ပဲခူး

ပဲခူး၊ ဒီဇင်ဘာ ၂၄၊ ၂၀၂၂။

ပဲခူးတိုင်း၊ ရေတာရှည်မြို့မှာ စစ်ကောင်စီ မြို့နယ်စီမံအုပ်ချုပ်ရေးအဖွဲ့က ဦးဆောင်ပြုလုပ်တဲ့ လမ်းလျှောက်ပွဲ ဗုံးပစ်ခံရတယ်လို့ သိရပါတယ်။

ဒီဇင်ဘာလ ၂၄ ရက်ဒီမနက် ၅ နာရီခွဲလောက်မှာ ရေတာရှည်မြို့၊ အမှတ် (၁) ရပ်ကွက်ရှိ ကန်တော်မင်္ဂလာပတ်လမ်းမှာ စစ်ကောင်စီဘက်က တာဝန်ရှိသူတွေဦးစီးပြီး စစ်ကောင်စီထောက်ခံသူတွေပါဝင်တဲ့ လမ်းလျှောက်ပွဲကို အမျိုးသား ၂ ဦးက ဗုံးနဲ့တိုက်ခိုက်ခဲ့တယ်လို့ ဒေသခံတဦးက ပြောပါတယ်။

“အဲဒီနေရာမှာက စကစ မြို့နယ်စီမံကောင်စီက ဦးစီးပြီး လမ်းလျှောက်ပွဲ ခဏခဏလုပ်နေတာ။ လာတာကလည်း ဌာနဆိုင်ရာအများစုနဲ့ သူတို့က မလာမနေရ သတ်မှတ်ထားတဲ့သူတွေလောက်ဘဲ ပါတယ်။ ဗုံးပေါက်တာတော့ ဟုတ်တယ်။ ထိခိုက်တယ်ဆိုတာတော့ မကြားရဘူး။ အသံဗုံးဘဲ ထင်တယ်”လို့ ပြောပါတယ်။

ဗုံးပေါက်တာကြောင့် လမ်းလျှောက်ပွဲလာတဲ့ စစ်ကောင်စီအုပ်ချုပ်ရေးအဖွဲ့ဝင်တွေနဲ့ပါဝင်သူတွေ ထိခိုက်တာ မရှိဘူးလို့ဆိုပါတယ်။

ဒီဖောက်ခွဲမှုကို ဘယ်အဖွဲ့အစည်းက လုပ်ဆောင်တာလည်းဆိုတာကိုတော့ ထုတ်ပြန်ကြေငြာထားတာမျိုး မတွေ့ရသေးပါဘူး။

ဒီနေ့ပြုလုပ်တဲ့ လမ်းလျှောက်ပွဲဟာ ဒီဇင်ဘာလအတွင်း ပြုလုပ်တဲ့ စတုတ္ထအကြိမ်မြောက် လမ်းလျှောက်ပွဲဖြစ်တယ်လို့ သိရပါတယ်။

စစ်ကောင်စီက အာဏာသိမ်းပြီးနောက်မှာ ပြည်သူတွေအနေနဲ့ နိုင်ငံရေးမှာ စိတ်ဝင်စားမှုမရှိစေဖို့ ပျော်ပွဲရွှင်ပွဲတွေ ကျင်းပနေသလို မူးယစ်ဆေးဝါးနဲ့ လောင်းကစားကိစ္စတွေကိုလည်း အရေးယူမှုနည်းပြီး မသိချင်ယောင်ဆောင်နေတာများတယ်လို့ သိရပါတယ်။

ပဲခူး၊ ဒီဇင်ဘာ ၂၃၊ ၂၀၂၂။

ပဲခူးတိုင်းဒေသကြီး၊ အင်းတကော်မြို့နယ်၊ ထုံးကြီးကျေးရွာ ရထားသံလမ်းအနီးမှာ ကြံ့ခိုင်ရေးပါတီ ကျေးရွာစည်းရုံးရေးမှူး ၁ ဦးပစ်ခတ်ခံရလို့ သေဆုံးသွားတယ်လို့ သိရပါတယ်။

