ပြည်

ပဲခူး၊ ဇူလိုင် ၁၂၊ ၂၀၂၂။

ပဲခူးတိုင်းဒေသကြီး(အနောက်ပိုင်း)၊ ပြည်မြို့နယ် တိုင်းဒေသကြီးလွှတ်တော်ကိုယ်စားလှယ် ဦးကျော်ဇေယျ ဖမ်းဆီးခံရပြီးနောက် ဒေသခံတချို့ကို ဆက်တိုက်ဆိုသလို ဖမ်းဆီးခံနေရတယ်လို့ မြို့ခံတွေကပြောပါတယ်။

ပြီးခဲ့တဲ့ ဇွန်လ ၉ ရက်နေ့က ရန်ကုန်မြို့မှာ ဦးကျော်ဇေယျအပါအဝင် ၄ ဦးဖမ်းဆီးခံခဲ့ရပြီး ပြည်မြို့ကို လွှဲပြောင်းပေးလိုက်တယ်ဆိုတဲ့ သတင်းတွေထွက်ပေါ်ခဲ့ပြီး ဘယ်နေရာမှာထိန်းသိမ်းထားတယ် ဆိုတာ တိကျစွာမပြောနိုင်သေးချိန်မှာပဲ သံသယရှိတဲ့ဒေသခံတချို့ကို စစ်ကောင်စီက လိုက်လံဖမ်းဆီးနေတာပါ။

“အဖမ်းခံနေရတာကတော့ ဆက်တိုက်ပဲ အရင် NLD ပြန်ကြားရေးလုပ်ခဲ့ဖူးသူလည်း အဖမ်းခံလိုက်ရတယ်။ နောက် မြို့ကနာမည်ကြီးစီးပွားရေးသမားတယောက်လည်း လာဖမ်းသွားတယ်။ ပြန်လွှတ်မလွှတ်တော့မသိဘူး နောက်ပြီး ပေါင်းတလည်နဲ့ ဝက်ထီးကန်မြို့တွေမှာလည်း ဖုန်းနဲ့လိုက်တိုက်စစ်ပြီး ရှာတယ်။ တချို့လည်း ရှောင်နေကြတယ်။ ကိုကျော်ဇေယျနဲ့ ဆက်စပ်မှုရှိတယ်မရှိဘူးကတော့ သေချာမပြောနိုင်ဘူး” လို့ မြို့ခံအမျိုးသားတဦးကပြောပါတယ်။

ပေါင်းတလည်မြို့က စစ်ကောင်စီခန့် ရပ်ကွက်အုပ်ချုပ်ရေးမှူးတဦး၊ ယခင် NLD ပါတီသတင်းနဲ့ပြန်ကြားရေးအဖွဲ့ဝင်တဦး၊ စီးပွားရေးလုပ်ငန်းရှင်တဦးနဲ့ အခြား ဖမ်းဆီးခံရသူ ၅ ဦးထက်မနည်းရှိတယ်လို့ မြို့ခံတွေက ဆိုပါတယ်။

အဲဒီလို ကိုကျော်ဇေယျအပါအဝင် ဖမ်းဆီးခံခဲ့ရသူတွေနဲ့ နောက်ဆက်တွဲ ဖမ်းဆီးခံရသူတွေကိုပါ စစ်ကောင်စီနဲ့ NUG၊ သက်ဆိုင်ရာအဖွဲ့အစည်းတွေက တရားဝင်သတင်းထုတ်ပြန်ခြင်းမရှိသေးတဲ့အပေါ် လူထုက စိုးရိမ်နေကြတယ်လို့ဆိုပါတယ်။

“ဘယ်မှာဖမ်းမိပြီး ဘယ်ကိုပို့တယ်ဆိုတာ ကျနော်တို့သိရသလောက်ကတော့ တိတိကျကျ ပြောနိုင်သူမရှိဘူး။ ထုတ်ပြန်တာလည်းမတွေ့ရတော့ မြို့ခံတွေနဲ့ ပတ်သက်စပ်ဆက်သူတွေက စိုးရိမ်တာပေါ့ဗျာ။ အဖမ်းခံနေရတဲ့သူတွေလည်း ရှိနေတော့။ ကျနော်ပြောချင်တာကတော့ ကိုယ့်အခြေအနေကိုယ်သိပေါ့ဗျာ။ စပ်ဆက်ပတ်သက်မှုကြီးကြီးရှိနေတယ်ဆိုရင်တော့ အဖမ်းမခံရခင် ရှောင်နေတာအကောင်းဆုံးပါပဲ။” လို့ မြို့ခံတဦးကပြောပါတယ်။

