ထွက်ပြေး

ကန့်ဘလူ၊ ဩဂုတ် ၅၊ ၂၀၂၅။

စစ်ကိုင်းတိုင်း၊ ကန့်ဘလူမြို့နယ်ပကဖရဲ့ တိုက်ခိုက်ရေးတပ်ဖွဲ့ဝင် ၁ ဦး အချုပ်ကျနေချိန် ထွက်ပြေးလွတ်မြောက်သွားတယ်လို့ မြေပြင်တပ်ဖွဲ့ဝင်တွေထံက သိရပါတယ်။

ထွက်ပြေးသွားသူဟာ အသက် ၂၅ နှစ်ကျော်ရှိ ရဲဘော် Error ဆိုသူဖြစ်ပြီး အမျိုးသမီးကိစ္စကြောင့် အချုပ်ချထားချိန် ဩဂုတ် ၂ ရက်မှာ ဆေးခန်းပြသမယ် ဆိုကာ ထွက်ပြေးသွားတာလို့ ဆိုပါတယ်။

” လူမှုရေးပြဿနာနဲ့မို့ အချုပ်ခဏချထားတာ။ ကျန်းမာရေးလိုလိုဘာလိုလိုနဲ့ ဆေးဘဲမှားသောက်သလို ဝမ်းနုတ်ဆေးဘဲမှားသောက်သလိုနဲ့ ကျန်းမာရေးဖောက်တဲ့အခါ ဆေးပြဆိုပြီး ရဲဘော်တယောက်နဲ့ထည့်လိုက်တာ အဲ့ကနေလစ်သွားတာ။ အဲ့ကောင်မလေးကိုခေါ်ပြီးတော့” လို့ ထွက်ပြေးသွားတဲ့တပ်ဖွဲ့ဝင် Error နဲ့ နီးစပ်သူတဦးက မြေလတ်အသံကို ပြောပါတယ်။

ထွက်ပြေးသွားသူ Error ဟာ အိမ်ထောင်ရှိသူဖြစ်ပြီး နောက်ထပ်အမျိုးသမီးငယ်တဦးနဲ့ လူမှုရေးကိစ္စတွေဖြစ်ပေါ်နေတာကြောင့် ပကဖစခန်းအချုပ်မှာ ဖမ်းဆီးထိန်းသိမ်းထားပြီး အရေးယူဆောင်ရွက်မှုတွေလုပ်ဆောင်နေစဥ် အခုလိုထွက်ပြေးလွတ်မြောက်သွားတာဖြစ်ပြီး လက်နက်နဲ့စာရွက်စာတမ်းတွေတော့ ဆုံးရှုံးမှု မရှိဘူးလို့ သိရပါတယ်။

၎င်းဟာ ကန့်ဘလူအခြေစိုက် အမှတ် ၆၀၀၆ တင့်ကားတပ်ကို ဘက်ပြောင်းခိုလှုံသွားကြောင်း သတင်းတွေထွက်ပေါ်နေပြီး ပြန်လည်ဖမ်းမိနိုင်ရေး မြို့နယ်ပကဖအဖွဲ့ဝင်တွေနဲ့ နယ်မြေအတွင်းက ဒေသကာကွယ်ရေးအဖွဲ့ဝင်တွေက လိုက်လံရှာဖွေနေတယ်လို့ သိရပါတယ်။

ပြီးခဲ့တဲ့ ဇွန် ၂၄ ရက်ကလည် သီရိမွန်ကျေးရွာအနီးရှိ ကန့်ဘလူခရိုင်ပကဖလှုပ်ရှားစခန်းပကဖအဖွဲ့ဝင် ၁ ဦးအပါ ၂ ဦး စစ်ကောင်စီဘက်ကို ဘက်ပြောင်းခိုလှုံသွားပြီးနောက် ၁၀ ရက်အကြာ ဇူလိုင် ၄ ရက်မှာ အဆိုပါခရိုင်ပကဖစခန်း လေကြောင်းကနေဗုံးကြဲခံခဲ့ရလို့ တပ်ဖွဲ့ဝင် ၄ ဦး ပြင်းထန်ဒဏ်ရာတွေရရှိခဲ့ပါတယ်။

