ပေါက်

မကွေး၊ နိုဝင်ဘာ ၂၅၊ ၂၀၂၅။

မကွေးတိုင်း၊ ပေါက်မြို့နယ်နဲ့ မြိုင်မြို့နယ်ထဲက ကျေးရွာ ၅ ရွာကို စစ်ကော်မရှင်စစ်ကြောင်းတွေက နိုဝင်ဘာ ၁၈ ကနေ ၂၄ ရက်အတွင်းမီးရှို့ဖျက်ဆီးခဲ့တယ်လို့ ဒေသခံတွေဆီက သိရပါတယ်။

ကပစ ၂၄ ကထွက်လာတဲ့ အင်အား ၂၀၀ ကျော်ပါစစ်ကော်မရှင်စစ်ကြောင်းက နိုဝင်ဘာ ၁၈ ရက်မှာ ပေါက်မြို့နယ်၊ တယ်ပင်ရွာနဲ့ နိုဝင်ဘာ ၂၃ ရက်မှာ ကျောက်မဲတောင်ရွာတို့ကို မီးရှို့ ဖျက်ဆီးခဲ့တယ်လို့ ဆိုပါတယ်။

“ကပစ ၂၄ အနီးတဝိုက်မှာပဲ ရှိနေသေးတယ်။ ကျောက်မဲတောင်ကို မီးရှို့ပြီးမှ ပြန်ဆုတ်သွားတာပါ။”လို့ ဒေသခံတဦးက ဆိုပါတယ်။

အခုလိုမီးရှို့ဖျက်ဆီးခဲ့တာကြောင့် အိမ်ခြေ ၁၀၀ ဝန်းကျင်ရှိ ကျောက်မဲတောင်ရွာက နေအိမ် ၁၅ လုံး၊ အိမ်ခြေ ၈၀ ရှိ တယ်ပင်ရွာက နေအိမ် ၇ လုံးမီးလောင်ပျက်စီးခဲ့တယ်လို့ ဆိုပါတယ်။

လက်ရှိမှာတော့ စစ်ကြောင်းက ကပစ ၂၄ အနီးရှိ မျှားပိုင်းကျေးရွာအနီးမှာရှိနေပြီး စစ်ကြောင်းကြောင့် သီးခြောက်၊ သရဖီ၊ လယ်လန်း၊ မြေခြား၊ သရက်လေးပင်၊ သပွတ်စု၊ တောင်ချို၊ ဒေါင်းသာ၊ ကျောက်ကား၊ ကျားသိုက်၊ ခင်တန်းရှည်၊ ဆင်ဇာ၊ ပလောင်း၊ ကျောက်မဲတောင်၊ ကျောက်တံခါး၊ ခင်အေး၊ မျှားပိုင်း၊ အုန်းမှင်၊ တယ်ပင်၊ မကျီးကုန်း၊ ယောကုန်း၊ ထန်းပင်ချောင်းစတဲ့ ကျေးရွာက ဒေသခံတွေလည်း တိမ်းရှောင်နေရတယ်လို့ သိရပါတယ်။

ဒါ့အပြင် အဆိုပါစစ်ကြောင်းဟာ အောက်တိုဘာလနောက်ဆုံးပတ်ကစလို့ ပေါက်မြို့နယ်တောင်ပိုင်း လယ်လန်းက နေအိမ် ၃ လုံး၊ သရဖီကျေးရွာက နေအိမ် ၃၇ လုံး၊ သီးခြောက်ကျေးရွာက နေအိမ် ၁၀ လုံး၊ ဆင်ဇာရွာက နေအိမ် ၆ လုံး၊ ကျောက်ကာစစ်ရှောင်စခန်းက နေအိမ် ၃၀ ကိုမီးရှို့ပြီး ပြည်သူ ၅ ဦးကိုသတ်ကာ ၅ ဦးကိုဖမ်းဆီးခဲ့သေးတယ်လို့ ဒေသခံတဦးက ပြောပါတယ်။

အလားတူ နိုဝင်ဘာ ၂၄ ရက် မနေ့ကညနေဘက်မှာ မြိုင်မြို့နယ်၊ တဲကြီးကျေးရွာကို ရောက်နေတဲ့ စစ်ကြောင်းက ရွာထဲကနေအိမ်တွေကိုမီးရှို့ခဲ့တယ်လို့ ဆိုပါတယ်။

