■ ပေါက်နဲ့မြိုင်မှာ လေယာဉ်ဗုံးကြောင့် ၇ ရက်အတွင်း ဒုတိယအကြိမ်မြောက် လူဆယ်နဲ့ချီသေဆုံးမှုဖြစ်

ပခုက္ကူ၊ မတ် ၃၊ ၂၀၂၅။

မကွေးတိုင်း၊ ပခုက္ကူခရိုင်၊ ပေါက်နဲ့ မြိုင်မြို့နယ်အစပ်က လက်ပံတိုရေနံမှော်နဲ့ ရွာတွေကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့လို့ လူ ၁၃ ဦးထက်မနည်းသေဆုံးပြီး ဒဏ်ရာရသူတွေများပြားခဲ့တယ်လို့ ပြည်သူ့ကာကွယ်ရေးတပ်ဖွဲ့-မြိုင်မြို့နယ်ဆီက သိရပါတယ်။

မြိုင်မြို့နယ် ဆိတ်ချေး၊ ဂျုတ်ကုန်း၊ဘောင်ဘင်၊ ညောင်ကုန်း၊ ဆူးဝင်းနဲ့ တောရွာ၊ ပေါက်မြို့နယ် သရက်ကန်၊ ဆုံကုန်း၊ လက်ပံတိုရွာတွေကို မတ် ၃ ရက် မနက်အစောပိုင်း ၁ နာရီခွဲကနေ ၂ နာရီခွဲအတွင်းမှာ တိုက်လေယာဉ်၊ Y 12 လေယာဉ်တွေနဲ့ ၉ ကြိမ် ဗုံးကြဲတိုက်ခိုက်ခဲ့တာလို့ ဆိုပါတယ်။

“အဲ့ဒီရွာတွေမှာ PDF စခန်းလည်းမရှိပါဘူး၊ ပြည်သူတွေပဲနေတဲ့ရွာတွေ။” လို့ မြိုင်ပကဖတာဝန်ရှိသူတဦးက ပြောပါတယ်။

ဗုံးကြဲတိုက်ခိုက်မှုကြောင့် လက်ပံတိုရေနံမှော်က ၆ ဦး၊ ဘော်ဘင်ရွာက ၄ ဦး၊ သရက်ကန်ရွာက ၃ ဦးအပါစုစုပေါင်း ဒေသခံအရပ်သား အမျိုးသား၊ အမျိုးသမီး ၁၃ ဦးထက်မနည်း သေဆုံးထားပြီး သေဆုံးသူတွေရဲ့ အသေးစိတ်အချက်အလက်တွေကိုတော့ မသိရသေးပါဘူး။

ဒါ့အပြင် ဗုံးကြဲတိုက်ခိုက်ခံရမှုအတွင်း နောက်ထပ်ဒေသခံ ၁၅ ဦးထက်မနည်း ဒဏ်ရာရရှိထားကာ ဒဏ်ရာရ သူတွေကို ဆေးဝါးကုသပေးနေတယ်လို့ သိရပါတယ်။

ပြီးခဲ့တဲ့ ဖေဖော်ဝါရီ ၂၅ ရက်မှာလည်း ပေါက်မြို့နယ်၊ ဆုံကုန်းရွာဘုန်းကြီးကျောင်းမှာ ပြုလုပ်တဲ့ PDF တပ်ဖွဲ့ဝင်တဦးရဲ့ မင်္ဂလာဆောင် လေယာဉ်ဗုံးကြဲခံရလို့ လူဆယ်နဲ့ချီသေဆုံးခဲ့လို့ စစ်ကောင်စီရဲ့လေကြောင်းတိုက်ခိုက်မှုကြောင့် ၇ ရက်အတွင်း ဒုတိယအကြိမ်မြောက် လူဆယ်နဲ့ချီသေဆုံးခဲ့တာလည်း ဖြစ်ပါတယ်။