ဒီဇင်ဘာလ ၂၂ ရက်နေ့ နေ့လည် ၂ နာရီကျော်ခန့်မှာ ထုံးကြီးကျေးရွာ ကြံခိုင်ရေးပါတီစည်းရုံးရေးမှူး ဦးသက်မြင့်ဦး(ခ)ကိုဖိုးသက် အသက် ၄၅ နှစ်ကျော်ဟာ အင်းတကော်ဘက်ကနေ ထုံးကြီးကျေးရွာဘက်ကိုဆိုင်ကယ်နဲ့ပြန်လာစဥ် ရထားသံလမ်းအနားအရောက်မှာ ဆိုင်ကယ်နဲ့ လိုက်လာသူ အမျိုးသား ၂ ဦးက သေနတ်နဲ့ပစ်ခတ်ခဲ့တာဖြစ်တယ်လို့ ဒေသခံတဦးက ပြောပါတယ်။

“သူကထုံးကြီး အထကကျောင်း အာစရိယပူဇော်ပွဲအတွက် အင်းတကော်မှာ ဗွီနိုင်းထုတ်ပြီးပြန်လာတာ။ အဲဒါကိုအနောက်ကနေဆိုင်ကယ်နဲ့ လိုက်လာတဲ့သူတွေကအနီးကပ်သေနတ်နဲ့ပစ်သွားတာ။ နေရာမှာဘဲသေသွားတယ်”လို့ ပြောပါတယ်။

သေနတ်နဲ့ပစ်ခတ်ခံရလို့ ဦးသက်မြင့်ဦး(ခ)ကိုဖိုးသက်ဟာ ဦးခေါင်းနဲ့နောက်ကျောတွေမှာ သေနတ်ဒဏ်ရာတွေရပြီး သေဆုံးသွားတယ်လို့ သိရပါတယ်။

အဲဒီပစ်ခတ်မှုကိုတော့ ဘယ်အဖွဲ့က ဘာကြောင့်ပစ်ခတ်ခဲ့တယ်ဆိုတာ မသိရသေးပါဘူး။

မတ်လ ၁၄ ရက်နေ့က အင်းတကော်မြို့နယ်၊ ကျောက်တန်းကျေးရွာက ​ကြံခိုင်ရေးပါတီဝင် ရာအိမ်မှူး ဦးမောင်သိန်းကို သူပိုင်ဆိုင်တဲ့ လက်ဖက်ရည်ဆိုင်အတွင်း အင်းတကော်ပြည်သူ့ကာကွယ်ရေးတပ်ဖွဲ့က ဝင်ရောက်ပစ်ခတ်ခဲ့လို့ ဒဏ်ရာပြင်းစွာရခဲ့သေးတယ်လို့ သိရပါတယ်။

စစ်ကိုင်း၊ ဒီဇင်ဘာ ၂၂၊ ၂၀၂၂။

စစ်ကိုင်းတိုင်း၊ ကောလင်းမြို့၊ မြို့မကုန်းရပ်ကွက်၊ သုဝဏ္ဏရပ်မှာနေတဲ့ လောင်းကစားဒိုင်လုပ်နေသူ အမျိုးသားတဦး ပစ်ခတ်ရှင်းလင်းခံခဲ့ရတယ်လို့ ဒေသခံကတဆင့်သိရပါတယ်။

ဒီဇင်ဘာလ ၂၁ ရက်မနေ့ကနေ့လည် ၁ နာရီခန့်က မျက်နှာဖုံးစွပ်နဲ့ လက်လုပ်သေနတ်တချို့ကိုင်ဆောင်ထားတဲ့ လူတစုကရောက်လာပြီး သေနတ်နဲ့ပစ်သတ်သွားတာလို့ အမည်မဖော်လိုသူ အမျိုးသားတဦးက မြေလတ်အသံကိုပြောပါတယ်။

“သူက တော်တော်လေးအနံ့ထွက်နေတာ။ စခတွေနဲ့ပေါင်းပြီး မူးယစ်ဆေး၊ လောင်းကစား အကြီးကျယ်လုပ်နေတာ။ ဂျင်ဝိုင်းထောင်ထားတယ်၊ လောင်းကစားတွေက အခုမှမဟုတ်ဘူး ဟိုးအရင်ထဲကဆရာကြီး၊ စခတွေနဲ့ပေါင်းစားပြီး ခုကပိုဆိုးလာတာလေ။ ကောလင်းမှာ စခတွေနဲ့မပတ်သက်ရင် ဖဲတောင်မရိုက်ရဲဘူး”လို့ ပြောပါတယ်။

