ပဲခူး၊ ဇွန် ၁၄၊ ၂၀၂၃။

ပဲခူးတိုင်းဒေသကြီး၊ ပြည်မြို့နယ်၊ ပြည်-ပေါက်ခေါင်းလမ်းဘေးရှိ ‌နှောကုန်း၊ လခုပ်ပင်၊ ရွာသာကုန်း ကျေးရွာတွေက လူနေအိမ်၊ ဈေးဆိုင်တွေနဲ့ အဆောက်အဦးတွေကို စစ်ကောင်စီက ဖယ်ရှားခိုင်းနေတယ်လို့ ဒေသခံတဦးက မြေလတ်အသံကို ပြောပါတယ်။

ဇွန်လ ၁၁ ရက်က ကျေးရွာအုပ်ချုပ်ရေးမှူးတွေကနေ တဆင့် ပြည်မြို့နယ်လမ်းဦးစီးဌာနက ထုတ်ပြန်အသိပေး စာကို လာပို့သွားတာဖြစ်ပြီး ဇွန်လ ၁၇ ရက် နောက်ဆုံးထားဖယ်ပေးရမယ်လို့ ဆိုပါတယ်။

“ကားလမ်းဘေးနှစ်ဖက်စလုံးကနေ ၇၅ ပေ ဖယ်ရမယ်ဆိုပြီး စာထုတ်လာတယ်။ အဲတော့ ကျနော်တို့ဘက်က စိုးရိမ်ရတာပေါ့။ အမြန်လမ်း စီမံကိန်းလုပ်ဖို့ ရှိတယ်လို့တော့ပြောတယ်။ ဖယ်ပေးရရင် ကျနော်တို့ဘက်မှာ ထိခိုက်နစ်နာဆုံးရှုံးမှုတွေ အများကြီးရှိလာမှာ” လို့ ဒေသခံတဦးကပြောပါတယ်။

နေရာကနေ မဖယ်ရှားပေးပါက အဆောက်အဦးပိုင်ရှင်တွေကို တရားစွဲ ဖမ်းဆီးထောင်ချတာတွေ လုပ်လာနိုင်တဲ့ အပြင် ဘူဒိုဇာတွေနဲ့ထိုးပြီး ဖျက်ဆီးတာတွေ လုပ်လာနိုင်တယ်လို့ ဆိုပါတယ်။

“အဆောက်အဦးတွေ ဖျက်ခံရမယ့် သူတွေဘက်ကတော့ မဖယ်ပေးချင်ကြဘူးပေါ့နော်။ တကယ်လို့ ဖယ်ပေးရ မယ်ဆိုလဲ ပေ ၅၀ လောက်ထိဘဲ ဖယ်ပေးရဖို့ တောင်းဆိုချင်ကြတာပေါ့နော်။ ၇၅ ပေ အတိဆိုရင် တော်တော် များများက မလွယ်ဘူး” လို့ အထက်ပါ ဒေသခံက ဆက်ပြောပါတယ်။

လမ်းကနေ ၇၅ ပေ အပြည့်ဖယ်ပေးရပါက နေအိမ်အဆောက်အဦးအကုန်၊ ခြံထဲကနေပါ ဖယ်ပေးရမယ့် သူတွေများနေပြီး နေစရာ ခြံဝင်းမရှိတဲ့အဖြစ်ကို ရောက်သွားနိုင်တယ်လို့ ဒေသခံတွေက ဆိုပါတယ်။

အဆိုပါ ကျေးရွာ ၃ ရွာက နေအိမ်နဲ့ စျေးဆိုင် ၃၀ ခန့်၊ ဘုန်းကြီးကျောင်း ၂ ကျောင်း၊ စာသင်ကျောင်း ၂ ကျောင်းနဲ့ ဆန်စက် ၅ လုံးလောက် ဖယ်ပေးရမယ့်အခြေအနေ ရှိနေတာပါ။

လက်ရှိမှာ ပြည်-ပေါက်ခေါင်းလမ်းဟာ ၁၈ ပေအကျယ်နဲ့ လမ်းပခုံးအပါအဝင် ၂၈ ပေလောက်ရှိနေတယ်လို့ သိရပါတယ်။

