ဒေသခံ

စစ်ကိုင်း၊ ဖေဖော်ဝါရီ ၈၊ ၂၀၂၃။

စစ်ကိုင်းတိုင်း၊ ရွှေဘိုမြို့နယ်ရှိ စစ်ကောင်စီတပ်တွေ မီးရှို့ဖျက်ဆီးခဲ့တဲ့ သရက်ပင်၀န်းကျေးရွာက ဒေသခံတွေအတွက် အကူအညီတွေ လိုအပ်နေတယ်လို့ ShweBo People Defence Force အဖွဲ့က သတင်းထုတ်ပြန်ထားပါတယ်။

အဲ့ဒီရွာကို ပြီးခဲ့တဲ့ ဇန်နဝါရီလ ၃၀ ရက်မှာ ရေဦးမြို့နယ်က လာရောက်တဲ့ အင်အား ၅၀ ပါစစ်သားတွေက မီးရှို့သွားခဲ့တာပါ။

“သရက်ပင်ဝန်းရွာက အိမ်ခြေ ၄၀၀ လောက်ရှိတဲ့ရွာကို အိမ်ခြေ ၅၀ လောက် မီးရှို့ခံရတာ။ ဟိုတစု သည်တစု မီးရှို့ခံရတာ။ ပထမ တရက် နှစ်ရက်လောက်ကိုတော့ ရွာသားချင်း ကူညီကြတာ။ ထမင်းထုပ်တွေ ပို့ပေးတာပေါ့။ တခြားရွာတွေကို အကူအညီတောင်းရအောင်လည်း သူတို့လည်း မီးရှို့ခံထားရတာဆိုတော့ အဆင်မပြေဘူး” လို့ ShweBo People Defence Force ရဲ့ တာဝန်ရှိသူက ပြောပါတယ်။

လက်ရှိမှာ မီးလောင်ကျွမ်းရာက ကျန်ရှိတဲ့ သွပ်ပြား မီးလောင်သစ်သားအချို့နဲ့ ထန်းရွက်တွေကို အသုံးပြုပြီး ယာယီတဲအိမ်တွေ ဆောက်လုပ်နေထိုင်ရတယ်လို့ သူကဆက်ပြောပါတယ်။

သူတို့တွေအတွက် နေထိုင်စရာ၊ စားနပ်ရိက္ခာ၊ အဝတ်အထည်၊ စောင်နဲ့ ဆေးဝါးပစ္စည်းတွေ လိုအပ်နေပြီး ဆက်သွယ်လှူဒါန်းလိုသူတွေ အနေနဲ့ ShweBo People Defence Force လူမူကွန်ယက်စာမျက်နှာကနေ ဆက်သွယ်လှူဒါန်းနိုင်တယ်လို့လည်း ဆိုပါတယ်။

ဒါအပြင် အခြားစစ်ကောင်စီတပ်ဖွဲ့တွေကလည်း သရက်ပင်ဝန်းကျေးရွာနဲ့အတူ ဇန်နဝါရီလ ၃၀ ရက် အဲဒီနေ့မှာပဲ ရွှေဘိုမြို့နယ်ထဲက ရုံးစုရွာ၊ ညောင်ပင်ကြီးစုရွာနဲ့ ဗျိုင်းကြိုင်ရွာက အိမ်ခြေ ၄၀၀ ကျော်ကို မီးရှို့ခဲ့သေးတယ်လို့ဆိုပါတယ်။

ခင်ဦး၊ ဇန်နဝါရီ ၃၀၊ ၂၀၂၃။

စစ်ကိုင်းတိုင်း၊ ခင်ဦးမြို့နယ်၊ ဗျိုင်းကြိုင်ရွာက ဒေသခံ ၂၀ ဦးကို စစ်ကိုင်း တပ်မ ၃၃ ကတပ်သားတွေက ဇန်နဝါရီလ ၃၀ ရက် ဒီ‌နေ့မနက်ပိုင်းမှာ ဝင်ရောက်လာပြီး ဖမ်းဆီးထားတယ်လို့ သိရပါတယ်။

မအူပင်မြို့ပေါ်ကနေ အင်အား ၈၀ ကျော်ရှိတဲ့ စစ်ကိုင်းတပ်မ ၃၃ တပ်သားတွေက ဇန်နဝါရီလ ၃၀ ရက် မနက်ပိုင်းမှာ ဗျိုင်းကြိုင်ကျေးရွာက ဒေသခံ ၂၀ ဦး ဖမ်းဆီးထားပြီး နေအိမ်တွေကို မီးရှို့နေတယ်လို့ FIRE DRAGON PDF ဗိုလ်‌ပျောက်ကြီးက ပြောပါတယ်။

