ့တာပါ၊ နေရာမှာ စစ်‌ကောင်စီတပ်ဖွဲ့ဝင် ၂ ဦး လဲကျသွားတာရှိတယ်၊ အဲ့ဒီနေ့မှာတော့ ဒဏ်ရာရတယ်လို့ပဲကြားတာ၊ နောက်ရက်မှာတော့ သေဆုံးသွားပြီလို့သိခဲ့တာ” လို့ Myingyan Black Tiger-MBT မြင်းခြံခရိုင်တပ်ရင်း – ၉ ခေါင်းဆောင်ဗိုလ်မိုက်ခဲက ပြောပါတယ်။

အဲ့ဒီဂိတ်ကစစ်ကောင်စီတပ်ဖွဲ့ဝင်တွေဟာ ခရီးသွားကားတွေကို ဆက်ကြေးကောက်တာ၊ မြင်းခြံတောင်ဘက်ခြမ်းကျေးရွာတွေက ဒေသခံတွေဆီကနေ ရိက္ခာသယ်အခွန်ကို အဓမ္မကောက်ခံနေတာလို့ ဆိုပါတယ်။

“အဲ့ဒီဂိတ်မှာက သူတို့က ခရီးသွားကားတွေကို ဆက်ကြေးကောက်ကြတာ၊ မြင်းခြံတောင်ဘက်ခြမ်းက ရွာတွေက ပြည်သူတွေဆီက ဆန်အိတ် ၁ အိတ်ကို ၇ ထောင်နှုန်းတောင်းတယ်၊ ကျန်တဲ့ရွာတွေကဆိုရင် ဆန်အိတ် ၁ အိတ်ကို ၅ ထောင်နှုန်းတောင်းတယ်၊ ပြီးရင် ဆီ ၁ ပုံးကို ဘယ်လောက်ဆိုပြီးလည်း တောင်းတယ်၊” လို့ ဗိုလ်မိုက်ခဲက ဆက်ပြောပါတယ်။

ပစ်ခတ်ပြီးနောက်ပိုင်း အဲ့ဒီစစ်ကောက်စီဂိတ်ကနေ မြင်းခြံတောင်ဘက်ခြမ်းမှာရှိတဲ့ ရွာတွေကို လက်နက်ကြီးတွေနဲ့ပစ်ခတ်တာတွေလုပ်ခဲ့တယ်လို့ ဆိုပါတယ်။

ဒီတိုက်ခိုက်မှုကို Myingyan Black Tiger-MBT မြင်းခြံခရိုင်တပ်ရင်း – ၉၊ ဗိုလ်စားပြောက်ကျားတပ်ဖွဲ့နဲ့ BGFတို့က ပူးပေါင်းလုပ်ဆောင်ခဲ့တာလို့ သိရပါတယ်။

စာတည်း – လင်း

မကွေး၊ ဖေဖော်ဝါရီ ၁၁၊ ၂၀၂၅။

မကွေးတိုင်း၊ ပေါက်မြို့နယ်၊ မကျီးစင်ရွာကနေ မြိုင်နယ်ဘက်ကို ပြန်လာတဲ့ စစ်ကောင်စီတပ်နဲ့ တော်လှန်ရေးပူးပေါင်းတပ်ဖွဲ့တွေ ထိတွေ့မှု ၂ ကြိမ်ဖြစ်ပြီး စစ်ကောင်စီတပ်ဖွဲ့ဝင် ၃ ဦးသေဆုံးကာ တော်လှန်ရေးတပ်ဖွဲ့ဝင် ၁ ဦးလည်း သေဆုံးခဲ့တယ်လို့ အညာမြေတပ်ပေါင်းစု သတင်းနဲ့ပြန်ကြားရေး တာဝန်ခံဆီက သိရပါတယ်။

ဖေဖော်ဝါရီ ၉ ရက် ညနေ ၄ နာရီလောက်မှာ မကျီးစင်ရွာကို မီးရှို့ပြီးပြန်ထွက်လာတဲ့ အင်အား ၃၀၀ ဝန်းကျင်ပါစစ်ကောင်စီတပ်ဖွဲ့နဲ့ တော်လှန်ရေးတပ်ဖွဲ့တို့ အဲဒီရွာနဲ့ ၇ မိုင်လောက်ဝေးတဲ့ ကျောက်လုံးရွာနားမှာ ထိတွေ့ပစ်ခတ်မှု ၂ နာရီကျော်ဖြစ်ပွားခဲ့ရာ စစ်ကောင်စီတပ်ဘက်မှ ၅ ဦးထိမှန်ဒဏ်ရာရရှိခဲ့ပြီး သူတို့လာတဲ့လမ်းကြောင်းပြောင်းသွားတယ်လို့ ဆိုပါတယ်။

