ပြည်

ပြည်၊ မေ ၂၊ ၂၀၂၃။

ပဲခူးတိုင်းဒေသကြီး၊ ပြည်မြို့၊ ကုတင် ၅၀၀ ဆေးရုံမှာ ကိုဗစ်ရောဂါနဲ့ အဘွားအို ၁ ဦးသေဆုံးသွားတယ်လို့ သိရပါတယ်။

ဧရာဝတီတိုင်း​ဒေသကြီး၊ မြန်အောင်မြို့နယ်ကနေ ပြည်ကုတင် ၅၀၀ ဆေးရုံမှာ ဆေးကုသမှုခံယူနေတဲ့ အသက် ၆၇ နှစ်အရွယ် အဘွားအိုဟာ မေလ ၁ ရက်နေ့ညမှာပဲ ကိုဗစ်ရောဂါနဲ့​သေဆုံးသွားတယ်လို့ ဒေသလူမှုကူညီရေးအသင်း တာဝန်ရှိသူတဦးက ပြောပါတယ်။

“ဆုံးသွားတဲ့သူက ပြည်ကတော့ မဟုတ်ပါဘူး။ ကိုဗစ်ဆိုတာကို ဆေးရုံက ဆရာဝန်တွေက အတည်ပြုပေးထားတာပါ။ သူက ဆေးရုံလာတက်တာ တပတ်လောက်ရှိနေပြီလို့တော့ သိရတယ်။ ဘာရောဂါနဲ့လာတက်တာလဲ ဆိုတာတော့ မသိရဘူး။ ဆေးရုံက စစ်ဆေးချိန်မှာ တွေ့တဲ့ ကိုဗစ်ပိုးက အရင်ကဖြစ်နေတဲ့ ပိုးအမျိုးအစားတွေတော့ မဟုတ်ဘူး။ မျိုးကွဲအသစ်ပုံစံဖြစ်နိုင်တယ်လို့တော့ သုံးသပ်ထားကြတယ်” လို့ ပြောပါတယ်။

အဘွားအိုမှာ ဆေးရုံလာတက်ချိန် ကိုဗစ်သံသယရှိလို့ ဆေးရုံက ဆေးစစ်ချိန်မှာ ကိုဗစ်ရောဂါပိုးတွေ့လို့ သီးခြားထားရှိကာ ဆေးကုသမှုပေးနေရာကနေ ​သေဆုံးသွားတာ ဖြစ်တယ်လို့ ဆိုပါတယ်။

မေလ ၂ ရက်နေ့မနက်ပိုင်းမှာတော့ ဒေသလူမှုကူညီရေးအသင်းအဖွဲ့က သေဆုံးသွားတဲ့ အဘွားအိုရဲ့ နာရေးကိစ္စကို မိသားစုတွေ ဆန္ဒအတိုင်း ပြီးစီးအောင် လုပ်ဆောင်ပေးခဲ့တယ် လို့ သိရပါတယ်။

အဘွားအို နာရေးကိုလာတဲ့ မိသားစုဝင် ၃ ဦးကိုလည်း ကိုဗစ်ရောဂါရှိမရှိ စစ်ဆေးပေးခဲ့ပြီးနောက် ရောဂါပိုးမတွေ့လို့ သက်ဆိုင်ရာနယ်ကို ပြန်ခွင့်ပြုလိုက်တယ်လို့ ဆိုပါတယ်။

၂၀၂၂ ခုနှစ် ကိုဗစ်တတိယလှိုင်း ဖြစ်ပေါ်နေချိန်တုန်းက ပြည်မြို့နယ်အတွင်းမှာ ကိုဗစ်ကြောင့်သေဆုံးသူ ၂၀၀ နဲ့အထက်ရှိခဲ့တယ်လို့ လူမှုကူညီရေးအသင်းတွေဆီက သိရပါတယ်။

