ဆိပ်ဖြူ၊ အောက်တိုဘာ ၂၈၊ ၂၀၂၅။

မကွေးတိုင်း၊ ပခုက္ကူခရိုင်၊ ဆိပ်ဖြူမြို့နယ်၊ သံဇလုံရွာစစ်ဆေးရေးဂိတ်ကို ဒေသကာကွယ်ရေးတပ်ဖွဲ့တွေက ဝင်ရောက်တိုက်ခိုက်ခဲ့ပြီး နှစ်ဖက်ထိခိုက်သေဆုံးမှုရှိခဲ့တယ်လို့ ပခုက္ကူခရိုင် အမှတ် ၁၉ တပ်ရင်းတာဝန်ရှိသူတွေထံက သိရပါတယ်။

ဂွေးပင်ချောင်းရွာနဲ့ သံငယ်လုံးကျေးရွာကြားမှာတဲ့ရှိတဲ့ အဲ့ဒီစစ်ဆေးရေးဂိတ်မှာ စစ်ကော်မရှင်တပ်နဲ့ပြည်သူ့စစ်ပူးပေါင်းအင်အား ၁၂ ဦးခန့်ရှိတပ်စွဲနေတာဖြစ်ပြီး အောက်တိုဘာ ၂၇ ရက် မနက် ၅ နာရီခွဲခန့်မှာ ဒေသကာကွယ်ရေးတပ်ဖွဲ့တွေက ဝင်ရောက်တိုက်ခိုက်ခဲ့ရာ အပြန်အလှန်ပစ်ခတ်မှု မိနစ် ၃၀ ခန့်ဖြစ်ပွားခဲ့တယ်လို့ ဆိုပါတယ်။

” ဂိတ်ကတော့ ထိုင်ထားတာ ၂ လဝန်းကျင်ရှိပြီး။ တိုက်ပွဲက မိနစ် ၃၀ လောက်ဘဲ။ မြို့နဲ့နီးတော့ စစ်ကူအလွယ်လာနိုင်တဲ့ ဂိတ်ဗျ၊ စစ်ကြောင်းမှူးက လက်နက်ငယ်ထိခဲ့ပြီး ဘော်ဒီ(အလောင်း) ဆွဲချိန် မရလိုက်ဘူး”လို့ ပခုက္ကူခရိုင် အမှတ် ၁၉ တပ်ရင်းတာဝန်ရှိတဦးက မြေလတ်အသံကို ပြောပါတယ်။

တိုက်ပွဲအတွင်း စစ်ကော်မရှင်တပ်ဖွဲ့နဲ့ပြည်သူစစ် ၄ ဦးသေဆုံးခဲ့ပြီး MA 3 သေနတ် ၁ လက်၊ ကျည်ဆန်တချို့ သိမ်းဆည်းရရှိခဲ့တယ်လို့ သိရပါတယ်။

တော်လှန်ရေးတပ်တွေဘက်ကလည်း မကွေးတိုင်းပကဖရွေ့လျားစစ်ကြောင်း (Yenanthar column)ရဲ့ စစ်ကြောင်းမှူး ရဲဘော် ဆိပ်ဖြူ (ခ) ဟိန်းမင်းသူ တိုက်ပွဲကျသေဆုံးခဲ့ရပြီး ရုပ်အလောင်းပြန်မရခဲ့ဘူးလို့ ဆိုပါတယ်။

တိုက်ပွဲဖြစ်ပြီးတဲ့နောက် အခင်းဖြစ်နေရာကို စစ်ကော်မရှင်တပ်ဖွဲ့စစ်ကူတွေ ထပ်မံရောက်လာပြီး လက်ရှိမှာ အဲ့ဒီစစ်ဆေးရေးဂိတ်ကို အင်အားတိုးမြှင့်ချထားတယ်လို့ သိရပါတယ်။

