ပဲခူး

မြေလတ်အသံ၊ ဇွန် ၁၈၊ ၂၀၂၅။

ပဲခူးတိုင်း၊ ပေါင်းတည်မြို့နယ်ထဲမှာ စစ်ကြောင်းထိုးနေတဲ့စစ်ကာင်စီတပ်သားတွေကို တိုက်ခိုက်ခဲ့တာကြောင့် ၄ ဦးသေဆုံးခဲ့ပြီး ၃ ဦးဒဏ်ရာရရှိခဲ့တယ်လို့ ဇွန် ၁၈ ရက်ဒီကနေ့မှာ PPDF-၃၆၀၁ တပ်ရင်း ကထုတ်ပြန်ပါတယ်။

အင်အား ၁၀၀ ခန့်ပါအဆိုပါစစ်ကြောင်းကို နွားသိုးရွာနဲ့ နွေးတောင်ရွာကြားမှာ ဇွန် ၁၆ ရက် မနက် ၁၀ နာရီ မိနစ် ၅၀ ကနေ ၁၂ နာရီ ၁၅ မိနစ်ထိ ဗျူဟာ ၂၁ ကွပ်ကဲမှုအောက်ရှိ ၃၆၀၁ တပ်ရင်း စနိုက်ပါအဖွဲ့နဲ့ တပ်ရင်းစစ်ကြောင်းတို့က ၄ နာရီကြာတိုက်ခိုက်ခဲ့တာလို့ ဆိုပါတယ်။

“စကစ သေဆုံးတာကို တိုက်ပွဲအတွင်း မျက်မြင်တွေ့ခဲ့ရတာနဲ့ နယ်မြေရှင်းလင်းရေးလုပ်တဲ့အချိန်မှာ မီးရှို့ထားတဲ့အလောင်းတွေကြည့်ပြီးအတည်ပြုနိုင်တာပါ”လို့ ၃၆၀၁ တပ်ရင်းမှ စစ်ထောက်လှမ်းရေးနဲ့ သတင်းပြန်ကြားတာဝန်ခံ Shadow ကပြောပါတယ်။

သေဆုံးစစ်ကောင်စီတပ်သား ၄ ဦးရုပ်အလောင်းကို တိုက်ပွဲဖြစ်ပြီးနောက် စစ်ကောင်စီတပ်သားတွေက နွားသိုးကျေးရွာဝင်ရောက်မီးရှို့ချိန် နေအိမ်တွေနဲ့အတူမီးရှို့ထားခဲ့တယ်လို့ တာဝန်ခံ Shadow က ဆိုပါတယ်။

စစ်ကောင်စီတပ်ဖွဲ့ဝင်တွေမီးရှို့ခဲ့တာကြောင့် နွားသိုးကျေးရွာက နေအိမ် ၆ လုံးနဲ့ နွေးတောင်ကျေးရွာက နေအိမ် ၃ လုံး မီးလောင်ပြာကျခဲ့ပြီး လက်ရှိမှာတော့အဲ့ဒီစစ်ကြောင်းဟာ ပေါက်ခေါင်းမြို့ဘက်ကို ပြန်သွားတယ်လို့ သိရပါတယ်။

စာတည်း – လင်း

မြေလတ်အသံ၊ ဇွန် ၁၇၊ ၂၀၂၅။

ပဲခူးတိုင်းအနောက်ခြမ်း၊ မင်းလှမြို့နယ်၊ အုတ်တွင်းရွာ၊ ရန်ကုန်-ပြည်လမ်း စစ်ကွင်းတာဆုံစစ်ဆေးရေးဂိတ်အနီး ထိတွေ့တိုက်ပွဲဖြစ်ပွားခဲ့ပြီး အရပ်သား ၃ ဦးသေဆုံးတယ်လို့ ဒေသခံတဦးထံက သိရပါတယ်။

ဇွန် ၁၆ ရက် ညနေပိုင်းမှာ စစ်ကွင်းတာဆုံစစ်ဆေးရေးစစ်ကောင်စီဂိတ်ကို ဒေသကာကွယ်ရေးတပ်တွေက ဝင်ရောက်ပစ်ခတ်တာကြောင့် တိုက်ပွဲတွေဖြစ်ပွားနေချိန် ပြည်လမ်းအတိုင်းမောင်းနှင်လာတဲ့ အိမ်စီးကား ၁ စီး သေနတ်ပစ်ခံခဲ့ရတာလို့ ဆိုပါတယ်။

