ဖမ်းဆီး

ပဲခူး၊ ဇူလိုင် ၁၂၊ ၂၀၂၂။

ပဲခူးတိုင်းဒေသကြီး(အနောက်ပိုင်း)၊ ပြည်မြို့နယ် တိုင်းဒေသကြီးလွှတ်တော်ကိုယ်စားလှယ် ဦးကျော်ဇေယျ ဖမ်းဆီးခံရပြီးနောက် ဒေသခံတချို့ကို ဆက်တိုက်ဆိုသလို ဖမ်းဆီးခံနေရတယ်လို့ မြို့ခံတွေကပြောပါတယ်။

ပြီးခဲ့တဲ့ ဇွန်လ ၉ ရက်နေ့က ရန်ကုန်မြို့မှာ ဦးကျော်ဇေယျအပါအဝင် ၄ ဦးဖမ်းဆီးခံခဲ့ရပြီး ပြည်မြို့ကို လွှဲပြောင်းပေးလိုက်တယ်ဆိုတဲ့ သတင်းတွေထွက်ပေါ်ခဲ့ပြီး ဘယ်နေရာမှာထိန်းသိမ်းထားတယ် ဆိုတာ တိကျစွာမပြောနိုင်သေးချိန်မှာပဲ သံသယရှိတဲ့ဒေသခံတချို့ကို စစ်ကောင်စီက လိုက်လံဖမ်းဆီးနေတာပါ။

“အဖမ်းခံနေရတာကတော့ ဆက်တိုက်ပဲ အရင် NLD ပြန်ကြားရေးလုပ်ခဲ့ဖူးသူလည်း အဖမ်းခံလိုက်ရတယ်။ နောက် မြို့ကနာမည်ကြီးစီးပွားရေးသမားတယောက်လည်း လာဖမ်းသွားတယ်။ ပြန်လွှတ်မလွှတ်တော့မသိဘူး နောက်ပြီး ပေါင်းတလည်နဲ့ ဝက်ထီးကန်မြို့တွေမှာလည်း ဖုန်းနဲ့လိုက်တိုက်စစ်ပြီး ရှာတယ်။ တချို့လည်း ရှောင်နေကြတယ်။ ကိုကျော်ဇေယျနဲ့ ဆက်စပ်မှုရှိတယ်မရှိဘူးကတော့ သေချာမပြောနိုင်ဘူး” လို့ မြို့ခံအမျိုးသားတဦးကပြောပါတယ်။

ပေါင်းတလည်မြို့က စစ်ကောင်စီခန့် ရပ်ကွက်အုပ်ချုပ်ရေးမှူးတဦး၊ ယခင် NLD ပါတီသတင်းနဲ့ပြန်ကြားရေးအဖွဲ့ဝင်တဦး၊ စီးပွားရေးလုပ်ငန်းရှင်တဦးနဲ့ အခြား ဖမ်းဆီးခံရသူ ၅ ဦးထက်မနည်းရှိတယ်လို့ မြို့ခံတွေက ဆိုပါတယ်။

အဲဒီလို ကိုကျော်ဇေယျအပါအဝင် ဖမ်းဆီးခံခဲ့ရသူတွေနဲ့ နောက်ဆက်တွဲ ဖမ်းဆီးခံရသူတွေကိုပါ စစ်ကောင်စီနဲ့ NUG၊ သက်ဆိုင်ရာအဖွဲ့အစည်းတွေက တရားဝင်သတင်းထုတ်ပြန်ခြင်းမရှိသေးတဲ့အပေါ် လူထုက စိုးရိမ်နေကြတယ်လို့ဆိုပါတယ်။

