ညောင်လေးပင်

ညောင်လေးပင်၊ စက်တင်ဘာ ၅၊ ၂၀၂၆။

ပဲခူးတိုင်း၊ ညောင်လေးပင်မြို့နယ်၊ အောင်းကြီးကျေးရွာနဲ့ ပြွန်တန်ဆာမြို့သွားလမ်းပေါ်မှာ အုပ်ချုပ်ရေးမှူးနဲ့ ရာအိမ်မှူးဆိုသူတို့ ပစ်ခတ်ခံရပြီး သေဆုံးနိုင်တယ်လို့ 9 star UG အဖွဲ့ဆီက သိရပါတယ်။

ပစ်ခတ်ခံရသူတွေဟာ ရေတွင်းကုန်းကျေးရွာ အုပ်ချုပ်ရေးမှူး အသက် ၆၅ နှစ်အရွယ် ဦးစိုးဌေး၊ တပည့်ဖြစ်သူ အောင်းကြီးကျေးရွာနေသူ ရာအိမ်မှူး ပျူစောထီးခေါင်းဆောင် အသက် ၃၀ အရွယ် ကိုကျော် (ခ) အောင်ကျော်မျိုးတို့ဖြစ်ပြီး စက်တင်ဘာ ၄ ရက် နေ့လယ် ၁ နာရီကျော်မှာ ပစ်ခတ်ခဲ့တာလို့ ဆိုပါတယ်။

“ဆိုင်ကယ် နဲ့ မြို့ပေါ်အတတ်ကို နောက်က လိုက်ပစ်တာ။ ဘာကိစ္စ နဲ့ မြို့ပေါ်တတ်တယ်ဆိုတာတော့ မသိဘူး။ ဆိုင်ကယ်က နှစ်ယောက်တစီး စီးပြီးလာတဲ့အချိန် လိုက်ပစ်တော့ ဆိုင်ကယ်လဲသွားတဲ့အချိန် အုပ်ကြီးကိုက ကျောထဲလေးချက် ခြေနှစ်ချောင်းလုံး နှစ်ချက်။ ရာအိမ်မှူးကိုက သုံးချက် ရင်ဘတ်ထဲပဲ ပစ်ထည့်တာ လဲနေလို့ သေပြီဆိုပြီး ထားခဲ့တာ”လို့ 9 star UG အဖွဲ့တာဝန်ရှိသူကပြောပါတယ်။

သေနတ်နဲ့အနီးကပ်ပစ်ခဲ့တာကြောင့် အုပ်ချုပ်ရေးမှုးနဲ့ရာအိမ်မှူးဟာ အဆိုပါနေရာမှာပင် ကျည်ထိဒဏ်ရာတွေနဲ့ ငြိမ်သက်သွားပြီး လမ်းသွားလမ်းလာများတဲ့လမ်းပိုင်းဖြစ်လို့ မည်သည့်ပစ္စည်းမှ မယူလာနိုင်ဘဲ အမြန်ပြန်ထွက်လာရတယ်လို့ ဆိုပါတယ်။

ပစ်ခတ်ခံရတဲ့ အုပ်ချုပ်ရေးမှူးနဲ့ရာအိမ်မှူးကိုတော့ ဒေသခံတွေက ပဲခူးဆေးရုံအထိ သယ်ဆောင်သွားတယ်လို့ သတင်းရထားပြီး သေဆုံးနိုင်ခြေများတယ်လို့ ဆိုပါတယ်။

အုပ်ကြီး စိုးဋ္ဌေးဟာ ရွှေကျင်မြို့နယ်၊ ဒုံစရစ် ခမရ ၅၈၉ တပ်တွင်းသို့ ဆန်၊ ရိက္ခာ၊ ဓာတ်ဆီတို့ကို တာဝန်ယူပို့ဆောင်ပေးခြင်း၊ ကျေးရွာအတွင်း စစ်တပ် အထိုင်ချနေထိုင်နိုင်ရန် စီစဥ်ဆောင်ရွက်ပေးတာ၊ ကျေးရွာနေပြည်သူများအပေါ် စစ်မှုထမ်းကြေး လစဥ်ကောက်ခံတဲ့အပြင် ဒေသအတွင်းပေါ်တာဆွဲကာ ဖမ်းမိပြည်သူတွေကို ငွေနဲ့ပြန်ရွေးယူခိုင်းတာတွေလုပ်တဲ့အပြင် ပျူ ခေါင်းဆောင် ကိုမျိုး(ခ)အောင်ကျော်မျိုးကလည်း ပြည်သူတွေအပေါ် ရိုက်နှက်နှိပ်စက်တာ၊ အနိုင်ကျင့် စော်ကားတာ၊ WY ဆေးပြားတွေရောင်းဝယ်ရာမှာ လိုင်းကြေးယူပြီး ကာကွယ်ပေးနေတာတွေကြောင့် ပစ်ခတ်ခဲ့တာလို့ သိရပါတယ်။