“ အဲ့တိုက်ပွဲဖြစ်ချိန် ပြည်ဘက်ကနေ ရန်ကုန်ဘက်ကို မောင်းလာတဲ့ အိမ်စီးကား ၁ စီးကိုရပ်ခိုင်းတာ၊ ရပ်မပေးလို့ဆိုပြီး သေနတ်နဲ့ပစ်လို့ ၃ ယောက်သေပါတယ်။ ဘယ်အဖွဲ့ကပစ်တာလည်းတော့ မသိရပါဘူး” လို့ မြေပြင်အခြေအနေကိုသိရှိသူတဦးက မြေလတ်အသံကို ပြောပါတယ်။

သေနတ်ပစ်ခံရတာကြောင့် သေဆုံးသွားတဲ့ရုပ်အလောင်းတွေနဲ့ကားဟာ ဒီကနေ့ ဇွန် ၁၇ ရက် မနက် ၁၀ နာရီခန့်အထိရန်ကုန်-ပြည်လမ်းဘေးမှာရှိနေသေးကာ သေဆုံးသူတွေနဲ့ပတ်သက်ပြီး အချက်အလက်တွေမသိရဘူးလို့ ဆိုပါတယ်။

စစ်ကွင်းတာဆုံစစ်ဆေးရေးဂိတ်မှာ စစ်ကောင်စီပူးပေါင်းတပ်ဖွဲ့ အင်အား ၃၀ ခန့် အထိုင်ချတပ်စွဲထားပြီး တော်လှန်ရေးတပ်တွေဘက်က ဝင်ရောက်ပစ်ခတ်ချိန် စစ်ကောင်စီတပ်သားတွေသေဆုံးမှုရှိတယ်လို့လည်း အထက်ပါဒေသခံက ဆိုပါတယ်။

ဒါ့အပြင် ယမန်နေ့မနက်ပိုင်းမှာ မင်းလှမြို့နယ်အတွင်း ထောက်ကြန့်အုပ်စု၊ ဆင်အိုင်ချောင်းပေါက်ရွာအနီးတိုက်ပွဲဖြစ်ခဲ့ပြီး လက်ရှိမှာလည်း ရန်ကုန်-ပြည်လမ်း အရှေ့ဘက်ပဲခူးရိုးမအကြားကျေးရွာတွေမှာ တိုက်ပွဲတွေဆက်ဖြစ်နေတယ်လို့ သိရပါတယ်။

ဇွန် ၁၇ ရက် ဒီကနေ့နံနက် ၂ နာရီခန့်မှာလည်း မင်းလှမြို့နယ်၊ ဖားလေးကွင်းမြောက်စုမှာ လက်နက်ကြီးဗုံးသီးကျရောက်ပေါက်ကွဲတာကြောင့် သက်ကြီးပိုင်းအငြိမ်းစားကျောင်းအုပ်ဆရာမ ၁ ဦး သေဆုံး ပြီး အတူနေမိန်းကလေး ၁ ဦးလည်း လက်ချောင်းပြတ်တောက်ဒဏ်ရာတွေရရှိခဲ့တယ်လို့ သိရပါတယ်။

စာတည်း – ဟိန်းစံ

ထန်းတပင်၊ ဇွန် ၁၇၊ ၂၀၂၅။

ပဲခူးတိုင်း၊ ထန်းတပင်မြို့နယ်အတွင်းမှာ တရက်တည်းနေရာ ၄ ခုမှာ တိုက်ပွဲတွေဖြစ်ပွားခဲ့ပြီး နှစ်ဖက်ထိခိုက်သေဆုံးရှိတယ်လို့ တောင်ငူခရိုင် ၃၅၀၂ တပ်ရင်းပြန်ကြားရေးတာဝန်ခံထံက သိရပါတယ်။

