မြေလတ်အသံ၊ စက်တင်ဘာ၇၊ ၂၀၂၅။
“ရွေးကောက်ပွဲကလည်း မင်းအောင်လှိုင် အာဏာတည်မြဲရေး၊ မင်းအောင်လှိုင်အတွက် ထွက်ပေါက်လုပ်ဖို့အတွက် လုပ်လာတဲ့ရွေးကောက်ပွဲသာလျှင်ဖြစ်ပြီးတော့ ကျန်တဲ့ခုနက စစ်တပ်အတွက် တိုင်းပြည်အတွက် လူထုအတွက်ကတော့ လုံးဝမဟုတ်ဘူးဆိုတာတော့ ကျိန်းသေပါတယ်။”
ဖြူး၊ စက်တင်ဘာ ၂၊ ၂၀၂၅
ပဲခူးတိုင်း၊ ဖြူးမြို့နယ်၊ မြို့ချောင်းတံတားပေါ် လမ်းလျှောက်လာတဲ့ လူငယ်အမျိုးသား ၂ ဦးကို တံတားစောင့်စစ်ကော်မရှင်တပ်ဖွဲ့က သေနတ်နဲ့ပစ်ခတ်လို့ ၂ ဦးစလုံးသေဆုံးခဲ့တယ်လို့ ဒေသခံတွေထံက သိရပါတယ်။
သေဆုံးသူတွေဟာ အောင်စည်ယွန်းကျေးရွာနေ အသက် ၁၆ နှစ် မောင်ဟိန်းဝေစိုးနဲ့ အသက် ၁၈ နှစ် ကိုမျိုးဇော်အောင်တို့ဖြစ်ပြီး စက်တင်ဘာ ၁ ရက် ယမန်နေ့မနက် ၈ နာရီ မိနစ် ၃၀ ခန့်မှာ အောင်စည်ယွန်းရွာကနေ မြို့ချောင်းကျေးရွာကို သွားရောက်စဥ် တံတားပေါ်မှာ ပစ်ခတ်ခံခဲ့ရတာလို့ ဆိုပါတယ်။
“တံတားပေါ်ဖြတ်နေတုန်း ပစ်ခံရတာ။ ၁ ယောက်က တံတားပေါ်မှာဆုံးတယ်။ ၁ ယောက်က ရွာရောက်မှဆုံးတာ။ ခြေလျင်သွားကြတာ။ စကစဘက်က တံတားနားမှာ စခန်းလုပ်ထားတာရှိတယ်။ ၁ ယောက်ကအိမ်ကိုပြန်ပြေးရင်း ဆေးရုံပို့မမီဘဲ အိမ်မှာဆုံးသွားတာပါ” လို့ အောင်စည်ယွန်းရွာခံတဦးက မြေလတ်အသံကို ပြောပါတယ်။
မြို့ချောင်းတံတားစောင့် စစ်ကော်မရှင်တပ်ဖွဲ့က လူငယ် ၂ ဦး လမ်းလျှောက်လာတာကို မေးမြန်းတာမရှိဘဲ သေနတ်နဲ့ပစ်ခတ်ခဲ့တာကြောင့် မောင်ဟိန်းဝေစိုးမှာ ရင်ဘတ်ကျည်ထိဒဏ်ရာနဲ့နေရာမှာသေဆုံးသွားခဲ့ပြီး မောင်မျိုးဇော်အောင် ကတော့ ဝမ်းဗိုက်ကျည်ထိဒဏ်ရာနဲ့ နေအိမ်အရောက်မှာ သေဆုံးသွားတာလို့ သိရပါတယ်။
တံတားပေါ်မှာ သေဆုံးသွားတဲ့ ဟိန်းဝေစိုးအလောင်းကို စစ်ကော်မရှင်တပ်ဖွဲ့က ကောက်ယူသွားပြီး ဖြူးဆေးရုံကိုပို့ဆောင်ပြီးနောက်မှာ ယမန်နေ့ညပိုင်းမှာ အလောင်းကို သင်္ဂြိုဟ်လိုက်ကြတယ်လို့ ဖြူးဆေးရုံနဲ့နီးစပ်သူတွေထံက သိရပါတယ်။
အဆိုပါ မြို့ချောင်းတံတားပေါ်ကို ဒေသခံပြည်သူတွေက ပုံမှန်သွားလာနေကြတာဖြစ်ပြီး ပြီးခဲ့တဲ့ ဩဂုတ်လလယ်ပိုင်းကစတင်ကာ မြို့ချောင်းကျေးရွာမှာ ကင်းပုန်းဝပ်နေထိုင်လာတာကြောင့် မြို့ချောင်းတံတားအပေါ်မှာ ဒေသခံပြည်သူဖြတ်သန်းသွားလာမှု နည်းသွားတယ်လို့ သိရပါတယ်။
ပြီးခဲ့တဲ့ ဇွန် ၂၉ ရက်ကလည်း ဖြူးမြို့နယ်၊ ဝဲဒေါင့်ဝဲကြီးကျေးရွာတိုက်ပွဲမှာ KNLA ပူးပေါင်းတပ်တွေနဲ့ စစ်ကောင်စီတပ်တွေ တိုက်ပွဲဖြစ်ပွားခဲ့ပြီး စစ်တပ်ဘက်က လေယာဥ်နဲ့ဗုံးကြဲလို့ ပြည်သူ ၄ ဦးသေဆုံးကာ ၅၀ ကျော်ဒဏ်ရာရရှိခဲ့ပါတယ်။