အဆိုပါတိုက်ခိုက်မှုကို ပခုက္ကူခရိုင် အမှတ် ၁၉ တပ်ရင်း၊ မကွေးတိုင်းပကဖ ရွေ့လျားစစ်ကြောင်း( Yenanthar column)တို့ကပူးပေါင်းလုပ်ဆောင်ခဲ့တာပါ။

အောက်တိုဘာ ၂၅ ရက်ကလည်း ဆိပ်ဖြူမြို့နယ်၊ ဂွေးပင်ချောင်းကျေးရွာအနီးမှာ စစ်ကော်မရှင်စစ်ကြောင်းမိုင်းဆွဲတိုက်ခိုက်ခံရလို့သေဆုံးထိခိုက်မှုတွေရှိခဲ့တယ်လို့ သိရပါတယ်။

စာတည်း – ဟိန်းစံ

ထန်းတပင်၊ အောက်တိုဘာ ၂၅၊ ၂၀၂၅။

ပဲခူးတိုင်း၊ ထန်းတပင်မြို့နယ်၊ ဘုမ္မတီးကျေးရွာအနီးမှာ တိုက်ပွဲဖြစ်နေပြီး စစ်ကော်မရှင်ဘက်က စက်တပ်လေထီးနဲ့ဗုံးကြဲချိန် အမျိုးသား ၁ ဦး ထိမှန်သေတယ်လို့ ဒေသကာကွယ်ရေးတပ်ဖွဲ့ တာဝန်ရှိသူတွေထံက သိရပါတယ်။

အောက်တိုဘာ ၂၄ ရက်မနက် ၇ နာရီခန့်မှာ ဘုမ္မတီးကျေးရွာ အထိုင်ချစခန်းကနေ စစ်ကော်မရှင် တပ်ဖွဲ့ဝင် အင်အား ၅၀ ကျော်က စစ်ကြောင်းထိုးလာချိန် ဒေသကာကွယ်ရေးပူးပေါင်းတပ်တွေနဲ့ ထိတွေ့တိုက်ပွဲဖြစ်ပွားခဲ့တာပါ။

“စစ်ကြောင်းထိုးလာလို့တိုက်ပွဲဖြစ်တာ။ ဘုမ္မတီးမှာက **စခန်းရှိတယ်။ အဲ့စခန်းအနီးထိ နေရာယူထားတော့ တိုက်ပွဲကခဏခဏဖြစ်နေတာ။ မနေ့ကဇရပ်ကြီးဘက်က အင်အားထပ်ဖြည့် စစ်ကြောင်းထိုးလာလို့ ထပ်ဖြစ်တာ။ ဗုံးလာကြဲနေတဲ့အချိနိ ဆိုင်ကယ်နဲ့လာတဲ့ အမျိုးသား ၁ ယောက်ထိသေတာ”လို့ ဒေသကာကွယ်ရေးအဖွဲ့တာဝန်ရှိသူတဦးကပြောပါတယ်။

မနက် ၁၁ နာရီခန့်မှာ တိုက်ပွဲဖြစ်ပွားနေတဲ့ ဧရိယာအနီးကို စစ်ကော်မရှင်တပ်ဘက်က စက်တပ်လေထီး နဲ့ ဗုံး ၃ လုံးလာကြဲချချိန် ရွှေကျောင်းကုန်းကျေးရွာနေ အသက် ၄၀ ကျော်အရွယ် ဦးတူး ဆိုသူကိုထိမှန် ပြီး ဦးခေါင်းပွင့်ဒဏ်ရာနဲ့နေရာမှာပင်သေဆုံးခဲ့ပါတယ်။

တိုက်ပွဲကြောင့် ဘုမ္မတီး၊ သရက်တန်းကျေးရွာတို့က ဒေသခံပြည်သူအချို့ ဘေးလွတ်ရာကို ထွက်ပြေးတိမ်းရှောင်နေကြပြီး အများစုကတော့ ကျေးရွာတွေမှာပဲနေထိုင်နေကြရတယ်လို့ ဆိုပါတယ်။

