ဒေသခံ

စစ်ကိုင်း၊ ဇွန် ၁၅၊ ၂၀၂၃။

စစ်ကိုင်းတိုင်း၊ ဆားလင်းကြီးမြို့နယ်၊ ညောင်ပင်ကြီးရဲစခန်းမှာတပ်စွဲနေတဲ့ စစ်ကောင်စီတပ်သားတွေက လက်နက်ကြီးတွေနဲ့ပစ်ခတ်လို့ အနီးရှိ နှင်းတောကျေးရွာက အမျိုးသားတဦး ကျည်ထိမှန်သေဆုံးခဲ့တယ်လို့ ဒေသခံတွေဆီက သိရပါတယ်။

အဲ့ဒီစစ်ကောင်စီတပ်သားတွေက ဇွန်လ ၁၄ ရက်မနေ့ မနက် ၉ နာရီလောက်မှာ ၄၀ မမ၊ ၆၀ မမ လက်နက်ကြီးတွေနဲ့ ပစ်ခတ်ခဲ့တာကြောင့် အသက် ၂၇ နှစ်အရွယ် နှင်းတောရွာသားတဦး သေဆုံးပြီး၊ နောက်ထပ်အမျိုးသား ၂ ဦးလည်း ဒဏ်ရာရရှိခဲ့တာဖြစ်ပါတယ်။

“ညောင်ပင်ကြီးရဲစခန်း ပစ်ခတ်ခံရပြီးနောက်ပိုင်းမှာ ရွာတွေဘက်ကို လက်နက်ကြီးတွေနဲ့ ပစ်ခတ်တာမျိုးတွေ လုပ်တယ်။ မနေ့က လက်နက်ကြီးထိမှန်ပြီး သေဆုံးသွားတဲ့သူရဲ့ အလောင်းကို ပြန်မရသေးပါဘူး၊ ထိခိုက်ဒဏ်ရာရသွားတဲ့ ၂ ယောက်ကိုလည်း ဆေးရုံကို ပို့ပေးထားပါတယ်” လို့ ချင်းတွင်းမြစ်သပိတ်ကော်မတီဝင်တဦးက ပြောပါတယ်။

ထိခိုက်သေဆုံးသူတွေနဲ့ပတ်သက်တဲ့ ကိုယ်ရေးအချက်အလက်တွေကိုတော့ လုံခြုံရေးအရ ထည့်သွင်း ပြောကြားခဲ့ခြင်း မရှိပါဘူး။

ဒါ့အပြင် မနေ့ကတရက်တည်းမှာတင် စစ်ကောင်စီတပ်သားတွေက နှင်းတောရွာသား ၈ ဦးကိုလည်း ညောင်ပင်ကြီးရဲစခန်းကို ဖမ်းဆီးခေါ်ဆောင်သွားပြီး ဇွန်လ ၁၅ ရက် ဒီနေ့အထိ ပြန်လွတ်မလာသေးဘူးလို့ သိရပါတယ်။

“ရွာသားတွေ ရွာထဲပစ္စည်းဝင်ယူပြီး ပြန်ထွက်ချိန် သူတို့ (စစ်ကောင်စီ)နဲ့တိုးပြီး အဖမ်းခံလိုက်ရတယ်။ အဖမ်းခံလိုက်ရတာ ယောကျာ်းလေးတွေချည်းပဲ အသက်အရွယ်တွေက ၂၅ နဲ့ ၃၀ ကြား အရွယ်တွေပါ။ ရွာသားတွေကို ရဲစခန်းမှာ အလုပ်လုပ်ခိုင်းဖို့ ဖမ်းသွားတာနေမှာ” လို့ အထက်ပါသပိတ်ကော်မတီဝင်က ဆက်ပြောပါတယ်။

ညောင်ပင်ကြီးရဲစခန်းမှာ နှင်းတောရွာသား ၈ ဦးအပါအဝင် အခြားကျေးရွာက ဒေသခံတွေလည်း ဖမ်းဆီးခံထားရပြီး၊ ရွာလမ်းတချို့ကိုလည်း ဘက်ဟိုးကားနဲ့ ဖျက်ဆီးထားခဲ့တယ်လို့ သိရပါတယ်။

