စစ်ကောင်စီ

စစ်ကိုင်း၊ ဧပြီ ၇၊ ၂၀၂၃။

စစ်ကိုင်းတိုင်း၊ ကန့်ဘလူခရိုင်ရှိ ကျေးရွာအချို့က နေအိမ် ၁၇၄ လုံးကို စစ်ကောင်စီတပ်ဖွဲ့တွေက ၃ ရက်အတွင်း မီးရှို့ဖျက်ဆီးသွားတယ်လို့ ဒေသခံတွေဆီက သိရပါတယ်။

ကန့်ဘလူခရိုင်၊ ကိုးတောင်ဘို့တိုက်နယ် လျှော်ဖြူကုန်းရွာက နေအိမ်အလုံး ၆၀ ကို ကိုးတောင်ဘို့အထိုင် ခြေလျင်တပ်ရင်း-၁၃၇က စစ်ကြောင်း ၂ ကြောင်းခွဲပြီး ဧပြီလ ၂ ရက်နေ့မှာ ဝင်ရောက်မီးရှို့ခဲ့သလို အဲဒီရက်မှာပဲ နောက်ထပ်စစ်ကြောင်းတကြောင်းက ထန်းကုန်းတိုက်နယ် ဉာဏ်အင်းရွာက အိမ်ခြေ အလုံး ၄၀ ကို မီးရှို့ဖျက်ဆီးသွားခဲ့တယ်လို့ ဆိုပါတယ်။

ယင်းနောက် လျှော်ဖြူကုန်းရွာနဲ့ ဉာဏ်အင်းရွာကို မီးရှို့သွားတဲ့ စစ်ကောင်စီတပ်ဖွဲ့တွေဟာ ဧပြီလ ၃ ရက်နေ့မှာတော့ ထန်းကုန်းတိုက်နယ်၊ အင်းလယ်ကြီးရွာထဲကို ဝင်ရောက်ခဲ့ပြီး နေအိမ် ၇၀ နီးပါးကို မီးရှို့သွားတဲ့အပြင် စိတ်ဝေဒနာရှင်တဦးဖြစ်တဲ့ အသက် (၃၅)နှစ်အရွယ် ကိုဝလီကို ပစ်ခတ်သတ်ဖြတ်သွားတဲ့အပြင် အသက် (၆၅)နှစ်အရွယ် ဦးဌေးမောင်ကိုလည်း လက်ပြန်ကြိုးတုပ်ပြီး မီးရှို့သတ်ဖြတ်သွားခဲ့ပါသေးတယ်။

“ရွာသားတွေက အခုထိ ရွာထဲမဝင်ရသေးဘူး။ တချို့အိမ်တွေကလည်း မီးမငြိမ်းသေးတော့ မီးတွေပြန်ငြိမ်းနေရတယ်။ ရွာသားတွေက ကိုယ့်ယာတောထဲမှာပဲ အဆင်ပြေသလို တဲတွေထိုးပြီး နေနေကြတယ်။ စားဖို့သောက်ဖို့ကကျတော့ တယောက်စီကနေ တယောက်ဝေမျှစားနေရတယ်” လို့ အင်းလယ်ကြီးရွာ ဒေသခံတဦးက ပြောပါတယ်။

ကန့်ဘလူခရိုင်ထဲက မီးရှို့ခံရတဲ့ အဆိုပါကျေးရွာသုံးရွာထဲမှ လျှော်ဖြူကုန်းရွာဟာ အခုအကြိမ်နဲ့ဆို မီးရှို့ခံရတာ ၃ ကြိမ်မြောက်ရှိပြီးဖြစ်တယ်လို့လည်း ကျွန်းလှတက်ကြွလှုပ်ရှားသူများအဖွဲ့က ထုတ်ပြန်ထားပါတယ်။