နိုင်ငံရေးအကျဥ်းသားများကူညီစောင့်ရှောက်ရေးအဖွဲ့-AAPP ရဲ့ စက်တင်ဘာ ၁ ရက် ယမန်နေ့ စာရင်းတွေအရ စစ်အာဏာသိမ်းပြီးနောက် စစ်ကော်မရှင်တပ်ရဲ့ သတ်ဖြတ်မှုကြောင့် အရပ်သားသေဆုံးမှု ၇,၁၆၉ ဦး ရှိပြီဖြစ်တယ်လို့ ထုတ်ပြန်ထားပါတယ်။
စာတည်း – ဟိန်းစံ
နတ်မောက်၊ ဩဂုတ် ၃၀၊ ၂၀၂၅။
မကွေးတိုင်း၊ နတ်မောက်မြို့နယ်၊ ကံသာကျေးရွာ၊ စက်တောကျေးရွာ၊ ကျောက်အိုးကျေးရွာကြားရှိ ဒေသအခေါ် သနပ်ပေါက်ကျောတဲတိုက်တွေအတွင်းကို စက်တပ်လေထီးနဲ့ ဗုံးကြဲခံရလို့ အမျိုးသမီး ၁ ဦးသေဆုံးပြီး ဖခင်ဖြစ်သူဒဏ်ရာရတယ်လို့ နတ်မောက်မြို့နယ်ပြည်သူ့ကာကွယ်ရေးအဖွဲ့ တာဝန်ခံဆီက သိရပါတယ်။
ဩဂုတ် ၃၀ ရက်မနက် ၉ နာရီကျော်မှာ မိတ္ထီလာဘက်ကတက်လာတဲ့ စက်တပ်လေထီး ၄ စီးထဲက ၁ စီးက ဗုံး ၄ လုံးကြဲချခဲ့ချိန် သနပ်ပေါက်ကျောတဲတိုက်မှာနေထိုင်ပြီး စိုက်ပျိုးရေးလုပ်နေကြတဲ့ သားအဖ ၂ ဦးကို ဗုံးစထိမှန်ပြီး ထိခိုက်သေဆုံးခဲ့ကြတာပါ။
“ဖအေက လယ်ထဲတဲဘေးမှာ ငရုပ်ခင်းဆေးဖြန်းနေတာ။ သမီးဖြစ်သူက ပေါင်းပေါက်နေချိန်မှာ ထိတာ။ အဲ့နားကတော်လှန်ရေးအဖွဲ့လည်းမရှိဘူး။ တိုက်ပွဲဖြစ်တာမရှိဘူး။ စစ်ကြောင်းထိုးတာလည်း မရှိဘူး”လို့ နတ်မောက်မြို့နယ်ပကဖ တာဝန်ခံကပြောပါတယ်။
ဗုံးထိမှန်တာကြောင့် အသက် ၂၆ နှစ်အရွယ် မအေးမာစိုးမှာ ဦးခေါင်းနဲ့နံကြားဗုံးစမှန်ပြီးနေရာတင်သေဆုံးသွားသလို ဖခင်ဖြစ်သူ အသက် ၅၀ အရွယ် စောလင်းဆိုသူမှာလည်း နောက်ကျောပေါက် ဒဏ်ရာရသွားတယ်လို့ ဆိုပါတယ်။
ဒါ့အပြင် နွား ၁ ကောင်သေဆုံးပြီး သူတို့နေထိုင်တဲ့ တဲ ၁ လုံး ပျက်စီးသွားတယ်လို့သိရကာ ဦးစောလင်း ကိုတော့ နီးစပ်ရာဆေးခန်းကိုပို့ဆောင်ပြီး ဆေးကုသမှုပေးနေတယ်လို့ သိရပါတယ်။
ပြီးခဲ့တဲ့ ဩဂုတ် ၂၄ ရက်ညပိုင်းကလည်း နတ်မောက်မြို့နယ်၊ လဲ့ဘူးကျေးရွာကို စစ်ကော်မရှင်တပ်က လေကြောင်းကနေဗုံးကြဲခဲ့တာကြောင့် ကလေးငယ် ၂ ဦးအပါအဝင် ၅ ဦးသေဆုံးပြီး ၁၁ ဦး ဒဏ်ရာရခဲ့သေးတယ်လို့ သိရပါတယ်။
၂၀၂၁ စစ်အာဏာသိမ်းချိန်ကနေ ၂၀၂၅ သြဂုတ် ၂၉ ရက်ထိ စစ်ကော်မရှင်တပ်နဲ့ လက်အောက်ခံတွေကြောင့် သေဆုံးခဲ့ရတဲ့ပြည်သူစုစုပေါင်း ၇,၁၅၉ ဦးရှိတယ်လို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း – AAPP က ထုတ်ပြန်ထားပါတယ်။
စာတည်း – လင်း
ချောက်၊ ဩဂုတ် ၂၃၊ ၂၀၂၅။
