ကမ္မ၊ မေ ၁၈၊ ၂၀၂၅။

မကွေးတိုင်း၊ ကမ္မမြို့ပေါ်ရှိ ဂျိုးပျံရပ်ကွက်ကို မေ ၁၈ ရက် ဒီမနက် ၆ နာရီလောက်မှာ စစ်ကောင်စီတပ်ကဗုံကြဲခဲ့တာကြောင့် ကလေး ၁ ဦးအပါအဝင် ၂ ဦးဒဏ်ရာရခဲ့ပြီ အဆောက်အဦပျက်စီးမှုတွေရှိခဲ့တယ်လို့ အညာမြေအရပ်ဖက်အဖွဲ့အစည်း – မြိုင် ဆီကသိရပါတယ်။

တိုက်ပွဲဖြစ်တာမရှိဘဲ ဗုံး ၂ လုံးကြဲချခဲ့တာကြောင့် ဂျိုးပျံရပ်ကွက်ကဆေးခန်း ၁ ခုပေါ်ကျရောက် ပေါက်ကွဲပြီး အသက် ၁၂ နှစ်အရွယ်နဲ့ ၃၀ အရွယ်အမျိုးသား ၂ ဦးထိခိုက်ဒဏ်ရာရခဲ့တာပါ။

“ကြဲချတာကတော့ ဘာအကြောင်းမှမရှိဘူး။ တိုက်ပွဲဘာညာမရှိဘူး။ အစောကြီးရှိသေးတာ မိုးလင်းစပဲရှိသေးတာ။ ၂ လုံးချတာကို ပထမအလုံးပဲကွဲတာ။ ၁ လုံးက သစ်ပင်နဲ့ငြိပြီးမကွဲတာ။ ပေါင် ၅၀၀ တွေဖြစ်မယ်ဗျ။ ဗုံးသီးအစတွေက ပေ ၁ ထောင်လောက်အထိ အဝေးကြီးတွေထိလွင့်တယ်”လို့ အညာမြေအရပ်ဖက်အဖွဲအစည်းက တာဝန်ရှိသူတဦးကဆိုပါတယ်။

ဒါ့အပြင် ဗုံးစထိမှန်လို့ ဆေးခန်းလည်းပျက်စီးခဲ့ပြီး မပေါက်ကွဲသေးတဲ့ဗုံးကိုတော့ ဘယ်လိုဆက်ပြီးလုပ်ဆောင်မယ်ဆိုတာမသိရဘူးလို့ သူကပြောပါတယ်။

ယခုဗုံးကျရောက်ပေါက်ကွဲခဲ့တဲ့နေရာအနီးမှာယခင်က တော်လှန်ရေးတပ်ဖွဲ့တွေရဲ့ ဂိတ်စခန်း ၁ ခုရှိခဲ့ပေမယ့် အဲ့ဒီဂိတ်ကပြောင်းရွှေ့သွားတာကြာပြီလို့ ဆိုပါတယ်။

ပြီးခဲ့တဲ့မေ ၅ ရက်ကလည်း စစ်ကောင်စီတပ်က ကမ္မမြို့နဲ့ ၁ မိုင်ဝန်းကျင်ခန့်အကွာက စောင်ဇမ်းကုန်းရွာကိုလေကြောင်းနဲ့ ဗုံးကြဲတိုက်ခိုက်ခဲ့ရာ ကာကွယ်ရေးတပ်ဖွဲ့ဝင် ၉ ဦးကျဆုံးခဲ့တယ်လို့သိရပါတယ်။

စာတည်း – လင်း

ပေါက်၊ ဧပြီ ၁၄၊ ၂၀၂၅။

မကွေးတိုင်း၊ ပေါက်မြို့နယ်၊ သနပ္ပင်ဇင်းကျေးရွာကို စစ်ကောင်စီတပ်က စက်တပ်လေထီးနဲ့ ဗုံးသီးချတိုက်ခိုက်ခဲ့တာကြောင့် ဒေသခံ ၂ ဦးထိခိုက်ဒဏ်ရာရခဲ့တယ်လို့ ဒေသခံတွေဆီက သိရပါတယ်။