ဇွန် ၁၅ ရက် မနက် ၈ နာရီခန့်မှာ မြို့စိုးကျေးရွာထဲရောက်နေတဲ့ စစ်ကောင်စီတပ်ဖွဲ့အင်အား ၂၀၀ ခန့်ဟာ စစ်ကြောင်း ၄ ကြောင်းခွဲပြီးထွက်ခွာလာရာ မြို့စိုးကျေးရွာနဲ့ ၂ မိုင်ပတ်လည်အတွင်းမှာရှိတဲ့ ကင်မွန်းခြုံနဲ့ ဂျက်ကလေးလမ်းပိုင်း၊ ဇီးကုန်းကျေးရွာနဲ့ တောင်ကုန်းကျေးရွာတွေအနီးမှာ နေ့လယ် ၁၂ နာရီ အထိ တပြိုင်နက်တိုက်ပွဲတွေဖြစ်ပွားခဲ့တာလို့ ဆိုပါတယ်။

” သူတို့က မြို့စိုးရွာကနေထွက်ရင် တိုက်ပွဲဖြစ်တဲ့ ၄ နေရာကိုသွားလို့ရတယ်။ ကျနော်တို့နေရာယူထားတဲ့အဖွဲ့တွေနဲ့ထိတွေ့မှုဖြစ်တာ။ ကျနော်တို့ဘက်က ဒရုန်းကြဲတာလည်းပါတယ်”လို့ တောင်ငူခရိုင် ၃၅၀၂ တပ်ရင်းပြန်ကြားရေးတာဝန်ခံ ကိုစွန်ရဲက မြေလတ်အသံကို ပြောပါတယ်။

တိုက်ပွဲတွေအတွင်း ကင်မွန်းခြုံနဲ့ဗျက်ကလေးရွာကြားက စစ်ကောင်စီစစ်ကြောင်းက ဒရုန်းဗုံးထိမှန်လို့ ၆ ဦးသေဆုံးပြီး အပြန်အလှန်ပစ်ခတ်မှုအတွင်း ၂ ဦးသေဆုံးခဲ့ကြောင်း၊ မြို့စိုးကျေးရွာအတွင်း တိုက်ပွဲမှာ စစ်ကောင်စီဘက်က ၂၀ ဦးသေဆုံးခဲ့ကာ အဆိုပါသေဆုံးမှုတွေကို ဒရုန်းကင်းထောက်ကင်မရာက တဆင့် တွေ့မြင်ခဲ့ရတယ်လို့ ၎င်းက ဆိုပါတယ်။

တိုက်ပွဲတွေအတွင်း စစ်ကောင်စီတပ်ဖွဲ့သေဆုံးမှုတွေကိုတော့ မြေလတ်အသံက သီးခြားအတည်မပြုနိုင်ပါဘူး။

ပြည်သူ့ကာကွယ်ရေးတပ်ဖွဲ့တွေဘက်ကလည်း တောင်ငူခရိုင် ၃၅၀၂ တပ်ရင်းက ၂ ဦး၊ တောင်ငူပကဖတပ်ဖွဲ့က ၃ ဦး၊ အခြားပူးပေါင်းအဖွဲ့တခုက ၁ ဦး စုစု ပေါင်း ၆ ဦးဒဏ်ရာရခဲ့တယ်လို့ သိရပါတယ်။

တိုက်ပွဲဖြစ်ပွားပြီးနောက် စစ်ကောင်စီတပ်ဖွဲ့တွေဟာ မြို့စိုးကျေးရွာထဲပြန်ဝင်သွားပြီး ဇွန် ၁၇ ရက် ဒီကနေ့အထိကျေးရွာအတွင်း တပ်စွဲထားကာ ဒရုန်း၊ လက်နက်ကြီးတွေနဲ့ပစ်ခတ်တာတွေ လုပ်ဆောင်နေပေမယ့် လက်ရှိမှာ တိုက်ပွဲထပ်မဖြစ်ဘဲ စစ်ဆိုင်ထားတဲ့အခြေအနေမှာရှိနေတယ်လို့ ဆိုပါတယ်။

ဇွန် ၁၂ ရက်မနက်ပိုင်းမှာ ဇရပ်ကြီး ခလရ ၇၃၊ ကျွဲပွဲနဲ့ အုတ်တွင်းအခြေစိုက် စစ်ကောင်စီပူးပေါင်းအင်အား ၁၂၀ ခန့်ဟာ မြို့စိုးကျေးရွာကို ကျွဲပွဲနဲ့ထန်းတပင်မြို့တွေကနေစစ်ကြောင်း ၂ ကြောင်းခွဲဝင်ရောက်လာချိန် မြို့စိုးတံတားနဲ့ကျေးရွာကြားမှာ ကြားဖြတ်တိုက်ခိုက်ခံရပြီး ၇ ဦးသေဆုံးခဲ့သေးတယ်လို့ သိရပါတယ်။