မကွေးတိုင်း၊ ချောက်မြို့ပေါ်နဲ့ မြို့အနီးကျေးရွာတွေမှာ သြဂုတ်လအတွင်း စစ်ကော်မရှင်တပ်က ပေါ်တာဆွဲဖမ်းဆီးမှုတွေ ဆက်တိုက်လုပ်နေပြီး ဖမ်းမိသူတွေကိုလည်း သိန်းဆယ်နဲ့ချီတောင်းကာ ပြန်ရွေးခိုင်းနေတယ်လို့ ချောက်မြို့ခံတွေဆီက သိရပါတယ်။
ချောက်မြို့ပေါ် နဲ့ အုံမြှားကြီးရွာ၊ ကျောက်တဲရွာတွေအပါ မြို့အနီးရှိကျေးရွာတွေက အသက် ၄၀ ဝန်းကျင် အမျိုးသားတွေ ဖမ်းဆီးခံခဲ့ရပြီး ဩဂုတ် ၁ ရက်ကနေ ၂၃ ရက်အတွင်း ဖမ်းခံရသူဦးရေ စုစုပေါင်း ၆၀ ဦးလောက်ရှိနိုင်တယ်လို့ ဆိုပါတယ်။
“ချောက်မြို့ပေါ်ကအပြင် ရွာဘက်တွေကလည်း ပါသွားတာ၊ ကျမတို့အိမ်နားကကို ၂ ဦးပါသွားတယ်၊ အဓိကတော့ ပိုက်ဆံပေးရင်လွှတ်တယ်၊ တခါတော့ လွှတ်မှာပဲ၊ လူတွေလည်း တခါပဲပေးနိုင်မှာပဲ၊ သိန်း ၃၀ တောင်းတာလည်းရှိတယ်၊ သိန်း ၆၀၊ သိန်း ၈၀၊ သိန်း ၅၀ တောင်းတာလည်းရှိတယ်၊ မပေးနိုင် ပါပေါ့၊ ဒါပဲရှိတော့တယ်” လို့ ချောက်မြို့ခံအမျိုးသမီးတဦးက ပြောပါတယ်။
မြို့ပေါ်မှာဖမ်းမိသူတွေကို ငွေကျပ်သိန်း ၂၀ ကနေ ၈၀ အတွင်းတောင်းကာ ပြန်ရွေးခိုင်းပြီး ကျေးရွာဘက်တွေက ဖမ်းဆီးခံရသူတွေကိုတော့ ငွေကျပ်သိန်း ၁၀၀ ကျော်က စတင်တောင်းနေတာလို့လည်း သူကဆက်ပြောပါတယ်။
“တပ်စွဲနေတာတော့ မရှိဘူး၊ ပတ်ပြီးဖမ်းတာ၊ နောက်ဆုံးလူပို့ခါနီးမှာ ဆွဲတာက ကျောက်တဲရွာဘက်မှာ တော်တော်ဆွဲသွားတယ်၊ အုံမြှားကြီးရွာဘက်ကလည်း ပါသွားတယ်၊ ပြန်လိုချင်လို့ တောင်းရင်းလည်း ရွာတွေဘက်ကို (ပိုက်ဆံ)တော်တော်များများတောင်းတယ်၊” လို့ ဆိုပါတယ်။
ဖမ်းဆီးထားတဲ့သူတွေကို ချောက်မြို့ စစ်ကွင်းရပ်ကွက် ခလရ ၁၃ မှာအရင်ထားရှိပြီးနောက် ရှမ်းပြည်နယ်၊ ကျိုင်းတောင်း (အမှတ် ၁၃ တပ်မတော်တန်းမြင့်လေ့ကျင့်ရေးကျောင်း) သင်တန်းကျောင်းကိုပို့ပြီး စစ်သင်တန်းတက်ခိုင်းတယ်လို့သိရကြောင်း သူကဆက်ပြောပါတယ်။
ခုလိုပေါ်တာဆွဲဖမ်းဆီးမှုတွေရှိနေတာကြောင့် ည ၈ နာရီထိုးရင် ဒေသခံတွေ အသွားအလာနည်းသွားကြတယ်လို့ ဆိုပါတယ်။
ပြီးခဲ့တဲ့ ဇူလိုင်လပိုင်းမှာလည်း ချောက်မြို့နဲ့ အနီးတဝိုက်ကျေးရွာတွေက ဒေသခံတွေကို စစ်ကော်မရှင်တပ်က အဓမ္မဖမ်းဆီးပြီး ရှမ်းပြည်တောင်ပိုင်း သင်တန်းကျောင်းကို စစ်သင်တန်းလုပ်ဖို့ပို့ဆောင်ခဲ့ကာ တချို့ကိုလည်း ရှေ့တန်းကိုပို့ခံခဲ့ရတယ်လို့ ချောက်မြို့ခံ အမျိုးသမီးတဦးဆီက သိရပါတယ်။
စာတည်း – လင်း
ကန့်ဘလူ၊ ဩဂုတ် ၁၉၊ ၂၀၂၅ ။
