ထွက်ပြေး

မြေလတ်အသံ၊ အောက်တိုဘာ ၁၃၊ ၂၀၂၅။

မကွေးတိုင်း၊ ဆောမြို့နဲ့ ကျောက်ထုမြို့ကနေထွက်ပြေးလာကြတဲ့ စစ်ကော်မရှင်တပ်မှ တပ်ကြပ်ကြီး ၁ ဦးနဲ့ ဒုတပ်ကြပ် ၂ ဦးတို့ကို တော်လှန်ရေးတပ်ဖွဲ့တွေက ဖမ်းဆီးခဲ့တယ်လို့ တော်လှန်ရေးတပ်ဖွဲ့ဝင်တဦးက ပြောပါတယ်။

ဆောမြို့ကနေထွက်ပြေးလာတဲ့ အသက် ၄၀ ခန့်အရွယ်ရှိ တပ်ကြပ်ကြီးကို အောက်တိုဘာ ၁၂ ရက်ည ၆ နာရီကျော်မှာ ဆောမြို့နယ် ကျေးရွာတရွာအနီးမှာ ဖမ်းမိပြီး ကျောက်ထုအခြေစိုက် အမတ ၃၆၈ တပ်ရင်းကထွက်ပြေးလာတဲ့ ၃၈ နှစ်အရွယ် ဒုတပ်ကြပ် ၂ ဦးကိုတော့ အောက်တိုဘာ ၁၀ ရက်မနက် ၈ နာရီကျော်က ကျောက်ထုမြို့နယ် ကားလမ်းတနေရာမှာဖမ်းမိခဲ့ကြတာလို့ ဆိုပါတယ်။

“ဒုတပ်ကြပ် ၂ ယောက်ကိုတော့ ရွာခံတွေနဲ့ ရွာပကဖတွေက ဖမ်းမိတာ။ သူတို့ကို သက်ဆိုင်ရာတပ်ဖွဲ့တခုကို အပ်လိုက်တယ်။ တပ်ကြပ်ကြီးကိုတော့ ဆောအခြေစိုက်တပ်ဖွဲ့တဖွဲ့က ဝိုင်းဝန်းဖမ်းဆီးလိုက်တာပါ။ သူ့မှာတော့ သေနတ်မပါလာဘူး”လို့ မြေပြင်အခြေအနေကိုသိရှိတဲ့ တော်လှန်ရေးတပ်ဖွဲ့ဝင်တဦးက ပြောပါတယ်။

ဒုတပ်ကြပ် ၂ ဦးဆီကတော့ MA 5 ပစ္စတို ၁ လက်၊ 9 mm ကျည် ၅ တောင့်၊ လက်ပစ်ဗုံး ၁ လုံး၊ လက်ကိုင်ဖုန်း ၁ လုံးတို့ကို သိမ်းဆည်းရမိခဲ့တယ်လို့ ဆိုပါတယ်။

ဖမ်းဆီးရမိတဲ့ တပ်ကြပ်ကြီးက ဆောမြို့ပေါ်ကနေ ထွက်ပြေးလာခဲ့တာဖြစ်ပေမယ့် ဘယ်တပ်ရင်းကလဲဆိုတာကိုတော့ မသိရှိရသေးဘဲ လက်ရှိမှာ ဖမ်းမိသူ ၃ ဦးကို စစ်ဆေးမေးမြန်းမှုပြုလုပ်ကာ ထိန်းသိမ်းထားတယ်လို့ အထက်ပါတပ်ဖွဲ့ဝင်ကပြောပါတယ်။

ဒါ့အပြင် ဒုတပ်ကြပ် ၂ ဦးထွက်ပြေးခဲ့တာနဲ့ပတ်သက်ပြီး အမတ ၃၆၈ က တပ်ဖွဲ့ဝင် ၁၀၀ ကျော်ဟာ ကျောက်ထုမြို့နယ်ရှိကျေးရွာတွေဘက်ကို အောက်တိုဘာ ၁၀ ရက် နဲ့ ၁၁ ရက်တို့မှာ စစ်ကြောင်းထိုးပြီး ရှာဖွေခဲ့ပေမယ့် မတွေ့ရှိတာကြောင့် အောက်တိုဘာ ၁၂ ရက်မနက်ပိုင်းမှာ တပ်ပြန်ဆုတ်သွားခဲ့ကြတယ်လို့ ဒေသခံတွေဆီက သိရပါတယ်။