စာတည်း – 007

ပေါင်းတည်၊ ဧပြီ ၅၊ ၂၀၂၃။

ပဲခူးတိုင်း(အနောက်ပိုင်း)၊ ပြည်ခရိုင်၊ ပေါင်းတည်မြို့နယ်မှာ ပုဒ်မ ၅၀၅(က)နဲ့ အမှုဖွင့်ခံရသူရဲ့ လယ်မြေတွေကို စစ်ကောင်စီက ဧပြီလ ၄ ရက် မနေ့မနက် ၉ နာရီလောက်က လုပ်ပိုင်ခွင့်ပိတ်သိမ်းသွားတယ်လို့ ကာယကံရှင်က ပြောပါတယ်။

ပေါင်းတည်မြို့နယ်၊ ဇီးအုပ်ရွာက ဦးညွှန့်လိူင်ကို စစ်ကောင်စီက အကြမ်းဖက်လို့စွပ်စွဲကာ ထွေအုပ်၊ မြေစာရင်း၊ စစ်သားနဲ့ရဲအင်အား ၂၀ လောက်က သူပိုင်ဆိုင်တဲ့လယ်ကွင်းထဲမှာ လုပ်ပိုင်ခွင့်ပိတ်သိမ်းတဲ့ ဗီနိုင်းစိုက်ထူခဲ့တာလို့ ဆိုပါတယ်။

“ကျနော်က ဘယ်ပါတီဝင်မှမဟုတ်ဘူး။ တက်ကြွလူပ်ရှားသူဖြစ်လို့သာ ၅၀၅(က)ဖွင့်ထားတာ၊ ခုလည်းအကြမ်းဖက်ဆိုပြီး စွပ်စွဲထားပြန်တယ်၊ လယ်ထဲမှာလည်း ချိတ်ပိတ်စာချိတ်သွားတယ်” လို့ လယ်ပိုင်ရှင် ဦးညွှန့်လိူင်က ပြောပါတယ်။

ဦးညွှန့်လိူင်ကိုစစ်ကောင်စီက အကြိမ်ကြိမ်ဖမ်းဆီးဖို့ကြိုးစားတဲ့အပြင် နေအိမ်ကိုချိတ်ပိတ်ထားပြီး လက်ရှိမှာ မိသားစုလိုက် တိမ်းရှောင်နေရတယ်လို့ ဆက်ပြောပါတယ်။

ပြီးခဲ့တဲ့ ၂၀၂၂ ခုနှစ် ဧပြီလဝန်းကျင်ကလည်း စစ်အုပ်က ဦးညွှန့်လိူင်နေအိမ်က ဆက်တီဝိုင်းတစုံ၊ စားပွဲ၊ မှန်တင်ခုံအပါ ကျပ်သိန်း ၈၀ ဖိုးလောက်ကို ဥပဒေမဲ့ ယူဆောင်သွားခဲ့ပါသေးတယ်။

စစ်ကောင်စီက ပေါင်းတည်မြို့နယ်ထဲက နွေဦးတော်လှန်ရေးမှာ ပါဝင်သူတွေနေထိုင်တဲ့ နေအိမ် ၁၀ လုံးကျော်ကို ချိတ်ပိတ်ထားတယ်လို့ သိရပါတယ်။

စာတည်း-007

ကန့်ဘလူ၊ ဧပြီ ၅၊ ၂၀၂၃။

စစ်ကိုင်းတိုင်း၊ ကန့်ဘလူခရိုင်၊ ထန်းကုန်းတိုက်နယ်၊ အင်းလယ်ကြီးရွာက နေအိမ် ၇၀ ကျော်ကို စစ်ကောင်စီတပ်တွေက မီးရှို့သွားတဲ့အပြင် ရွာသား ၂ ဦးကိုလည်း သတ်သွားတယ်လို့ ဒေသခံတွေဆီက သိရပါတယ်။

အင်အား ၁၀၀ ကျော်ရှိတဲ့ စစ်အုပ်စုဟာ ဧပြီလ ၃ ရက် ညနေ ၄ နာရီလောက်မှာ လက်နက်တွေပစ်ဖောက်ဝင်ရောက်လာပြီးနောက် စိတ်ကျန်းမာရေးချို့တဲ့သူ အသက် ၂၅ နှစ်အရွယ် ကိုဝလီနဲ့ အသက် ၇၀ အရွယ် ဦးဌေး‌မောင် တို့ကို သတ်သွားတာလို့ ဒေသခံတဦးက ပြောပါတယ်။