စစ်ကိုင်းတိုင်း၊ ကန့်ဘလူမြို့နယ်အတွင်း စစ်ကော်မရှင်တပ်နဲ့ တော်လှန်ရေးပူးပေါင်းတပ်တွေအကြား တိုက်ပွဲတွေဖြစ်ပွားပြီးနောက် ကျေးရွာ ၄ ရွာကို စစ်တပ်က မီးရှို့ခဲ့တာကြောင့် နေအိမ် ၁၀၀ ထက်မနည်း ပျက်စီးခဲ့တယ်လို့ ကန့်ဘလူခရိုင်ပကဖ ပြန်ကြားရေးတာဝန်ခံထံက သိရပါတယ်။
ဩဂုတ် ၁၅ ရက်မှာ ငါတို့ကျေးရွာကနေ ထွက်လာတဲ့ စစ်ကော်မရှင်တပ်နဲ့ပျူစောထီး ပူးပေါင်းအင်အား ၃၀၀ ကျော်ပါစစ်ကြောင်းဟာ ဩဂုတ် ၁၇ နဲ့ ၁၈ ရက်တွေမှာ ကိုင်းရိုး၊ သရက်တာ၊ အင်္ဂါဒေါင့်ကျေးရွာတွေကို ၂ ရက်ဆက်တိုက်မီးရှို့ခဲ့ပြီး ဩဂုတ် ၁၉ ရက် ဒီကနေ့မှာ ကျေးပင်အက်ရွာကိုရောက်ရှိကာ မီးထပ်ရှို့နေတာလို့ ဆိုပါတယ်။
” သူတို့စိုးမိုးထားတဲ့ နယ်မြေမဟုတ်တော့ ရွာတွေမှာ ကျနော်တို့ရှိနေတယ်လို့ သူတို့ယူဆမယ်။ ပြည်သူနဲ့တော်လှန်ရေးအဖွဲ့ကို ရန်တိုက်ပေးဖို့လုပ်တာ။ တော်လှန်ရေးအဖွဲ့တွေကို မထောက်ပံ့နိုင်အောင် လုပ်တာ။ တိုက်ပွဲတွေဖြစ်ပြီးမှ ရွာတွေကို မီးရှို့တာ”လို့ ကန့်ဘလူခရိုင်ပကဖပြန်ကြားရေးတာဝန်ခံက မြေလတ်အသံကို ပြောပါတယ်။
စစ်ကော်မရှင်စစ်ကြောင်း မီးရှို့လို့ ကိုင်းရိုးရွာက နေအိမ် ၅ လုံး၊ သရက်တာနဲ့ အင်္ဂါဒေါင့်ကျေးရွာက နေအိမ်အလုံး ၁၀၀ ကျော် မီးလောင်ပျက်စီးခဲ့ပြီး ကျေးပင်အက်ကျေးရွာပျက်စီးဆုံးရှုံးမှု အခြေအနေတွေကိုတော့ မသိရသေးဘူးလို့ ဆိုပါတယ်။
စစ်ကြောင်းထိုးလာတဲ့ စစ်ကော်မရှင်တပ်ဖွဲ့တွေနဲ့ ဒေသကာကွယ်ရေးပူးပေါင်းအဖွဲ့တွေအကြား ဩဂုတ် ၁၅ ရက်ကနေ ၁၉ ရက်အထိ ၄ ရက်အတွင်း ယမားကျေးရွာ၊ သရက်တောနဲ့ အင်္ဂါဒေါင့်ကျေးရွာ၊ ကျေးပင်အက်ကျေးရွာတွေအနီးမှာ တိုက်ပွဲ ၄ ကြိမ် ဖြစ်ပွားခဲ့ပြီးနောက် အခုလို ရွာတွေကို မီးရှို့နေတာလို့ သိရပါတယ်။
စစ်ကြောင်းဟာ ဒီကနေ့ညနေပိုင်းအထိ ကျေးပင်အက်ကျေးရွာ အနီးဝန်းကျင်မှာရှိနေသေးပြီး စစ်ကြောင်းထိုးလာတာ၊ တိုက်ပွဲဖြစ်ပွားတာတွေနဲ့ နေအိမ်မီးရှို့တာတွေကြောင့် အိမ်ခြေ ၂၀၀ ကနေ ၃၀၀ ကျော်ထိရှိတဲ့ ကိုင်းရိုး၊ ကျေးပင်အက်၊ အင်္ဂါဒေါင့်၊ သရက်တာ၊ ကျွန်းပင်ကုန်း၊ ယမ၊ ယသစ်၊ ထိန်တောအပါအဝင် ကျေးရွာ ၁၂ ရွာခန့်က ဒေသခံ ၁၀,၀၀၀ ဝန်းကျင် ထွက်ပြေးတိမ်းရှောင်နေရတယ်လို့ သိရပါတယ်။
မြေလတ်အသံ၊ ဇူလိုင် ၂၄၊ ၂၀၂၅။
ပဲခူးတိုင်း၊ အုတ်ဖိုမြို့နယ်၊ ကြို့ကိုးပင်ရွာကိုမီးရှို့တဲ့ စစ်ကောင်စီတပ်ဖွဲ့ဝင်တွေကို ဝင်ရောက်တိုက်ခိုက်ခဲ့ရာ သေဆုံးမှုတွေရှိပြီး စစ်အသုံးအဆောင်ပစ္စည်းတွေကိုလည်း သိမ်းဆည်းရရှိခဲ့တယ်လို့ ရွှေတန်းမြေပြည်သူ့ကာကွယ်ရေးအဖွဲ့က ပြောပါတယ်။
