စစ်ကောင်စီ

စစ်ကိုင်း၊‌ ဧပြီ ၄၊ ၂၀၂၂။

စစ်ကိုင်းတိုင်း မုံရွာအကျဥ်းထောင်မှာ မနေ့က ထောင်တွင်းဖိနှိပ်ခံရမှုတွေကို မကျေနပ်လို့ နိုင်ငံရေးအကျဥ်းသားတွေ ထောင်တွင်းလှုပ်ရှားမှုပြုလုပ်ခဲ့ချိန်မှာ စစ်ကောင်စီက ပစ်ခတ်ဖြိုခွင်းခဲ့လို့ အကျဥ်းသားတဦး သေဆုံးပြီး ၅ဦး ဒဏ်ရာရရှိခဲ့တယ်လို့ မုံရွာဒေသခံတဦးဆီက သိရပါတယ်။

ဧပြီလ ၃ရက်မနေ့က ညနေ ၅နာရီဝန်းကျင်လောက်ကစလို့ ဆူပူမှုဖြစ်နေခဲ့ပြီး အစပိုင်းမှာ သေနတ်ပစ်ဖောက်သတိပေးခဲ့ပေမယ့် ကြွေးကြော်သံတွေဟာ ပိုပြီး ဟိန်းထွက်လာခဲ့လို့ နောက်ထပ် မီးသတ်ကား၂စီး၊ စစ်ကားကြီး ၂စီးနဲ့ အိမ်စီးကားတွေ ဝင်သွားပြီးနောက်ပိုင်းမှာ သေနတ်သံ အချက် ၃၀ကျော် ထပ်ပြီးကြားခဲ့ရတယ်ဆိုတဲ့ အကြောင်းကို မုံရွာဒေသခံ ကိုအာကူးက ပြောပါတယ်။

“ထောင်ကမြို့လယ်ခေါင်မှာရှိတာဆိုတော့ တို့ပြည်သူတွေညီရဲ့လားဟေ့ဆိုတဲ့ အသံက ၁၅မိနစ်လောက်အထိ ဟိန်းထွက်သွားတယ်၊ အဲ့အချိန်မှာပဲ ရိုက်နှက်သံတွေ ဖြိုခွင်းသံတွေ အတိုင်းသားကြားရတယ်လို့ ကျနော်တို့သိရတယ်။အဲ့နောက်မှာ ၁ယောက်ကျတယ် ၅ယောက်ဒဏ်ရာရတယ်၊ ထောင်ကလည်း မီးနည်းနည်းလောင်သွားတယ်လို့ အကြမ်းဖျင်းသိထားတယ် ၊ ဓါတ်ပုံတွေအရကတော့ ဆုံးသွားတဲ့ တယောက်က ရင်ညွန့်ကို ထိသွားတာဗျ ” လို့ ကိုအာကူးက ပြောပါတယ်။

ဒဏ်ရာရရှိသူတွေကတော့ ဖြိုခွင်းခံရချိန်ပစ်ခံရတဲ့ ရာဘာကျည်တို့ ဘက်ခွ( လောက်လေးခွ) ဒဏ်ရာတွေ ရရှိထားပြီး ၂ဦးကတော့ ဒဏ်ရာပြင်းထန်တယ်လို့ သိရပါတယ်။

” ၂ယောက်ပဲ အခြေအနေဆိုးတယ်ဗျ၊ အသက်ကြီးကြီး အဖိုးကြီးတယောက်ကတော့ ခြေထောက်တွေ ဒူးတွေထိသွားတယ်ဗျ၊ သွေးတွေရဲလို့၊ နောက်ညီလေးတယောက်ကတော့ လက်တွေနဲ့ တစ်ကိုယ်လုံးထိထားတယ်” လို့ ဆက်ပြောပါတယ်။

ဒဏ်ရာရတဲ့ သူတွေကို စစ်ဆေးရုံနဲ့ ထောင်တွင်းဆေးရုံတခုခုမှာ ဆေးကုပေးနေပေမယ့် သေဆုံးသွားသူကတော့ ဘယ်သူဘယ်ဝါဆိုတာ မသိရသေးသလို သင်္ဂြိုလ်လိုက်တယ်လို့လည်းသတင်းမရသေးဘူးလို့ ပြောပါတယ်။