ဖယ်ပေးရမယ့်နေရာတွေက အဆောက်အဦးတွေဟာ လွန်ခဲ့တဲ့ ၁၅ နှစ်အထက်ကတည်းက ရှိနေခဲ့တဲ့ အဆောက် အဦးတွေ၊ နေအိမ်တွေဖြစ်တယ်လို့ သိရပါတယ်။

စာတည်း – လင်းဇေ

ပဲခူး၊ ဇွန် ၉၊ ၂၀၂၃။

ပဲခူးတိုင်း(အနောက်ခြမ်း)၊ ပြည်မြို့မှာ ဆိုင်ကယ်စီးနင်းသူတွေကို ဇွန်လ ၅ ရက်ကစပြီး၊ ဖမ်းစီးစစ်ဆေးနေတယ်လို့ ဒေသခံတွေထံက သိရပါတယ်။

ဆိုင်ကယ်တွေဖမ်းဆီးရာမှာ တနေရာတည်း ဖမ်းဆီးတာမဟုတ်ဘဲ၊ ကိုးသောင်းမီးပွိုင့်၊ ခရိုင်အုပ်ချုပ်ရေးရုံးရှေ့၊ ဆင်မကြပ်လမ်းဆုံနေရာတွေမှာ လှည့်လည် ဖမ်းဆီးနေတာဖြစ်ပြီး လိုင်စင်မရှိပါက ငွေသိန်းချီတောင်းတာရှိသလို မပေးနိုင်ပါက ထောင်ချမယ်လို့ ခြိမ်းခြောက်နေကြောင်း ပြည်မြို့နေပြည်သူတဦးက ပြောပါတယ်။

“မနေ့က ကိုးသောင်းနားမှာ ကောင်လေးတယောက် အဖမ်းခံရတယ်။ ဆိုင်ကယ်ပစ္စည်းလာဝယ်ရင်း အဖမ်းခံရတာ။ ဆိုင်ကယ် လိုင်စင်မရှိလို့ ၅ သိန်းတောင်းတယ်။ အဲ့ကလေးတွေ အိမ်ကငွေကြေး အဆင်မပြေကြဘူး။ ပိုက်ဆံမပေးနိုင်ရင် ထောင် ၁ လကျမယ်ပြောလို့ ငွေရှာနေကြတယ်” လို့ ပြောပါတယ်။

အဲ့ဒီလူငယ်ကို ဇွန်လ ၈ ရက် နေ့လည် ၃ နာရီလောက်က အမှတ် ၁ ရဲစခန်းမှာ ဖမ်းဆီးထားတာဖြစ်ပြီး၊ ည ၈ နာရီခန့်မှာ မိသားစုဆီကို ရဲစခန်းကဖုန်းဆက် အကြောင်းကြားတယ်လို့ ဆိုပါတယ်။

“ဆင်မကြပ်လမ်းဆုံမှာ ကောင်လေးတယောက် Without ဆိုင်ကယ်စီးလို့ အဖမ်းခံရတယ်။ ရဲစခန်းတန်းခေါ်သွားတာ။ ငွေ ၁၀ သိန်းပေးရမယ်ပြောလို့ ညှိတော့ ၈ သိန်းနဲ့အဆင်ပြေကြတယ်။ ငွေတော့မပေးရသေးဘူး။ ဖမ်းထားတဲ့လူနဲ့လည်း အတွေ့မခံဘူး”လို့ မြို့ခံတဦးကလည်း ပြောပါတယ်။

ဆိုင်ကယ်စီးပါက ဦးထုပ်၊ ဘက်မှန်နဲ့ နံပတ်ပြားမပါတာ လိုင်စင်သက်တမ်းကျော်တဲ့ဆိုင်ကယ်တွေဆိုရင် ဒဏ်ငွေ ၃၀၀၀၀ ကျပ်ပေးဆောင်ရပြီး၊ လိုင်စင်မပါတဲ့ ဆိုင်ကယ်စီးရင် ဆိုင်ကယ်သိမ်းပြီး၊ လူကိုထောင်ဒဏ် ၁ လပြစ်ဒဏ်ချမှတ်တာတွေလည်း ရှိတယ်လို့ ဒေသခံတွေထံက သိရပါတယ်။