ပကဖတပ်ဖွဲ့ဝင် Error ထွက်ပြေးသွားပြီးနောက် ပကဖစခန်းနဲ့ ကျန်ရှိတပ်ဖွဲ့ဝင်တွေရဲ့ လုံခြုံရေးအရ ကြိုတင်ရွှေ့ပြောင်းတာတွေပြုလုပ်ပြီးဖြစ်သလို စစ်ကောင်စီတပ်ရဲ့ မြေပြင်ထိုးစစ်ထက် စခန်းတည်နေရာတွေကို လေကြောင်းကနေ ဗုံးလာကြဲနိုင်တဲ့အခြေအနေကို ပိုမိုစိုးရိမ်ရတာမျိုးရှိနေတယ်လို့ ၎င်းက ဆိုပါတယ်။

စာတည်း – ဟိန်းစံ

၁ ဦးပြန်ဖမ်းခံထားရပြီး စစ်ကောင်စီတပ်ကစစ်ဆေးမှုတင်းကျပ်ရှာဖွေနေ

မြေလတ်အသံ၊ သြဂုတ် ၄၊ ၂၀၂၅။

ပဲခူးတိုင်း၊ မင်းလှမြို့နယ်က ပေါ်တာဆွဲဖမ်းဆီးခံထားရတဲ့ အမျိုးသား ၁၉ ဦးထွက်ပြေးခဲ့တာကြောင့် စစ်ကောင်စီဘက်က မင်းလှမြို့ပေါ်နဲ့အနီးဝန်းကျင်ကိုစစ်ဆေးမှုတွလုပ်နေတယ်လို့ ဒေသခံတွေဆီက သိရပါတယ်။

သြဂုတ် ၂ ရက်ည ၈ နာရီကျော်မှာ မင်းလှမြို့၊ ထွေအုပ်ရုံး ထိန်းသိမ်းခန်းမှာ ဖမ်းဆီးခံထားရတဲ့ အမျိုးသား ၁၉ ဦးစလုံးထွက်ပြေးခဲ့ကြတာဖြစ်ပြီး အဲ့ဒီက ၁၈ ဦးသာလွတ်မြောက်ခဲ့ကာ ၁ ဦးကတော့ မြို့ပေါ်မှာပြန်အဖမ်းခံလိုက်ရတယ်လို့ ဆိုပါတယ်။

“မနေ့(သြဂုတ် ၂)က မြို့ထဲမှာပတ်ရှာနေတာ။ အစစ်အဆေးလည်းကြမ်းတယ်။ ပုံတွေနဲ့တိုက်စစ်နေတာ။ ၂ ရက်နေ့ညက ပြန်မိတာ ၁ ယောက်က။ ဘယ်နေရာမိလည်းတော့အတိအကျမသိရဘူး။ မြို့ထဲမှာပဲ မိတယ်လို့ ပြောတယ်”လို့ မြေပြင်အခြေအနေကိုသိရှိတဲ့ တော်လှန်ရေးတပ်ဖွဲ့ဝင်တဦးကပြောပါတယ်။

ထွေအုပ်ရုံးရှိ စစ်ကောင်စီတပ်ဖွဲ့ဝင်တွေ မင်းလှမြို့၊ အနောက်ခြမ်းရှိကျေးရွာတွေကို ပေါ်တာသွားဆွဲနေတုန်း အလစ်အငိုက်မှာထွက်ပြေးခဲ့ကြတာဖြစ်ပြီး သူတို့နဲ့ပတ်သက်တဲ့ အသေးစိတ်အချက်အလက်တွေကိုတော့ မြေလတ်အသံကအတည်မပြုနိုင်သေးပါဘူး။