“မနက် ၉ နာရီလောက်ကနေ မအူပင်ကနေ စထွက်လာပြီးတော့ ရွှေဘိုမြို့နယ် အင်ကြင်းပင်ရွာအနောက်ဘက်က တဲတွေမီးရှို့တယ်။ ခင်ဦးမြို့နယ် ဗိုင်းကြိုင်ရွာမှာ မီးရှို့နေတယ်။ အိမ်ခြေက ၁၅၀ လောက်ပဲရှိတာ။ အခုမှ မီးစရှို့နေတာ။ စစ်ခွေးတွေက အဲဒီရွာမှာ ခဏနားနေတယ်။ ပြည်သူ ၂၀ ကျော်လောက် အဖမ်းခံထားရတယ်။ တပ်မ ၃၃ က စစ်ခွေးတွေနဲ့ ပျူတွေဝင်ရောက်နေတာ” လို့ ဗိုလ်ပျောက်ကြီးက ပြောပါတယ်။

ဗျိုင်းကြိုင်ကျေးရွာက ဖမ်းခံရသူတွေဟာ အသက် ၄၀ ကျော်နဲ့ ၅၀ ဝန်းကျင်အမျိုးသားတွေ ဖြစ်ကြပြီး ကလေးအမေတွေကိုပါ ဖမ်းဆီးထားကာ လက်ရှိစစ်ကြောင်းဝင်လာလို့ ထွက်ပြေးရသူ ၇၀၀ ကျော်ရှိတယ်လို့ ဆက်ပြောပါတယ်။

ဗျိုင်းကြိုင်ရွာကနေ စစ်သားအင်အား ၄၀ နဲ့ခွဲထွက်သွားပြီး ယခုအချိန်မှာ စိုင်တိုးရွာ မီးရှို့နေတယ်လို့ ဆက်ပြောပါတယ်။

စစ်ကိုင်း၊ ဇန်နဝါရီ ၂၄၊ ၂၀၂၃။

စစ်ကိုင်းတိုင်း၊ ဆာလင်းကြီးမြို့နယ်အတွင်းက စစ်ကောင်စီတပ်တွေမီးရှို့ခဲ့တဲ့ကျေးရွာ ၃ ရွာကဒေသခံတွေကို ဇန်နဝါရီလ ၂၃ ရက်မနေ့ကညနေပိုင်းမှာ မီးဖိုဆောင်သုံးပစ္စည်းတွေနဲ့အဝတ်အထည်တွေလှူဒါန်းခဲ့တယ်လို့ သိရပါတယ်။

အညာပစ်တိုင်းထောင်လေးများအဖွဲ့၊ ဓားမဆိုင်းဗိုလ်စွမ်းနဲ့ Dhamma Worker Group Singapore) တို့ပူးပေါင်းကာ မီးဘေးသင့်နေအိမ် ၈၇ အိမ်ကိုတအိမ်လျှင် ဒန်အိုးနဲ့ ဒယ်အိုး ၁လုံးစီ၊ ဇလုံ ၂ လုံး၊ဇွန်း ၃ ချောင်း၊ ကြွေအုပ် ၁ လုံး၊ ဆန်၂ ပြည်၊ ဆီ ၅၀ ကျပ်သားနဲ့ အ၀တ်အထည်အချို့ကို လှူဒါန်းခဲ့တာလို့သိရပါတယ်။

စစ်ကိုင်း၊ ဒီဇင်ဘာ ၃၁၊ ၂၀၂၂။

ပြီးခဲ့တဲ့ဒီဇင်ဘာလ ၂၈ ရက်မှာ စစ်ကိုင်းတိုင်း၊ ခင်ဦးမြို့နယ်၊ အလယ်ရှိုကျေးရွာကိုဝင်ရောက်ခဲ့တဲ့ စစ်ကောင်စီတပ်သားတွေက ဒေသခံ ၈ ဦးကိုပစ်သတ်ပြီးတော့ ၂၀ ဦးထက်မနည်းကိုလည်း ဖမ်းဆီးခဲ့တယ်လို့ သိရပါတယ်။

