နွားထိုးကြီး

နွားထိုးကြီး၊ မေ ၃၊ ၂၀၂၃။

မန္တလေးတိုင်း၊ မြင်းခြံခရိုင်၊ နွားထိုးကြီးမြို့မရဲစခန်း မေလ ၁ ရက် နေ့လယ် ၂ နာရီခွဲလောက်မှာ ဒရုန်းနဲ့ ဗုံးချတိုက်ခိုက်ခံရလို့ ရဲတပ်ဖွဲ့ဝင်တွေ သေဆုံးဒဏ်ရာရတာတွေ ရှိခဲ့တယ်လို့ သိရပါတယ်။

အမှတ် ၄ ရပ်ကွက်၊ နွားထိုးကြီး-မြင်းခြံကားလမ်းမကြီးဘေးမှာရှိတဲ့ မြို့မရဲစခန်းဝန်းအတွင်းကို ဒရုန်းနဲ့ဗုံး ၃ လုံးချ တိုက်ခိုက်လို့ ၁ ဦး သေဆုံးပြီး၊ ၄ ဦး ပြင်းထန်ဒဏ်ရာရခဲ့တယ်လို့ မြင်းခြံခရိုင် တပ်ရင်း ၄ နွားထိုးကြီး PDF တာဝန်ခံ ဗိုလ်လင်းယုန်က မြေလတ်အသံကို ပြောပါတယ်။

“ရဲစခန်းဝန်းထဲက အိမ်စီးကားနား ရဲတွေစုပြုံနေတဲ့နေရာကို ဗုံးချခဲ့တာ။ ကားလည်း မီးလောင်ပျက်စီးသွားတယ်” လို့ ပြောပါတယ်။

ပျက်စီးသွားတဲ့ အိမ်စီးကားဟာ စစ်ကောင်စီလက်အောက်ခံရဲတပ်ဖွဲ့ဝင်တွေ ကင်းလှည့်ချိန်မှာ အသုံးပြုတဲ့ အဖြူရောင် Mark II ကားဖြစ်ပြီး မီးသတ်ကားတွေ ရောက်ရှိ မီးငြိမ်းသတ်ခဲ့လို့ ရဲစခန်းတွင်း ရေတွေလျှံတဲ့အထိ ဖြစ်ခဲ့ကာ မီးခိုးလုံးတွေကို တမြို့လုံးက မြင်ရတယ်လို့ ဒေသခံတွေရဲ့ပြောဆိုချက်တွေကို ကိုးကားပြီး သူက ဆက်ပြောပါတယ်။

သေဆုံးနဲ့ ဒဏ်ရာရတဲ့ ရဲတွေကိုတော့ နွားထိုးကြီးဆေးရုံကို ပို့ဆောင်ကာ ဆေးကုသနေတယ်လို့ ဆိုပါတယ်။

ဧပြီ ၃၀ ရက်နေ့ကလည်း နွားထိုးကြီးမြို့အရှေ့ဘက် ထန်းဇင်ကျေးရွာမှာရှိတဲ့ စစ်အုပ်စုကင်းစခန်းဂိတ်ကို နွားထိုးကြီး PDF အဖွဲ့က ဒရုန်းနဲ့ဗုံးချတိုက်ခိုက်ခဲ့လို့ ထိခိုက်သေဆုံးတာတွေ ရှိတယ်လို့ သိရပါတယ်။

စာတည်း – ရင်ငြိမ်း

နွားထိုးကြီး၊ ဧပြီ ၂၇၊ ၂၀၂၃။

မန္တလေးတိုင်း၊ နွားထိုးကြီး မြို့မရဲစခန်းက ရဲတပ်ကြပ်တဦး ဧပြီလ ၂၆ ရက်မနေ့ည ၇ နာရီလောက်မှာ သေနတ်နဲ့ပစ်ခံရပြီး သေဆုံးခဲ့တယ်လို့ သိရပါတယ်။