စာတည်း – 007

ပြည်၊ ဧပြီ ၂၄၊ ၂၀၂၃။

ပဲခူးတိုင်း(အနောက်ခြမ်း)၊ ပြည်မြို့ အကျဥ်းထောင်ကနေ သာယာဝတီအကျဥ်းထောင်ကို ပြောင်းရွှေ့ခံရတဲ့ နိုင်ငံရေးအကျဥ်းသူ ၄ ဦးထဲမှာ ကင်ဆာရောဂါသည် သက်ကြီးအမျိုးသမီးတဦးလည်း ပါဝင်တယ်လို့ သိရပါတယ်။

ကြို့ပင်ကောက်မြို့နေ အသက် ၆၀ အရွယ် နိုင်ငံရေးအကျဉ်းသူ ဒေါ်မာမာအေးဟာ ရင်သားကင်ဆာ ဝေဒနာ ခံစားနေရတာဖြစ်ပြီး သူနဲ့အတူ နိုင်ငံရေးအကျဉ်းသူ ၃ ဦးကို ဧပြီလ ၂၂ ရက်နေ့က မိသားစုဝင်တွေမသိဘဲ ထောင်အာဏာပိုင်တွေက ပြောင်းရွှေ့လိုက်တာလို့ ဆိုပါတယ်။

“မိတ်ဆွေတွေ ပါဆယ်ပို့ဖို့ သွားတော့မှ ပြောင်းသွားပြီလို့ ပြောမှသိရတာပါ။ ရင်သားကင်ဆာနဲ့ပတ်သက်ပြီး ခုအချိန်အထိတော့ ဆေးကုသတာ မရှိသေးဘူးဗျ။ ကျန်းမာရေးက သိရသလောက်တော့ ညစဉ်အဖျားတက်တယ်လို့ သိရတယ်။ မပြည့်ပြည့်ဝင်းက အနီးကပ်ပြုစုပေးနေတယ်လို့လည်း သိရတယ်။ တခြားတော့ ဘာမှမသိရဘူးဗျ” လို့ ဒေါ်မာမာအေးနဲ့ နီးစပ်သူတဦးက မြေလတ်အသံကို ပြောပါတယ်။

ထောင်ပြောင်းရွှေ့ခံရသူတွေဟာ ကင်ဆာဝေဒနာသည် ဒေါ်မာမာအေး၊ မဆုဝေဖြိုး၊ မပြည့်ပြည့်ဝင်းနဲ့ ဒေါ်စာဥတို့ နိုင်ငံရေးအကျဉ်းသူ ၄ ဦးဖြစ်ပြီး ပြည်ထောင်တွင်း ဖိနှိပ်မှုတွေကို ဆန့်ကျင်တောင်းဆိုမှုတွေ ပြုလုပ်ခဲ့တဲ့အတွက် သာယာဝတီထောင်ကို ပြောင်းရွှေ့ခဲ့တာလို့ သိရပါတယ်။

ဒေါ်မာမာအေးဟာ ပေါင်းတည်အကျဥ်းထောင်အတွင်း ရှိနေချိန်မှာလည်း ကျန်းမာရေးစောင့်ရှောက်မှု မရရှိသလို အမှုရင်ဆိုင်ဆဲကာလမှာလည်း ရှေ့နေလိုက်ပါခွင့် မရရှိဘဲ အကျဥ်းသားအခွင့်အရေးပါ ဆုံးရှုံးခဲ့ရတယ်လို့ သူနဲ့ရင်းနှီးတဲ့ရှေ့နေတဦးက ဆိုပါတယ်။

ဒေါ်မာမာအေးဟာ ၂၀၂၁ ခုနှစ်၊ ဇွန်လက ကြို့ပင်ကောက်မြို့နေအိမ်မှာ ဖမ်းဆီးခံခဲ့ရတာဖြစ်ပြီး သူ့ရဲ့သားဖြစ်သူကို လာဖမ်းချိန် မတွေ့ရှိတာကြောင့် မိခင်ဖြစ်သူ ဒေါ်မာမာအေးကို စစ်ကောင်စီက ဖမ်းဆီးကာ အကြမ်းဖက်ဥပဒေပုဒ်မ ၅၂(က)၊မတရားသင်းပုဒ်မ ၁၇(၁)နဲ့ တရားစွဲပြီး ခုခံချေပခွင့် မရဘဲ စစ်ကောင်စီတရားရုံးက ထောင် ၅ နှစ်ချမှတ်ခဲ့တာ ဖြစ်ပါတယ်။