စာတည်း – 007

ပဲခူး၊ ဇွန် ၂၊ ၂၀၂၃။

ပဲခူးတိုင်း(အနောက်ခြမ်း)၊ ပြည်မြို့နယ်စစ်ကောင်စီ(စီမံအုပ်ချုပ်ရေးကောင်စီ) အဖွဲ့ဝင် ၁ အဖြစ်တာဝန်ယူထားသူ အောင်လံမြို့နယ်၊ ကျော်စွာအခြေစိုက် အမှတ် ၇ ကာကွယ်ရေးပစ္စည်းစက်ရုံ (ကပစ ၇) မှ ဗိုလ်မှူး စိုပြေလင်း မေလတတိယအပတ်ကစလို့ မိန်းမမှုနဲ့စစ်ခုံရုံးဖွဲ့ စစ်ဆေးခံနေရတယ်လို့ သိရပါတယ်။

ဗိုလ်မှူး စိုပြေလင်းဟာ ကပစ ၇ က တတပ်တည်းနေ စစ်ကောင်စီတပ်ဖွဲ့ဝင်တပ်ကြပ်ကြီး ၁ ဦးရဲ့ သမီး ဖြစ်သူ အသက် ၂၀ ဝန်းကျင်အရွယ် အမျိုးသမီးနဲ့ အတူတကွပေါင်းသင်းနေထိုင်ပြီးနောက် ကိုယ်ဝန်ရရှိလာတဲ့အပေါ်မိဘဖြစ်သူတပ်ကြပ်ကြီးက ကပစ ၇ စက်ရုံမှူးမှတဆင့် နေပြည်တော်၊ ကာကွယ်ရေးပစ္စည်းထုတ်လုပ်ရေးအရာရှိချုပ်ရုံး (ကကထုတ်) ကို ပြီးခဲ့တဲ့မေလအတွင်းက လိပ်မူတိုင်ကြားခဲ့လို့ စုံစမ်းစစ်ဆေးရေးခုံရုံးဖွဲ့ စစ်ဆေးခံနေရတာလို့ ဆိုပါတယ်။

“ကောင်မလေး ကိုယ်ဝန်ရှိသွားတာကို သူ့မိဘတွေမေးမြန်းတော့မှ သူ(ဗိုလ်မှူး စိုပြေလင်း)နဲ့ဖြစ်တယ်ဆိုတာ သိပြီးပြသနာတက်ကြတာ။ ဖြစ်ကာစက မတိုင်ဖို့ ညှိနှိုင်းသေးတယ်။ ပြည် ဒကစ ကလည်း ကြားထဲက ဝင်ညှိပေးသေးတယ်။ ကောင်မလေးကို တာဝန်မယူနိုင်တာမျိုးနဲ့ ဘလိုညှိမရလဲတော့မသိဘူး။ နောက်ဆုံးကောင်မလေးမိဘတွေက တိုင်လိုက်တာ” လို့ ကပစ ၇ နဲ့ နီးစပ်တဲ့သတင်းရင်းမြစ်တဦးက မြေလတ်အသံကိုပြောပါတယ်။

ဗိုလ်မှူး စိုပြေလင်း ဟာ မိန်းမရှုပ်ပွေသူတဦးဖြစ်ပြီး ပြည်မြို့ ပြည်-အောင်လံကားလမ်းမဘေး ဘုရားကြီးဆည်မြောင်းရုံးရှေ့က မင်္ဂလာဂါးဒင်းဟိုတယ်ကို ကောင်မလေးအများအပြားနဲ့ မကြာခဏဆိုသလို လာရောက်ပေါင်းသင်းနေထိုင်တယ်လို့ သူနဲ့ရင်းနှီးမှုရှိတဲ့ စီးပွားရေးလုပ်ငန်းရှင်အသိုင်းအဝိုင်း သတင်းရင်းမြစ်တဦးက ပြောပါတယ်။

“သူ(စိုပြေလင်း)က မိန်းမတအားရှုပ်တယ်။ ကောင်မလေးတွေအများကြီးနဲ့ မင်္ဂလာဂါးဒင်းမှာ မကြာခဏလာအိပ်တယ်။ ညအိပ်ရော အချိန်ပိုင်းရောလာနေတာ။ ရန်ကုန်ကလာတဲ့ မိန်းကလေးတွေနဲ့လာတာလည်း ရှိတယ်။ တလကို မိန်းကလေး ၁၀ ယောက်လောက်လဲပြီးလာနေတယ်” လို့ ဆိုပါတယ်။

