နွားထိုးကြီး

နွားထိုးကြီး၊ ဩဂုတ် ၇၊ ၂၀၂၅။

မန္တလေးတိုင်း၊ နွားထိုးကြီးမြို့နယ်၊ ကနားကျေးရွာနဲ့ ပြင်စည်ကျေးရွာကြားမှာ စစ်ကောင်စီတပ်ဖွဲ့ဝင်တွေ စီးလာတဲ့ကားကို တိုက်ခိုက်ရာ သေဆုံးသူတွေရှိခဲ့ပြီး လက်နက်ခဲယမ်းတွေကိုလည်း သိမ်းဆည်းခဲ့တယ်လို့ Natogyi People Defence Force မြင်းခြံခရိုင် အမှတ် ၄ တပ်ရင်းဆီက သိရပါတယ်။

စစ်ကောင်စီတပ်ဖွဲ့ဝင် ၅ ဦးစီးနင်းလိုက်ပါလာတဲ့ကားကို သြဂုတ် ၅ ရက်ညနေ ၃ နာရီ ၁၂ မိနစ်လေက် မှာ တော်လှန်ရေးတပ်တွေကပစ်ခတ်တိုက်ခိုက်ခဲ့ချိန် စစ်ကောင်စီတပ်ဖွဲ့ဝင် ၃ ဦးသေဆုံးပြီး ၂ ဦးကတော့ ထွက်ပြေးသွားတယ်လို့ ဆိုပါတယ်။

“ကား‌ပေါ်မှာ ၅ ဦးပါတာ၊ ကားအမျိုးအစားကတော့ အတည်အကျမပြောတတ်ဘူး၊ အိမ်စီးကားနဲ့ လာတာ၊ ဘယ်တပ်က ဘာတာဝန်တွေတော့ ကျနော်တို့စုံစမ်းနေတုန်းပါ၊ ၃ ဦးကတော့ အသေ၊ ၂ ဦးကတော့ ထွက်ပြေးလွတ်မြောက်သွားတယ်၊ ကားကိုတော့ မီးရှို့ဖျက်ဆီးခဲ့တယ်”လို့ Natogyi People Defence Force မြင်းခြံခရိုင်အမှတ် ၄ တပ်ရင်းရဲ့ တပ်ဖွဲ့ဝင်တဦးက ပြောပါတယ်။

ပစ်ခတ်မှုအပြီးမှာ စစ်ကောင်စီကားပေါ်က M79 ၁ လက်၊ MA 3 ၃ လက်၊ 5.56 ကျည် ၂၁၅ တောင့်၊ ၄၀ မမ ၁ လုံး၊ လက်ပစ်ဗုံး ၁ လုံး၊ ကျည်ဘောက် ၅ ခု တို့ကို သိမ်းဆည်းရခဲ့တယ်လို့ သိရပါတယ်။

ဒီတိုက်ခိုက်မှုကို Natogyi People Defence Force မြင်းခြံခရိုင်အမှတ် ၄ တပ်ရင်း နဲ့ မြင်းခြံခရိုင် အမှတ် ၁၀ တပ်ရင်း တို့က ပူးပေါင်းလုပ်ဆောင်ခဲ့တာဖြစ်ပါတယ်။

ပစ်ခတ်တိုက်ခိုက်ပြီးနောက်ပိုင်း ပြင်စည်ကျေးရွာကနေမှ ပစ်ခတ်မှုဖြစ်ခဲ့တဲ့နေရာကို စစ်ကောင်စီတပ်ဖွဲ့ဝင်တွေက ရှင်းလင်းရေးဝင်တာတွေလုပ်သလို ကင်းပုန်းဝပ်တာတွေလည်း ရှိတယ်လို့ သိရပါတယ်။

ဩဂုတ် ၅ ရက်မနက် ၃ နာရီခွဲလောက်မှာလည်း အရာခံဗိုလ်ဦးစီး အင်အား ၁၄ ဦးရှိနေတဲ့ မန္တလေးတိုင်း၊ မိတ္ထီလာမြို့နယ်၊ တလင်းကုန်းကျေးရွာ၊ ရန်ကုန်-မန္တလေး အမြန်လမ်း မိုင်တိုင် ၂၈၉ အနီးရှိ တလင်းကုန်းတံတားစောင့်ရဲကင်းကို Meiktila Revolution Group ကတိုက်ခိုက်ရာ ရဲ ၂ ဦးသေဆုံးခဲ့ပါသေးတယ်။