တဲကြီးကျေးရွာကို ရောက်ရှိနေတဲ့စစ်ကြောင်းဟာ နိုဝင်ဘာ ၂၃ ရက်မှာ တဲကြီးကျေးရွာနဲ့ ၂ မိုင်ခန့်အကွာရှိ ပေါက်မြို့နယ် နယ်သတ်ရွာက နေအိမ် ၂ လုံးကို မီးရှို့ ဖျက်ဆီးခဲ့ပြီး မနေ့ကညနေပိုင်းမှာ ဒေသတော်လှန်ရေးတပ်တွေနဲ့ တိုက်ပွဲဖြစ်ပြီးနောက် တဲကြီးရွာကိုမီးရှို့ခဲ့တာလို့ သိရပါတယ်။

“ထပ်ရှို့တယ် သိရတာ။ စစ်ကြောင်းက အဲ့ရွာထဲမှာရှိနေတာဆိုတော့ ဘယ်လောက်လောင်တယ် ဘယ်လောက်ကုန်သွားတယ်ဆိုတာကို ကျနော်တို့ကသေသေချာချာ သိလို့မရဘူး။ မနေ့ကလည်း ရှို့တယ် “လို့ ဒေသခံတဦးက ဆိုပါတယ်။

နိုဝင်ဘာ ၂၅ ရက်ဒီမနက်ပိုင်းမှာတော့ တဲကြီးရွာကိုရောက်နေတဲ့စစ်ကြောင်းက ရွာရဲ့ တောင်ဘက်ပိုင်း ဆီကို အထွက်ပြနေတယ်လို့ ဒေသခံတွေဆီက သိရပါတယ်။

တမခ ၁၀၁၊ ခလရ ၄၁၈ နဲ့ ခလရ ၄၁၉ ကစစ်ကော်မရှင်တပ်သားတွေပါဝင်ပြီး မြိုင်နဲ့ ပေါက်မြို့နယ်အစပ်ရှိ တဲကြီး၊ နသတ်၊ ကံသတ်၊ ကမ္ဘားဖြူ၊ ကျောက်ခွက် စတဲ့ကျေးရွာတွေကို နို၀င်ဘာ ၁၉ ရက်ကစလို့ စစ်ကြောင်းထိုးကာ ကျေးရွာတွေကိုမီးရှို့နေပြီး ဒေသခံကာကွယ်ရေးတပ်တွေနဲ့လည်း မကြာခဏထိတွေ့ ပစ်ခတ်မှုတွေဖြစ်နေတာပါ။

စစ်အာဏာသိမ်းချိန်ကနေ ၂၀၂၅၊ မေလကုန်ပိုင်းအထိ မကွေးတိုင်းအတွင်းက အရပ်သားနေအိမ်ပေါင်း ၁၆,၄၇၀ လုံး မီးရှို့ဖျက်ဆီးခံထားရတယ်လို့ သုသေသနအဖွဲ့တခုဖြစ်တဲ့ Data for Myanmar ရဲ့ နိုဝင်ဘာ ၂၂ ရက်ထုတ်အစီရင်ခံစာမှာ ဖော်ပြထားပါတယ်။

စာတည်း – လင်း

မြေလတ်အသံ၊ နိုဝင်ဘာ ၁၀၊ ၂၀၂၅။

မကွေးတိုင်း၊ ဆားလင်းကြီးမြို့နယ်နဲ့ ပေါက်မြို့နယ်အတွင်းရောက်ရှိနေတဲ့ စစ်ကြောင်းတွေကနေ စစ်ကော်မရှင်တပ်ဖွဲ့ဝင် ၄ ဦး ဒေသခံကာကွယ်ရေးတပ်တွေဆီဘက်ပြောင်းလာတယ်လို့ သက်ဆိုင်ရာတပ်ဖွဲ့တွေဆီက သိရပါတယ်။

ဆားလင်းကြီးမြို့နယ်၊ ဝက်မှေးကျေးရွာမှာ အထိုင်ချတပ်စွဲထားတဲ့စစ်ကြောင်းက အသက် ၃၁ အရွယ် စစ်ကော်မရှင်တပ်သား ၁ ဦး နိုဝင်ဘာ ၉ ရက်မှာ မြို့နယ်၊ ရပ်ကျေးပကဖအဖွဲ့တွေနဲ့ ချိတ်ဆက်ပြီး ဘက်ပြောင်းလာခဲ့တယ်လို့ ဆားလင်းကြီးမြို့နယ်ပကဖရဲ့ပြောရေးဆိုခွင့်ရှိသူက ဆိုပါတယ်။