ထောင်တွင်းက နိုင်ငံရေးအကျဥ်းသားတွေက ထောင်တွင်းမှာဖြစ်ပျက်နေတာကို အပြင်က ပြည်သူတွေကို သိစေချင်တာရယ် ဘယ်တော့မှ သွေးအေးမသွားဘူးဆိုတာ ပြသတဲ့ အနေနဲ့ အခုလို ထောင်တွင်းလှုပ်ရှားမှုတွေကို လုပ်နေတာဖြစ်တယ်လို့ ကိုအာကူးကပဲ ဆက်ပြောပါတယ်။

” ထောင်ထဲက ရဲဘော်တွေက အကြောင်းမဲ့ ပြုလုပ်တာမဟုတ်ဘူးဗျ၊ သူတို့ ထောင်ထဲမှာ ဖိနှိပ်ခံရမှု ရက်စက်မှုတွေကို မခံနိုင်တဲ့ အဆုံးမှာ ကြွေးကြော်သံနဲ့ အတူ ပြည်သူလူထုကို အသိပေးခြင်းဖြစ်တယ်၊ အပြင်ကပြည်သူတွေလည်း သွေးမအေးကြဖို့ လှုံ့ဆော်တယ်လို့ ကောက်ချက်ချတယ်၊ ဒါကလည်းရဲဘော်တွေရဲ့ စိတ်နဲ့ ကျနော်နဲ့ တသားတည်းကျမှာပါ” လို့ ပြောပါတယ်။

အဲ့ဒီလို ဖြစ်နေတဲ့ အချိန်မှာ ပြည်သူတွေကလည်း သတင်းတုသတင်းမှားတွေ မတင်ဖို့နဲ့ မယုံကြဖို့ နဲ့ မနေ့က ၄၀ မမနဲ့ ပစ်တယ်ဆိုတဲ့ သတင်းတွေက မဟုတ်ဘူးဆိုတဲ့ အကြောင်းအပြင် အဲ့တာတွေက ထောင်ထဲမှာရှိတဲ့ ရဲဘော်တွေရဲ့လုံခြုံရေးကို အများကြီး ထိခိုက်စေနိုင်တယ်လို့ ပြောပါတယ်။

မနေ့ကညပိုင်းမှာ ဖြိုခွင်းခံရမှုကို လက်တုံ့ပြန်တဲ့ အနေနဲ့ မုံရွာမြို့အနှံ့မှာ ပေါက်ကွဲသံတွေထွက်ပေါ်ခဲ့ပြီး လက်ရှိမှာတော့ မုံရွာအကျဥ်းထောင်မှာ စစ်တပ်က တပ်စွဲထားပါတယ်။

မကွေး၊‌ ဧပြီ ၃၊ ၂၀၂၂။

မကွေးတိုင်း၊ ရေစကြိုမြို့နယ်၊ ရေလယ်ကျွန်းပေါ်ကို စစ်ကောင်စီက အင်အားအများအပြားနဲ့ စစ်ကြောင်းထိုးဝင်ရောက်လာပြီး အနည်းဆုံး ကျေးရွာ ၆ ခုကို မီးရှို့ထားပြီး ဖြစ်ပါတယ်။

ဧပြီလ ၂ ရက် မနေ့ကစပြီး ရေလယ်ကျွန်းပေါ်ကို စစ်ကြောင်း တခုကို အင်အား ၁၀၀ ဝန်းကျင်လောက်နဲ့ တရွာပြီးတရွာ လက်နက်ကြီးငယ်တွေ ပစ်ပြီး ဝင်ရောက်ကာ မီးရှို့တာတွေ ဒီနေ့အထိ လုပ်နေတယ်လို့ YSO No-1အဖွဲ့ခေါင်းဆောင်က ပြောပါတယ်။

“ဘုန်းကြီးကျောင်းတကျောင်းကို အရင်ဆုံး မီးရှို့ဖျက်ဆီးပစ်လိုက်ပါတယ်။ ပြီးတော့ အိမ် ၃ လုံးလောက် မီးရှို့ပြီး မိဖုရားရွာကို လက်နက်ကြီးနဲ့ ပစ်ဝင်ပြီး အဲ့ဒီရွာမှာ တညအိပ်ခဲ့တယ်။ အဲ့ဒီညဦးမှာ CDM ကျောင်းဆရာရဲ့ အိမ်ကို မီးစရှို့တဲ့အခါမှာ အိမ်ချင်းကပ်ရက်ဖြစ်တဲ့ အတွက် ၂ အိမ်ပြာကျသွားတယ်။ ဘာမှ မကျန်တော့ဘူး” လို့ YSO No-1 အဖွဲ့ခေါင်းဆောင်က ပြောပါတယ်။