“ကိုဝလီက မွေးရာပါ စိတ်မမှန်တဲ့သူပါ၊ ရွာထဲမှာ သူသွားချင်သလိုသွားနေတာ။ စစ်သားတွေလားလည်းသူမသိဘူး၊ သူသွားချင်သလိုသွားနေတယ်။ ကျနော်တို့မနေ့က (ဧပြီလ ၄) ရွာထဲကို မီးဝင်ငြိမ်းတဲ့အချိန် အူတွေထွက်နေတဲ့ သူ့အလောင်းကို သူ့အိမ်ရှေ့မှာတွေ့တယ်။ ဦးဌေးမောင်အလောင်းကိုတော့ ဒီမနက်မှ သူ့အိမ်ပေါ်မှာတွေ့တယ်”လို့ ဆိုပါတယ်။

ကိုဝလီကိုတော့ စစ်အုပ်စုက လမ်းမှာတင်သေနတ်နဲ့ပစ်သတ်ခဲ့ပြီး ဦးဌေးမောင်ကိုတော့ လက်ပြန်ကြိုးတုပ်ပြီးမီးရှို့သတ်ခဲ့တာလို့လည်း ဆိုပါတယ်။

ဦးဌေးမောင်ကို ကျေးရွာကာကွယ်ရေးပကဖတပ်ဖွဲ့တွေက ကျေးရွာထဲကနေ ထွက်ဖို့ခေါ်ခဲ့ပေမယ့် မလိုက်ပဲ ရွာထဲမှာကျန်နေခဲ့ရာမှာ အခုလို အသတ်ခံလိုက်ရတာလို့ ကျေးရွာပကဖ တပ်ဖွဲ့ဝင်တဦးက ပြောပါတယ်။

“အရင်စစ်ကြောင်းတွေလာတိုင်း ဦးဌေးမောင်ကို ဘာမှမလုပ်ဘူး။ သူက အသက်ကြီးပြီဆိုတော့ အိမ်မှာပဲနေခဲ့တာများတယ်။ ဒီတခေါက်စစ်ကြောင်းလာတော့ သူ့ကိုသွားခေါ်တယ်၊ သူမလိုက်ဘူး အိမ်မှာပဲနေခဲ့မယ်ဆိုပြီး နေခဲ့လိုက်တာ၊ အခုလိုဖြစ်သွားတယ်”လို့ ဆိုပါတယ်။

သေဆုံးသွားတဲ့ ကိုဝလီရဲ့ အလောင်းကိုတော့ ဧပြီလ ၄ ရက်မနေ့က သင်္ဂြုဟ်ပေးလိုက်ပြီး ဦးဌေးမောင်ရဲ့ရုပ်အလောင်းကိုတော့ ဒီမနက်မှ သဂြိုလ်ပေးလိုက်တယ်လို့ သိရပါတယ်။

အိမ်ခြေ ၈၀၀ ကျော်ရှိတဲ့ အင်းလယ်ကြီးရွာဟာ အခုလိုမီးရှို့ခံရတာ ဒုတိယအကြိမ်ရှိပြီဖြစ်ပြီး၊ ပြီးခဲ့တဲ့ ၂၀၂၂ ခုနှစ်၊ အောက်တိုဘာလတုန်းကလည်း စစ်ကောင်စီတပ်ဖွဲ့တွေက အိမ်ခြေ ၁၃၆ လုံးကို မီးရှို့ဖျက်ဆီးသွားခဲ့ပါသေးတယ်။

စာတည်း – လင်း

ဆိပ်ဖြူ၊ ဧပြီ ၄၊ ၂၀၂၃။

မကွေးတိုင်း၊ ဆိပ်ဖြူမြို့နယ်၊ ကျစ်ပြင်ရွာကို စစ်ကောင်စီတပ်က စစ်ကြောင်းထိုးဝင်ရောက်လာပြီး နေအိမ်တလုံးကိုလည်း မီးရှို့သွားတယ်လို့ ဒေသခံတွေဆီက သိရပါတယ်။