“ရပ်ကျေးပကဖတွေနဲ့ ချိတ်ဆက်ပြီးဝင်လာတာပါ။ စစ်ကြောင်းရောက်တာကတော့ ၁ လနီးပါး ရှိနေပြီ။ ဝက်မှေး၊ ကံတောမှာတော့ စစ်ကူဆိုပြီးပို့လိုက်တာ ၁၀ ရက်ကျော်ခန့် ရှိနေပြီလို့ သိရတယ်”လို့ ဆိုပါတယ်။

ဘက်ပြောင်းလာချိန် ကျည်ဘောက် ၂ ခု၊ ကျည်တောင့် ၁၈၀ ယူလာပြီး ဒေသခံကာကွယ်ရေးတပ်ဖွဲ့ဝင်တွေနဲ့အတူ စစ်ကော်မရှင်ကိုဆက်လက်တော်လှန်သွားမယ်လို့ ပြောဆိုကြောင်း ဆားလင်းကြီးမြို့နယ်ပြည်သူ့ကာကွယ်ရေးရဲ့ပြောရေးဆိုခွင့်ရှိသူက ဆိုပါတယ်။

၂၀၂၁၊ စစ်အာဏာသိမ်းချိန်ကနေ လက်ရှိအချိန်ထိ ဆားလင်းကြီး ပကဖဆီကို ဘက်ပြောင်းလာတဲ့ စစ်သားနဲ့ရဲ စုစုပေါင်း ၂၀ ဦးရှိပြီလို့ သိရပါတယ်။

အလားတူ နိုဝင်ဘာ ၁ ရက်နဲ့ နိုဝင်ဘာ ၆ ရက်မှာလည်း ပေါက်မြို့နယ်အတွင်းရောက်နေတဲ့ စစ်ကော်မရှင်စစ်ကြောင်းကနေ တပ်သား ၃ ဦးဘက်ပြောင်းလာခဲ့တယ်လို့ ပေါက်မြို့နယ် ပြည်သူ့ကာကွယ်ရေးအဖွဲ့တာဝန်ရှိသူက ပြောပါတယ်။

“ဒီတိုင်းတွေ့တာပါ ကျနော်တို့ မြို့နယ် ပကဖ မှာ ၃ ယောက်ရှိပါပြီ၊ အလင်းဝင်ထားတဲ့သူတွေကို ဖမ်းဆီးချုပ်နှောင်ခြင်းမရှိဘဲ စောင့်ကြည့်ပုံစံမျိုးနဲ့ ကောင်းကောင်းမွန်မွန် ကျွေးမွေးအနားယူခိုင်းထားပါတယ်ခင်ဗျ။ စိတ်ချရတဲ့အချိန်တခုရောက်ရင်တော့ သူတို့ဆန္ဒအတိုင်းလုပ်ပေးနိုင် မလုပ်ပေးနိုင်တာကို တိုင်ပင်ပြီးဆက်လက်လုပ်ဆောင်ပေးမှာပါ” လို့ ဆိုပါတယ်။

နိုဝင်ဘာ ၁ ရက်မှာ ခမရ ၁၀၉ လက်အောက်ခံ တပ်သား ၁ ဦးနဲ့ ခမရ ၄၁၉ လက်အောက်ခံတပ်သား ၁ ဦးတို့ဟာ လက်နက်ခဲယမ်းတွေနဲ့ စစ်ကြောင်းကနေထွက်ပြေးပြီးဘက်ပြောင်းလာခဲ့ကြတယ်လို့ ဆိုပါတယ်။

ထွက်ပြေးလာစဥ် ၎င်းတို့မှာ RPG ၁ လက်၊ အဖူး ၄ ဖူး၊ MA 4 ၁ လက်၊ ၄၀ မမ ၁၂ လုံး၊ လက်ပစ်ဗုံး ၂ လုံး၊ ၅.၅၆ ကျည် ၁၀၀ ထောင့် G3 ကျည် ၁၉ ထောင့်ပါ ယူဆောင်လာခဲ့တယ်လို့ သိရပါတယ်။

