မြင်းခြံ၊ အောက်တိုဘာ ၂၄၊ ၂၀၂၅။

မန္တလေးတိုင်း၊ မြင်းခြံမြို့ကနေ စစ်ကော်မရှင်တပ်ဖွဲ့ဝင်တွေလိုက်ပါလာတဲ့ ကားတွေကို ဒေသခံတော်လှန်ရေးတပ်တွေက ကြားဖြတ်တိုက်ခိုက်ပြီး လက်နက်တွေသိမ်းဆည်းခဲ့တယ်လို့ မြင်းခြံခရိုင်၊ တပ်ရင်း ၇ Zero ပြောက်ကျားတပ်မဟာဆီက သိရပါတယ်။

အောက်တိုဘာ ၂၁ ရက်မနက်ပိုင်းက စစ်ကော်မရှင်တပ်တွေလိုက်ပါလာတဲ့ Doubl Cab ကား ၃ စီးကို မြင်းခြံ-နွားထိုးကြီး လမ်းပိုင်းတနေရာမှာ တိုက်ခိုက်ခဲ့ရာ ၃ စီးစလုံးကို ထိမှန်ခဲ့ကာ တိုက်ခိုက်နေချိန်မှာပဲ ကား ၁ စီးကိုထားပြီး ကျန် ၂ စီးနဲ့ထွက်ပြေးသွားကြတယ်လို့ ဆိုပါတယ်။

“နောက်ဆုံးမှာကျန်တဲ့ Jammer တင်တဲ့ Double Cab ကား ၁ စီးက မောင်းလို့ခက်ခဲတာတကြောင်း ရန်သူက ဘယ်ညာအရှေ့အနောက်မှာ ရှိနေတာကတကြောင်း ဒီစစ်ဆင်ရေးကို မိနစ် ၂၀ လောက်နဲ့ ဖော်ဆောင်ပြီး အမြန်ခွာစစ်ဆင်ခဲ့ရတာကြောင့် ကားတွေလည်းမသယ်နိုင်ဘူး၊ ကျန်နေခဲ့တဲ့ Double Cab နဲ့ Jammer ကားကို လက်ပစ်ဗုံးနဲ့ခွဲပြီးတော့ ကျနော်တို့ ခွာစစ်ဆင်ပြီးတော့ ဆုတ်ခဲ့ရတယ်။” လို့ Zero ပြောက်ကျားတပ်မဟာ တပ်ရင်း ၇ မြင်းခြံခရိုင် တပ်ရင်းမှူး ဗိုလ်သက်ကြီးက ပြောပါတယ်။

တိုက်ခိုက်ပြီးနောက် MA1 ၁ လက်၊ MA3 ၁ လက်နဲ့ G3 ၁ လက်တို့ကို သိမ်းဆည်းရခဲ့ပြီး ကျန်ခဲ့တဲ့ ကားပေါ်မှာလည်း သေဆုံးစစ်သားအလောင်း ၁ လောင်းကို မျက်မြင်တွေ့ခဲ့ရတယ်လို့ ဆိုပါတယ်။

ဒီတိုက်ခိုက်မှုကို Zero ပြောက်ကျားတပ်မဟာ တပ်ရင်း ၇ မြင်းခြံခရိုင်နဲ့ မြင်းခြံခရိုင် အမှတ် ၈ တပ်ရင်း တို့က ပူးပေါင်းလုပ်ဆောင်ခဲ့တာပါ။

ပြီးခဲ့တဲ့ ဇူလိုင် ၃ ရက်ကလည်း မြို့သာကနေ ငါန်းဇွန်ဘက်ကို ရိက္ခာပို့တဲ့စစ်ကြောင်းကို မြို့သာနဲ့ ငါန်းဇွန်ကြားမှာ Zero ပြောက်ကျားတပ်မဟာက ကြားဖြတ်တိုက်ခိုက်ခဲ့ပါသေးတယ်။

စာတည်း – လင်း၊ တည်းဖြတ် – M

ပဲခူး၊ အောက်တိုဘာ ၁၇၊ ၂၀၂၅။

ပဲခူးတိုင်း၊ လက်ပံတန်းမြို့နယ်၊ သရက်ချောင်းရွာကို စစ်ကြောင်းထိုးလာတဲ့ စစ်ကော်မရှင်စစ်ကြောင်းကို အောက်တိုဘာ ၁၅ ရက် မနက် ၁၀ နာရီလောက်မှာ ကြားဖြတ်တိုက်ခိုက်ခဲ့ပြီး စစ်သုံ့ပန်း ၁၂ ဦးကို ဖမ်းဆီးရရှိခဲ့ကာ လက်နက်ခဲယမ်းတွေလည်း သိမ်းဆည်းခဲ့တယ်လို့ သာယာဝတီခရိုင် တပ်ရင်း ၃၈၀၂ တပ်ခွဲ ၂ ဆီက သိရပါတယ်။