ပြည်၊ ဧပြီ ၂၂၊ ၂၀၂၃။

ပြည်အကျဉ်းထောင်အတွင်း ဖိနှိပ်မှုတွေကို ဆန့်ကျင်တောင်းဆိုမှုတွေ ပြုလုပ်ခဲ့တဲ့ အကျဉ်းသူ မဆုဝေဖြိုး အပါအဝင် အမျိုးသမီး ၄ ဦးကို သာယာဝတီအကျဉ်းထောင်ကို ပြောင်းရွေ့လိုက်တယ်လို့ အကျဉ်းထောင်နဲ့ နီးစပ်သူများထံက သိရပါတယ်။

ယနေ့ ဧပြီလ ၂၂ ရက်နေ့ နံနက်အစောပိုင်းက ပြောင်းရွေ့ခဲ့တာဖြစ်ပြီး သင်္ကြန်ရက်မတိုင်မီကတည်းက ပြောင်းရွေ့မိန့်ကိုကြားသိထားရပေမယ့် မိသားစုဝင်တွေ တွေ့ခွင့်မရဘဲ ပြောင်းရွေ့ခံလိုက်ရတာလို့ အကျဉ်းထောင် ရင်းမြစ်တွေက ဆိုပါတယ်။

“သူက ထောင်တွင်းတောင်းဆိုမှုတွေ လုပ်တာရှိတယ်။ အမျိုးသမီးဆောင်မှာ ဖိနှိပ်တာမျိုးပေါ့။ သန့်ရှင်းရေးတို့ သစ်ပင်စိုက်တာတို့ ည ကိုးနာရီ မဖြစ်မနေ အိပ်ရမယ်ဆိုတာတွေကို ထောင်ပိုင်တန်းစီးလာတဲ့အချိန်မှာ တိုက်ရိုက် တောင်းဆိုလိုက်တယ်။ အဲနောက်ပိုင်း ညပိုင်းအိပ်တာကိုတော့ လျော့ပေးလိုက်တယ် ကြားတယ်။ ထောင်အရာရှိအချို့က သိပ်မကျေနပ်ကြဘူး။ နောက်သူက ဆံပင်ဆေးဆိုးထားတော့ အနက်ဆိုးခိုင်းတာကို မဆိုးဘူးဆိုပြီး ငြင်းတယ်။ အဲဒါမျိုးတွေတော့ ရှိတယ်။” လို့ အကျဉ်းထောင်ရင်းမြစ်က ဆိုပါတယ်။

မဆုဝေဖြိုးအပါ အမျိုးသမီး အကျဉ်းသူ ၄ ဦးနဲ့ အခြား အမျိုးသားအကျဉ်းသားတချို့ကိုလည်း ပြောင်းရွေ့ခဲ့ပေမယ့် အခြားသူများရဲ့ အသေးစိတ် အချက်အလက်တွေကိုတော့ မသိရသေးဘူးလို့ သူက ပြောပါတယ်။

မဆုဝေဖြိုး ဟာ ပြည်ခရိုင်ကျောင်းသားသမဂ္ဂဥက္ကဌဟောင်းကိုစိုးမြတ်မင်းရဲ့ ဇနီးဖြစ်သလို ကိုစိုးမြတ်မင်း ဖမ်းဆီးခံရပြီး ၅ ရက်အကြာဖြစ်တဲ့ ၂၀၂၂ ခုနှစ်၊ မေလ ၈ ရက်နေ့မှာ ပြည်ခရိုင်၊ ရွှေတောင်မြို့နယ်ထဲက ကျေးရွာတရွာမှာ မဆုဝေဖြိုးနဲ့ သားဖြစ်သူ ၂ နှစ်သားအရွယ် ကလေးကိုလည်း စစ်ကောင်စီက ဖမ်းဆီးခဲ့တာပါ။