စာတည်း – လင်း

မြေလတ်အသံ၊ စက်တင်ဘာ ၂၃၊ ၂၀၂၅။

ပဲခူးတိုင်း၊ နတ်တလင်းမြို့နယ်မှာ စစ်မှုထမ်းဖို့ ဖမ်းဆီးခံထားရသူလူငယ်က အစောင့်ရဲတပ်ဖွဲ့ဝင်တဦးကိုသတ်ပြီး လက်နက်ခဲယမ်းတွေယူဆောင်ထွက်ပြေးလာတယ်လို့ သာယာဝတီခရိုင် အမှတ် ၁ တပ်ရင်း ၃၈၀၁ ဆီက သိရပါတယ်။

ထွက်ပြေးလွတ်မြောက်လာသူဟာ တောင်ညိုကွက်သစ်ရဲစခန်းမှာ စစ်မှုထမ်းအဖြစ်ပို့ဆောင်ဖို့ဖမ်းဆီးခံထားရသူ အသက် ၁၈ နှစ်အရွယ် စိုင်းမြတ်ကို ဖြစ်ပြီး စက်တင်ဘာ ၂၁ ရက် ညပိုင်းမှာ အစောင့်ရဲတပ်သားကို ဓားနဲ့ထိုးသတ်ပြီး လက်နက်ခဲယမ်းတွေယူဆောင်ထွက်ပြေးလာပြီးနောက် PDF တွေဆီ ရောက်ရှိလာတာလို့ ဆိုပါတယ်။

” သူကလည်း စစ်မှုထမ်းအဖြစ် ဆွဲခံရတာ ၁၀ ရက်လောက်ပဲ ရှိသေးတယ်။ သူက သူတို့(ရဲတပ်ဖွဲ့) ယုံကြည်မှုကို ရအောင်ယူတယ်။ သူ့ကို တောင်ညိုရဲစခန်းမှာ လွတ်လပ်စွာထားတယ်၊ သူနဲ့အတူရှိနေတဲ့ ရဲတဦးကို အဲ့ဒီရဲရဲ့ဓါးနဲ့လည်ပင်းကို ထိုးဖောက်ပြီး လက်နက်ခဲယမ်းတွေကို တိတ်ဆိတ်စွာယူဆောင်နိုင်ခဲ့တယ်။ တိတ်ဆိတ်စွာယူဆောင်နိုင်ခဲ့တာလည်း သူတို့တန်းစီနေတဲ့အချိန် ဖြစ်ပါတယ်။ သူ့မှာထွက်ပေါက်ရာ လမ်းတခုရသွားတာပေါ့။ ဘန်ကာကင်းထဲမှာ သူနဲ့အတူရှိနေတဲ့ ရဲ** ၁ ကောင်ကို သူသုတ်သင်ရှင်းခဲ့ပြီးတော့ သူထွက်ပြေးတိမ်းရှောင်လာခဲ့တာ” လို့ သာယာဝတီခရိုင်အမှတ် ၁ တပ်ရင်း ၃၈၀၁ တပ်ရင်းမှူး ဗိုလ်မိုးကြိုး က မြေလတ်အသံကို ပြောပါတယ်။

စိုင်းမြတ်ကိုဟာ ပြီးခဲ့တဲ့ စက်တင်ဘာဒုတိယပတ်အတွင်းက တောင်ညိုကွက်သစ်ဈေးတန်းမှာ စစ်ကော်မရှင်တပ်နဲ့ ရဲတပ်ဖွဲ့ဝင်တွေရဲ့ လူ၊ ဆိုင်ကယ်တွေကို စစ်ဆေးဖမ်းဆီးချိန် စစ်မှုထမ်းဖို့ ဖမ်းဆီးခံခဲ့ရတာဖြစ်ပြီး စစ်သင်တန်းပို့ဆောင်ဖို့ တောင်ညိုရဲစခန်းထဲ ထိန်းသိမ်းထားစဥ် အခုလိုထွက်ပြေးလွတ်မြောက်လာခဲ့တာလို့ သိရပါတယ်။