စာတည်း – ဟိန်းစံ

ပေါက်၊ ဖေဖော်ဝါရီ ၂၅၊ ၂၀၂၅။

ဒိန်းဂျား ၊ ဟိန်းစံ

မကွေးတိုင်း၊ ပေါက်မြို့နယ်အပိုင် ပေါက်နဲ့မြိုင်အစပ်ရှိ ဆုံကုန်းရွာဘုန်းကြီးကျောင်းမှာ ပြုလုပ်တဲ့ မြိုင်ပကဖတပ်ဖွဲ့ဝင် ၁ ဦးရဲ့မင်္ဂလာဆောင် လေယာဥ်ဗုံးကြဲခံရလို့ လူ ၂၃ ဦးထက်မနည်းသေဆုံးပြီး ၁၀ ဦးကျော် ဒဏ်ရာရရှိခဲ့တယ်လို့ ဒေသခံတွေနဲ့ ကာကွယ်ရေးတပ်ဖွဲ့ဝင်တွေထံက သိရပါတယ်။

အဆိုပါဘုန်းကြီးကျောင်းကို ဖေဖော်ဝါရီ ၂၅ ရက် ဒီကနေ့ မနက် ၁၀ နာရီခန့်မှာ တိုက်လေယာဥ်နဲ့ ပေါင် ၃၀၀ ဗုံး ၁ လုံး ၊ ၁၀ နာရီခွဲခန့်မှာ တိုက်လေယာဥ်ပါ ရော့ကတ်ဒုံး ၄ လုံးနဲ့ ၂ ကြိမ် ဗုံးကြဲပစ်ခတ်တိုက်ခိုက်ခဲ့တာလို့ မြိုင်မြို့နယ်PDFတာဝန်ခံ ဗိုလ်လက်ယာက ပြောပါတယ်။

မြေပြင်အခြေအနေကို သိရှိထားတဲ့ မြိုင်မြို့ခံတဦးကလည်း ဗုံးကြဲတိုက်ခိုက်ခံရတာကြောင့် မင်္ဂလာဆောင်ပွဲမှာရှိနေတဲ့ လူ ၂၃ ဦးအထိ သေဆုံးထားပြီး ၁၀ ဦးကျော် ဒဏ်ရာရထားတယ် လို့ပြောပါတယ်။

“ လောလောဆယ် သေဆုံး ၂၃ ဦးရှိပြီ “ လို့ ၎င်းက ပြောပါတယ်။

လက်ရှိမှာ သေဆုံးနဲ့ဒဏ်ရာရသူတွေကို ကောက်ယူကာ ဆေးရုံပို့တာတွေ လုပ်ဆောင်နေဆဲဖြစ်လို့ သေဆုံးသူတွေဟာ ဘယ်သူဘယ်ဝါတွေဆိုတာတော့ မသိရသေးဘူးလို့ ဆိုပါတယ်။

လေကြောင်းဗုံးကြဲခံရတဲ့နေရာဟာ မြိုင်နဲ့ပေါက်နယ်အစပ်ရှိ ရေနံမှော်တွေအနီးကကျေးရွာဖြစ်ပြီး စစ်ကောင်စီက ဒေသအချို့မှာ နိုင်ငံပိုင်သယံဇာတပစ္စည်းတွေ တူးဖော်သုံးစွဲနေမှုကို လိုအပ်သလိုတိုက်ဖျက်မယ်လို့ ၎င်းတို့ထိန်းချုပ်မီဒီယာတွေကနေတဆင့် ဖေဖော်ဝါရီ ၂၀ ရက်မှာ ထုတ်ပြန်လာပြီးတဲ့နောက် ရေနံမှော်အနီးကျေးရွာတွေကို လေကြောင်းတိုက်ခိုက်မှုပြုလုပ်လာတာလည်း ဖြစ်ပါတယ်။

မကွေး၊ ဇူလိုင် ၁၁၊ ၂၀၂၄။

စစ်တပ်နဲ့ပျူစောထီးတွေအုပ်ချုပ်ထားတဲ့ မကွေးတိုင်း၊ ပေါက်မြို့နယ်၊ တရော်ကိုင်းကျေးရွာကနေ ကလေး ၄ ဦးအပါအဝင် ဒေသခံ ၁၀ ဦး ဇူလိုင် ၉ ရက်မှာ ထွက်ပြေးခိုလှုံလာတယ်လို့ မြိုင်မြို့နယ် ပြည်သူ့ကာကွယ်ရေး တပ်ဖွဲ့ဆီက သိရပါတယ်။