ပြီးခဲ့တဲ့ဇန်နဝါရီ ၁၂ ရက်ကလည်း ပြွန်တန်ဆာမြို့၊ မြို့မ ၁ ရပ်ကွက် အုပ်ချုပ်ရေးမှူး လှသောင်းဟာ ပစ်ခတ်ခံရပြီးသေဆုံးခဲ့သေးတယ်လို့သိရပါတယ်။

ပဲခူး၊ ဧပြီ ၂၅၊ ၂၀၂၆။

စစ်ကိုင်းတိုင်း၊ မုံရွာမြို့နယ်နဲ့ ပဲခူးတိုင်း၊ ညောင်လေးပင်မြို့နယ်တွေမှာ စစ်ကော်မရှင်ရဲ့ လေကြောင်းနဲ့ လက်နက်ကြီးပစ်ခတ်တိုက်ခိုက်မှုတွေကြောင့် ပြည်သူ ၁ ဦးသေ ၄ ဦးဒဏ်ရာရတယ်လို့ မုံရွာမြို့နယ်ပကဖနဲ့ ညောင်လေးပင်ဒေသခံတွေဆီက သိရပါတယ်။

ဧပြီ ၂၄ ရက်ညနေ ၃ နာရီကျော်မှာ မုံရွာအခြေစိုက် နမခ ကတက်လာတဲ့ စက်တပ်လေထီး ၂ စီးဟာ မုံရွာမြို့နယ်၊ ဂျိုးစုကျေးရွာထဲကို ဗုံး ၂ လုံးကြဲချခဲ့တယ်လို့ဆိုပါတယ်။

“ပြည်သူနေအိမ်နီးနားပတ်ဝန်းကျင်ကို ကျတယ်လို့ ပြောလို့ရတယ်။ ရွာနားမှာတိုက်ပွဲဖြစ်တာမျိုးမရှိဘဲ လာကြဲသွားတာ။ ရွာခံတွေထွက်ပြေးရတာတော့ မရှိသေးပါဘူး”လို့ မုံရွာမြို့နယ်ပကဖပြန်ကြားရေး တာဝန်ရှိသူက ပြောပါတယ်။

ဗုံးကြဲခံရလို့ အသက် ၃၀ ကျော်အရွယ်အမျိုးသမီး ၂ ဦးနဲ့အသက် ၁၀ နှစ်အောက်ကလေးငယ် ၁ ဦးဒဏ်ရာရပြီး နေအိမ် ၁ လုံးပျက်စီးခဲ့တယ်လို့ ဆိုပါတယ်။

အလားတူ အဆိုပါညနေ ၅ နာရီကျော်မှာလည်း ရွှေကျင်မြို့နယ်အခြေစိုက် ခမရ ၅၈၉ တပ်ကနေ ညောင်လေးပင်မြို့နယ်၊ ထင်းကုန်းကျေးရွာအုပ်စု၊ အနောက်ဒုံဇရစ်ရွာကို လက်နက်ကြီး ၂ လုံး ပစ်ခတ်ခဲ့တယ်လို့ ဆိုပါတယ်။

” လက်နက်ကြီးနဲ့လှမ်းဆော်တာမှာ အနောက်ဘက်ကမ်း ဘုန်းကြီးကျောင်းဘေး ၁ လုံးကျတယ်။ ကမ်းနားလမ်း လူနေအိမ်ဘေးကျတာ လူ ၂ ယောက်ကိုထိတယ်။ နွား ၁ ကောင်ကိုထိတယ်”လို့ ဒေသခံတဦးက ပြောပါတယ်။

ဒီလက်နက်ကြီးကျရောက်ပေါက်ကွဲမှုကြောင့် အသက် ၄၀ ခန့်အရွယ် အမျိုးသား ၁ ဦးသေဆုံးပြီး နောက်ထပ် အမျိုးသား ၁ ဦး ပြင်းထန်ဒဏ်ရာရသွားတယ်လို့ ဆိုပါတယ်။

