ပဲခူး

ပဲခူး၊ ဖေဖော်ဝါရီ ၄၊ ၂၀၂၃။

ပဲခူးတိုင်းဒေသကြီး၊ ကျောက်ကြီးမြို့နယ်၊ နတ်သံကွင်း – ကျောက်ကြီးသွားကားလမ်း ညောင်ကုန်ကျေးရွာတံတားအနီးမှာ စျေးရောင်းထွက်လာတဲ့ကား မိုင်းထိလို့ ကလေးငယ် ၁ ဦးအပါအဝင် ၄ ဦးဒဏ်ရာရသွားတယ်လို့ သိရပါတယ်။

ဖေဖော်ဝါရီလ ၃ ရက်မနေ့ကမနက် ၇ နာရီဝန်းကျင်မှာ ကျောက်ကြီးမြို့ဘက်ကနေ ပဲနွယ်ကုန်းဘက်ကို စျေးရောင်းဖို့ထွက်လာတဲ့ လိုက်ထရပ် အဖြူရောင်ကားဟာ ညောင်ကုန်းတံတား ရှောင်ကွင်းလမ်းအေရာက်မှာ မိုင်းထိခဲ့တာလို့ ဒေသခံတဦးကပြောပါတယ်။

“သူတို့က မိသားစုလိုက် စျေးရောင်းဖို့ထွက်လာတဲ့ကားပါ။ ကျောက်ကြီးဘက်ကနေ ရွာလှည့်ရောင်းတာပေါ့။ အဲဒါ ကားဘီးက မိုင်းနင်းမိတာ။ ကား ၁ စီး ပက်လက်လန်သွားတဲ့အထိ ဖြစ်သွားတယ်။ ကံကောင်းတာက ဒဏ်ရာရတာလောက်ဘဲရှိကြတယ်” လို့ပြောပါတယ်။

ကားမိုင်းထိတာကြောင့် ကားပေါ်ပါ ကျောက်ကြီးမြို့၊ ကပ်ကျေးရပ်ကွက်နေ ဒေါ်ဇာခြည်ဦး ၄၀ နှစ်ခန့်၊ မရှင်းသန့်လင်း ၇ နှစ်၊ ဦးလွင်ကိုအောင် ၄၀ နှစ်၊ မောင်အောင်သူရမျိုးလွင် ၂၃ နှစ်တို့ ထိခိုက်ဒဏ်ရာရသွားတယ်လို့ သိရပါတယ်။

အဲဒီမိုင်းကိုတော့ ဘယ်အဖွဲ့အစည်းက ထောင်ထားတယ်ဆိုတာကို မသိရသေးသလို ထိခိုက်ဒဏ်ရာရသူတွေကိုတော့ ဒေသလူမှုကူညီရေးအသင်းတွေက ကျောက်ကြီးမြို့နယ် ပြည်သူ့ဆေးရုံကိုတင်ပို့ကာ ဆေးကုသမှုခံယူနေတယ်လို့ သိရပါတယ်။

ဇန်နဝါရီလ ၁၄ ရက်ကလည်း ကျောက်ကြီး-နတ်သံကွင်းသွားလမ်း စစ်ပင်တံတားအနီးမှာ တံတားပြင်နေတဲ့ စစ်ကောင်စီအဖွဲ့နဲ့ လက်အောက်ခံဝန်ထမ်းတွေကို လက်နက်ကိုင်အဖွဲ့ ၁ ခုက ဒရုန်းနဲ့ဗုံးချတိုက်ခိုကိချိန် ဘေးနားကဖြတ်သွားတဲ့ ငါးဒိုင်က သုံးဘီးတစီးထိမှန်ခဲ့တာကြောင့် ထိခိုက်သေဆုံးမှုတွေရှိခဲ့တယ်လို့ သိရပါတယ်။

ပဲခူး၊ ဖေဖော်ဝါရီ ၃၊ ၂၀၂၃။

ပဲခူးတိုင်းဒေသကြီး၊ ထန်းတပင်မြို့နယ်၊ တပြေးကျေးရွာမှာ စစ်မှုထမ်းဟောင်းဥက္ကဌဆိုသူ ပစ်ခတ်ခံရလို့ သေဆုံးသွားတယ်လို့ သိရပါတယ်။