အသက် ၃၀ အရွယ် ရဲတပ်ကြပ် ခိုင်မင်းထွန်းဟာ နွားထိုးကြီး မြို့မရဲစခန်းကနေ မြို့အရှေ့ဘက်ရှိ ရဲကင်းစခန်းကို ဆိုင်ကယ်နဲ့ထွက်လာချိန် ထန်းဇင်ရွာအနီးအရောက်မှာ ဒေသခံကာကွယ်ရေး တပ်ဖွဲ့ဝင်တွေနဲ့ ထိပ်တိုက်တွေ့လို့ ထွက်ပြေးရာမှာ ပစ်ခတ်ခံရပြီး နေရာတင်သေဆုံးခဲ့တာပါ။

“ကျနော်တို့အဖွဲ့ ကင်းပတ်နေတုန်း ထန်ဇင်းရွာအနားမှာ တွေ့တာ၊ လက်နက်မပါဘူးဗျ။ ဆိုင်ကယ်ရပ်ဖို့ ပြောတာကို မောင်းပြေးလို့ ကျနော်တပ်ဖွဲ့တွေ ပစ်ခတ်ရှင်းလင်းခဲ့တာပါ။ အဖွဲ့လိုက် ပစ်တာဆိုတော့ ဘယ်နှစ်ချက်ပစ်မိသလဲတော့ မမှတ်မိပါဘူး” လို့ မြင်းခြံခရိုင် အမှတ်-၄ တပ်ရင်း၊ နွားထိုးကြီး ပြည်သူ့ကာကွယ်ရေးတပ်ဖွဲ့ – NPDF တာဝန်ခံက ပြောပါတယ်။

ပစ်ခတ်ပြီး ကာကွယ်ရေးတပ်တွေ ပြန်ဆုတ်ခွာသွားချိန်မှာ ရဲတပ်ကြပ်အလောင်းကို စစ်ကောင်စီတပ်သားတွေက အင်အား ၃၀ ကျော်နဲ့ ညတွင်းချင်းပဲ အခင်းဖြစ်တဲ့နေရာမှာ လာသယ်သွားကြတယ်လို့ ဆိုပါတယ်။

စစ်တပ်ဝါဒဖြန့် တယ်လီဂရမ် ချန်နယ်မှာတော့ အဆိုပါရဲတပ်ကြပ်မှာ နားထင်၊ နောက်ကြော၊ မေးရိုး၊ နားအောက်၊ ရင်ညွန့်၊ ဗိုက်နဲ့ လက်ကောက်ဝတ် စတဲ့နေရာတွေမှာ ကျည်ထိမှန်သေဆုံးနေတာကို ထန်းဇင်ရွာအနီးမှာ တွေ့ခဲ့ရတယ်လို့ ရေးသားထားပါတယ်။

ပြီးခဲ့တဲ့ ဧပြီ ၂၃ ရက်ကလည်း နွားထိုးကြီးမြို့နယ်၊ သာယာကုန်းရွာနားမှာ စစ်သားတွေပါလာတဲ့ အိမ်စီးကား ၃ စီးကို NPDF အဖွဲ့သားတွေက ပဒေသာမိုင်းနဲ့ ဖောက်ခွဲတိုက်ခိုက်ခဲ့ပါသေးတယ်။

စာတည်း – လင်း

နွားထိုးကြီး၊ ဧပြီ ၂၄၊ ၂၀၂၃။

မန္တလေးတိုင်းဒေသကြီး၊ နွားထိုးကြီးမြို့နယ်၊ သာယာကုန်းကျေးရွာ နွားထိုးကြီး-မြင်းခြံလမ်းပိုင်းမှာ အင်အား ၂၀ လော​က်နဲ့ စစ်ဆေးရေးလုပ်နေတဲ့ စစ်ကောင်စီတပ် တိုက်ခိုက်ခံရလို့ ၅ ဦးသေ ၂ ဦး ဒဏ်ရာရတယ်လို့ သိရပါတယ်။

ဧပြီလ ၂၃ ရက် မနက် ၁၀ နာရီဝန်းကျင်လောက်မှာ မင်းရွာဘက်ကနေလာတဲ့ စစ်ကောင်စီတပ်တွေဟာ လမ်းသွားလမ်းလာတွေကို ရှောင်တခင် စစ်ဆေးရေးလုပ်နေချိန်မှာ ဒရုန်းနဲ့ဗုံး ၂ လုံးချ တိုက်ခိုက်ခဲ့တယ်လို့ Myingyan District Drone Strike Teamတာဝန်ခံ ကိုအာမိုက ပြောပါတယ်။