လက်နက်ကြီးပစ်ခံရတဲ့ အနောက်ဒုံဇရစ်ကျေးရွာဟာ ဧပြီ ၂၄ ရက်က KNLA ပူးပေါင်းတပ်တွေက သိမ်းပိုက်လိုက်တဲ့ ရွှေကျင်မြို့နယ်၊ အရှေ့ဒုံဇရစ်ကျေးရွာရဲစခန်းနဲ့ စစ်တောင်းမြစ်တခုသာခြားတယ်လို့ အထက်ပါဒေသခံဆီက သိရပါတယ်။

၂၀၂၁ စစ်အာဏာသိမ်းချိန်ကနေ ၂၀၂၆ ဧပြီ ၂၄ ရက်အထိ စစ်ကော်မရှင်တပ်နဲ့ ၎င်းတို့ရဲ့လက်အောက်ခံ အဖွဲ့အစည်းတွေကြောင့် သေဆုံးတဲ့ပြည်သူစုစုပေါင်း ၇,၉၈၈ ဦးရှိတယ်လို့ နိုင်ငံရေးအကျဥ်းသားများကူညီစောင့်ရှောက်ရေးအသင်း – AAPP ထုတ်ပြန်ပါတယ်။

စာတည်း – လင်း

ညောင်လေးပင်၊ မတ် ၉၊ ၂၀၂၆။

ပဲခူးတိုင်း၊ ညောင်လေးပင်မြို့နယ်အတွင်းကျေးရွာတွေကနေ ဖမ်းဆီးခံထားရတဲ့ ဒေသခံ ၄၀ ကျော်ကို စစ်ကော်မရှင်စစ်ကြောင်းက သတ်ဖြတ်ခဲ့တယ်လို့ မတ်လ ၉ ရက်ဒီကနေ့မှာ အမျိုးသားညီညွတ်ရေးအစိုးရ – NUG ကာကွယ်ရေးဝန်ကြီးဌာနက ထုတ်ပြန်ပါတယ်။

တပ်မ ၇၇ ဦးဆောင်တဲ့ အင်အား ၁၀၀ ကျော်ပါစစ်ကြောင်း ၄ ကြောင်းက မတ်လ ၅ ရက်မနက် ၅ နာရီဝန်းကျင်မှာ ရေတွင်းကန်း၊ ခရုကုန်းနဲ့ ကျောင်းကုန်းရွာ တွေကိုဝင်ရောက်ကာ ဒေသခံ ၃၀၀ ကျော်ကို ဖမ်းဆီးပြီး အဲ့ဒီထဲက ၄၀ ကျော်ကို သတ်ဖြတ်ခဲ့တာလို့ ဆိုပါတယ်။

အသတ်ခံရသူတွေထဲမှာ ကလေး ၃ ဦး၊ ကိုယ်ဝန်ဆောင်အမျိုးသမီး ၁ ဦးနဲ့ သက်ကြီးရွယ်အိုတွေလည်း ပါဝင်တယ်လို့လည်း ထုတ်ပြန်ချက်မှာ ဖော်ပြထားပါတယ်။

ညောင်လေးပင်၊ ဇန်နဝါရီ ၁၂၊ ၂၀၂၆။

ပဲခူးတိုင်း၊ ညောင်လေးပင်မြို့နယ်၊ ပြွန်တန်ဆာမြို့၊ မြို့မ ၁ ရပ်ကွက်မှာ အုပ်ချုပ်ရေးမှူး ၁ ဦး နေအိမ်ထဲပစ်သတ်ခံရတယ်လို့ 9Stars UG အဖွဲ့ဆီက သိရပါတယ်။

ပစ်သတ်ခံရသူဟာ မြို့မ ၁ ရပ်ကွက် အုပ်ချုပ်ရေးမှူး အသက် ၆၈ နှစ်အရွယ် ဦးလှသောင်းဖြစ်ပြီး ဇန်နဝါရီ ၁၂ ရက်မနက် ၅ နာရီခွဲမှာ နေအိမ်အတွင်းဝင်ရောက်ပစ်ခတ်ခဲ့တာလို့ ဆိုပါတယ်။