ဖေဖော်ဝါရီလ ၂ ရက်ညနေ ၄ နာရီ ၁၀ မိနစ်ခန့်က တပြေးကျေးရွာမှာ ထန်းတပင်မြို့နယ်စစ်မှုထမ်းဟောင်းဥက္ကဌ ဦးမြင့်သိန်း ၅၅ နှစ်ခန့်ကို ထန်းတပင်မြို့နယ် ပကဖ ဖီးနစ်အဖွဲ့က ပစ်ခတ်ရှင်းလင်းခဲ့တာဖြစ်တယ်လို့ ပဲခူးတိုင်းဒေသကြီးပြည်သူ့ကာကွယ်ရေးတပ်ဖွဲ့တာဝန်ရှိသူက ပြောပါတယ်။

“မြေပြင်ကပေးပို့လာတဲ့သတင်းအရ သူ့ကိုသွားရောက်ပစ်ခတ်ရှင်းလင်းတဲ့အခါ သူနေနေတဲ့ခြံကနေ တပြေးရဲစခန်း စကစ တွေရှိတဲ့နေရာကိုပြေးတာ၊ အနောက်ကနေအဖွဲ့တွေက လိုက်ပစ်ခဲ့ရတယ်။ တပြေးစခန်းထဲမှာရှိနေတဲ့ စကစ တွေကတောင် ဒီဘက်ကအဖွဲ့တွေကို ပြန်ပစ်တာတွေရှိခဲ့သေးတယ်။ ဒါပေမယ့် အဖွဲ့တွေကထိခိုက်တာမရှိခဲ့ဘူး” လို့​ပြောပါတယ်။

မြင့်သိန်းဟာ တပြေးကျေးရွာက ပြည်သူပိုင်မြေတွေကို စစ်မှုထမ်းဟောင်းနာမည်နဲ့သိမ်းယူပြီး စစ်ကောင်စီနဲ့အကျိူးတူလုပ်ကိုင်နေသလို PDF သတင်းတွေကိုစုံစမ်းပြီး စစ်ကောင်စီကို သတင်းပေးနေတာကြောင့် ရှင်းလင်းခဲ့ရတာဖြစ်တယ်လို့ ဆိုပါတယ်။

ဦးမြင့်သိန်းဟာ ပစ်ခတ်ရှင်းလင်းခံရလို့ ဦးခေါင်းပွင့်ထွက်၊ ရင်ဘတ်ကျည်ဖောက်ဝင်ဒဏ်ရာတွေရပြီး နေရာမှာဘဲသေဆုံးသွားတယ်လို့ သိရပါတယ်။

ပြီးခဲ့တဲ့ ၂၀၂၂ ခုနှစ် အောက်တိုဘာလ ၈ ရက်နေ့က ထန်းတပင်မြို့နယ်၊ မရွှေဥကျေးရွာက အုပ်ချုပ်ရေးမှူး ဦးဝင်းဗိုလ်ဆိုသူဟာ ကျေးရွာထဲက ဆိုင်ကယ်ပြင်ဆိုင်မှာရှိနေချိန် ပစ်ခတ်ခံရတာကြောင့် ဒဏ်ရာပြင်းထန်ရခဲ့သေးတယ်လို့ သိရပါတယ်။

ကျောက်တံခါး၊ ဇန်နဝါရီ ၂၉၊ ၂၀၂၃။

ပဲခူးတိုင်းဒေသကြီး၊ ကျောက်တံခါးမြို့နယ်၊ သမင်အင်းကုန်းကျေးရွာက ပျူစောထီးဆိုသူ လမ်းလျှောက်ထွက်လာချိန် ပစ်ခတ်ခံရလို့ သေဆုံးသွားတယ်လို့ သိရပါတယ်။

ဇန်နဝါရီလ ၂၈ ရက်နေ့ မနက် ၆ နာရီလောက်မှာ သမင်အင်းကုန်းကျေးရွာနဲ့ဒိုးတန်းကျေးရွာလမ်းပေါ်မှာ ပျူစောထီး လှကြိုင် အသက် ၆၅ နှစ်ကျော်ဆိုသူကို ကျောက်တံခါးမြို့နယ် ပကဖအဖွဲ့က ပစ်ခတ်ရှင်းလင်းခဲ့တာဖြစ်တယ်လို့ ပဲခူးတိုင်းဒေသကြီး ပြည်သူ့ကာကွယ်ရေးတပ်ဖွဲ့ တာဝန်ရှိသူကပြောပါတယ်။