ခိုလှုံလာသူတွေဟာ အသက် ၅၈ နှစ်အရွယ် ဒေါ်မြင့်ရီ၊ ၄၂ နှစ်အရွယ် ဦးကျော်လွင်၊ ၃၁ နှစ်အရွယ် မခင်သက်လွင်၊ ၁၆ နှစ်အရွယ် မင်းထက်ထက်ဝေ၊ ၁၆ နှစ်အရွယ် မခိုင်နှင်းဦး၊ ကိုရင် ဖက်တီး၊ အသက် ၁၄ နှစ်အရွယ် နေလင်းဦး၊ ၁၀ နှစ်အရွယ် ဟိန်းသန့်ဖြိုး၊ ၈ နှစ်အရွယ် ဘုန်းလျှံဖြိုးနဲ့ ၅ နှစ်အရွယ် ဟိန်းသန့်စိုးတို့ ဖြစ်ပါတယ်။

“သူတို့ကို ပျူစောထီးလိုတော့ မသတ်မှတ်ပါဘူး။ ရွာထဲကနေမထွက်ရဲလို့ မထွက်နိုင်လို့နေကြရတာ။ အခုတော့ အစာရေစာပြတ်တော့ ထွက်ကြတော့တာ။ ထွက်ပြေးလာတဲ့သူတွေကို **တွေနဲ့ဝေးတဲ့နေရာ နေရာထိုင်ခင်း လုပ်ပေးထားတယ်။ ရေရှည်မှာ အလုပ်ပေးနိုင်အောင်တော့ စီစဉ်နေတယ်။” လို့ မြိုင်ပကဖတာဝန်ခံ ဗိုလ်လက်ယာက ပြောပါတယ်။

တရော်ကိုင်းကျေးရွာမှာ စစ်ကောင်စီတပ်သားနဲ့ပျူစောထီး ၁၀၀ ကျော်ရှိပြီး ဒေသခံတွေကိုလည်း ကျေးရွာအတွင်း အလှည့်ကျကင်းစောင့်ခိုင်းတာအပြင် ရိက္ခာလည်းလုံလုံလောက်လောက်မရရှိဘူးလို့ ဆိုပါတယ်။

“နေထိုင်စားသောက်ရတာက ဆန်ကိုပြည့်ပြည့်စုံစုံမရှိဘူး။ ဆီ ဆား ငရုတ် ကြက်သွန်တွေ ခက်ခဲတယ်။ ထမင်းမစားရတာလည်းကြာပြီ။ ပဲပြုတ်တွေနဲ့ပဲ စားနေရတာ” လို့ ထွက်ပြေးလာသူတွေရဲ့ အခြေအနေကို ဗိုလ်လက်ယာက ပြန်ပြောပြပါတယ်။

အခုထွက်ပြေးလာသူတွေဟာ ဆွေမျိုးတော်စပ်သူတွေဖြစ်ပြီး မြိုင်ပကဖ အဖွဲ့ဝင်တွေနဲ့ချိတ်ဆက်ကာ သူတို့ကို ကင်းစောင့်ခိုင်းတဲ့အချိန်မှာ ထွက်ပြေးလာခဲ့ကြတာလို့ ဆိုပါတယ်။

“အခုပြေးလာတဲ့သူတွေကတော့ နှစ်ဝမ်းကွဲ၊ သုံးဝမ်းကွဲအပြန်အလှန်တော်ကြတာ။ သူတို့ကရွာထဲမှာ တရက်ခြား နှစ်ရက်ခြား ကင်းစောင့်ရတယ်။ သူတို့ကင်းစောင့်ရတဲ့အချိန်မှာ ထွက်ပြေးလာကြတာ။ သူတို့ကို ကျနော်တို့က မီတာ ၄၀၀ အကွာကစောင့်တာဆိုတော့ သူတို့ အခက်အခဲ မရှိပါဘူး၊” လို့ ဆိုပါတယ်။

တရော်ကိုင်းကျေးရွာအနီးက ဇီးပြားကျေးရွာမှာလည်း စစ်သားနဲ့ပျူစောထီးတွေ အင်အား ၁၀၀ ကျော် တပ်စွဲထားပြီး ၂ ရွာလုံးက ပျူစောထီးအားကောင်းတဲ့ကျေးရွာတွေဖြစ်တယ်လို့လည်း သိရပါတယ်။