“သူက သူအိမ်အောက်မှာ အိပ်တာကုတင်နဲ့ အိပ်ယာထဲထိပဲဝင်ပစ်ခဲ့တာ။ ၃ ချက်ပစ်ခဲ့တယ်။ သူမိန်းမလည်း ရှိတယ်။ တွေ့တယ်အော်ဆဲနေတာ ဘာမှမလုပ်ပါဘူး။ ဒီတိုင်းပဲထားခဲ့တယ်။ “လို့ 9Stars UG ခေါင်းဆောင်မြွေပွေးက ပြောပါတယ်။

အုပ်ချုပ်ရေးမှူးနေထိုင်တဲ့နေရာက ပြွန်တန်ဆာရဲစခန်းနဲ့ ကိုက် ၆၀၀ လောက်သာ ဝေးကွာတာကြောင့် ပစ်ခတ်ပြီး အမြန်ပြန်ဆုတ်ခွာခဲ့တယ်လို့ သူကဆက်ပြောပါတယ်။

အုပ်ချုပ်ရေးမှူး ဦးလှသောင်းဟာ သထုံအခြေစိုက် အမှတ် ၅၂၅ ထောက်ပံ့နှင့်ပို့ဆောင်ရေးတပ်ခွဲကနေ တပ်ကြပ်ကြီးရာထူးနဲ့ အငြိမ်းစားယူထားသူဖြစ်ပြီး သား ၂ ဦးဖြစ်တဲ့ ကိုကိုလင်းက အဆိုပါတပ်မှ ဗိုလ်မှူးဖြစ်တယ်လို့သိရပြီး လှဌေးကတော့ ရဲတပ်ဖွဲ့ဝင်ဖြစ်တယ်လို့ 9Stars UG ခေါင်းဆောင်မြွေပွေးက ပြောပါတယ်။

ဦးလှသောင်းဟာ အငြိမ်းစားယူပြီးနောက် အုပ်ချုပ်ရေးမှူးဖြစ်လာပြီး NLD အစိုးရလက်ထက်အတွင်း အုပ်ချုပ်ရေးမှူးရာထူးက ရပ်နားခံခဲ့ရပြီး စစ်အာဏာသိမ်းပြီးနောက်ပိုင်းမှာ အုပ်ချုပ်ရေးမှူး ပြန်ဖြစ်လာသူဖြစ်တဘ်လို့ ခေါင်းဆောင်မြွေပွေးက ပြောပါတယ်။

ဒါ့အပြင် ပြွန်တန်ဆာပျူစောထီးအဖွဲ့ကိုဦးဆောင်ပြီး ဧည့်စာရင်းထောက်ခံစာလုပ်သူတွေကို ငွေအများအပြားတောင်းတာ၊ ဒေသခံတွေကို စစ်မှုထမ်းကြေး ၂ သောင်း၊ ကင်းကြေး ၂ ထောင် လစဥ်ကောက်ခံတာ၊ ရပ်ကွက်ထဲကသူတချို့ကိုလည်း စစ်မှုထမ်းအတွက်ရောင်းစားတာ၊ ရွေးကောက်ပွဲနဲ့ပတ်သက်ပြီး ပူးပေါင်းပါဝင်တာတွေရှိတဲ့အတွက် ခုလိုပစ်ခတ်ခဲ့တာလို့လည်း ဆိုပါတယ်။

ဒီဇင်ဘာ ၁၉ ရက်ကလည်း ညောင်လေးပင်မြို့နယ်၊ သံတံတားစံပြကျေးရွာမှာ လယ်ထဲကနေ ပြန်လာတဲ့ အုပ်ချုပ်ရေးမှူး သေနတ်နဲ့ပစ်ခံရပြီးသေဆုံးသွားတယ်လို့ သိရပါတယ်။

စာတည်း – လင်း

ညောင်လေးပင်၊ ဒီဇင်ဘာ ၂၀၊ ၂၀၂၅။

ပဲခူးတိုင်း၊ ညောင်လေးပင်မြို့နယ်၊ သံတံတားစံပြကျေးရွာမှာ အုပ်ချုပ်ရေးမှူး ၁ ဦး သေနတ်နဲ့ပစ်ခံရပြီး သေဆုံးခဲ့တယ်လို့ 9 Stars UG အဖွဲ့ဆီက သိရပါတယ်။