“သူက စကစက လုပ်မယ့် ရွေးကောက်ပွဲအတွက် မဲစာရင်းကောက်ရာမှာ အားတက်သရောပါဝင်လုပ်ဆောင်နေသလို စကစ ဒေါက်တိုင်သတင်းပေး ပျူတဦးဖြစ်လို့ သက်ဆိုင်ရာ အဖွဲ့က ရှင်းလင်းလိုက်တာဖြစ်တယ်”လို့ ပြောပါတယ်။

သေနတ်နဲ့ပစ်ခတ်ခံရလို့ ဦးလှကြိုင်ဟာ ညာဘက်ပါး၊ ညာဘက်ရင်အုံတွေမှာ ကျည်ဖောက်ဝင်ဒဏ်ရာတွေ ရရှိပြီး နေရာမှာဘဲ သေဆုံးသွားတယ်လို့ ဆိုပါတယ်။

သေဆုံးသွားတဲ့ ဦးလှကြိုင်အလောင်းကိုတော့ ဒေသခံတွေ အကူအညီနဲ့ ကျောက်တံခါးဆေးရုံကို ပို့ဆောင်ထားတယ်လို့ သိရပါတယ်။

ဇန်နဝါရီလ ၇ရက်နေ့က ကျောက်တံခါးမြို့နယ်၊ တောကျွဲအင်းကျေးရွာမှာ စျေးဆိုင်ဖွင့်ထားတဲ့ ပျူစောထီးခေါင်းဆောင် မင်းအောင်ဆိုသူကို သူ့ကိုယ်ပိုင်စျေးဆိုင်မှာဘဲ ကျောက်တံခါး ပကဖ၊ ဗိုလ်ကျောက်ခဲ မြို့ပြပြောက်ကျားအဖွဲ့တွေက ရှင်းလင်းခဲ့လို့ သေဆုံးသွားတယ်လို့ သိရပါတယ်။

အဲဒီပျူစောထီးခေါင်းဆောင်ရှင်းခံရတာကို လာရောက်စစ်ဆေးတဲ့ တောကျွဲအင်းရဲစခန်းက ရဲကားကိုလည်း မိုင်းဆွဲတိုက်ခိုက်ခဲ့လို့ ဒုရဲအုပ်အပါအဝင် ရဲ ၂ ဦး ထိခိုက်ဒဏ်ရာရခဲ့သေးတာပါ။

ပဲခူး၊ ဇန်နဝါရီ ၂၈၊ ၂၀၂၃။

ပဲခူးတိုင်းအနောက်ခြမ်း၊ သဲကုန်းမြို့နယ်က ရာအိမ်မှူးတဦးကို ဇန်နဝါရီလ ၂၇ ရက်မနေ့ညက သေနတ်နဲ့ပစ်သတ်ခဲ့တယ်လို့ သဲကုန်းမြို့နယ် ပြည်သူ့ကာကွယ်ရေးတပ်ဖွဲ့၊ ပြည်ခရိုင်ပြည်သူ့ကာကွယ်ရေးတပ်ရင်း၃၆၀၂၊ TPDFတပ်ခွဲ ၄ က သတင်းထုတ်ပြန်ထားပါတယ်။

သဲကုန်းမြို့နယ်၊ ကန့်လန့်ကုန်းအုပ်စု၊ အိုင်းကုန်းကျေးရွာက အသက် ၄၇ နှစ်အရွယ် ရာအိမ်မှူးကိုညီဂျော်(ခ)ထွန်းထွန်းနိုင်ကို နန်းထိုက်အောင် စစ်ဆင်ရေးအဖြစ် မြို့ပြပျောက်ကျားအဖွဲ့က မနေ့ည ၁၀ နာရီခွဲလောက်က သုတ်သင်ခဲ့တာလို့ ဆိုပါတယ်။

“ခြံဝင်းထဲကိုခေါ်ထုတ်ပြီးပစ်ခဲ့တာပါ၊ သေနတ်နဲ့ ၅ ချက်ပစ်တာ ၃ ချက်က ဦးခေါင်းနဲ့ရင်ဘတ်ကိုထိတယ်၊ ပွဲချင်းပြီးပါပဲ”လို့ TPDFရဲ့ သတင်းတာဝန်ခံကပြောပါတယ်။