သရက်ချောင်းရွာက ပြည်သူ့နေအိမ်တွေကို မီးရှို့ဖျက်ဆီးပြီး ထွက်လာတဲ့လာတဲ့ စစ်ကော်မရှင်စစ်ကြောင်းကို အောက်တိုဘာ ၁၅ ရက် မနက် ၁၀ နာရီလောက်က သရက်ချောင်းရွာအထွက်မှာ ကြားဖြတ်ပစ်ခတ်ခဲ့တာဖြစ်ပြီး တိုက်ပွဲဖြစ်ပွားချိန် ၁ နာရီခွဲခန့်ကြာခဲ့တယ်လို့ ဆိုပါတယ်။

“သူတို့ ပြည်သူတွေနေအိမ်ကို မီးရှို့တယ်၊ ဖျက်ဆီးတယ်။ ဖျက်ဆီးတဲ့အချိန်မှာပဲ ရွာအထွက်မှာ ကျနော်တို့တွေ တိုက်ပွဲစတင်ပြီးတော့ ဖော်ဆောင်တယ်ပေါ့။ (စကမ)အင်အားက ၇၀ လောက်ရှိတယ်။ ကျနော်တို့ပိုင်နိုင်စွာပဲတိုက်ခိုက်ခဲ့တယ်ပေါ့။ အဲ့အချိန်မှာ အင်အားက ၇၀ လောက်ကို ၂၀ လောက် ကျသွားတယ်ပေါ့။” လို့ သာယာဝတီခရိုင် တပ်ရင်း ၃၈၀၂၊ တပ်ခွဲ ၂ တာဝန်ရှိသူတဦးက ပြောပါတယ်။

တပ်မ ၆၆ စစ်ကော်မရှင်တပ်သားတွေအပါအဝင် လက်ပံတန်းက ဇော်မင်းသိန်းနဲ့ ဌေးအောင်ရှိန်တို့ဦးစီးတဲ့ ပျူစောထီးအဖွဲ့တွေနဲ့ ပူးပေါင်းအင်အား ၇၀ ခန့်ပါအဆိုပါစစ်ကြောင်းဟာ လက်ပံတန်းမြို့နယ် လွှစင်ကုန်းရွာ၊ ပဒဲကောရွာဘက်ကနေတဆင့် သရက်ချောင်းရွာကို စစ်ကြောင်းထိုးလာတာဖြစ်ပြီး သရက်ချောင်းရွာကို မီးရှို့ခဲ့လို့ နေအိမ် ၆ လုံးခန့် မီးလောင်ခဲ့တယ်လို့ ဆိုပါတယ်။

တိုက်ပွဲအတွင်း တော်လှန်ရေးပူးပေါင်းတပ်တွေဘက်က ထိခိုက်မှုမရှိခဲ့ဘဲ စစ်ကော်မရှင်ဘက်က စစ်သုံ့ပန်း ၁၂ ဦးအပါအဝင် G 3 ၁၀ လက်၊ G 4 ၃ လက်၊ MA 12 ၂ လက်၊ စနိုက်ပါ ၁ လက်၊ ကာဘိုင် ၁ လက်နဲ့ ကျည်အနည်းငယ်ရရှိခဲ့ပြီး စစ်သုံ့ပန်းတွေကိုတော့ တပ်ရင်းတွေက အကောင်းဆုံးထိန်းသိမ်းသွားမှာဖြစ်တယ်လို့ သူကဆက်ပြောပါတယ်။

ဒီတိုက်ခိုက်မှုကို ပြည်သူ့ကာကွယ်‌ရေးတပ်မတော်၊ အမှတ် (၂) စစ်ဆင်ရေးနယ်မြေ၊ ပဲခူးတိုင်းစစ်ဌာန၊ ဗျူဟာ ၂၂ ကွပ်ကဲမှုနဲ့ အမှတ် ၃၈၀၂ တပ်ရင်း၊ အမှတ် ၃၈၀၃ တပ်ရင်း၊ ရွှေတန်းမြေ ပြည်သူ့ကာကွယ်ရေးတပ်ဖွဲ့၊ ဂဠုန်ပြည်သူ့ကာကွယ်ရေးတပ်ဖွဲ့ ပူးပေါင်းတပ်ဖွဲ့တွေက လုပ်ဆောင်ခဲ့တာပါ။