“ဘယ်မှာဖမ်းမိပြီး ဘယ်ကိုပို့တယ်ဆိုတာ ကျနော်တို့သိရသလောက်ကတော့ တိတိကျကျ ပြောနိုင်သူမရှိဘူး။ ထုတ်ပြန်တာလည်းမတွေ့ရတော့ မြို့ခံတွေနဲ့ ပတ်သက်စပ်ဆက်သူတွေက စိုးရိမ်တာပေါ့ဗျာ။ အဖမ်းခံနေရတဲ့သူတွေလည်း ရှိနေတော့။ ကျနော်ပြောချင်တာကတော့ ကိုယ့်အခြေအနေကိုယ်သိပေါ့ဗျာ။ စပ်ဆက်ပတ်သက်မှုကြီးကြီးရှိနေတယ်ဆိုရင်တော့ အဖမ်းမခံရခင် ရှောင်နေတာအကောင်းဆုံးပါပဲ။” လို့ မြို့ခံတဦးကပြောပါတယ်။

ဦးကျော်ဇေယျ ဟာ အမျိုးသားဒီမိုကရေစီအဖွဲ့ချုပ်ပါတီရဲ့ ပြည်မြို့နယ် တိုင်းဒေသကြီးလွှတ်တော်ကိုယ်စားလှယ်အဖြစ် ၂၀၁၅၊ ၂၀၂၀ ရွေးကောက်ပွဲများမှာ အနိုင်ရကိုယ်စားလှယ်ဖြစ်ခဲ့ပြီး စစ်အာဏာသိမ်းပြီးနောက်ပိုင်းမှာလည်း အာဏာရှင်ဆန့်ကျင်တော်လှန်ရေးတွေ ဆက်လက်လုပ်ဆောင်ခဲ့လို့ သူငှားရမ်းနေထိုင်ခဲ့တဲ့ အိမ်အပါအဝင် ပိုင်ဆိုင်မှုတွေကိုပါ ချိတ်ပိတ်သိမ်းဆည်းခံထားရသူဖြစ်ပါတယ်။

မြေလတ်အသံ၊ ဇွန် ၂၇၊ ၂၀၂၂။

ဇွန်လအတွင်း ရခိုင်ပြည်နယ်၊ စစ်တွေမြို့နှင့် ပုဏ္ဏားကျွန်းမြို့များမှ အပြစ်မဲ့အရပ်သား ၂၉ ဦးကို စစ်ကောင်စီက ဖမ်းဆီးထားသည်ဟု ရက္ခိုင့်တပ်တော် (AA)က ထုန်ပြန်လိုက်သည်။

ပြီးခဲ့သည့် ဇွန်လ ၂၃ ရက်နှင့် ၂၄ ရက်နေ့တို့တွင် စစ်တွေမြို့မှ စစ်ကောင်စီက ဖမ်းဆီးထားသည့် အပြစ်မဲ့အရပ်သား ၂၁ ဦးရှိပြီး၊ ၎င်းတို့ထဲတွင် အသက် ၁၈ နှစ်မပြည့်သေးသော လူငယ် ၃ ဦး ပါဝင်သည်ဟု ဇွန်လ ၂၅ ရက်နေ့တွင် AA က ထုတ်ပြန်ထားသည်။

အလားတူ ဇွန်လ ၁၆ ရက်နေ့မှ ဇွန်လ ၂၆ ရက်နေ့အထိ ၁၀ ရက်အတွင်း ပုဏ္ဏားကျွန်းမြို့မှ စစ်ကောင်စီက ဖမ်းဆီးထားသည့် အရပ်သား ၈ ဦးရှိပြီး ၎င်းတို့ထဲတွင် အသက် ၁၈ နှစ်မပြည့်သေးသော လူငယ် ၁ ဦးပါဝင်သည်ဟုလည်း AA က ဇွန်လ ၂၆ ရက်နေ့တွင် ထုတ်ပြန်ထားသည်။

စစ်တွေမှ ဖမ်းဆီးခံထားရသူမှာ ဦးလှထွန်းဝင်း၊ ဦးခင်မောင်စော၊ ဦးဘသိန်း၊ ညီညီထွန်း၊ ဦးမြင့်စိုး၊ မောင်မောင်ခင်၊ ဒီမာမောက်၊ အောင်အောင်၊ မာမောက်ရှာ၊ မောင်ကျော်လှ၊ ညီညီ၊ စံမောင်၊ မောင်ဟန်စိုး၊ ကျော်သန်းအေး၊ အောင်ဇာ်လင်း၊ ကျော်အေးလှိုင်၊ စိုးနိုင်ဝင်း၊ မောင်စံဦး၊ မောင်ဖြူ၊ မောင်လုံးချေ၊ မောင်သန်းထွန်းတို့ဖြစ်ကြောင်း သိရသည်။