စာတည်း – လင်း

ကားကိုမီးရှို့ပြီး လက်နက်ခဲယမ်းတွေကို PDF သိမ်းဆည်း

မန္တလေး၊ ဇူလိုင် ၂၁၊ ၂၀၂၅။

မန္တလေးတိုင်း၊ နွားထိုးကြီးမြို့နယ်အပိုင် ရန်ကုန်-မန္တလေးအမြန်လမ်း မိုင်တိုင် ၃၁၈ မှာ ရဲတပ်ဖွဲ့ဝင်တွေ စီးလာတဲ့ကားကို ပစ်ခတ် တိုက်ခိုက်ရာ ရဲ ၂ ဦးသေဆုံးပြီး လက်နက်ခဲယမ်းတွေကို သိမ်းဆည်းခဲ့တယ်လို့ Natogyi People Defence Force မြင်းခြံခရိုင်အမှတ် ၄ တပ်ရင်း ဆီက သိရပါတယ်။

အဲ့ဒီရဲတပ်ဖွဲ့ဝင်တွေမောင်းနှင်လာတဲ့ကားကို ဇူလိုင် ၂၀ ရက် မနက် ၇ နာရီခွဲဝန်းကျင်မှာ အသင့်စောင့်ပြီး ပြောက်ကျားပုံစံနဲ့ပစ်ခတ်တိုက်ခိုက်ခဲ့ပြီး ကားကိုလည်းမီးရှို့ခဲ့တယ်လို့ ဆိုပါတယ်။

“ကားကတော့ စစ်သုံး ရဲသုံး ကားပဲ၊ ကားပေါ်မှာပါတာက ၂ ဦးပဲပါတာ၊ ကားပေါ်ပါတာက ရဲတွေပါ၊ ကားပေါ်ပါတဲ့ ၂ ဦးလုံးကတော့သေတယ်၊ ကျနော်တို့ ကားကိုတော့မယူခဲ့ဘူး၊ မီးရှို့ဖျက်ဆီးခဲ့တယ်၊ အလောင်း ၂ လောင်းကိုတော့ ကားနဲ့ မနီးမဝေးမှာထားခဲ့တာ”လို့ Natogyi People Defence Force မြင်းခြံခရိုင်အမှတ် ၄ တပ်ရင်း တာဝန်ခံက ပြောပါတယ်။

ဒီပစ်ခတ်မှုကို Natogyi People Defence Force မြင်းခြံခရိုင်အမှတ် ၄ တပ်ရင်းနဲ့ တပ်ရင်း ၁၀ တို့က ပူးပေါင်းလုပ်‌ဆောင်ခဲ့တာဖြစ်ပြီး တိုက်ခိုက်ချိန်အတွင်း လမ်းသွားလမ်းလာပြည်သူတွေ ထိခိုက်မှုမရှိအောင် တားဆီးထားခဲ့တယ်လို့လည်း ဆိုပါတယ်။

“ပစ်ခတ်ခဲ့တဲ့အချိန်မှာ အရမ်းရှုပ်ထွေးတာတော့ မဖြစ်ခဲ့ဘူး၊ သူတို့ကား ၁ စီးပဲ လမ်းမပေါ်မှာ ပေါ်ပေါ် ထင်ထင်ရှိတာ၊ တချို့ကားတွေက နောက်မှာပဲကျန်ခဲ့တာ၊ ပစ်ခတ်မှုဖြစ်စဉ်မှာ ပြည်သူတွေ ထိခိုက်မှာ စိုးတာကြောင့် ဟိုဘက် ဒီဘက်လမ်းတွေ ကျနော်တို့တားစီးထားတာတွေရှိတယ်၊” လို့ သူကဆက်ပြောပါတယ်။

ပစ်ခတ်ပြီးနောက် ရဲတပ်ဖွဲ့ဝင်တွေကိုင်ဆောင်လာတဲ့ BA-94 ၂ လက်၊ ကျည်ဘောက် ၅ ခု၊ 9 မမ ကျည် ၁၂၃ တောင့်၊ 7.62 ကျည် ၁၂၇ တောင့်တို့ကို သိမ်းဆည်းပြီး ပြန်လည်ဆုတ်ခွာခဲ့ကြတယ်လို့ ဆိုပါတယ်။

ပြီးခဲ့တဲ့ ဇွန် ၂၃ ရက်ကလည်း ဝက်လူးနယ်မြေရဲစခန်းကို စစ်ကူလာတဲ့စစ်ကြောင်းကို Natogyi People Defence Force မြင်းခြံခရိုင်အမှတ် ၄ တပ်ရင်း တိုက်ခိုက်ခဲ့ပါသေးတယ်။