“လင်မယားနှစ်ယောက်လုံးက အဖမ်းခံရပြီး သားကလေးကတော့ မဆုဝေဖြိုးအမေတွေဆီမှာ နေတယ်လို့ သိရပါတယ်။ သာယာဝတီကို အပြောင်းခံလိုက်ရပြီဆိုတော့ ထောင်ဝင်စာ ပစ္စည်းတွေ ပို့ဖို့ ခက်သွားတာပေါ့။ အရင်ကလည်း လူတွေ့တော့ မရဘူး။” လို့ ကိုစိုးမြတ်မင်းနဲ့ ရင်းနှီးခဲ့ဖူးသူ မိတ်ဆွေတဦးက ပြောပါတယ်။

မဆုဝေဖြိုးဟာ အကြမ်းဖက်မှု တိုက်ဖျက်ရေးဥပဒေ ပုဒ်မ-၅၁(ဂ) နဲ့ ထောင်ဒဏ် ၇ နှစ်ချမှတ်ခံထားရတာဖြစ်ပြီး ၂၀၂၂ ခုနှစ်မှစတင်ကာ ဖမ်းဆီးခံရသူတွေကို စစ်ကောင်စီအထူးတရားတွေက အကြမ်းဖက်မှု တိုက်ဖျက်ရေးဥပဒေတွေနဲ့သာ အမှုဖွင့်တရားစွဲဆို အမိန့်ချခဲ့တာဖြစ်ပြီး အများစုမှာ ထောင်တသက်အပါအဝင် နှစ်ရှည်ထောင်ဒဏ်များကို ချမှတ်ခံထားရတယ်လို့ ရှေ့နေအသိုင်းအဝိုင်းက သိရပါတယ်။

ပြည်၊ ဧပြီ ၁၃၊ ၂၀၂၃။

ပဲခူးတိုင်းဒေသကြီး၊ ပြည်မြို့၊ ဗိုလ်ချုပ်ကျောက်ရုပ်အနီးမှာ စစ်ကောင်စီက သင်္ကြန်မဏ္ဍပ်ဖွင့်ပွဲကို ပြုလုပ်ရာမှာ မြို့တွင်းလမ်းတွေပိတ်ပြီး အစစ်အဆေးတင်းကျပ်စွာနဲ့ ပြုလုပ်ခဲ့တယ်လို့ သိရပါတယ်။

ဧပြီလ ၁၃ ရက်ဒီမနက် ၇ နာရီလောက်မှာ စစ်ကောင်စီလက်အောက်ခံ ဌာနဆိုင်ရာဝန်ထမ်းတွေနဲ့ သင်္ကြန်မဏ္ဍပ်ဖွင့်ပွဲကို ပြုလုပ်ခဲ့ရာ ဝန်ထမ်းအနည်းငယ်သာ တက်ရောက်ခဲ့ပြီး ပြည်သူတွေ တက်ရောက်သူမရှိခဲ့ဘူးလို့ ဒေသခံတဦးက ပြောပါတယ်။

“ဗိုလ်ချုပ်ကျောက်ရုပ် မြို့လယ်ခေါင်လမ်းဆုံမှာ သူတို့ ဗဟိုမဏ္ဍပ်လုပ်ပြီး ဖွင့်ပွဲလုပ်တာ။ လမ်းတွေက ပိတ်ထားတယ်။ အစစ်ဆေးလည်း များတယ်။ လူကတော့ သူတို့လူနည်းနည်းလောက်ပဲရှိတယ်။ အခြေနေကောင်းတုန်းကဆိုရင် ဘာပြောကောင်းမလဲ ဖွင့်ပွဲနေဆို စည်ကားနေတာ တိုးမပေါက်ပဲ။ သူတို့ကတော့ မဖြစ်ဖြစ်အောင်လုပ်မှာပဲ” လို့ ပြောပါတယ်။