ဦးကျော်ဇေယျ ဟာ အမျိုးသားဒီမိုကရေစီအဖွဲ့ချုပ်ပါတီရဲ့ ပြည်မြို့နယ် တိုင်းဒေသကြီးလွှတ်တော်ကိုယ်စားလှယ်အဖြစ် ၂၀၁၅၊ ၂၀၂၀ ရွေးကောက်ပွဲများမှာ အနိုင်ရကိုယ်စားလှယ်ဖြစ်ခဲ့ပြီး စစ်အာဏာသိမ်းပြီးနောက်ပိုင်းမှာလည်း အာဏာရှင်ဆန့်ကျင်တော်လှန်ရေးတွေ ဆက်လက်လုပ်ဆောင်ခဲ့လို့ သူငှားရမ်းနေထိုင်ခဲ့တဲ့ အိမ်အပါအဝင် ပိုင်ဆိုင်မှုတွေကိုပါ ချိတ်ပိတ်သိမ်းဆည်းခံထားရသူဖြစ်ပါတယ်။

ပဲခူး၊ ဇူလိုင် ၄၊ ၂၀၂၂။

ပဲခူးတိုင်းအနောက်ခြမ်း၊ ပြည်မြို့က ၇ တန်းကျောင်းသား ၇ ဦးကို ကျောင်းအုပ်ကြီးက ရပ်ကွက်အုပ်ချုပ်ရေးမှူးကို အကြောင်းကြားဖမ်းခိုင်းခဲ့တယ်လို့ မြို့ခံတွေဆီက သိရပါတယ်။

ပြည်မြို့၊ ခေတ္တရာမြို့သစ်မှာရှိတဲ့ အောင်မြေသာယာ မူလတန်းကျောင်းက ၇ တန်းကျောင်းသားတွေက ၂ ပတ်အတွင်း ကျောင်းပိတ်ပေးဖို့ နဲ့ ခြိမ်းခြောက်တဲ့သဘော စာရေးသား ကာ ပေးပို့လို့ဆိုပြီး ကျောင်းအုပ်ကြီးဖြစ်သူက ရပ်ကွက်အုပ်ချုပ်ရေးမှူးကို အကြောင်းကြားဖမ်းခိုင်းလို့ ဖမ်းဆီးခဲ့တာဖြစ်တယ်လို့ မြို့ခံတွေက ပြောပါတယ်။

“သိတာတော့ ကလေးတွေက ရုံးခန်းထဲက စားပွဲခုံကိုဆိုလား စာခေါက်လေးသွားတင်တာ။ အဲဒီမှာ သူတို့ကိုခြိမ်းခြောက်ပါတယ်ဆိုပြီး ကြောက်လန့်ပြီး ရပ်ကွက်အုပ်ချုပ်ရေးမှူးကို အကြောင်းကြားလိုက်တော့ အုပ်ချုပ်ရေးမှူးနဲ့ စစ်တပ်က စစ်ကားတွေနဲ့ ကလေးတွေ အိမ်တွေကို လာခေါ်ဖမ်းသွားတာ။ စာရေးထားတဲ့စာရွက်က စာလုံးပေါင်းတောင်မမှန်ပါဘူး အဲဒါကိုကလေးတွေကို စစ်ကားတွေနဲ့လာဖမ်းကြတာ” လို့ မြို့ခံတဦးကဆိုပါတယ်။

ဇူလိုင်လ ၁ ရက်နေ့က ဖမ်းဆီးသွားတဲ့ ကျောင်းသား ၇ ဦးထဲက ၆ ဦးကိုတော့ ပြန်လည်လွှတ်ပေးခဲ့ပြီး ခေါင်းဆောင်လို့ယူဆရတဲ့ ကျောင်းသားကိုတော့ ပြန်လွှတ်မပေးသေးဘူးလို့ ဆက်ပြောပါတယ်။

ပဲခူး၊ ဇွန် ၁၅၊ ၂၀၂၂။

ပဲခူးတိုင်း ပြည်မြို့က အသက်၂၄နှစ်အရွယ် လူငယ်တဦး မနေ့က ဖရူဆိုမြို့ ရှေ့တန်းတနေရာမှာ လက်နက်ကြီး စမ်းသပ်ရင်း ကျဆုံးခဲ့တယ်လို့ သိရပါတယ်။