ဒါ့အပြင် နိုဝင်ဘာ ၆ ရက်မှာလည်း ခမရ ၁၄ က စစ်ကော်မရှင်တပ်သား ၁ ဦး၊ MA 1 ၁ လက်၊ ကျည်ဘောက် ၃ ဘောက်၊ 5.56 ကျည် ၁၀၀၊ အီနာဂါ ၁ လုံး၊ လက်ပစ် ၁ လုံးနဲ့ RPG ၁ ဖူးနဲ့အတူ ဘက်ပြောင်းလာခဲ့တာလို့ ပေါက်မြို့နယ် ပြည်သူ့ကာကွယ်ရေးအဖွဲ့တာဝန်ရှိသူ ကပြောပါတယ်။

“သူက စစ်ကြောင်းအတွင်းကနေထွက်ပြေးလာပြီး ကျနော်တို့ နယ်မြေခံ ပကဖ တွေက တွေ့ရှိခဲ့တာပါ။ တွေ့တွေ့ချင်းမှာလည်း သူက ကျနော်တို့ဘက်ကို အလင်းဝင်ဖို့ ပြေးလာတာပါလို့ ပြောပါတယ်”လို့ ဆိုပါတယ်။

ပေါက်မြို့နယ်ထဲကကျေးရွာတွေမှာ စစ်ကော်မရှင်တပ်က ဆက်တိုက်ဆိုသလိုစစ်ကြောင်းထိုးနေပြီး ဒေသခံတွေအနေနဲ့လည်း လေကြောင်းနဲ့ လက်နက်ကြီးအန္တရာယ်ကို သတိထားကြဖို့ ပေါက်မြို့နယ်ပြည်သူ့ကာကွယ်ရေးအဖွဲ့က သတိပေးထားပါတယ်။

စာတည်း – လင်း

ပေါက်၊ နိုဝင်ဘာ ၂၊ ၂၀၂၅။

မကွေးတိုင်း၊ ပေါက်မြို့နယ်၊ ချက်ကန်ရွာထဲမှာမီးရှို့နေတဲ့ စစ်ကော်မရှင်တပ်ဖွဲ့ဝင် ၃ ဦးကို ဒေသခံကာကွယ်ရေးတပ်တွေက ဝင်ဖမ်းပြီး လက်နက်တွေလည်းသိမ်းဆည်းခဲ့တယ်လို့ Young Revolution Force ဆီက သိရပါတယ်။

တပ်မ ၉၉ လက်အောက်ခံ အမှတ် ၁၀၉ ခြေမြန်တပ်ရင်းက အဆိုပါစစ်ကော်မရှင်တပ်သား ၃ ဦးက ချောက်ကန်ရွာထဲမှာမီးရှို့နေစဥ် အောက်တိုဘာ ၃၁ ရက် မနက် ၅ နာရီဝန်းကျင်မှာ ဝင်ရောက်ဖမ်းဆီးခဲ့တာလို့ ဆိုပါတယ်။

“ကျနော်တို့ သေနတ် ၁ ချက်မဖောက်ရဘဲနဲ့ ဖမ်းဆီးနိုင်ခဲ့တာ၊ ကျနော်တို့က ဒီအတိုင်းပဲဝင်ဖမ်းလိုက်တာ၊ သေနတ်မပစ်လိုက်ရဘူး၊ ချက်ကန်ကျေးရွာထဲမှာပဲ အရှင်ဖမ်းမိခဲ့တာ၊ သူတို့ မီးရှို့တဲ့သူက မီးရှို့နေပြီ၊ သူတို့ မီးရှို့တာက အိမ်ကောင်းကြီးတွေ အိမ်မကြီးတွေတော့ မရှို့ဘူး၊ သူတို့ မီးဖိုချောင်တွေ နွားစာတဲတွေ ရှို့တာတော့ ၇ လုံးလောက်ရှိတယ်” လို့ Young Revolution Force သတင်းတာဝန်ခံက ပြောပါတယ်။