ဇွန် ၁၂ ရက် တိုက်ပွဲတွေစတင်ဖြစ်ပွားစဥ်ကတည်းက ထွက်ပြေးနေရတဲ့ ကိုးတိုင်၊ ပွဲသာ၊ ဂွေးပင်ရိုး၊ အရှေ့ကုန်း၊ ဇီးဖြူသောင်၊ ဘုရားကုန်း၊ အောက်တင်းကုတ်၊ ခုံစု၊ မြို့စိုးကျေးရွာတွေက ဒေသခံ ၄,၀၀၀ ကျော်ဟာ ဇွန် ၁၇ ရက်ဒီကနေ့အထိ နေရပ်မပြန်နိုင်ကြရသေးဘူးလို့ သိရပါတယ်။

စာတည်း – ဟိန်းစံ

တိုက်ပွဲကြောင့် ဒေသခံ ၄,၀၀၀ ကျော်စစ်ရှောင်နေရ

ထန်းတပင်၊ ဇွန် ၁၃၊ ၂၀၂၅။

ပဲခူးတိုင်း၊ ထန်းတပင်မြို့နယ်၊ မြို့စိုးကျေးရွာကို စစ်ကြောင်းထိုးလာတဲ့စစ်ကောင်စီတပ်ဖွဲ့ တိုက်ခိုက်ခံရပြီး ၇ ဦးသေဆုံးခဲ့တယ်လို့ တောင်ငူခရိုင် အမှတ် ၂ တပ်ရင်းဆီက သိရပါတယ်။

ဇွန် ၁၂ ရက်မနက် ၇ နာရီခန့်မှာ ဇရပ်ကြီး ခလရ ၇၃ တပ်၊ ကျွဲပွဲ၊ အုတ်တွင်းအခြေစိုက်စစ်ကောင်စီ ပူးပေါင်းအင်အား ၁၂၀ ခန့်ပါစစ်ကြောင်းနဲ့ ထန်းတပင်မြို့ဘက်ကလာတဲ့စစ်ကြောင်းတို့က မြို့စိုးကျေးရွာကိုဝင်ချိန်မှာ တိုက်ခိုက်ခဲ့ကြတာလို့ ဆိုပါတယ်။

“သူတို့(စကစ)က မြို့စိုးတံတားကနေ မြို့စိုးရွာထဲဝင်လာလို့ ထိတွေ့ မှုဖြစ်တာပါ။ တိုက်ပွဲကတော့ ၁ နာရီကျော်လောက်ဖြစ်တယ်။ ဒီနေ့ထိ ရွာထဲမှာရှိနေတုန်းဘဲ။ စကစထိခိုက်သေဆုံးက မြင်လိုက်ရတဲ့ သူတွေရှိလို့ ပြန်သိရတာ”လို့ တောင်ငူခရိုင် အမှတ် ၂ တပ်ရင်း ပြန်ကြားရေးတာဝန်ရှိသူက ပြောပါတယ်။

တိုက်ပွဲအတွင်း စစ်ကောင်စီတပ်ဖွဲ့ဝင် ၇ ဦးသေဆုံးပြီး လက်ရှိအချိန်ထိ စစ်ကောင်စီစစ်ကြောင်းက မြို့စိုးကျေးရွာထဲရှိနေသေးတာကြောင့် စစ်ဆိုင်နေတဲ့အခြေအနေရှိနေတယ်လို့လည်း သိရပါတယ်။

စစ်ကြောင်းထိုးမှုနဲ့ တိုက်ပွဲကြောင့် ကိုးတိုင်၊ ပွဲသာ၊ ဂွေးပင်ရိုး၊ အရှေ့ကုန်း၊ ဇီးဖြူသောင်၊ ဘုရားကုန်း၊ အောက်တင်းကုတ်၊ ခုံစု၊ မြို့စိုးကျေးရွာတွေက ဒေသခံ ၄,၀၀၀ ကျော်ထွက်ပြေးနေရတယ်လို့ အထက်ပါပြန်ကြားရေးတာဝန်ရှိသူက ဆိုပါတယ်။