ပြီးခဲ့တဲ့ ဇွန်လ ၉ ရက် ညနေ ၅ နာရီခွဲလောက်မှာ PDF မဟာမိတ်ပူးပေါင်းတပ်ဖွဲ့တွေက ညောင်ပင်ကြီးရဲစခန်းကို ဝင်ရောက်ပြီး စခန်းသိမ်းတိုက်ပွဲဆင်နွှဲခဲ့ရာ စစ်အုပ်စုဘက်က သေဆုံးမှုများခဲ့တာကြောင့် လေကြောင်းပစ်ကူနဲ့ လက်နက်ကြီးပစ်ကူ အများအပြား အသုံးပြုခဲ့တယ်လို့လည်း ကာကွယ်ရေးတပ်ဖွဲ့တွေက ပြောပါတယ်။

စာတည်း – လင်း

စစ်ကိုင်း၊ ဇွန် ၁၄၊ ၂၀၂၃။

စစ်ကိုင်းတိုင်း၊ မုံရွာခရိုင်၊ ချောင်းဦးမြို့နယ်၊ နတ်ရေကန်ကျေးရွာက အမျိုးသား ၄ ဦး ဇွန်လ ၁၃ ရက် ညနေ ၄ နာရီဝန်းကျင်မှာ စစ်ကောင်စီတပ်သားတွေရဲ့ ဖမ်းဆီးတာခံလိုက်ရပြီး အဆက်အသွယ်ပြတ် တောက်နေတယ်လို့ ချောင်းဦးPDF တပ်ဖွဲ့ဝင်တွေဆီက သိရပါတယ်။

ဖမ်းဆီးခံရသူတွေဟာ နတ်ရေကန်ကျေးရွာသား မျိုးသူအောင် ၂၅ နှစ်၊ ဖိုးထူး ၄၀ နှစ်နဲ့ အသက် ၃၀ အရွယ်ရှိ အမည်မသိရသေးတဲ့ နောက်ထပ်အမျိုးသား ၂ ဦးတို့ဖြစ်ကြပြီး အင်အား ၁၀ ဦး ကျော်ပါတဲ့ စစ်ကောင်စီတပ်သားတွေက ကားတစီးနဲ့လာရောက်ဖမ်းဆီးသွားတာလို့ ဆိုပါတယ်။

“သူတို့လေးယောက်က နတ်ရေကန်ဇရပ်ပေါ်မှာထိုင်နေကြတာ။ မြို့ပေါ်က စကစတွေက ကားနဲ့ရောက် လာပြီး အကုန်ဆွဲတင်သွားတာ။ ဒီလူတွေက PDFတွေ မဟုတ်ဘူး၊ သာမန်ပြည်သူတွေပါ” လို့ ချောင်းဦး PDF အဖွဲ့ဝင်တဦးက ပြောပါတယ်။

ဖမ်းဆီးခံရသူတွေနဲ့ အဆက်အသွယ်ပြတ်တောက်နေပြီး စစ်ကောင်စီတပ်က ဘယ်နေရာမှာ ထိန်းသိမ်းထားတယ်ဆိုတာကို ဇွန်လ ၁၄ ရက် ဒီမနက်အချိန်ထိ မသိရှိရတာကြောင့် မိသားစုဝင်တွေက အသက်အန္တရာယ်စိုးရိမ်နေကြတယ်လို့ သူက ဆက်ပြောပါတယ်။

နတ်ရေကန်ကျေးရွာဟာ မုံရွာ-မန္တလေးကားလမ်းမဘေးမှာ တည်ရှိပြီး အဆိုပါကျေးရွာအတွင်းမှာ စစ်ကောင်စီတပ် အင်အား ၆၀ ခန့်က ဝင်ရောက်တပ်စွဲထားတာလည်း ဖြစ်ပါတယ်။

ပြီးခဲ့တဲ့မေလ ၂၂ရက်မှာလည်း မန္တလေးဘက်ကနေ မုံရွာမြို့ဘက်ကို ဟိုက်ဂျက်ကားစီးနင်းလာတဲ့ အမျိုးသား ၄ ဦး ကို နတ်ရေကန်စစ်ဆေးရေးဂိတ် စစ်ကောင်စီတပ်သားတွေက ဖမ်းဆီးပြီး PDF နဲ့ ပတ် သက်တယ်ဆိုကာ အသတ်ခံလိုက်ရတယ်လို့ ချောင်းဦး PDF ဆီကသိရပါတယ်။