မြိုင်မြို့နယ်ပကဖဆီမှာ တရော်ကိုင်းရွာကနေထွက်ပြေးလာသူ ၁၈ ဦးနဲ့ ဇီးပြားရွာက လက်နက်ကိုင် ပျူစောထီး ၁ ဦး စုစုပေါင်း ၁၉ ဦးထွက်ပြေးခိုလှုံနေကြတယ်လို့လည်း ဗိုလ်လက်ယာက ပြောပါတယ်။

စာတည်း – လင်း

မကွေး၊ ဇွန် ၁၈၊ ၂၀၂၃။

မကွေးတိုင်း၊ ပခုက္ကူခရိုင်၊ ပေါက်မြို့နယ်၊ ရေပြာရဲစခန်းက ရဲတပ်ကြပ်တဦးကို ဇွန်လ ၁၇ ရက်မနေ့က ပစ်ခတ်ရှင်းလင်းခဲ့တယ်လို့ ပေါက်ဒေသကာကွယ်ရေးအဖွဲ့ဆီက သိရပါတယ်။

အသက် ၃၀ နှစ်အရွယ် ရဲတပ်ကြပ် ရန်နိုင်အောင် (ခေါ်) မဲလုံးကို ရဲစခန်းဂိတ်အနီးမှာ စကားပြောနေချိန် သေနတ်နဲ့ ၂ ချက် ပစ်ခတ်ရှင်းလင်းခဲ့တာလို့ သိရပါတယ်။

“မနေ့ညနေပိုင်းက ရှင်းခဲ့တာဗျ။ ခန္ဒာကိုယ်အရှေ့ပိုင်းကို နှစ်ချက်ပစ်လိုက်တယ်။ အဲဒီနေရာမှာပဲ လဲကျသွားတယ်။ ဘေးနားကလူတွေတော့ မထိခိုက်ပါဘူး” လို့ ပေါက်ဒေသကာကွယ်ရေး ရဲဘော်တဦးက ပြောပါတယ်။

ရဲတပ်ကြပ် ရန်နိုင်အောင်ဟာ ခရီးသွားပြည်သူတွေဆီကနေ ငွေတောင်းယူတာ၊ စစ်ကောင်စီ စစ်ကြောင်းနဲ့ အတူ ကျေးရွာတွေကို မီးရှို့ဖျက်ဆီးရာမှာလည်း လိုက်ပါတာတွေ ရှိတာကြောင့် ရှင်းလင်းခဲ့တာဖြစ်သလို အလောင်းကိုတော့ ညပိုင်းရောက်မှ ရဲစခန်းထဲကို သယ်သွားကြတယ်လို့ သူက ဆက်ပြောပါတယ်။

ပေါက်မြို့နယ်ကကျေးရွာတွေကို စစ်ကောင်စီတပ်ဖွဲ့ဝင်တွေနဲ့ ပျူတွေက မကြာခဏ စစ် ကြောင်းထိုးတာတွေ ရှိနေပြီး၊ မေ ၂၈ ရက်မှာတော့ ချောင်းနားရွာဟောင်း၊ ပြစ်ထဲရွာ၊ တဲတော်ယာရွာတောင်စုရွာတွေကို ၅ ရက်ကြာ မီးရှို့ဖျက်ဆီးကာ ရွာသားတွေကို သတ်ဖြတ်ခဲ့တာတွေလုပ်ခဲ့တယ်လို့ သိရပါတယ်။

စာတည်း – လင်း

မကွေး၊ ဇွန် ၁၆၊ ၂၀၂၃။

မကွေးတိုင်း၊ ထီးလင်းနဲ့ ပေါက်မြို့နယ်ကြားက လှိုင်ဂူတခုမှာ ၂ ရက်ကြာ ဝင်အောင်းနေကြတဲ့ စစ်ကောင်စီတပ်သားတွေကို ဇွန် ၁၂ ရက်က PDF တွေ ဝင်တိုက်တာကြောင့် ၃ ဦး သေဆုံးခဲ့တယ်လို့ တောင်ညိုနဂါး PDF အဖွဲ့က ပြောပါတယ်။