မြို့စိုးကျေးရွာနဲ့အနီးဝန်းကျင်ရွာတွေဟာ KNLA ပူးပေါင်းတပ်တွေ ထိန်းချုပ်ထားတဲ့ဒေသတွေဖြစ်ပြီး မြို့စိုးတံတား ထန်းတပင်ဘက်ခြမ်းမှာတော့စစ်ကောင်စီဘက်က အင်အား ၄၀ ကျော်နဲ့တပ်စွဲထားတယ်လို့ သိရပါတယ်။

ပြီးခဲ့တဲ့ မတ် ၂၇ ရက်ကလည်း အုတ်တွင်းမြို့နယ်၊ ညောင်ခြေထောက်အပိုင် ရန်ကုန်-မန္တလေး လမ်းဟောင်းပေါ်မှာ စစ်ကောင်စီတပ်ဖွဲ့ဝင် ၁၀ ဦးလိုက်ပါလာတဲ့ ကားကို တောင်ငူခရိုင်အမှတ် ၂ တပ်ရင်းနဲ့ပူးပေါင်းအဖွဲ့တွေက တိုက်ခိုက်ခဲ့ရာ ၅ ဦး သေဆုံးခဲ့သေးတယ်လို့ သိရပါတယ်။

စာတည်း – လင်း

တောင်ငူ၊ ဇွန် ၁၁၊ ၂၀၂၅။

ပဲခူးတိုင်း၊ တောင်ငူမြို့နယ်၊ မကျီးပင်အင်းကျေးရွာမှာ စစ်ကောင်စီတပ်နဲ့ ဒေသခံကာကွယ်ရေးတပ်တွေ တိုက်ပွဲဖြစ်နေပြီး စစ်ကောင်စီတပ်က နေအိမ်တွေကိုပါမီးရှို့နေတယ်လို့ ဒေသခံတဦးကပြောပါတယ်။

ဇွန် ၁၁ ရက်ဒီမနက် ၈ နာရီကျော်မှာ အင်အား ၁၀၀ ကျော်ပါ စစ်ကောင်စီစစ်ကြောင်းက မကျီးပင်အင်းရွာကိုရောက်လာချိန် ဒေသကာကွယ်ရေးတပ်တွေနဲ့တိုက်ပွဲဖြစ်ခဲ့တာလို့ ဆိုပါတယ်။

“အရင်နေ့က ဆွဲမိုင်းထိသွားတာကို ပြန်တက်လာလို့တိုက်ပွဲဖြစ်နေတာ။ ခုထိဖြစ်နေတုန်း။ မကျီးပင် အနောက်ဘက်က ကုန်းစောင်းတွေမှာရှိတဲ့တဲတွေကို မီးရှို့နေတာလို့ သိရတယ်။ လူတော့မရှိတော့ဘူး။”လို့ ဒေသခံတဦးကပြောပါတယ်။

တိုက်ပွဲကြောင့် အိမ်ခြေ ၁၂၀ ခန့်၊ လူဦးရေ ၅၀၀ ကျော်နေထိုင်တဲ့ မကျီးပင်အင်းရွာက ဒေသခံတွေလည်း ဘေးလွတ်ရာကိုရွာလုံးကျွတ်ထွက်ပြေးတိမ်းရှောင်နေကြရတယ်လို့ ဆိုပါတယ်။

တိုက်ပွဲအခြေအနေနဲ့ မီးရှို့ခံရတဲ့အိမ်ခြေအရေအတွက်ကိုတော့ မြေလတ်အသံက ဆက်လက်စုံစမ်းနေပါတယ်။

ပြီးခဲ့တဲ့ မေ ၂၃ ရက်ကလည်း တောင်ငူမြို့နယ်၊ စပါးကြွယ်ကျေးရွာအနီးတိုက်ပွဲဖြစ်ပွားပြီး ကျေးရွာကနေအိမ်တွေကို စစ်ကောင်စီတပ်ကမီးရှို့ခဲ့ပါသေးတယ်။