ပစ်ခတ်ခံရလို့ နာမည်ကြီးလောင်းကစားလုပ်ငန်းလုပ်ကိုင်သူ ဦးတင့်ကို အသက် ၅၅ နှစ်သေဆုံးခဲ့ပြီး၊ ဘယ်အဖွဲ့အစည်းက လုပ်ခဲ့လဲဆိုတာတော့ မြေလတ်အသံအနေနဲ့ အတည်ပြုနိုင်ခြင်းမရှိသေးပါဘူး။

ကောလင်းမြို့ပေါ်မှာ စစ်တပ်ကအာဏာသိမ်းပြီးနောက်ပိုင်း လောင်းကစားနဲ့ မူးယစ်ဆေးလုပ်ငန်း လုပ်ကိုင်သူတွေပေါများလာပြီး၊ စစ်ကောင်စီကို လိုင်းကြေးပေးပြီး ပေါ်ပေါ်ထင်ထင်လုပ်ကိုင်နေကြတာတွေ ရှိသလို၊ ရဲဝန်ထမ်းတွေကိုယ်တိုင်ပါဝင်တဲ့ လောင်းကစားဝိုင်းတွေလည်းရှိတယ်လို့ အထက်ပါအမျိုးသားက ဆက်ပြောပါတယ်။

ပြီးခဲ့တဲ့ဒီဇင်ဘာလ ၄ ရက်ကလည်း ကောလင်းမြို့နယ်၊ ဗျူဟာလမ်းပိုင်းတနေရာမှာ ဘိန်းဖြူတွေနဲ့အတူ မူးယစ်ဆေးအကြီးကျယ်ရောင်းနေတဲ့ လုပ်ငန်းရှင်တဦးကို ကောလင်းမြို့နယ်ပြည်သူ့လုံခြုံရေးအဖွဲ့က ဖမ်းဆီးအရေးယူခဲ့ပါသေးတယ်။

ပဲခူး၊ ဒီဇင်ဘာ ၂၂၊ ၂၀၂၂။

ပဲခူးတိုင်းဒေသကြီး၊ အနောက်ခြမ်းဖြစ်တဲ့ မိုးညို၊ နတ်တလင်း၊ ကြို့ပင်ကောက်၊ အုတ်ဖို၊ ဇီးကုန်း၊ ပေါင်းတည်မြို့နယ်တွေမှာ ရဲ၊ စစ်တပ်၊ ယာဥ်ထိန်းပေါင်းပြီး ဆိုင်ကယ်စီးသူတွေကို ငွေတောင်းကြမ်းနေလို့ ဒေသခံတွေ ခက်ခဲနေတယ်လို့ သိရပါတယ်။

စစ်ကောင်စီတပ်သား၊ ရဲနဲ့ယာဥ်ထိန်းတွေဟာ မြို့တွေရဲ့ လမ်းဆုံလမ်းခွတွေအပါအဝင် ကျေးရွာဘက်ဆင်းတဲ့ လမ်းတွေမှာတောင် ပိတ်ဆို့စစ်ဆေးငွေတောင်းနေလို့ ဒေသခံကျေးရွာနေသူတွေဟာ မြို့ပေါ်တက် ထွက်ကုန်တွေရောင်းချဖို့တောင် ခက်ခဲနေကြတယ်လို့ မိုးညိုဒေသခံတဦးက ပြောပါတယ်။

“ကျွန်တော်တို့ မိုးညိုဘက်မှာဆို မနက် ၅ နာရီလောက်ကတည်းကနေ ညပိုင်းထိဖမ်းနေတာ။ ရွာဘက်က သူတွေ မြို့ပေါ်တက်စျေးတောင်မရောင်းရဲဘူး။ သူတို့နဲ့တွေ့ရင် တခုမဟုတ်တခုအကြောင်းရှာပြီး ငွေတောင်းတယ်။ ကျွန်တော်တောင် တခါ ဖမ်းခံထိတာ ၅၀၀၀၀ မိသွားတယ်။ ကိုယ်တွေ ရွာကလူတွေက အဲလောက်ပိုက်ဆံဆို တပတ်ကျော်လောက်စားလို့ရတယ်လေ။ သူတို့လုပ်မှ လူတွေက ကျီးလန့်စာစားနေရတယ်” လို့ ပြောပါတယ်။