အောက်တိုဘာ ၂၅ ရက်ဒီနေ့မှာတော့ တိုက်ပွဲအခြေအနေ ငြိမ်သက်နေပြီး တိုက်ပွဲအတွင်း နှစ်ဖက်ထိခိုက်မှုအခြေအနေကိုတော့ လတ်တလောမှာမသိရသေးဘဲ အသေးစိတ်ထုတ်ပြန်ပေးသွားမယ်လို့ အထက်ပါတာဝန်ရှိသူက ဆိုပါတယ်။

ပြည်သူတွေအနေနဲ့ တော်လှန်ရေးတပ်တွေကကန့်သတ်ထားတဲ့ ခွင့်မပြုတဲ့နေရာတွေကို ဖြတ်သန်းသွားလာတာတွေမလုပ်ဖို့၊ လက်နက်ကြီးသံနဲ့ လေယာဥ်သံကြားရင်လည်း လုံခြုံတဲ့နေရာတွေမှာနေထိုင်ပြီး ထွက်မကြည့်ဘဲအကာအကွယ်ယူနေထိုင်ဖို့ အထက်ပါတာဝန်ရှိသူက အသိပေးပြောဆိုထားပါတယ်။

အောက်တိုဘာ ၂၀ ရက်ကလည်း ကျောက်ကြီးမြို့နယ်၊ ရေလဲကျေးရွာကို စစ်ကော်မရှင်တပ်ဘက်က ဒရုန်းနဲ့ဗုံးသီးချတိုက်ခိုက်လို့ ပြည်သူ ၃ ဦးထိခိုက်ဒဏ်ရာရရှိခဲ့ပါသေးတယ်။

စာတည်း – လင်း

ပဲခူး၊ အောက်တိုဘာ ၁၆၊ ၂၀၂၅။

ပဲခူးတိုင်း၊ လက်ပံတန်းမြို့နယ်၊ သရက်ချောင်းကျေးရွာကို စစ်ကြောင်းထိုးလာတဲ့ စစ်ကော်မရှင်တပ်ကို အောက်တိုဘာ ၁၅ ရက်မနက် ၁၀ နာရီကျော်မှာကြားဖြတ်တိုက်ခိုက်ပြီးနောက် လက်နက်ခဲယမ်းတွေနဲ့ သုံ့ပန်းတွေကို သိမ်းဆည်းဖမ်းမိနိုင်ခဲ့တယ်လို့ အမျိုးသားညီညွတ်ရေးအစိုးရ – NUG၊ ကာကွယ်ရေးဝန်ကြီးဌာန ရဲ့ စစ်ရုံးချုပ်က အောက်တိုဘာ ၁၆ ရက်ဒီကနေ့မှာ ထုတ်ပြန်ပါတယ်။

အဆိုပါတိုက်ပွဲအတွင်း စစ်ကော်မရှင်တပ်အထိအခိုက်များခဲ့ပြီး ၁၅ ဦးထက်မနည်း သေဆုံးကာ စစ်သုံ့ပန်းအဖြစ် ၁၂ ဦးကို ဖမ်းဆီးရရှိခဲ့ကာ လက်နက်အစုံ ၁၉ လက်၊ ခဲယမ်းများနဲ့ စစ်သုံးပစ္စည်းများစွာကိုလည်း သိမ်းဆည်းရမိတယ်လို့ ထုတ်ပြန်ချက်မှာ ဖော်ပြပါတယ်။

ဒီတိုက်ခိုက်မှုကို ပြည်သူ့ကာကွယ်‌ရေးတပ်မတော်၊ အမှတ် (၂) စစ်ဆင်ရေးနယ်မြေ၊ ပဲခူးတိုင်းစစ်ဌာန၊ ဗျူဟာ ၂၂ ကွပ်ကဲမှုနဲ့ အမှတ် (၃၈၀၂) တပ်ရင်း၊ အမှတ် (၃၈၀၃) တပ်ရင်း၊ ရွှေတန်းမြေ ပြည်သူ့ကာကွယ်ရေးတပ်ဖွဲ့၊ ဂဠုန်ပြည်သူ့ကာကွယ်ရေးတပ်ဖွဲ့ ပူးပေါင်းတပ်ဖွဲ့တွေက ပြုလုပ်ခဲ့တာလို့ ဆိုပါတယ်။

