ပဲခူး၊ ဒီဇင်ဘာ ၂၅၊ ၂၀၂၁။

ဘူတာပိုင်မြေတွေမှာ နေထိုင်သူတွေ ဒီဇင်ဘာလအကုန်အပြီးဖယ်ပေးရမှာဖြစ်ပြီး မဖယ်ပေးသူတွေကို စစ်ကောင်စီက အင်အားသုံးပြီး ဖယ်ရှားမယ်လို့ အကြောင်းကြားစာတွေ သက်ဆိုင်ရာမြို့တွေမှာ ထုတ်ပြန်ထားပါတယ်။

ပြည်၊ လက်ပံတန်း၊ ပေါင်းတည် မြို့တွေက ဘူတာ‌ပိုင်မြေတွေမှာ နေတဲ့ သူတွေကို အဲ့ဒီအကြောင်းကြားစာ ပို့ထားခဲ့ပြီး အဲဒီနို့တစ်စာ အပိုဒ်၂ မှာ ရေးသားထားတာကတော့ “အိမ်ဥပစာမှထွက်ခွာ၍မသွားလျင် သင်သည် အနိုင်ထက်ပြုမူမူဖြင့် အဲဒီအိမ်ကနေ ဖယ်ရှားခြင်းခံရလိမ့်မယ်”လို့ဖော်ပြထားတယ်လို့ဆိုပါတယ်။

“ဇီးဖြူကုန်းကိုပေးထားတဲ့စာကိုဖတ်ကြည့်တော့ ဒီဇင်ဘာ၃၁ရက်‌ နောက်ဆုံးထားပြီးဖယ်ရှားပေးရမယ်လို့အကြောင်းကြားစာထဲမှာပါတယ် ဖယ်မပေးရင်အတင်းဝင်ဖျက်မယ့်သဘောလည်းရေးထားတယ်”လို့ လက်ပံတန်းမြို့ခံတဦးက မြေလတ်အသံကို ပြောပါတယ်။

ပေါင်းတည်မြို့ကနို့တစ်စာပို့ခံထားရတဲ့သူတွေဟာ ကျူးကျော်သူတွေမဟုတ်ပဲ မီးရထားဌာနကိုအခပေးနေထိုင်သူတွေဖြစ်တယ်လို့ သိရပါတယ်။

“ပေါင်းတည် ၃ လမ်းက စား‌သောက်ဆိုင်ခန်းတွေက ကျူးကျော်ဆိုင်တွေမဟုတ်ဘူး မီးရထားကိုအခပေးနေတာ အဲဒါကလည်း အရင်စစ်အာဏာရှင်ခေတ်က ဆောက်ပြီးငှားစားနေတာ ကျူးကျော်တာမဟုတ်ဘူး အခုတော့ညှိနိူင်းနေတယ်လို့ကြားတယ် “ လို့ မြို့ခံတဦး‌က ပြောပါတယ်။

ဟင်္သာတခရိုင်အတွင်းကဘူတာပိုင်မြေမှာ နေထိုင်သူ‌တွေကိုလည်း ဒီဇင်ဘာလအတွင်းအပြီးဖယ်ရှားပေးဖို့ စစ်ကောင်စီကအကြောင်းကြားထားတယ်လို့လည်း သိရပါတယ်။

မီးရထားနယ်မြေအတွင်း ဝင်ရောက်နေထိုင်သူအများစုဟာ မီးရထားဝန်ထမ်းတွေရဲ့သားစဥ်‌မြေးဆက်‌‌ နေထိုင်လာကြတဲ့မိသားစုဝင်‌တွေဖြစ်ပြီး ဖယ်ရှားခံရရင် အိုးအိမ်မဲ့သူတွေဖြစ်သွားနိုင်တယ်လို့ သိရပါတယ်။

ပဲခူး၊ ဒီဇင်ဘာ ၂၃၊ ၂၀၂၁။

ပဲခူးတိုင်းအနောက်ခြမ်း ပေါင်းတည်အကျဥ်းထောင်မှာ ပုဒ်မ၅၀၅ က နဲ့ အကျဥ်းချခံထားရသူ ၉ ဦးကို ဒီနေ့မနက်မှာ အကျဥ်းထောင်တရားရုံးကနေ ထောင်ဒဏ်၂နှစ်စီ ချမှတ်ခဲ့တယ်လို့ မိသားစုဝင်တဦးကပြောပါတယ်။

