ပဲခူး

ပဲခူး၊ သြဂုတ် ၉၊ ၂၀၂၂။

ပဲခူးရိုးမအနောက်ဘက်ခြမ်း သာယာဝတီခရိုင် အုတ်ဖိုမြို့နယ်ထဲက ကျေးရွာနေပြည်သူတွေ စစ်ကောင်စီနဲ့ ပူးပေါင်းမှုမရှိပါက နေအိမ်တွေကို မီးရိူ့ပစ်မယ်ဆိုကာ ခြိမ်းခြောက်နေတယ်လို့ ဒေသခံတွေက ပြောပါတယ်။

အဲဒီအထဲမှာ ကပစတပ်က စစ်သားတွေအများစုဖြစ်ပြီး စစ်မူထမ်းဟောင်းတွေနဲ့ ပျူစောထီးတွေလည်း ပါဝင်တယ်လို့ ဆိုပါတယ်။

“တောင်ခြေရွာတွေက ကြောက်လို့ ထွက်ပြေးတဲ့ အိမ်တွေမှာနေပြီး မွေးထားတဲ့ ကြက်တွေ ဝက်တွေ အကုန်ချက်စားတယ် ဆိုင်ကယ်တွေဆို သပ်သပ်ယူကိုသွားတာ ၅စီးရှိပြီ ရိက္ခာဆိုလဲ ဆိုင်တွေမဖွင့်ရဲတော့ဘူး ဝိုင်းအုပ်စုထဲက တာဝါတိုင်ရွာ ကန့်နီရွာ၊ မြေပြာရွာ ချောင်းစောက်ရွာ ကိုင်းချိုကြီးရွာ အဲဒီ ၅ရွာကို သူတို့ဘက်မပါရင် မီးရှို့ပစ်မယ်လို့ စစ်တပ်က ရွာထဲမှာ ခြိမ်းခြောက်တာ က.ပ.စတပ်ရယ် စစ်သားဟောင်းတွေရယ် ပျူတွေရယ် ပါတယ်လေ” လို့ ဒေသခံတွေနဲ့ နီးစပ်သူတဦးက ပြောပါတယ်။

စစ်ကောင်စီတွေမှာ လက်နက်ငယ်တွေအပြင် RPG ၅ လက်၊ ၄၀ မမ ဗုံးသီးတွေလည်းပါဝင်ပြီး နေ့စဥ်သောက်စားမူးယစ်နေကြသလို နေအိမ်အတွင်းက ပစ္စည်းတွေကို အုပ်စုဖွဲ့ ခိုးယူတာအပြင် တဦးချင်းခိုးယူတာတွေလည်း ရှိတယ်လို့ သိရပါတယ်။

အဲဒီဒေသမှာ မကြာခဏ စစ်ကောင်စီနဲ့ ဒေသခံ ပီဒီအက်ဖ်တွေ ထိတွေ့တိုက်ပွဲဖြစ်ပွားခဲ့ပြီး စစ်ကောင်စီက အထိနာနေတာလည်းဖြစ်သလို စစ်ကောင်စီက အခုလိုရွာထဲမှာ ဝင်ရောက်တပ်စွဲနေတဲ့ အတွက် ဒေသခံ ရွာသားတွေဟာ နေအိမ်တွေကို စွန့်ခွာပြေးနေရတယ်လို့ သိရပါတယ်။

ပဲခူး၊ ဇူလိုင် ၂၉၊ ၂၀၂၂။

ပဲခူးတိုင်းအနောက်ခြမ်း၊ ပေါင်းတည်မြို့နယ်၊ ပဲခူးရိုးမအစပ်မှာ စစ်ကောင်စီတပ်တွေက ဇူလိူင် ၂၉ ရက် ဒီနေ့မက်ပိုင်းကစလို့ လေယာဥ် ၂စီးနဲ့ ဝဲပျံကာ မြေပြင်ကလည်း တပ်အင်အားဖြည့်တင်းနေတယ်လို့ ဒေသခံတွေက ပြောတယ်။

ဒေသခံကျေးရွာတွေကိုလည်း ရဟတ်ယာဥ်တွေ ပျံသန်းခဲ့တာကြောင့် ရွာသားတွေလည်း ကြောက်ရွှံ ပုန်းရှောင်ကြတယ်လို့ ဆိုပါတယ်။