“တော်လှန်ရေးပူးပေါင်းအဖွဲ့တွေ ကျောက်လုံးရွာထိပ်ကနေပြီးတော့မှ သူတို့ကို တိုက်ခိုက်တဲ့အခါမှာ သူတို့က လမ်းကြောင်းပြောင်းသွားတယ်။ အဲဒီညနေတိုက်ပွဲမှာ သူတို့ဘက်က ၅ ယောက်ဒဏ်ရာရခဲ့တယ်။ ကျနော်တို့က ကုန်းပေါ်မှာဆိုတော့ ဗျူးပိုကောင်းတော့ အဲ့မှာ သူတို့လဲကျသွားတာကို မြင်လိုက်တယ် “လို့ အညာမြေတပ်ပေါင်းစုမှ သတင်းနဲ့ ပြန်ကြားရေးတာဝန်ခံ ကိုဘိုဘိုသန့်ဇင် ကပြောပါတယ်။

ပစ်ခတ်မှုဖြစ်ပြီးနောက် စစ်ကောင်စီတပ်ဖွဲ့ဝင်တွေဟာ ကျောက်လုံးရွာအနီးမှာခေတ္တအထိုင်ချနေချိန် တော်လှန်ရေးတပ်ဖွဲ့ဝင်တွေအတွက် ထမင်းထုပ်ကို ကားနဲ့လာပို့တဲ့ TYK(သရက်ကန်) ပြောက်ကျားတပ်ဖွဲ့ခေါင်းဆောင် ကိုမြင့်သူ(ခ)ကိုကုလား ၂၉ နှစ်အပါ တော်လှန်ရေးတပ်ဖွဲ့ဝင် ၂ ဦးတို့နဲ့ ထိတွေ့မှုဖြစ်ခဲ့ပြီး ရှေ့ကင်းစောင့်နေတဲ့ စစ်ကောင်စီတပ်ဖွဲ့ဝင် ၁ ဦး သေဆုံးသွားသလို ကိုမြင့်သူလည်း သေဆုံးခဲ့ကာ ကျန်တော်လှန်ရေးတပ်ဖွဲ့ဝင် ၁ ဦးကတော့ ဒဏ်ရာတွေနဲ့ထွက်ပြေးလွတ်မြောက်ခဲ့တယ်လို့ ဆိုပါတယ်။

“ ကျသွားတဲ့ကိုမြင့်သူက ရှေ့တန်းရဲဘော်တွေအတွက်ဆိုပြီးတော့ စားစရာလာပြီးတော့ပို့တာ။ အဲဒီအခါမှာ ရှေ့ကင်းတွေနဲ့ ပတ်ပင်းတွေ့ပြီး အပြန်အလှန်ပစ်ခတ်မှုဖြစ်ပြီးတော့မှ ကိုမြင့်သူကလည်း စစ်ကောင်စီတယောက်ကို ပစ်ခတ်လိုက်နိုင်ပြီးတော့ ကိုမြင့်သူလည်း စစ်ကောင်စီရဲ့ လက်ချက်နဲ့ အဲ့နားမှာပွဲချင်းပြီး ကျဆုံးသွားတယ်ပေါ့။ ကိုမြင့်သူနဲ့ ပါသွားတဲ့နောက်ထပ်ရဲဘော်တယောက်က ဒဏ်ရာရပြီးတော့ ဆေးဝါးကုသမှုခံယူနေရတယ်” လို့ ကိုဘိုဘိုသန့်ဇင်က ဆက်ပြောပါတယ်။