ဧပြီလ ၄ ရက် ဒီမနက် ၁၀ နာရီလောက်မှာ အင်အား ၄၀ ကျော်ရှိတဲ့ စစ်ကောင်စီစစ်ကြောင်းက ပုသိမ် – မုံရွာလမ်းဘေးရှိ ကျစ်ပြင်ရွာထဲက နေအိမ်ကို မီးရှို့ခဲ့ပြီးနေ့လယ် ၁၂ နာရီကျော်လောက်မှာ ရွာကနေပြန်ထွက်ခသွားတယ်လို့ ဆိပ်ဖြူမြို့ခံတဦးက ပြောပါတယ်။

“စခတွေ ရွာထဲဝင်လာတာကို ရွာသားတယောက်ကတွေ့ပြီး၊ ရွာထဲကိုအချိန်မှီပြောနိုင်လို့ ရွာသားတွေကလွတ်သွားတယ်။မဟုတ်ရင် ရွာသားတွေလည်းအဖမ်းခံရနိုင်တယ်။ ဒီတခါဝင်လာတာက လက်နက်တွေပစ်ဖောက်တာမျိုးမဟုတ်ဘူး။ ဒီအတိုင်းအသံမပေးပဲ ဝင်လာတာ၊ ရွာထဲကအိမ်တအိမ်ကိုလည်း မီးရှို့သွားတယ်”လို့ ဆိုပါတယ်။

အဲ့ဒီစစ်အုပ်စုဟာ ရွာထဲက အခြားနေအိမ်တွေကိုလည်း ဝင်ရောက်မွှေနှောက်သွားခဲ့ပြီး၊ လက်ရှိမှာ ရွာသားအချို့ကတော့ ရွာထဲကို ပြန်၀င်နေကြပြီလို့လည်း ဆိုပါတယ်။

အိမ်ခြေ ၁၀၀ နီးပါးရှိတဲ့ ကျစ်ပြင်ရွာဟာ ခုလိုမီးရှို့ခံရတာ ပထမအကြိမ်ဖြစ်တယ်လို့လည်း ဆိုပါတယ်။

အခုနှစ် ဖေဖော်ဝါရီ ၂၁ ရက်ကလည်း ဆိပ်ဖြူမြို့နယ်က ကျေးရွာတွေထဲကို စစ်ကောင်စီတပ်ဖွဲ့တွေက ဝင်ရောက်လာခဲ့လို့ ကျစ်ပြင်၊ ရွာသာကုန်း၊ သက္ကယ်ကျင် နဲ့ ထွန်ရွာတို့က ဒေသခံပြည်သူ ၁၀၀၀ ကျော်ဟာ ဘေးလွတ်ရာကိုထွက်ပြေးတိမ်းရှောင်ခဲ့ရပါသေးတယ်။

စာတည်း – လင်း

ပုလဲ၊ ဧပြီ ၄၊ ၂၀၂၃။

စစ်ကိုင်းတိုင်း၊ ပုလဲမြို့နယ်မှာ စစ်ကောင်စီနဲ့ပျူတပ်သားတွေက စစ်ကြောင်းထိုးကာ ကျေးရွာတွေကို မီးရှို့ဖျက်ဆီးနေတာကြောင့် ဒေသခံပြည်သူ ၁ သောင်းကျော် ဘေးလွတ်ရာကိုထွက်ပြေးတိမ်းရှောင်နေကြရတယ်လို့ သိရပါတယ်။

