ပျက်စီး

စစ်ကိုင်း၊ မေ ၉၊ ၂၀၂၃။

စစ်ကိုင်းတိုင်း၊ ရေဦးမြို့နယ်အနောက်ခြမ်း၊ ထန်းတောရွာထိပ်ရှိ ကလေးတွေကို စာသင်ပေးနေတဲ့ CDM စာသင်ကျောင်း (အရပ်ခေါ် ဗောဓိကျောင်း) ကို မေလ ၉ ရက်နေ့လယ် ၂ နာရီကျော်လောက်မှာ စစ်ကောင်စီက လေယာဥ်နဲ့ဗုံးကြဲခဲ့တာကြောင့် အဆောက်အဦးတချို့ ပျက်စီးမှုရှိခဲ့တယ်လို့ သိရပါတယ်။

အဲ့ဒီကျောင်းကို တံတားဦး လေတပ်စခန်းကနေ ဂျက်ဖိုင်တာ ၁ စီးနဲ့ ဗုံးသီး ၂ လုံးကြဲချခဲ့တာကြောင့် စာသင်ကျောင်းထဲရှိ လုပ်သားအဆောင်တဆောင်မှာ မီးလောင်ပျက်စီးခဲ့သလို ကျောင်းမုဒ်ဦးတွေနဲ့ ရွာမှာသွယ်တန်းထားတဲ့ လျှပ်စစ်မီးကြိုးတွေလည်း ကျိုးကျသွားခဲ့ကြတယ်လို့ People’s Defense Comrade မှ ပြန်ကြားရေးတာဝန်ခံ ထူးခန့်ဇော်(အမေ့သား)က ပြောပါတယ်။

“ဒီကျောင်းမှာ ကလေးတွေကိုမနက်ပိုင်းကနေ မွန်းလွဲ၁၂နာရီအထိသင်ကြားပေးခဲ့ပြီး ကျောင်းဆင်းတာ။ ဗုံးလာကြဲတာက ၂ နာရီဆိုတော့ ကလေးတွေ၊ ဆရာ၊မတွေနဲ့ ရွာသားတွေ ထိခိုက်တာမရှိခဲ့ဘူးဗျ။ ကံကောင်းသွားတာပေါ့။ လေယာဥ်က ကျောင်းကိုအသွားတခေါက် ဗုံးတလုံးကြဲချတယ်၊ ပြီးတော့ ပြန်ဝိုက်လာပြီးတော့ ဗုံးတလုံးထပ်ကြဲချခဲ့တာ။ လေယာဥ်ကကျောင်းပေါ်မှာ ၁၅ မိနစ်လောက် ကြာဝဲပျံခဲ့တယ်။ ဒီကျောင်းက ရွာရဲ့ထိပ်ဦးမှာတည်ရှိတာ”လို့ ဆိုပါတယ်။

အသက် ၅ နှစ်ကနေ ၁၀ နှစ်အထိရှိတဲ့ ကလေးသူငယ် ၅၀ ကျော်ကို CDM ဆရာ၊ ဆရာမတွေနဲ့ ဆယ်တန်းဖြေထားပြီးတဲ့ ကျောင်းသူ/သားတွေက စာသင်ကြားပေးနေတဲ့ ကျောင်းဖြစ်တယ်လို့လည်း သူကဆက်ပြောပါတယ်။

အဲ့ဒီကျောင်းကို ဂျက်ဖိုင်တာနဲ့လာရောက် ဗုံးကြဲတာဟာ ပထဆုံးအကြိမ်ဖြစ်သလို၊ လေယာဥ်နဲ့ ထပ်ပြီးဗုံးကြဲမှာကို စိုးရိမ်တဲ့အတွက် အိမ်ခြေ ၁၀၀ ကျော်ရှိတဲ့ ထန်းတောရွာ၊ အိမ်ခြေ ၆၀၀ ခန့်ရှိတဲ့ တင်းတိန်ရံရွာက ဒေသခံပြည်သူတွေကို ဘေးလွတ်ရာနေရာကို ရွေ့ပြောင်းပေးထားတယ်လို့ သိရပါတယ်။