သူတို့ဆီကနေ MA 2 ၁ လက်၊ MA 3 ၁ လက်၊ လက်ပစ်ဗုံး ၅ လုံး၊ နင်းမိုင်း ၃ လုံး၊ ၆၀ မမဗုံးသီး ၅ လုံး၊ အီကွေ့မန့် ၁ ခု၊ ကျည်ကာဦးထုပ် ၃ လုံး၊ ကျည်ဘောက် ၁၁ ခု၊ ကျည်မျိုးစုံ ၁၃၀၀ ကျော်၊ စစ်ဝတ်တန်ဆာတွေရရှိခဲ့ပြီး ဖမ်းဆီးခံ ၃ ဦးကိုတော့ စစ်ဆေးမေးမြန်းနေဆဲဖြစ်တယ်လို့ သိရပါတယ်။

ဒီဖမ်းဆီးခဲ့တာကို Young Revolution Force ဦးဆောင်ပြီး ပခုက္ကူခရိုင် အမှတ် ၁၂ တပ်ရင်းက ပူးပေါင်း ပါဝင်ခဲ့တယ်လို့ သိရပါတယ်။

စကခ ၁၄၊ ခမရ ၁၀၉၊ ခမရ ၄၁၉ စတဲ့တပ်ရင်းတွေက အင်အား ၄၀၀ ကျော်ပါတဲ့စစ်ကြောင်းက အောက်တိုဘာ ၂၉ ရက်မှာ ကပစ ၂၂ ကနေထွက်လာပြီးနောက် ဆိပ်ဖြူမြို့နယ်၊ ရေထွက်ရွာမှာ ညအိပ်စခန်းချခဲ့တယ်လို့ ဆိုပါတယ်။

အဲ့ဒီနောက် အောက်တိုဘာ ၃၀ ရက်မှာ စစ်ကြောင်းက ပေါက်မြို့နယ်၊ ရှားပင်ရွာနဲ့ ပုတီးရွာကို စစ်ကြောင်းထိုးခဲ့ပြီး အဲ့ဒီကတဆင့် အောက်တိုဘာ ၃၁ ရက်မနက် ၄ နာရီဝန်းကျင်မှာ ချက်ကန်ရွာကို ဝင်ရောက်ခဲ့တယ်လို့ အထက်ပါသတင်းတာဝန်ခံက ပြောပါတယ်။

ချက်ကန်ရွာကိုစစ်ကြောင်းဝင်ကတည်းက တော်လှန်ရေးတပ်တွေဖွဲ့တွေဘက်ကလည်း အဲ့ဒီစစ်ကြောင်းအခြေအနေကိုစောင်ကြည့်နေခဲ့ကာ မနက် ၅ နာရီဝန်းကျင် ရွာကနေစစ်ကြောင်းပြန်ထွက်သွားကြချိန်မှာ မီးရှို့ဖို့ကျန်ခဲ့ကြတဲ့ စစ်ကော်မရှင်တပ်ဖွဲ့ဝင် ၃ ဦးကို ဝင်ဖမ်းလိုက်တာလို့ ဆိုပါတယ်။

“ချက်ကန်ရွာရဲ့ အရှေ့ပိုင်းအတိုင်းဝင်လာတဲ့ အချိန်မှာ ကျနော်တို့တပ်ဖွဲ့တွေက ချက်ကန်ရွာရဲ့တောင်ဘက် ပုတီးရွာမှာရှိတယ်၊ သူတို့က ပုတီးရွာကို မဝင်ဘဲနဲ့ ပုတီးရွာမြောက်ဘက်အတိုင်း ချက်ကန်ရွာဘက်ကို သွားတာ၊ စစ်ကြောင်းနောက်ကနေ ကျနော်တို့ တပ်ဖွဲ့တွေ အကုန်ကပ်လိုက်တာ” လို့ သူကပြောပါတယ်။

ချက်ကန်ရွာကိုစစ်ကြောင်းလာချိန်မှာလည်း ချက်ကန်ရွာအနီး တာဝါတိုင်လမ်းစုံမှာ အမျိုးသား ၄ ဦးကို ဖမ်းဆီးပြီး ကား ၂ စီးကိုချောဆွဲသွားတယ်လို့ သိရပါတယ်။

လက်ရှိမှာတော့ စစ်ကြောင်း ၂ ကြောင်းခွဲပြီး ဒီးတုတ်ကွင်းနဲ့ တပ်ကုန်းရွာတို့ကိုဝင်ရောက်ပြီး နိုဝင်ဘာ ၂ ရက် ဒီညအထိတပ်စွဲနေကြတယ်လို့ သိရပါတယ်။