စာတည်း – ရင်ငြိမ်း

စစ်ကိုင်း၊ ဇွန် ၉၊ ၂၀၂၃။

စစ်ကိုင်းတိုင်း၊ ခင်ဦးမြို့နယ်၊ ကျီးကန်အုပ်စု၊ ရေအေးကုန်းရွာကို ဇွန်လ ၉ ရက်ဒီမနက် ၈ နာရီလောက်မှာ စစ်တပ်ကလက်နက်ကြီးနဲ့ပစ်ကာ စစ်ကြောင်းထိုးလာတဲ့အတွက် ဒေသခံ ၃ ထောင်လောက် တိမ်းရှောင်ထွက်ပြေးခဲ့ရတယ်လို့ သိရပါတယ်။

ခင်ဦးမြို့နယ်၊ ရွှေမိုးညိုဘုရားကနေ ရေအေးကုန်းရွာထဲကို စစ်တပ်က လက်နက်ကြီး၊ငယ်တွေနဲ့ ရမ်းသမ်းပစ်ခတ် ဝင်ရောက်လာလို့ ရေအေးကုန်းရွာနဲ့ အနီးရှိ သံဘို၊ ချောင်းစုံ၊ ကျီးကန်ရွာက ဒေသခံတွေ ထွက်ပြေးတိမ်းရှောင်နေကြရတာလို့ ခင်ဦးသတင်းမှန်ပြန်ကြားရေးအဖွဲ့ဝင်တဦးက ပြောပါတယ်။

“ရွာသားတွေကလည်း စစ်ကြောင်းလာမှန်း ကြိုသိလို့ မိုးရွာထားတဲ့ကြားက ကြိုပြီးရှောင်ကြတာ။ ခြေလျင်ရော နွားလှည်းရော ဆိုင်ကယ်တွေနဲ့ပြေးကြတာ။ လူဦးရေ ၃,၀၀၀ လောက်ရှိမယ်။ စစ်တပ်က လက်နက်ကြီးနဲ့ရမ်းထုလို့။ ဒဏ်ရာရသူ ရှိမရှိတော့ အသေးစိတ်တော့မသိရသေးဘူး”လို့ ပြောပါတယ်။

စစ်ကြောင်းဟာ မနက် ၁၁ နာရီဝန်းကျင်လောက်မှာ ရေအေးကုန်းရွာကနေ ထွက်သွားပြီး၊ လက်ရှိမှာ ရွှေဘိုမြို့ထဲကို ဝင်ရောက်သွားတယ်လို့ သူကဆက်ပြောပါတယ်။

စစ်ကြောင်းထွက်ခွာသွားပေမယ့် စစ်တပ်က ကင်းပုန်းတွေချန်ထားခဲ့မှာစိုးရိမ်လို့ စစ်ရှောင်တွေဟာ ရွာထဲကိုပြန်မဝင်ရဲဘဲ တိမ်းရှောင်နေတဲ့ စာသင်ကျောင်းတွေနဲ့ ဘုန်းတော်ကြီးကျောင်းတွေမှာပဲ လက်ရှိအချိန်အထိ ရှိနေသေးတယ်လို့ဆိုပါတယ်။

အဲဒီစစ်ကြောင်းဟာ ဒီနေ့မနက်မှ ခင်ဦးမြို့ကနေ မနက်အစောပိုင်းထွက်လာတဲ့ ဘီးလူးစစ်ကြောင်းဖြစ်ပြီး အင်အား ၁၀၀ ကျော်ပါဝင်တယ်လို့ ဆိုပါတယ်။

ခင်ဦးမြို့နယ်ထဲက မဒေါင်းလှရွာ၊ မန်ကျည်းကုန်းရွာ၊ ရွာသစ်ကုန်းနဲ့ ပျဥ်ထောင်ကျေးရွာတွေကို စစ်တပ်က အာဏာသိမ်းအပြီးလပိုင်းအကြာမှာ တပ်လာစွဲလို့ အနီးဝန်းကျင်ကျေးရွာ ၂၇ ရွာက ဒေသခံအချို့ဟာ ရွာကိုစွန့်ကာ တိမ်းရှောင်နေကြတယ်လို့ ပြောပါတယ်။