သင်္ကြန်မဏ္ဍပ်ဖွင့်ပွဲလုပ်ဖို့အတွက် ဧပြီလ ၁၂ ရက် မနေ့ညပိုင်းကတည်းက မဏ္ဍပ်ဝန်းကျင်နေရာတွေမှာ စစ်ကောင်တပ်တွေနဲ့ ရဲတွေ လုံခြုံရေးအများအပြားချထားသလို ဒီနေ့မနက် ဖွင့်ပွဲမှာလည်း အရပ်ဝတ်၊ ယူနီဖောင်းဝတ်တွေနဲ့ လုံခြုံရေး အင်အား ၅၀ ထက်မနည်း ထားရှိကာ မဏ္ဍပ်လာသမျှယာဥ်တွေကို တားဆီးစစ်ဆေးတာတွေ လုပ်ခဲ့တယ်လို့ ဆိုပါတယ်။

သင်္ကြန်အကြိုနေ့ မနက်ပိုင်း ဒီမနက်မှာတော့ ပြည်မြို့အတွင်းမှာ ရေကစားသူမရှိသလောက်နည်းပါးပြီး ကလေးငယ်အချို့သာ အိမ်ရှေ့တွေမှာ ရေပက်ကစားတာတွေရှိတယ်လို့ သိရပါတယ်။

စစ်တပ်က အာဏာမသိမ်းခင်နှစ်တွေမှာ သင်္ကြန်အကြိုနေ့မတိုင်ခင်ကတည်းက ပြည်မြို့အတွင်း မြို့ပေါ်ရပ်ကွက်တွေမှာ သင်္ကြန်မဏ္ဍပ်တွေ အများအပြားနဲ့ ရပ်ကွက်အိမ်ရှေ့တွေမှာ ဒေသခံမိသားစုအလိုက် အုန်းလက်မဏ္ဍပ်တွေ ထိုးတာရှိခဲ့ပေမယ့် အာဏာသိမ်းပြီးနောက်ပိုင်းမှာတော့ မရှိသလောက် နည်းပါးနေတယ်လို့ သိရပါတယ်။

စာတည်း – လင်း

ပြည်၊ ဧပြီ ၈၊ ၂၀၂၃။

ပဲခူးတိုင်းဒေသကြီး(အနောက်ပိုင်း)၊ ပြည်မြို့မှာ ရာဇဝတ်ပြစ်မှုနဲ့ ဖမ်းဆီးခံရသူ လူငယ်တွေကို စစ်တပ်ယူနီဖောင်း ဝတ်ပြီး ကင်းစောင့်ခိုင်းတာအပြင် စစ်တပ်ထဲဝင်ခိုင်းနေတယ်လို့ မြို့ခံတွေဆီက သိရပါတယ်။

ပြီးခဲ့တဲ့ မတ်လအတွင်းမှာ ယာဉ်စည်းကမ်း လမ်းစည်းကမ်းနဲ့ ဖမ်းဆီးခံရပြီး ငွေကြေးမတတ်နိုင်သူတွေကို အချုပ်သားတွေကို စစ်ယူနီဖောင်းဝတ်ခိုင်းပြီး ကျည်မပါသေနတ်နဲ့ ကင်းစောင့်ခိုင်းတာတွေ လုပ်ခဲ့တယ်လို့ ပြန်လည်လွတ်မြောက်လာသူတွေနဲ့ နီးစပ်သူတွေက ပြောပါတယ်။

“အချုပ်ထဲမှာ ပိုက်ဆံမတတ်နိုင်လို့ နောက်ကမလိုက်နိုင်တဲ့ လူငယ်တချို့ကို ကင်းစောင့်ခိုင်းတာ တပ်ယူနီဖောင်းနဲ့ သေနတ်ကိုင်ပြီး စောင့်ရတယ်တဲ့။ ကျည်ဆန်တော့ မပါဘူးပြောတယ်။ သူတို့မှာ အင်အားမရှိတာလား ကြောက်လို့လားတော့ မသိဘူး။ ကလေးတွေက နှစ်ရက်စောင့်ပေးခဲ့ရတယ် ပြောတယ်” လို့ မြို့ခံတဦးက ပြောပါတယ်။