ဆိုင်ကယ်တွေကို စစ်ဆေးချိန်မှာတော့ ယာဥ်လိုင်စင်၊ လူလိုင်စင်၊ ဦးထုပ်၊ ဘက်မှန်၊ နံပါတ်ပြား၊ လေပေါင်တင်းမတင်းတာကအစ စစ်ဆေးနေတယ်လို့ ဆိုပါတယ်။

စစ်ကောင်စီတပ်သား၊ ရဲနဲ့ယာဥ်ထိန်းတွေဟာ ဆိုင်ကယ်ဖမ်းဆီးချိန်မှာ အပြစ်တခုမဟုတ်တခုရှာပြီး ငွေတောင်းနေပြီး အနည်းဆုံးငွေကျပ် ၃၀၀၀၀ ကနေ ကျပ်တသိန်းထိ တောင်းကြတယ်လို့ ဆိုပါတယ်။

“သူတို့လုပ်တာက အခြေခံလူတန်းစားတွေကို ဒုက္ခပေးတာနဲ့တူတူဘဲ။ တမြို့နယ်ထဲလုပ်နေတာမဟုတ်ဘူး။ ပဲခူးအနောက်ခြမ်းမြို့နယ်အားလုံးမှာ တပုံစံတည်းလုပ်နေတာ။ ငွေတောင်းတယ်။ မပေးရင် ဆိုင်ကယ်သိမ်းတယ်။ ဒါက သူတို့ကံကြမ္မာကို သူတို့ဖန်တီးနေတာဘဲ။ ဒီလိုလုပ်လေ လူထုက သူတို့ကို မုန်းလေစိတ်နာလေဘဲ။ ဖမ်းခံထိတဲ့ အထဲမှာ စကစ ထောက်ခံသူ၊ ပါဝင်နေသူတွေတောင် ဖမ်းတာဘဲ။ ဖမ်းဆီးရေးတာဝန်ရှိတဲ့သူတွေက ငွေရဖို့တခုတည်းဘဲ ကြည့်တော့တာ”လို့ ပဲခူးတိုင်းဒေသကြီး ပြည်သူ့ကာကွယ်ရေးတပ်ဖွဲ့ တာဝန်ရှိသူတဦးက ပြောပါတယ်။

ပဲခူးတိုင်းအနောက်ခြမ်းက မြို့နယ်တွေမှာ စစ်ကောင်စီလက်အောက်ခံဌာနဆိုင်ရာရုံး၊ စစ်ကောင်စီခန့် အုပ်ချုပ်ရေးမှူးတွေ၊ စစ်ကောင်စီဂိတ်စခန်းတွေကို ဆိုင်ကယ်စီးနင်းလာသူတွေက ပစ်ခတ်တိုက်ခိုက်တာတွေ မကြာခဏခံနေရလို့ စစ်ကောင်စီဘက်က ဆိုင်ကယ်စီးသူတွေကို တင်းတင်းကြပ်ကြပ် စစ်ဆေးနေတာလို့ သိရပါတယ်။

ဒါအပြင် စစ်ကောင်စီတပ်သားတွေနဲ့ လက်အောက်ခံအဖွဲ့တွေကတော့ လုပ်ပိုင်ခွင့်ကို အသုံးချပြီး ကိုယ်ကျိုးအတွက် ငွေတောင်းကြမ်းနေတယ်လို့ ဆိုပါတယ်။

ပဲခူး၊ ဒီဇင်ဘာ ၂၁၊ ၂၀၂၂။

ပဲခူးတိုင်း၊ ပြည်ခရိုင်၊ ပန်းတောင်းမြို့နယ်အတွင်းက ပြည်- တောင်ကုတ်ကားလမ်းမှာ ဒီဇင်ဘာလ ၂၀ ရက်က ပျက်နေတဲ့ကုန်ကားကိုဆွဲလာတဲ့ ကရိန်းကား အရှိန်လွန်ပြီး ယာဥ်နှစ်စီးစလုံးလမ်းအောက်ထိုးကျရာက ယာဥ်မောင်းတဦးသေဆုံးခဲ့တယ်လို့ သိရပါတယ်။

ပြည်-တောင်ကုတ်ကားလမ်းအတိုင်း ပြည်ဘက်ကိုမောင်းလာချိန် ညောင်ကျိုးရွာအနီး ဆင်လန်တောင်ကုန်းအကွေ့နားမှာ မနေ့ညနေ ၄ နာရီလောက်က အရှိန်လွန်ကာလမ်းအောက်ဘယ်ဘက်ခြမ်းကို ထိုးကျရာက ကရိန်းယာဥ်မောင်းသေဆုံးခဲ့တာ ဖြစ်ပါတယ်။