ဧပြီ ၁၄ ရက် မနေ့ကမနက်ပိုင်းမှာ ဆိပ်ဖြူ ကပစ ၂၄ ဘက်ကတက်လာတဲ့ စက်တပ်လေထီး ၂ စီးပေါ်ကနေ စက်လတ်သေနတ်နဲ့ပစ်ခတ်ပြီးနောက် ဗုံးသီး ၂ လုံးကြဲချခဲ့တာလို့ ဆိုပါတယ်။

“ကုက္ကိုစုပျူရွာနဲ့ နီးလို့ လာချတာထင်တယ်ဗျ။ သူတို့ ပျူရွာက အနီးပတ်ဝန်းကျင်ရွာတွေကို တိုက်ခိုက်ပေးဖို့ အထက်ကိုပေါက်ကိုယ်တော်က တောင်းဆိုထားတာလို့ကြားတာပဲ”လို့ အညာမြေအရပ်ဖက်အဖွဲ့အစည်း – မြိုင်မှ တာဝန်ရှိသူတဦးက ပြောပါတယ်။

ဒီတိုက်ခိုက်မှုကြောင့် သနပ္ပင်ဇင်းရွာက အသက် ၄၀ အရွယ်အမျိုးသား ၁ ဦး ပေါင်ထိမှန်ပြီး အသက် ၃၀ အရွယ်အမျိုးသမီး နဖူးထိမှန်ဒဏ်ရာရရှိခဲ့တာပါ။

ဒါ့အပြင် သနပ္ပင်ဇင်းရွာနဲ့ အနီးတဝိုက်ကိုလည်း ကပစ ၂၄ ကနေ လက်နက်ကြီးတွေနဲ့ မကြာခဏပစ်ခတ်လေ့ရှိတယ်လို့လည်း ဆိုပါတယ်။

ဧပြီလဒုတိယပတ်အတွင်းမှာ မကွေးနဲ့စစ်ကိုင်းတိုင်းအတွင်း လေကြောင်းတိုက်ခိုက်မှုတွေ ခပ်စိပ်စိပ်လုပ်လာတဲ့အတွက် ဒေသခံထိခိုက်သေဆုံးမှုတွေရှိနေတာပါ။

ဧပြီ ၁၂ ရက်ဒီနေ့မနက် ၁၀ နာရီလောက်မှာ မိတ္ထီလာလေတပ်ဘက်ကလာတဲ့ ဂျက်ဖိုက်တာနဲ့ ရေစကြိုမြို့နယ်၊ ရေလယ်ကျွန်းဒေသရှိ သာဂေါင်ကျေးရွာကို ဗုံး ၂ လုံးကြဲချတိုက်ခိုက်ခဲ့တာကြောင့် ထိခိုက်ပျက်စီးမှုတွေရှိခဲ့တယ်လို့ ရေစကြိုမြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။

ပုံစာ – ပြီးခဲ့တဲ့ ဖေဖော်ဝါရီလအတွင်း သနပ္ပင်ဇင်းရွာ စစ်ကောင်စီတပ်ဖွဲ့မှမီးရှို့ခဲ့စဥ်။

သတင်း – ဟယ်သာ၊ စာတည်း – လင်း

■ ယာဥ်တိုက်မှုကြောင့် စစ်ဆေးရေးဂိတ်အနီး နှစ်ဖက်သွားလာမယ့်ကားတွေ ပိတ်ဆို့နေ

ဝေါ၊ မတ် ၃၁၊ ၂၀၂၅။

ပဲခူးတိုင်း၊ ဝေါမြို့နယ်၊ ရန်ကုန်-မော်လမြိုင်ကားလမ်းရှိ ညောင်ခါးရှည်စစ်ဆေးရေးဂိတ်မှာတန်းစီကားတွေကို စစ်တပ်ကားကဝင်တိုက်ပြီး တိမ်းမှောက်လို့ ၈ ဦးဒဏ်ရာရတယ်လို့ ညောင်ခါးရှည်စစ်ဆေးရေးဂိတ်နဲ့နီးစပ်သူတွေထံက သိရပါတယ်။