‌လက်နက်ကြီးစမ်းသပ်ရင်း ကျဆုံးသွားတဲ့ လူငယ် ထင်လင်ဦး( ခ) ဂျပန်ကြီးဟာ PDF တပ်ဖွဲ့ လက်နက်ထုတ်လုပ်ရေးမှာ တာဝန်ထမ်းဆောင်နေသူဖြစ်ပြီး မနေ့က ‌ရှေ့တန်းကို လိုက်အသွားမှာ ကျဆုံးခဲ့တာဖြစ်တယ်လို့ သူငယ်ချင်းဖြစ်သူက ပြောပါတယ်။

” ရှေ့တန်းကို လိုက်သွားတာ၊ သူ့ကို ရှေ့တန်းမလိုက်နဲ့လို့ ပြောတာကို သူက အတင်းလိုက်သွားပြီးတော့၊ လက်နက်ကြီးစမ်းရင်းနဲ့ ကျသွားတာ” လို့ ပြောပါတယ်။

ရဲဘော် ထင်လင်းဦးဟာ၂၄ နှစ်ပြည့်ပြီးထားသူဖြစ်ပြီး လာမဲ့ ဇွန်လ ၂၀ရက် ရက်လည်မှာ အသက်၂၅ နှစ်ပြည့်မှာဖြစ်သလို မိဘတွေကလည်း အမွေပြတ်စွန့်လွှတ်ခံထားရသူဖြစ်ပါတယ်။

သူဟာ အရင်က Sniper အဖွဲ့ထဲမှာ တာဝန်ထမ်းဆောင်ခဲ့ဖူးသူဖြစ်ကာ ‌အနေအေးပြီး ကူညီတတ်သူတဦးလည်း ဖြစ်တယ်လို့ သူငယ်ချင်းဖြစ်သူ ရဲဘော်တဦးက ပြောပါတယ်။

” တပ်ရင်းမှာလဲအားကိုးရတယ်သူက၊ လေ့ကျင်းခန်းတွေဆိုလဲသူများတွေထက်ပိုပြီးအပင်ပန်းခံလုပ်တတ်တာ၊ သူ့ဆိုအကုန်လုံးကချစ်ကျခင်ကျတယ်၊ နေရင်ပေါတောတောနဲ့ ရုပ်ကလဲဂျပန်ရုပ်တရုပ်ထဲပဲ၊ စိတ်ညစ်စရာရှိရင်တော့တယောက်ထဲပဲအမြဲဖြေရှင်းတတ်တယ်၊ သူများတွေကိုဒုက္ခမပေးချင်လို့တဲ့၊ ခုနောက်ပိုင်းမှ သူအိမ်ကိုလွမ်းတဲ့အကြောင်းနဲ့ ထုတ်လုပ်ရေးရောက်သွားတဲ့အကြောင်းပြောပြတာ” လို့ သူငယ်ချင်း ဖြစ်သူက ပြောပါတယ်။

လက်ရှိ Southern Shan PDF တပ်ရင်း ၁၀၀၅မှာ တာဝန်ထမ်းဆောင်ရင်း လက်နက် မတော်တဆမှုကြောင့် ကရင်နီပြည်နယ် ဖရူဆိုမြို့ ‌ရှေ့တန်းမှာ ကျဆုံးခဲ့တာဖြစ်ပါတယ်။

ရဲဘော်ထင်လင်းဦးဟာ ပြည်မြို့မှာလည်း စစ်အာဏာရှင်ဆန့်ကျင်ရေးလှုပ်ရှားမှုတွေမှာ တက်တက်ကြွကြွပါဝင်ခဲ့သူတဦးဖြစ်ပြီး သင်္ကြန်ကာလအပြီးမှာ ပြည်ကပျောက်သွားခဲ့တာဖြစ်တယ်လို့ သိရပါတယ်။

ပဲခူး၊ ဇွန် ၁၁၊ ၂၀၂၂။

ပဲခူးတိုင်းအနောက်ခြမ်း၊ ပြည်မြို့မှာ စစ်ကောင်စီက ကျောင်းစောင့်ရာထူးအတွက် ဝန်ထမ်းခေါ်ခဲ့ပြီး လာလျှောက်သူကို စစ်ယူနီဖောင်းဝတ်စေပြီး ကျည်မပါတဲ့ သေနတ်ကိုင်ခိုင်းကာ လုံခြုံရေးတာဝန်ကို ပေးထားတယ်လို့ ဒေသခံတွေ ဆီကသိရပါတယ်။