ကိုစိုင်းမြတ်ကိုနဲ့ အတူ သေဆုံးရဲတပ်သားရဲ့ G-3 သေနက် ၁ လက်၊ ၇.၆၂ မမ ကျည် ၁၀ တောင့်၊ ကျည်ဘောက် ၁ ခု ယူဆောင်လာနိုင်လို့ ၎င်းကို သိန်း ၂၀ ဆုချီးမြှင့်ထားတယ်လို့ တပ်ရင်းမှူးက ပြောပါတယ်။

စာတည်း – ဟိန်းစံ

မြေလတ်အသံ၊ စက်တင်ဘာ ၁၉၊ ၂၀၂၅။

စစ်ကိုင်းတိုင်း၊ ထီးချိုင့်မြို့နယ် ပြည်သူ့လုံခြုံရေးအဖွဲ့အချုပ်မှ အချုပ်ကျနေသူ ၁၈ ဦး စက်တင်ဘာ ၉ ရက်ည ၉ နာရီကျော်မှာ ထွက်ပြေးသွားခဲ့ပြီး အဲဒီထဲက ၂ ဦးကိုပြန်ဖမ်းမိထားကာ ၁ ဦးကတော့ပစ်ခတ်ခံရပြီး သေဆုံးခဲ့တယ်လို့ ဒေသခံတွေဆီကသိရပါတယ်။

သေဆုံးသူဟာ ဝါးဘိုးချောင်းရွာမှ ရဲရင့်ဖြစ်ပြီး သူအပါအဝင်အချုပ်သား ၅ ဦးကို ပလဖအဖွဲ့ဝင်တွေက စက်တင်ဘာ ၉ ရက်ည ၁၀ နာရီကျော်မှာ ပျဉ်းစုကျေးရွာအတွင်း ဝင်ရောက်ဖမ်းဆီးခဲ့ချိန် ၄ ဦးက ထပ်မံထွက်ပြေးသွားခဲ့ပြီး ရဲရင့်ကတော့ ဖမ်းမိတဲ့နေရာတင် ပစ်ခတ်ခံရကာ သေဆုံးခဲ့တာလို့ ဆိုပါတယ်။

“အဲ့ဒီအချိန် ရဲရင့်နဲ့အတူမိတဲ့ အခြားအချုပ်သားတွေလည်းပါတယ်။ သူတို့က ဒူးထောက်လျက်ကနေ ထပြေးကြတာ။ အဲ့ဒီကောင်လေး(ရဲရင့်)က ထဖို့လှည့်တဲ့အချိန် ကျောဘက်ကိုတချက်ပစ်လိုက်တာ။ ပြီးတော့မှ သေတယ်ဆိုတာ ဒီလိုဆိုပြီး ခေါင်းကို တချက်ပစ်ထည့်လိုက်တော့တာ။ အလောင်းကိုတော့ ရွာသင်္ချိုင်းထဲ သွားမြှုပ်တယ်”လို့ ဖြစ်စဥ်ကိုသိရှိထားသူ ထီးချိုင့်ဒေသခံအမျိုးသားတဦးကပြောပါတယ်။

အဲ့ဒီနောက် ထွက်ပြေးသွား ၄ ဦးကို ဆက်လက်ဖမ်းဆီးရာ လင်းလင်း နဲ့ အချုပ်သား ၁ ဦး စုစုပေါင်း ၂ ဦးကို ဝါးဘိုးချောင်းရွာနဲ့ လမ်းတခုသာခြားတဲ့ ထန်းကုန်းကျေးရွာလမ်းဆုံမှာ ပြန်လည်ဖမ်းမိခဲ့ပြီး ပလဖ အချုပ်မှာပဲ ထိန်းသိမ်းထားတယ်လို့ သိရပါတယ်။

အဆိုပါဖြစ်စဥ်နဲ့ပတ်သက်ပြီး ထီးချိုင့်မြို့ နယ်ပြည်သူ့လုံခြုံရေးနဲ့ ပြည်သူ့ကာကွယ်ရေးအဖွဲ့တို့ကို မြေလတ်အသံက ဆက်သွယ်မေးမြန်းထားပေမယ့်ပြန်လည်ဖြေကြားတာမရှိသေးပါဘူး။