သြဂုတ် ၃ ရက်နဲ့ ၄ ရက်ဒီကနေ့မနက်အချိန်ထိ မင်းလှမြို့ပေါ်မှာ စစ်ကောင်စီတပ်က လွတ်မြောက်သွားသူ ၁၈ ဦးရဲ့ဓာတ်ပုံတွေကိုကိုင်ဆောင်ပြီး စစ်ဆေးမှုတွေလုပ်နေသလို မြို့အနီးရှိကျေးရွာတွေကိုပါ စစ်ကြောင်းထိုးပြီး လိုက်လံရှာဖွေနေတယ်လို့ သိရပါတယ်။

ပြီးခဲ့တဲ့ဇူလိုင် ၈ ရက်နဲ့ ၁၂ ရက်ကလည်း မင်းလှမြို့နယ်၊ ညောင်ပင်သာနဲ့ ငလှစမ်းကျေးရွာတို့ကို စစ်ကြောင်းထိုးဝင်ရောက်ပြီး ရွာခံတွေဖြစ်ကြတဲ့ ကိုမိုးဒီ၊ ကိုညီညီမိုးခန့်၊ ကိုဖိုးကုလား၊ ကိုဝင်းထွဋ်နောင်၊ ကိုမင်းဇော်၊ ကိုစန်းမင်းအောင်တို့ကို ဖမ်းဆီးခဲ့တယ်လို့ ဒေသခံတွေဆီက သိရပါတယ်။

စာတည်း – လင်း

မြေလတ်အသံ၊ ဇူလိုင် ၂၆၊ ၂၀၂၅။

စစ်ကောင်စီတပ်ကနေ ထွက်ပြေးလိုတဲ့တပ်သားအများအပြားရှိနေတယ်လို့ ကလေးအခြေစိုက် ခလရ ၂၂၈ တပ်ရင်းကနေ တမူးခရိုင်PDF ထံ ဘက်ပြောင်းခိုလှုံလာသူ စစ်မှုထမ်းအပတ်စဥ် ၁ ဆင်း တပ်သားက ပြောဆိုပါတယ်။

ဘက်ပြောင်းခိုလှုံလာသူမှာ စစ်မှုထမ်းသင်တန်းအပတ်စဥ် ၁ ဆင်း အသက် ၃၁ နှစ်အရွယ် ကိုနေဝင်းထွန်း(ခ)ကိုပိုင် ဖြစ်ပြီး သူတာဝန်ကျတဲ့ ကလေးမြို့အခြေစိုက် ဒကစ (ကလေး)လက်အောက်ခံ ခလရ ၂၂၈ အထိုင်ချထားတဲ့ တမူးမြို့နယ်၊ မင်းသာကျေးရွာစခန်းကနေ ဇူလိုင် ၁၁ ရက်က တမူးခရိုင် အမှတ်၂ တပ်ရင်းထံ ခိုလှုံလာတာပါ။

စစ်တပ်အတွင်း စစ်မှုထမ်းသက် ၁၀ နှစ်အထက်ရှိသူ အောက်ခြေစစ်သားတွေကစလို့ စစ်မှုထမ်းဥပဒေနဲ့အတင်းအကြပ်စုဆောင်းခံရတဲ့ တပ်သားတွေအထိ စစ်ကောင်စီတပ်သားအများအပြားဟာ တပ်ကိုစွန့်ခွာထွက်ပြေးချင်နေကြတယ်လို့ ကိုနေဝင်းထွန်းက ပြောပါတယ်။