ဒေသခံတွေကိုပစ်သတ်၊ ဖမ်းဆီးထားတဲ့စစ်ကောင်စီတပ်သားတွေဟာ ရွှေဘိုမြို့နယ်မှာရှိတဲ့ စစ်ကောင်စီရဲ့လေ့ကျင့်ရေးစခန်း အမှတ်(၈) ကဖြစ်ပြီး ကန့်ဘလူမြို့နယ်၊ ဇီးကုန်းသကြားစက်မှတပ်သားတွေနဲ့ ပူးပေါင်းကာ အင်အား ၁၀၀ ဝန်းကျင်နဲ့ အလယ်ရှိုကျေးရွာကို စစ်ကြောင်းထိုးဝင်ရောက်လာခဲ့တာလို့ ခင်ဦးမြို့နယ်သတင်းမှန်ပြန်ကြားရေးအဖွဲ့မှ တာဝန်ရှိသူက ပြောပါတယ်။

“စကစတွေက ရွာထဲကိုဝင်တဲ့အချိန် မနက် ၅ နာရီလောက်ကဝင်တာ။ ကျောက်တွေတင်တဲ့ ကားနဲ့ဝင်တာ။ ဝင်တဲ့အချိန်ကမနက်ခင်းဆိုတော့ ပြင်ဆင်ချိန်မရလိုက်ဘူး။ ဝင်တာကလည်း သူတို့(စကစ)ကားနဲ့မဟုတ်ဘူး။ ကျောက်တင်တဲ့ကားနဲ့ဝင်လာတာ။ ဝင်ပြီးတော့ ကင်းစောင့်နေသူတွေကိုပစ်သတ်တာ” လို့ ပြောပါတယ်။

အလယ်ရှို့ရွာဒေသခံ ၈ ဦးကို ရွာထဲဝင်ဝင်ချင်းမှာပဲ သေနတ်နဲ့ပစ်သတ်ခဲ့တာဖြစ်ပြီး၊ အဲ့ဒီတပ်တွေဟာ ဒီဇင်ဘာလ ၃၁ ရက်ဒီကနေ့ထိ ရွာထဲမှာရှိနေသေးတာကြောင့် အသတ်ခံရသူတွေနဲ့ ဖမ်းဆီးခံရသူတွေရဲ့ အသေးစိတ် အချက်အလက်တွေကို မသိရှိရသေးဘူးလို့လည်းဆိုပါတယ်။

အလယ်ရှိုရွာမှာ အိမ်ခြေ ၈၀၀ ခန့်ရှိပြီး၊ ရွာထဲမှာ စစ်ကောင်စီအင်အား ၁၀၀ ဝန်းကျင်က တပ်စွဲနေဖို့ လုပ်ဆောင်နေတာကြောင့် ထောင်ချီတဲ့ရွာခံတွေလည်း ထွက်ပြေးတိမ်းရှောင်နေရပြီး တောထဲတွေမှာ ဖြစ်သလို ခိုလှုံနေကြရတယ်လို့ အထက်ပါတာဝန်ရှိသူကပြောပါတယ်။

“ဒီရွာကို ကန့်ဘလူက ဝါသဝ ရောက်မယ်လို့သိရတယ်။ ပျူသင်တန်းတက်ဖို့အတွက်ပေါ့။ စကစတွေက ဒီနေ့အချိန်ထိ ရွာထဲကလုံးဝမထွက်သေးဘူး။ အဲဒီရွာကဒေသခံတွေနဲ့ အနီးအနားကရွာသားတွေအကုန်လုံးမှာ ထွက်ပြေးပြီးတော့ အခုတောထဲမှာ ခိုလှုံနေရတယ်။ သူတို့အကူအညီအရေးပေါ်လိုအပ်နေပါတယ်”လို့ ဆိုပါတယ်။

ဒါ့အပြင်ဒီဇင်ဘာလ ၂၇ ရက် နဲ့ ၂၈ ရက်မှာလည်း ရွှေဘိုမြို့နယ်မှာရှိတဲ့ စစ်ကောင်စီရဲ့လေ့ကျင့်ရေးစခန်း အမှတ် ၈ ကနေ တိုက်ပွဲမဖြစ်ပဲ လက်နက်ကြီးတွေနဲ့ပစ်ခတ်ခဲ့တာကြောင့် ရေးကုန်းရွာကအမျိုးသားတဦး၊ ဝါးရုံကုန်းရွာက အမျိုးသမီး ၃ ဦးနဲ့ အမျိုးသား ၁ဦးတို့ အသီးသီးဒဏ်ရာရရှိသွားခဲ့ကြတယ်လို့ သိရပါတယ်။