မတ် ၃၁ ရက် ဒီကနေ့မနက် ၁၀ နာရီခန့်မှာ ရန်ကုန်-မော်လမြိုင်ကားလမ်းအတိုင်း ဝေါဘက်ကနေ မွန်ပြည်နယ်ဘက်ကို မောင်းနှင်လာတဲ့ စစ်တပ်ကားက ညောင်ခါးရှည်ဂိတ်မှာ တန်းစီနေတဲ့ ခရီးသည်တင် ပရိုဘောက်ကား ၁ စီး၊ ကုန်တင် ၁၂ ဘီးကား ၂ စီးတို့ကို ဝင်တိုက်ပြီးတိမ်းမှောက်သွားတာလို့ ဆိုပါတယ်။

” ကားက နေပြည်တော် တပ်မတော်နေ့အခမ်းအနားပြီးလို့ပြန်လာတဲ့ စစ်မေတွေလိုက်ပါလာတဲ့ကား။ ရပ်ထားတဲ့ကားတွေကို အရှိန်နဲ့ဝင်တိုက်ပြီး တိမ်းမှောက်သွားတာ “လို့ ညောင်ခါးရှည်စစ်ဆေးရေးဂိတ်နဲ့နီးစပ်သူတဦးက မြေလတ်အသံကို ပြောပါတယ်။

ယာဥ်တိမ်းမှောက်တာကြောင့် စစ်တပ်ကားပေါ်ပါ စစ်ကောင်စီတပ်ဖွဲ့ဝင်အမျိုးသမီး ၅ ဦးနဲ့ ယာဥ်မောင်းတပ်သား ၁ ဦး၊ ပရိုဘောက်ယာဥ်ပေါ်က မော်လမြိုင်မြို့နေ အသက် ၃၀ ကျော်အမျိုးသား ၁ ဦးနဲ့အမျိုးသမီး ၁ ဦး စုစုပေါင်း ၈ ဦး ပြင်းထန်ဒဏ်ရာရရှိသွားပြီး စစ်တပ်ကားယာဥ်မောင်းကတော့ သတင်းဖော်ပြနေတဲ့အချိန်ထိ ကားခေါင်းထဲညပ်နေပြီး ထုတ်မရသေးဘူးလို့ ဆိုပါတယ်။

ထိခိုက်ဒဏ်ရာရသူတွေကိုတော့ ကျိုက်ထိုဆေးရုံကို သယ်ဆောင်သွားပြီး ယာဥ်မောင်းကိုတော့ ဆွဲထုတ်ဖို့ ကြိုးစားနေကြတယ်လို့သိရကာ စစ်ကောင်စီတပ်ကားနဲ့ အတိုက်ခံခဲ့ရတဲ့ အရပ်ကား ၃ စီးလည်း ပျက်စီးသွားတယ်လို့ သိရပါတယ်။

ယာဥ်တိုက်မှုဖြစ်ပွားခဲ့ပြီး စစ်ကားတိမ်းမှောက်သွားတာကြောင့် လမ်းပိတ်နေလို့ နှစ်ဖက်သွားလာမယ့် ခရီးသွားကားတွေလည်း ပိတ်မိနေကာ စောင့်ဆိုင်းနေကြရတယ်လို့ သိရပါတယ်။

စာတည်း – ဟိန်းစံ

ရွှေဘို၊ မတ် ၂၆၊ ၂၀၂၅။

စစ်ကိုင်းတိုင်း၊ ရွှေဘိုမြို့၊ အမှတ် ၁ ရပ်ကွက်ရှိ၊ အောင်ဇေယျစျေးအတွင်း လက်နက်ကြီးဗုံးသီးကျရောက်ပေါက်ကွဲလို့ ကလေးငယ်အပါအဝင် ၅ ဦးဒဏ်ရာရတယ်လို့ ဒေသခံတွေထံက သိရပါတယ်။

မတ် ၂၅ ရက်နေ့ မနက် ၁၁ နာရီ ၄၅ မိနစ်ခန့်မှာ ရွှေဘိုမြို့အခြေစိုက် အမှတ် ၈ စစ်အခြေခံလေ့ကျင့်ရေးတပ်ကနေ ပစ်ခတ်လိုက်တဲ့ လက်နက်ကြီးဗုံးသီး ၁ လုံး ဟာ အဆိုပါတပ်နဲ့ ၁ ဖာလုံခန့်အကွာရှိ အောင်ဇေယျစျေးထဲရှိ ဆန်ဆိုင် ၁ ဆိုင်ပေါ်ကို ကျရောက်ပေါက်ကွဲခဲ့တာလို့ ဆိုပါတယ်။