သေဆုံးသူ ရဲရင့်မှာ စက်လှေအချင်းချင်းတိုက်မိပြီး တဖက်စက်လှေပိုင်ရှင်ကို လျော်ကြေးမပေးနိုင်တာကြောင့် ကျေးရွာ အုပ်ချုပ်ရေးမှူးကဖမ်းဆီးပြီး ပလဖအချုပ်မှာ ချုပ်နှောင်ခံထားရတာဖြစ်သလို ပြန်ဖမ်းမိထားတဲ့ ၂ ဦးအပါအဝင် လွတ်မြောက်နေသေးတဲ့အချုပ်သားတွေကလည်း မူးယစ်ဆေးဝါးသုံးစွဲမှုတွေနဲ့ ဖမ်းဆီးချုပ်နှောင် ခံထားရသူတွေဖြစ်ကြတယ်လို့ အထက်ပါအမျိုးသားကပြောပါတယ်။

“အချုပ်သားတွေက ကျခံနေရတာ တယောက်နဲ့တယောက် အချိန်မတူဘူး။ တချို့ဆို လေးလကျော်၊ သုံးလကျော်ရှိနေတယ်။ အဲ့ဒီ ၁၈ ယောက်လုံးနဲ့ပတ်သက်လို့ လိုက်လို့မရဘူးပေါ့လေ။ အမှုတော်တော် များများကတော့ မူးယစ်မှုပေါ့လေ။ တချို့ ကတော့ လျော်ကြေးဆိုင်ရာအမှုတွေပေါ့လေ။ တယောက်နဲ့ တယောက်အမှုတွေမတူကြတော့ ကာလတွေတော့ပြောလို့မရဘူးဖြစ်နေတာ”လို့ အထက်ပါအမျိုးသားကဆို ပါတယ်။

ထီးချိုင့်ဒေသအတွင်း‌ရှိ တော်လှန်ရေးတပ်တွေစိုးမိုးထားတဲ့ ထီးချိုင့်မြို့နယ်မှာ ၂၀၂၅၊ ဩဂုတ်လကစတင်ပြီး လက်ရှိအချိန်ထိ စစ်ကော်မရှင်တပ်က ညမထွက်ရအမိန့် ပုဒ်မ (၁၄၄) ထုတ်ထားပြီး အဲဒီအမိန့်ချိုးဖောက်သူတွေကို စစ်မှုထမ်းပို့မှာလို့ ထုတ်ပြန်ထားတယ်လို့ ဒေသခံတွေဆီကသိရပါတယ်။

ပြီးခဲ့တဲ့ ဧပြီ ၂၆ ရက်ကလည်း ထီးချိုင့်မြို့နယ် ပြည်သူ့လုံခြုံရေးအဖွဲ့ရဲ့အချုပ်မှ အချုပ်သားတချို့မှာ အချုပ်တံခါးပွင့်နေချိန် ထွက်ပြေးခဲ့တဲ့ဖြစ်စဥ်ရှိခဲ့ပြီး ထွက်ပြေးသူတွေကိုတော့ ပြန်လည်ဖမ်းမိခဲ့တယ်လို့ ဒေသခံတွေဆီကသိရပါတယ်။

စာတည်း – လင်း

ရွှေတောင်၊ စက်တင်ဘာ ၉၊ ၂၀၂၅။

ပဲခူးတိုင်းအနောက်ခြမ်း၊ ပြည်မြို့မှာ အဝေးသင်တက္ကသိုလ်မှာတက်ရောက်နေတဲ့ ကျောင်းသားတဦး စစ်ကော်မရှင်တပ်ရဲ့ ပေါ်တာဆွဲဖမ်းဆီးမှုခံရပြီးနောက် ထွက်ပြေးလွတ်မြောက်လာတယ်လို့ ရွှေတောင်ပကဖတာဝန်ခံထံက သိရပါတယ်။

ဖမ်းဆီးခံရသူဟာ ရွှေတောင်မြို့ဇာတိ ပြည်အဝေးသင်တက္ကသိုလ်မှာ ရူပဗေဒဘာသာရပ်နဲ့ ပထမနှစ်တက်ရောက်နေသူ အသက် ၂၁ နှစ်အရွယ် မောင်မျိုးမင်းဟိန်းဖြစ်ပြီး ဩဂုတ်လဒုတိယပတ်အတွင်းက ၎င်းရဲ့သူငယ်ချင်းအမျိုးသား ၂ ဦးနဲ့အတူ ဆိုင်ကယ်စီးနင်းနေစဥ် ပြည်၊ မြို့သစ် ၁၇ လမ်းအရောက်မှာ စစ်ကော်မရှင်တပ်သားတွေရဲ့ ဖမ်းဆီးတာကိုခံလိုက်ရတာလို့ ဆိုပါတယ်။