ယင်းအပြင် ပုဏ္ဏားကျွန်းမှ ဖမ်းဆီးခံထားရသူများမှာ ကျော်မင်း၊ ဝင်းမောင်သန်း၊ ထွန်းလှိုင်၊ ဦးဘလှိုင်၊ မျိုးသွင်၊ မြတ်သူထွန်း၊ နိုင်မျိုးထွန်း၊ မင်းအောင်ခိုင်တို့ဖြစ်ကြသည်။

ယင်းအပြင် ကျောက်တော်နှင့် မြောက်ဦးမြို့တို့တွင်လည်း စစ်ကောင်စီကဖမ်းဆီးထားသည့် မပြစ်မဲ့အရပ်သား အနည်ဆုံး ၂၀ ကျော်ရှိသည်ဟုလည်း ဒေသခံများ၏ပြောဆိုချက်အရသိရသည်။ယင်းအရေအတွက်ကိုမူ ရက္ခိုင့်တပ်တော် (AA)က ထုတ်ပြန်ထားခြင်းမရှိသေးပေ။

ယခုနှစ် ဇွန်လမှစ၍ ရခိုင်ပြည်နယ်ရှိ မြို့နယ် ၄ မြို့နယ်မှ ရက္ခိုင့်တပ်တော်(AA)က ဖမ်းစီးထားသည့် စစ်ကောင်စီတပ်ဖွဲ့ဝင်များနှင့် ရဲတပ်ဖွဲ့ဝင် အရေအတွက် စု၏စုစုပေါင်း ၁၈ ဦးအထိရှိပြီ ဖြစ်သည်။

ယင်းအပြင် ရက္ခိုင့်တပ်တော်(AA)ထံသို့လည်း ထွက်ပြေခိုလှုံလာသည့် စစ်ကောင်စီတပ်ဖွဲ့ဝင် အရေအတွက် ထောင်နှင့်ချီ၍ရှိသည်ဟု ဇွန်လ ၁၄ ရက်နေ့တွင် ပြုလုပ်ခဲ့သည့် သတင်းစာရှင်းလင်းပွဲ AA ၏ ပြောခွင့်ရသူ ခိုင်သုခက ပြောဆိုခဲ့သည်။

မြင်းမူ၊ ဇွန် ၈၊ ၂၀၂၂။

မြင်းမူမြို့နယ်၊ ကံဖျားရွာနှင့် ဂုံညှင်းဆိပ်ကျေးရွာများကို စစ်ကြောင်းထိုးလာသော စစ်ကောင်စီစစ်ကြောင်း က အရပ်သား ၇ ဦးကို သေနတ်နဲ့ပစ်သတ်သွားပြီး ဓါးစာခံ ၁၁ ဦးကိုလည်းဖမ်းဆီးသွားတယ်လို့ People’s Army to Fight Dictatorship(PAFD) အဖွဲ့ထံကသိရသည်။

ဇွန်လ ၅ ရက်နေ့က မိုင်းဆွဲတိုက်ခိုက်ခံလိုက်ရတဲ့ စစ်ကောင်စီတပ်တွေက ဖမ်းဆီးခေါ်သွားခြင်းဖြစ်ပြီး PAFD တပ်တွေဖွဲ့တွေ ဒရုန်းနဲ့ လိုက်လံကြည့်ရှုစဉ် ဓါးစာခံ ၁ ဦး ထွက်ပြေးလွတ်မြောက်ခဲ့ပြီး ဓါးနဲ့လှီးဖြတ်ခံရခြင်း၊ မျက်နှာတခုလုံးကို ရိုက်နှက်ထားခြင်းတို့ကို ခံခဲ့ရကြောင်း သိရသည်။