အဲ့ဒီ ၂၇ ရွာက တိမ်းရှောင်ကြသူဦးရေ ၁ သောင်းဝန်းကျင်ခန့်ရှိပြီး အချို့ဟာ အခြားဒေသတွေမှာ သွားရောက်နေထိုင်ကြသလို လူဦးရေ ၅၀၀၀ လောက်ကတော့ ခင်ဦးမြို့နယ်ထဲက ဘုန်းကြီးကျောင်း၊ စာသင်ကျောင်းနဲ့ တောတိုက်တွေထဲမှာ စစ်ရှောင်နေကြတာ ၁ နှစ်ခွဲဝန်းကျင်လောက်ရှိပြီလို့ ဆိုပါတယ်။

ပြီးခဲ့တဲ့ ဇွန်လ ၄ ရက်မနက်ကလည်း စစ်ကောင်စီစစ်တပ်ဟာ ခင်ဦးမြို့နယ်၊ ကံသစ်ကျေးရွာကို ၄ ကြိမ်မြောက် ဝင်ရောက်မီးရှို့ပြီး နေအိမ်ထဲက ဗုဒ္ဓဆင်းတုတော်တွေကိုပါ မီးရှို့ဖျက်ဆီးခဲ့လို့ အဲဒီနေ့က နေအိမ် ၆၅ လုံးနဲ့ ဘုန်းတော်ကြီးကျောင်းက ကျောင်းဆောင် ၄ ဆောင်လည်း ပြာကျခဲ့ရပါသေးတယ်။

စာတည်း – လင်း

စစ်ကိုင်း၊ ဇွန် ၈၊ ၂၀၂၃။

စစ်ကိုင်းတိုင်း၊ စစ်ကိုင်းမြို့နယ်၊ ပဒူကျေးရွာက နေအိမ်တွေကို စစ်ကောင်စီတပ်သားတွေက ၂ လအတွင်းထဲမှာ ၈ ကြိမ် ဝင်ရောက်မီးရှို့ဖျက်ဆီးခဲ့တယ်လို့ သိရပါတယ်။

အိမ်ခြေ ၁ ထောင်နီးပါးရှိတဲ့ ပဒူရွာကို မေလ ၂၂၊ ၂၄၊ ၂၅၊ ၂၉ နဲ့ ၃၀ ရက်၊ ဇွန်လ ၃၊ ၇၊ ၈ ရက်တွေမှာ မီးရှို့ခဲ့တာပါ။

စစ်သားအင်အား ၃၀ လောက်နဲ့ တပ်စွဲနေတဲ့ ပဒူကျေးရွာ ရဲစခန်းကို ဒေသခံကာကွယ်တပ်ဖွဲ့တွေက မေလ ၂၂ ရက်မနက်ပိုင်းမှာ ဝင်ရောက်တိုက်ခိုက်ခဲ့ပြီးနောက် အဲ့ဒီနေ့ညနေပိုင်းကစလို့ ဆက်တိုက်ဆိုသလို မီးရှို့ခံခဲ့ရတာလည်း ဖြစ်ပါတယ်။

“ပဒူက တိုက်နယ်အဆင့်မှာပါတော့ အိမ်ခြေကများတယ်။ အခုရွာကို မီးရှို့နေတာလည်း ပဒူရဲစခန်းမှာ ကျန်ခဲ့တဲ့ (စစ်ကောင်စီတပ်သား)တဝက်လောက်က နေအိမ်တွေကို မီးရှို့နေတာ”လို့ Wetlet Informational Network မှ ဗိုလ်မြေဩဇာက ပြောပါတယ်။

ခုလိုမီးရှို့လို့ ဒေသခံရွာသား ၆ ထောင်ကျော် ဘေးလွတ်ရာကိုတိမ်းရှောင်နေရပြီး နေထိုင်စားသောက်ရေးအတွက်လည်း အခက်ကြုံနေရပါတယ်။

“ရွာထဲမှာ ဘယ်သူမှပြန်လာမရဲဘူး၊ ရွာသားတွေထွက်ပြေးနေရတာ တလပြည့်တော့မယ်၊ ဘာအငြိုးတွေနဲ့ ဝင်ပြီးမီးရှို့နေလဲတော့မသိဘူး။ ရွာထဲမှာလည်း နေအိမ်တွေ ဘယ်လောက်မှ မကျန်တော့ဘူး။ တရွာလုံးပြာကျအောင်ပဲ လုပ်နေတာလားတော့ မသိဘူး” လို့ ဗိုလ်မြေသြဇာက ဆိုပါတယ်။