” ဝက်သားတန်းကိုသွားတဲ့လမ်းက ဆန်ဆိုင်ပေါ်ကျတာ။ ဆန်တွေလည်းပြန့်ကျဲနေပြီးတော့ ဆန်တွေလည်းမဲလို့။ တဲတွေလည်းပြို။ အဲ့နားလေးကိုအကုန်လွင့်စင်သွားတာ “လို့ ရွှေဘိုမြို့ခံတဦးက မြေလတ်အသံကို ပြောပါတယ်။

အဲ့ဒီနေ့မနက်ပိုင်းမှာ ရွှေဘိုမြို့ပြင်၊ ကျွန်းတောကွေ့အနီး စစ်ကောင်စီတပ်နဲ့တော်လှန်ရေးတပ်ဖွဲ့တွေအကြား တိုက်ပွဲဖြစ်ပွားနေတာကို လေ့ကျင့်ရေး ၈ တပ်က လက်နက်ကြီးနဲ့ပစ်ကူပေးပစ်ခတ်နေတာဖြစ်ပြီး အဆိုပါလက်နက်ကြီး ပစ်ခတ်မှုတွေအနက် ဗုံးသီး ၁ လုံးက စျေးထဲကိုကျရောက်ပေါက်ကွဲခဲ့တာလို့ ဆိုပါတယ်။

လက်နက်ကြီးဗုံးသီးကျရောက်ပေါက်ကွဲတာကြောင့် စျေးအတွင်းရှိဆန်ဆိုင်ပိုင်ရှင် အသက် ၃၈ နှစ်အရွယ် ဒေါ်ခိုင်မို့မို့လင်း၊ အသက် ၁၀ နှစ်ခန့်ကလေး ၁ ဦးနဲ့ အသက် ၃၀ ကျော်နဲ့ ၆၀ ကျော်အရွယ် အမျိုးသမီး ၃ ဦးတို့ ထိခိုက်ဒဏ်ရာရသွားခဲ့ပြီး ရွှေဘိုဆေးရုံကို ဒေသခံတွေက ကူညီပို့ဆောင်ပေးခဲ့ကာအဲဒီအထဲက ဗိုက်ပေါက်ထွက်ဒဏ်ရာရထားတဲ့ အမျိုးသမီး ၂ ဦးကိုတော့ မန္တလေးပြည်သူ့ဆေးရုံကို လွှဲပြောင်းကုသထားရတယ်လို့ သိရပါတယ်။

လက်နက်ကြီးဗုံးသီးကျရောက်ပေါက်ကွဲချိန်မှာ စျေးဆိုင်အများစုက စျေးသိမ်းနေချိန်ဖြစ်ပြီး စျေးသွားစျေးလာကျဲပါးနေချိန်ဖြစ်လို့ ထိခိုက်မှုနည်းပါးခဲ့တာဖြစ်ကာ အခင်းဖြစ်ပွားပြီးနောက် စျေးအတွင်းကို စစ်ကောင်စီတပ်ဖွဲ့ဝင်တွေရောက်ရှိလာပြီး မှတ်တမ်းဓာတ်ပုံရိုက်တာနဲ့ အပျက်အစီးတွေရှင်းလင်းတာတွေ လုပ်ဆောင်သွားတယ်လို့ ဆိုပါတယ်။

ဖေဖော်ဝါရီ ၇ ရက်ကလည်း ရွှေဘိုမြို့နယ်၊ ဇီးဖြူကုန်းရွာမှာတပ်စွဲထားတဲ့ စစ်ကောင်စီတပ်ဖွဲ့ဝင်တွေ ပစ်ခတ်တဲ့လက်နက်ကြီးဗုံးသီး ဆိပ်သာကျေးရွာထဲ ကျရောက်ပေါက်ကွဲလို့ ရွာခံသားအမိ ၂ ဦးဒဏ်ရာရခဲ့တယ်လို့ သိရပါတယ်။