“ဓါးစာခံတွေဖမ်းခေါ်သွားတယ်၊ သူတို့ထွက်သွားပြီးလားဆိုပြီး ကျနော်တို့ကံပြားအထိအောင် ဒရုန်းနဲ့လိုက်ကြည့်တယ်၊ သူတို့ဖမ်းသွားတဲ့ ဓါးစာခံတယောက်ပြန်တွေ့တယ်၊ ပြန်ခေါ်လာတယ်၊ သူ့နားလည်းဓါးနဲ့ဖြတ်ထားတယ်၊မျက်နှာကြီးကပျားတုပ်ထားသလိုပဲ တအားရိုက်နှက်ထားတာ၊ သူကတော့အသက်ရှင်လျက်ပြန်လွတ်လာတယ်၊ ၁၁ ယောက်ကတော့ ဓါးစာခံအဖြစ်ခေါ်သွားတယ်၊ ရွာသူရွာသား ၇ ယောက်ကိုရှေ့ကပြေးခိုင်းပြီး သေနတ်နဲ့သတ်ကြတယ်၊” ဟု PAFD တာဝန်ခံက မြေလတ်အသံကိုပြောသည်။

ပစ်သတ်ခံရသူများမှာ အမျိုးတွေဖြစ်ပြီး ဖမ်းဆီးခေါ်ဆောင်သွားခြင်းခံရသူတွေလည်း အသက်ရှင်မရှင် သေချာမသိရသေးကြောင်း ဆိုသည်။

ဆုတ်ခွါသွားတဲ့ စစ်ကောင်စီစစ်ကြောင်း က ကျေးရွာနေအိမ်တွေနဲ့ ဆိုင်ကယ် အစီး ၁၀၀ လောက်ကိုလည်း မီးရှို့သွားကြကြောင်း PAFD အဖွဲ့ထံကသိရသည်။

မြေလတ်အသံ၊ မေ ၂၇၊ ၂၀၂၂။

ရခိုင်ပြည်နယ်၊ ကျောက်ဖြူမြို့၊ စေတီတောင်ရပ်ကွက်တွင်နေထိုင်သည့် ဒေသခံ ၂ ဦးမှာ ရက္ခိုင့်တပ်တော်(AA)ကို ရိက္ခာကောက်ပေးနေသည်ဟုဆိုကာ ယမန်နေ့ မေလ ၂၆ ရက်၊ ညနေ ၄ နာရီခန့်တွင် စစ်ကောင်စီက ဖမ်းဆီးသွားကြောင်း မိသားစုဝင်များထံမှသိရသည်။

ဖမ်းဆီးခံရသူများမှာ ဦးသန်းလှိုင်(၄၁ နှစ်)နှင့် ဒေါ်ခင်အုန်းနွဲ့ (၅၆နှစ်)တို့ဖြစ်ကြပြီး ၎င်းတို့ကို ရွှေဥထမင်းဆိုင်အနီးတွင် ကျောက်ဖြူအခြေစိုက် ခလရ(၃၄)တပ်ရင်းမှ စစ်ကောင်စီတပ်သားများ ကဖမ်းခေါ်သွားခြင်းဖြစ်ပြီး လက်ရှိတွင်၎င်းတို့ ၂ ဦးကို ရဲစခန်း၌ အမှုဖွင့်ထားသည်ဟု ဒေါ်ခင်အုန်းနွဲ့၏ ခင်ပွန်းဦးမြအောင်စံက ပြောသည်။

“သူတို့ကို နိုင်ငံတော်အကြည်ညိုပျက်စေမှုပုဒ်မ ၅၀(က)နဲ့ ကျောက်ဖြူမြို့မရဲစခန်းမှာ အမှုဖွင့်ထားပါတယ်။ ဒီနေ့တော့ သူတို့ကို စတင်စစ်ဆေးပါတယ်။ ပြီးတော့သူတို့ကို ကျောက်ဖြူအကျဉ်းထောင်ကို ပို့လိုက်ကြတယ်” ဟု သူကဆိုသည်။