ညီဂျော်ဟာ လောင်းကစားဝိုင်းတွေကိုလိုင်းကြေးတောင်းသလို စစ်သားတွေနဲ့ပေါင်းသင်းဆက်ဆံရေးကောင်းနေသူဖြစ်တယ်လို့လည်း သူကဆက်ပြောပါတယ်။

ဒါ့အပြင် စစ်ကောင်စီနဲ့ပူးပေါင်းပြီးရွေးကောက်ပွဲကျင်းပဖို့ အိမ်ထောင်စုစာရင်းကောက်ယူပေးတာ၊ ကျေးရွာပြည်သူလူထုကို စစ်ကောင်စီအားကိုးနဲ့ နိုင်ထက်စီးနင်းပြုတာ စတဲ့လုပ်ငန်းတွေကိုပူးပေါင်းလုပ်ကိုင်နေတာကြောင့် သုတ်သင်ခဲ့တာလို့ ထုတ်ပြန်ချက်မှာ ဖော်ပြထားပါတယ်။

ပြီးခဲ့တဲ့ဇန်နဝါရီလ၁၆ ရက်ကလည်း သဲကုန်းမြို့နယ်အတွင်းက ဆင်မြီးဆွဲလျှပ်စစ်ရုံးကို မြို့ပြပျောက်ကြားအဖွဲ့က ဗုံးခွဲတိုက်ခိုက်ခဲ့ပါသေးတယ်။

ပဲခူး၊ ဇန်နဝါရီ ၂၇၊ ၂၀၂၃။

ပဲခူးတိုင်း၊ ဖြူးမြို့နယ်၊ ကညွတ်ကွင်းဒေသ၊ ရွာမကြီးရွာအနောက်ဖက်က လမင်းသာတံတားနားမှာ မိုင်းတလုံးကွဲပြီး နွားကျောင်းနေတဲ့ အမျိုးသားတဦးကိုထိမှန်ခဲ့တာကြောင့် အခြေနေကစိုးရိမ်ရတယ်လို့ သိရပါတယ်။

ဇန်နဝါရီလ ၂၆ ရက်မနေ့ကနေ့လယ် ၂ နာရီခွဲလောက်မှာ စစ်ကောင်စီစစ်ကားတွေက အဆိုပါလမ်းကဖြတ်သွားပြီး မကြာခင်မှာ မိုင်းကွဲခဲ့တာဖြစ်တယ်လို့ ဒေသခံအမျိုးသားတဦးက ပြောပါတယ်။

“သူက နွားကျောင်းရင်းတံတားအနီးမှာ ကီးပတ်ဖုန်းကိုတွေ့လို့ ကောက်ယူချိန်မိုင်းကွဲတာပါ၊ စိုးရိမ်ရတဲ့ အခြေအနေပါ၊ ဖုန်းကိုအရောင်ပြပြီး အောက်မှာမိုင်းထောင်ထားတာ၊ ဒီဒေသမှာက စစ်**တွေပဲလှုပ်ရှားလာတာပါ၊ ကျနော်တို့ဘက်ကလူတွေက ပြည်သူဒုက္ခဖြစ်စေတဲ့လုပ်ရပ်တွေကို မလုပ်ပါဘူး”လို့ ပြောပါတယ်။

မိုင်းထိမှန်လို့ အသက် ၃၅ နှစ်အရွယ် ရွာမကြီးရွာသား ကိုပေါက်ခေါဆိုသူ ရင်ဘတ်နဲ့ မျက်လုံးကို မိုင်းထိမှန်ကာ တောင်ငူဆေးရုံကို အရေးပေါ်တင်ထားရပြီး၊ သူတို့အိမ်ကစီးပွားရေးမပြေလည်တဲ့အတွက် ရွာထဲကို အလှူငွေကောက်ပြီး ဆေးရုံပို့ပေးထားရတာဖြစ်တယ်လို့ ဆိုပါတယ်။

နယ်ခံတွေကတော့ အဆိုပါမိုင်းဟာ စစ်ကောင်စီဘက်ကထောင်ခဲ့တဲ့ မိုင်းဖြစ်တယ်လို့ ပြောဆိုနေကြပြီး မြေလတ်အသံအနေနဲ့တော့ ဘယ်အဖွဲ့စည်းကထောင်ခဲ့တဲ့ မိုင်းဖြစ်တယ်ဆိုတာ စုံစမ်းနေဆဲဖြစ်ပါတယ်။