စာတည်း – လင်း

မကွေး၊ မေ ၉၊ ၂၀၂၃။

မကွေးတိုင်း၊ ဆိပ်ဖြူမြို့နယ်၊ ရွှေဘိုးကျွန်းရွာအခြေစိုက် အမှတ် ၂၂ ကာကွယ်ရေးပစ္စည်းစက်ရုံ (ကပစ-၂၂)တပ်ကို မေလ ၇ ရက် မနက် ၆ နာရီကျော်အချိန်မှာ တိုက်ခိုက်ခံရလို့ စက်ရုံတွင်း အဆောက်အဦတချို့ ပျက်စီးတယ်လို့ PDF တာဝန်ရှိသူက ပြောပါတယ်။

အဲဒီစက်ရုံကို ကာကွယ်ရေးတပ်ဖွဲ့ ၄ ဖွဲ့က Short Range Missile (၁၂)လုံးနဲ့ ပစ်ခတ်တိုက်ခိုက်ခဲ့တာဖြစ်တယ်လို့ Black Hawk Seink phyu Revolution Front မှ တပ်ရင်းတာဝန်ခံ ဗိုလ်ရှည် က ပြောပါတယ်။

“အဲ့စက်ရုံမှာက ကဏ္ဍတွေ အများကြီးခွဲထားတာကို ကျနော်တို့က လက်နက်ထားတဲ့ ဂိုဒေါင် ကို အဓိကထား ပစ်ခတ်ခဲ့တာ။ လက်နက်ကြီး ပစ်ခတ်တဲ့အချိန်မှာ ၄ လုံးက လေပေါ်မှာတင် ကွဲသွားတယ်။ နောက် ၈ လုံးကတော့ ပစ်မှတ်ထဲကို ကျသွားလို့ အရပ်ခေါ် ၆ လုံးတန်းထဲက လက်နက်ဂိုဒေါင် ပျက်စီးခဲ့တာ။ ဒီပျက်စီးမှုကို အတွင်းသတင်းပေးပြောလို့ အတည်ပြုနိုင်ခဲ့တာ” လို့ ဆိုပါတယ်။

ကပစ-၂၂ စက်ရုံကို PDFတွေက ပစ်ခတ်တိုက်ခိုက်နေချိန် စစ်ကောင်စီဘက်က ပြန်လည်ပစ်ခတ်တိုက်ခိုက်တာ မရှိခဲ့တဲ့အပြင် ဂိတ်စောင့်နေကြတဲ့ စစ်ကောင်စီတပ်သားတွေနဲ့ စက်ရုံအနီးပတ်ဝန်းကျင်ကို ကင်းပတ်နေကြတဲ့ စစ်ကောင်စီတပ်သားတွေဟာ ဝရုန်းသုန်းကားဖြစ်ကာ ထွက်ပြေးနေခဲ့ကြတယ်လို့ ဗိုလ်ရှည်က ဆက်ပြောပါတယ်။

အဲဒီနောက်မှာတော့ ညအချိန်ကင်းပတ်ပြီး သေနတ်ပစ်ခတ်တာတွေ ပြုလုပ်ခဲ့တယ်လို့ ဆိုပါတယ်။

ကပစ-၂၂ က အရပ်ခေါ် ၆ လုံးတန်း အဆောက်အဦးဟာ လက်နက်သိုလှောင်တဲ့ အဆောက်အဦးမျိုး မဟုတ်ဘဲ စစ်ကောင်စီတပ်ဖွဲ့ဝင်မိသားစုတွေ နေထိုင်တဲ့လိုင်းခန်းဖြစ်တယ်လို့ အဲ့ဒီတပ်နဲ့နီးစပ်တဲ့ CDM တပ်မတော်သား အရာရှိတဦးက ပြောပါတယ်။

“၆ လုံးတန်းဆိုတာစ စ်ကောင်စီတပ်သားတွေနေတဲ့ လိုင်းခန်းတွေကို ခေါ်ကြတာ။ လက်နက်စက်ရုံတော့ မဟုတ်ဘူး။ ၆ လုံးတန်းကို ထိတာဆိုရင်တော့ အဲ့ဒီလိုင်းခန်းတွေထိတာ ဖြစ်နိုင်တယ်’’ လို့ ပြောပါတယ်။