စစ်အင်အား ၁၀၀ ခန့်နဲ့ ကျေးရွာအတွင်းဝင်ရောက်တပ်စွဲထားချိန် ဇူလိုင် ၂၂ ရက် ည ၈နာရီမှာ ၁ ကြိမ်၊ ဇူလိုင်၂၃ ရက် မနက် ၅ နာရီမှာ ၁ ကြိမ် ဝင်ရောက်တိုက်ခိုက်ခဲ့တာလို့ ရွှေတန်းမြေပြည်သူ့ကာကွယ်ရေးအဖွဲ့မှ တာဝန်ရှိသူတဦးက ပြောပါတယ်။
“ည ၈ နာရီလောက်မှာ တော်လှန်ရေးတပ်ဖွဲ့တွေ လက်နက်ကြီးနဲ့သွားပစ်ကြသေးတယ် မအောင်မြင်ခဲ့ဘူး။ မနက် ၅ နာရီလောက်မှာ ဒုတိယအကြိမ်သွားပြီးတိုက်ခိုက်ရာမှာ **အကောင် ၂၀ ကျော်ကျတယ်”လို့ သူကပြောပါတယ်။
တိုက်ပွဲအတွင်း စစ်ကောင်စီတပ်ဘက်က စစ်ကူတွေရောက်ရှိလာပြီးနောက် သေဆုံး၊ ဒဏ်ရာရတွေကို သယ်ထုတ်ထွက်ခွာသွားတဲ့အတွက် တော်လှန်ရေးတပ်ဖွဲ့တွေအနေနဲ့ စစ်ကောင်စီတပ်စွဲခဲ့တဲ့နေရာကို ဝင်ရောက်နိုင်ခဲ့တယ်လို့ အထက်ပါတာဝန်ရှိသူကဆိုပါတယ်။
စစ်ကောင်စီတပ်တွေတပ်စွဲခဲ့တဲ့ ကျေးရွာအတွင်းရှိ တိုက်အိမ်နေရာက စစ်ယူနီဖောင်းတွေ၊ ဆိုင်ကယ်တွေ၊ ဖုန်းတွေ၊ အီနာဂါ ၂ လုံး၊ G 3 ၁ လက်၊ လက်ပစ်ဗုံး ၁ လုံး၊ ၆၀ သီး ၁ လုံးတို့ကို သိမ်းဆည်းရရှိခဲ့တယ်လို့ သူကပြောပါတယ်။
ဒီတိုက်ခိုက်မှုကို သာယာဝတီခရိုင်ပကဖ၊ အမှတ်(၁)တိုက်ခိုက်ရေးတပ်ဖွဲ့၊ ရွှေတန်းမြေပြည်သူ့ကာကွယ်ရေးအဖွဲ့၊ မိုးညိုပြည်သူ့ကာကွယ်ရေးအဖွဲ့၊ သာယာဝတီခရိုင် ၃၈၀၁ တပ်ခွဲ(၅)၊ ဇီးကုန်မြို့နယ်ပြည်သူ့ကာကွယ်ရေးအဖွဲ့တို့က ပူးပေါင်းလုပ်ဆောင်ခဲ့တာဖြစ်ပါတယ်။
စစ်ကောင်စီတပ်က အိမ်ခြေ ၃၀၀ ခန့်ရှိတဲ့ကြို့ကိုးပင်ကျေးရွာမှာ ဇူလိုင် ၂၁ ရက်ကစကာ ၂၃ ရက်မနက်ပိုင်းအချိန်အထိ တပ်စွဲနေခဲ့ရာ လူနေအိမ် ၆ လုံးကို မီးရှို့ဖျက်ဆီးခဲ့တယ်လို့ ပျက်စီးနေအိမ်တွေကို မှတ်တမ်းသွားယူခဲ့တဲ့ တပ်ဖွဲ့ဝင်တဦးက ပြောပါတယ်။
တည်းဖြတ် – M
နတ်မောက်၊ ဇူလိုင် ၁၉၊ ၂၀၂၅။
မကွေးတိုင်း၊ နတ်မောက်မြို့နယ်၊ ကန်သာအုပ်စု၊ ကန်သာကျေးရွာကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် စာသင်ကျောင်းနဲ့ စေတီတချို့ပျက်စီးခဲ့တယ်လို့ နေပြည်တော်စစ်ဒေသ ၉၀၃ တပ်ရင်းဆီက သိရပါတယ်။
ဇူလိုင် ၁၉ ရက် မနက် ၁၁ နာရီလောက်မှာ စက်တပ်လေထီးနဲ့ ပေါင် ၃၀၀ ဗုံး ၂ လုံးကြဲချတာကြောင့် စာသင်ကျောင်းနဲ့ စေတီတချို့အပေါ်ကျရောက်ပေါက်ကွဲခဲ့တယ်လို့ ဆိုပါတယ်။
“ကန်သာကျေးရွာ စာသင်ကျောင်းကို ကြဲသွားတာ၊ အလယ်တန်းကျောင်းကိုပါ၊ လူထိခိုက်သေဆုံးတာတော့ မရှိသေးဘူး၊ ကန်သာကျေးရွာစေတီတချို့ ပျက်စီးသွားတယ်၊ ဘုန်းကြီးကျောင်းက သိမ်လည်း ပျက်စီး သွားတယ်၊ သိမ်လည်း တခြမ်းပါသွားတယ်၊ စာသင်ကျောင်းကတော့ လုံးလုံးပျက်စီးသွားတယ်၊” လို့ နေပြည်တော်စစ်ဒေသ ၉၀၃ တပ်ရင်း တပ်ရင်းမှူး ဗိုလ်အောင်ဒင်က ပြောပါတယ်။