စစ်ကိုင်း၊ ဒီဇင်ဘာ ၃၀၊ ၂၀၂၂။

စစ်ကိုင်းတိုင်း၊ တန့်ဆည်မြို့ပေါ်ရပ်ကွက်မှာနေထိုင်တဲ့ဒေသခံတွေကို စစ်ကောင်စီတပ်ဖွဲ့က ပျူထဲဝင်ဖို့ လိုက်လံစည်းရုံးနေတယ်လို့ ဒေသခံတွေဆီကသိရပါတယ်။

ယနေ့ ဒီဇင်ဘာ ၃၀ ရက်မနက် ၁၀ နာရီကနေ ၁၁ နာရီအထိ တန့်ဆည်မြို့နယ် ဘောလုံးကွင်းထဲမှာ စစ်ကောင်စီတပ်ဖွဲ့တွေကရပ်ကွက်ထဲကလူတွေကို တအိမ်တယောက်မဖြစ်မနေတက်ရောက်ရမှာဖြစ်ကြောင်းနဲ့ တက်ရောက်ခဲ့တဲ့ဒေသခံတွေကိုလည်း “ကိုယ့်မြို့ကိုယ့်နယ်ကိုလက်နက်ကိုင်ပြီးကာကွယ်ချင်ကြလားလို့” မေးခွန်းတွေကိုမေးပြီးပျူထဲဝင်ဖို့လိုက်လံတိုက်တွန်းနေတယ်လို့ ဆိုပါတယ်။

“ဒီနေ့မနက်မှာ စစ်တပ်ဖက်က အစည်းအဝေးလုပ်မယ်၊ တက်ဖို့တအိမ်တယောက်ခေါ်ပါတယ်အင်အား ၂၀ ခန့်ဝင်လာတယ်၊ ပြီးတော့လမ်းထိပ်ကားရပ်ပြီးတအိမ်ချင်းဝင်ပြီးအစည်းအဝေးဘယ်အချိန်စမယ်လာခဲ့ပါလိုက်ခေါ်တယ် သူတို့မှာဘယ်ရပ်ကွက်ဘယ်အိမ်မှာဘယ်သူတွေနေတယ် ဆိုတာစာရင်းရှိပါတယ်” လို့တန့်ဆည်မြို့ခံတဦးက ပြောပါတယ်။

တန့်ဆည်မြို့ပေါ်မှာ ပေါ်ဦးရပ်ကွက်၊ ဗိုလ်မြရပ်ကွက်၊ မေတ္တာမြိုင်ရပ်ကွက် နဲ့ မဟာမြိုင်ရပ်ကွက် ဆိုပြီး ရပ်ကွက်ကြီးလေးရပ်ကွက်ရှိကာ ပြီးခဲ့တဲ့ရက်ပိုင်းလောက်ကလည်း ဝန်ထမ်းအိမ်ယာအနီးက လျှပ်စစ်မီတာရုံးထဲမှာအခုလိုမျိုးစည်းရုံးပွဲကို ကျင်းပတယ်လို့သိရပါတယ်။

“တန့်ဆည်မြို့မှာက လေးရပ်ကွက်ရှိပါတယ်။ ရပ်ကွက်တိုင်းကိုလိုက်လံစည်းဝေးတာမို့လေးကြိမ်အနည်းဆုံးရှိပါတယ်။ ဒါပေမဲ့ဒီနေ့လုပ်တဲ့အစည်းဝေးက ရပ်ကွက်သီးသန့်မဟုတ်ပဲသူတို့ခေါ်ချင်တဲ့အပိုင်းကိုခေါ်တာဆိုတော့ ပြောဖို့ကလည်းခက်တယ်။ ဒီနေ့အစည်းအဝေးကတော့ကြောက်လို့တက်ရတာမို့ လူအနည်းငယ်တော့ရှိပါတယ်” လို့ အဆိုပါမြို့ခံကဆက်ပြောပါတယ်။

အစည်းအဝေးအပြီးမှာတော့ စစ်ကောင်စီတပ်ဖွဲ့ဝင်တွေက စည်းဝေးတက်ရောက်တဲ့ပြည်သူတွေကို ကြက်ဥ ၂ လုံး၊ ခေါက်ဆွဲခြောက်တထုပ်ကိုပေးလိုက်တယ်လို့ သိရပါတယ်။