အင်အား ၁၀၀ ကျော်ရှိတဲ့ အဲ့ဒီစစ်ကြောင်းဟာ ဧပြီလ ၂ ရက်နေ့မှာ နှောကန်ကျေးရွာကို မီးရှို့ဖျက်ဆီးခဲ့တာကြောင့် လူနေအိမ် ၁၂၀ လုံး ပြာကျပျက်စီးခဲ့တဲ့အပြင် နေအိမ်ထဲပိတ်မိကျန်ခဲ့တဲ့ အသက် ၇၈ နှစ်အရွယ် အဘွားတဦးလည်းမီးလောင်သေဆုံးခဲ့တယ်လို့ ပုလဲမြို့နယ်ပြည်သူ့အုပ်ချုပ်ရေးအဖွဲ့ရဲ့ ပြောရေးဆိုခွင့်ရှိသူက မြေလတ်အသံကို ပြောပါတယ်။

“မီးလောင်သေဆုံးတဲ့အဘွားက ဒုက္ခိတ လို့သိရတယ်။ ပြီးတော့ အဘိုးတယောက်လည်း မီးလောင်ဒဏ်ရာရခဲ့တယ်။ နှောကန်ရွာက တောင်သူလယ်သမားရွာဗျ။ ထွန်စက်တွေ၊ လယ်ယာသုံးပစ္စည်းတွေက အကုန်လုံးပြာတွေပဲ တွေ့ခဲ့ရတယ်။ စကစတွေက ရွာမီးမရှို့ခင် ရွာကလူတွေကို ထွက်မပြေးရင် လူတွေကိုပါ မီးရှို့လိုက်မယ်ပါပြောတာ” လို့ ပြောပါတယ်။

အခုလို နှောကန်ကျေးရွာ မီးရှို့ခံရတာကြောင့် အနီးအနားကရွာတွေဖြစ်ကြတဲ့ ငှက်ပျောတော၊ အင်းကန်၊ ကျေးနင်း၊ဆင်ရှင်၊ ကျောက်ဖျာကန်၊ မင်းတိုင်ပင်၊ သပြေကန် အပါအဝင် ကျေးရွာ ၁၀ ရွာက ဒေသခံ ၁၅၀၀၀ ခန့်ဟာ ဧပြီလ ၄ ရက် ဒီကနေ့အထိ အချိန်ထိ ထွက်ပြေးတိမ်းရှောင်နေကြရဆဲ ဖြစ်တယ်လို့ ဆိုပါတယ်။

“စကစတွေက မင်းတိုင်ပင်ရွာမှာ စခန်းချထားတယ်။ အဲဒီနေရာကပဲ အနီးတဝိုက်က ရွာတွေကို စစ်ကြောင်းဝင်ထိုးနေတာ။ ဒေသခံတွေကတော့ တော်တော်လည်း အကူအညီတွေ လိုအပ်နေပါတယ်။ ရွာကပြေးလာရတာက အဝတ်တထည်တည်းနဲ့ပြေးလာရတာလေ” လို့ သူကဆက်ပြောပါတယ်။

စစ်ကောင်စီတပ်က ကျေးရွာတွေကို ဝင်ရောက်မီးရှို့နေတာဟာ ဧပြီလ ၂ ရက်နေ့မှာ ဖြစ်ပွားခဲ့တဲ့ နှောကန်ကျေးရွာအနီးတိုက်ပွဲမှာ စစ်ကောင်စီတပ်ဘက်က အကျအရှုံးများခဲ့ပြီးတဲ့နောက် အခုလိုမီးတင်ရှို့နေတာလို့ ဆိုပါတယ်။

ဧပြီလ ၂ ရက်နေ့က မင်းတိုင်ပင်ရွာနဲ့ နှောကန်ရွာအကြားမှာ PDF တွေကို ဆိုင်ကယ်စီးပြီး သေနတ်နဲ့လိုက်ပစ်တဲ့ စစ်ကောင်စီတပ် ဗိုလ်ကြီးနဲ့တပ်သား ပစ်ခတ်ခံရလို့ သေဆုံးခဲ့ပြီး သေနတ် ၂ လက်လည်း PDF တွေဘက်က ရရှိခဲ့တဲ့အပြင် စစ်ကောင်စီစစ်ကြောင်း မိုင်းဆွဲတိုက်ခိုက်ခံရမှုတွေမှာလည်း ထိခိုက်သေဆုံးမှုတွေ များပြားနေတယ်လို့ သိရပါတယ်။