” သူငယ်ချင်း ၃ ယောက်ဆိုင်ကယ် ၁ စီးနဲ့သွားနေတဲ့အချိန်မှာ **က နောက်ကနေ စုဆောင်းရေးကားက ကပ်ပါလာတာကို ဘုန်းကြီးကားထင်ပြီး လမ်းဘေးချရပ်ပေးလိုက်တာကို ရှေ့ကနေပိတ်ပြီး ၃ ယောက်စလုံးကို ဖမ်းတာ။ ကျန်တဲ့ ၂ ယောက်ကလည်း ခုခံလို့ဆိုပြီး ရိုက်နှက်ဖမ်းသွားတာ” လို့ ထွက်ပြေးလွတ်မြောက်လာသူရဲ့ပြောဆိုချက်ကို ရွှေတောင်မြို့နယ်ပကဖတာဝန်ခံက ပြောပါတယ်။

အဲ့ဒီနောက် မျိုးမင်းဟိန်းအပါ ၃ ဦးကို ပြည်မြို့အခြေစိုက် အမှတ် ၉၅၉ လျှပ်စစ်နှင့်စက်မှုအင်ဂျင်နီယာတပ်ခွဲ အတွင်း ၃ ရက်ကြာ ထိပ်တုံးခတ်ဖမ်းဆီးထားပြီးနောက် စစ်ကော်မရှင်လက်အောက်လျှပ်စစ်ဝန်ထမ်းတွေဖြစ်တဲ့ သူငယ်ချင်းအမျိုးသား ၂ ဦးကို ပြန်လွှတ်ပေးလိုက်ပြီး ၎င်းကို ရွှေတောင်မြို့အခြေစိုက် ခလရ ၁၄ ကို ပြောင်းရွှေ့ကာ ဆက်လက်ဖမ်းဆီးထားခဲ့တယ်လို့ သိရပါတယ်။

ခလရ ၁၄ ကိုရောက်ရှိချိန် အခြားဖမ်းဆီးခံထားရသူ အမျိုးသား ၃၀ ဦးကျော်နဲ့အတူနေထိုင်ခဲ့ရပြီး ဩဂုတ်လနောက်ဆုံးပတ်ထဲမှာ စစ်ကော်မရှင်တပ်သားတွေ ညပိုင်းကင်းအိပ်နေကြချိန် အပေါ့သွားမယ်ဆိုကာ ထွက်ပြေးခဲ့ရာ စက်တင်ဘာ ၅ ရက်မှာ ရွှေတောင်မြို့နယ်ပကဖထံရောက်ရှိခဲ့တာလို့ ဆိုပါတယ်။

“သူထွက်ပြေးလာပြီးတော့ လမ်းမှာအဆင့်ဆင့်ဆက်သွယ်လာပြီး ကျနော်တို့နဲ့ချိတ်ဆက်ပြီး ကျနော်တို့က ဒီဘက်ကိုကယ်တင်ပြီး ခေါ်လာတာ။ သူက ပကဖထဲဝင်သွားမယ်လို့တော့ အဆိုပြုထားတာရှိတယ်”လို့ပကဖ တာဝန်ခံကဆက်ပြောပါတယ်။

လက်ရှိမှာ အဝေးသင်တက္ကသိုလ်သိပ္ပံဘာသာတွဲအထူးပြုဘာသာရပ်တွေအနေနဲ့ တက္ကသိုလ်တက်ရောက်နေရပြီဖြစ်ပြီး စက်တင်ဘာလကုန်မှာ စာမေးပွဲဖြေဆိုရမှာဖြစ်ကာ ဝိဇ္ဇာတွဲအထူးပြုဘာသာရပ်တွေအနေနဲ့ အောက်တိုဘာနဲ့ နိုဝင်ဘာလတွေမှာ ဆက်လက်တက်ရောက်ရမှာ ဖြစ်ပါတယ်။