” တပ်ထဲမှာ နှစ်ရှည်လများ ၁၅ နှစ်၊ အနှစ် ၂၀ ထမ်းဆောင်တဲ့သူတွေတောင်မှ အခုလိုမျိုး ပြေးချင်ခတ်ချင်နေရင် ကျနော်တို့မနေ့တနေ့ကမှ ထမ်းဆောင်ရသူတွေဆို ပိုဆိုးတာပေါ့။ ပြီးတော့ ကျနော်တဦးတည်း အလင်းဝင်ချင်တာမဟုတ်ဘူး။ ၁၀ နှစ်၊ ၁၅ နှစ် ကောင်တွေတောင်မှ လွတ်မြောက်နယ်မြေကိုရောက်ရင် ထိပ်ဆုံးကပြေးမယ့်ကောင်တွေ။ ကျနော်တို့ ပစ(စစ်မှုထမ်းသင်တန်းဆင်း)တွေဆို မပြောတော့နဲ့ပေါ့နော်။ ၂ နှစ်ပြည့်လို့မှ သူတို့ဖက်က ကတိမတည်ဘူးဆိုလို့ရှိရင်၊ သူတို့ကတိမတည်ဆိုတာကိုလည်း ကျနော်ယုံတယ်” လို့ သူက ပြောပါတယ်။

တပ်သား နေဝင်းထွန်းဟာ စစ်ကောင်စီတပ်က စစ်မှုထမ်းဥပဒေပြဌာန်းပြီးနောက် အစောဆုံး စစ်မှုထမ်းသင်တန်းအပတ်စဥ် ၁ မှာ မဲနှိုက်ရွေးချယ်ခံခဲ့ရပြီး၂၀၂၄ ဧပြီ ၈ ရက်မှာ စစ်သင်တန်းကျောင်းပို့ဆောင်ခံရကာ သင်တန်းဆင်းပြီးနောက် ခလရ ၂၂၈ ကိုဆက်လက်ပို့ဆောင်ခံခဲ့ရတာလို့ သိရပါတယ်။

” တပ်ထဲမှာ ​မြက်ပေါက်ရတာတွေ၊ ထင်းခုတ်ရတာတွေ၊ စပါးနှုတ်ရတာတွေရှိတယ်။ မြို့ထဲကိုသွားလာလို့မရဘူး။ စျေးလည်းမသွားရဘူး။ လိုချင်တာကို သူတို့နဲ့မှာရတယ်။ မှာရတဲ့အခါမှာလည်း ၅၀၀၀(ကျပ်) တန်တဲ့ပစ္စည်းတခုကို ၁၀,၀၀၀ ပေးရတယ်။သူတို့(စကစ)စခေါ်တုန်းကတော့ လွတ်လပ်ခွင့် အကုန်ရှိမယ်။ ကိုယ့်ရပ်ကိုယ့်ဒေသကို ပြန်ရမယ်ပေါ့။ တကယ့်တကယ်တန်းကျတော့ သူတို့စခေါ်တဲ့၊ ပြောတဲ့ပုံစံနဲ့ လက်တွေ့ကျကျပေးဆပ်ရတာတွေက တခြားစီပေါ့။ အဲဒီမှာကတည်းက ကျနော်တို့စိတ်ကုန်ခဲ့တာ”လို့ တပ်သား နေဝင်းထွန်း က ပြောပါတယ်။

၂၀၂၅ ဇန်နဝါရီလမှာ တပ်သား နေဝင်းထွန်းအပါ စစ်မှုထမ်းအပတ်စဥ် ၁ ဆင်း တပ်သား ၄၅ ဦးကို ကလေးအခြေစိုက်တပ်ရင်းကနေ တမူးခရိုင်၊ မြို့သစ်မြို့နယ်၊ မင်းသာကျေးရွာအထိုင်စခန်းကို ပြောင်းရွှေ့ခဲ့ရပြီးနောက် ဇူလိုင်လဆန်းပိုင်းမှာ ထွက်ပြေးလာခဲ့တာလို့ သိရပါတယ်။

