ဝေါ၊ မတ် ၂၁၊ ၂၀၂၅။
ပဲခူးတိုင်း၊ ဝေါမြို့နယ်၊ လက်ပန်ရွာအခြေစိုက် ပျူစောထီးနဲ့စစ်ကောင်စီတပ်ဖွဲ့ဝင်တွေပစ်တဲ့ လက်နက်ကြီးထိမှန်တဲ့အတွက် သံဃာ ၁ ပါး ပျံလွန်ပြီး ၂ ပါးဒဏ်ရာရတယ်လို့ ဝေါမြို့နယ် ပြည်သူ့ကာကွယ်ရေးအဖွဲ့တာဝန်ခံဆီက သိရပါတယ်။
မတ် ၂၁ ရက်မနက် ၉ နာရီ ၁၃ မိနစ်ခန့်မှာ စစ်ကောင်စီတပ်ဖွဲ့ဝင်တွေဟာ စစ်တောင်းမြစ် တဖက်ကမ်း မွန်ပြည်နယ်၊ ကျိုက်ထိုမြို့နယ်၊ ခရွဲကျေးရွာဘက်ကို လက်နက်ကြီး ၁ လုံးပစ်ခတ်ခဲ့ရာ ခရွဲမြောက်ရွာရှိ ဘုန်းကြီးကျောင်းဆွမ်းစားဆောင်ပေါ်ကို ကျရောက်ပေါက်ကွဲခဲ့တာလို့ ဆိုပါတယ်။
“ဟိုတနေ့က သူတို့ကို အကိုတို့ဘက်က ဒရုန်းချတဲ့ကိစ္စနဲ့ပတ်သက်ပြီး မကျေနပ်ဘူးနဲ့တူပါတယ်။ မနေ့က ဗျူဟာမှူးဦးဆောင်ပြီး ကား ၈ စီးနဲ့ရောက်လာတယ်။ လက်နက်ကြီးတွေကော ဒရုန်းတွေကောပါလာပြီး မနေ့ညနေက ခရွဲကိုဒရုန်းနဲ့လာကြဲသွားသေးတယ်။ အဲဒါတော့ လူထိခိုက်တာမရှိဘူး။ ဒီမနက်ကတော့ လက်နက်ကြီးနဲ့လှမ်းပစ်တာ ၁ လုံးတည်းပဲ”လို့ ဝေါမြို့နယ်ပြည်သူ့ကာကွယ်ရေးအဖွဲ့ တာဝန်ခံကပြောပါတယ်။
လက်နက်ကြီးထိမှန်လို့ သက်တော် ၅၀ ကျော် ကျောင်းနေသံဃာ ၁ ပါး နေရာတင် ပျံလွန်တော်မူပြီး နောက်ထပ်သံဃာ ၂ ပါးမှာ ခြေထောက်နဲ့လက်တွေ အစမှန်ဒဏ်ရာရရှိသွားခဲ့ကာ ဘုန်းကြီးကျောင်း ဆွမ်းစားဆောင်လည်း ပျက်စီးသွားတယ်လို့ ဆိုပါတယ်။
ပြီးခဲ့တဲ့နှစ် စက်တင်ဘာ ၁၃ ရက်ကလည်း ဝေါမြို့နယ်၊ လက်ပံရွာမှာတပ်စွဲထားတဲ့ စစ်ကောင်စီ အဖွဲ့တွေက ကျိုက်ထိုမြို့နယ်၊ ခရွဲကျေးရွာကို လက်နက်ကြီးနဲ့ပစ်ခတ်လို့ ကျေးရွာအတွင်းရှိ မြောက်ကျောင်းဘုန်းကြီးကျောင်းအနီးကို ကျရောက်ပေါက်ကွဲပြီး အဖွားအို ၁ ဦးအပါအဝင် စုစုပေါင်း ၂ ဦးထိခိုက်ဒဏ်ရာရခဲ့တယ်လို့ သိရပါတယ်။
စာတည်း – လင်း