စစ်ကော်မရှင်ပြည်သူစစ်မှုထမ်းဆင့်ခေါ်ရေး နည်းဥပဒေမှာ စစ်ကော်မရှင်ကဖွင့်လှစ်တဲ့ တက္ကသိုလ်တွေမှာတက်ရောက်နေသူ ကျောင်းသားတွေကို စစ်မှုထမ်းဆောင်ခြင်းကနေ ယာယီကင်းလွတ်ခွင့်ပြုကြောင်း ပြဌာန်းထားပေမယ့် စစ်ကော်မရှင်တပ်က တက္ကသိုလ်ကျောင်းသားတွေကိုပါ ဖမ်းဆီးနေတဲ့အပေါ် ပြည်နည်းပညာတက္ကသိုလ်ကျောင်းသားများသမဂ္ဂအတွင်းရေးမှူးဟောင်းတဦးက အခုလို မှတ်ချက်ပြုပါတယ်။

” စစ်ကော်မရှင်က ပြည်သူ့စစ်မှုထမ်းဥပဒေ စပြဌာန်းကတည်းက ပေါ်တာတွေဆွဲနေတာပေါ့နော်။ ဒီဥပဒေကလည်း ပေါ်တာဆွဲဖို့အတွက်ပဲ ထုတ်ထားတဲ့ပုံစံမျိုးပဲ ဖြစ်တယ်ပေါ့။ လောလောဆယ်မှာ လူဦးရေမလောက်တော့တဲ့အတွက်ကြောင့်မလို့ ဒီကျောင်းတက်နေတဲ့ တက္ကသိုလ်ကျောင်းသားတွေဘက်ကိုလည်း ဦးတည်လာတယ်လို့ ထင်ရတယ်။ ခုကတော့ အဝေးသင်တက္ကသိုလ်ကျောင်းသားတွေ များသောအားဖြင့်ပါတယ်။ သူတို့က ဘာလို့လည်းဆိုတော့ တက္ကသိုလ်မှာအမြဲနေရတာမဟုတ်ဘူး။ အပြင်မှာ အလုပ်လုပ်ရင်းနဲ့ကျောင်းတက်နေရတာဖြစ်တာကြောင့်မလို့ အလုပ်လုပ်ရင်းနဲ့ ပေါ်တာဆွဲခံရတာမျိုးတွေလည်းရှိနိုင်တယ်။ နောက်ပြီး နောက်တဆင့်ကျရင်တော့ Day တက်နေတဲ့ ကျောင်းသားတွေဘက်ကိုလည်း လှည့်ကောင်းလှည့်လာနိုင်တယ်ပေါ့။ သူတို့အနေနဲ့ ဂရုတစိုက်နေဖို့ကို ပြောချင်ပါတယ် “ လို့ သူကပြောပါတယ်။

စစ်ကော်မရှင်တပ်ဟာ ၎င်းတို့လစဥ်ဖွင့်လှစ်နေတဲ့ ပြည်သူ့စစ်မှုထမ်းသင်တန်းတွေမှာ စစ်သင်တန်းသားတွေပြည့်မီစေရေး နေ့ရောညပါ လူငယ်တွေကို ဖမ်းဆီးမှုတွေပြုလုပ်နေပြီး ပဲခူး၊ မကွေး၊ စစ်ကိုင်းနဲ့ ဧရာဝတီတိုင်းဒေသကြီးတွေက လူငယ်တွေကို အဓိကပစ်မှတ်ထားဖမ်းဆီးနေတာလည်းဖြစ်ပါတယ်။

ပြီးခဲ့တဲ့ဩဂုတ်လအတွင်းမှာလည်း စစ်ကိုင်းတံတားပေါ်က ခရီးသွားကားတွေကို တားဆီးကာ လူငယ် ၃၀ ကျော်ကို ဖမ်းဆီးခဲ့သလို မကွေးတိုင်း၊ အောင်လံမြို့ နယ်က ကျေးရွာတွေမှာလည်း လူငယ်တွေကို နေအိမ်တွေထဲအထိ ဝင်ရောက်ဖမ်းဆီးမှုတွေလုပ်ဆောင်နေတယ်လို့ မြို့ခံတွေထံက သိရပါတယ်။