တလ ၃သိန်းနဲ့ ကျောင်းစောင့်လုပ်ရမယ်ဆိုတဲ့ အချက်နဲ့ ဝန်ထမ်းခေါ်ခဲ့တာကြောင့် အလုပ်လျှောက်ခဲ့ပြီး အလုပ်ဝင်ဝင်ချင်းမှာပဲ ယူနီးဖောင်းဝတ်ခိုင်းပြီး ပြည်မြို့ အမှတ် ၅ ကျောင်း အလယ်ပေါက်မှာ လုံခြုံရေးဂိတ်စောင့် လုပ်နေရတာဖြစ်တယ်လို့ ဒေသခံတဦးက ပြောပါတယ်။

” အဲ့ဒီလို မလုပ်ပါရစေနဲ့ ပိုက်ဆံလည်း မပေးပါနဲ့တော့၊ တောင်းပန်ပြီး ထွက်ခွင့်တောင်းတာ မရဘူး၊ တလပြည့်အောင် လုပ်ရမယ် ရှေ့တန်းခေါ်ရင်လည်း လိုက်ရမယ်လို့ ပြောတယ်” လို့ ပြည်မြို့က ဒေသခံတဦးက ပြောပါတယ်။

ပြည်မြို့ အမှတ်၅ ကျောင်းရှေ့လမ်းကို စစ်ကောင်စီက ဖြတ်သန်းသွားလာခွင့်ပိတ်ထားတာဖြစ်ပေမယ့် ကျောင်းကြိုပို့ လုပ်နေတဲ့ မိဘတွေကတော့ အလယ်ပေါက်မှာ ယူနီဖောင်းနဲ့ စောင့်နေတာကို မြင်ရတယ်လို့ လည်း ပြောပါတယ်။

အဲ့ဒီလိုစောင့်နေတဲ့ ယူနီဖောင်းနဲ့ လုံခြုံရေးဝန်ထမ်းကို တွေ့တာ တပတ်ကျော်လောက်သာ ရှိသေးပြီး အရင်က အဲ့လိုစောင့်တာမျိုး မရှိဘူးလို့ နောက်ထပ် ‌ဒေသခံအမျိုးသမီးတဦးက ပြောပါတယ်။

” ဟုတ်တယ် စစ်ဝတ်စုံနဲ့ အဝမှာတွေ့တယ် တပတ်အတွင်းလောက်ပေါ့၊ အရင်ကဆို လမ်းထိပ်က ဂိတ်မှာပဲ တွေ့တာ”လို့ ပြောပါတယ်။

အဲ့ဒီလို ဝန်ထမ်း ဘယ်နှစ်ယောက်ရှိနေတယ်ဆိုတာနဲ့ အမှတ်၅ ကျောင်းအပြင် ပြည်မြို့က ဘယ်ကျောင်းတွေမှာ အခုလိုမျိုး ကျောင်းစောင့်ခေါပြီး လုံခြုံရေးတာဝန်ကို ပေးထားသေးလဲဆိုတာကိုတော့ မြေလတ်အသံအနေနဲ့ အတည်ပြုနိုင်ဖို့ စုံစမ်းနေဆဲဖြစ်ပါတယ်။

ပဲခူး၊ ဇွန် ၁၀၊ ၂၀၂၂။

ပဲခူးတိုင်းဒေသကြီး၊ ပြည်ခရိုင်ထဲက တောင်သူလယ်မားတွေဆီကနေ စိုက်ဘဏ်ချေးငွေတွေအပြင် ကိုဗစ်ချေးငွေတွေကို တရားစွဲမယ်လို့ ခြိမ်းခြောက် တောင်းနေလို့ အဆမတန်အတိုးပေးရတဲ့သူတွေဆီကနေ ငွေချေးငှားဆပ်နေ ရတယ်လို့ တောင်သူလယ်သမားတွေက ဆိုပါတယ်။

ချေးငွေကျန်များကို ဇွန်လ ၅ ရက်နေ့နောက်ဆုံးထား ပေးဆပ်ရန် နဲ့ ပေးဆပ်ရန်ပျက်ကွက်ပါက ဘဏ်၏တည်ဆဲ ဥပဒေအရလည်းကောင်း၊ မြေခွန်မပြေကျန်ငွေ ဖြစ်ဘိသကဲ့သို့လည်းကောင်း အရေးယူမည်ဆိုတာကို ချေးငွေကျန်တောင်သူလယ်သမားများဆီကို နို့တစ်စာပို့ အကြောင်းကြားနေတာဖြစ်ပါတယ်။