အဲ့ဒီရွာက ဒေသခံ ပြည်သူ ၂၀၀ နီးပါးကို ဘုန်းကြီးကျောင်းပေါ် မှာ ဖမ်းဆီးထားပြီး လက်နက်ကြီးနဲ့ ချိန်ထားကာ ခြိမ်းခြောက်ဖမ်းဆီးထားခဲ့တယ်လို့ ပြောပါတယ်။

“လှုပ်ရဲတဲ့သူ လှုပ်ကြည့် လှုပ်ရင် ဒီပေါ်မှာ အကုန်ပစ်မယ်ဆိုပြီး ကျောင်းထဲကို လက်နက်ကြီးနဲ့ ချိန်ပြီးခြိမ်းခြောက်ထားတာပါ။ လူသားဒိုင်းသဘောနဲ့ သူတို့လုပ်နေတာ” လို့ YSO No-1 ခေါင်းဆောင်ကပဲ ပြောပါတယ်။

ဒီနေ့ မနက်ပိုင်းမှာ မိဖုရားရွာကနေ ဖြုံဖူးရွာကို မနက် ၈ နာရီဝန်းကျင်မှာ လက်နက်ကြီး ပစ်ဝင်လာခဲ့ပြီး ရွာတဝက်ကျော်ကို မီးရှို့သွားတယ်လို့ သိရပါတယ်။

“ရွာသားတွေ မရှိတော့တာတောင် လက်နက်ကြီးနဲ့ ပစ်ဝင်လာတာ၊ နွားတွေဘာတွေ ထိတာပေါ့ ၊ အဲ့မှာအိမ်ခြေ ၁၂၀ ကျော်ရှိတာကို အိမ်ခြေ ၇၀ ကျော်ကြီးက အကုန်လုံးပြာကျသွားတယ်ဗျ” လို့ အဲ့ဒီခေါင်းဆောင်ကပဲ ဆက်ပြောပါတယ်။

ဘုန်းကြီးကျောင်း မီးရှို့ခံလိုက်ရတဲ့ မီး‌လောင်ကျွန်းရွာက အသက် ၄၀ ကျော် မသန်စွမ်း အမျိုးသမီးတဦးကို စစ်ကောင်စီက သေနတ်နဲ့ ပစ်ခဲ့လို့ ဦးခေါင်းပွင့်သေဆုံးနေခဲ့ပါတယ်။

ဆက်ပြီးစစ်ကောင်စီကပဲ ပုန်းအောင်းနေတဲ့ နေရာတွေကို ရမ်းသမ်း ပစ်ခတ်ခဲ့လို့ အမျိုးသမီးတဦး သေနတ်ထိမှန်သေဆုံးခဲ့ပြန်ပါတယ်။

“အိမ်ခြေ ၇၀ ကျော် မီးလောင်ခဲ့တဲ့ ရွာကနေ တမိုင်ကျော်လောက်ရှိတဲ့ တောထဲမှာ ပုန်းအောင်းနေတဲ့ ပြည်သူ အသက် ၄၀ ကျော်အရွယ် ဒေါ်စီကို ချိုင်း( ဂျိုင်း) ကနေ ကျည်ဆံကဖောက်ဝင်ပြီး ပြန်မထွက်လာပဲ သေသွားပါတယ်” လို့ YSO No-1ခေါင်းဆောင်က ဆက်ပြောပါတယ်။

ဒေါ်စီဆိုတဲ့ အမျိုးသမီးကိုတော့ မီးသင်္ဂြိုလ်ပေးခဲ့ပြီးဖြစ်သလို လက်ရှိအချိန်အထိ ကျေးရွာပေါင်း ၃၀ နီးပါးက သက်ကြီးရွယ်အိုနဲ့ ကလေးသူငယ် အပါအဝင် နီးစပ်ရာ တောထဲကို ထွက်ပြေးတိမ်း‌ရှောင်နေရတယ်လို့ သိရပါတယ်။