သူတို့တွေဟာပြီးခဲ့တဲ့ မတ်လ ၂၇ရက် တော်လှန်ရေးနေ့က ပေါင်းတည်မြို့မှာငြိမ်းချမ်းစွာဆန္ဒပြနေတုန်း စစ်ကောင်စီက ပစ်ခတ်ဖြိုခွင်းလို့ ဖမ်းဆီးခံခဲ့ရသူတွေ ဖြစ်ပါတယ်။

“အခုမနက်ပဲ ထောင်တရားရုံးကနေ ပုဒ်မ ၅၀၅ နဲ့ တရားစွဲခံရသူ ၉ဦးကို ထောင်ဒဏ် ၂ နှစ်စီ ချမှတ်လိုက်တယ်၊ အားလုံးက အုန်းနဲစမ်းရွာကပါ၊ အဲ့အထဲမှာမှ ထက်ကိုကိုလင်းဆိုတဲ့ တယောက်ကကျ ပုဒ်မ ၃၀၇နဲ့ ကပ်ခံရပြီး ၃၀၇အတွက်က ထောင်တနှစ်ချလိုက်တော့ သူက သုံးနှစ်ဖြစ်သွားတယ်” လို့ လိုက်ပါအကျိုးဆောင်ပေးနေသူတဦးက ပြောပါတယ်။

သူတို့အားလုံးဟာတရွာတည်းသားတွေဖြစ်ပြီး ချုပ်နှောင်ခံနေရတာ ၉ လရှိပြီဖြစ်ကြောင်း သိရပါတယ်။

ပဲခူး၊ ဒီဇင်ဘာ ၁၈၊ ၂၀၂၁။

ပဲခူးတိုင်းဒေသကြီးအနောက်ခြမ်း၊ သာယာဝတီခရိုင်၊ လက်ပံတန်းမြို့နယ်က သတင်းထောက် တဦးဖြစ်တဲ့ ကိုငြိမ်းချမ်းဝေကို စစ်ကောင်စီက ဒီဇင်ဘာ ၁၆ ရက်နေ့က သာယာဝတီထောင်ရုံး ချိန်းမှာ ပုဒ်မ ၅၀၅(က)အမှုအတွက် ထောင်ဒဏ် ၃ နှစ်အမိန့်ချလိုက်ကြောင်း သိရပါတယ်။

ကိုငြိမ်းချမ်းဝေကို နောက်တိုးအမှုတခုအနေနဲ့ ပုဒ်မ ၁၂၃ (ဂ)နဲ့ ပါ စစ်ကောင်စီက အမှုဖွင့်ထပ်ဖွင့်ထားပြီး၊ သူကိုဖမ်းဆီးချိန်မှာ လက်ပံတန်းမြို့နယ်၊ ခမုံဆိပ်ကျေးရွာက သူတိမ်းရှောင်နေတဲ့နေရာမှာ ဖမ်းဆီးခဲ့ခြင်းဖြစ်ပါတယ်။

အာဏာသိမ်းပြီးနောက်စစ်ကောင်စီက ပုဒ်မ ၅၀၅(က)ဖွင့်ထောင်ချခံရတဲ့ သတင်းသမားတွေကိုပြန်လွှတ်ပေးခဲ့ပေမယ့် ပုဒ်မ၅၀၅ (က)နဲ့ အမှုရင်ဆိုင်နေရတဲ့ ကိုငြိမ်းချမ်းဝေကတော့ ထောင် ၃ နှစ် အမိန့်ချခံလိုက်ရကြောင်း သိရပါတယ်။

ကိုငြိမ်းချမ်းဝေကို မတ်လ ၁၉ ရက်နေ့မှာ ပုဒ်မ၅၀၅ (က)နဲ့စစ်ကောင်စီက ဖမ်းဆီးအမှုဖွင့်ခဲ့တာဖြစ်ပြီး ဒီဇင်ဘာလ ၁၆ ရက်နေ့မှာ၎င်းပုဒ်မအတွက် ရက်ပေါင်း ၂၇၃ ရက်ကြာ တရားရင်ဆိုင်အပြီးမှာ ထောင်ဒဏ် ၃ နှစ်ချမှတ်လိုက်တာဖြစ်ပါတယ်။

ကိုငြိမ်းချမ်းဝေမှာ ပဲခူးမြို့အခြေစိုက် Bago Weekly Journal မှာ နယ်မြေခံသတင်းထောက်အနေနဲ့ သတင်းတွေရေးသားပြီး သူရဲ့ ဂျာနယ်တိုက်ကို မတ်လထဲမှာ စစ်ကောင်စီက ဝင်ရောက်ဖျက်ဆီးခဲ့ကာ၊ သတင်းဌာနရဲ့ Facebook လူမှုကွန်ရက်စာမျက်နှာကိုပါ နည်းပညာအရ ပိတ်ခံထားရတဲ့ သတင်းဌာနတခုဖြစ်ကြောင်း သိရပါတယ်။