ဖမ်းဆီးခံရသူ ဦးသန်းလှိုင်၏ ဇနီးဖြစ်သူဒေါ်ချိုချိုသိန်းက ၎င်း၏ခင်ပွန်းဖြစ်သူမှာ မိသားစုကို ဘေးတွဲဆိုင်ကယ်မောင်းကာ ရှာကျွေးနေသူဖြစ်ပြီး ရက္ခိုင့်တပ်တော် (AA)အတွက်ရိက္ခာကောက်ပေးနေသူမဟုတ်ကြောင်းနှင့် ယခုလိုဖမ်းဆီးခံထားရခြင်းကြောင်း မိသားစုစားဝတ်နေရေးအတွက် အခက်အခဲဖြစ်သွားရသည်ဟု ပြောသည်။

“ကျမအမျိုးသားက နိုင်ငံရေးအကြောင်းတွေ၊ နိုင်ငံရေးနဲ့ပတ်သက်တာတွေကို ဘာမှမလုပ်ပါဘူး။ တရက်လုပ်မှ တရက်စားနေရတဲ့အခြေအနေပါ။ ဒီလိုစွပ်စွဲပြီးတော့ ဖမ်းသွားတာတော့ အရမ်းဝမ်းနည်းရပါတယ်။ ဒီလိုမတရား မလုပ်သင့်ပါဘူး။ အမြန်ဆုံးပြန်လွှတ်ပေးစေချင်ပါတယ်” ဟု ဒေါ်ချိုချိုသိန်းက မြေလတ်အသံကို ပြောသည်။

ရခိုင်ပြည်နယ်တွင် လက်ရှိအချိန်၌ စစ်ကောင်စီက မြို့နယ်တချို့သို့ဝင်ရောက်ကာ ULA/AA အဖွဲ့များနှင့် ဆက်စပ်မှုရှိနေသူများကို ဖမ်းဆီးလိုက်လှံရှာဖွေနေမှုများ တရပ်စပ်လုပ်ဆောင်နေလျှက်ရှိသည်။

ယမန်နေ့ မေလ ၂၆ ရက်နေ့ကလည်း ရမ်းဗြဲမြို့နယ်၊ လေးတောင်မြို့ပေါ်ရှိ ULA တိုက်နယ်မှူးနေအိမ်နှင့် CSO အဖွဲ့အစည်းတွင်လုပ်ကိုင်နေသည့် ကိုမောင်မောင်ကြီးနေအိမ်တို့ကို စစ်ကောင်စီက အင်အားအလုံးအရင်းဖြင့် ဝင်ရောက်စီးနင်းခဲ့သည်ဟု ဒေသများကပြောသည်။

ပဲခူး၊ မေ ၁၉၊ ၂၀၂၂။

ပဲခူးတိုင်း၊ အနောက်ခြမ်းပေါင်းတည်မြို့မှာ စစ်ကောင်စီက အမျိုးသားတဦးကို စစ်ဆေးစရာရှိလို့ ဖမ်းဆီးသွားခဲ့ပြီး ၂၄နာရီမပြည့်ခင်မှာပဲ သေဆုံးသွားတယ်လို့ မိသားစုဝင်တွေကို အကြောင်းကြားလာခဲ့ပါတယ်။

အသက် ၃၈နှစ်အရွယ် ကိုမင်းမင်းဟာ ပေါင်းတည်မြို့နယ် ကြို့ပင်အုပ်စု ဟင်္သာကန်ကျေးရွာမှာ နေထိုင်သူဖြစ်ပြီး NLD ပါတီဝင်တဦးဖြစ်ကာ မေလ ၁၈ရက် မနေ့က နေ့လယ်ပိုင်းမှာ စစ်တပ်က ဖမ်းဆီးပြီး စစ်ကြောရေးမှာ သေဆုံးခဲ့တာဖြစ်တယ်လို့ ဒေသခံတဦးက ပြောပါတယ်။