ဗုံးစထိခဲ့တဲ့ကျောင်းမှာ ဆယ်တန်းအထိဖွင့်လှစ်သင်ကြားနေတဲ့ အစိုးရကျောင်းဖြစ်ပြီး ဒီကနေ့ အာဇာနည်နေ့အဖြစ် ကျောင်းပိတ်ထားလိုက်တဲ့အတွက် လူအထိအခိုက်မရှိခဲ့တာလို့လည်း ဆိုပါတယ်။
“အဲ့ဒီကျောင်းက ၁၀ တန်းအထိ ဖွင့်ထားတယ်၊ သူတို့ဖွင့်လှစ်ခွင့်ပေးထားတဲ့ကျောင်းကိုတောင် သူတို့ကိုယ်တိုင်လာကြဲသွားတယ်ဆိုတော့ ကျနော်တို့လည်း စဉ်းစားမရဘူးဖြစ်နေတယ်၊ သူတို့က စာသင်ကျောင်းနဲ့ ဘုန်းကြီးကျောင်းတွေကို ဦးတည်ပြီးလုပ်နေတာဆိုတော့ ဒီကလေးတွေအတွက် စိတ်မကောင်းပါဘူး၊” လို့ သူက ဆက်ပြောပါတယ်။
ကန်သာကျေးရွာဟာ အိမ်ခြေ ၃၀၀ နဲ့ လူဦးရေ ၃,၀၀၀ ဝန်းကျင်ရှိပြီး ခုလို လေကြောင်းကနေ တိုက်ခိုက်ခံရတာကြောင့် ဒေသခံတွေလည်းကြောက်လန့်နေကြတယ်လို့ သိရပါတယ်။
စာတည်း – လင်း
ဆော၊ မေ ၂၈၊ ၂၀၂၅။
မကွေးတိုင်း၊ ဂန့်ဂေါခရိုင်PDF အမှတ် ၁၆ တပ်ရင်း ဒုတပ်ရင်းမှူးရဲ့ဇနီးလည်းဖြစ်တဲ့ CDM ရဲတပ်ဖွဲ့ဝင်အမျိုးသမီး စစ်ကောင်စီတပ်ရဲ့ပစ်ခတ်မှုခံရပြီး သေဆုံးခဲ့တယ်လို့ မိသားစုဝင်တွေထံက သိရပါတယ်။
သေဆုံးသူမှာ ဒုတပ်ရင်းမှူး ကျော်မင်းသူ(ခ)ကျော်လေးရဲ့ဇနီး မမေသက်ဝေ ဖြစ်ပြီး ၎င်းတို့ ၂ ဦးဟာ ဆောမြို့နယ်၊ ကံကြီးကုန်းကျေးရွာမှာရှိနေချိန် မေ ၁၉ ရက် နေ့လယ် ၁၂ နာရီကျော်မှာ အင်အား ၈၀ ခန့်ပါ ကျောက်ထုအခြေစိုက် အမတ ၃၆၈ စစ်ကောင်စီတပ်က အဆိုပါကျေးရွာအတွင်း စစ်ကြောင်းထိုးလာစဥ် ပစ်ခတ်ခံရပြီး သေဆုံးခဲ့ရတာလို့ ဆိုပါတယ်။
“ကျနော်တို့လင်မယားအတူရှိနေချိန်မှာ စကစကမထင်မှတ်ဘဲ ဝင်ရောက်လာခဲ့တယ်။ ဝင်ရောက်လာတော့ ကျနော်တို့အတူ ထွက်ပြေးကြတာပေါ့။ အတူထွက် ပြေးတဲ့အချိန်မှာ ကျနော်ကရှေ့ကကျတယ်။ မိန်းမကတော့ နောက်ကနေကျန်ခဲ့တယ်။ စကစပစ်လိုက်တဲ့ကျည်က ပေါင်မှာမှန်တယ်။ ခေါင်းပိုင်းတွေမှာလည်းမှန်တယ်။ အလောင်းတွေ့တဲ့အချိန်မှာပဲ ပြေးတဲ့နေရာကနေ ထိမှန်သွားတာလို့ပဲ ယူဆပါတယ် ။ စကစက ဖမ်းမိလို့ပစ်သတ်တာမျိုးတော့ မဟုတ်ပါဘူး” လို့ ဒုတပ်ရင်းမှူး ကိုကျော်မင်းသူက မြေလတ်အသံကို ပြောပါတယ်။
သေနတ်ဒဏ်ရာတွေနဲ့ သေဆုံးနေတဲ့ မမေသက်ဝေရဲ့ရုပ်အလောင်းကို မေ ၂၃ ရက် မနက်ပိုင်းမှာ ဂန့် ဂေါခရိုင်အမှတ် ၁၅ တပ်ရင်းမှ တပ်မှူးနဲ့အဖွဲ့က ကံကြီးကုန်းကျေးရွာအနီး ရင့်ရဲကျေးရွာအပြင်ဘက် ရေမြောင်းအတွင်းတွေ့ရှိခဲ့တာဖြစ်ပြီး အဲ့ဒီနေ့ နေ့လယ်ပိုင်းမှာပဲ ရုပ်အလောင်းကို ထီးလင်းမြို့နယ်၊ ကျေးရွာတရွာမှာ သင်္ဂြိုဟ်ပေးခဲ့တယ်လို့သိရပါတယ်။