အဲ့ဒီနောက် စပါးကြွယ်၊ ကြက်ရိုးပင်၊ ဇီးပင်သာ၊ တောပု၊ ငုံးမင်းရွာတွေက ဒေသခံ ၃,၀၀၀ ကျော်ဟာ တောင်ငူမြို့အပါအဝင် ဘေးလွတ်ရာကို ထွက်ပြေးတိမ်းရှောင်နေရပြီး ဇွန် ၁၁ ရက်အထိ အများစုက နေရပ်မပြန်ရသေးဘူးလို့ သိရပါတယ်။

စာတည်း – လင်း

တိုက်ပွဲအတွင်း စစ်ကောင်စီတပ်ဖွဲ့ဝင် ၃ ဦးသေဆုံး

ကျောက်ကြီး၊ ဇွန် ၁၁၊ ၂၀၂၅။

ပဲခူးတိုင်း၊ ကျောက်ကြီးမြို့နယ်၊ ရွာကြီးအင်းကျေးရွာထိပ်မှာတပ်စွဲထားတဲ့ စစ်ကောင်စီတပ်စခန်းကို ဝင်ရောက်တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၃ ဦးသေဆုံးပြီး လက်နက်ခဲယမ်းတွေ သိမ်းဆည်းခဲ့တယ်လို့ Falcons Guerilla Force ကပြောပါတယ်။

စစ်ကောင်စီတပ်ဖွဲ့ဝင် ၂၀ ခန့်နဲ့တပ်စွဲထားတဲ့ အဲ့ဒီစခန်းကို ဇွန် ၁၀ ရက်မနက် ၈ နာရီကျော်မှာ ဒေသကာကွယ်ရေးတပ်တွေက ထိုးစစ်ဆင်တိုက်ခိုက်ခဲ့ရာ မိနစ် ၂၀ ခန့်အကြာမှာ စစ်ကောင်စီဘက်က စခန်းကိုစွန့်ခွာထွက်ပြေးခဲ့တယ်လို့ဆိုပါတယ်။

“သူတို့(စကစ)ဝင်ရောက်တပ်စွဲထားတာက အများပြည်သူတွေရဲ့နေအိမ်တွေပါ။ ကျနော်တို့တိုက်ပွဲဖြစ်ပြီး ဝင်ရောက်ရှင်းလင်းချိန်မှာ MA 1 သေနတ် ၁ လက် ခဲယမ်းတွေ၊ စစ်သုံးဆောင်ပစ္စည်းတွေကို သိမ်းဆည်းရမိခဲ့တယ်ဗျ။ စစ်**အလောင်း ၃ လောင်းတွေ့ခဲ့တယ်”လို့ Falcons Guerilla Force မှတာ ဝန်ရှိသူတဦးကပြောပါတယ်။

ရွာကြီးအင်းကျေးရွာရှိစခန်းမှာ ကျောက်ကြီး-ပဲနွယ်ကုန်းလမ်းမကြီးနဲ့နီးပြီး စစ်ကောင်စီတပ်တွေ စခန်းစွန့်ထွက်ပြေးချိန်မှာလည်း လက်နက်ကြီးတွေနဲ့တောက်လျောက်ပြန်လည်ပစ်ခတ်ခဲ့တယ်လို့ ဆိုပါတယ်။

ပြီးခဲ့တဲ့ ဧပြီ ၂၈ ရက်ကလည်း ကျောက်ကြီးမြို့နယ်ရှိ ကျွန်းကုန်း၊ ရင်းတိုက်ကုန်း၊ တောင်စု၊ ရန်မျိုးအောင်၊ တမာခေါ၊ နောင်ကုန်းတံတားရှိ စစ်ကောင်စီတပ်စခန်းတွေကို ကရင်အမျိုးသား လွတ်မြောက်ရေးတပ်မတော် – KNLA နဲ့ ပူးပေါင်းတပ်ဖွဲ့တွေကတိုက်ခိုက်ရာ ဒုတပ်ရင်းမှူးအပါအဝင် ၂၀ ကျော်သေဆုံးပြီး လက်နက်မျိုးစုံ ၃၀ကျော်နဲ့ ခဲယမ်း၊ စစ်အသုံးအဆောင်ပစ္စည်းတွေ သိမ်းဆည်းရရှိခဲ့တယ်လို့ သိရပါတယ်။

စာတည်း – လင်း