ရေလယ်ကျွန်းပေါ်မှာ စစ်ကြောင်း ၃ကြောင်း နဲ့ စစ်ကောင်စီက ဝင်ရောက်ခဲ့တာဖြစ်လို့ လက်ရှိသိထားတဲ့ သတင်းအချက်အလက်တွေဟာ အနည်းဆုံးအရေအတွက်နဲ့ ခန့်မှန်းဆုံးရှုံးမှုတွေဖြစ်ပြီး အရပ်သား သေဆုံးသူ အနည်းဆုံး ၃ဦးထိ သေဆုံးခဲ့တယ်လို့ သိရပါတယ်။

မြေလတ်အသံ၊‌ မတ် ၃၀၊ ၂၀၂၂။

ပုသိမ်-မုံရွာလမ်းအတိုင်း တက်လာတဲ့ စစ်ကောင်စီကား ၆စီးဟာ မကွေးတိုင်း ငဖဲမြို့နယ် ပဒါန်းကျေးရွာအရောက်မှာ လမ်းဘေးတလျှောက်လူနေအိမ်တွေကို ကားပေါ်က ရမ်းသမ်းပစ်ခတ်သွားလို့ ပြည်သူ ၃ဦး သေနတ်ထိမှန်ပြီး ဆေးကုသနေရပါတယ်။

မင်းဘူးမြို့နယ် ပန်းတောင်းကျေးရွာဘက်ကနေ ရခိုင်ပြည်နယ် အမ်းဘက်ကို သွားတဲ့ အဲ့ဒီစစ်ကောင်စီ ကားတွေဟာ မတ်လ ၂၈ရက် က ပဒါန်းကျေးရွာကို ဖြတ်သွားချိန် ကားမောင်းနေရင်းပဲ ပစ်ခတ်သွားခဲ့တာဖြစ်တယ်လို့ ဒေသခံတဦးက ပြောပါတယ်။

” အဲ့ဒီပစ်ခတ်မှုကြောင့် ငဖဲမြို့နယ် ကုန်းသာရွာက စျေးလာဝယ်တဲ့ ပြည်သူ အမျိုးသား ၂ဦးနဲ့ ပဒါန်းက အမျိုးသမီး ၁ဦး စုစုပေါင်း ၃ဦးမှာ အမျိုးသား ၂ဦးက ခြေသလုံး ကျည်ထိတယ် အမျိုးသမီးကတော့ ခြေဖနောင့်ထိပြီး မင်းဘူးဆေးရုံကို လွှဲလိုက်ပြီး ဆေးဝါးကုသနေရတယ်၊ ပဒါန်းမှာ ရှိမရှိမသိရဘူး “ လို့ ဒေသခံတဦးက ပြောပါတယ်။

ပစ်ခတ်မှုကြောင့် လူ၃ဦး သေနတ်ထိမှန်တာအပြင် လမ်းဘေးတောက်‌လျှောက်က လူနေအိမ်တွေနဲ့ ဆိုင်တွေ ထိခိုက်ပျက်စီးတာတွေလည်း ရှိခဲ့ပါတယ်။

“ပဒါန်း နပခ( အနောက်ပိုင်းတိုင်းစစ်ဌာနချုပ် ကြားစခန်း) နားတစ်ဝိုက်နဲ့ လမ်းဆုံမီးပွိုင့် ယာဉ်ထိန်းရုံးလည်းကိုမှန်တယ် ပြီးတော့ သဇင်တည်းခိုခန်းခြေရင်း အပျိူကြီးဈေးဆိုင် က မှန်ဘီရိုမှန်တယ်မှန်ကွဲတယ် ရေခဲသေတ္တာ မှန်တယ်” လို့ ပြောပါတယ်။

မင်းဘူးမြို့နယ် ပန်းတောင်းကျေးရွာနဲ့ ငဖဲမြို့နယ် ပဒါန်းကျေးရွာကြားထဲမှာ အဲ့ဒီစစ်ကောင်စီ ကား ၆စီး မိုင်းဆွဲခံရတယ်လို့ သတင်းရရှိထားပြီး အဲ့ဒီကိစ္စကြောင့် ပဒါန်းကျေးရွာကို ဖြတ်သွားချိန်မှာ ပစ်ခတ်သွားတာဖြစ်နိုင်တယ်လို့ အဲ့ဒီဒေသခံကပဲ ပြောပါတယ်။