စာတည်း – ဟိန်းစံ

အင်အား ၅၀၀ ကျော်ပါစစ်ကြောင်းက ထွက်ပြေးသူတဝက် သေဆုံးတဝက်ဖြစ်နေဟုဆို

မြေလတ်အသံ၊ ဇူလိုင်၁၁၊ ၂၀၂၅။

ချင်းပြည်နယ်၊ ဖလမ်းမြို့ကိုပြန်လည်သိမ်းပိုက်နိုင်ရေး စေလွှတ်ခံရတဲ့ စစ်ကောင်စီစစ်ကြောင်းက ထွက်ပြေးလာတဲ့ စစ်ကောင်စီတပ်ဖွဲ့ဝင် ၂၀ ဦး ကို ထိန်းသိမ်းထားတယ်လို့ ကလေးမြို့ပြပြောက်ကျားစီမံချက်အဖွဲ့က ပြောပါ တယ်။

ဧပြီလနောက်ဆုံးအပတ်ကစလို့ ကလေးမြို့ အခြေစိုက် ဒေသကွပ်ကဲမှုစစ်ဌာနချုပ် (ဒကစ) ကနေ စစ်အင်အား ၅၀၀ ကျော်ဟာ ချင်းပြည်နယ်က တော်လှန်ရေးတပ်ဖွဲ့တွေ ထိန်းချုပ်ထားတဲ့ ဖလမ်းမြို့ကို တိုက်ခိုက်ဖို့ စေလွှတ်ခံခဲ့ရတာဖြစ်ပြီး ၎င်းစစ်ကြောင်းကနေ ဇွန်နဲ့ မေလအတွင်း စစ်ကောင်စီတပ်ဖွဲ့ဝင် ၂၀ ဦးထွက်ပြေးလာခဲ့လို့ ဆိုပါတယ်။

” ထွက်ပြေးပြီး ကျနော်တို့ဘက်ကို ၂ လအတွင်း ရောက်ရှိလာတဲ့ အရေအတွက်ကတော့ စကစအယောက် ၂၀ နဲ့ လက်နက်က ၁၁ လက်ပါခဲ့တယ်။ တခြားတပ်တွေဘက်ရောက်သွားတဲ့ တပ်ပြေးတွေလည်း အများကြီးဗျ”လို့ ကလေးမြို့ပြပြောက်ကျားစီမံချက်အဖွဲ့တာဝန်ရှိသူက မြေလတ်အသံကို ပြောပါတယ်။

ထွက်ပြေးလာတဲ့ စစ်ကောင်စီတပ်ဖွဲ့ဝင်တွေကို CDM စာရင်းတင်သွင်းပေးထားပြီး ကောင်းမွန်စွာနဲ့ လွတ်လွတ်လပ်လပ်ထားသလို မိသားစုဝင်တွေကို ခေါ်ချင်တဲ့သူတွေအတွက်ကိုလည်း ကူညီခေါ် ဆောင်ပေးထားတယ်လို့ ၎င်းက ဆိုပါတယ်။

အထက်ပါစစ်ကောင်စစ်ကြောင်းဟာ ဇူလိုင် ၁၁ ရက် ဒီကနေ့အထိ ကလေး-သိုင်းငင်းလမ်း တလျောက် မှာ တော်လှန်ရေးတပ်ဖွဲ့တွေနဲ့ တိုက်ပွဲဖြစ်ပွားနေတာကြောင့် ၂ လကျော်ကြာအထိ ဖလမ်းမြို့နယ်အတွင်း ဝင်ရောက်နိုင်တာမရှိသေးဘူးလို့ သိရပါတယ်။