“ကိုမင်းမင်း ဖုန်းကို စစ်တယ် ဖုန်းထဲမှာ ဘာမှ မတွေ့ဘူး မတွေ့တော့ လူကိုစစ်မယ် ဆိုပြီးခေါ်သွားတာ ညက ၈နာရီလောက်အထိ အကောင်း ခုမနက်မှ သေပြီလို့ သိရတာ”လို့ သူနဲ့နီးစပ်သူတဦးက ပြောပါတယ်။

ဖမ်းဆီးခံရစဥ်က ကိုမင်းမင်းဟာ ကျန်းမာရေးကောင်းမွန်ပြီး စစ်ကောင်စီကတော့ ပန်ကာလေအအေးမိကာ သေဆုံးတာလို့ သတင်းလွှင့်ထားပြီး ဒေသခံတွေကတော့ မေလ ၁၅ ရက်နေ့က ကိုမင်းမင်းရဲ့ ကွမ်းယာဆိုင်ရဲ့တောင်ဖက် နှစ်ဖာလုံခန့်အကွာမှာ မိုင်းခွဲခံရလို့ ရဲတဦး ပြင်းထန်ဒဏ်ရာ ရခဲ့တာနဲ့ ပတ်သက်ပြီး လက်စားချေ သတ်ဖြတ်ခံရတာလို့ ဆိုပါတယ်။

ကိုမင်းမင်းဟာ ရပ်ရွာအတွင်းမှာ ပရဟိတဆောင်ရွက်သူတဦးလည်း ဖြစ်ပြီး ဇနီးဖြစ်သူနဲ့အတူ သမီးတယောက်နဲ့ သားတယောက်ကျန်ရစ်ခဲ့ပါတယ်။

အာဏာသိမ်း စစ်တပ်ဟာ ပြီးခဲ့တဲ့ မေလ ၁၇ ရက်နေ့ ဟင်္သာကန်ရပ်ကွက်က ကြံ့ခိုင်ရေးထောက်ခံသူ မိသားတစုနဲ့ အခြားမိသားတစုကို ဖမ်းဆီးကာ ပိုက်ဆံတောင်းပြီး ညအချိန်ရောက်မှ ပြန်လွှတ်ပေးခဲ့တယ်လို့လည်း သိရပါတယ်။

ပဲခူး၊ မေ ၈၊ ၂၀၂၂။

ပဲခူးတိုင်းဒေသကြီး၊ ပြည်ခရိုင် ကျောင်းသားသမဂ္ဂဥက္ကဌဟောင်းကိုစိုးမြတ်မင်း ကို ဖမ်းဆီးပြီးနောက် ဇနီးဖြစ်သူနှင့် ၂ နှစ်အရွယ်သားကိုပါ ယနေ့ မေလ ၈ ရက်နေ့ နေ့လည်မှာ ဖမ်းဆီးသွားတယ်လို့ သူတို့နဲ့ ရင်းနှီးသူ မိတ်ဆွေတွေထံကသိရပါတယ်။

ယနေ့နေ့လည် ၂ နာရီခန့်က ပြည်ခရိုင်၊ ရွှေတောင်မြို့ နယ်ထဲက ကျေးရွာတခုမှာ ဝင်ရောက်ဖမ်းဆီးသွားတာဖြစ်ပြီး ဘယ်ကိုခေါ်ဆောင်သွားတယ်မသိရသေးဘူးလို့ ဆိုပါတယ်။

“စိုးမြတ်မင်းကို ဖမ်းသွားတုန်းက ဖမ်းတယ်မဖမ်းဘူးဆိုတာက နှစ်ရက်လောက်ထိမသေချာဖြစ်နေတာ။ ဒီနေ့တော့ သူ့မိန်းမနဲ့ ကလေးကို မိဘတွေရွာမှာ လာဖမ်းသွားတယ်ဆိုတာ သိရတယ်။ စိုးမြတ်မင်းကိုလည်း ဘယ်မှာထားတယ်ဆိုတာ မသိရသေးဘူး” လို့ သူတို့မိတ်ဆွေတဦးကပြောပါတယ်။