ပြည်မြို့နယ်စစ်ကောင်စီအဖွဲ့ဝင်ဖြစ်တဲ့ ဗိုလ်မှူး စိုပြေလင်းဟာ ပြည်မြို့ စီးပွားရေးလုပ်ငန်းရှင်အသိုင်းအဝိုင်းမှာလည်း ပေါက်ရောက်သူဖြစ်ပြီး ဒေသကွပ်ကဲမှုစစ်ဌာနချုပ်(ပြည်)၊ ဒကစမှူး ဗိုလ်မှူးချုပ် အောင်နိုင်ဦး က သဘောကျသူတဦးဖြစ်တယ်လို့ သိရပါတယ်။

လက်ရှိမှာ ဗိုလ်မှူး စိုပြေလင်းကို နေပြည်တော် ကို ခေါ်ယူစစ်ဆေးနေတယ်လို့သိရပြီး သက်သေခံကောက်နှုတ်ချက်ရယူတာတွေလုပ်ဆောင်ဖို့ ခေါ်ယူတာဖြစ်နိုင်တယ်လို့ တပ်သတင်းရင်းမြစ်တဦးက ပြောပါတယ်။

“တိုင်တာက နေပြည်တော် ကကထုတ်(ကာကွယ်ရေးပစ္စည်းထုတ်လုပ်ရေးအရာရှိချုပ်ရုံး) ကို တိုင်တာဆိုတော့ ကကထုတ်က တိုက်ရိုက်ကိုင်ဖို့ နေပြည်တော်ကို ပို့လိုက်တာလား။ အမှုအတွက်သက်ကောက်(သက်သေခံကောက်နှုတ်ချက်) ယူဖို့ခေါ်သွားတာလားတော့ မသိဘူး” လို့ ဆိုပါတယ်။

မိန်းမမှုနဲ့ ဖမ်းဆီးစစ်ဆေးခံနေရတဲ့ ဗိုလ်မှူး စိုပြေလင်း ရဲ့ ပြည်မြို့နယ်စီမံအုပ်ချုပ်ရေးအဖွဲ့ဝင် ၁ လစ်လပ်နေရာကို ကပစ ၇ က ဗိုလ်မှူး ဝေဖြိုးအောင် ဆိုသူ အစားထိုးခန့်အပ်ထားတယ်လို့ ပြည်မြို့စစ်ကောင်စီအသိုင်းအဝိုင်းထံက သိရပါတယ်။

ပဲခူး၊ မေ ၁၅၊ ၂၀၂၃။

ပဲခူးတိုင်းအနောက်ခြမ်း၊ ပြည်မြို့နယ်က ပုဒ်မ ၆ ခုနဲ့ ထောင်ဒဏ်ချမှတ်ခံထားရတဲ့ အမျိုးသားဒီမိုကရေစီအဖွဲ့ချုပ် – NLD မှ ပြည်မြို့နယ်ကိုယ်စားပြု တိုင်းဒေသကြီးလွှတ်တော်ကိုယ်စားလှယ် ဦးကျော်ဇေယျကို ပြည်ထောင်တွင်းတရားရုံးက ပုဒ်မ ၂ ခုနဲ့ ထပ်မံတရားစွဲထားတယ်လို့ မိသားစုနဲ့ နီးစပ်သူတဦးဆီက သိရပါတယ်။

အကြမ်းဖက်မှု၊ ရွေးကောက်ပွဲ၊ ၅၀၅ (က) ၂ မှု၊ ယစ်မျိုး၊ ဘေးစီမံ စတဲ့အမှုတွေနဲ့ ထောင်ဒဏ် ၁၉ နှစ် ချမှတ်ခံထားရတာကနေ လက်ရှိမှာ အကြမ်းဖက်မှုတိုက်ဖျက်ရေး ဥပဒေပုဒ်မ ၄၉(က) နဲ့ ၂ မှု ထပ်မံစွဲဆိုခဲ့တာလို့ သိရပါတယ်။