စာတည်း – ဟိန်းစံ

မြင်းခြံ၊ စက်တင်ဘာ ၁၊ ၂၀၂၅။

မန္တလေးတိုင်းအခြေစိုက် မြင်းခြံခရိုင်တပ်ရင်း ၁၀ က တပ်ဖွဲ့ဝင် ၄ ဦး တပ်ရင်းကထွက်ပြေးသွားခဲ့တယ်လို့ မြင်းခြံခရိုင်တပ်ရင်း ၄ တာဝန်ရှိသူတွေဆီက သိရပါတယ်။

ထွက်ပြေးသွားသူတွေက တပ်ဖွဲ့ဝင် မျိုးမင်းသိန်း၊ လွင်ဦး၊ စိုင်းဇင်ထွန်း၊ နိုင်ဝင်းတို့ ၄ ဦးဖြစ်ပြီး ဩဂုတ်လတတိယအပတ်လောက်မှာ တာဝန်ကျရာနေရာတွေကနေ တဦးနဲ့တဦးချိတ်ဆက်ပြီး တရက်တည်း အတူထွက်ပြေးသွားကြတာလို့ ဆိုပါတယ်။

“ကျနော်တို့ တပ်ရင်းရဲ့ ထုတ်ပြန်ထားတဲ့စည်းကမ်းတွေကို မလိုက်နာဘဲ ထွက်ပြေးသွားတယ်။ အရင်သတ်မှတ်ထားတဲ့ စည်ကမ်းရှိသလို လတ်တလောထုတ်ပြန်ထားတဲ့ စည်းကမ်းရှိတယ်။ ဒါတွေကိုမလိုက်နာနိုင်လို့ ပြေးသွားကြတာ။ သူတို့က အရင်ကတော့ LPDF အဖွဲ့တခုကပါ။ အသေးစိတ်တော့ ပြောလို့မရသေးဘူး”လို့ မြင်းခြံခရိုင်တပ်ရင်း ၄ တာဝန်ရှိသူတဦးကပြောပါတယ်။

သူတို့ ၄ ဦးဟာ ထွက်ပြေးသွားပြီးနောက် တပ်ရင်းနဲ့ပတ်သက်ပြီး တိုက်ခိုက်ပြောဆိုမှုတွေရှိလာတဲ့အတွက် တပ်ပြေးတွေအဖြစ်ကြေညာရတာလို့ သူကဆက်ပြောပါတယ်။

ထွက်ပြေးသွားတဲ့သူ ၄ ဦးဟာ ၂ ပတ်ခန့်ကြာလာတဲ့အထိ စစ်ကော်မရှင်တပ်ဆီ ဘက်ပြောင်း ခိုလှုံသွားတာမျိုး သတင်းမရသေးပေမယ့် ၎င်းတို့နေထိုင်ခဲ့တဲ့ ကျေးရွာတွေက စခန်းငယ်အချို့ ဆုတ်ခွာရတာ၊ တပ်ရင်းတွေမှာ ကတုတ်ကျင်းတွေ ပြင်ဆင်ရတာ၊ တပ်စခန်းလုံခြုံရေးတိုးမြှင့်ရတာနဲ့ လေကြောင်းရန် အန္တရာယ်အတွက် ကြိုတင်ကာကွယ်မှုတွေပြုလုပ်ထားရတယ်လို့ သိရပါတယ်။

၄ ဦးစလုံးဟာ ၂၀၂၅ ဇန်နဝါရီလလောက်အတွင်းမှ LPDF အဖွဲ့တခုကနေ မြင်းခြံခရိုင်တပ်ရင်း ၁၀ ကိုပြောင်းရွှေ့လာကြတာလို့သိရပြီး ဘယ် LPDF အဖွဲ့ကနေ ပြောင်းလာတယ်ဆိုတာကိုတော့ တပ်ရင်းတာဝန်ရှိသူတွေဘက်က ထုတ်ဖော်ပြောကြားတာမျိုးမရှိပါဘူး။

ဩဂုတ် ၂၄ ရက်ကလည်း ကျောက်ဆည်ခရိုင်အမှတ် ၂ တပ်ရင်းက ဆေးတပ်သား ၁ ဦးနဲ့ထောက်ပို့ ၁ ဦး စစ်ကော်မရှင်တပ်ဆီ ဘက်ပြောင်းသွားတယ်လို့သိရပါတယ်။

စာတည်း – လင်း