“သူတို့က အဲနေရာမှာ အမြဲတမ်းစစ်ဆေးရေးဂိတ်ဆိုပြီး ဖွင့်ထားတာ မဟုတ်ဘူး။ သူတို့ငွေလိုတဲ့အခါကျရင် လာတယ်။ အဲနေရာက သစ်ပင်အောက်ကနေ လမ်းသွားလမ်းလာတွေကို စစ်တယ်။ ငွေတောင်းတယ်။ ဒီနေ့မှာ သူတို့ ငွေလာတောင်းမယ်ဆိုတာ သတင်းအတိအကျရလို့ ဒရုန်းနဲ့တိုက်ခိုက်ခဲ့တာ။ ထိခိုက်သေဆုံးအခြေနေကတော့ သေချာစောင့်ကြည့်ခဲ့လို့ သိရတာပါ” လို့ ပြောပါတယ်။

ဒရုန်းနဲ့တိုက်ခိုက်ခံရလို့ စစ်ကောင်စီတပ်သား ၅ ဦးသေဆုံးကာ ၂ ဦး ဒဏ်ရာရခဲ့တဲ့အတွက် နောက်ကရောက်လာတဲ့ စစ်ကောင်စီစစ်ကူအဖွဲ့တွေက သေဆုံးဒဏ်ရာရသူတွေကို ကားနဲ့တင်ပြီး နွားထိုးကြီးဘက်ကို ထွက်သွားတယ်လို့ ဆိုပါတယ်။

“ဒရုန်းဗုံးမကျခင်တော့ စကစ အဖွဲ့တွေက သစ်ပင်အောက်မှာရှိနေကြတာ။ ဗုံးကျတဲ့အချိန်မှာ အစတွေမှန်ပြီး ၅ ယောက်ကတော့ အဲနေရာမှာပဲ ငြိမ်ပြီး​​သေသွားတာ။ ၂ ယောက်ကတော့ ဒဏ်ရာရပြီး အော်နေလို့ ကားတွေနဲ့တင်ပြီး ယူသွားတာ” လို့ ပြောပါတယ်။

စစ်ကောင်စီတပ်သားတွေ တိုက်ခိုက်ခံရပြီး သေဆုံးထိခိုက်လို့ သာယာကုန်းကျေးရွာကို လေယာဥ်နဲ့ဗုံးကြဲချခိုင်းမယ်ဆိုကာ ခြိမ်းခြောက် ပြောဆိုသွားခဲ့တယ်လို့ သိရပါတယ်။

အဲဒီတိုက်ခိုက်မှုကိုတော့ Myingyan District Drone Strike Team နဲ့အတူ မဟာမိတ်တွေဖြစ်တဲ့ မြင်းခြံခရိုင် တပ်ရင်းအမှတ် ၁၊ မြင်းခြံခရိုင် တပ်ရင်းအမှတ် ၃၊ မြင်းခြံခရိုင် တပ်ရင်းအမှတ် ၄၊ မြင်းခြံခရိုင် တပ်ရင်းအမှတ် ၈၊ 27 revolutional force၊ ဗိုလ်စား ပြောက်ကျားတပ်ဖွဲ့တွေက ပူးပေါင်းတိုက်ခိုက်ခဲ့ကြတာပါ။

ဧပြီလ ၂၂ ရက် နေ့လည် ၁၂ နာရီလောက်က မြင်းခြံဘက်ကနေ နွားထိုးကြီးဘက်ကို အိမ်စီးကား ၃ စီးနဲ့လာတဲ့ စစ်ကောင်စီကားတန်းဟာ သာယာကုန်းကျေးရွာနားမှာ ပဒေသာမိုင်းနဲ့တိုက်ခိုက်ခံရပြီး ၁ ဦးသေ ၃ ဦး ပြင်းထန်ဒဏ်ရာရခဲ့တယ်လို့ သိရပါတယ်။