“မနက်ကလေယာဥ် ၂ စီးပေါ်မှာ စစ်သားတွေက လက်နက်တွေကို မြေပြင်ကို ချိန်ပြီး ဝဲနေတယ် တော်တော်ကြာတယ် ရွာတွေဖက်ကလည်း ကြောက်လို့ ရှောင်နေကြတာ အခုတော့ လေယာဥ်ပျံတာမျိုး မရှိတော့ဘူး “လို့ မျက်မြင်တွေခဲ့ရတဲ့ ဒေသခံတွေက ပြောပါတယ်။

စစ်ယာဥ်တန်းတွေနဲ့ တောင်ပေါ်ဒေသဘက်ကို စစ်ကူပို့နေတာလို့ ဆိုပါတယ်။

“ရဲကားတွေ စစ်ကားတွေလည်းပါတယ် စစ်သား ၆ ယောက်ကလည်း ဆိုင်ကယ် ၃ စီးနဲ့ စစ်ရောင် DCကားပေါ်မှာလည်း စစ်သားအပြည့်နဲ့ အင်အား စုစုပေါင်း ၃၀ လောက်တော့ရှိမယ် တောင်ပေါ်ဒေသဘက်ကို ဝါယာလက်စက်တွေရောပါသွားတယ် ညကတည်းက စစ်ကားက ၆ စီးလောက်တက်နေတာ “လို့ ဒေသခံတွေကပြောပါတယ်။

လက်ရှိမှာတော့ စစ်ကောင်စီဘက်က စစ်ကြောင်းထိုးကာ တောနင်းတာမျိုး မပြုလုပ်သေးပဲ အင်အားဖြည့်တင်းနေပြီး ဒေသခံတွေကတော့ စိုးရိမ်​နေကြပါတယ်။

ပေါင်းတည် PPDFရဲ့ လက်ချက်နဲ့ ဇူလိူင် ၂၈ ရက်မနေ့က စစ်ကောင်စီဘက်က သိမ်ကုန်းကျေးရွာ တာဝါတိုင်စောင့် အရာရှိတဦးအပါ စစ်သား ၄ ဦး သေဆုံးတာနဲ့ ပတ်သက်ပြီး မကျေနပ်တာကြောင့် အခုလို လေယာဥ်နဲ့ ဝဲပျံ ခြိမ်းခြောက်ကာ အင်အားဖြည့်တင်း နေတာဖြစ်တယ်လို့ ဒေသခံတွေဆီက သိရပါတယ်။

ပဲခူး၊ ဇူလိုင် ၂၆၊ ၂၀၂၂။

ပဲခူးတိုင်းအနောက်ခြမ်း၊ သာယာဝတီခရိုင်၊ နတ်တလင်းမြို့နယ်ထဲ ဒေသခံတပ်ဖွဲ့ရဲ့ တိုက်ခိုက်တာကြောင့် အထိနာနေတဲ့ စစ်ကောင်စီဟာ ဇူလိူင် ၂၅ ရက်မနေ့က စလို့ စစ်သားအင်အားထပ်မံဖြည့်တင်းနေတယ်လို့ ဒေသခံတဦးက မြေလတ်အသံကို ပြောပါတယ်။

နတ်တလင်းမြို့နယ်အရှေ့ဘက် ပဲခူးရိုးမအစပ်မှာ တပ်စွဲထားတဲ့ စစ်ကောင်စီတပ်တွေဟာ PDFတွေရဲ့ အလစ်အငိုက် တိုက်ခိုက်ခံနေရတာကြောင့် မကြာခဏဆိုသလို သေဆုံးထိခိုက် ဒဏ်ရာရနေကြတာ ဖြစ်ပါတယ်။

“လောလောဆယ်က စစ်ကောင်စီဘက်က အင်အားထပ်ဖြည့်လာတာရှိပါတယ် ဘယ်တပ်ကလည်း ဆိုတာကတော့ မသိရဘူး အခုဆို သူတို့မှာ အင်အား ၅၀ လောက်တော့ ရှိမယ်”လို့ နတ်တလင်း Phoenix DFက ပြောပါတယ်။

စစ်သားအင်အား ၁၅ ဦးလောက်ပါတဲ့ ကားတစီးနဲ့ ပဲခူးရိုးမတောင်ခြေအစပ်ဘက် တက်သွားတာကို မြင်တွေ့ခဲ့ရတယ်လို့ ဆိုပါတယ်။