ဇွန် ၁၀ ရက်က အင်အား ၆၀ ကျော်ပါတဲ့ စစ်ကြောင်းဟာ ထီးလင်းမြို့နယ်၊ ကျင်းကျေးရွာကို မီးရှို့ပြီး ပြန်ထွက်အလာကို တောင်ညိုနဂါးအဖွဲ့က တိုက်ခိုက်ဖို့ စောင့်နေခိုက် ၂ ရက်ကြာတဲ့အထိ ပေါ်မလာတာကြောင့် လိုက်လံရှာဖွေခဲ့ရာ အဲ့ဒီဂူထဲမှာ ရှိနေတာကို သိခဲ့ရတာလို့ တောင်ညိုနဂါး PDF အဖွဲ့ရဲ့ တပ်ရင်းမှူး ကိုညီက ဆိုပါတယ်။

“လှိုင်ဂူက လူ ၅၀ လောက်ဆံ့တယ်။ အဲ့ထဲမှာ နေကြတာတွေ့တော့ ကျနော်တို့လည်း လက်နက်ကြီးနဲ့ ပစ်တဲ့သူက ပစ်၊ လက်နက်ငယ်နဲ့ ပစ်တဲ့သူက ပစ်လိုက်တာ။ အဲ့နားမှာခိုနေမှန်း လူသိသွားတော့ နောက်နေ့မနက်မှာပဲ ကားလေးစီးနဲ့ ပြန်ခေါ်သွားကြတယ်။” လို့ သူက ပြောပါတယ်။

ဂူအောင်းနေတုန်း တိုက်ခိုက်ခံလိုက်ရတဲ့ စစ်ကောင်စီတပ်သွားတွေကို ဇွန် ၁၃ ရက် မနက်ပိုင်းမှာ ပေါက်မြို့နယ် ကပစ ၂၄ ကနေ စစ်ကား ၄ စီးနဲ့ လာခေါ်သွားရာ စောင်ဖြူနဲ့ပတ်ပြီး အလောင်း ၃ လောင်းပါသွားတာကို အတွင်း သတင်းအရ သိရတာလို့ တပ်ရင်းမှူးကိုညီက ဆိုပါတယ်။

စာတည်း – ဟယ်ရီ

မကွေး၊ ဇွန် ၁၊ ၂၀၂၃။

မကွေးတိုင်း၊ ပေါက်မြို့နယ်ထဲက ကျေးရွာတရွာမှာ စစ်ကောင်စီထံသတင်းပေးတဲ့ ဒလန်ဟုဆိုကာ လူငယ် ၂ ဦးကို ရပ်/ကျေး ပကဖအဖွဲ့က မှားယွင်းရှင်းလင်းခဲ့တဲ့အတွက် အဖွဲ့ခေါင်းဆောင်ဖြစ်သူနဲ့ ရဲဘော် ၁ ဦးကို ပေါက်မြို့နယ် ပြည်သူ့လုံခြုံရေးအဖွဲ့က ဥပဒေအတိုင်းအရေးယူထားတယ်လို့ ပေါက်မြို့နယ်ပလဖ တာဝန်ရှိသူတဦးက ပြောပါတယ်။

ပေါက်မြို့နယ်၊ ကျေးရွာတရွာက ညီအစ်ကို ၂ ဦးဟာ စစ်ကောင်စီကို သတင်းပေးနေတယ်လို့ တရွာတည်းနေသူ တဦးက သတင်းပေးလာတဲ့အတွက် ဗိုလ်စစ်နိုင် ဦးဆောင်တဲ့ ရပ်/ကျေး ပကဖအဖွဲ့က ၂၀၂၁ ခုနှစ် ဇွန်လမှာ သွားရောက် ရှင်းလင်းခဲ့ပါတယ်။