စစ်ကောင်စီတပ်တွေက ပဒူရွာ ရဲစခန်းမှာရှိနေသေးပြီး ရွာသားတွေအနေနဲ့လည်း ရွာထဲကို ပြန်မဝင်ရဲကြသေးတဲ့အတွက် နေအိမ်ပျက်စီးဆုံးရှုံးမှု အရေအတွက်ကိုတော့ မသိရှိရသေးဘူးလို့ ဗိုလ်မြေသြဇာ ပြောပါတယ်။

စာတည်း – လင်း

စစ်ကိုင်း၊ ဇွန် ၅၊ ၂၀၂၃။

စစ်ကိုင်းတိုင်း၊ ကလေးမြို့နယ်မြောက်ပိုင်းကို စစ်ကောင်စီက လေကြောင်းသုံးတိုက်ခိုက်တဲ့အပြင် လက်နက်ကြီးနဲ့ပါ ဆက်တိုက်ပစ်ခတ်နေတာကြောင့် ဒေသခံပြည်သူ ၈ ဦး ထိမှန်ဒဏ်ရာ ရထားတယ်လို့ သိရပါတယ်။

ဇွန်လ ၅ ရက် ဒီနေ့မနက် ၁၀ နာရီခွဲဝန်းကျင်မှာ တိုက်ခိုက်ရေး ရဟတ်ယာဉ်တစီးနဲ့ ရှုခင်းသာရွာကို တိုက်ခိုက်ခဲ့တာဖြစ်ပြီး၊ ၁၁ နာရီခွဲဝန်းကျင်မှာတော့ ကလေးမြို့ပေါ်ကနေ လက်နက်ကြီးနဲ့ပစ်ခတ်လို့ လက်ပံချောင်းရွာအနီး ကျရောက်ပေါက်ကွဲခဲ့တာကြောင့် ဒေသခံတွေ ထိမှန်ဒဏ်ရာ ရရှိခဲ့တာလည်း ဖြစ်ပါတယ်။

“ကလေးမြောက်ပိုင်းကို လေကြောင်းပစ်နေပြီ၊ စာသင်ကျောင်း ပစ်ခံရတာ၊ လက်နက်ကြီးနဲ့ပစ်တာလည်း ထိထားတယ်၊ ခုလည်း လေယာဉ်နောက်တစီးပတ်ဝဲနေတာမို့ သတိထားနေရတယ်” လို့ ကလေးဒေသခံတဦးက ပြောပါတယ်။

လေကြောင်းပစ်ခတ်ခံရလို့ ရှုခင်းသာရွာက ဒေသခံ ၄ ဦး ထိမှန်ဒဏ်ရာရခဲ့တဲ့အပြင် ကျေးရွာစာသင်ကျောင်း လည်းပျက်စီးခဲ့ပြီး သေဆုံးသူတွေရှိတယ်လို့ သတင်းတွေထွက်ပေါ်နေပေမယ့် မြေလတ်အသံက သီးခြားအတည်မပြုနိုင်သေးပါဘူး။

ဒါ့အပြင် လက်နက်ကြီးနဲ့ပစ်ခတ်လို့ လက်ပံချောင်းရွာက ဒေသခံ ၄ ဦး ကျည်ထိမှန်ခဲ့ကာ တဦးကတော့ ခြေထောက်ပြတ်သွားပြီး တဦးက စိုးရိမ်ရတယ်လို့ သိရပါတယ်။

ထိခိုက်သူတွေထဲမှာ အမျိုးသား၊ အမျိုးသမီးဘယ်နှစ်ဦး ပါလဲဆိုတာနဲ့ လူနာတွေရဲ့ အသေးစိတ်အချက်လက်ကိုတော့ စုံစမ်းနေဆဲဖြစ်တယ်လို့ မြေပြင်နဲ့နီးစပ်သူ အထက်ပါဒေသခံက ပြောပါတယ်။

နေ့လယ် ၁၂ နာရီမှာလည်း နောက်ထပ် တိုက်ခိုက်ရေးရဟတ်ယာဉ်တစီးက ကလေးမြို့ပေါ်ကို ပျံသန်းတာတွေ လုပ်နေတဲ့အတွက် ကလေးမြို့မြောက်ပိုင်းက ပြည်သူတွေ သတိနဲ့နေနေရတယ်လို့ ဆိုပါတယ်။