ပြီးခဲ့တဲ့ ၂၀၂၂ ခုနှစ်ထဲမှာလည်း ရွာမကြီးရွာရဲ့တရွာကျော်က သစ်ပတ်တံတားအနီးမှာ အသက် ၅၆ နှစ်အရွယ် ဒေါ်စန်းမြင့်ဆိုသူဟာ လယ်တောထဲထမင်းသွားပို့ချိန် စစ်ကောင်စီဘက်က ထောင်ထားတဲ့မိုင်းကို နင်းမိပြီး အူပွင့်သေဆုံးခဲ့တဲ့ဖြစ်ရပ်လည်း ရှိခဲ့ပါသေးတယ်။

ပဲခူး၊ ဇန်နဝါရီ ၂၆၊ ၂၀၂၃။

ပဲခူးတိုင်းဒေသကြီး၊ ဖြူးမြို့နယ်နဲ့ ညောင်လေးပင်မြို့နယ်မြို့နယ်တွေမှာ စစ်ကောင်စီနဲ့ပေါင်းပြီး လောင်းကစားဒိုင်လုပ်နေတဲ့ သူ​ ၃ ဦး ပစ်သတ်ခံရလို့ သေဆုံးသွားတယ်လို့ သိရပါတယ်။

သေဆုံးသူတွေဟာ မျိုးဇော်ဦး၊ ဦးဇော်မင်းအောင်(ခ)စာကလေးခွေနဲ့ ဇနီးဖြစ်သူ မအိမွန် တို့ ၃ဦးဖြစ်ကာ သူတို့ဟာ ပျူစောထီးတွေလည်းဖြစ်တယ်လို့ Bago Region PDF တာဝန်ရှိသူတဦးကပြောပါတယ်။

“ပစ်ခတ်ခံရသူတွေက ပျူစောထီးတွေဖြစ်တယ်။ ရဲနဲ့တပ်နဲ့ပေါင်းပြီး လောင်းကစားဒိုင်လုပ်တယ်။ ရဲနဲ့တပ်ကို လိုင်းကြေးပေးပြီးတော့ပေါ့ ဒါကြောင့်ပစ်ခတ်ရှင်းလင်းတာဖြစ်တယ်။ စကစနဲ့ရဲအတွက် ငွေရှာပေးနေတာလေ”လို့ ပြောပါတယ်။

ပျူစောထီး မျိုးဇော်ဦးကို ဇန်နဝါရီ ၂၅ရက် ညနေ ၄နာရီခွဲလောက်မှာ စက်ကုန်းကျေးရွာအုပ်ချုပ်ရေးမှူး အိမ်မှာရောက်နေတဲ့အချိန် ဖြူးပကဖ က ပစ်ခတ်ရှင်းလင်းခဲ့တာဖြစ်ပါတယ်။

ပျူစောထီး ဇော်မင်းအောင်တို့ လင်မယား၂ယောက်ကိုတော့ အဲ့ဒီနေ့ ညနေ ၅နာရီခွဲလောက်မှာ ကြက်ဝိုင်းကနေပြန်လာချိန် ညောင်လေးပင် ပကဖ က ပစ်ခတ်ရှင်းလင်းခဲ့တာဖြစ်ပါတယ်။

သေနတ်နဲ့ပစ်ခံရလို့ ဦး​ဇော်မင်းအောင်မှာ နဖူးကျည်ဖောက်ဝင်ဒဏ်ရာတချက်၊ ဝဲမျက်ခုံးကျည်ဖောက်ဝင်ဒဏ်ရာတချက်နဲ့နေရာမှာ သေဆုံးခဲ့ပြီး ‌ဇနီးဖြစ်သူ မအိမွန်မှာ ယာနထင်ကျည်ဖောက်ဝင်ဒဏ်ရာတချက်ရရှိသေဆုံးသွားတယ်လို့ ဆိုပါတယ်။

သေဆုံးသွားသူတွေကိုတော့ ဒေသလူမှုကူညီရေးအသင်းတွေက ညောင်လေးပင်ဆေးရုံကို သယ်ဆောင်သွားတယ်လို့ သိရပါတယ်။

ဇန်နဝါရီလ ၂၂ ရက် မနက်ပိုင်းက ညောင်လေးပင်မြို့နယ်၊ ပုဇွန်မြောင်ကျေးရွာ၊ ဆွဲဒလဲပိုင်းက ဦးဝင်းဌေးအပါအဝင် မိသားစု ၃ ဦးနေအိမ်မှာ ပစ်သတ်ခံရလို့ သေဆုံးသွားပြီး ဘယ်အဖွဲ့က လုပ်တယ်ဆိုတာ မသိရသေးပါဘူး။