ပဲခူး၊‌ မတ် ၂၉၊ ၂၀၂၂။

ပဲခူးတိုင်း ပြည်မြို့နယ် တမ္မကောက်အုပ်စု တီတွတ်စံပြရွာက တိုင်းဒေသကြီးလွှတ်တော်ကိုယ်စားလှယ် အမှတ်(၁) ဦးသက်ဝင်းလှိုင်ရဲ့ နေအိမ်ကို စစ်ကောင်စီက ဒီနေ့ ညနေပိုင်းမှာ ချိတ်ပိတ်သွားခဲ့တယ်လို့ သိရပါတယ်။

ချိတ်ပိတ်ခံရတဲ့ လွှတ်တော်ကိုယ်စားလှယ်ဟာ ပြီးခဲ့တဲ့ နှစ် မေလ ၃ရက်က တော်လှန်‌ရေးလုပ်ငန်းဆောင်ရွက်နေစဥ် မတော်တဆမှုတခုကြောင့် ကျဆုံးသွားခဲ့သူဖြစ်ပြီး ဒီနေ့မှာ နေအိမ်ကို စစ်ကောင်စီက ချိတ်ပိတ်လိုက်တာကြောင့် ကျန်ခဲ့တဲ့ မိသားစုတွေဟာ အိမ်ငှားပြီး နေနေရတယ်လို့ ဒေသခံတဦးက ပြောပါတယ်။

” သူ့မိသားစုက လက်ရှိအိမ်ငှားပြီး နေနေရတယ် သားလေးရယ် သမီးလေးရယ် အမျိုးသမီးရယ်ပေါ့၊ သူတို့က အရမ်းကြောက်နေကြတယ်” လို့ ‌မိသားစုနီးစပ်သူ တဦးက ပြောပါတယ်။

ဥပဒေမဲ့ အာဏာသိမ်းပြီး ဥပဒေမဲ့ လုပ်ရပ်တွေကို လုပ်နေတဲ့ စစ်ကောင်စီကိုတော့ ပြောစရာ စကားမရှိပေမယ့် ကျန်နေခဲ့တဲ့ မိသားစုအတွက် ဒီလုပ်ရပ်ဟာ လူမဆန်တဲ့ လုပ်ရပ်တခုဖြစ်တယ်လို့ လုပ်ဖော်ကိုင်ဖက် သူငယ်ချင်းဖြစ်သူ လွှတ်တော်ကိုယ်စားလှယ် ဦးကျော်ဇေယျက ပြောပါတယ်။

” ဖခင်တယောက် ‌သေဆုံးထားလို့ ပူဆွေးသောကရောက်နေရတဲ့ သားသမီးတွေနဲ့ ခင်ပွန်းကို ဆုံးရှုံးထားလို့ သောကရောက်နေရတဲ့ ဇနီးသည်တွေ အတွက်ကို တော်တော်လူမဆန်တဲ့ လုပ်ရပ်ပေါ့ “လို့ ပြောပါတယ်။

ပြီးခဲ့တဲ့ ရက်ပိုင်းအတွင်းကလည်း ပြည်မြို့ ခေတ္တရာမြို့သစ် ၁လမ်းထိပ်က မိုဘိုင်းကမ္ဘာ ဖုန်းဆိုင်ကိုလည်း စစ်ကောင်စီက ချိတ်ပိတ်ခဲ့ပြီး ကပိုင်ရှင်ဖြစ်သူကို ဖမ်းဆီးသွားခဲ့တယ်လို့ သိရပါတယ်။

မကွေး၊‌ မတ် ၂၉၊ ၂၀၂၂။

မကွေးတိုင်း၊ ရေစကြိုမြို့နယ်က ကံပွင့်ပလက်စတစ်စက်ရုံကို စစ်ကောင်စီနဲ့ ပျူစောထီးတွေကို အဓိက ကူညီထောက်ပံ့နေလို့ ဒီနေ့ နေ့လယ်ပိုင်းမှာ ဖောက်ခွဲပြီး မီးရှို့ခံလိုက်ရတယ်လို့ ဒေသခံတဦးဆီက သိရပါတယ်။

ရေစကြိုမြို့၊ ပေကုန်းတိုးချဲ့ ရပ်ကွက်မှာ ရှိတဲ့ ကံပွင့်လုပ်ငန်းရဲ့ ပလက်စတစ်စက်ရုံကို မတ်လ ၂၉ရက် ဒီနေ့ နေ့လယ် ၂နာရီလောက်က ကားတစီးနဲ့ PDF တဖွဲ့ရောက်လာပြီး ဖောက်ခွဲမီးရှို့ခဲ့တာဖြစ်တယ်လို့ ဒေသခံတဦးက ပြောပါတယ်။