“မနေ့က နေ့လည် ၂ နာရီ ခွဲလောက်က နတ်တလင်းမြို့ သံဖြူရုံဂိတ်မှာ စစ်သားအင်အား ၁၅ ဦးလောက်ပါတဲ့ DC ကားတစီး ခဏရပ်ပြီး ပဲခူးရိုးမအစပ်ကို တက်သွားတာ တွေ့လိုက်တယ်”လို့ မျက်မြင်တွေ့သူ မြို့ခံတဦးက ပြောပါတယ်။

ဇူလိုင် ၂၅ ရက်မနေ့က ကြက်မနက်ရွာ တိုက်ခိုက်ခံရမှုမှာ Phoenix DF တပ်ဖွဲ့က စစ်ကောင်စီ ၃ ဦး သေဆုံးပြီး အရာရှိ တဦးအပါ အများအပြား ဒဏ်ရာရတယ်လို့ သတင်းထုတ်ပြန်ခဲ့ပေမယ့် ဒေသခံတွေအဆိုအရ စစ်သားအလောင်းအချို့ လျှိုမြောင်ထဲ ပစ်ချတာတွေလည်းရှိပြီး အရာရှိတဦးလည်း ရင်ဘတ်မှာ ဒဏ်ရာရသွားတယ်လို့ ပြောဆိုပြီး မြေလတ်အသံအနေနဲ့ကတော့ အတည်ပြုလို့မရသေးပါဘူး။

ပဲခူး၊ ဇူလိုင် ၁၂၊ ၂၀၂၂။

ပြည်ခရိုင်၊ သဲကုန်းမြို့နယ်၊ ပုတီးကုန်းရဲစခန်းအပိုင် ကျေးရွာတရွာမှာ ပုပ်ပွသေဆုံးနေတဲ့ အလောင်းကို ဇူလိူင် ၉ ရက်ညနေက တွေ့ရှိခဲ့ပြီး အဲဒီညနေမှာပဲ ရဲက ဆေးစစ်ချက်မယူပဲ မီးသဂြိုဟ်ခဲ့တယ်လို့ ဒေသခံတွေဆီက သိရပါတယ်။

သေဆုံးသူဟာ ပုတီးကုန်းမြို့ ရင်းတိုက်မှော်အုပ်စု သခွတ်စောက်ကျေးရွာက အသက် ၂၉နှစ်အရွယ် ကိုအောင်ကိုဝင်း ဆိုသူ ဖြစ်တယ်လို့ ဆိုပါတယ်။

“အလောင်းက ရင်းတိုက်မှော်ရွာအနီးက ကိုင်းတောထဲမှာ သေနေတာ ပိုးတွေလည်း တွယ်နေတယ်လို့ပြောတယ် ဘာဖြစ်သေမှန်းမသိဘူး ဒါကိုရဲက ဆေးစစ်ချက်မယူပဲ တခါတည်း မီးသဂြိုဟ်ခိုင်းလို့ ​သဂြိုဟ်ရတာကို မိသားစုဝင်တွေက သံယဝင်နေတယ် ခုဟာက ဘယ်လိုဖြစ် သေမှန်းမသိဘူး သူများပဲ သတ်သလားပေါ့ “လို့ မိသားစုနဲ့ နီးစပ်သူတဦးကပြောပါတယ်။

အခုလို အကြောင်းရင်း မသိရပဲ သေဆုံးနေတဲ့ရုပ်အလောင်းတွေကို တွေ့ရှိပါက ရဲက သေမှုသေခင်းဖွင့် စစ်ဆေးရပြီး ဆေးစစ်ချက်ယူရသလို ဓမ္မတာအတိုင်း သေဆုံးခြင်း ဟုတ်မဟုတ် စစ်ဆေးရပေမယ့် အခုလို လူတယောက်ရဲ့ အသက်တချောင်းကို ပေါ့ပေါ့ဆဆ သဘောထားတာဟာ ဥပဒေလုပ်ထုံးလုပ်နည်းနဲ့ မညီညွတ်​ဘူးလို့လည်း အငြိမ်းစားရဲတပ်ဖွဲ့ဝင်တဦးက ဆိုပါတယ်။