“နောက်က NISSAN DIESEL ခြောက်ဘီးကုန်ကားက မှောက်ထားလို့ ကရိန်းနဲ့သွားဆွဲတာ အခုဖြစ်တဲ့နေရာက လေးထပ်ကွေ့ အပေါ်ဆုံးထပ်ကို ရောက်တဲ့အချိန်မှာ ကရိန်းကအရှိန်နည်းပြီး အောက်ကိုကျသွားတာ၊ အဲတော့နောက်ကဆွဲလာတဲ့ ကားပါအောက်ကိုကျပြီး ကရိန်းပေါ်ကိုပိတာမှာ ကရိန်းယာဥ်မောင်းကဆုံးသွားတာ” လို့ ဒေသခံတဦးက ပြောပါတယ်။

သေဆုံးတဲ့ကရိန်းယာဥ်မောင်းဟာ ပြည်မြို့မှာနေထိုင်တဲ့ အသက် ၃၅ နှစ်အရွယ် ကိုဇော်မြင့်ဦး ဖြစ်ပြီး သူ့ကို အေးသုခလူမှုကူညီရေးအသင်း(ဥသျစ်ပင်)၊ ပြည်မြို့ကပရဟိတပါရမီနဲ့ ကရုဏသိဒ္ဒိအသင်းတို့က ခက်ခဲစွာတူးဖော်ရှာဖွေခဲ့ရတယ်လို့ ကိုယ်တိုင်မြင်တွေ့သူ တဦးဆီက သိရပါတယ်။

ယာဥ်မတော်တဆမှုကို ပန်းတောင်းမြို့နယ်အပိုင် ဥသျစ်ပင်နယ်မြေရဲစခန်းက အမှုဖွင့်လှစ်ထားတယ်လို့ သိရပါတယ်။

ပဲခူး၊ ဒီဇင်ဘာ ၂၁၊ ၂၀၂၂။

ပဲခူးတိုင်း​ဒေသကြီး၊ တောင်ငူခရိုင်၊ ထန်းတပင်မြို့နယ်၊ ကျီတော်ကျေးရွာအုပ်ချုပ်ရေးမှူးပစ်သတ်ခံရတယ်လို့ သိရပါတယ်။

ဒီဇင်ဘာလ ၂၀ ရက်နေ့ မနက် ၅ နာရီကျော်ခန့်မှာ ကျီတော်ကျေးရွာအုပ်ချုပ်ရေးမှူး ဦးဌေးအောင်ကို နေအိမ်မှာပဲ ဒေသကာကွယ်ရေးအဖွဲ့တွေက ပစ်ခတ်ရှင်းလင်းခဲ့တာဖြစ်တယ်လို့ ပဲခူးတိုင်းဒေသကြီးပြည်သူ့ကာကွယ်ရေးတပ်ဖွဲ့ တာဝန်ရှိသူက ပြောပါတယ်။

“သူ့သမက်က စကစတပ်က အရာရှိဖြစ်တယ်။ ထန်းတပင်မှာ စကစ အားကိုးရဆုံး အုပ်ချုပ်ရေးမှူးတယောက်ဖြစ်တယ်။ ဒါကြောင့်လဲဒီဘက်က အဖွဲ့တွေကပစ်ခတ်ရှင်းလင်းလိုက်တာဖြစ်တယ်။” လို့ ပြောပါတယ်။

သေနတ်နဲ့ပစ်ခံရလို့ အုပ်ချုပ်ရေးမှူး ဦးဌေးအောင် ၅၆ နှစ်ဟာ ဦးခေါင်း၊ ဝမ်းဗိုက်တွေမှာ သေနတ်ဒဏ်ရာ ၇ ချက်ရရှိပြီး နေရာမှာဘဲ သေဆုံးသွားတယ်လို့ ဆိုပါတယ်။

အုပ်ချုပ်ရေးမှူး ဦးဌေးအောင်ကို နန်းထိုက်အောင်စစ်ဆင်ရေးအနေနဲ့ ထန်းတပင်ပကဖ (ကျွဲရိုင်းအဖွဲ့) ကရှင်းလင်းခဲ့တာ ဖြစ်ပါတယ်။