ရှင်းလင်းခံရသူ ၂ ဦးရဲ့ မိဘဖြစ်သူတွေက ဒလန်ရှင်းလင်းမှုမှာ မှားယွင်းစွာရှင်းလင်းခဲ့တာဖြစ်တယ်လို့ ပေါက်မြို့နယ် ပလဖအဖွဲ့ဆီကို တိုင်ကြားလာတဲ့အတွက် စုံစမ်းစစ်ဆေးမှုတွေ ပြုလုပ်ခဲ့ရာမှာ သေဆုံးသွားတဲ့ ညီအစ်ကို ၂ ဦးဟာ စစ်တပ်အာဏာသိမ်းပြီးနောက် လူထုလှုပ်ရှားမှုတွေမှာ ပါဝင်ခဲ့ကြသလို လက်နက်ကိုင်တော်လှန်ရေးမှာလည်း ထောက်ပို့အဖြစ်ပါဝင်ကူညီသူတွေ ဖြစ်နေခဲ့တယ်လို့ ပေါက်မြို့နယ်ပြည်သူ့လုံခြုံရေးအဖွဲ့မှ တာဝန်ခံတဦးက မြေလတ်အသံကို ရှင်းပြပါတယ်။

၂၀၂၁ ခုနှစ် ဇွန်လမှာ ဖြစ်ခဲ့တဲ့ အမှုကို အခုနှစ် ၂၀၂၃ ဧပြီလမှာ ပြန်လည်ဖမ်းဆီးရတဲ့အကြောင်းနဲ့ပတ်သက်လို့ ပေါက်မြို့နယ် ပြည်သူ့လုံခြုံရေးအဖွဲ့မှ တာဝန်ရှိသူတဦးက မြေလတ်အသံကို အခုလိုရှင်းပြပါတယ်။

“ကလေးတွေကို မသေချာဘဲနဲ့ ဒီလို အဆုံးစီရင်လိုက်တယ်ဆိုတော့ လက်နက်ကိုင်အဖွဲ့တွေက ဖမ်းတယ်ပေါ့။ ဖမ်းပြီး မေးမြန်းစစ်ဆေးတဲ့အချိန်ကျတော့ တရားစီရင်ရေးတွေ၊ အချုပ်ထောင်တွေ မပေါ်သေးတဲ့အချိန်(၂၀၂၁ခုနှစ်)ဆိုတော့၊ သူတို့ကို ခဏ အာမခံနဲ့ပေးပြီးတော့ တော်လှန်ရေးပြီးတဲ့ကာလပဲဖြစ်ဖြစ်၊ တရားဥပဒေ ပေါ်လာတဲ့ကာလပဲဖြစ်ဖြစ် မင်းတို့ဟာ တရားဥပဒေအရ ရင်ဆိုင်ဖြေရှင်းရမယ်။ တရားဥပဒေအရပေးတဲ့ ပြစ်ဒဏ်ကို ခံယူရပါမယ်ဆိုတဲ့ ခံဝန်လက်မှတ်တွေနဲ့ ပြန်ထွက်လာတာပါ” လို့ သူက ရှင်းပြပါတယ်။

ဒလန်လို့ မှားပြီးရှင်းလင်းခဲ့တဲ့(၂၀၂၁)ကာလဟာ တော်လှန်ရေးအစောပိုင်းကာလတွေဖြစ်လို့ အစိုးရရဲ့ အုပ်ချုပ်ရေးလည်း မပေါ်ပေါက်သေးသလို တရားစီရင်ရေးပိုင်းလည်း ပီပီပြင်ပြင် မပေါ်ပေါက်သေးတဲ့အတွက် အပြစ်ကျူးလွန်တယ်လို့ ယူဆရတဲ့ ဗိုလ်စစ်နိုင်ကို ဖမ်းဆီးပြီး ခံဝန်နဲ့ ပြန်လွှတ်ကာ အခုနှစ် အုပ်ချုပ်ရေး၊ ပြည်သူ့လုံခြုံရေး၊ တရားစီရင်ရေးစတဲ့ကဏ္ဍတွေ ပေါ်ပေါက်လာတဲ့အတွက် ၂၀၂၃ ဧပြီလမှာ ပြန်လည်ဖမ်းဆီးရတာဖြစ်တယ်လို့ သူက ထပ်ရှင်းပြပါတယ်။