ဒါ့အပြင် ရပ်ကွက်တွေထဲ ဆိုးသွမ်းလူငယ်တွေ ပစ္စည်းခိုးယူရာမှာမိတဲ့အတွက် ဖမ်းဆီးခဲ့ပေမယ့် တပ်ထဲဝင်ပါက လွတ်ပေးမယ်လို့ ပြောဆိုပြီး အိမ်တွေကို ပြန်လိုက်ပို့တာတွေ လုပ်ဆောင်နေတယ်လို့ မြို့ခံတွေဆီက သိရပါတယ်။

“လူငယ်တွေကတော့ ညပိုင်းမှောင်ရိပ်ခိုနဲ့ တခြားပစ္စည်းတွေလည်း ယူမိတာမျိုးရှိမှာပေါ့။ အဲ့ဒါကို ထောင်ချမခံချင်ရင် တပ်ထဲဝင် လွှတ်ပေးမယ်ဆိုပြီး ပြောပြီး အိမ်တွေကို လိုက်ပို့တာတွေ လုပ်နေတယ်လို့ ပြောကြတယ်” လို့ မြို့ခံတဦးက ပြောပါတယ်။

မူးယစ်ရမ်းကားနဲ့ မှောင်ရိပ်ခိုတွေကို သက်ဆိုင်ရာရပ်ကွက်အုပ်ချုပ်ရေးမှူးတွေက ဖမ်းဆီးပြီး ဒဏ်ငွေရိုက်တာ၊ ရိုက်နှက်ခြိမ်းခြောက်တာတွေ လုပ်ဆောင်နေသလို ညနက်အချိန် ပေါ်တာဆွဲမယ်ဆိုတဲ့ သတင်းတွေကြောင့် မြို့ပေါ်မနက်အစော ဈေးလာရောက်ရောင်းချရတဲ့ တောဈေးသယ် လူငယ်တွေလည်း စိုးရိမ်နေကြရတယ်လို့ ဆိုပါတယ်။

ပဲခူး၊ မတ် ၃၁၊ ၂၀၂၃။

ပဲခူးတိုင်း(အနောက်ပိုင်း)၊ ပြည်မြို့နယ် စီမံအုပ်ချုပ်ရေးကောင်စီက ဌာနဆိုင်ရာတွေကို သင်္ကြန်မဲလက်မှတ်တွေ ဖိအားပေးရောင်းနေတယ်လို့ သိရပါတယ်။

စစ်ကောင်စီ ဌာနဆိုင်ရာတွေ၊ ရပ်ကျေးအုပ်ချုပ်ရေးမှူး၊ ဆယ်အိမ်မှူး၊ သတင်းပေးတွေနဲ့ စစ်ကောင်စီထောက်ခံသူတွေကို ရောင်းချနေတာလို့ ဆိုပါတယ်။

“ရောင်းတာကတော့ ပုဂ္ဂလိကဆေးရုံ၊ ဆေးခန်းနဲ့ သူတို့နဲ့နီးစပ်တဲ့ စီးပွားရေးလုပ်ငန်းရှင်တွေကို ရောင်းတာတွေ့ရတယ်။ တမဲကို ၃၅၀၀ တဲ့ ဆိုင်ကယ်နဲ့ ဖုန်းတွေပါတယ်” လို့ မြို့ခံတဦးက ပြောပါတယ်။

မဲတစောင်ကို ၃၅၀၀ ကျပ်နှုန်းနဲ့ ရောင်းချပြီး ယိုးဒယားဆိုင်ကယ်(၁) စီး၊ တရုတ်ဆိုင်ကယ်(၂) စီးနဲ့ ဖုန်းအလုံး(၂၀) ကို ကံစမ်းမဲဖောက်ပေးမှာဖြစ်တယ်လို့ မဲလက်မှတ်မှာ ဖော်ပြထားပါတယ်။