စာတည်း – ဇို

နွားထိုးကြီး၊ ဧပြီ ၁၅၊ ၂၀၂၃။

မန္တလေးတိုင်း၊ နွားထိုးကြီးမြို့၊ စစ်ကောင်စီတပ်စွဲထားတဲ့ မြို့နယ်လူဝင်မှု ကြီးကြပ်ရေး(လဝက)ရုံးနဲ့ အထွေထွေအုပ်ချုပ်ရေးရုံးတွေကို ဒရုန်းနဲ့ ဗုံးချတိုက်ခိုက်ခဲ့လို့ ထိခိုက်သေဆုံးမှုတွေရှိခဲ့တယ်လို့ သိရပါတယ်။

ဧပြီလ ၁၄ ရက် မနေ့မနက် ၁၀ နာရီခန့်မှာ အမှတ် ၁ ရပ်ကွက်မှာရှိတဲ့ လဝကရုံးကို ၆၀ မမ ဗုံးသီး ၂ လုံး၊ ထွေအုပ်ရုံးကို ၆၀ မမ ဗုံးသီး ၁ လုံးနဲ့ တိုက်ခိုက်ခဲ့တာလို့ Myingyan District Drone strike အဖွဲ့တာဝန်ရှိသူက မြေလတ်အသံကို ပြောပါတယ်။

“အဲ့ဒီနားက စုပေါင်းရုံးတွေလိုဖြစ်နေတာ၊ လူနေအိမ်နည်းပြီးရုံးတွေဘဲများတယ်။ လဝကရုံး ချတဲ့အချိန်မှာ ရုံးအရှေ့ဘက်နားက စကစတွေနေတဲ့နေရာနားကျပြီး သေတာရှိတယ်။ ထွေအုပ်ရုံးနားချတဲ့ အချိန်မှာ ရုံးနားကျပြီးတော့ ရဲမိသားစုတွေ ထိခိုက်သေဆုံးတာရှိတယ်”လို့ ပြောပါတယ်။

လဝကရုံးနဲ့ထွေအုပ်ရုံး ဗုံးချတိုက်ခိုက်ခံရလို့ စစ်ကောင်စီတပ်သား ၃ ဦးနဲ့ ရဲမိသားစုဝင် ၂ ဦး သေဆုံးခဲ့တယ်လို့ PDF တာဝန်ရှိသူကပြောပေမယ့် မြေလတ်အသံက သီးခြားအတည်ပြုနိုင်တာမျိုးမရှိသေးပါဘူး။

စစ်တပ်ထောက်ခံတဲ့ တယ်လီဂရမ်ချန်နယ်တွေမှာတော့ နွားထိုးကြီးမြို့ ထွေအုပ်ရုံးနဲ့ရဲစခန်းအနီး ဒရုန်းဗုံးကျရောက်ပေါက်ကွဲခဲ့တာကြောင့် ဒေသခံအမျိုးသား ၁ ဦးနဲ့ အမျိုးသမီး ၁ ဦး သေဆုံးတယ်လို့ ဖော်ပြထားပါတယ်။

ဒရုန်းနဲ့ဗုံးချတိုက်ခိုက်ခံရလို့ စစ်ကောင်စီတပ်သားတွေဘက်က ဒရုန်းတွေကို လိုက်ပစ်တာရှိသလို ဗုံးချခံရတဲ့နေရာတွေကို စစ်ကောင်စီနဲ့ရဲတွေ အင်အားဖြည့်ထပ်ရောက်လာပြီး စစ်ဆေးတာတွေလုပ်ဆောင်ခဲ့တယ်လို့ သိရပါတယ်။

အဲဒီတိုက်ခိုက်မှုကိုတော့ Myingyan District Drone strike အဖွဲ့နဲ့ Natogyi People Defence force မြင်းခြံခရိုင် အမှတ် ၄ တပ်ရင်းတို့က ပူးပေါင်းတိုက်ခိုက်ခဲ့တာ ဖြစ်တယ်လို့ ဆိုပါတယ်။

မတ်လ ၁၃ ရက်နေ့ကလည်း နွားထိုးကြီးမြို့ရှိ ထွေအုပ်ရုံးနဲ့လျှပ်စစ်ရုံး ဒရုန်းနဲ့ဗုံးချတိုက်ခိုက်ခံရလို့ ဝန်ထမ်း ၂ ဦးသေဆုံးပြီး ၅ ဦးဒဏ်ရာခဲ့သေးတယ်လို့ သိရပါတယ်။

စာတည်း-ရင်ငြိမ်း