ဦးဌေးအောင်ရဲ့သားမက်ဖြစ်သူဟာ စစ်ကောင်စီရဲ့ အမှတ်(၄၀၂)ခြေမြန်တပ်ရင်းမှ ဗိုလ်ကြီးရဲဝင်းအောင် (ကြည်း-၅၉၉၉၀) ဖြစ်​ပြီး သားမက်အားကိုး၊ စစ်ကောင်စီအားကိုးနဲ့ ပြည်သူအပေါ် ထင်တိုင်းကြဲအနိုင်ကျင့် ဗိုလ်ကျနေသူဖြစ်တယ်လို့ ဆိုပါတယ်။

ထန်းတပင်မြိုနယ်ထဲမှာ စစ်ကောင်စီဒေါက်တိုင်အုပ်ချုပ်ရေးမှူးတွေနဲ့စစ်ကောင်စီအဖွဲ့တွေ မကြာခဏတိုက်ခိုက်ခံရပြီး ထိခိုက်သေဆုံးတာတွေရှိနေတာပါ။

ပဲခူး၊ ဒီဇင်ဘာ ၂၀၊ ၂၀၂၂။

ပဲခူးတိုင်းအနောက်ခြမ်း၊ သာယာဝတိမြို့မှာ ဒီဇင်ဘာလ ၁၉ ရက်မနေ့ညက ကင်းလှည့်နေတဲ့ စစ်သားနဲ့ရဲတွေကို မိုင်းဆွဲတိုက်ခိုက်ခဲ့တယ်လို့ သာယာဝတီဂဠုန်တပ်ဖွဲ့သတင်းတာဝန်ခံဆီက သိရပါတယ်။ ​

သာယာဝတီမြို့ရန်ကုန်-ပြည်လမ်းမှာရှိတဲ့ တိုးဂိတ်အနီးမှာ အင်အား ၁၂ ဦးလောက်နဲ့ ညကင်းလှည့်နေတဲ့အဖွဲ့ကို မနေ့ည ၉ နာရီခွဲလောက်က လက်လုပ်မိုင်း ၂ လုံးနဲ့တိုက်ခိုက်ခဲ့တာလို့ သိရပါတယ်။

“မိုင်းဆွဲပြီးတဲ့အချိန်မှာ စစ်ကောင်စီတွေဘက်က သေနတ်ဖောက်သံတွေအဆက်မပြတ်ထွက်လာတယ်။ သိပ်မကြာဘူး လူနာတင်ကားတွေ သွားတာမြင်လိုက်ရတယ် မိုင်းဆွဲတိုက်ခိုက်ခဲ့တာကြောင့် စစ်ကောင်စီတပ်ဖွဲ့ဝင်တွေသေဆုံးနိုင်ခြေရှိသလို ပြင်းထန်ဒဏ်ရာရသူတွေလည်း ရှိနိုင်တယ်”လို့ ဂဠုန်တပ်ဖွဲ့ဝင်တဦးက ပြောပါတယ်။

သာယာဝတီမြို့နယ်အတွင်းမှာ စစ်ကောင်စီက တမြို့နယ်လုံးကို လုံခြုံရေးတင်းကြပ်ထားတဲ့အပြင် ပြည်သူလူထုကိုလည်းနည်းမျိုးစုံနဲ့စစ်ဆေးဖမ်းဆီးတာတွေ နေ့စဉ်ဆိုသလို ပြုလုပ်နေတာကြောင့် ပဲခူးတိုင်းနန်းထိုက်အောင်စစ်ဆင်ရေးအဖြစ် တိုက်ခိုက်ခဲ့တာဖြစ်တယ်လို့ သူကဆက်ပြောပါတယ်။

သာယာဝတီဂဠုန်တပ်ဖွဲ့ဟာ မကြာခဏဆိုသလို နန်းထိုက်အောင်စစ်ဆင်ရေးအဖြစ် တိုက်ခိုက်မှုတွေပြုလုပ်နေပြီး ပြီးခဲ့တဲ့နိုဝင်ဘာလ ၂ ရက်ကလည်းပျူစောထီးခေါင်းဆောင်လို့ ဒေသတွင်းသတင်းကြီးသူကြံ့ခိုင်ရေးလွှတ်တော်အမတ်ဟောင်း ဦးမောင်မောင်ရဲ့တပည့် တပ်ထောက်ခံပွဲတွေဦးဆောင်သူ ကိုပိုက်တင်ဆိုသူကိုလည်းသေနတ်နဲ့ပစ်ခတ်ရှင်းလင်းခဲ့ပါသေးတယ်။