” သူတို့(စကစ)စစ်ကြောင်းက ချင်းပြည်နယ်နဲ့ ကလေးမြို့နယ်စပ် သိုင်းငင်းတောင် မရောက်သေးဘူး သေတဲ့စကစတဝက်၊ ထွက်ပြေးတဲ့စကစကတဝက်ဖြစ်နေပြီ။ ထွက်ပြေးတဲ့စကစတွေက စစ်မှုထမ်း (သင်တန်းဆင်း)တွေဗျ။ သိုင်းငင်းအနီးမှာက တိုက်ပွဲကဆက်ဖြစ်တုန်းပါ” လို့ အထက်ပါတာဝန်ရှိသူက ပြောပါတယ်။

ကလေးမြို့ကနေ သိုင်းငင်းကျေးရွာလမ်းဆုံအထိ ၂၅ မိုင်ကွာဝေးပြီး သိုင်းငင်းကနေ ဖလမ်းမြို့ကို နောက်ထပ် မိုင် ၅၀ ခန့်ကွာဝေးတာကြောင့် ချင်းတော်လှန်ရေးအင်အားစုတွေက တီးတိန်မြို့က လွဲရင် ကျန်နေရာ အများစုကိုထိန်းချုပ်ထားနိုင်ပြီး စစ်ကောင်စီစစ်ကြောင်းအနေနဲ့ ဖလမ်းမြို့ကို ရောက်ရှိဖို့ လွယ်ကူမှာမဟုတ်ဘူးလို့ တော်လှန်ရေးအင်အားစုတွေက ဆိုကြပါတယ်။

ဖလမ်းမြို့နယ်တခုလုံးကို ချင်းညီနောင် (Chin BrotherHood)က ယခုနှစ် ဧပြီ ၉ ရက်မှာ အလုံးစုံ သိမ်းပိုက်ရရှိခဲ့ပြီး ချင်းညီနောင်စစ်ဆင်ရေး (Operation CB) ဖလမ်းမြို့ သိမ်းတိုက်ပွဲမှာ အညာဒေသမှ စစ်ကိုင်းဖက်ဒရယ်တပ်ပေါင်းစု(SFT)အပါအဝင် PDF ၁၇ ဖွဲ့ပါဝင်တိုက်ခိုက်ခဲ့ပါတယ်။

စာတည်း – ဟိန်းစံ

မြေလတ်အသံ၊ ဇွန် ၁၉၊ ၂၀၂၅။

မကွေးတိုင်း၊ ထီးလင်းမြို့မရဲစခန်းအချုပ်မှာ ဖမ်းဆီးခံထားရတဲ့ နိုင်ငံရေးအကျဥ်းသား ၁၃ ဦး ထွက်ပြေးနိုင်လွတ်မြောက်ခဲ့ပြီး ထွက်ပြေးစဥ်မိုင်းနင်းမိတာကြောင့် ၁ ဦး သေဆုံးခဲ့တယ်လို့ ဒေသတွင်းPDF တပ်ရင်း ၇ ခုနဲ့ ဖွဲ့စည်းထားတဲ့ ထီးလင်းပြည်သူ့ကာကွယ်ရေးတပ်ရင်းများထံက သိရပါတယ်။

လွတ်မြောက်လာသူ နိုင်ငံရေးအကျဥ်းသား ၁၃ ဦးမှာ အမျိုးသား ၁၂ ဦးနဲ့ အမျိုးသမီး ၁ ဦးတို့ဖြစ်ပြီး ဇွန် ၁၇ ရက်ညပိုင်းမှာ အချုပ်ရဲ့သံတိုင်တွေကို ထွက် ပေါက်ဖြစ်အောင်လုပ်ပြီး ထွက်ပြေးလာခဲ့ကြတာလို့ ဆိုပါတယ်။