စလင်း၊ အောက်တိုဘာ ၁၂၊ ၂၀၂၅။

မကွေးတိုင်း၊ မင်းဘူးခရိုင်၊ စလင်းမြို့နယ်၊ လင်းဇင်းတိုက်နယ်ရဲစခန်းမှာတပ်စွဲထားတဲ့ စစ်ကောင်စီတပ်ဖွဲ့ဝင်တွေကို ဝင်ရောက်တိုက်ခိုက်ခဲ့ပြီးနောက် ၂ ဖက်ထိခိုက်သေဆုံးမှုရှိခဲ့တယ်လို့ မင်းဘူးခရိုင် အမှတ် ၅ တပ်ရင်းဆီက သိရပါတယ်။

စစ်ကော်မရှင်တပ်နဲ့ရဲတပ်သား စုစုပေါင်းအင်အား ၃၀ ဝန်းကျင်ရှိတဲ့ အဲ့ဒီစခန်းကို အောက်တိုဘာ ၈ ရက် မနက် ၄ နာရီခွဲဝန်းကျင်ကနေ ၄ နာရီကြာတိုက်ခိုက်ပြီးနောက် စစ်ကော်မရှင်တပ်ဖွဲ့ဝင် ၃ ဦးသေဆုံးပြီး ဒဏ်ရာရသူတွေလည်းရှိခဲ့တယ်လို့ ဆိုပါတယ်။

“ကျနော်တို့ စတင်တိုက်ခိုက်တာကတော့ မင်းဘူးခရိုင် အမှတ် ၅ တပ်ရင်းရဲ့ ဒရုန်းတပ်ဖွဲ့ကနေ ဒရုန်းနဲ့ ဗုံးသီးကြဲချ တိုက်ခိုက်တယ်၊ တိုက်ခိုက်ပြီးချိန်မှာ မြေပြင်တပ်ဖွဲ့အနေနဲ့ မင်ဘူးခရိုင် အမှတ် ၅ တပ်ရင်း ရဲ့ တပ်ခွဲ ၂ ကနေပြီးတော့ ရန်သူ့နယ်မြေအထိချဉ်းကပ်ပြီး လက်နက်ငယ်နဲ့ ပစ်ခတ်တာတွေရှိတယ်၊” လို့ မင်းဘူးခရိုင် အမှတ် ၅ တပ်ရင်း IO ဟီးရိုးက ပြောပါတယ်။

တော်လှန်ရေးတပ်တွေဘက်က ရဲစခန်းဘန်ကာတွေအနီးထိသွားရောက်တိုက်ခိုက်ခဲ့ပြီး ဘန်ကာ ၃ လုံးကိုဖြိုနိုင်ခဲ့ကာ စစ်ကော်မရှင်တပ်တွေဘက်ကလည်း စနိုက်ပါတွေနဲ့ ပြန်လည်ပစ်ခတ်ခဲ့တယ်လို့ ဆိုပါတယ်။

“ကျနော်တို့ဘက်က ပစ်ခတ်ပေမဲ့စစ်ကော်မရှင်ဘက်က ပြန်လည်တိုက်ခိုက်ခြင်း မရှိဘူး၊ ၉ နာရီ လောက်မှာ စစ်ကော်မရှင်ဘက်က ပြန်လည်တိုက်ခိုက်တာတွေရှိတယ်၊ ရဲစခန်း ဘန်ကာတွေ ဆောက်ထားတဲ့နေရာအထိ ကျနော်တို့ ဝင်ရောက်တိုက်ခိုက်တာတွေရှိတယ်၊ ဘန်ကာ ၄ လုံးရှိတယ်၊ ကျနော်တို့ ၃ လုံးကိုဖြိုနိုင်ခဲ့တယ်၊ ၁ လုံးကိုတော့ ကျနော်တို့ မဖြိုနိုင်ဘူး၊” လို့ IO ဟီးရိုး ကပြောပါတယ်။