စစ်ကောင်စီတပ်ဖွဲ့ဟာ တော်လှန်ရေးတပ်ဖွဲ့ဝင်တွေရဲ့ကားကိုမီးရှို့ဖျက်ဆီးခဲ့သလို ကိုမြင့်သူ ရဲ့ ရုပ်အလောင်းတခြမ်းကိုပါ မီးရှို့ဖျက်ဆီးသွားတာတွေ့ခဲ့ရပြီး ကျန်ရှိရုပ်အလောင်းကို ဖေဖော်ဝါရီ ၁၀ ရက် မနက် ၁၀ နာရီလောက်မှာ တော်လှန်ရေးပူးပေါင်းတပ်ဖွဲ့တွေက သင်္ဂြိုဟ်ပေးခဲ့တယ်လို့ ဆိုပါတယ်။

အဲဒီနေ့ ည ၁၂ နာရီလောက်မှာပဲ ကျောက်လုံးရွာနဲ့ ဝါးရင်းချိုင်ရွာကြားမှာ ဒုတိယအကြိမ် ထိတွေ့ပစ်ခတ်မှု ၄၅ မိနစ်ကြာဖြစ်ပွါးခဲ့ကာ စစ်ကောင်စီတပ်ဖွဲ့ဝင် ၃ ဦးသေဆုံးခဲ့ပြီး ဒေသခံတွေရဲ့ပြောကြားချက်အရ ၈ ဦးဒဏ်ရာရရှိသွားတယ်လို့ ဆိုပါတယ်။

ဒီတိုက်ပွဲကို အညာမြေတပ်ပေါင်းစု၊ TYK(သရက်ကန်)ပြောက်ကျားတပ်ဖွဲ့၊ ဝံပုလွေပျောက်ကြားတပ်ဖွဲ့၊ မြိုင် ပကဖ၊ မြိုင် ပကဖ(တပ်ရင်း ၁)၊ ပခုက္ကူခရိုင်တပ်ရင်း ၁၊ ၂၊ ၇၊ စင်္ကြာတပ်ဖွဲ့၊ Union brother၊ God of myaing၊ နံ့သာမြေယက္ခ၊ Kamma under ground people defance force နဲ့ ကမ္မတပ်ပေါင်းစု စတဲ့ တော်လှန်ရေးပူးပေါင်းအဖွဲ့တွေက ပူးပေါင်းလုပ်ဆောင်ခဲ့တယ်လို့ သိရပါတယ်။

ထိတွေ့မှုဖြစ်ပြီးချိန် စစ်ကောင်စီတပ်ဖွဲ့ဟာ အဲ့ဒီအနီးအနားမှာ ၁ ညအိပ် စခန်းချခဲ့ပြီး ဖေဖော်ဝါရီ ၁၀ ရက် မနက် ၁၁ နာရီကျော်လောက်မှာ မြိုင်မြို့နယ် စက်မှု – ၂ ထဲကို ပြန်လည်ဝင်ရောက်သွားတယ်လို့ သိရပါတယ်။

ယင်းစစ်ကောင်စီတပ်ဖွဲ့ဝင်တွေဟာ ဖေဖော်ဝါရီ ၃ ရက်နေ့ကတည်းက မြိုင်မြို့နယ် စက်မှု – ၂ ကနေထွက်လာတဲ့ စစ်ကြောင်းဖြစ်ပြီး ၎င်းစစ်ကြောင်းဟာ ဖေဖော်ဝါရီ ၃ ရက်နေ့က အညာမြေတပ်ပေါင်းစုအဖွဲ့ဝင် MUGDF စခန်းကိုမီးရှို့ခဲ့ကာ ဖေဖော်ဝါရီ ၉ ရက်နေ့ကလည်း မကျီးစင်ရွာနေအိမ် ၂၇ လုံးကို မီးရှို့ဖျက်ဆီးခဲ့ပြီး ရွာသား ၁ ဦးဖြစ်တဲ့ ကိုဝင်းစိုးကို မီးရှို့သတ်ဖြတ်သွားခဲ့ပါတယ်။

စာတည်း – ကိုချမ်း

ပဲခူး၊ ဇန်နဝါရီ ၁၉၊ ၂၀၂၅။

ပဲခူးတိုင်း၊ တောင်ငူခရိုင်၊ အုတ်တွင်းမြို့နယ်မှာ ကင်းလှည့်ထွက်လာတဲ့ စစ်ကောင်စီပူးပေါင်းတပ်ဖွဲ့ကို အနီးကပ် ပစ်ခတ်တိုက်ခိုက်ခဲ့တယ်လို့ People’s Defence Organization – Oktwin ဆီက သိရပါတယ်။