” PDF က Light Truck ကားနဲ့လာပြီး အလုပ်သမားတွေအကုန်ထွက်ခိုင်းပြီး စက်ရုံဖောက်ခွဲပြီး မီးနဲ့ ရှို့ပစ်လိုက်တာ ၊ကံပွင့်ပိုင်ရှင်က ရှင်မတောင်ဆရာတော်၊ ပျူစောထီးအဖွဲ့ စစ်တပ် နဲ့ ဦးစိုးမောင်တို့ကိုအဓိကပံ့ပိုးသူဖြစ်နေတာ၊ တမြို့လုံးလည်းသိပါတယ်၊တနိုင်ငံလုံးလည်းသိတယ်၊ စစ်တပ်ဆိုရင် ကံပွင့်ပိုင်ရှင်က ခါးပိုက်ဆောင်လိုထားတာ” လို့ အဲ့ဒီဒေသခံက ပြောပါတယ်။

အဲ့ဒီ စက်ရုံပိုင်ရှင်က ကံပွင့်ဆိုတဲ့ နာမည်နဲ့ လုပ်ငန်းပေါင်းစုံရှိပြီး ဆေးခန်းတခုလည်း ဖွင့်ထားပြီး ဆရာဝန်တွေကိုလည်း ဖိနှိမ့်တာမျိုးတွေရှိတယ်လို့ ‌သိရပါတယ်။

” သူဖမ်းချင်တဲ့ CDM လုပ်တဲ့လူတွေ သူ့ဆေးခန်းမလာတဲ့သူတွေဆိုရင် တခါထဲသွားဖမ်းခိုင်းတာ၊သူနဲ့မပြေလည်တဲ့သူမှန်သမျှစစ်တပ်ကိုလက်တို့လိုက်ရင် အကုန်လိုက်ဖမ်းတာ၊အဲလိုလုပ်နိုင်အောင်လည်း စစ်တပ်ကလူမှန်သမျှကို ပံ့ပိုးတယ်၊ကားလိုချင်ကားပေးထားတာ၊နောက်ပြီးတော့ကင်းလှည့်တဲ့စစ်သားမှန်သမျှ အရက်သောက်ဖိုးဟာကို သူ့သား ဖိုးသွေးက အရက်ဆိုင်မှန်သမျှကို ဘေဖွင့်ပေးထားတာ” လို့ ဒေသခံတဦးက ပြောပါတယ်။

စစ်သားတွေနဲ့ ပျူစောထီးမှန်သမျှ ကင်းလှည့်ပြီးပြန်လာချိန်မှာ အဲ့ဒီဆိုင်တွေမှာ ဝင်သောက်ခွင့်ရှိပြီး ကုန်ကျစရိတ်အားလုံးကို ကံပွင့်လုပ်ငန်းပိုင်ရှင်တွေက ထောက်ပံ့ပေးနေတာ ဖြစ်လို့ PDF အဖွဲ့က လာရောက် ဖောက်ခွဲ မီးရှို့ခဲ့တာဖြစ်ပြီး မီးသတ်ကား ၄စီးနဲ့ ငြှိမ်းသတ်နေတယ်လို့ ပြောပါတယ်။

ကံပွင့်လုပ်ငန်းပိုင်ရှင် ဦးအောင်သန်းဟာ အရင်က ကြံ့ခိုင်းရေးပါတီရဲ့ အမျိုးသားလွတ်တော် ကိုယ်စားလှယ်ဟောင်းတဦးဖြစ်သလို လက်ရှိသားဖြစ်သူက စစ်ကောင်စီကို အဓိက ထောက်ပံ့နေသူဖြစ်တယ်လို့ နောက်ထပ် ဒေသခံတဦးကလည်း မြေလတ်အသံကို ပြောပါတယ်။

” သူ့သားက လာသမျှ စခတွေ တို့ ပျူတို့ကို လာသမျှဟာတွေကို ဒိုင်ခံ ဧည့်ပြုတာ ထောက်ပံ့တာ ၊ အဲ့တာကြောင့်မလို့ PDF ဝင်ပြီး ဆုံးမတာ ဒီနေ့ ဒီနေ့” လို့ အတည်ပြု ပြောပါတယ်။