ပဲခူး၊ ဒီဇင်ဘာ ၁၄၊ ၂၀၂၁။

ပဲခူးတိုင်းအနောက်ခြမ်း ဇီးကုန်းမြို့မှာစစ်ကောင်စီက ဒီဇင်ဘာလဆန်းပိုင်းကစလို့ နေ့စဥ်ဆိုသလိုလူငယ်တွေကိုဖမ်းစီး စစ်ဆေးနေကြောင်း ဒေသခံတွေဆီက သိရပါတယ်။

စစ်ကောင်စီကအခုလို ဖမ်းဆီးတာ​ကြောင့်လူငယ်တွေအဟာ နေအိမ်မှာမအိပ်ရဲပဲတိမ်းရှောင်နေကြကြောင်း သိရပါတယ်။

“မြို့ပေါ်ကလူငယ်တွေစစ်ကောင်စီကနေ့စဥ်ဆိုသလိုဖမ်းတာကိုခံနေရတယ် နှစ်ရက်သုံးကြာရင်ပြန်လွှတ်တယ် ဘာမှမဟုတ်ဘူးမဲမဲမြင်ရာ ဖမ်းနေကြတာအခုလူငယ်တွေက အိမ်မှာတောင်ရဲရဲမနေရဲကြဘူးအခုဆို ၈ဦး၉ဦးလောက်ရှိနေပြီ မြို့ပေါ်ရပ်ကွက်က ကလေးတွေအများစုပဲ”လို့ မြို့ခံတဦးကပြောပါတယ်။

ဇီးကုန်းမြို့မှာရပ်ကွက် ၅ ခုရှိကြောင်း ဖမ်းဆီးခံရသူအများစုဟာ အပစ်မရှိသူတွေဖြစ်ကြောင်း အခုလိုဖမ်းဆီးခံရတဲ့အတွက် ကလေးငယ်တွေအပြင် မိဘများပါစိုးရိမ်ထိတ်လန့်နေကြောင်းနဲ့ဖမ်းဆီးစစ်မေးခံရသူတွေဟာ ပြန်လွှတ်လာချိန်မှာလည်း ကြောက်ရွံ့စိတ်တွေများနေတာကိုတွေ့ရကြောင်း ဖမ်းဆီးခံရသူနဲ့နီးစပ်သူတဦးကမြေလတ်အသံကိုပြောတယ်။

အခုလိုလူငယ်တွေဖမ်းဆီးခံရတာဟာဇီးကုန်းPDFက အုပ်ချုပ်ရေးမှူးတွေကိုလာမယ့်ဒီဇင်ဘာ၁၅ရက်နေ့အထိနောက်ဆုံးထားနုတ်ထွက်ကြရန် သတိပေးထားတဲ့အတွက်စစ်ကောင်စီကအခုလိုလိုက်လံဖမ်းဆီးနေတာလည်း ဖြစ်နိုင်ကြောင်း မြို့ခံတချို့က သုံးသပ်ပြောဆိုနေကြပါတယ်။

ပဲခူး၊ ဒီဇင်ဘာ ၁၁၊ ၂၀၂၁။

ဒီဇင်ဘာ ၁၀ ရက်နေ့ လူ့အခွင့်အ‌ရေးနေ့ အသံတိတ်သပိတ်တွင် ဆိုင်ပိတ်ခဲ့သည့် ပဲခူးတိုင်းအနောက်ခြမ်း၊ ပြည်မြို့ရှိ စျေးဆိုင်များကို ငွေ တသိန်း မှ ငွေ သုံးသိန်းထိ စစ်ကောင်စီက တောင်းနေကြောင်း မြို့ခံများထံက သိရသည်။

အဓမ္မငွေတောင်းခံမှုတွေကို ဒီဇင်ဘာလ ၁၁ ရက်နေ့က ဆိုင်အချို့ကို လိုက်လံတောင်းခံနေခြင်းဖြစ်ပြီး အချို့ဆိုင်များကို အစည်းအ‌‌‌ဝေးခေါ်နေကြောင်း ဓါတ်ပုံမှတ်တမ်းများလည်း ရိုက်ယူထားကြောင်း မြို့ခံများထံကသိရသည်။