ပြီးခဲ့တဲ့ အောက်တိုဘာ ၆ ရက်ကလည်း ပဲခူးတိုင်း၊ သာယာဝတီခရိုင်၊ မင်းလှမြို့နယ်၊ ဆင်တဲကုန်းအုပ်စု၊ ဆင်တဲကုန်းကျေးရွာ လူငယ်အားမာန်စာကြည့်တိုက်မှာရှိတဲ့ စစ်ကော်မရှင်မဲစာရင်းတွေကို သာယာဝတီခရိုင် တပ်ရင်း ၃၈၀၂၊ တပ်ခွဲ ၂ က မီးရှို့ဖျက်ဆီးခဲ့ပါသေးတယ်။

တည်းဖြတ် – M

စလင်း၊ အောက်တိုဘာ ၁၂၊ ၂၀၂၅။

မကွေးတိုင်း၊ မင်းဘူးခရိုင်၊ စလင်းမြို့နယ်၊ လင်းဇင်းတိုက်နယ် ရဲစခန်းမှာတပ်စွဲထားတဲ့ စစ်ကောင်စီ တပ်ဖွဲ့ဝင်တွေကို ဝင်ရောက်တိုက်ခိုက်ခဲ့ပြီးနောက် ၂ ဖက်ထိခိုက်သေဆုံးမှုရှိခဲ့တယ်လို့ မင်းဘူးခရိုင် အမှတ် ၅ တပ်ရင်း ဆီက သိရပါတယ်။

စစ်ကော်မရှင်တပ်နဲ့ရဲတပ်သား စုစုပေါင်းအင်အား ၃၀ ဝန်းကျင်ရှိတဲ့ အဲ့ဒီစခန်းကို အောက်တိုဘာ ၈ ရက် မနက် ၄ နာရီခွဲဝန်းကျင်ကနေ ၄ နာရီကြာတိုက်ခိုက်ပြီးနောက် စစ်ကော်မရှင်တပ်ဖွဲ့ဝင် ၃ ဦးသေဆုံးပြီး ဒဏ်ရာရသူတွေလည်းရှိခဲ့တယ်လို့ ဆိုပါတယ်။

“ကျနော်တို့ စတင်တိုက်ခိုက်တာကတော့ မင်းဘူးခရိုင် အမှတ် ၅ တပ်ရင်းရဲ့ ဒရုန်းတပ်ဖွဲ့ကနေ ဒရုန်းနဲ့ ဗုံးသီးကြဲချ တိုက်ခိုက်တယ်၊ တိုက်ခိုက်ပြီးချိန်မှာ မြေပြင်တပ်ဖွဲ့အနေနဲ့ မင်ဘူးခရိုင် အမှတ် ၅ တပ်ရင်း ရဲ့ တပ်ခွဲ ၂ ကနေပြီးတော့ ရန်သူ့နယ်မြေအထိချဉ်းကပ်ပြီး လက်နက်ငယ်နဲ့ ပစ်ခတ်တာတွေရှိတယ်၊” လို့ မင်းဘူးခရိုင် အမှတ် ၅ တပ်ရင်း IO ဟီးရိုး ကပြောပါတယ်။

တော်လှန်ရေးတပ်တွေဘက်က ရဲစခန်းဘန်ကာတွေအနီးထိသွားရောက်တိုက်ခိုက်ခဲ့ပြီး ဘန်ကာ ၃ လုံးကိုဖြိုနိုင်ခဲ့ကာ စစ်ကော်မရှင်တပ်တွေဘက်ကလည်း စနိုက်ပါတွေနဲ့ ပြန်လည်ပစ်ခတ်ခဲ့တယ်လို့ ဆိုပါတယ်။

“ကျနော်တို့ဘက်က ပစ်ခတ်ပေမဲ့စစ်ကော်မရှင်ဘက်က ပြန်လည်တိုက်ခိုက်ခြင်း မရှိဘူး၊ ၉ နာရီ လောက်မှာ စစ်ကော်မရှင်ဘက်က ပြန်လည်တိုက်ခိုက်တာတွေရှိတယ်၊ ရဲစခန်း ဘန်ကာတွေ ဆောက်ထားတဲ့နေရာအထိ ကျနော်တို့ ဝင်ရောက်တိုက်ခိုက်တာတွေရှိတယ်၊ ဘန်ကာ ၄ လုံးရှိတယ်၊ ကျနော်တို့ ၃ လုံးကိုဖြိုနိုင်ခဲ့တယ်၊ ၁ လုံးကိုတော့ ကျနော်တို့ မဖြိုနိုင်ဘူး၊” လို့ IO ဟီးရိုး ကပြောပါတယ်။