ပုံစာ – မီးရှို့ခံရတဲ့ နေအိမ်တွေနဲ့ စစ်ရှောင်ဒေသခံများ။

စာတည်း – ရင်ငြိမ်း

စစ်ကိုင်း၊ ဧပြီ ၄၊ ၂၀၂၃။

စစ်ကိုင်းတိုင်း၊ အင်းတော်မြို့နယ်၊ နတ်မဟုတ်ကလေးကျေးရွာက လူငယ်အမျိုးသားတဦးကို စစ်ကောင်စီလက်အောက်စစ်ခုံရုံးက ဧပြီလ ၃ ရက်နေ့မှာ ထောင်ဒဏ်တသက်တကျွန်း ချမှတ်လိုက်တယ်လို့ သိရပါတယ်။

ထောင်ချမှတ်ခံရသူမှာ အသက် ၂၄ နှစ်အရွယ် ကိုအေးမင်းထွန်းဖြစ်ပြီး PDF နဲ့ဆက်စပ်တယ်ဆိုကာ အကြမ်းဖက်မှုတိုက်ဖျက်ရေးဥပဒေပုဒ်မတွေဖြစ်တဲ့ ၅၀(ည)၊ ၅၂(က)နဲ့ ထောင်တသက်တကျွန်း ချမှတ်လိုက်တာဖြစ်တယ်လို့ Indaw Revolution-IR တာဝန်ခံက မြေလတ်အသံကို ပြောပါတယ်။

“အေးမင်းထွန်းက PDF ကို ရိက္ခာတွေပို့ပေးတယ်။ ကူညီထောက်ပံ့ပေးနေတယ်ဆိုတဲ့ စွပ်စွဲချက်နဲ့ ဖမ်းလိုက်တာပေါ့။ သူက PDF တပ်ဖွဲ့ဝင် မဟုတ်ဘူးဗျ။ သူကလူငယ်ဆိုတော့ PDFကို ထောက်ခံတဲ့သူတယောက်သာ ဖြစ်တယ်” လို့ ပြောပါတယ်။

ကိုအေးမင်းထွန်းဟာ ပြီးခဲ့တဲ့မတ်လ ၅ ရက်နေ့က နားရခေါင်ကျေးရွာကို ရောက်ရှိနေချိန် PDF ယူနီဖောင်းတွေ ဝတ်ဆင်ထားတဲ့ စစ်ကောင်စီတပ်သားတွေရဲ့ ဖမ်းဆီးတာကို ခံခဲ့ရသူဖြစ်ပါတယ်။

အလားတူ နဘားကျေးရွာအုပ်စု၊ ကန်းနီကျေးရွာက မီးသွေးဖုတ်နေတဲ့ ကိုမင်းမင်းဦး ၂၇ နှစ်ကိုလည်း စစ်ကောင်စီတပ်သားတွေက PDF လို့စွပ်စွဲဖမ်းဆီးကာ ဖေဖော်ဝါရီ ၂၇ ရက်နေ့ အင်းတော်စစ်ခုံရုံးက ပုဒ်မ ၅၀(ည)နဲ့ ထောင်ဒဏ်တစ်သက်တကျွန်း ချမှတ်ခဲ့တယ်လို့ သိရပါတယ်။

စစ်ကောင်စီက ဖေဖော်ဝါရီလ ၂ ရက်နေ့ကစတင်ကာ အင်းတော်မြို့အပါအဝင် စစ်ကိုင်းတိုင်းအတွင်းက မြို့နယ် ၁၄ ခုကို စစ်အုပ်ချုပ်ရေးကြေငြာခဲ့ကာ စစ်ခုံရုံးနဲ့ အမှုစစ်ဆေးပြီး အမြင့်ဆုံးပြစ်ဒဏ်တွေ ချမှတ်နေတယ်လို့ သိရပါတယ်။

စာတည်း – ရင်ငြိမ်း