ပဲခူး၊ ဇန်နဝါရီ ၂၄၊ ၂၀၂၃။

ပဲခူးတိုင်းအနောက်ခြမ်း၊ ပြည်ခရိုင်၊ ပေါင်းတည်မြို့မှာ ဇန်နဝါရီ ၂၅ ရက် ဒီနေ့မနက်အစောပိုင်းက နေအိမ်တလုံးနဲ့ စပါးကျီတလုံး မီးလောင်ဆုံးရှုံးခဲ့တယ်လို့ ဒေသခံတဦးဆီက သိရပါတယ်။

ပေါင်းတည်မြို့နယ်၊ ဗျက်ကြီးတောင်ကျေးရွာမှာ ဒီနေ့မနက် ၂ နာရီလောက်က လောင်ကျွမ်းခဲ့တာလို့ သိရပါတယ်။

“မီးကြွင်းမီးကျန်ကပဲစပြီး လောင်တယ်လို့ ပြောရမယ်။ ၂ ထပ် သွပ်မိုးပျဥ်ထောင်အိမ်တလုံးနဲ့ စပါးကျီတလုံး မီးထဲပါသွားတယ်။ လာရောက်ကူညီပေးတဲ့ အမျိုးသမီးတဦး မီးလောင်ဒဏ်ရာရရှိပြီး စိုးရိမ်ရတာကြောင့် ပေါင်းတည်ဆေးရုံကို ပို့ဆောင်ထားတယ်” လို့ ဒေသခံတဦးဆီက သိရပါတယ်။

ပေါင်းတည်မြို့နယ် မီးသတ်စခန်းက မီးငြှိမ်းသတ်ယာဉ် ၂ စီး၊ ရေသယ်ယာဉ် ၁ စီး၊ မင်းကွက် ၁ အရန်မီးသတ်စခန်းက မီးငြှိမ်းသတ်ယာဉ် ၁ စီးတို့နဲ့ နာရီဝက်အကြာ ငြိမ်းသတ်ခဲ့ရတယ်လို့ သိရပါတယ်။

ပြီးခဲ့တဲ့ဇန်နဝါရီလ ၁၃ ရက် ညနေ ၆ နာရီကလည်း ပေါင်းတည်မြို့ပေါ် ရွေးကောက်ပွဲကော်မရှင် ခြံဝင်းအတွင်းက အမှိုက်မီးရှို့ရာက ရုံးရှေ့ ပိတောက်ပင်ကို မီးကူးစက် လောင်ကျွမ်းခဲ့လို့ မီးသတ်ယာဥ် ၂ စီးနဲ့ အချိန် ၁ နာရီလောက်အကြာ ငြိမ်းသတ်ခဲ့ရပါသေးတယ်။

ပဲခူးတိုင်းအနောက်ခြမ်းမှာ ပေါင်းတည်မြို့က မီးလောင်မှု ၂ ကြိမ်အပါ အခုနှစ်ဇန်နဝါရီလအတွင်း မီးလောင်မှု ၄ ကြိမ်ဖြစ်ပွားပြီး အခုလ ၁၁ ရက်က မိုးညိုမြို့နယ် မှက္ကတန်ရွာက နေအိမ် ၁၅ လုံး၊ ဇန်နဝါရီလ ၁၅ ရက်က ပြည်မြို့ကျောင်းကြီးအိုးတန်းရပ်ကွက်က မွေ့ယာအရောင်းဆိုင်တို့ကိုလည်း မီးလောင်ကျွမ်းခဲ့ပါသေးတယ်။

ပဲခူး၊ ဇန်နဝါရီ ၂၄၊ ၂၀၂၃။

ပဲခူးတိုင်းဒေသကြီးအတွင်းက မြို့နယ်တွေမှာ လိုင်စင်မဲ့မော်တော်ဆိုင်ကယ်တွေကို လိုင်စင်လုပ်ပေးမယ့် အစီအစဥ်ကို စစ်ကောင်စီလက်အောက်ခံ ကညနက ရက်အကန့်သတ်မရှိ ရွေ့ဆိုင်းလိုက်တယ်လို့ သိရပါတယ်။