တန့်ဆည်မြို့ထဲမှာ ရပ်ကွက်နာမည်တွေသာကွဲပြီး ရပ်ကွက်ဖွဲ့စည်းပုံကတော့ မြို့လယ်လမ်းမကြီးနဲ့ထားတာကြောင့် လမ်းဘေးဝဲရာကလူတွေကိုခေါ်ရင် ရပ်ကွက် ၂ ခုလုံးပါသွားတယ်လို့ဆိုပါတယ်။

စစ်ကိုင်း၊ ဒီဇင်ဘာ ၃၀၊ ၂၀၂၂။

စစ်ကိုင်းတိုင်း၊ ခင်ဦးမြို့နယ်၊ ရေးကုန်းရွာနဲ့ ဝါးရုံကုန်းရွာကို စစ်ကောင်စီပစ်ခတ်လိုက်တဲ့ လက်နက်ကြီးကျည်တွေ ကျရောက်ပေါက်ကွဲခဲ့တာကြောင့် ဒေသခံ ၅ ဦး ဒဏ်ရာရရှိသွားပြီး အဲဒီထဲက ၁ ဦးမှာ ဒဏ်ရာပြင်းထန်တယ်လို့ သိရပါတယ်။

ဒဏ်ရာရရှိခဲ့သူတွေကတော့ ဒီဇင်ဘာ ၂၇ ရက်နေ့မှာ ရေးကုန်းကျေးရွာက အမျိုးသား ၁ ဦးနဲ့ ၂၈ ရက်နေ့မှာ ဝါးရုံကုန်းကျေးရွာက အမျိုးသမီး ၃ ဦးနဲ့ အမျိုးသား ၁ ဦးတို့ ဒဏ်ရာရရှိခဲ့တာဖြစ်တယ်လို့ ခင်ဦးမြို့နယ် သတင်းမှန်ပြန်ကြားရေးအဖွဲ့မှ တာဝန်ရှိသူတဦးက ပြောပါတယ်။

“ဒဏ်ရာရသူတွေရဲ့နာမည်တွေကိုတော့ လုံခြုံရေးအရပြောလို့ မရဘူးဗျ။ ငါးယောက်ဒဏ်ရာရတဲ့အထဲမှာ ဝါးရုံကုန်းရွာက အမျိုးသားတယောက်ကတော့ ဒဏ်ရာတော်တော်လေးပြင်းပါတယ်။ သူ့ရဲ့ခန္ဓာတကိုယ်လုံးမှာ ကျည်စတွေဝင်သွားတာ။ ကျန်တဲ့လေးယောက်ကိုတော့ ကျည်စတွေက အနည်းငယ်ပဲထိမှန်ခဲ့တာ။ အခုတော့ အကုန်လုံးဆေးကုသမှု ခံယူနေရတုန်းပါ” လို့ ဆိုပါတယ်။

ရွှေဘိုမြို့နယ်မှာရှိတဲ့ စစ်ကောင်စီရဲ့လေ့ကျင့်ရေးစခန်းအမှတ် (၈) ကနေ တိုက်ပွဲဖြစ်ပွားတာမရှိဘဲ လက်နက်ကြီးတွေပစ်ခတ်ခဲ့တာကြောင့် ဒီဇင်ဘာ ၂၇ ရက်နေ့မှာ ရေးကုန်းရွာကို ကျည်တလုံးကျရောက်ခဲ့ကာ အမျိုးသားတဦး ဒဏ်ရာရရှိခဲ့သလို ၂၈ ရက်နေ့မှာလည်း ဝါးရုံကုန်းရွာကို ကျည်တလုံးထပ်မံကျရောက်ခဲ့လို့ အမျိုးသမီး ၃ ဦးနဲ့ အမျိုးသား ၁ ဦးတို့ အသီးသီးဒဏ် ရာရရှိသွားခဲ့ကြတာ ဖြစ်ပါတယ်။