လက်ရှိမှာ ဖမ်းဆီးထိန်းသိမ်းခံရတဲ့ ဗိုလ်စစ်နိုင်နဲ့ ရဲဘော် ဇော်မင်းလှိုင်တို့ဟာ တော်လှန်ရေးမှာပါဝင်ခဲ့တဲ့သူတွေဖြစ်သလို သူတို့တွေအနေနဲ့ စနစ်တခုအကူးအပြောင်းမှာ တာဝန်ယူမှု၊ တာဝန်ခံမှုအရ တရားဥပဒေကို ရင်ဆိုင်ဖြေရှင်းသွားဖို့ရှိနေတယ်လို့ ပေါက်မြို့နယ်ပြည်သူ့လုံခြုံရေးအဖွဲ့မှ တာဝန်ခံတဦးက ပြောပါတယ်။

“ဥပေဒမှာ သူတို့ကျူးလွန်ခဲ့ရင်လည်း ကျူးလွန်တဲ့အပြစ်ဒဏ်ကို သူတို့ခံယူမယ်။ တကယ်လို့ သူတို့မကျူးလွန်ဘူး ဆိုရင်လည်း မကျူးလွန်တဲ့အနေအထားအရ ဥပဒေအတိုင်းပဲလျှောက်ပါ့မယ်ဆိုပြီးတော့ သူတို့ကိုယ်တိုင် ကျေကျေနပ်နပ်နဲ့ အေးအေးဆေးဆေးပါ” လို့ သူက ဆိုပါတယ်။

ဒါကြောင့်လည်း ခံဝန်နဲ့ ပြန်လည်လွတ်မြောက်လာပြီး ၂ နှစ်ကြာပြီးနောက် အခုနှစ် (၂၀၂၃) ဧပြီလ ၆ ရက်မှာ အသက် ၅၂ နှစ်အရွယ် ရပ်/ကျေးပကဖ ခေါင်းဆောင် ဗိုလ်စစ်နိုင်နဲ့အတူ ရဲဘော်ဇော်မင်းလှိုင်ကို ပေါက်မြို့နယ် ပြည်သူ့လုံခြုံရေးအဖွဲ့က ကျေးရွာမှာ လာရောက်ဖမ်းခေါ်သွားတာဖြစ်ပါတယ်။

ဗိုလ်စစ်နိုင်ကို ဖမ်းဆီးခဲ့တာကလည်း သတ်ခံခဲ့ရတဲ့ ညီအစ်ကို ၂ ယောက်ဟာ ဒလန် မဟုတ်ဘူးလို့ အသတ်ခံရသူရဲ့ မိဘနဲ့ အစ်ကိုဖြစ်သူတို့က တိုင်ကြားသလို တခြား ပကဖတွေကလည်း တိုင်ကြားထားတဲ့အတွက် သူ့ကို ဖမ်းဆီးထိန်းသိမ်းပြီး တရားစွဲတင်ထားတာဖြစ်တယ်လို့ ပေါက်မြို့နယ်ပလဖက ရှင်းပြပါတယ်။

“ကျနော်တို့က သမ္မတဖြစ်ဖြစ်၊ ဝန်ကြီးချုပ်ဖြစ်ဖြစ် ဘယ်ကောင်ဖြစ်ဖြစ်။ အကြောင်းမဲ့လူသတ်ခွင့်ပေးမထားဘူး။ တော်လှန်ရေးလုပ်လို့ပဲဖြစ်ဖြစ်၊ ခွေးဘက်ကပဲဖြစ်ဖြစ် လူသတ်ခွင့်ပေးမထားဘူး။ တရားဥပဒေအရတော့ တရားစွဲတင်ခံရမှာပဲလေ။ အပြစ်ရှိရင် တရားဥပဒေအရ ပြစ်ဒဏ်ခံရမယ်၊ အပြစ်မရှိရင်တော့ လွတ်လိမ့်မယ်ပေါ့” လို့ သူက ဆိုပါတယ်။

ဗိုလ်စစ်နိုင်အဖမ်းခံရပြီးနောက် ဧပြီလ ၁၄ ရက်မှာ သူရဲ့အမျိုးတွေအပါအဝင် တပ်ဖွဲ့ဝင် ၂၀ ခန့်ဟာ ဗိုလ်စစ်နိုင်အဖမ်းခံထားရတဲ့နေရာကို သွားရောက်ပြီး မေးမြန်းစုံစမ်းတာတွေ ပြုလုပ်ခဲ့ကြပါတယ်။