စာတည်း – ဟိန်းစံ

နွားထိုးကြီး၊ မတ် ၂၄၊ ၂၀၂၅။

မန္တလေးတိုင်း၊ နွားထိုးကြီးမြို့နယ်၊ လက်ဝဲမြင်းနီကျေးရွာကို စစ်ကောင်စီဘက်က လေကြောင်းကနေ ဗုံးကြဲလို့ ဒေသခံ ၂ ဦးဒဏ်ရာရပြီး နေအိမ် ၂၃ လုံးပျက်စီးသွားတယ်လို့ မြေပြင်ကူညီရေးလုပ်ဆောင်ပေးခဲ့သူတွေထံက သိရပါတယ်။

မတ် ၂၃ ရက် မနေ့မနက်အစော ၁ နာရီခန့်မှာ စစ်ကောင်စီတပ်ဘက်က တိုက်လေယာဥ် ၁ စီးနဲ့ဗုံး ၂ လုံး၊ Y 12 လေယာဥ်နဲ့ဗုံး ၅ လုံးထက်မနည်းကြဲချခဲ့တာလို့ဆိုပါတယ်။

“ကျေးရွာရဲ့ လူနေအိမ်တွေကိုပေါ်အဓိကထားပြီး ချတာဆိုတော့ ရွာအလယ်ကြောနဲ့ အနောက်ပိုင်းကြားကိုကျတာ။ ရွာထဲမှာက လူတွေသိပ်မရှိလို့ ထိခိုက်မှုနည်းသွားတာ။ ခုထိတဲ့ သူတွေကလည်း ရွာထဲညအိပ်ပြန်တဲ့သူတွေထိတာ”လို့ မြေပြင်ကူညီရေးလုပ်ဆောင်ပေးနေသူတဦးက မြေလတ်အသံကို ပြောပါတယ်။

ဗုံးကျရောက်ပေါက်ကွဲတာကြောင့် လက်ဝဲမြင်းနီရွာခံ ဦးမောင်ကြိုင် အသက် ၆၅ နှစ်မှာ (စိုးရိမ်ရ) ဒဏ်ရာနဲ့ မနှင်းမြတ်နွယ် အသက် ၁၃ နှစ်မှာ (မစိုးရိမ်ရ ) ဒဏ်ရာတွေရရှိခဲ့ပြီး နေအိမ် ၇ လုံးမှာ ဗုံးစထိမှန်ပျက်စီးခဲ့ကာ၊ ၁၆ လုံးမှာ မီးလောင်ပျက်စီးခဲ့တယ်လို့ ဆိုပါတယ်။

လက်ဝဲမြင်းနီကျေးရွာဟာ ၂၀၂၄ အတွင်းမှာ စစ်ကောင်စီစစ်ကြောင်းရဲ့ ၂ ကြိမ် ဝင်ရောက်မီးရှို့တာကိုခံထားရပြီး မြင်းခြံအခြေစိုက် ခမရ ၁၅ တပ်ကလည်း မကြာခဏ လက်နက်ကြီးနဲ့ပစ်ခတ်နေတာကြောင့် ဒေသခံတွေမှာ ကျေးရွာတွင်းအတည်တကျ နေထိုင်နိုင်ခြင်းမရှိဘူးလို့ သိရပါတယ်။

လက်ဝဲမြင်းနီကျေးရွာမှဦ အိမ်ခြေ ၁၀၀၀ ဝန်းကျင်ရှိတဲ့ရွာဖြစ်ပြီး မီးရှို့ခံရတာ၊ လက်နက်ကြီးနဲ့လေကြောင်းကနေ ဗုံးကြဲခံထားရတာတွေကြောင့် နေအိမ် ၂၅၀ ကျော်ပျက်စီးထားပြီး ဒေသခံ ၅,၀၀၀ ခန့်မှာလည်း မကြာခဏစစ်ဘေးရှောင်နေရတယ်လို့ သိရပါတယ်။

ပုံစာ – လက်ဝဲမြင်းနီကျေးရွာ လေကြောင်းဗုံးကြဲခံရပြီး နေအိမ်တွေမီးလောင်နေမှုမြင်ကွင်း။

စာတည်း – ဟိန်းစံ