ကလေးမြို့တောင်ပိုင်းမှာ မေလ ၂၇ ရက်က ၃ ပွင့်ဗိုလ်တဦးအပါအဝင် စစ်ကောင်စီတပ်သား ၁၅ ဦးကျော်သေဆုံးခဲ့ပြီးနောက် စစ်ကောင်စီက ကလေးမြို့ပေါ်ကို စဉ့်ကူးကနေ အင်အား ၃၀၀ နီးပါး ထပ်မံဖြည့်တင်းထားပြီး ဂန့်ဂေါ-ကလေးနယ်စပ်မှာလည်း စစ်ရေးတင်းမာမှုတွေရှိနေတယ်လို့ သိရပါတယ်။

စာတည်း – လင်း

စစ်ကိုင်း၊ မေ ၂၈၊ ၂၀၂၃။

စစ်ကိုင်းတိုင်း၊ မုံရွာခရိုင်၊ ချောင်းဦးမြို့နယ်၊ ငါးယှန်ကျေးရွာက လူနေအိမ်တွေကို စစ်ကောင်စီတပ်သားတွေက မေလ ၂၇ ရက် မနက် ၁၁ နာရီကျော်မှာ မီးရှို့ပြီး ရွာခံ ၆၀ ကျော်ကိုလည်း ဖမ်းဆီးသွားခဲ့တယ်လို့ သိရပါတယ်။

စစ်ကား ၂ စီးနဲ့အင်အား ၁၀၀ ကျော်ပါ စစ်ကောင်စီတပ်သားတွေဟာ ကျေးရွာအတွင်းဝင်ရောက်လာပြီး နေအိမ် ၂ လုံးကိုမီးရှို့ကာ အသက် ၃၀ နဲ့ ၄၀ အကြားရှိ ရွာခံအမျိုးသား၊အမျိုးသမီး ၆၀ ကျော်ကို ချောင်းဦးမြို့ရဲစခန်းကို ဖမ်းခေါ်သွားတာဖြစ်တယ်လို့ ချောင်းဦး PDF ရဲဘော်တဦးက မြေလတ်အသံကို ပြောပါတယ်။

“ငါးယှန်ရွာမှာ တောင်ကုန်းဆိုတဲ့အပိုင်းရှိတယ်။ အဲဒီအပိုင်းက အိမ်ကိုမီးရှို့တာ။ပြီးတော့ တွေ့တဲ့လူတွေကိုဖမ်းတာ။ အသက်ကြီးပိုင်းတွေကိုတော့ ချန်ထားခဲ့တယ်။ အဖမ်းခံရသူတွေက ၆၀ ကျော်တော့ နာမည်တွေမသိရသေးဘူးဗျ။ အခုအချိန်ထိ ပြန်မလွတ်လာကြသေးဘူး” လို့ ပြောပါတယ်။

လက်ရှိမှာ ငါးယှန်ရွာအတွင်း စစ်ကောင်စီတပ်ဖွဲ့ဝင်တချို့ တပ်စွဲနေထိုင်နေပြီး အဲ့ဒီစစ်ကောင်စီတပ်ဖွဲ့ဟာ မုံရွာ-ချောင်းဦးလမ်းပိုင်းမှာ ယမန်နေ့ နေ့လယ်ပိုင်းက မိုင်းရှင်းလင်းရေးလုပ်နေချိန် ဒေသကာကွယ်ရေးတပ်ဖွဲ့တွေဘက်က မိုင်းခွဲတိုက်ခိုက်ခဲ့လို့ အရာရှိ ၁ ဦး အပါအဝင် ၅ ဦးဒဏ်ရာရရှိခဲ့တယ်လို့ ဆိုပါတယ်။

မေလ ၁၁ ရက်ကလည်း စစ်ကောင်စီတပ်သားတွေက ချောင်းဦး-မုံရွာကားလမ်းမဘေးမှာတည်ရှိတဲ့ အိမ်ခြေ ၁၀၀၀ ခန့်ရှိ ငါးယှန်ရွာကို ပစ်ခတ်ဝင်ရောက်ပြီး မီးရှို့ခဲ့တာကြောင့် လူနေအိမ် ၂၀၀ ကျော် မီးလောင်ပျက်စီးခဲ့သလို အမျိုးသားတဦးလည်း လက်နက်ကြီးစထိမှန် သေဆုံးခဲ့တယ်လို့ သိရပါတယ်။