ကပစ-၂၂ စက်ရုံဟာ တာဝေးပစ်ခတ်နိုင်တဲ့ မစ်ဇိုင်း(Missile) လက်နက်တွေဖြစ်တဲ့ ၁၅၅ မမ တွေ အဓိက ထုတ်လုပ်နေတဲ့ စက်ရုံတခု ဖြစ်တယ်လို့လည်း သိရပါတယ်။

ဒီတိုက်ခိုက်မှုကိုတော့ စစ်ဒေသကွပ်ကဲ -၁၊ မကွေးတိုင်း Drone အထူးတပ်ရင်း၊ တပ်ခွဲ(၅) သိန်းငှက်နက်ဆိပ်ဖြူ တော်လှန်ရေးတပ်ဦး ( B.H.S.R.F)နဲ့ ပခုက္ကူခရိုင် အမှတ် (၁၁) တပ်ရင်း- ပြည်သူ့စွမ်းအား တပ်ပေါင်းစု (PPC)တို့ ပူးပေါင်းလုပ်ဆောင်ခဲ့တာ ဖြစ်ပါတယ်။

ပြီးခဲ့တဲ့ ဧပြီလ ၁၈ ရက်နေ့က မကွေးတိုင်း၊ ဆိပ်ဖြူမြို့နယ်၊ ဆယ်မိုင်လမ်းဆုံ စစ်ကောင်စီစစ်ဆေးရေးဂိတ်ကို ဒရုန်းနဲ့ ဗုံးသီးချ တိုက်ခိုက်ခဲ့ရာ စစ်ကောင်စီတပ်သား ၅ ဦး ထိခိုက်ဒဏ်ရာရခဲ့သေးတယ်လို့ ဆိုပါတယ်။

ဒါ့အပြင် ဧပြီလ ၂၂ ရက်နေ့ ည ၉ နာရီခန့်ကလည်း ဆိပ်ဖြူမြို့နယ်နဲ့ စလင်းမြို့နယ်အစပ်မှာရှိတဲ့ တညောင်ဓါတ်အားပေးစက်ရုံကို ဖောက်ခွဲတိုက်ခိုက်ခဲ့ရာ ထရန်စဖော်မာတလုံးပျက်စီး၊ ဓါတ်တိုင်နဲ့ ဓါတ်အားလိုင်းကြိုးတွေ ပြတ်တောက်ခဲ့ပါသေးတယ်။

အဲဒီဓါတ်အားပေးစက်ရုံဟာ ကပစ-၂၁၊ ၂၂ နဲ့ ဝါဇီငွေထုတ်စက်ရုံတို့ကို ဓါတ်အားပေးပို့နေတဲ့ စက်ရုံလည်း ဖြစ်ပါတယ်။

စာတည်း – 007

ညောင်လေးပင်၊ ‌မေ ၁၊ ၂၀၂၃။

ပဲခူးတိုင်း၊ ညောင်လေးပင်မြို့နယ်၊ အင်ဝိုင်းကျေးရွာအနီးရှိ ညောင်လေးပင်-မဒေါက်သွားလမ်းက ရေကြည်ချောင်းတံတား မိုင်းဖောက်ခွဲခံရပြီး ပျက်စီးသွားတယ်လို့ ဒေသခံတွေဆီက သိရပါတယ်။

မေလ ၁ ရက် ဒီကနေ့မနက်အစော ၁ နာရီဝန်းကျင်မှာ မိုင်းထောင်ဖောက်ခွဲခံရတာကြောင့် တံတားပြိုကျပျက်စီးခဲ့ကာ အသုံးပြုလို့မရတော့ဘူးလို့ ဒေသခံတဦးက မြေလတ်အသံကို ပြောပါတယ်။

“အဲဒီတံတားက လမ်းသွားလမ်းလာတွေ အသုံးပြုများတဲ့တံတားလို့ ပြောရမှာပေါ့။ လမ်းမကြီးပေါ်က တံတားပါ။ တံတားကတော့ ပေ ၁၂၀ ကျော်တယ်။ ခုတံတားမိုင်းခွဲခံရတော့ လောလောဆယ် သွားမရတော့ဘူးလို့ သိရတယ်” လို့ ပြောပါတယ်။