ပစ်သတ်ခံရသူဟာ သံတံတားစံပြကျေးရွာအုပ်ချုပ်ရေးမှူး အသက် ၄၅ နှစ်အရွယ် နိုင်ဝင်းဆိုသူဖြစ်ပြီး ဒီဇင်ဘာ ၁၉ ရက်ညနေ ၅ နာရီကျော်မှာ ရွာထဲရှိ အမှတ် ၉ ရပ်ကွက်လမ်းပေါ်မှာ ပစ်သတ်ခံရတာလို့ ဆိုပါတယ်။

“သူကဆိုင်ကယ်နဲ့လာတာကို လိုက်ပစ်ရတာ။ သူကလည်း မောင်းပြေးတာ။ သူလည်း လည်တယ်။ သူ့အိတ်ကို ဖြုတ်ထားပြီးပြီ။ အသီး(လက်ပစ်ဗုံး)ကို နှိုက်နေတာ။ ခေါင်းကို သုံးချက်ပစ်ခဲ့တာ”လို့ 9 Stars UG တာဝန်ခံ မြွေပွေးကပြောပါတယ်။

သေနတ်ကျည်ထိလို့ အုပ်ချုပ်ရေးမှူး ဝင်းနိုင် ဟာ နေရာမှာတင်သေဆုံးပြီးနောက် သူ့ဆီကနေ လက်ပစ်ဗုံး ၂ လုံး၊ မှတ်ပုံတင်၊ ကားသော့နဲ့ ဖုန်း ၁ လုံးတို့ကို သိမ်းယူရရှိခဲ့တယ်လို့ ဆိုပါတယ်။

အုပ်ချုပ်ရေးမှူးဝင်းနိုင်ဟာ စစ်ကော်မရှင်ရွေးကောက်ပွဲဖြစ်မြောက်ဖို့အတွက် ပြည်သူတွေ ကိုဖိအားပေးတာ၊ စစ်မှုထမ်းကြေး ၁ လ ၂၀,၀၀၀ ကျပ်ကောက်ခံတာ၊ စစ်မှု့ထမ်းပေါ်တာဆွဲတာလည်းလုပ်တာကြောင့် ခုလိုပစ်ခတ်ရှင်းလင်းခဲ့တာလို့ ဆိုပါတယ်။

ပစ်ခတ်မှုဖြစ်ပြီးနောက် ညောင်လေးပင်ရဲစခန်းက ရဲတွေလာရောက်စစ်ဆေးပြီး အလောင်းကိုဆေးရုံကို ယူဆောင်သွားကြတယ်လို့ သိရပါတယ်။

ပြီးခဲ့တဲ့နိုဝင်ဘာ ၈ ရက်ကလည်း ညောင်လေးပင်မြို့နယ်၊ စီပင်ကျေးရွာ၊ ဝိသဖန်းအင်းအနီး ဝန်းကျင်မှာ စီပင်ရွာအုပ်ချုပ်ရေးမှူးတပည့် ပျူစောထီးအဖွဲ့ဝင် မင်းမင်းဆိုသူပစ်သတ်ခံရလို့ သေဆုံးသွားသေးတယ်လို့ သိရပါတယ်။

စာတည်း – လင်း

ညောင်လေးပင်၊ နိုဝင်ဘာ ၉၊ ၂၀၂၅ ။

ပဲခူးတိုင်း၊ ညောင်လေးပင်မြို့နယ်အတွင်း နာမည်ဆိုးနဲ့ကျော်ကြားတဲ့ ပင်စီကျေးရွာအုပ်ချုပ်ရေးမှူးနဲ့ ၎င်းရဲ့တပည့်ဖြစ်သူတို့ တရက်တည်း အသတ်ခံခဲ့ရတယ်လို့ 9 star UG အဖွဲ့တာဝန်ရှိသူတွေထံက သိရပါတယ်။

အသက် ၄၅ နှစ်ခန့်ရှိ ဒေသတွင်းပျူစောထီးခေါင်းဆောင်လည်းဖြစ်၊ ကြံ့ခိုင်ရေးပါတီဝင်လည်းဖြစ်တဲ့ ပင်စီရွာအုပ်ချုပ်ရေးမှူး မင်းမင်းဦးကို နိုဝင်ဘာ ၈ ရက် ညနေ ၃ နာရီခန့်မှာ ဒိုက်ဦးမြို့၊ ဒရယ်နီမီးပွိုင့်အနီးကွမ်းယာဆိုင်မှာ ကွမ်းယာဝယ်နေစဥ် သေနတ်နဲ့အနီးကပ်ပစ်ခတ်ခဲ့တာလို့ ဆိုပါတယ်။