“ပေါင်းတည်က ၁ မှုနဲ့ သဲကုန်းက ၁ မှု ထပ်စွဲတာလို့ပြောတယ်။ လာမယ့်မေလ ၁၉ ရက်မှာ ရုံးထုတ်မယ်လို့ သိရတယ်။ အခုလက်ရှိက ရှေ့နေငှားရမ်းဖို့က အခက်အခဲရှိတယ်။ လိုက်ရဲသူမရှိဘူး ဖြစ်နေတယ်။ ပုဒ်မတွေက ၁၀ နှစ်ကနေ သေဒဏ်အထိ ချမှတ်နိုင်တော့ ရှေ့နေငှားရမ်းဖို့ ကြိုးစားနေပါတယ်”လို့ မိသားစုနဲ့ နီးစပ်သူတဦးက ပြောပါတယ်။

အခု ထပ်မံချမှတ်လိုက်တဲ့အမှုဟာ ထောင်ဒဏ် ၁၀ နှစ်ကနေ သေဒဏ်အထိ ချမှတ်နိုင်တဲ့အမှု ဖြစ်တယ်လို့လည်း သိရပါတယ်။

သူ့ကို ပြီးခဲ့တဲ့နှစ် ဇွန်လ ၉ ရက်က ဖမ်းဆီးခဲ့ပြီး ရန်ကုန်မြို့၊ ရေကြည်အိုင်စစ်ကြောရေးနဲ့ ပြည်မြို့ ဒ.က.စ စစ်ကြောရေးတို့မှာ မိသားစုနဲ့ တွေ့ခွင့်မပေးဘဲ ၂ လအကြာစစ်ဆေးခဲ့ပြီးနောက် ပြည်မြို့ အကျဉ်းထောင်ကိုပို့ကာ ထောင်တွင်းတရားရုံးကနေ ၂၀၂၂ ခုနှစ်၊ ဒီဇင်ဘာလ ၁၉ ရက်မှာ ထောင်ဒဏ် ၁၉ နှစ် ချမှတ်ခဲ့တာလို့ သိရပါတယ်။

ဦးကျော်ဇေယျဟာ ပဲခူးတိုင်း၊ ပြည်မြို့နယ် တိုင်းလွှတ်တော်ကိုယ်စားလှယ်အဖြစ် ၂၀၁၅ ခုနှစ်နဲ့ ၂၀၂၀ ခုနှစ် အထွေထွေရွေးကောက်ပွဲမှာ ၂ ကြိမ်ဆက်တိုက် အနိုင်ရခဲ့သူလည်း ဖြစ်ပါတယ်။

စာတည်း – လင်း

ပဲခူး၊ မေ ၈၊ ၂၀၂၃။

ပဲခူးတိုင်းဒေသကြီး၊ ပြည်မြို့နယ်၊ ကြပ်ကုန်းရွာအနီး တောင်နဝင်းဆည်နားမှာ စျေးကပြန်လာတဲ့ အုပ်ချုပ်ရေးမှူးလင်မယား သေနတ်နဲ့ပစ်သတ်ခံခဲ့ရတယ်လို့ သိရပါတယ်။

မေလ ၈ ရက်ဒီမနက် ၈ နာရီ ၄၀ မိနစ်လောက်မှာ တဲကုန်းကျေးရွာအုပ်ချုပ်ရေးမှူး ဦးစိုးသန်း ၅၁ နှစ်နဲ့ ဇနီးဖြစ်သူ ဒေါ်ဆွေဆွေမြင့် ၄၈ နှစ်တို့ဟာ ကြပ်ကုန်းစျေးကနေ ကားနဲ့တဲကုန်းရွာဘက်ပြန်လာချိန်မှာ ပစ်ခတ်ရှင်းလင်းခဲ့တာလို့ ပြည်ခရိုင်ပြည်သူ့ကာကွယ်ရေးတပ်ဖွဲ့ ပြန်ကြားရေးတာဝန်ရှိသူက ပြောပါတယ်။