ကိုစိုးမြတ်မင်းကို ပြီးခဲ့တဲ့ မေလ ၃ ရက်နေ့က ပြည်မြို့ စားသောက်ဆိုင်တဆိုင်မှာ ထိုင်နေစဉ် ဝင်ဖမ်းသွားတယ်လို့ သတင်းများထွက်ပေါ်ခဲ့သော်လည်း ထိုစဉ်က ဖမ်းဆီးခံရသူမှာ ကိုစိုးမြတ်မင်း ဟုတ်မဟုတ် ကို အတည်ပြုနိုင်ခြင်းမရှိဘူးလို့လည်း ပြောဆိုကြပါတယ်။

ကိုစိုးမြတ်မင်းမှာ ယခင် ပြည်ခရိုင် ကျောင်းသားသမဂ္ဂဥက္ကဌ တာဝန်ကိုထမ်းဆောင်ခဲ့ဖူးပြီး နွေဦးတော်လှန်ရေးတွင် ဆန္ဒဖော်ထုတ်ခဲ့တာကြောင့် ပုဒ်မ ၅၀၅-က ဖြင့်အမှုဖွင့်ကာ ဖမ်းဝရမ်းထုတ်ခံထားရသူလည်းဖြစ်ပါတယ်။

မြေလတ်အသံ၊ မေ ၁၊ ၂၀၂၂။

မတရားအသင်း ဆက်သွယ်မှုအက်ဥပဒေပုဒ်မ ၁၇(၁)၊ နိုင်ငံတော်အကြည်အညိုပျက်စေမှု ပုဒ်မ ၅၀၅(ခ)တို့ဖြင့် တရားစွဲခံထားရသည့် ရခိုင်ပြည်နယ် ဝန်ကြီးချုပ်ဦးညီပု၏ သမီးဖြစ်သူ NLD ဗဟိုတာဝန်ခံ မမိုးဆန်းစုကြည်နှင့် မိသားစုအဆက်အသွယ်မရသည်မှာ ၂ လကျော်ရှိနေပြီဖြစ်ကြောင်း မိသားစုဝင်များထံမှ သိရသည်။

မမိုးဆန်းစုကြည်မှာ ပြီးခဲ့သည့် ၂၀၂၁ ခုနှစ် မေလ ၈ ရက်နေ့တွင် ရန်ကုန်မြို့၌ ဖမ်းဆီးခံလိုက်ရခြင်းဖြစ်ပြီး အင်းစိန်အကျဉ်းထောင်၌ ချုပ်နှောင်ခံ ထားရသူဖြစ်သည်။

လက်ရှိတွင် မမိုးဆန်းစုကြည်ကို သာယာဝတီအကျဉ်းထောင်သို့ရွေ့သွားပြီဟု သတင်းကြားရ သော်လည်း သူမနှင့် အဆက်အသွယ်လုံးဝမရသေးဟု အစ်မဖြစ်သူ မကြည်ကြည်ဦးက ပြောသည်။

“ညီမရဲ့ အမှုအခြေအနေလည်း မပြောတတ်တော့ဘူး။ ရုံးချိန်းလည်း မသိဘူး။ လောလောဆယ် အဆက်အသွယ် ပြတ်နေပါတယ်။ ရှေ့နေကလည်း သူနဲ့မတွေ့ရဘူး။ မိသားစုတွေက အရမ်းတွေ့ချင်တာပေါ့။ အခုလေ သူမကို သာယာဝတီကို ရွေ့တယ်လို့သတင်းရတယ်။ အခုချိန်ထိ အဆက်အသွယ်မရသေးဘူး။ သူမနဲ့ပတ်သက်လို့ စိတ်မကောင်းရုံကလွဲလို့ ဘာမှမပြောချင်တော့ဘူး”ဟု မကြည်ကြည်ဦးက ပြောသည်။