“လက်နက်ကြီးကျည်တွေက နေအိမ်ပေါ်ကို တိုက်ရိုက်လာကျတာဗျ။ ညနေပိုင်းလောက်မှာ ဒေသခံတွေက အိမ်ပေါ်မှာထိုင်လို့ စကားပြောနေကြတဲ့အချိန်မှာ လာကျတာ။ ၂၉ ရက်မနေ့ကဆိုရင်လည်း တန်ဘိုရွာကို တလုံးကျခဲ့သေးတယ်။ ဒါပေမယ့် လူတွေတယောက်မှ ဒဏ်ရာမရရှိခဲ့ကြဘူး” လို့ ဆိုပါတယ်။

ခင်ဦးမြို့နယ်မှာ စစ်ကောင်စီတပ်နဲ့ကာကွယ်ရေးတပ်ဖွဲ့တို့အကြား တိုက်ပွဲဖြစ်ပွားမှုမရှိတာ ဒီနေ့အချိန်ထိဆိုရင် တလနီးပါးရှိနေပြီဖြစ်ပြီးနောက် စစ်ကောင်စီဘက်က လက်နက်ကြီးတွေနဲ့ စတင်ပစ်ခတ်တာကြောင့် ဒေသခံတွေအခုလို ဒဏ်ရာရရှိခဲ့ကြတာဖြစ်ပါတယ်။

ခင်ဦးမြို့နယ်မှာ အခု(၂၀၂၂) ခုနှစ်နိုဝင်ဘာ – ၁၅ရက်နေ့ကနေ နိုဝင်ဘာ၂၇ ရက်နေ့အထိ စစ်ကောင်စီရဲ့ သတ်ဖြတ်တာကို ခံခဲ့ရတဲ့ ဒေသခံပြည်သူ ၁၃ ဦးရှိခဲ့ပြီး ကျေးရွာပေါင်း ၁၂ ရွာက နေအိမ်ပေါင်း ၇၀၀ ကျော် မီးရှို့ဖျက်ဆီးခဲ့တယ်လို့ သိရပါတယ်။

မကွေး၊ ဒီဇင်ဘာ ၂၉၊ ၂၀၂၂။

မကွေးတိုင်းဒေသကြီး၊ ပခုက္ကူမြို့နယ်၊ မြေနီတွင်းကျေးရွာက ဒေသခံ ၅ ဦးကို ပျူစောထီးစစ်ကြောင်းက ကျေးရွာထဲကနေ ဖမ်းခေါ်သွားတယ်လို့ သိရပါတယ်။

ဒီဇင်ဘာလ ၂၈ ရက်မနေ့ကညနေ ၃ နာရီခန့်မှာ ပျူစောထီးအင်အား ၅၀ ကျော်ရှိတဲ့စစ်ကြောင်းဟာ အောင်သာကျေးရွာဘက်ကနေ စစ်ကြောင်းထိုးလာပြီး မြေနီတွင်းကျေးရွာအနီးက ယာခင်းထဲမှာရှိနေတဲ့အမျိုးသား ၅ ဦးကို ဖမ်းဆီးသွားတာလို့ ဒေသခံတဦးက ပြောပါတယ်။

“မနေ့က အဲဒီဘက်ရွာခြမ်းကို အောင်သာနဲ့ဇီးကုန်းဘက်က ပျူစစ်ကြောင်းဝင်လာခဲ့တာ။ သူတို့လာတော့ ရွာသားအချို့ကပြေးကြတယ်။ ခု ဖမ်းခံလိုက်ရတဲ့သူတွေက သူတို့နဲ့မဆိုင်ဘူး။ ဘာမှ မလုပ်လောက်ဘူးဆိုပြီး ရွာထဲကျန်နေတာ။ အဲဒါကို ပျူစစ်ကြောင်းက ဖမ်းသွားတာ။ သူတို့ကို ဖမ်းပြီးတာနဲ့ပြန်ထွက်သွားတယ်” လို့ ပြောပါတယ်။

ဖမ်းဆီးခံရသူတွေဟာ အသက် ၂၀ ဝန်းကျင်အရွယ်တွေဖြစ်တဲ့ မောင်ဆန်းလင်းအောင်၊ မောင်နေသူလွင်၊ မောင်ဇော်ဇော်ဌေး၊ ဖြိုးရန်နိုင်နဲ့ အသက် ၅၀ ကျော်အရွယ်ရှိ ဦးကောင်းဟန်တို့ဖြစ်တယ်လို့ ဆိုပါတယ်။

ဖမ်းဆီးသွားတဲ့သူတွေကို ပျူစောထီးစစ်ကြောင်းက အောင်သာကျေးရွာဘက်ကိုခေါ်သွားပြီး နှိပ်စက်စစ်ဆေးမှုတွေလုပ်နေလို့ မိသားစုဝင်တွေက စိုးရိမ်နေကြတယ်လို့ သိရပါတယ်။