“မြေပြင်က သတင်းပေးပို့လာတာကတော့ အုပ်ကြီးလင်မယားက ကားနဲ့ပြန်လာတဲ့အချိန် လမ်းကနေ စောင့်ပြီး ရှင်းလိုက်တာလို့သိရတယ်။ သူတို့လင်မယားမှာ မိန်းမကပိုဆိုးတယ်။ စကစ အားကိုးနဲ့ ရွာသူရွာသားတွေအပေါ် ခြိမ်းခြောက်ပြောဆိုတာတွေရှိတယ်။ ဒါကြောင့် ရှင်းလိုက်တာဖြစ်တယ်”လို့ ပြောပါတယ်။

အဲ့ဒီ အုပ်ချုပ်ရေးမှူးလင်မယား စီးလာတဲ့ကားကို တောင်နဝင်းဆည်အနီးမှာ ဒေသကာကွယ်ရေး တပ်ဖွဲ့ဝင်တွေကတားပြီး၊ ၂ ဦးစလုံးကားအပြင် ရောက်တဲ့အချိန်မှ ရှင်းလင်းခဲ့တာကြောင့် လည်ပင်းနဲ့ ရင်ဘတ်တွေမှာ ကျည်ထိဒဏ်ရာတွေနဲ့ သေဆုံးသွားတယ်လို့ ဆိုပါတယ်။

အဲဒီပစ်ခတ်မှုကို ပြည်ခရိုင် PDF တပ်ရင်း ၃၆၀၂၊ တပ်ခွဲ ၁ ရဲဘော်တွေက လုပ်ဆောင်ခဲ့တာဖြစ်ပြီး၊ အုပ်ချုပ်ရေးမှူးလင်မယားဟာ စစ်ကောင်စီအားကိုးနဲ့ ပြည်သူလူထုအပေါ် အနိုင်ကျင့် ဗိုလ်ကျနေတာကြောင့် ခုလိုပစ်ခတ်ရှင်းလင်းခဲ့တာ ဖြစ်တယ်လို့ ပဲခူးတိုင်းဒေသကြီး ပြည်သူ့ကာကွယ်ရေးတပ်ဖွဲ့က ထုတ်ပြန်ထားပါတယ်။

စာတည်း – လင်း

ပဲခူး၊ မေ ၃၊ ၂၀၂၃။

ပဲခူးတိုင်း(အနောက်ပိုင်း)၊ ပြည်အကျဉ်းထောင်ကနေ လွတ်ငြိမ်းချမ်းသာခွင့်နဲ့ လွှတ်ပေးခဲ့တဲ့ ဆရာအတတ်သင်ကျောင်းသား ၂ ဦးကို ပန်းတောင်းရဲစခန်းအချုပ်မှာ ပြန်လည် ဖမ်းဆီးချုပ်နှောင် ထားလိုက်တယ်လို့ နိုင်ငံရေးအသိုင်းအဝန်းက သိရပါတယ်။

ယနေ့ မေလ ၃ ရက် ကဆုန်လပြည့်နေမှာ တနိုင်ငံလုံးအတိုင်းအတာနဲ့ ၅၀၅-က နိုင်ငံရေးအကျဉ်းသားတွေကို လွတ်ပေးခဲ့ရာမှာ ပြည်မြို့အကျဉ်းထောင်ကနေ နိုင်ငံရေးအကျဉ်းသား/သူ ၅၃ ဦးကို လွတ်ပေးခဲ့ပေမယ့် ပြည်ပညာရေးဒီဂရီကောလိပ် ကျောင်းသားတွေဖြစ်တဲ့ ကိုမင်းခန့်ကျော်(၂၀ နှစ်)၊ နဲ့ ကိုရှိန်းဝေယံကျော် (၁၈ နှစ်) တို့ နှစ်ဦးကို ပြန်လည်ဖမ်းဆီးခဲ့တာလို့ သိရပါတယ်။

“သူတို့က ပညာရေးကောလိပ်က ကျောင်းဆရာပေါက်စလေးတွေပါ။ လွှတ်ပေးပြီးကာမှ ပန်းတောင်းစခန်းဘက်က ရဲတွေက ခေါ်ပြီး ခံဝန်နဲ့ပြတ်လွှတ်ပေးမယ်ပြောတယ်။ အခုတော့ မလွှတ်တော့ဘူး ပန်းတောင်းရဲအချုပ်မှာဖမ်းထားတယ်။ ပထမ ၅၀၅-က နဲ့အမိန့်ချပြီးသားကို ရဲတွေက ၅၀-ည နဲ့ ပြင်ဆင်ချက်တက်တယ်ဆိုလို့ မလွှတ်တော့ဘူး” လို့ နိုင်ငံရေးတက်ကြွလှုပ်ရှားသူတဦးက ပြောပါတယ်။