ဒါ့အပြင် အဲ့ဒီလမ်းပိုင်းဟာ ညောင်လေးပင်မြို့နယ်ကနေ ရွှေကျင်မြို့နယ်အထိ ရောက်ရှိတာဖြစ်ပြီး စစ်ကောင်စီဘက်ရော တော်လှန်ရေးအင်အားစုတွေကပါ စစ်ရေးအရအသုံးပြုနေတဲ့ လမ်းပိုင်းဖြစ်တယ်လို့ ဒေသခံတွေက ပြောပါတယ်။

တံတားမိုင်းခွဲခံရလို့ အလျားပေ ၆၀ လောက် ပြိုကျပျက်စီးသွားပြီး အဲ့ဒီတံတားမိုင်းခွဲတာကိုတော့ ဘယ်အဖွဲ့က လုပ်ဆောင်တယ်ဆိုတာတော့ မသိရသေးပါဘူး။

ဇန်နဝါရီလ ၁၀ ရက်က ညောင်လေးပင်မြို့နယ်၊ ခင်ကန့်လန့်ရွာနဲ့ ကညင်ကျိုးရွာကြားက တံတား ၂ စင်းနဲ့ ဖေဖော်ဝါရီလ ၉ ရက်မှာ ရန်ကုန်-မန္တလေးလမ်းဟောင်းပေါ်က တောင်ဘို့သုံးလုံးတံတားလည်း မိုင်းဖောက်ခွဲခံရလို့ ပျက်စီးခဲ့သေးတယ်လို့ သိရပါတယ်။

စာတည်း-ရင်ငြိမ်း

ခင်ဦး၊ ဧပြီ ၂၇၊ ၂၀၂၃။

စစ်ကိုင်းတိုင်း၊ ရွှေဘိုခရိုင်၊ ခင်ဦးမြို့နယ်၊ မြို့သစ်ကျေးရွာကို စစ်ကောင်စီတပ်သားတွေက ၂ ရက်ဆက်တိုက် မီးရှို့ဖျက်ဆီးခဲ့တယ်လို့ သိရပါတယ်။

တပ်သားအင်အား ၁၀၀ ဝန်းကျင်ပါတဲ့ စစ်ကြောင်းက ဧပြီလ ၂၆ ရက်မနေ့ကညနေ ၆ နာရီလောက်မှာ မြို့သစ်ရွာကို ဝင်ရောက်လာပြီး ပထမအကြိမ် မီးရှို့ဖျက်ဆီးပြီးနောက် တပ်စွဲနေထိုင်ကာ ဧပြီလ ၂၇ ရက်ဒီမနက် ၇ နာရီလောက်မှာ ဒုတိယအကြိမ် ထပ်မံမီးရှို့ခဲ့တာလို့ Khin U Local Guerrilla Force ရဲ့တာဝန်ခံ ဂျက်စတင်က ပြောပါတယ်။

“အိမ်ခြေက ၉၀ ကျော် ၁၀၀ နီးပါးလောက် မီးရှို့ခံလိုက်ရတယ်။ ၂ ရက်ဆိုတော့လေ။ နောက်ပြီး သူတို့ရွာထဲကနေ ပြန်ထွက်ချိန် ကျနော်တို့ ဒရုန်းနဲ့ကြည့်တဲ့အထဲမှာ ပြည်သူလို့ထင်ရတဲ့ အရပ်သား ပြည်သူ ၁ ယောက် ၂ ယောက် ဖမ်းဆီးခံသွားရတယ်လို့လည်း သိရတယ်။ သူတို့စစ်ကြောင်းထိုးလာတဲ့အချိန် မရှောင်လိုက်နိုင်လို့ အဖမ်းခံရတယ် ထင်တယ်” လို့ ပြောပါတယ်။

အဖမ်းခံရသူတွေဟာ ဘယ်သူဘယ်ဝါဆိုတာ မသိရသေးဘဲ ဒီမနက် ၉ နာရီလောက်က စစ်ကောင်စီတပ်သားတွေ ရွာကပြန်ထွက်သွားချိန်မှာ သူတို့နဲ့အတူ ရေဦးမြို့ဘက်ကို ခေါ်သွားတယ်လို့ ဆိုပါတယ်။