တိုက်ခိုက်ပြီးနောက် စစ်ကော်မရှင်ဘက်က မနက် ၁၀ နာရီလောက်မှာ ၁ ကြိမ်၊ ၁၁ နာရီထိုးပြီးမှာ ၁ ကြိမ် လေကြောင်းကနေတိုက်ခိုက်ခဲ့တာကြောင့် တော်လှန်ရေးတပ်ဖွဲ့ဝင် ၃ ဦးထိခိုက်ခဲ့တယ်လို့ ဆိုပါတယ်။

ဒါ့အပြင် တိုက်ပွဲအတွင်း လက်နက်ကြီးနဲ့ပစ်ခတ်လို့ အသက် ၁၉ အရွယ် မင်ဘူးခရိုင် အမှတ် ၅ တပ်ရင်းက တပ်ဖွဲ့ဝင်ဖိုးစိုင်း သေဆုံးခဲ့ပြီး သူ့ရဲ့စျာပနကိုတော့ တိုက်ပွဲဖြစ်ပြီးနေ့ချင်းပြုလုပ်ခဲ့တယ်လို့ IO ဟီးရိုးက ပြောပါတယ်။

လင်းဇင်းတိုက်နယ် ရဲစခန်းမှာ ခလရ ၂၅၃၊ ခလရ ၂၅၄၊ ခလရ ၂၅၅ က စစ်ကော်မရှင်တပ်ဖွဲ့ဝင်၊ ရဲနဲ့ ဆယ်ကန်ရွာကပျူစောထီးအပါအဝင် စုစုပေါင်းအင်အား ၅၀ ဝန်းကျင်နဲ့ တပ်စွဲထားတာလို့ ဆိုပါတယ်။

ပြီးခဲ့တဲ့ ဇွန် ၁၅ ရက်ကလည်း မင်းဘူးခရိုင်၊ စလင်းမြို့နယ်အတွင်းရှိ ကံပြားရွာဘက်ကနေ တင့်ကား ၄ စီးနဲ့ အင်အား ၂၀၀ ကျော်ပါ စစ်ကြောင်းကို ပုသိမ်-မုံရွာ ကားလမ်းပိုင်းမှာ မင်ဘူးခရိုင် အမှတ် ၅ တပ်ရင်းက မိုင်းဆွဲတိုက်ခိုက်ခဲ့ရာ ၃ ဦးသေဆုံးပြီး ၈ ဦးဒဏ်ရာရခဲ့ပါသေးတယ်။

စာတည်း – လင်း၊ တည်းဖြတ် – HP

မုံရွာ၊ အောက်တိုဘာ ၅၊ ၂၀၂၅။

စစ်ကိုင်းတိုင်း၊ မုံရွာမြို့၊ မုံရွာ-မန္တလေးလမ်းပေါ်မှာ ကားတွေကိုပိုက်ဆံကောက်နေတဲ့ စစ်ကော်မရှင်တပ် မိုင်းဆွဲတိုက်ခိုက်ခံရပြီး ၃ ဦးသေဆုံးခဲ့တယ်လို့ မုံရွာခရိုင် အမှတ် ၄ တပ်ရင်း Chindwin Attack Force ဆီက သိရပါတယ်။

အောက်တိုဘာ ၄ ရက် ညနေ ၅ နာရီ ၃၅ မိနစ်မှာ မုံရွာမြို့အထွက်မှာ အင်အား ၁၀ ဦးနဲ့ ပိုက်ဆံကောက်နေတဲ့ စစ်ကော်မရှင်တပ်ဖွဲ့ဝင်တွေကို မိုင်းဆွဲတိုက်ခိုက်ပြီးနောက် စစ်ကူလာတဲ့တပ်တွေကိုလည်း ထပ်မံမိုင်းဆွဲခဲ့တယ်လို့ ဆိုပါတယ်။