ပခုက္ကူနယ်ဘက်က ရွာတွေမှာ စစ်ကောင်စီတပ်တွေနဲ့ပျူစောထီးအဖွဲ့တွေက ကျေးရွာတွေဘက်ကို စစ်ကြောင်းထိုးချိန် ဒေသခံတွေကို မကြာခဏ ဖမ်းဆီးစစ်ဆေးတာတွေရှိနေပြီး အချို့ကိုတော့ ပြန်လွှတ်ပေးတာတွေရှိခဲ့ပေမယ့် အချို့ကိုတော့ ပုဒ်မတပ် ထောင်ချထားတွေ ရှိနေတာပါ။

ဒါ့အပြင်ပြီးခဲ့တဲ့ ဒီဇင်ဘာလ ၁၆ ရက်မှာလည်း ရန်ကုန်ကနေ ခရီးသည်တင်ကးနဲ့လိုက်ပါလာတဲ့ အသက် ၂၀ နဲ့ ၂၅ ဝန်းကျင်ရှိအမျိုးသား ၄ ဦးကို ဒရုန်းသင်တန်းပေးဖို့လာတဲ့သူတွေလို့ စွပ်စွဲပြီး ပခုက္ကူမြို့နယ်၊ ဧရာဝတီတံတား (ပခုက္ကူ)ပေါ်မှာ စစ်ကောင်စီတပ်သားတွေက ဖမ်းဆီးခဲ့ပါသေးတယ်။

မကွေး၊ ဒီဇင်ဘာ ၂၆၊ ၂၀၂၂။

မကွေးတိုင်းဒေသကြီး၊ ဆောမြို့နယ်ထဲကကျေးရွာထဲကို စစ်ကောင်စီတပ်ဖွဲ့က လေယာဉ်နဲ့ဗုံးကြဲခဲ့လို့ ၄ဦးသေဆုံးပြီး ၈ဦးဒဏ်ရာရခဲ့ပါတယ်။

ဒီဇင်ဘာလ ၂၆ ရက် ဒီနေ့နေ့လယ် ၂ နာရီချိန်မှာ ဆောမြို့နယ်၊ ညောင်ကန်ကျေးရွာကို စစ်ကောင်စီတပ်ဖွဲ့တွေက တိုက်ပွဲမဖြစ်ပဲ ဂျက်ဖိုက်တာ ၁ စီးနဲ့ လာရောက်ပစ်ခတ်ခဲ့လို့ဒေသခံ အမျိုးသမီး ၁ ဦးနဲ့ အမျိုးသား ၃ ဦးထိခိုက်သေဆုံးသွားတယ်လို့ဆိုပါတယ်။

“ဘာပစ်ခတ်မှုမှမရှိဘဲနဲ့ ရုတ်တရက်ကြီး လေယာဉ်နဲ့လာပစ်တာ။ ရွာသားတွေကပြေးချိန်တောင်မရလိုက်ဘူး။ သေဆုံးသွားတဲ့အန်တီကလည်း ညနေစာချက်ပြုတ်နေချိန်ထိမှန်သွားတာ။ နေအိမ်၄လုံးလည်းပျက်စီးသွားတယ်” လို့ ယောဒေသခံအမျိုးသမီးတဦးက ပြောပါတယ်။

သေဆုံးသွားသူတွေက ဒေါ်စောဝိုင်း၊ ကိုဇော်ဌေးဝင်း၊ ကိုကျော်ဌေးလင်းတို့ သားအမိ ၃ဦးနဲ့ တူဖြစ်သူ ‌ကိုဇော်မင်းတို့ ၄ဦး ဖြစ်ကာ နောက်ထပ်ဒေသခံ ၈ဦးလည်း ဒဏ်ရာရရှိခဲ့ကြတယ်လို့ ဆိုပါတယ်။

အခုလက်ရှိအချိန်မှာတော့ ညောင်ကန်ကျေးရွာကဒေသခံတချို့ဟာ တောထဲမှာရှောင်တိမ်းနေကြပြီး ကျန်တချို့ကတော့ကျေးရွာထဲမှာပင်ဆက်လက်နေထိုင်ဆဲဖြစ်တယ်လို့ ဆိုပါတယ်။