တိုက်ခိုက်ပြီးနောက် စစ်ကော်မရှင်ဘက်က မနက် ၁၀ နာရီလောက်မှာ ၁ ကြိမ်၊ ၁၁ နာရီထိုးပြီးမှာ ၁ ကြိမ် လေကြောင်းကနေတိုက်ခိုက်ခဲ့တာကြောင့် တော်လှန်ရေးတပ်ဖွဲ့ဝင် ၃ ဦးထိခိုက်ခဲ့တယ်လို့ ဆိုပါတယ်။

ဒါ့အပြင် တိုက်ပွဲအတွင်း လက်နက်ကြီးနဲ့ပစ်ခတ်လို့ မင်ဘူးခရိုင် အမှတ် ၅ တပ်ရင်းက အသက် ၁၉ အရွယ် တပ်ဖွဲ့ဝင် ဖိုးစိုင်း သေဆုံးခဲ့ပြီး သူ့ရဲ့စျာပနကိုတော့ တိုက်ပွဲဖြစ်ပြီးနေ့ချင်းပြုလုပ်ခဲ့တယ်လို့ IO ဟီးရိုးက ပြောပါတယ်။

လင်းဇင်းတိုက်နယ် ရဲစခန်းမှာ ခလရ ၂၅၃၊ ခလရ ၂၅၄၊ ခလရ ၂၅၅ က စစ်ကော်မရှင်တပ်ဖွဲ့ဝင်၊ ရဲနဲ့ ဆယ်ကန်ရွာကပျူစောထီးအပါအဝင် စုစုပေါင်းအင်အား ၅၀ ဝန်းကျင်နဲ့ တပ်စွဲထားတာလို့ ဆိုပါတယ်။

ပြီးခဲ့တဲ့ ဇွန် ၁၅ ရက်ကလည်း မင်းဘူးခရိုင်၊ စလင်းမြို့နယ်အတွင်းရှိ ကံပြားရွာဘက်ကနေ တင့်ကား ၄ စီးနဲ့ အင်အား ၂၀၀ ကျော်ပါ စစ်ကြောင်းကို ပုသိမ်-မုံရွာ ကားလမ်းပိုင်းမှာ မင်ဘူးခရိုင် အမှတ် ၅ တပ်ရင်းက မိုင်းဆွဲတိုက်ခိုက်ခဲ့ရာ ၃ ဦးသေဆုံးပြီး ၈ ဦးဒဏ်ရာရခဲ့ပါသေးတယ်။

စာတည်း – လင်း

မြေလတ်အသံ၊အောက်တိုဘာ ၁၀၊ ၂၀၂၅။

စစ်ကိုင်းတိုင်းအထက်ပိုင်း၊ မော်လိုက်မြို့နယ်အတွင်းက စစ်ကော်မရှင်တပ်စခန်း ၆ ခုကို ၂ လအတွင်း သိမ်းပိုက်ရရှိခဲ့တယ်လို့ မော်လိုက်ဒေသကာကွယ်ရေးတပ်ဖွဲ့တွေစုပေါင်းဖွဲ့စည်းထားတဲ့ မော်လိုက်တော်လှန်ရေးအင်အားစုက အောက်တိုဘာ ၉ ရက်မှာ ထုတ်ပြန်ပါတယ်။

ပြီးခဲ့တဲ့ ဩဂုတ်နဲ့ စက်တင်ဘာလတွေအတွင်းမှာ စစ်ကော်မရှင်တပ်နဲ့ပျူစောထီးတပ်ဖွဲ့တွေ ပူးပေါင်းအထိုင်ချတပ်စွဲနေတဲ့ ထော်သာ၊ တောင်းအင်၊ ညောင်ဝန်း၊ နောင်ပိန်း၊ အော်ဇီးခုံ၊ နားပင်ရွာစခန်းတွေကို သိမ်းပိုက်ရရှိခဲ့တာဖြစ်ပြီး ထော်သာရွာစခန်းသိမ်းတိုက်ပွဲမှာ စစ်ကော်မရှင်တပ်ဖွဲ့ဝင် ၆ ဦးနဲ့ ထွက်ပြေးသွားတဲ့ပျူစောထီးတွေရဲ့မိသားစုဝင် စုစုပေါင်း ၂၀၀ နီးပါးကို ဖမ်းမိခဲ့တယ်လို့ ဆိုပါတယ်။