“သူတို့ ငွေကြေးကောက်ခံတဲ့အချိန်မှာ လုပ်ဖြစ်တာ၊ ပြည်သူတွေကို ကောက်တာ၊ ကားတွေကို ပိုပြီးတော့ ကောက်တယ်၊ ကျနော်တို့ မိုင်းဆွဲပြီးမှ တပ်ကူ ၃၀ ဦးထပ်ရောက်လာတယ်၊ ငွေကောက်နေတဲ့အချိန် မိုင်း ၁ လုံးဆွဲနိုင်ခဲ့တယ်၊ တပ်ကူလာတဲ့အချိန်မှာ မိုင်း ၁ လုံးထပ်ဆွဲတယ်၊ ပထမ အခါမိုင်းဆွဲတာမှာ ၃ ဦးထိတယ်၊ သေဆုံးတယ်လို့တော့ သတင်းရထားတယ်၊ တပ်ကူလာတဲ့အချိန် မိုင်းထပ်ဆွဲတာက ၅ ဦးထိခိုက်မှုရှိတယ်” လို့ မုံရွာခရိုင် အမှတ် ၄ တပ်ရင်း Chindwin Attack Force သတင်းနဲ့ ပြန်ကြားရေးတာဝန်ခံ ကိုပေတလူက ပြောပါတယ်။

ဒီတိုက်ခိုက်မှုကို မုံရွာခရိုင် အမှတ် ၄ တပ်ရင်း Chindwin Attack Force၊ အထူးကွန်မန်ဒိုတပ်ဖွဲ့ Monywa The Boys နဲ့ မဟာမိတ်အဖွဲ့တွေက တိုက်ခိုက်ခဲ့ကြတာပါ။

မိုင်းဆွဲတိုက်ခိုက်ပြီးနောက် အောက်တိုဘာ ၅ ရက် ဒီနေ့မနက်အထိ စစ်ကော်မရှင်တပ်ဖွဲ့ဝင်‌တွေက မိုင်းဆွဲခံရတဲ့နေရာမှာပဲ သေနတ်ပစ်ဖောက်မှုတွေလုပ်နေတာကြောင့် လူသွားလူလာ နည်းနေတယ်လို့လည်း သိရပါတယ်။

မုံရွာ-မန္တလေးလမ်းမပေါ် မုံရွာမြို့နဲ့ ၁ မိုင်ဝန်းကျင်အတွင်း စစ်ကော်မရှင်တပ်ရဲ့ စစ်ဆေးရေးဂိတ် ၁၀ ခုကျော်ရှိပြီး အဆိုပါဂိတ်တွေကိုလည်း မကြာခဏသွားရောက်တိုက်ခိုက်လေ့ရှိတယ်လို့ သူကဆက် ပြောပါတယ်။

စက်တင်ဘာ ၁၆ ရက်ကလည်း မုံရွာမြို့၊ မုံရွာ-မန္တလေးလမ်းပေါ်မှာ ကုန်ကားတွေကို ပိုက်ဆံကောက်‌နေတဲ့ စစ်ကော်မရှင်တပ်ဖွဲ့ဝင်တွေကို မုံရွာခရိုင် အမှတ် ၄ တပ်ရင်း Chindwin Attack Force က မိုင်းဆွဲတိုက်ခိုက်ရာ ၄ ဦး သေဆုံးခဲ့ပါသေးတယ်။

တည်းဖြတ် – HP

ရွှေဘို၊ အောက်တိုဘာ ၅၊ ၂၀၂၅။

စစ်ကိုင်းတိုင်း၊ ရွှေဘိုမြို့နယ်၊ တာဂဏန်းကျေးရွာအနီး စစ်ကော်မရှင်တပ်နဲ့ ဒေသကာကွယ်ရေးတပ်ဖွဲ့ဝင်တွေအကြား ဖြစ်ပွားခဲ့တဲ့တိုက်ပွဲမှာ ၂ ဖက်သေဆုံးမှုရှိပြီး စစ်သုံ့ပန်း ၄ ဦးဖမ်းမိခဲ့တယ်လို့ ရွှေဘိုမြို့နယ်ပကဖထံက သိရပါတယ်။

အောက်တိုဘာ ၂ ရက် မနက် ၆ နာရီကျော်မှာ ရွှေဘိုမြို့ကနေ စစ်ကြောင်းထိုးလာတဲ့ အင်အား ၁၀၀ ကျော်ပါ စစ်ကော်မရှင်နဲ့ပျူစောထီးပူးပေါင်းတပ်ဖွဲ့ တာဂဏန်းရွာအနီးအရောက် ဒေသကာကွယ်ရေးပူးပေါင်းတပ်တွေက ကြားဖြတ်တိုက်ခိုက်ခဲ့ရာ နှစ်ဖက်တိုက်ပွဲပြင်းထန်ခဲ့တယ်လို့ ဆိုပါတယ်။