စာတည်း – လင်း

မြေလတ်အသံ၊ အောက်တိုဘာ ၁၄၊ ၂၀၂၅။

မကွေးတိုင်း၊ ပေါက်မြို့နယ်၊ တပ်ကုန်းရွာပျူစောထီးတပ်ဖွဲ့ဝင်တွေကို ထမင်းချက်ကျွေးနေတဲ့ သက်ကြီးပိုင်းအမျိုးသားတဦးကို ဖမ်းမိထားတယ်လို့ ပေါက်မြို့နယ်တောင်ပိုင်းနဂါးပြောက်ကျားတပ်ဖွဲ့ (ပကဖ) က ပြောပါတယ်။

အဖမ်းခံရသူမှာ တပ်ကုန်းရွာခံ အသက် ၇၀ ကျော်အရွယ်ရှိ ဦးပွေး ဖြစ်ပြီး အောက်တိုဘာ ၁၂ ရက် မနက် ၉ နာရီကျော်မှာ ကျေးရွာအနီးတောထဲကို မှိုရှာထွက်လာစဥ် ကင်းပတ်နေတဲ့ဒေသကာကွယ်ရေးတပ်ဖွဲ့ဝင်တွေက တောတွင်းတနေရာမှာ ဖမ်းမိခဲ့တာလို့ ဆိုပါတယ်။

” ပျူစောထီးရွာမှာနေပြီး ကင်းတွေမှာ နေထိုင်သူ။ ပျူစောထီးအားပေးနေတာ။ ထမင်းချက်ကျွေးနေတာ ကင်းမှာ။ သူက ၂၀၁၀ ကတည်းက စစ်တပ်ထောက်ခံလာတာဗျ။ သူက မှိုရှာထွက်လာရင်း မိတာပါ။ ဓားတလက်တော့ပါတယ် “လို့ ပေါက်မြို့နယ်တောင်ပိုင်းနဂါးပြောက်ကျားတပ်ဖွဲ့(ပကဖ)တာဝန်ခံက ပြောပါတယ်။

တပ်ကုန်းကျေးရွာမှာ ပျူစောထီးအထိုင်စခန်းချထားကာ စစ်ကော်မရှင်တပ်ဖွဲ့ဝင် ၃၀ ဦး နဲ့ ပျူစောထီးတပ်ဖွဲ့ဝင် ၂၅ ဦးတပ်စွဲနေပြီး ပျူစောထီးအားကောင်းတဲ့ အိမ်ခြေ ၄၀၀ ခန့်ရှိကျေးရွာဖြစ်တယ်လို့ သူသိရပါတယ်။

လက်နက်ထုတ်လုပ်ရေးစက်ရုံ ကပစ ၂၄ အခြေစိုက်ထားတဲ့ ပေါက်မြို့နယ်မှာ ပျူစောထီးအင်အားကောင်းတဲ့ကျေးရွာအများအပြားရှိနေသလို ဒေသတွင်းမှာလည်း ပျူစောထီးတွေကဦးဆောင်ပြီး ကျေးရွာတွေကို စစ်ကြောင်းထိုးနေတာပါ။

ဦးပွေးရဲ့ ထွက်ဆိုချက်အရ တပ်ကုန်းရွာဒေသခံတွေဟာ စားနပ်ရိက္ခာပြတ်လပ်နေကြတာကြောင့် ကျေးရွာအနီးရှိ တောတောင်တွေမှာ မှိုနဲ့ ပျားတွေအပါအဝင် တောတွင်းအလေ့ကျပေါက်တဲ့ အသီးအရွက်တွေကို ရှာဖွေစားသောက်နေကြရတယ်လို့ အထက်ပါတာဝန်ခံက ပြောပါတယ်။

လက်ရှိမှာ ဦးပွေးကို ထိန်းသိမ်းပြီး စစ်ဆေးမေးမြန်းနေဆဲဖြစ်ကာ စစ်ဆေးမှုတွေပြီးဆုံးရင် သက် ဆိုင်ရာတရားရေးအဖွဲ့ ထံကို လွှဲပြောင်းပေးသွားဖြစ်တယ်လို့လည်း သိရပါတယ်။

စာတည်း – ဟိန်းစံ