ဇန်နဝါရီ ၁၈ ရက် မနေ့ည ၉ နာရီခန့်မှာ အုတ်တွင်းမြို့မှာတပ်စွဲနေတဲ့ စစ်ကောင်စီတပ်ဖွဲ့နဲ့ အုတ်တွင်းမြို့မရဲစခန်းက ရဲတပ်ဖွဲ့၊ အုန်းပင်ရွာအုပ်ချုပ်ရေးမှူး ပူးပေါင်းအင်အား ၇ ဦးဟာ မြို့နဲ့ ၂ မိုင်ခန့်အကွာ အုန်းပင်ကျေးရွာအုပ်စုကို ဆိုင်ကယ် ၄ စီးနဲ့ ကင်းလှည့်မောင်းနှင်လာစဉ် သံတိုင်ခင်ရွာအနီးမှာ အနီးကပ်တိုက်ခိုက်ခဲ့တာလို့ ဆိုပါတယ်။

တိုက်ခိုက်မှုအတွင်း စစ်ကောင်စီပူးပေါင်းတပ်ဖွဲ့က ဗိုလ် ၁ ဦးအပါ စစ်ကောင်စီတပ်ဖွဲ့ဝင် ၃ ဦးနဲ့ အုန်းပင်ရွာအုပ်ချုပ်ရေးမှူးတို့ သေဆုံးခဲ့ပြီး စစ်ကောင်စီတပ်သား ၁ ဦးနဲ့ ရဲ ၂ ဦးဟာ ဆိုင်ကယ် ၁ စီးနဲ့ထွက်ပြေးလွတ်မြောက်သွားတယ်လို့ People’s Defence Organization – Oktwin ပြောရေးဆိုခွင့်ရှိသူက ပြောပါတယ်။

ဒါ့အပြင် သေဆုံးစစ်ကောင်စီတပ်ဖွဲ့ဝင်တွေထံကနေ MA 3 ၁ လက်၊ MA 11 ၁ လက်၊ G 3 ၂ လက် ၊ အူဇီ ၁ လက်၊ MA ကျည်ဘောက်မျိုးစုံ ၁၀ ခု၊ လက်ပစ်ဗုံး ၁ လုံး၊၊ ဓါးမြောင် ၂ ချောင်းတို့ကို သိမ်းဆည်းရခဲ့တယ်လို့ ဆိုပါတယ်။

ပြီးခဲ့တဲ့ ဒီဇင်ဘာလနောက်ဆုံးပတ်အတွင်းမှာလည်း အုတ်တွင်းမြို့နယ်အတွင်းရှိ မျက်နီကွင်း၊ ကြူအင်း၊ သရက်ကုန်း၊ နှောခင်၊ ဂရမ်မတီး၊ ထန်းကုန်း၊ ဝက်ကုန်းကျေးရွာတွေကို စစ်ကြောင်းထိုးလာတဲ့ စစ်ကောင်စီတပ်ဖွဲ့ဝင်နဲ့ People’s Defence Organization – Oktwin အဖွဲ့တွေအကြား ၆ ရက်ကြာတိုက်ပွဲဖြစ်ပွားခဲ့ရာ စစ်ကောင်စီတပ်ဖွဲ့ဝင် အများအပြားသေဆုံးခဲ့တယ်လို့ သိရပါတယ်။

စာတည်း – ဟိန်းစံ။

■ ၅ ဦးသေပြီး ၁၂ ဦး အရှင်ဖမ်းမိကာ သေနတ် ၁၅ လက်အပါ ခဲယမ်းမျိုးစုံ ကာကွယ်ရေးတပ်သိမ်းဆည်း

မကွေး၊ ဇန်နဝါရီ ၁၆၊ ၂၀၂၅။

မကွေးတိုင်း၊ ငဖဲမြို့နယ်အတွင်းမှာ အမ်းမြို့ဘက်ကထွက်ပြေးလာတဲ့ စစ်ကောင်စီတပ်ဖွဲ့ဝင်တွေနဲ့ ဇန်နဝါရီ ၁၃ – ၁၄ ရက်မှာ ၂ ရက်တာတိုက်ပွဲဖြစ်ပွားပြီး စစ်သားတွေနဲ့လက်နက်ခဲယမ်းတွေ ဖမ်းဆီးရခဲ့တယ်လို့ ချင်းကာကွယ်ရေးတပ် အရှို (CDF – Asho) ဆီက သိရပါတယ်။