သေဆုံးသူဟာ အလောင်းမတွေ့ရှိမီ ၇ ရက်အကြာလောက်ကတည်းက ပျောက်ဆုံးနေတာဖြစ်ပြီး အလောင်းကိုဝက်ပုတ်ပရဟိတအသင်းက ယာဥ်နဲ့ သယ်ဆောင်ကာ ဝက်ပုတ်နယ်ထဲမှာပဲ မီးသဂြိုဟ်ခဲ့တာလို့ သိရပါတယ်။

ပဲခူး၊ ဇူလိုင် ၁၂၊ ၂၀၂၂။

ပဲခူးတိုင်းဒေသကြီး(အနောက်ပိုင်း)၊ ပြည်မြို့နယ် တိုင်းဒေသကြီးလွှတ်တော်ကိုယ်စားလှယ် ဦးကျော်ဇေယျ ဖမ်းဆီးခံရပြီးနောက် ဒေသခံတချို့ကို ဆက်တိုက်ဆိုသလို ဖမ်းဆီးခံနေရတယ်လို့ မြို့ခံတွေကပြောပါတယ်။

ပြီးခဲ့တဲ့ ဇွန်လ ၉ ရက်နေ့က ရန်ကုန်မြို့မှာ ဦးကျော်ဇေယျအပါအဝင် ၄ ဦးဖမ်းဆီးခံခဲ့ရပြီး ပြည်မြို့ကို လွှဲပြောင်းပေးလိုက်တယ်ဆိုတဲ့ သတင်းတွေထွက်ပေါ်ခဲ့ပြီး ဘယ်နေရာမှာထိန်းသိမ်းထားတယ် ဆိုတာ တိကျစွာမပြောနိုင်သေးချိန်မှာပဲ သံသယရှိတဲ့ဒေသခံတချို့ကို စစ်ကောင်စီက လိုက်လံဖမ်းဆီးနေတာပါ။

“အဖမ်းခံနေရတာကတော့ ဆက်တိုက်ပဲ အရင် NLD ပြန်ကြားရေးလုပ်ခဲ့ဖူးသူလည်း အဖမ်းခံလိုက်ရတယ်။ နောက် မြို့ကနာမည်ကြီးစီးပွားရေးသမားတယောက်လည်း လာဖမ်းသွားတယ်။ ပြန်လွှတ်မလွှတ်တော့မသိဘူး နောက်ပြီး ပေါင်းတလည်နဲ့ ဝက်ထီးကန်မြို့တွေမှာလည်း ဖုန်းနဲ့လိုက်တိုက်စစ်ပြီး ရှာတယ်။ တချို့လည်း ရှောင်နေကြတယ်။ ကိုကျော်ဇေယျနဲ့ ဆက်စပ်မှုရှိတယ်မရှိဘူးကတော့ သေချာမပြောနိုင်ဘူး” လို့ မြို့ခံအမျိုးသားတဦးကပြောပါတယ်။

ပေါင်းတလည်မြို့က စစ်ကောင်စီခန့် ရပ်ကွက်အုပ်ချုပ်ရေးမှူးတဦး၊ ယခင် NLD ပါတီသတင်းနဲ့ပြန်ကြားရေးအဖွဲ့ဝင်တဦး၊ စီးပွားရေးလုပ်ငန်းရှင်တဦးနဲ့ အခြား ဖမ်းဆီးခံရသူ ၅ ဦးထက်မနည်းရှိတယ်လို့ မြို့ခံတွေက ဆိုပါတယ်။

အဲဒီလို ကိုကျော်ဇေယျအပါအဝင် ဖမ်းဆီးခံခဲ့ရသူတွေနဲ့ နောက်ဆက်တွဲ ဖမ်းဆီးခံရသူတွေကိုပါ စစ်ကောင်စီနဲ့ NUG၊ သက်ဆိုင်ရာအဖွဲ့အစည်းတွေက တရားဝင်သတင်းထုတ်ပြန်ခြင်းမရှိသေးတဲ့အပေါ် လူထုက စိုးရိမ်နေကြတယ်လို့ဆိုပါတယ်။