ဒါ့အပြင် အဲ့ဒီနေ့ ညနေပိုင်းမှာပဲ မင်းမင်းဦးရဲ့ တပည့်ဖြစ်သူ ပျူစောထီးအဖွဲ့ဝင် မိုးကြိုး ငမျိုးကို သူနေထိုင်ရာ စီပင်ကျေးရွာရှိ ဝိသမန်းအင်းအနီးမှာ ထပ်မံပစ်ခတ်ခဲ့တာလို့ 9 star UG အဖွဲ့ခေါင်းဆောင် မြွေပွေးက မြေလတ်အသံကို ပြောပါတယ်။

“မင်းမင်းဦးကိုက ကွမ်းယာဆိုင်မှာ ကွမ်းဝယ်နေချိန်ဝင်ရှင်းခဲ့တာ။ ကျော ၃ ချက် ခေါင်း ၂ ချက်ပစ်ခဲ့တာ။ ငမျိုးကျတော့ သူလုပ်နေတဲ့ အင်းထဲက ခေါ်သွားပြီး တနေရာမှာစစ်တာ။ လက်နက်ရှိတယ်ဆိုတော့ စစ်ဖို့လုပ်နေတာ။ အချိန်မရလိုက်သလို ကလေးတပ်ဖွဲ့ဝင်တွေနဲ့လည်း ရုန်းရင်းဆန်ခတ်ဖြစ်လို့ ပစ်ခတ်ရှင်းလင်းခဲ့တာ” လို့ သူက ပြောပါတယ်။

ပစ်ခတ်မှုကြောင့် ၂ ဦးစလုံးအခင်းဖြစ်နေရာတွေမှာပဲ သေဆုံးသွားခဲ့ပြီး စစ်ကော်မရှင်တပ်ဖွဲ့တွေက ၎င်းတို့ ရုပ်အလောင်းလာရောက်စစ်ဆေးကာ ကောက်ယူသွားတယ်လို့ သိရပါတယ်။

မင်းမင်းဦးဟာ ညောင်လေးပင်အခြေစိုက် ခမရ ၂၀ တပ်ရင်း(စိစစ်ရန်) က ဗိုလ်မှူးနေလင်းနဲ့ ပူးပေါင်းပြီး စစ်မှုထမ်းအဖြစ်လူငယ်တွေကို ဖမ်းဆီးငွေညစ်တာ၊ ပြည်သူလူထုကို နည်းလမ်းမျိုးစုံနဲ့ ဒုက္ခပေးသူဖြစ်သလို တပည့်ဖြစ်သူ ငမျိုးမှာလည်း မင်းမင်းဦးရဲ့ ညာလက်ရုံးဖြစ်ပြီး ထပ်တူလုပ်ဆောင်မှုတွေရှိတာကြောင့်ရှင်းလင်းခဲ့တာလို့ အထက်ပါအဖွဲ့က ဆိုပါတယ်။

ပြီးခဲ့တဲ့ဇန်နဝါရီလအတွင်းမှာလည်း သေဆုံးသွားတဲ့အုပ်ချုပ်ရေးမှူး မင်းမင်းဦးနဲ့ပျူအဖွဲ့ဝင်တွေဟာ ဝိသဖန်းအင်းဘက်ကနေ စီပင်ကျေးရွာဘက်ကို ကားနဲ့ပြန်လာချိန် ပစ်ခတ်ခံခဲ့ရပြီး ပျူစောထီးအဖွဲ့ဝင် ၂ ဦးသေဆုံးကာ ခေါင်းဆောင် မင်းမင်းဦးအပါ ၄ ဦးဒဏ်ရာရခဲ့တာပါ။

အဲ့ဒီလိုပစ်ခတ်ခံရပြီးကတည်းက မင်းမင်းဦးဟာ ကျေးရွာကို မပြန်တော့ဘဲ ဒိုက်ဦးမြို့၊ ဒရယ်နီလမ်း ဆုံမီးပွိုင့်အနီးက နေအိမ် ၁ လုံးကိုဝယ်ယူနေထိုင်နေခဲ့တာလို့ သိရပါတယ်။

စာတည်း – ဟိန်းစံ