ဒါ့အပြင် သင်္ကြန်ကာလစည်ကားရေး စစ်ကောင်စီက နည်းမျိုးစုံသုံးနေသလို ကမ်းနားလမ်းလျှောက်သင်္ကြန်၊ ရေပေါ်သင်္ကြန်တွေနဲ့ ဌာနဆိုင်ရာ၊ ရပ်ကွက်ရုံးတွေကနေ တာဝန်ယူပြီး ယိမ်းတွေ ထွက်ကြဖို့ကိုလည်း ညွှန်ကြားထားတယ်လို့ သိရပါတယ်။

ရပ်ကွက်ယိမ်းတွေအတွက် ရပ်ကွက်အတွင်းမှာရှိတဲ့ စီးပွားရေးလုပ်ငန်းရှင်တွေကို အချိုးကျစီ တာဝန်ယူခိုင်းတာမျိုးတွေလည်း လုပ်ဆောင်နေတယ်လို့ မြို့ခံတွေက ပြောပါတယ်။

ပဲခူး၊ မတ် ၂၈၊ ၂၀၂၃။

ပဲခူးတိုင်း၊ ပြည်မြို့မှာ သင်္ကြန်စည်ကားဖို့ စစ်ကောင်စီက ဌာနဆိုင်ရာဝန်ထမ်းတွေ၊ ရာအိမ်မှူးတွေ၊ ဆယ်အိမ်မှူးတွေနဲ့ ပူးပေါင်းကြိုးစားနေကြတယ်လို့ ဒေသခံတွေက ပြောပါတယ်။

လက်ရှိ ပြည်မြို့ ဗိုလ်ချုပ်ကျောက်ရုပ်အနီးမှာ ဗဟိုမဏ္ဍပ်ဆောက်နေပြီး နောက်ထပ်လည်း ရပ်ကွက်မဏ္ဍပ်တွေ ဆက်လုပ်သွားမယ့်အစီအစဥ်တွေလည်း ကြားနေရတယ်လို့ ပြည်မြို့ဒေသခံတဦးက ပြောပါတယ်။

“စကစ ထောက်ခံတဲ့သူအချို့ ရာအိမ်မှုး၊ ဆယ်အိမ်မှုး၊ အုပ်ကြီး၊ ဒလန် သူ့လူနဲ့သူ စီစဥ်နေပြီး ပြည်သူလူထု အများစုကတော့ စိတ်ဝင်စားမှု နည်းပါးတာတွေ့ရတယ်” လို့ ဆိုပါတယ်။

ပြည်မြို့မှာ အခုနှစ်သင်္ကြန်ကို ကမ်းနားလမ်းတလျှောက်မှာ လမ်းလျှောက်သင်္ကြန်ပြုလုပ်ပြီး မြစ်ကမ်းစပ်မှာတော့ ရေပေါ်သင်္ကြန်ပြုလုပ်ဖို့ စီစဥ်နေတယ်လို့ သိရပါတယ်။

ဒါ့အပြင် ဌာနဆိုင်ရာများအလိုက် ယိမ်းတွေထွက်ဖို့ ညွှန်ကြားထားပြီး မြို့ပေါ် ၁၀ ရပ်ကွက်မှာလည်း အုပ်ချုပ်ရေးမှူးတွေဦးဆောင်ပြီး ယိမ်းတွေထွက်ဖို့ ကြိုးစားနေသလို ငွေကြေးကောက်ခံတာတွေကိုလည်း လုပ်ဆောင်နေတယ်လို့ သိရပါတယ်။

“ရပ်ကွက်တွေထဲကို လာကောက်တယ်။ စေတနာရှိသလောက်လို့ ပြောတယ်။ စီးပွားရေးလုပ်ငန်းရှင်တွေကိုတော့ သက်သက်ကောက်တာ ရှိတယ်။ ယိမ်းတွေအတွက် တာဝန်ယူခိုင်းတာတွေ လုပ်တယ်” လို့ မြို့ခံအမျိုးသမီးတဦးက ပြောပါတယ်။