” မနက်ခင်းက တမနက်ခင်းလုံးဖြစ်တာ။ နေ့ခင်းပိုင်းကျတော့ ပြောက်ကျား သူကပစ်လိုက်၊ ကိုယ့်ဘက်ကပစ်လိုက်ဖြစ်ရင်းနဲ့ ညနေကျတော့ သူတို့ပြန်ဆုတ်သွားတယ်။ ရှင်းလင်းရေးဝင်တော့ သုံ့ပန်းတွေမိတာ။ ရဲဘော်တယောက်ဆို စကစ သေတဲ့အလောင်းကိုတက်ယူတာ လက်နက်ကြီးခေါင်းထိပြီး ဆုံးတာ” လို့ ရွှေဘိုမြို့နယ်ပကဖတာဝန်ရှိသူတဦးက မြေလတ်အသံကို ပြောပါတယ်။

တိုက်ပွဲအတွင်း စစ်ကော်မရှင်တပ်ဖွဲ့ဝင် ၇ ဦးသေဆုံးပြီး ၁၀ဦးခန့်ဒဏ်ရာရသွားတယ်လို့ဆိုပါတယ်။
ဒါ့အပြင် စစ်ကော်မရှင်တပ်ဖွဲ့ဝင် တပ်ကြပ်တဦးအပါအဝင် ၄ဦးကို အရှင်ဖမ်းစီးရမိခဲ့ပြီး ၆၀ မမ ကွန်မန်ဒိုပြောင်း ၁ လက်၊ MA 3 ၁ လက်၊ MA 1 ၁ လက်၊ ၆၀ မမ ဗုံးသီး ၁ လုံး၊ RPG 7 ဒုံးသီး ၂ လုံး၊ ဂျမ်မာ ၁ ခု၊ ၅.၅၆ ကျည် ၁၀၀ တောင့်တို့ကို သိမ်းဆည်းရမိခဲ့တယ်လို့လည်း ဆိုပါတယ်။

တော်လှန်ရေးတပ်ဖွဲ့တွေဘက်ကလည်း တာဂဏန်းကျေးရွာပကဖအဖွဲ့ဝင် ၁ ဦး၊ ဝက်လက်မြို့နယ်ကာကွယ်ရေးအဖွဲ့ဝင် ၁ ဦးတိုက်ပွဲကျသေဆုံးခဲ့ပြီး ဒဏ်ရာရသူအချို့လည်းရှိခဲ့တယ်လို့ ဆိုပါတယ်။

တိုက်ပွဲဖြစ်ပွားတာကြောင့် တာဂဏန်း၊ ရှားတော၊ ဇီးတောကျေးရွာတွေနဲ့ အနီးတဝိုက်ကျေးရွာတွေက ဒေသခံလူဦးရေ ၃,၀၀၀ ခန့်ထွက်ပြေးခဲ့ရပြီး အောက်တိုဘာ ၃ ရက်မှာတော့ ကျေးရွာတွေမှာ ပြန်လည်နေထိုင်နေကြပြီလို့ သိရပါတယ်။

တိုက်ခိုက်မှုကိုတော့ ရွေဘိုမြို့နယ်အတွင်း တိုက်နယ်နဲ့ကျေးရွာပကဖအဖွဲ့တွေ၊ ဝက်လက်နယ်ဒေသကာကွယ်ရေးအဖွဲ့တွေအပါအဝင် ပူးပေါင်းအဖွဲ့တွေက တိုက်ခိုက်ခဲ့တာပါ။

တိုက်ပွဲဖြစ်ပွားနေချိန် အောက်တိုဘာ ၂ ရက်မနက် ၁၁ နာရီလောက်မှာ ရွှေဘိုအခြေစိုက် ခမရ ၁၁ က ပစ်ကူပေးတဲ့လက်နက်ကြီးဗုံးသီးဟာ ရွှေဘိုမြို့၊ အမှတ် ၇ ရပ်ကွက်ရှိ အောင်မြေချမ်းမြေ့ဘုန်းကြီးကျောင်းဝန်းထဲ ကျရောက်ပေါက်ကွဲလို့ ကိုရင် ၃ ပါး ပျံလွန်တော်မူကာ ၈ ပါးထိခိုက်ဒဏ်ရာရတယ်လို့ သိရပါတယ်။

စာတည်း – ဟိန်းစံ⁩၊ တည်းဖြတ် – HP