“ဆပ်ကြတဲ့သူတွေလည်းရှိပါတယ်။ မဆပ်နိုင်သူတွေလည်းများပါတယ်။ ကိုဗစ်ချေးငွေကအတိုးမရှိကြားထားတာ။ ခုကျတော့အဲ့ငွေလည်းအတိုးနဲ့ပါပဲ။ အတိုးတော့မများပါဘူး ဒါပေမယ့်စိုက်ဘဏ်တွေက ဒဏ်တိုးပါလာပါပြီ တောင်သူတွေကဘေးမှာအတိုးယူပြီး ပေးဆပ်နေကြရတာပါပဲ” လို့ ချေးငွေပေးဆပ်လိုက်ရတဲ့ လယ်သမားတဦးကပြောပါတယ်။

ယခုလာမည့် မိုးချေးငွေများအတွက် ယခင် ၂၀၂၀ ခုနှစ် မိုးချေးငွေများ(ဧကအလိုက်)နဲ့ ကိုဗစ်ချေးငွေ ၅ သိန်းကို ပြန်လည်ပေးဆပ်ခိုင်းနေခြင်းဖြစ်ပြီး ပေးဆပ်ရက်ကျော်လွန်သူများကို ဒဏ်ကြေးများပါ ဆောင်ခိုင်းနေခြင်းဖြစ်ကြောင်း တောင်သူလယ်သမားများကဆိုပါတယ်။

“တောင်သူတွေကတော့ အရစ်ကျပြန်တောင်းမှ အဆင်ပြေမယ်ထင်ပါတယ်။ ဥပမာ သိန်းသုံးဆယ်သမားကို တနှစ် ဆယ်သိန်းပြန်တောင်းတာမျိုး အဲ့လိုမျိုးမဟုတ်ရင်လည်း အတိုးငွေကိုပဲပြန်ကောက်တာဆို အဆင်ပြေနိုင်တာပေါ့ ချေးငွေဆိုတဲ့ စနစ်ကြီးမရှိရင်လည်း ကောင်းတာပါပဲ” လို့ လယ်သမားတဦးကပြောပါတယ်။

ချေးငွေအတင်းအဓမ္မပြန်တောင်းတာနဲ့ပတ်သက်ပြီး တောင်သူလယ်သမားအရေးဆောင်ရွက်နေတဲ့ တရားလွှတ်တော်ရှေ့နေတဦးက အဲဒီကိုဗစ်ချေးငွေများမှာ NLD အစိုးရလက်ထက်က ချေးထားခြင်းဖြစ်ပြီး လက်ရှိစစ်ကောင်စီမှာ တရားဝင်အစိုးရမဟုတ်တဲ့အတွက် ပေးဆပ်ရန် မလိုသော်လည်း တောင်သူများမှာ နီးရာဓါးကြောက်နေရလို့ ဆပ်နေရတာလို့ဆိုပါတယ်။

“တကယ်က ဆပ်စရာမလိုဘူး ဒါပေမယ့်သူတို့က မထင်ရင်မထင်သလိုလုပ်တာဆိုတော့ ဆပ်နေရကြရတာပေါ့။ နောက် ဘဏ်ချေးငွေဆိုတာလည်း တောင်းချင်ရင် တရားမမှုနဲ့သွားရတာမျိုး အမှုနိုင်ရင်တော့ တတ်နိုင်သလောက် ဘယ်လောက်ပဲဆပ်ဆိုတာမျိုးပေါ့ အဲလိုပဲတောင်းရတယ် အခုကမတရားသဖြင့်ခြိမ်းခြောက်တောင်းတဲ့သဘောပဲ” လို့ တရားလွှတ်တော်ရှေ့နေတဦးကဆိုပါတယ်။

တဘက်မှာလည်း ယခုမိုးစပါးစတင်စိုက်ပျိုးချိန်မှာ ဓါတ်မြေဩဇာဈေးကြီးမြင့်တာ ဒီဇယ်၊ဓါတ်ဆီဈေးကြီးမြင့်တာတွေကြောင့် အခက်ခဲအကျပ်တည်းနဲ့ ရင်ဆိုင်နေကြရပါတယ်။