လာရောက်တွေ့ဆုံကြသူတွေထဲက ဗိုလ်စစ်နိုင်ရဲ့ ယောက်ဖတော်စပ်သူနဲ့ မယားညီကိုဖြစ်သူ ၂ ဦးဟာ ထန်းပင်တက်စရာရှိတာကြောင့် မိမိတို့နေထိုင်ရာ ကျေးရွာသို့ ဆိုင်ကယ်နဲ့ အရင်ဆုံး ပြန်ထွက်သွားခဲ့ပါတယ်။

ဒါပေမဲ့ သူတို့ ၂ ဦးဟာ အပြန်လမ်းမှာ တိုက်မိုင်းထိပြီး တဦးသေကာ တဦးကတော့ပျောက်ဆုံးသွားခဲ့တယ်လို့ ပေါက်မြို့နယ် ပလဖက ပြောပါတယ်။

ဒီဖြစ်စဉ်နဲ့ပတ်သက်လို့ ဗိုလ်စစ်နိုင်ရဲ့ မိသားစုဝင်တွေက အခုသေဆုံးမှုဟာ ပေါက်မြို့နယ်ပလဖအဖွဲ့က သေနတ်နဲ့ ပစ်ခတ်ခဲ့တာလို့ စွပ်စွဲထားသလို ပေါက်မြို့နယ်ပလဖအဖွဲ့ကလည်း သူတို့ ၂ ဦးဟာ တိုက်မိုင်းထိတာသာဖြစ်ပြီး ပျောက်ဆုံးသွားသူတဦးဟာ မိုင်းပေါက်ကွဲရာ နီးစပ်တဲ့ ကျေးရွာအတွင်းကို ဝင်ပြေးသွားတာဖြစ်တယ်လို့ မြေလတ်အသံသတင်းဌာနက စုံစမ်းသိရှိရပါတယ်။

ပျောက်ဆုံးသွားသူ ဝင်ပြေးသွားတဲ့ ကျေးရွာဟာ ပျူစောထီးတွေရှိတဲ့ ကျေးရွာဖြစ်တယ်လို့ ပေါက်မြို့နယ် ပလဖအဖွဲ့ ထံက စုံစမ်းသိရှိရပါတယ်။

သေဆုံးသူ ၂ ဦးအနက် တဦးရဲ့အလောင်းကိုသာ ပြန်ရပြီး ကျန်အလောင်းကိုတော့ ဒီနေ့အထိ ပြန်မရသေးပါဘူး။ ပြန်ရရှိတဲ့အလောင်းမှာတော့ ရိုက်နှက်ထားတဲ့ဒဏ်ရာတွေ တွေ့ရသလို သေနတ်ကျည်မှန်ထားတဲ့ဒဏ်ရာလည်း တွေ့တယ်လို့ ဗိုလ်စစ်နိုင်ရဲ့ မိသားစုဝင်တွေက ဆိုပါတယ်။

အဖွဲ့အစည်း နှစ်ဖက်စလုံးကတော့ အပြန်အလှန်ပြောဆိုထားကြပေမယ့် မြေလတ်အသံက သီးခြားအတည်ပြုနိုင်ဖို့ ကြိုးစားနေဆဲဖြစ်ပါတယ်။

ဒါပေမဲ့ မိသားစုဝင်တွေ ပေးပို့လာတဲ့သေဆုံးသူရဲ့ ဓာတ်ပုံတွေအရတော့ သေဆုံးသူရဲ့ ပေါင်မှာ ပေါက်ပြဲ၊ ပြတ်ရှဒဏ်ရာ ၂ ချက်နဲ့ ဝတ်ထားတဲ့ လုံချည်မှာ သွေးတွေစိုရွဲနေတာကို တွေ့ရပါတယ်။

သေဆုံးသွားသူဟာ အသက်၄၉နှစ်ကျော်အရွယ်ရှိ ဦးမြင့်ဌေးဆိုသူဖြစ်ပြီး ပျောက်ဆုံးနေတဲ့တယောက်ကတော့ အသက် ၄၆ နှစ်အရွယ် ဦးသောင်းရှိန်ဖြစ်တယ်လို့ မိသားစုဝင်တွေက ဆိုပါတယ်။

စာတည်း – လင်းဇေ