” သူတို့ ၁၃ ဦးက အချုပ်ကနေ ပြင်ဆင်နေတာကြာပြီပေါ့လေ။ ထွက်ပေါက်ရအောင် သူတို့ သံတိုင်စိုက်ထားတဲ့ဟာတွေကို ဂဟေတွေကို လက်အားနဲ့ပဲလုပ်ပြီးနေကြတယ်။ ကြိုးစားနေကြတယ်။ အဲ့လိုအပေါက်ဖြစ်အောင် ပွင့်နိုင်အောင် ကြိုးစားနေကြတာ ၃၊ ၄ လကြာခဲ့တယ်။”လို့ ကူညီစောင့်ရှောက်ပေးထားတဲ့ ထီးလင်းမြို့ နယ်ပြည်သူ့ကာကွယ်ရေးတပ်ရင်းများမှ တာဝန်ရှိသူတဦးက မြေလတ်အသံကို ပြောပါတယ်။

၎င်းတို့ ၁၃ ဦးမှာ ထီးလင်းမြို့ပေါ်နဲ့ အနီးတဝိုက်ရွာတွေကနေ နိုင်ငံတော်အကြည်ညိုပျက်စေမှုပုဒ်မ ၅၀၅ (က)၊ ၅၀၅ (ခ)၊ ဆက်သွယ်ရေးဥပဒေပုဒ်မ၊ အကြမ်း ဖက်မှုတိုက်ဖျက်ရေးပုဒ်မ၊ နိုင်ငံတော်ပုန်ကန်မှုပုဒ်မ စတာတွေနဲ့ တရားစွဲခံထားရသူတွေဖြစ်ပြီး ၎င်းတို့အနက် အစောဆုံးဖမ်းဆီးခံရသူမှာ ၂၀၂၁ က ဖြစ်ကာ အထက်ပါပုဒ်မတွေနဲ့ အမှုဖွင့်ထားပေမယ့် ရုံးထုတ်စစ်ဆေးတာမရှိဘဲ ရဲစခန်းထဲမှာပဲ ချုပ်နှောင်ခံထားရသူတွေဖြစ်တယ်လို့ ဆိုပါတယ်။

ထွက်ပြေးလွတ်မြောက်လာသူတွေရဲ့ အသေးစိတ်အချက်အလက်တွေကိုတော့ ၎င်းတို့ရဲ့လုံခြုံရေးအရ ပြောဆိုလို့မရကြောင်း အထက်ပါတာဝန်ရှိသူက ပြောပါတယ်။

ရဲစခန်းအချုပ်ကနေ ထွက်ပြေးလာစဥ် လမ်းပိုင်းတနေရာမှာ အသက် ၅၇ နှစ်အရွယ် အကျဥ်းသူအမျိုးသမီးဟာ စစ်ကောင်စီတပ်ထောင်ထားတဲ့ မြေမြှုပ်မိုင်းနင်းမိတာကြောင့် ဒဏ်ရာအပြင်းအထန်ရရှိခဲ့ကာ မိုင်းနင်းမိပြီး ၁ နာရီအကြာမှာ သေဆုံးသွားခဲ့တယ်လို့ သိရပါတယ်။

” မိုင်းနင်းမိတာက သူတို့သားမိ ၃ ဦးပါတဲ့ အုပ်စု၊ လူ ၅ယောက်ပါတဲ့အုပ်စု။ အဲ့ချိန်မှာ နောက်ဆုံးမှကျန်ခဲ့တဲ့အမေဖြစ်သူက မိုင်းကိုနင်းမိတယ်။ ဒဏ်ရာတွေက တကိုယ်လုံးမှာ ပြင်းပြင်းထန်ထန်ရပြီး သေဆုံးသွားတယ်”လို့ ၎င်းက ပြောပါတယ်။

သေဆုံးသူရဲ့ ရုပ်အလောင်းကို ဇွန် ၁၈ ရက်မနက်ပိုင်းအချိန်မှာ ထီးလင်းမြို့နယ်ပြည်သူ့ကာကွယ်ရေးတပ်ရင်းများမှ တပ်ဖွဲ့ဝင်တွေက ကောက်ယူသင်္ဂြိုဟ်ပေးလိုက်တယ်လို့ သိရပါတယ်။

စာတည်း – ဟိန်းစံ