ပဲခူး၊ ဒီဇင်ဘာ ၁၅၊ ၂၀၂၂။

ပဲခူးတိုင်း၊ ပြည်မြို့နယ်တိုင်းဒေသကြီးလွှတ်တော်ကိုယ်စားလှယ် ဦးကျော်ဇေယျကို စစ်ကောင်စီက ဒီဇင်ဘာ ၁၂ ရက် မနေ့က ပုဒ်မ ၆ ခုနဲ့ ထောင်ဒဏ် ၁၉ နှစ်ချမှတ်ခဲ့တယ်လို့မိသားစုဆီက သိရပါတယ်။

NLD အမတ် ဦးကျော်ဇေယျကို စစ်ကောင်စီတပ်ဖွဲ့တွေက ပြီးခဲ့တဲ့ ဇွန်လ ၉ ရက်မှာဖမ်းဆီးလိုက်ပြီး ရေကြည်အိုင် စစ်ကြောရေးမှာ ၁၀ ရက် ဖမ်းဆီးစစ်ဆေးခံရပြီးနောက် ဇူလိုင် ၂၉ ရက်မှာ ပြည်မြို့ ဒကစကို ပို့ကာ သြဂုတ် ၈ ရက်မှာတော့ပြည်ထောင်ကိုရောက်ရှိခဲ့ပါတယ်။

ဖမ်းဆီးခဲ့ပြီးတဲ့နောက် စစ်ကောင်စီက ဦးကျော်ဇေယျကို ပုဒ်မ ၆ ခုဖြစ်တဲ့ အကြမ်းဖက်မှု ၊ ရွေးကောက်ပွဲ ၊ ၅၀၅(က) ၂ ခါ ၊ ယစ်မျိုး ၊ ဘေးစီမံ စတဲ့ပစ်မှုတွေနဲ့ ဖမ်းဆီးထားပြီ ၆ လအကြာမှာ အမိန့်ချခဲ့တယ်လို့လည်းဆိုပါတယ်။

“ရေကြည်အိုင်စစ်ကြောရေးမှာ စုတ်ပြတ်သတ်နေအောင်ရိုက်တာ လူရုပ်တောင်မပေါ်ဘူး။ဖမ်းဆီးခံရတဲ့ ၆လလုံး မိသားစုဝင်တွေနဲ့ တွေ့ခွင့်မပေးပါဘူး။ စာတောင်ပေးလို့မရဘူးအခုလိုအမိန့်ချခံရတာတော့ခံပြင်းတာပေါ့။ မတရားအမိန့်တွေ သူတို့ချချင်သလိုချနေတာ မတရားမှန်းသိပေမဲ့လည်း အခုချိန်တော့ ကိုယ့်လူနေကောင်းကျန်းမာဖို့ဘဲအရေးကြီးတယ်ကိုယ့်ထက်တောင်ပေးဆပ်ထားရသူတွေတပုံကြီးရှိသေးတာပဲ ”လို့ ဦးကျော်ဇေယျရဲ့အမျိုးသမီးက မြေလတ်အသံကို ပြောပါတယ်။

ပြည်ထောင်တွင်းတရားရုံးမှာ ဦးကျော်ဇေယျကို ထောင်ဒဏ် (၁၉) နှစ်ချမှတ်တာကိုမိသားစုဝင်တွေက ကိုယ်တိုင်သွားပြီး ကြားနာရခြင်းမျိုးမဟုတ်ပဲ တဆင့်ပြောစကားကသာသိရှိရတယ်လို့ ဆိုပါတယ်။

ဦးကျော်ဇေယျဟာ ၂၀၁၅ ကနေ ၂၀၂၀ အထိရွေးကောက်ပွဲမှာ အနိုင်ရလွှတ်တော်ကိုယ်စားလှယ်တဦးဖြစ်ကာ လက်ရှိပြည်မြို့မှာ နိုင်ငံရေးမှုနဲ့ ဖမ်းခံထားရသူ ၅၀ဦးထက်မနည်းရှိနေပါတယ်။