ဖမ်းဆီးခံရစဉ်က မမိုးဆန်းစုကြည်မှာ ပုဒ်မ ၅၀၅(ခ) အမှုတခုတည်းဖြင့်တရားစွဲခံရခြင်းဖြစ် သော်လည်း ၂၀၂၂ ခုနှစ် မတ်လ ၈ ရက်နေ့တွင် ပုဒ်မ ၁၇(၁) ဖြင့် ထပ်တိုးတရားစွဲခံလိုက်ရခြင်းဖြစ် သည်။

ထပ်တိုးတရားစွဲလိုက်သည့် ပုဒ်မ ၁၇(၁)သည် ထောင်ဒဏ် ၂ နှစ် သို့မဟုတ် ၃ နှစ်ထက်မပိုသော ပြစ်ဒဏ်ချမှတ်နိုင်သလို ငွေဒဏ်လည်း ချမှတ်နိုင်သည်ဟု ဥပဒေ၌ပြဌာန်းထားသည်။

မမိုးဆန်းစုကြည်မှာ ရခိုင်ပြည်နယ်ဝန်ကြီးချုပ် ဦးညီပု၏ သမီးဖြစ်ပြီး၊ လက်ရှိတွင် ဦးညီပုမှာလည်း ၅၀၅(ခ)၊ ပုဒ်မ ၅၁ တို့ဖြင့် စစ်တွေအကျဉ်းထောင်မှာ ထောင်ဒဏ် ၁၁ နှစ်ကျခံနေရသည်။

စစ်တပ်မှအာဏာသိမ်းပြီးနောက် ရခိုင်ပြည်နယ်မှ အမျိုးသားဒီမိုကရေစီအဖွဲ့ချုပ် (NLD) ပါတီဝင်များဖြစ်ကြသည့် ဦးညီပု၊ ဦးမင်းအောင်နှင့် ဦးစိုးလေးအပါအဝင် ၄ ဦးတို့မှာ ဖမ်းဆီးတရားစွဲ ခံထားကြရသည်။

ပဲခူး၊ ဧပြီ ၂၄၊ ၂၀၂၂။

ပဲခူးတိုင်း၊ ပြည်မြို့ မှာ စစ်ကောင်စီက နိုင်ငံရေးတက်ကြွလှုပ်ရှားသူ အမျိုးသားတဦးကို မနက်တကြိမ်ဖမ်းကာ ပြန်လွှတ်ပေးခဲ့ပြီး ညပိုင်းမှာ ထပ်ပြီးဖမ်းဆီးသွားခဲ့ပါတယ်။

ဧပြီလ ၂၃ရက် မနေ့က မနက် ၁၀နာရီဝန်းကျင်မှာ တစ်ကြိမ်ဖမ်းဆီးခဲ့ပြီး ညနေ ၅နာရီမှာ လွှတ်ပေးခဲ့ပေမယ့် ည ၉နာရီခွဲမှာ ထပ်ပြီးလာဖမ်းသွားတယ်လို့ ဒေသခံတဦးက ပြောပါတယ်။

” မနက်ပိုင်းက ကျောင်းသားခေါင်းဆောင်တယောက်ဖုန်းဝင်လာပြီး၊ မေးစရာရှိလို့ဆိုပြီးဖမ်းသွားတာ၊ ညနေ ၅နာရီလောက်ပြန်ရောက်တယ်၊ ညက ကား၂စီးနဲ့ ထပ်ဖမ်းသွားတယ်” လို့ ပြောပါတယ်။

လက်ရှိဖမ်းခံလိုက်ရတဲ့ ပြည်မြို့က ကျော်ကျော်ဉာဏ်ဝင်း ဆိုသူဟာ ၅၀၅ က အမှုနဲ့ တရားစွဲဆိုခံရပြီးထောင်ကျနေရာက ပြီးခဲ့တဲ့ ၂၀၂၁ခုနှစ် အောက်တိုဘာလ ၁၈ရက်က ပြည်အကျည်းထောင်ကနေ ပြန်လွတ်မြောက်ထားသူတဦးလည်းဖြစ်ပါတယ်။