” ဆိုင်ကြီးတွေကို အဓိကတောင်းတာ မနေ့ကတည်းက ကြံ့ခိုင်ရေးအဖွဲ့ကလူတွေလည်း ပါတယ်။ ရပ်ကွက်အုပ်ချုပ်ရေးမှူးတွေနဲ့ ဆိုင်တွေကို ဓါတ်ပုံရိုက်တယ် မဖွင့်ရင်လည်း အတင်းဖွင့်ခိုင်းတယ်။ လုံးဝမဖွင့်တဲ့ဆိုင်တွေကိုတော့ ဒီနေ့ငွေညစ်နေတယ်” ဟု မြို့ခံတဦး ကပြောသည်။

အလားတူ ခေတ္တရာမြို့သစ်အုပ်ချုပ်ရေးမှူးကလည်း ဆိုင်မဖွင့်ခဲ့သည့် ဆိုင်များကို ဓါတ်ပုံမှတ်တမ်းများ ရိုက်ယူကာ စာရင်းပြုစုပြီး အထက်ကို တင်ပြနေကြောင်း မဖွင့်သည့်ဆိုင်များကိုလည်း ငွေတောင်းနေကြောင်း ‌သိရသည်။

” ဒီဘက်ကိုတော့ အခုထိ လာပြောတာမရှိသေးဘူး။ လာခေါ်မယ်လို့တော့ ကြားတယ်။ မြို့သစ်မှာတော့ အုပ်ကြီးဆိုသူက ဆိုင်တွေကို မှတ်တမ်းတွေယူ ငွေတောင်းတာတွေလုပ်နေတယ်လို့ သိရတယ်။” ဟု မြို့ခံတဦးကပြောသည်။

အသံတိတ်သပိတ် အား ပြည်မြို့ရှိ စျေးဆိုင်များစွာက ပါဝင်ပူးပေါင်းခဲ့ပြီး ယင်းနေ့မှာပင် စစ်ကောင်စီတပ်သားများက ခြိမ်းခြောက်ကာ အတင်းအဓမ္မဆိုင်ဖွင့်ခိုင်းမှုများ ပြုလုပ်ခဲ့ကြသည်။

ပဲခူး၊ ဒီဇင်ဘာ ၁၁၊ ၂၀၂၁။

ပဲခူးတိုင်းအနောက်ခြမ်း၊ နတ်တလင်းမြို့က လူငယ်တဦးကို မနေ့ညကဖမ်းဆီးကာ သေနတ်ဖြင့်ပစ်ခတ်ခဲ့ကြောင်း မြို့ခံတွေက ပြောပါတယ်။

မြို့မရပ်ကွက်က ကိုဖိုးစိုင်းဆိုတဲ့ လူငယ်တဦးဖြစ်ပြီး၊ မနေ့က နတ်တလင်းမြို့မှာ ပြုလုပ်တဲ့ အသံတိတ်သပိတ်လူပ်ရှားမှုမှတ်တမ်းဓါတ်ပုံကို ဒရုန်း နဲ့ရိုက်ခဲ့တာကြောင့် ဖမ်းဆီးခံရတာဖြစ်နိုင်ကြောင်း မြို့ခံတွေက သုံးသပ်ပြောဆိုကြပါတယ်။

နတ်တလင်းမြို့မှာ မနေ့က ညဦးပိုင်းကတည်းက သေနတ်ဖောက်သံတွေ ဆူညံနေခဲ့ပြီး ၉ နာရီလောက်မှာ ဖမ်းဆီးကာ ရဲစခန်းအရောက်မှာ သေနတ်နဲ့ ပစ်ခတ်ခဲ့တာလို့ သိရပါတယ်။

“ည ၉ နာရီလောက်မှာ မြို့ထဲကသေနတ်သံတွေကြားရပြီး ည ၁၀ နာရီခွဲလောက်မှာ ရဲစခန်းထဲက သေနတ်ဖောက်သံတချက်ကြားလိုက်တယ်။ စုံစမ်းကြည့်တော့မှ မြို့မရပ်ကွက်၊ ဗိုလ်ချုပ်လမ်းက ဖိုးစိုင်းကို ဖမ်းတာလို့သိရတာ စစ်ဆေးနေတုန်း သေနတ်နဲ့ ပစ်တာတဲ့ သူရဲ့ပေါင်ကိုမှန်သွားတယ် လည်းကြားတယ်။ မနေ့က သူကဒရုန်းနဲ့ လျှောက်နေတာလေ ဒလန်တွေပဲသတင်းပေးတာ နေမှာပေါ့” လို့ သူနဲ့ နီးစပ်သူတဦးက ပြောပါတယ်။

သေနတ်ဒဏ်ရာကို ကုသရန်အတွက် စစ်ကောင်စီက သူ့ကို ပြည်ဆေးရုံကို ခေါ်ဆောင်သွားတယ်လို့ သိရပါတယ်။