ရခိုင်ပြည်နယ်၊ အမ်းမြို့နယ်ဘက်ကနေ ထွက်ပြေးလာတဲ့စစ်သားတွေကို ပိတ်ဆို့တားဆီးခဲ့ရာ ထိတွေ့တိုက်ပွဲတွေဖြစ်ပွားခဲ့ပြီး စစ်သား ၁၂ ဦး အရှင်ဖမ်းဆီးရမိကာ သေနတ် ၁၅ လက်၊ စိန်ပြောင်း ၁ လက်၊ ခဲယမ်းမျိုးစုံနဲ့ စစ်အသုံးအဆောင်ပစ္စည်းတွေလည်း သိမ်းဆည်းရရှိခဲ့တယ်လို့ ဆိုပါတယ်။

ဇန်နဝါရီ ၁၃ ရက်က အမ်း-ပဒါန်းလမ်းမပေါ်ရှိ ကြက်ရေစမ်းရွာစခန်းက ထွက်ပြေးလာတဲ့ စစ်ကောင်စီ တပ်ဖွဲ့ဝင် ၅ ဦးကို ငဖဲမြို့နယ်၊ ဂုတ်စည်းရိုးရွာအနီးမှာ တားဆီးပိတ်ဆို့ထားချိန် လက်နက်မချတာကြောင့် ပစ်ခတ်ဖမ်းဆီးခဲ့တယ်လို့ သိရပါတယ်။

“လက်နက်မချလို့ ပစ်ခတ်ခဲ့ရတယ်။ ခုခံတဲ့စစ်သား ၂ ဦးဒဏ်ရာရလို့ ဆေးကုသပေးရင်း သေသွားတယ်။” လို့ CDF-Asho တပ်ဖွဲ့ တာဝန်ရှိသူ ဆလိုင်းရိုးချင်းက ပြောပါတယ်။

ဒါ့အပြင် ဇန်နဝါရီ ၁၄ ရက်ကလည်း အမ်းမြို့နယ်၊ တောင်ဇောက်ရွာအနီးမှာ တိုက်ပွဲဖြစ်ပြီး ထွက်ပြေးလာတဲ့ စစ်ကောင်စီအင်အား ၁၀၀ ခန့်ကို ငဖဲမြို့နယ်၊ ရှောက်တောင်ရွာအနီး ကပစ ၁၄ နဲ့မီတာ ၂,၀၀၀ ခန့်အကွာမှာ လက်နက်မချတာကြောင့် တိုက်ပွဲထပ်မံဖြစ်ပွားခဲ့တယ်လို့ ဆိုပါတယ်။

အဲ့ဒီတိုက်ပွဲမှာလည်း စစ်ကောင်စီဘက်မှ ၃ ဦး ပွဲချင်းပြီးသေဆုံးခဲ့ပြီး ဖွဲ့စည်းပုံပျက်ကာ ထွက်ပြေးလွတ်မြောက်သွားတဲ့ စစ်သားတွေကို နယ်မြေရှင်းလင်းရေး လုပ်ဆောင်စဉ်စစ်သား ၈ ဦး ထပ်မံဖမ်းဆီးရမိခဲ့တယ်လို့ ဆိုပါတယ်။

တိုက်ပွဲအပါအဝင် အကြောင်းအမျိုးမျိုးနဲ့ အရှင်ဖမ်းဆီးမိတဲ့ စစ်သားတွေကို ကောင်းမွန်စွာထိန်းသိမ်းစောင့်ရှောက်ထားပြီး လိုအပ်တဲ့ စစ်ဆေးမှုတွေ ပြုလုပ်နေတယ်လို့ တပ်ဖွဲ့တာဝန်ရှိသူက ပြောပါတယ်။

တိုက်ပွဲအတွင်းမှ ထွက်ပြေးလွတ်မြောက်သွားတဲ့ စစ်ကောင်စီတပ်ဖွဲ့ဝင်တွေကို ဇန်နဝါရီ ၁၆ ရက်ဒီကနေ့အထိ နယ်မြေရှင်းလင်းရေးလုပ်ကာ ဆက်လက်ရှာဖွေနေတယ်လို့ သိရပါတယ်။

စာတည်း – ဈာန်မြင့်