မမေသက်ဝေမှာ CDM အမျိုးသမီးရဲတပ်ဖွဲ့ဝင်ဖြစ်သလို ဂန့်ဂေါခရိုင်အမှတ် ၁၆ တပ်ရင်းရဲ့ စစ်ဦးစီး/စစ်ရေး/စစ်ထောက်တာဝန်ခံအဖြစ် ထမ်းဆောင်နေတာဖြစ်ပြီး သေဆုံးချိန်မှာ အသက် ၂ နှစ်အရွယ်သား ၁ ဦး ကျန်ရှိခဲ့တယ်လို့ သိရပါတယ်။
ထီးလင်းမြို့နယ်အခြေစိုက် ဂန့်ဂေါခရိုင်အမှတ် ၁၆ တပ်ရင်းမှ ဒုတပ်ရင်းမှူးရဲ့ဇနီး ဦးရေးထောက်တာဝန်ခံ မမေသက်ဝေတို့ ရှိနေခဲ့တဲ့ ဆောမြို့နယ်၊ ကံကြီးကုန်းကျေးရွာမှာ ကျောက်ထုအခြေစိုက် အမတ ၃၆၈ အမြောက်တပ်ရင်းနဲ့ ၆ မိုင်ခန့်သာ ကွာဝေးတယ်လို့ သိရပါတယ်။
စာတည်း – ဟိန်းစံ
ပန်းတောင်း၊ ဧပြီ ၂၊ ၂၀၂၅။
ပဲခူးတိုင်းအနောက်ခြမ်း၊ ပန်းတောင်းမြို့နယ်၊ ပန်းတောင်း-တောင်ကုတ်လမ်း ရခိုင်ရိုးမပေါ် ရှိ ညောင်ကျိုးရွာနဲ့အနီးတဝိုက်ကို စစ်ကောင်စီတပ်က လေကြောင်းကနေဗုံးကြဲပြီး လက်နက်ကြီးတွေနဲ့ပစ်ခတ်တိုက်ခိုက်နေတယ်လို့ ဒေသခံတွေထံက သိရပါတယ်။
ဧပြီ ၂ ရက် ဒီကနေ့မနက်ပိုင်းမှာ ညောင်ကျိုးကျေးရွာနဲ့ အနီးပတ်ဝန်းကျင်တဝိုက်ကို တိုက်လေယာဥ် ၁ စီးနဲ့ ဗုံးကြဲတိုက်ခိုက်ခဲ့တဲ့အပြင် စစ်ကောင်စီတပ်ရဲ့ ၂၇ မိုင်စခန်းဘက်ကနေ လက်နက်ကြီးတွေနဲ့ အလုံးရေ အမြောက်အများပစ်ခတ်နေပြီး ညောင်ကျိုးရွာအပေါ်ဝေဟင်မှာလည်း စက်တပ်လေထီးတွေ အဆက်မပြတ်ပျံသန်းနေတယ်လို့ ဆိုပါတယ်။
” ဒီကနေ့(ဧပြီ ၂ရက်) မနက်လုံးလက်နက်ကြီးသံ အကြိမ်စိပ်စိပ်ထုသံကြားရတယ်။ လေယာဥ်နဲ့ဗုံးကြဲသံလည်းကြားရတယ်။ စစ်တပ်က ထုနေတာ။ ခုလည်း ဆက်ပြီးတချက်တချက် ထုနေတယ်။ လေထီး (paramotor)ကလည်း ပတ်သလားမမေးနဲ့ တချိန်လုံးပျံနေတာပဲ”လို့ မြေပြင်အခြေအနေသိရှိထားတဲ့ ပန်းတောင်းဒေသခံ အမျိုးသားတဦးက မြေလတ်အသံကို ပြောပါတယ်။
အာရက္ခတပ်တော် – AAနဲ့တော်လှန်ရေးပူးပေါင်းအဖွဲ့တွေဟာ ပန်တောင်း-တောင်ကုတ်လမ်းပိုင်း ရခိုင်ရိုးမပေါ်ရှိ မိုးထိတောင်၊ပန်းကန်ကွဲ၊ တောင်ပုံကြီး၊ နတ်တောင်ကုန်းစတဲ့ စစ်ကောင်စီစခန်းတွေကို သိမ်းပိုက်ထားနိုင်ပြီး မတ်လဒုတိယအပတ်အတွင်းမှာ ညောင်ကျိုးပင်မစခန်းနဲ့ ကာကင်းစခန်းတွေကို ထိန်းချုပ်ထားနိုင်ကာ လက်ရှိငလျင်ဘေးဒဏ်သင့်ကာလမှာ ထိုးစစ်တွေကို ယာယီတဖက်သတ်ရပ်တန့်လိုက်တာပါ။
မတ် ၂၈ ရက်မှာ လှုပ်ခတ်ခဲ့တဲ့ အင်အားပြင်းငလျင်ကြီးကြောင့် ပျက်စီးဆုံးရှုံးမှုတွေအပေါ် ကူညီကယ်ဆယ်ရေးလုပ်ငန်းတွေဆောင်ရွက်နိုင်ဖို့ တိုက်ပွဲဖြစ်ပွားရာနေရာတွေက ၎င်းတို့ရဲ့ ထိုးစစ်အားလုံးကို ဧပြီ ၃၀ ရက်အထိ ၁ လတာရပ်စဲထားမယ်လို့ အာရက္ခတပ်တော်-AA အပါ ညီနောင်မဟာမိတ် ၃ ဖွဲ့က ဧပြီ ၁ ရက် မနေ့ကထုတ်ပြန်ပါတယ်။
စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်ကတော့ တိုင်းရင်းသားလက်နက်ကိုင်တွေအနေနဲ့ ၎င်းတို့ရဲ့ထိုးစစ်တွေရပ်တန့်တယ်ဆိုပေမယ့်လေ့ကျင့်မှု၊ တပ်စုဖွဲ့မှုတွေရှိနေကာ အဲ့ဒီပြင်ဆင်မှုတွေကို တိုက်ခိုက်မှုလို့ သဘောထားပြီး လိုအပ်တဲ့ကာကွယ်ရေးဆိုင်ရာလုပ်ငန်းတွေကို ဆက်လက်လုပ်ဆောင်သွားမယ်လို့ ယမန်နေ့မှာပဲ ပြောကြားခဲ့ပါတယ်။
စာတည်း – ဟိန်းစံ
ဆင်ဖြူကျွန်း၊ မတ် ၁၄၊ ၂၀၂၅။
မကွေးတိုင်း၊ စလင်းမြို့နယ်၊ ဆင်ဖြူကျွန်းမြို့နယ်အတွင်း လှည့်ပတ်စစ်ကြောင်းထိုးနေတဲ့ စစ်ကောင်စီတပ်ဖွဲ့က ကုက္ကိုတန်းကျေးရွာကို မီးလောင်ဗုံး၊လက်နက်ကြီးတွေနဲ့ပစ်ခတ်လို့ နေအိမ် ၃၀၀ ခန့် မီးလောင်ခဲ့တယ်လို့ ဒေသခံတွေထံက သိရပါတယ်။
မတ် ၁၃ ရက် မနေ့ည ၉ နာရီ ၄၅ မိနစ်လောက်မှာ ကျပင်းကျေးရွာအနီး ကြက်ရိုးတောင်ပေါ်မှာ ယာယီတပ်စွဲနေတဲ့ အဆိုပါစစ်ကောင်စီစစ်ကြောင်းက ကုက္ကိုတန်းကျေးရွာကို လက်နက်ကြီး၊ မီးလောင်ဗုံးတွေနဲ့ပစ်ခတ်ခဲတာလို့ဆိုပါတယ်။
“ အခုကတော့ တရွာလုံးကုန်ပြီလို့ သိရတယ်၊ မီးကတော်တော်ပြင်းတယ်” လို့ ကုက္ကိုတန်းရွာခံအမျိုးသမီးတဦးက မြေလတ်အသံကို ပြောပါတယ်။
မီးလောင်ဗုံးကြောင့် အိမ်ခြေ ၃၀၀ ဝန်းကျင် လူဦးရေ ၁,၅၀၀ ခန့်ရှိ ကုက္ကိုတန်းကျေးရွာမှာ ရွာလုံးကျွတ်နီးပါးနေအိမ်တွေ မီးလောင်ဆုံးရှုံးခဲ့ပြီး ဒေသခံတွေက စစ်ကောင်စီစစ်ကြောင်းစတင်ဝင်ရောက်တဲ့ မတ် ၈ ရက်က စတင်ကာ ရိက္ခာနဲ့ပစ္စည်းတချို့ယူဆောင်ကာ နီးစပ်ရာတောစပ်တွေမှာ စစ်ရှောင်နေကြရတယ်လို့ ဆိုပါတယ်။
မတ်လဒုတိယအပတ်က စတင်ကာ စစ်ကောင်စီတပ်ဖွဲ့က ဆင်ဖြူကျွန်းနယ်အတွင်း စစ်ကြောင်းထိုးမီးရှို့တာနေတာကြောင့် ကုက္ကိုတန်းရွာအပါအဝင် ကျေးရွာ ၂၀ ခန့်က ဒေသခံ ၁၀,၀၀၀ ကျော်ဟာ ဘေးလွတ်ရာကို အရေးပေါ်စစ်ရှောင်နေကြရတာပါ။
အဆိုပါစစ်ကောင်စီတပ်ဟာ ပခုက္ကူအခြေစိုက် တပ်မ ၁၀၁ နဲ့ စလင်း ခလရ ၂၅၃၊ ခလရ ၂၅၄၊ ခလရ ၂၅၅ တပ်တွေက စစ်ကောင်စီတပ်ဖွဲ့ဝင် ၃၀၀ ကျော်ပါ ပူးပေါင်းစစ်ကြောင်းဖြစ်ပြီး လက်ရှိမှာ ကျပင်းကျေးရွာအနီးမှာပဲ ယာယီတပ်စွဲထားတယ်လို့ သိရပါတယ်။
၎င်းစစ်ကြောင်းကပဲ မတ် ၁၁ နဲ့ ၁၂ ရက်တွေမှာလည်း ကျပင်းရွာနဲ့ နေပူကန်ရွာက နေအိမ်တွေကို မီးရှို့ခဲ့လို့ နေအိမ် ၈၀ ကျော်မီးလောင်ဆုံးရှုံးခဲ့ပါသေးတယ်။
စာတည်း – ဟိန်းစံ