စာတည်း – လင်း

နွားထိုးကြီး၊ ဇွန် ၂၅၊ ၂၀၂၅။

မန္တလေးတိုင်း၊ မြင်းခြံခရိုင်၊ နွားထိုးကြီးမြို့နယ်မှာ စစ်ကောင်စီစစ်ကြောင်းကို ကာကွယ်ရေးတပ်ဖွဲ့ဝင်တွေက စောင့်ကြိုတိုက်ခိုက်ရာ စစ်ကောင်စီအဖွဲ့ဝင် ၁၃ ဦးသေဆုံးပြီး ဒုတပ်ကြပ် ၁ ဦး အရှင်ဖမ်းမိခဲ့တယ်လို့ Natogyi People Defence Force အဖွဲ့ဆီကနေ သိရပါတယ်။

ဇွန် ၂၀ ရက် မနက် ၇ နာရီခွဲဝန်းကျင်မှာ နွားထိုးကြီးမြို့နယ်၊ သာစည်လေးကျေးရွာအနီးမှာ စစ်ကောင်စီ အင်အား ၁၃၀ ဝန်းကျင်ပါစစ်ကြောင်းကို ကြားဖြတ်စောင့်ကြိုတိုက်ခိုက်ခဲ့တယ်လို့ ဆိုပါတယ်။

တိုက်ပွဲအတွင်း စစ်ကောင်စီအဖွဲ့ဝင် ၁၃ ဦးသေဆုံးကာ တပ်မ ၈၈ က ဒုတပ်ကြပ် ၁ ဦး အရှင်ဖမ်းမိပြီး MA-1 ၁ လက်၊ MA-3 ၁ လက်၊ G-3 ကျည် ၉၂ တောင့်၊ ၅.၅၆ ကျည် ၁၅၀၀ တောင့်၊ M9 ၁၂ လုံး၊ ၆၀ မမ ၈ လုံး၊ ၆၀ မမ ဒေါက် ၁ ခု၊ RPG ၂ ဖူး၊ RPG ကျည် ၂ တောင့်၊ နင်းမိုင်း ၁၄ လုံး၊ လက်ပစ်ဗုံး ၁၁ လုံး၊ Drone Shooter ၁ လက် နဲ့ ကျည်ဘောက် ၆ ခု တို့ သိမ်းဆည်းရရှိခဲ့တယ်လို့ သိရပါတယ်။

“တိုက်ပွဲကြာချိန် ၂ နာရီခွဲလောက်တော့ ကြာမြင့်သွားတယ်ဗျ။ မြေပြင်စစ်ကြောင်းကို တိုက်တာဖြစ်တဲ့အတွက် အကွာအဝေးကိုတော့ ပြောဖို့ခက်မယ်။ သူတို့ဘက်ကလည်း လက်နက်ကြီး လက်နက်ငယ်တွေနဲ့ ပြန်ထုတယ်။ မျက်မြင် သေဆုံးသွားတဲ့ စစ်သား ၁၃ ဦးထဲက ၁၂ ဦး အလောင်းကိုတော့ ပြန်ကောက်သွားကြတယ်ဗျ။ အလောင်း ၁ လောင်းကိုတော့ ကျနော်တို့ဘဲ သင်္ဂြိုဟ်ပေးခဲ့တာ။” လို့ Natogyi PDF ရဲ့တပ်ရင်းမှူး ကိုစိုးအောင်က မြေလတ်အသံကို ပြောပါတယ်။

အရှင်ဖမ်းဆီးရမိခဲ့တဲ့ ဒုတပ်ကြပ် ၁ ဦးကိုတော့ သေချာထိန်းသိမ်းပေးထားပြီး သူရဲ့ အခြေအနေ အသေးစိတ်ကိုတော့ လုံခြုံရေးအရမထုတ်ပြန်သေးဘူးလို့ ဆိုပါတယ်။

တိုက်ခိုက်မှုအပြီးမှာ စစ်ကောင်စီစစ်ကြောင်းဟာ အနီးနားဝန်းကျင်က ကျေးရွာတွေကို လက်နက်ကြီး၊ လက်နက်ငယ်တွေနဲ့ ရမ်းသမ်းပစ်ခတ်ခဲ့တယ်လို့ တပ်ရင်းမှူး ကိုစိုးအောင်က မြေလတ်အသံကို ပြောပါတယ်။

အဆိုပါ တိုက်ခိုက်မှုကို မြင်းခြံခရိုင် အမှတ် ၁၀ တပ်ရင်း၊ မြင်းခြံခရိုင် အမှတ် ၄ တပ်ရင်းနဲ့ တံတားဦးမြို့နယ် ပြည်သူ့ကာကွယ်ရေးအဖွဲ့တို့က ပူးပေါင်းလုပ်ဆောင်ခဲ့တာဖြစ်တယ်လို့ သိရပါတယ်။

စာတည်း – လင်း