အိမ်ခြေ ၆၀၀ နီးပါးရှိတဲ့ မြို့သစ်ကျေးရွာဟာ အခုလိုမီးရှို့ဖျက်ဆီးခံရတာ ဒုတိယအကြိမ်ဖြစ်ပြီး ၂၀၂၂ ခုနှစ်၊ ဖေဖော်ဝါရီလ ၁၇ ရက်ကလည်း အဲ့ဒီကျေးရွာအနီးမှာ ဒေသခံကာကွယ်ရေးတပ်တွေနဲ့ စစ်ကောင်စီတပ်တို့ တိုက်ပွဲဖြစ်ပြီးနောက် ရွာကိုမီးဝင်ရှို့ခဲ့တာလို့ သိရပါတယ်။

လက်ရှိမှာ မြို့သစ်ကျေးရွာအပါအဝင် ခင်ဦးနယ်ထဲက ကံကြီးကုန်း၊ ရွှေယမင်း၊ သာဂရ၊ မြင်းဒေါင်းနဲ့ မြကန် စတဲ့ ကျေးရွာတွေက ဒေသခံပြည်သူ ၃၀၀၀ ကျော်လည်း ရွာကနေထွက်ပြေး တိမ်းရှောင်နေရတယ်လို့ ခင်ဦးမြို့နယ် သတင်းမှန်ပြန်ကြားရေးက ထုတ်ပြန်ရေးသားထားပါတယ်။

စာတည်း – လင်း

ကနီ၊ ဧပြီ ၂၂၊ ၂၀၂၃။

စစ်ကိုင်းတိုင်း၊ ကနီမြို့နယ်အတွင်းမှာ ဧပြီလ ၂၁ ရက် မနေ့ ညနေ ၅ နာရီလောက်က လေပြင်းတိုက်ခတ်ခဲ့လို့ လူနေအိမ် ၁၅၀ နီးပါး ပျက်စီးသွားတယ်လို့ ဒေသခံတွေဆီက သိရပါတယ်။

ကနီမြို့နယ် ချင်းတွင်းမြစ်အနောက်ဘက်ကမ်းက ကျေးရွာတွေဖြစ်တဲ့ အိုင်တောင် မြောက်ရွာ၊ အရှေ့ရွာ၊ အနောက်ရွာနဲ့ အဲ့ဒီအနီးနားမှာရှိတဲ့ ကျေးရွာ ၅ ရွာကို အချိန်အခါမဟုတ် လေပြင်းတိုက်ခတ်ခဲ့တာကြောင့် လူသေဆုံးတာမျိုး မရှိပေမယ့် နေအိမ် တော်တော်များများပျက်စီးသွားတယ်လို့ ကနီဒေသခံတဦးက မြေလတ်အသံကို ပြောပါတယ်။

“မိုးများပြီး လေကြမ်းတာ။ လေပြင်းဝင်တာ ၈ ရွာပေါ့။ အဲ့ဒီလောက် လေကြမ်း၊မိုးကြမ်းတာ တခါမှမကြုံဖူးဘူး ပထမဆုံးပဲ။ မီးတွေလည်း ဖြတ်ခံထားရတာ ၂ ရက်ရှိပြီ။ အခုချိန်ထိလည်း မီးမလာသေး” လို့ဆိုပါတယ်။

မနေ့ ညနေ ၅ နာရီလောက်မှာ လေပြင်း စတင်တိုက်ခတ်ခဲ့တာ ဖြစ်ပြီး အချိန် ၄၅ မိနစ်ခန့် တိုက်ခတ်ခဲ့တာဖြစ်ကာ ညနေ ၆ နာရီဝန်းကျင်မှာ လေပြင်းတိုက်ခတ်တာ ရပ်တန့်ခဲ့ပေမယ့် မိုးကတော့ ဆက်လက်ရွာသွန်းခဲ့တယ်လို့ သိရပါတယ်။

မနေ့ညနေပိုင်းမှာ ကနီမြို့နယ်အပါအဝင် မြန်မာပြည်အထက်ပိုင်းဒေသတွေဖြစ်တဲ့ စစ်ကိုင်းတိုင်းအတွင်းက မြို့နယ်တချို့နဲ့ ကချင်ပြည်နယ်အတွင်း မြို့နယ်တချို့မှာလည်း လေပြင်းတိုက်ခတ်ကာ မိုးသည်းထန်စွာ ရွာသွန်းမှုတွေ ဖြစ်ပေါ်ခဲ့တယ်လို့ သိရပါတယ်။

စာတည်း – ရင်ငြိမ်း