“သိမ်းပိုက်ထားတဲ့ စစ်ကော်မရှင်တပ်စခန်း ၆ခုရဲ့တိုက်ပွဲအခြေအနေအသေးစိတ်တွေကို အမှတ် ၁ စစ်ဒေသက ဆက်လက်ထုတ်ပြန်သွားမှာဖြစ်တယ်”လို့ မော်လိုက်တော်လှန်ရေးအင်အားစု တာဝန်ရှိသူတဦးက မြေလတ်အသံကို ပြောပါတယ်။

“သိမ်းငှက်စစ်ဆင်ရေး” လို့အမည်ပေးထားတဲ့ အဲ့ဒီတိုက်ခိုက်မှုမှာ စစ်ကော်မရှင်တပ်စခန်း ၆ ခုအထိသိမ်းပိုက်ရရှိခဲ့ပြီး စခန်း ၆ ခုအနက် ထော်သာရွာစခန်းဟာ ပျူစောထီးအားကောင်းတဲ့စခန်းဖြစ်ကာ ခမရ ၃၆၆၊ ရှေ့တန်းတပ်မ ၈၈ လက်အောက်တပ်ရင်းတွေနဲ့ ရွာခံပျူစောထီးတွေ ပူးပေါင်းတပ်စွဲနေတာလို့ ဆိုပါတယ်။

ထော်သာပျူစောထီးစခန်းသိမ်းတိုက်ပွဲအတွင်း ပျူစောထီးခေါင်းဆောင် အဲပန်အပါ ပျူစောထီးမိသားစုဝင် ၁၉၀ ဦးကို ဖမ်းဆီးနိုင်ခဲ့သလို ၆၀ မမ စိန်ပြောင်း၊ RPG အပါအဝင် လက်နက်မျိုးစုံ ၂၃ လက်၊ ခဲယမ်းနဲ့ ငွေကျပ် သိန်း ၁၅၀ ကျော်ကို သိမ်းဆည်းရရှိခဲ့တယ်လို့ အမှတ် ၁ စစ်ဒေသက သြဂုတ် ၂၁ ရက်မှာထုတ်ပြန်ပါတယ်။

ဒါ့အပြင် စခန်းအတွင်းက စစ်ကော်မရှင်တပ်သားအလောင်း ၃လောင်း ရရှိခဲ့ပြီး စစ်သားနဲ့ပျူစောထီး ၉ ဦးထိခိုက်ဒဏ်ရာရရရှိခဲ့ကာ ပျူစောထီး ၂၀ ဦးခန့် ထွက်ပြေးလွတ်မြောက်ခဲ့တယ်လို့ အမှတ်-၁ စစ်ဒေသ ထုတ်ပြန်ချက်မှာဖော်ပြပါတယ်။

သိမ်းငှက်စစ်ဆင်ရေးစခန်းသိမ်းတိုက်ပွဲတွေကို မော်လိုက်ခရိုင်တပ်ရင်း ၁၊၂၊ ၃၊ ၄ မော်လိုက်နဲ့ဖောင်းပြင်မြို့နယ်ပြည်သူ့ကာကွယ်ရေးတပ်ဖွဲ့(ပကဖ)၊ ပြည်သူ့လုံခြုံရေးတပ်ဖွဲ့ (ပလဖ)၊ ခရိုင်ကွပ်ကဲရေးရုံးတိုက်ခိုက်ရေးအဖွဲ့တို့က ပူးပေါင်းဖော်ဆောင်ခဲ့တာလို့သိရပါတယ်။