သူတို့နှစ်ဦးကို CDM ထောက်ပံ့မှုနဲ့ ၅၀-ည ပုဒ်မ နဲ့ စတင်တရားစွဲဆိုခဲ့ပေမယ့် တရားရုံးက ၅၀၅-က နဲ့ အမိန့်ချခဲ့တာကြောင့် လွတ်ငြိမ်းနဲ့ လွတ်ပြီး ဒေသကွပ်ကဲမှုစစ်ဌာနချုပ် ဘက်က ရဲတပ်ဖွဲ့ကို ပြင်ဆင်ချက် တက်ပြီး ထပ်မံအမှုဖွင့် ဖို့ ပြောဆိုခဲ့တာလို့ နိုင်ငံရေးအကျဉ်းသားဟောင်းတွေဆီက သိရပါတယ်။

“အခုသူတို့ကိုမလွတ်ပေးဘူး ပန်းတောင်းစခန်းအချုပ်မှာ ပြန်ဖမ်းထားတယ်။ သောကြာနေ့မှာ ထောင်ကိုပြန်ပို့မယ်လို့ပြောတယ်။ အခုအမှုကတော့ ထောင်ဒဏ် ၁၀ နှစ်လောက်ကျမယ်။ အခုထိတော့ အိမ်နဲ့အဆက်သွယ်မရကြသေးဘူးလို့ ပြောတယ်။” လို့ နိုင်ငံရေးအကျဉ်းသားဟောင်းတဦးက ပြောပါတယ်။

၂၀၂၁ ခုနှစ် နိုဝင်ဘာလမှာ ကိုရှိန်းဝေယံကျော်နဲ့ ၂၀၂၂ ခုနှစ် ဇန်နဝါရီလမှာတော့ ကိုမင်းခန့်ကျော် တို့ကို ပြည်အကျဉ်းထောင်ထဲကို ပို့ဆောင်ခဲ့တာလို့ သိရပါတယ်။

အလားတူ ကိုကျော်စွာမိုး ဆိုသူကိုလည်း လွတ်ငြိမ်းစာရင်းထဲမှာ ပါဝင်ခဲ့ပြီးကာမှ လွှတ်ခါနီး နံနက်မှာတော့ သံသယဖြင့် စာရင်းပြန်ဖျက်ပြီး ဆက်လက်ထိန်းသိမ်းထားခဲ့တယ်လို့ အကျဉ်းထောင်နဲ့ နီးစပ်သူတွေဆီက သိရပါတယ်။

ပဲခူး၊ မေ ၃၊ ၂၀၂၃။

ပဲခူးတိုင်း(အနောက်ပိုင်း)၊ ပြည်အကျဉ်းထောင်ကနေ ၅၀၅-က ဖြင့် ဖမ်းဆီးထောင်ချထားသူများကို လွတ်ငြိမ်းချမ်းသာခွင့်ပေးလိုက်တယ်လို့ အကျဉ်းထောင်အသိုင်းအဝန်းက သိရပါတယ်။

ယနေ့ မေလ ၃ ရက် ကဆုန်လပြည့်နေ့မှာ ပြည်အကျဉ်းထောင်ကနေ ၅၀၅-က နဲ့ နိုင်ငံရေးအကျဉ်းသား ကျား ၃၅ ဦး နဲ့ မ ၁၄ ဦး လွတ်ပေးခဲ့သော်လည်း လွတ်ငြိမ်းစာရင်းပါဝင်ပြီးကာမှ သံသယနဲ့ ပြန်လည်ဖမ်းဆီးထိန်းသိမ်းခံရသူလည်း ရှိတယ်လို့ နိုင်ငံရေးအသိုင်းအဝန်းက သိရပါတယ်။