ဆိုင်ကယ်လိုင်စင်လုပ်ပေးနေချိန် ကညန ဝန်ထမ်းတွေအနေနဲ့ PDF တွေရဲ့ တိုက်ခိုက်တာကို ခံရမှာကိုစိုးရိမ်တာကြောင့် လုံခြုံရေးအစီအစဥ်တွေ ပြန်လည်ရေးဆွဲပြီးမှ ပြန်လည်လုပ်ပေးဖို့ စီစဥ်နေတာဖြစ်တယ်လို့ ပဲခူး ကညနနဲ့ နီးစပ်သူတဦးက ပြောပါတယ်။

“မနေ့က လုပ်ပေးမယ်ဆိုပြီး လိုင်စင်လုပ်မယ့် လူတွေတောင် လာစောင့်နေကြတာ။ ပြီးတော့ နေ့ခင်း ၁၁ နာရီလောက်မှာ မလုပ်ပေးတော့ဘူးဆိုပြီး ချက်ချင်းဖြစ်သွားတယ်။ တန်းစီနေတဲ့သူတွေတောင်ပြန်သွားရတယ်။ ဘယ်သူမှကို မလုပ်လိုက်ရဘူး။ ပြီးတော့ ရက်အကန့်အသတ်မရှိရွေ့လိုက်တယ်လို့ သိရတယ်”လို့ပြောပါတယ်။

ပဲခူးတိုင်းအတွင်း လိုင်စင်မဲ့ဆိုင်ကယ်သိန်းချီရှိရာ စစ်ကောင်စီက ပြည်သူလူထုထံကနေ လိုင်စင်လုပ်ပေးပြီး ငွေသန်းထောင်ချီရှာရန် ပြင်ဆင်နေတာလို့ ဆိုပါတယ်။

ဇန်နဝါရီလ ၂၃ ရက်ကစတင်ပြီး ပဲခူးတိုင်းဒေသကြီးအတွင်းရှိ ခရိုင်တွေဖြစ်တဲ့ ပဲခူး၊ တောင်ငူ၊ သာယာဝတီ၊ ပြည်ခရိုင် ကညနရုံးတွေမှာ လိုင်စင်မဲ့မော်တော်ဆိုင်ကယ်တွေကို ပဲခူးဒေသလိုင်စင်လုပ်ပေးဖို့ ကညန ဘက်က ကြေညာခဲ့တာဖြစ်ပါတယ်။

ဆိုင်ကယ်လိုင်စင်ပြုလုပ်မယ်ဆိုပါက ၁ စီးလျှင် ကညနကြေး ၃၀၀၀၀ ကျပ်နဲ့ အခွန်ကြေးအပါအဝင် ဆိုင်ကယ် အမျိုးအစားနဲ့ထုတ်လုပ်တဲ့ခုနှစ်အလိုက် ကျပ် ၁ သိန်းအထက်ကနေ ကျပ် ၅ သိန်းကျော်ထိ ကုန်ကျနိုင်မှာဖြစ်တယ်လို့ သိရပါတယ်။

စစ်ကောင်စီက ပဲခူးတိုင်းထဲကမြို့နယ်တွေမှာ မော်တော်ဆိုင်ကယ်လိုင်စင်၊ ယာဉ်မောင်းလိုင်စင်၊ ဘတ်မှန်၊ ဆိုင်ကယ်စီးဦးထုပ်နဲ့ အခြားအရာတွေကိုစစ်ဆေးကာ ဆိုင်ကယ်သိမ်းတာ၊ လူဖမ်းတာတွေနဲ့ ငွေတောင်းတာတွေကြောင့် ဒေသခံတွေဟာ သွားလာရေးနဲ့စားဝတ်နေရေးအတွက် အခက်ခဲဖြစ်နေရတယ်လို့ ဆိုပါတယ်။

စစ်တပ်ဟာ အာဏာသိမ်းပြီးနောက်ပိုင်း ၂၀၂၁ ခုနှစ် စက်တင်ဘာလမှာလည်း တနိုင်ငံလုံးအတိုင်းအတာနဲ့ လိုင်စင်မဲ့မော်တော်ဆိုင်ကယ်တွေကို လိုင်စင်လုပ်ပေးခဲ့ပြီး ကျပ်သန်းပေါင်းများစွာ အခွန်ငွေရရှိခဲ့သေးတာပါ။