ပဲခူး၊ မေ ၃၁၊ ၂၀၂၂။

ပဲခူးတိုင်းဒေသကြီးအနောက်ခြမ်း၊ ပြည်မြို့နယ်တွင် ယခုနှစ်မှ ကျောင်းပြန်အပ်သူများကို ဒဏ်ငွေများ ဆောင်ခိုင်းနေကြောင်း မြို့ခံကျောင်းသားမိဘများထံကသိရသည်။

စစ်ကောင်စီလက်အောက်ခံ ၂၀၂၂-၂၃ ပညာသင်နှစ်အတွက် ကျောင်းအပ်နှံရေးရက်များကို မေလ ၂၆ ရက်နေ့က စတင်ကာ ကျောင်းအပ်လက်ခံခဲ့ရာ ပြီးခဲ့သည့်နှစ် အာဏာသိမ်းပြီး ကျောင်းအပ်နှံရာတွင် အကြောင်းအမျိုးမျိုးကြောင့် ကျောင်းမတက်ဘဲ ယခုနှစ်မှ ကျောင်းပြန်အပ်သူများကို ပညာရေးဝန်ထမ်းများက စစ်မေးခြင်း၊ မကြားဝံ့မနာသာ စကားများ ပြောဆိုခြင်း ကျောင်းပြောင်းလက်မှတ် တောင်းခံရာတွင်လည်း ဒဏ်ငွေများကို ဆောင်ခိုင်းခြင်းတို့ လုပ်ဆောင်နေခြင်းဖြစ်သည်။

“ကလေးတွေကို အလယ်တန်းအဆင့်ပဲရှိတဲ့ကျောင်းကနေ အထက်တန်းအဆင့်ကျောင်းကိုပြောင်းဖို့ ကျောင်းပြောင်းလက်မှတ်တောင်းတာကို မနှစ်က ကျောင်းမအပ်လို့ဆိုပြီး ဒဏ်ငွေဆောင်ခိုင်းတယ်။ ဘဏ်ကိုလည်းသွားရတယ် သွင်းရတဲ့ငွေက မများပေမယ့် ဒဏ်ကြေးဆောင်ရတဲ့သူတွေ အများကြီးတွေ့တယ်။ သက်သက်မဲ့ ဒီနှစ်မှကျောင်းပြန်အပ်ရကောင်းလားဆိုပြီး နှိပ်ကွပ်တာ” ဟု ကျောင်းသားမိဘတဦးကပြောသည်။

ဒဏ်ငွေများကို ပညာရေးမှူးနှင့် ဘဏ်သို့သွားရောက်ပေးဆောင်ခဲ့ရပြီး ယခင်နှစ်ကထက် ကျောင်းလာအပ်နှံသူများပြားကြောင်း သိရသည်။

“ဒီနှစ်ကမနှစ်ကထက် ကျောင်းအပ်တဲ့သူများတယ်၊ ကျနော်လိုက်ကြည့်တာမှာ အတော်များများလာအပ်နေကြတယ်။ တချို့ကလည်း မလွန်ဆန်နိုင်တာတို့ မတတ်သာတဲ့အဆုံး အပ်ကြပုံရတယ်၊ ရပ်ကွက်တွေထဲမှာကလည်း တခြားကလေးတွေကကျောင်းအပ်ပြီး ကိုယ့်ကလေးက မအပ်ရင် ဘာလို့မအပ်တာလည်း ဆိုပြီး သတင်းပေးတွေက ရန်ရှာမှာလည်းစိုးရတယ်။” ဟု ကျောင်းဆရာဟောင်းတဦးကပြောသည်။

ပြည်မြို့နယ်တွင်း အထက(၁)၊ အထက(၄)၊ အထက(၅)၊ ပန်းဘဲတန်း အလက၊ ရွှေဟင်္သာတိုက်တန်း အလက၊ ရွှေတံခါး အလက။ ကန်ပေါ်ရိပ်သာ အလက၊ ကျောင်းများတွင် ကျောင်းအပ်နှံသူများပြားပြီး အထက(၂)၊ အလက(၂) ကျောင်းအပ်နှံသူနည်းပါးပြီး၊ အထက(၃) အရပ်ဘက်အပ်နှံသူနည်းကာ စစ်တပ်အသိုင်းအဝိုင်းက အပ်နှံသူများပြားခဲ့ကြောင်း စောင့်ကြည့်လေ့လာသူတဦး ထံကသိရသည်။