“ဘယ်မှာဖမ်းမိပြီး ဘယ်ကိုပို့တယ်ဆိုတာ ကျနော်တို့သိရသလောက်ကတော့ တိတိကျကျ ပြောနိုင်သူမရှိဘူး။ ထုတ်ပြန်တာလည်းမတွေ့ရတော့ မြို့ခံတွေနဲ့ ပတ်သက်စပ်ဆက်သူတွေက စိုးရိမ်တာပေါ့ဗျာ။ အဖမ်းခံနေရတဲ့သူတွေလည်း ရှိနေတော့။ ကျနော်ပြောချင်တာကတော့ ကိုယ့်အခြေအနေကိုယ်သိပေါ့ဗျာ။ စပ်ဆက်ပတ်သက်မှုကြီးကြီးရှိနေတယ်ဆိုရင်တော့ အဖမ်းမခံရခင် ရှောင်နေတာအကောင်းဆုံးပါပဲ။” လို့ မြို့ခံတဦးကပြောပါတယ်။

ဦးကျော်ဇေယျ ဟာ အမျိုးသားဒီမိုကရေစီအဖွဲ့ချုပ်ပါတီရဲ့ ပြည်မြို့နယ် တိုင်းဒေသကြီးလွှတ်တော်ကိုယ်စားလှယ်အဖြစ် ၂၀၁၅၊ ၂၀၂၀ ရွေးကောက်ပွဲများမှာ အနိုင်ရကိုယ်စားလှယ်ဖြစ်ခဲ့ပြီး စစ်အာဏာသိမ်းပြီးနောက်ပိုင်းမှာလည်း အာဏာရှင်ဆန့်ကျင်တော်လှန်ရေးတွေ ဆက်လက်လုပ်ဆောင်ခဲ့လို့ သူငှားရမ်းနေထိုင်ခဲ့တဲ့ အိမ်အပါအဝင် ပိုင်ဆိုင်မှုတွေကိုပါ ချိတ်ပိတ်သိမ်းဆည်းခံထားရသူဖြစ်ပါတယ်။

ပဲခူး၊ ဇူလိုင် ၄၊ ၂၀၂၂။

ပဲခူးတိုင်းအနောက်ခြမ်း၊ ပြည်မြို့က ၇ တန်းကျောင်းသား ၇ ဦးကို ကျောင်းအုပ်ကြီးက ရပ်ကွက်အုပ်ချုပ်ရေးမှူးကို အကြောင်းကြားဖမ်းခိုင်းခဲ့တယ်လို့ မြို့ခံတွေဆီက သိရပါတယ်။

ပြည်မြို့၊ ခေတ္တရာမြို့သစ်မှာရှိတဲ့ အောင်မြေသာယာ မူလတန်းကျောင်းက ၇ တန်းကျောင်းသားတွေက ၂ ပတ်အတွင်း ကျောင်းပိတ်ပေးဖို့ နဲ့ ခြိမ်းခြောက်တဲ့သဘော စာရေးသား ကာ ပေးပို့လို့ဆိုပြီး ကျောင်းအုပ်ကြီးဖြစ်သူက ရပ်ကွက်အုပ်ချုပ်ရေးမှူးကို အကြောင်းကြားဖမ်းခိုင်းလို့ ဖမ်းဆီးခဲ့တာဖြစ်တယ်လို့ မြို့ခံတွေက ပြောပါတယ်။

“သိတာတော့ ကလေးတွေက ရုံးခန်းထဲက စားပွဲခုံကိုဆိုလား စာခေါက်လေးသွားတင်တာ။ အဲဒီမှာ သူတို့ကိုခြိမ်းခြောက်ပါတယ်ဆိုပြီး ကြောက်လန့်ပြီး ရပ်ကွက်အုပ်ချုပ်ရေးမှူးကို အကြောင်းကြားလိုက်တော့ အုပ်ချုပ်ရေးမှူးနဲ့ စစ်တပ်က စစ်ကားတွေနဲ့ ကလေးတွေ အိမ်တွေကို လာခေါ်ဖမ်းသွားတာ။ စာရေးထားတဲ့စာရွက်က စာလုံးပေါင်းတောင်မမှန်ပါဘူး အဲဒါကိုကလေးတွေကို စစ်ကားတွေနဲ့လာဖမ်းကြတာ” လို့ မြို့ခံတဦးကဆိုပါတယ်။

ဇူလိုင်လ ၁ ရက်နေ့က ဖမ်းဆီးသွားတဲ့ ကျောင်းသား ၇ ဦးထဲက ၆ ဦးကိုတော့ ပြန်လည်လွှတ်ပေးခဲ့ပြီး ခေါင်းဆောင်လို့ယူဆရတဲ့ ကျောင်းသားကိုတော့ ပြန်လွှတ်မပေးသေးဘူးလို့ ဆက်ပြောပါတယ်။