စာတည်း – ရင်ငြိမ်း

မကွေး၊ မေ ၂၇၊ ၂၀၂၃။

မကွေးတိုင်း၊ ပခုက္ကူခရိုင်၊ ရေစကြိုမြို့နယ်က ကျေးရွာနေအိမ်တွေကို မေလ ၂၇ ရက် ဒီနေ့မနက်ပိုင်း မှာ စစ်အုပ်စုက စစ်ကြောင်း ၂ ကြောင်းခွဲပြီး မီးရှို့နေလို့ ဒေသခံ ၅၀၀၀ ကျော် ထွက်ပြေးနေရတယ်လို့ သိရပါတယ်။

အင်အား ၈၀ ခန့်ပါ စစ်ကြောင်းက ဒီနေ့မနက်အစော ၅ နာရီခွဲလောက်ကစပြီး မြေတောရွာက နေအိမ်တွေကိုဝင်ရောက်မီးရှို့သွားခဲ့ပြီးနောက် အဲဒီရွာနဲ့ ရွာနားနီးစပ်တွေဖြစ်တဲ့ ဘိစပ်ကုန်းရွာ ၊ ဆည်းသည့်ရွာ ၊ မြေစွန်းရွာက နေအိမ်တွေကိုလည်း မီးရှို့ဖျက်ဆီးခဲ့တယ်လို့ ဒေသခံသတင်းရင်းမြစ်တဦးက မြေလတ်အသံကိုပြောပါတယ်။

အလားတူ နောက်ထပ်စစ်ကြောင်းတကြောင်းဟာလည်း ရေစကြိုမြို့နယ်ထဲက ရေယှားကျေးရွာကို ဒီကနေ့မနက် ၈ နာရီလောက်မှာဝင်ရောက်မီးရှို့ခဲ့ပြီး နေ့လယ် ၁၁ နာရီကျော်လောက်မှာတော့ အဲဒီရွာနဲ့ မိုင်ဝက်လောက်ဝေးတဲ့ နန်းဦးရွာထဲကိုဝင်ရောက်သွားပြီး အဲဒီရွာကနေအိမ်တွေကိုလည်း မီးရှို့ဖျက်ဆီးနေတယ်လို့ သိရပါတယ်။

“အနောက်ဘက်ချင်းတွင်းမြစ်ဘက်ကလာတဲ့ စစ်ကြောင်းတကြောင်းနဲ့ ဧရာဝတီမြစ်ဘက်ကနေလာတဲ့ စစ်ကြောင်းပါ။ ဒီမနက်အထိမီးလောင်သွားတဲ့ အိမ်ခြေတွေကို မသိရသေးဘူး။ ရေယှားရွာကတော့ ၂၀၀ ဝန်းကျင်လောက် မီးထဲပါသွားတယ်လို့တော့ကြားရတယ်။ အတည်တော့မပြုနိုင်သေးဘူး ရွာသားတွေလည်း ရွာနားကိုဘယ်သူမှမကပ်ရဲသေးဘူး ” လို့ ပြောပါတယ်။

စစ်ကောင်စီတပ်က ကျေးရွာနေအိမ်တွေကို ဝင်ရောက်မီးရှို့နေတာကြောင့် မီးရှို့ခံရတဲ့ မြေတောရွာ၊ ရေယှားရွာတွေ အပါအဝင် ၊ နန်းဦးရွာ ၊ ကိုင်းရွာ ၊ ငတမျှော်ရွာ ၊ မြေတောရွာ၊ ဘိစပ်ကုန်းရွာ၊ မြေစွန်းရွာ အစရှိတဲ့ကျေးရွာထဲက ဒေသခံပြည်သူ ၅၀၀၀ ကျော်ဟာ နီးစပ်ရာကျေးရွာတွေဘက်ကို ထွက်ပြေးတိမ်းရှောင်နေရတယ်လို့ သိရပါတယ်။

မေလ ၂၆ ရက်နေ့မနေ့ကလည်း ရေစကြိုမြို့နယ်၊ မိဖုရားကျေးရွာက နေအိမ် ၄ လုံး နဲ့ ပဲမှော်စင်တလုံးကို မီးရှို့ဖျက်ဆီးသွားတဲ့အပြင် စစ်တပ်ကပစ်ခတ်လိုက်တဲ့လက်နက်ကြီးကြောင့် အမျိုးသမီး ၁ ဦးသေဆုံး ပြီး အမျိုးသား ၁ ဦိးဒဏ်ရာရရှိခဲ့တယ်လို့သိရပါတယ်။

စာတည်း- ရင်ငြိမ်း