အဲ့ဒီစက်ရုံဖောက်ခွဲမီးရှို့တာကို ဘယ် PDF က လုပ်တယ်ဆိုတာမျိုး မထုတ်ပြန်သေးသလို ဘယ်အဖွဲ့ဆိုတာလဲ မသိရသေးပဲ စစ်ကောင်စီကတော့ ရမ်းသမ်းပစ်ခတ်တာတွေ လုပ်နေတယ်လို့ ပြောပါတယ်။

ကံပွင့်အမွှေးတိုင်လုပ်ငန်းကို အဓိက လုပ်ဆောင်ပြီး ရေသန့်၊ ပလက်စတစ်နဲ့ ဆေးခန်းအပြင် ၄ထပ် ဆေးရုံကိုလည်းတိုးချဲ့ ဆောက်နေပြီး အဓိက စစ်ကောင်စီကို ထောက်ပံ့နေတဲ့ လုပ်ငန်းတခုဖြစ်တယ်လို့ ဒေသခံတွေဆီက သိရပါတယ်။

ပဲခူး၊‌ မတ် ၂၉၊ ၂၀၂၂။

ပဲခူးတိုင်းဒေသကြီး၊ ပြည်မြို့တွင် လမ်းလျှောက်သင်္ကြန်၊ ဗဟိုမဏ္ဍပ်နှင့်နာမည်ကြီးဖျော်ဖြေရေးမဏ္ဍပ် များပါ ထည့်သွင်းကျင်းပရန် စစ်ကောင်စီက ပြင်ဆင်လျှက်ရှိသည်။

စစ်ကောင်စီက ဗဟိုမဏ္ဍပ်ကို ပြည်မြို့ နာရီစင်နှင့် စာတိုက်တန်းလမ်းတွင်ပြုလုပ်မည်ဖြစ်ပြီး လမ်းလျှောက်သင်္ကြန်ကို ကမ်းနားလမ်း ဈေးကြီနှင့်တရုတ်ဘုံကျောင်းအထိ၊ ရေကစားမဏ္ဍပ်နှင့်ဖျော်ဖြေရေး အစီစဉ်များတွင်လည်း မြို့၏ နာမည်ကြီးဂိုဏ်းများဖြင့်ဖွဲ့စည်းထားသည့်အဖွဲ့များပါဝင်မည်ဖြစ်ကြောင်း မြို့ခံများက ပြောသည်။

” နာမည်ကြီးမဏ္ဍပ်တခုကတော့ ညဈေးတန်းမှာ ဆောက်ဖို့ ပြင်ဆင်နေတယ်။ လူကြီးသားသမီးတွေ၊ စစ်ထောက်ခံတဲ့သူတွေ လူမိုက်တွေ စီးပွားလုပ်ငန်းရှင်တွေရဲ့သားသမီးတချို့လည်းပါဝင်တဲ့အဖွဲ့ပေါ့။ ဗဟိုမဏ္ဍပ်ကတော့ စာတိုက်တန်းလမ်းကိုပိတ်ပြီး ဆောက်မယ်။”ဟု မြို့ခံတဦးကပြောသည်။

ဖြေဖျော်ရေးယိမ်းအဖွဲ့များအတွက်လည်း နယ်မြေအလိုက် အသက် ၁၃ နှစ်မှ ၁၆ နှစ်အထိ မိန်းကလေးငယ် ၂၀ ဦးစီရွေးချယ်ခိုင်းထားပြီး စာရင်းကောက်မှုများလည်း ပြုလုပ်နေပြီဖြစ်ကာ ရပ်ကွက်အားလုံးမဏ္ဍပ် ဆောက်လုပ်ရမည်ဖြစ်ကြောင်း ရပ်ကျေးအုပ်ချုပ်ရေးမှူးတဦးထံ ကသိရသည်။

“ယိမ်းတွေအတွက်လည်း အမျိုးသမီးငယ်တွေကို လိုက်ရွေးနေတယ်။ သူတို့လက်အောက်ခံအုပ်ကြီးတွေနဲ့ စစ်ထောက်ခံအစိမ်းတွေအများဆုံးပါတယ်” ဟု မြို့ခံတဦးကပြောသည်။

မဏ္ဍပ်ဆောက်လုပ်ရန်နှင့် ယိမ်းအဖွဲ့များအတွက် လောင်းကစားလုပ်ငန်းများနှင့် KTV၊ စားသောက်ဆိုင်များ စီးပွားရေးလုပ်ငန်းရှင်များထံက ငွေကြေးကောက်ခံမှုများပြုလုပ်နေပြီဖြစ်ကြောင်း မြို့ခံများကပြောသည်။