လက်ရှိအချိန်ထိ ပုဂ္ဂလိကမဏ္ဏုပ်ဆောက်တာမျိုးနဲ့ ကြေညာတာမျိုး မရှိသေးသလို ဌာနဆိုင်ရာများနဲ့ ဖိအားပေးခံရသူတွေကလွဲရင် အများစုက စိတ်ဝင်စားမှု မရှိကြဘူးလို့ မြို့ခံတွေဆီက သိရပါတယ်။

သဲကုန်း၊ မတ် ၁၅၊ ၂၀၂၃။

ပြည်ခရိုင်၊ သဲကုန်းမြို့နယ်၊ ဆင်စွယ်ရပ်ရွာ အနောက်ဘက် ရေကန်ထဲမှာ ဓါတ်လိုက်ခံရသူ အမျိုးသားတဦးကို ဆေးရုံပို့ဆောင်ခဲ့ပေမယ့် သေဆုံးသွားခဲ့တယ်လို့ သဲကုန်းပရဟိတနာရေးကူညီမှုအသင်းက သိရပါတယ်။

ယမန်နေ့ မတ်လ ၁၄ ရက်နေ့ည ၁၀ နာရီခွဲခန့်က သတင်းပေးအကြောင်းကြားလို့ သွားရောက်ကယ်ဆယ်ကာ အရေးပါ်ဌာနကိုပို့ဆောင်ခဲ့ပေမယ့် သေဆုံးခဲ့တာလို့ ဆိုပါတယ်။

“သဲကုန်မြို့နဲ့နှစ်မိုင်ကျော်လောက်ဝေးမယ်၊ ကန်စပ်ချောင်းစပ်မှာငါးဓါတ်တို့ကျတာ၊ သူတို့လုပ်နေကျတွေပါ၊ ခုက အက်ဆီးဒင့်သဘောမျိုးဖြစ်တာ၊ ကန်ထဲမှာငါးတွေကို ကျင်စက်နဲ့ဖမ်းကြတာ၊ အုပ်စုလိုက်ဖမ်းရင်း ကြိုးပေါက်တာမျိုးနဲ့ ဓာတ်လိုက်သွားတာမျိုးဖြစ်ပြီး၊ သေသွားတာဖြစ်နိုင်တယ်လို့” သဲကုန်းပရဟိတနာရေးကူညီမှုအသင်း ဥက္ကဌက မြေလတ်အသံကို ပြောပါတယ်။

သေဆုံးသူမှာ အသက် ၃၀ အရွယ်ရှိ အမျိုးသားတဦးဖြစ်ကာ သူရဲ့ ရုပ်အလောင်းကို ယနေ့မတ်လ ၁၅ ရက်မနက်ပိုင်းက မြို့နယ်ဆေးရုံကြီးရင်ခွဲရုံကတဆင့် သေဆုံးသူနေထိုင်ရာ တပ်ရွာကို ပို့ဆောင်ပေးခဲ့တယ်လို့ သိရပါတယ်။

အဲဒီလို ဘတ္ထရီအကြီးစားတွေနဲ့ လျှပ်စစ်ရှော့တိုက်ကျင်စက်တို့ ငါဖမ်းနည်းဟာ လူအတွက်အန္တရာယ်များသလို ငါးဥချချိန်နဲ့ ငါးသားပေါက်များ မျိုးတုန်းမှုကို ဆိုးဆိုးရွားရွားဖြစ်စေတဲ့အတွက် ဥပဒေအရတားမြစ်ထားသော ငါးဖမ်းနည်းဖြစ်သော်လည်း ထိထိရောက်ရောက် တားမြစ်နိုင်တာမျိုး မရှိသေးဘူးလို့ သိရပါတယ်။
ပုံစာ – သေဆုံးသွားသူ၏ရုပ်အလောင်းကို ပြန်လည်ပို့ဆောင်ပေးနေသော ပရဟိတကား။

စာတည်း-007