“ကျနော်တို့ သိတဲ့တယောက်ဆို လွတ်ငြိမ်းပါပြီးမှ မပါဘူးဆိုပြီး သံသယနဲ့ ပြန်ထိန်းထားတယ်။ သူ့ရင်ဝ ဆောင့်ကန်လိုက်သလို ဖြစ်တာပေါ့။ အခုမနက်မှ စာရင်းပြန်ဖျက်တယ်။ အပြင်က စောင့်နေကြတဲ့ သူမိသားစုရော အထဲကသူရော တလွဲဖြစ်ကုန်တာပေါ့” လို့ နိုင်ငံအသိုင်းအဝိုင်းနဲ့နီးစပ်သူ တဦးက မြေလတ်အသံကို ပြောပါတယ်။

လွတ်ငြိမ်းခွင့်ပေးသူတွေထဲမှာ ပြည်မြို့က နာမည်ကြီး နိုင်ငံရေးတက်ကြွလှုပ်ရှားသူများ ပါဝင်ခဲ့သော်လည်း ၅၀၅-က နဲ့ ထောင်ချခံထားရတဲ့ မိုးမေတ္တာနာရေးကူညီမှုအသင်းက ကိုမျိုးညိန်းဇော်ကိုတော့ လွတ်မပေးဘူးလို့ သူ့မိတ်ဆွေတွေဆီက သိရပါတယ်။

“၅၀၅-က နဲ့ ပြည်ကနေ အကုန်နီးပါး လွတ်တယ်လို့ ပြောရမယ်။ အဲ့အထဲမှာမှ သူကမပါဘူးဆိုတော့ စိတ်မကောင်း ဖြစ်ကြတာပေါ့။ တကယ်က သူက ဘာနိုင်ငံရေးမှ မလုပ်ဘူး။ လူအေးလူပျော်ပဲ။ မိုးမေတ္တာအသင်းကဆိုတာ တခုပဲ ပြောစရာရှိတယ်။ အဲဒါကြောင့်ပဲ မလွတ်တာလား ဒါမှမဟုတ် ရဲစခန်းက ချုပ်ရက်ကိုလျော့ပေါ့တဲ့အထဲမှာ မပါဘူးလို့လည်း ကြားတယ်” လို့ ကိုမျိုးညိန်းဇော်ရဲ့ မိတ်ဆွေတဦးက ပြောပါတယ်။

လွတ်ငြိမ်းစာရင်းမှာ ၅၀၅-က အမှုအပြင် တခြား ပုဒ်မထပ်တိုးကပ်ခံရသူများကို မထည့်သွင်းထားဘူးလို့ အကျဉ်းထောင်နဲ့နီးစပ်သူတွေဆီက သိရပါတယ်။

ယနေ့ ကဆုန်လပြည့် ဗုဒ္ဓနေ့ အထိမ်းအမှတ်ဟုဆိုကာ စစ်ကောင်စီက အကျဉ်းထောင်/အချုပ်နဲ့ စခန်းတွေမှာရှိတဲ့ ရာဇသတ်ကြီးပုဒ်မ ၅၀၅-က ထောင်ချခံထားရတဲ့ အကျဉ်း သား/သူ ၂၁၅၃ ဦးတို့ကို လွတ်ငြိမ်းခွင့်ပေးခဲ့ပြီး ရာဇဝတ်ကျင့်ထုံးဥပဒေပုဒ်မ ၄၀၁ ပုဒ်မခွဲ(၁)အရ “နောက်တစ်ကြိမ် ပြစ်မှုထပ်မံကျူးလွန်ပါက ၎င်းပြစ်ဒဏ်အပြင် လက်ရှိကျခံရန် ကျန်သော ပြစ်ဒဏ်များကိုပါ ဆက်လက်ကျခံပါမည်” ဆိုတဲ့ စည်းကမ်းသတ်မှတ်ချက်နဲ့ လွတ်ငြိမ်းခွင့်ပြုတာလို့ စစ်ကောင်စီက ထုတ်ပြန်ထားပါတယ်။

ပုံစာ – ယနေ့(မေလ ၃ ရက်)နေ့မှာ ပြည်အကျဉ်းထောင်က လွတ်မြောက်လာသူများကို မိသားစုများက ကြိုဆိုနေကြစဉ်။