စစ်ကိုင်း၊‌ မတ် ၂၈၊ ၂၀၂၂။

စစ်ကိုင်းတိုင်း၊ မြောင်မြို့နယ်အတွင်း မတ်လ ၂၇ ရက် မနေ့ကညနေပိုင်းမှာ စစ်ကောင်စီတပ်ဖွဲ့ဝင်တွေစီးလာတဲ့ ကားတစီး မိုင်းဆွဲတိုက်ခိုက် ခံခဲ့ရပါတယ်။

မြောင်မြို့ကနေထွက်လာတဲ့ အဲ့ဒီကားကို မြောင်မြို့တောင်ဘက်အထွက် ဆီဆိုင် ၂ ဆိုင်ကြားမှာ PDF သုံးဖွဲ့က ဆီးကြိုပြီး ပဒေသာမိုင်းနဲ့တိုက်ခိုက်ခဲ့တာလို့ မြောင်မြို့နယ်တော်လှန်ရေးတပ် – MRA တာဝန်ခံက ပြောပါတယ်။

“ ကျနော်တို့မိုင်းဆွဲတိုက်ခိုက်လိုက်တာပါ၊ မြောင်မြို့တောင်ဘက်အထွက် ဆီဆိုင် ၂ ဆိုင်ကြားထဲမှာ မိုင်းခွဲတိုက်ခိုက်လိုက်တာပါ၊ သူတို့က မြောင်ကနေ တောင်ဘက်ထွက်အလာ ညနေ ၄ နာရီလောက်မှာ ကျနော်တို့ တိုက်ခိုက်လိုက်တာပါ၊” လို့ သူကပြောပါတယ်။

တိုက်ခိုက်လိုက်တဲ့အချိန်မှာ ကားမှန်တွေလည်းကြေမွသွားပြီး၊ ကားထဲလိုက်ပါလာတဲ့ စစ်ကောင်စီတပ်ဖွဲ့ဝင် ၂ ဦးလည်း သေဆုံးခဲ့တယ်လို့ MRA တာဝန်ခံက ဆက်ပြောပြပါတယ်။

ဒီတိုက်ခိုက်မှုကို မြောင်မြို့နယ်တော်လှန်ရေးတပ် – MRA ၊ စစ်ကိုင်းခရိုင်တပ်ရင်း ၁ အရန်တပ်ခွဲ ၁ နဲ့ Zarmani Revolution Force ပြောက်ကျားတပ်ဖွဲ့တို့က ပူးပေါင်းတိုက်ခိုက်တာလို့ MRA ရဲ့ ထုတ်ပြန်ချက်မှာ ဆိုထားပါတယ်။

ဒါ့အပြင် မြောင်မြို့နယ်အတွင်း ပြောက်ကျားစစ်ဆင်ရေးတွေကို အရှိန်အဟုန်မြင့်လုပ်ဆောင်နေပြီး၊ အဲ့လိုလုပ်ဆောင်ရာမှာလည်း ပြည်သူတွေကို အထိအခိုက်မရှိအောင် ဂရုတစိုက်ဆောင်ရွက်နေတာဖြစ်သလို ပြည်သူတွေအနေနဲ့ကတော့ စစ်ကောင်စီတပ်တွေရဲ့ လှုပ်ရှားမှုတွေကို သတိကြီးကြီးထားပြီး ဂရုတစိုက်သွားလာကြဖို့ MRA က သတိပေး ပြောကြားထားပါသေးတယ်။

ဒီဖြစ်စဥ်မတိုင်ခင် ပြီးခဲ့တဲ့ မတ်လ ၂၄ ရက် ညပိုင်းမှာလည်း မြင်းမူမြို့နယ်အတွင်း ပတ်ကင်းလှည့်နေတဲ့ စစ်ကောင်စီအင်အား ၄၀ ကျော်ကို MRA အပါအဝင် မဟာမိတ် ၄ ဖွဲ့က မိုင်းဆွဲတိုက်ခိုက်ခဲ့တာကြောင့် စစ်သား ၂ ဦးသေဆုံးပြီး၊ ၈ ဦး ဒဏ်ရာပြင်းထန်ရရှိခဲ့တယ်လို့ မြေပြင်တိုက်ခိုက်သူ ရဲဘော်တွေရဲ့ပြောဆိုချက်အရ သိရပါတယ်။